Hung khoh cheh di (Prof. Dr. Nehginpao Kipgen jong Second Wave in...

Hung khoh cheh di (Prof. Dr. Nehginpao Kipgen jong Second Wave in lata)

41
0
SHARE

Hung khoh cheh di
(Prof. Dr. Nehginpao Kipgen jong Second Wave in lata)

Tukum achesa April a pat beh school ho class jousea hung kihong di hitam tia mijousen kinepna ananei chu koi kihon malah akhoh cheh in akiban khagam kit tai. Tuchung covid second wave hi ningkum’a first wave a sang’in ahung gimnei cheh tan ichan ahinphah di ham sei hahsa ahi. Ningkum’a February a themkhat hung um chu ahung kithejal thim jouva March kichai dikon’a India pumpi Lockdown hung kikoi anahi. Lockdown kikoi vanga natna kithejalbe cheh cheh a September langa natna vei leh athi ana tampenna (peak) ahinphah a October a pat them khat hatna hung ol/kemsuh jepjep anahi. Tukum February lha gei chu India a covid case hi hetkham hitalou, nitin kiman chahna ho angai banga hung chesoh ahitai. Second wave hung lhung chu abul’a kon kivenna lampang khohsahna ana umleh tu dinmun geilou maithei ahi. Tu tadi a hi India sunglanga khopi hoa natna khohdan hi hospital ho lupna di umgam talou, oxygen leh ventilator jong kichaigam, doctor honjong akijen ho phate vejou talou ahi. Hiche jeh a nisehleh athi chap hep hum jenga Delhi a um North East mi ho lah a inam sunga kineppi leh mi het theitah Prof. Dr. Nehginpao Kipgen jong hiche covid second wave a kon sohcha lou loi lah a jaokha ahitai. Second wave gimnei jeh a Manipur a jong mipi hung lunglinglao saosaova Vaccine kikap nomlou hojong kikap dia hung kichutho ahitai.
Ningkum’a Lockdown jeh a mipi gentheina asan toh sum le pai holna leh inchen louchen ahum ahal’a ana umdoh jeh a govt nin tuchung second wave a hi ahithei chan’a India pumpi lockdown koiloudi ati ahi. Tuchan’a kichepi hi natna vei tamna mun hoa bou Containment Zone tia alutle apotle umlou di tit e ahin lockdown jat khat ahivanga mipi jouse asuhboilou ahi.  Ahin school chapang ho lekhasim le school kai vang nasa tah a asuhkhah cheh ahikit tai. Board exam hojong akivohai loi, akivochon loi, asuh asah umlou loi ahigam tai. India sung langa natna dinmun khoh behseh tah jeh a Army doctor le Nurse pension chesa hojong govt nin akou kit, govt service dang dang hoa medical doctor degree neiho hospital a doctor ho kithopi dia kisolgam ahitai. Doctor le Nurse hojong angollo loi um hitam hospital a kijen ho lou moh kapkap a thatdoh a ngohna muloi jong um ahitai.
ADC election bol louva kikoi thua kiboina jong hi govt nin abolnomlou jeh ahin tua May lha sunga election bolna di nikho le lha ho phondoh dia kinop tona ana um chu covid dinmun khohset cheh cheh jeh a govt hin kilepna phatah a ahinneidi ahitai. March leh April a India a State 5 a Assembly election ana kibol’a kon mipi kitit khomna ana dimsetna covid jong nasatah a hung kithejalbe ahi. Ahin election kibolna lou Delhi leh khopi dang hoa jong natna kithejaldan hi hoilai hileh mi tamtah kitit khomna phot hi natna kihopjalna ahidan het thei ahi. Hindu te Kumhei – Kumb Mela a mihem a-lakh a sim UP a kitit khomna umjeh a UP le Delhi a natna kihathejal ahi. Kisei ngaina aum’a jui dia kisei ho mijousen juileh natna veijat leh athijat hi suhnem hidi ahi. Mijouse vaccine kikapsoh kah a akisei ho juidi hijeng ahi.

SHARE
Previous article3th May, 2021 News
Next article4th May 2021 News
Editor at Eimi Times.