ENTERTAINMENT

ENTERTAINMENT

257
0
SHARE

Ariana Grande in Dalton Gomez toh kichen ding agot thu phongdoh

Los Angeles: Pop star Ariana Grande in Instagram a realtor Dalton Gomez toh kicheng dinga akigot lhon thu aseidoh in, chule Dalton in songmantam a kisem khutjem apeh avetsah in ahi.

Ariana leh Dalton hi kum khat nailam kilungset lhon ahitai. Ariana in Instagram a agom a lim li atahdoh in chule songmantam a kisem khutjem tilouva amani akilah khom lhonna lim adang thum jong atahdoh in, lim hohi tukum kipat til a kon akilah lhonna ho ahi.

Ariana thuphon anu Joan in akipapina thu aseiyin ahi. “Dalton Gomez eiho insunga liemna kaneiyin, kakipah e. Ariana leh Dalton kahin ngailu lhon lheh e”, tin anu Joan in aseiyin ahi. Showbiz a kon Ariana aloi agol hon jong Ariana leh Dalton kikhaokhi nasatah a akipapi uvin, kipa thuthot anei uvin ahi.

Reality TV star Kim Kardashian in kahin kipapi lheh lhon e, tin aseiyin chule model Hailey Bieber injong akipapina thu aseiyin ahi. Amani tilou adang dang injong kipathu athot lhonin ahi.

Xxxxxxxxxx

Karanvir Bohra leh Teejay Sidhu in chanu khat nei kit

Mumbai: Actor Karanvir Bohra leh ajinu Teejay Sidhu in cha numei khat anei kit lhon tan ahi. Vancouver, Canada gam a nao peng ahi in, Karanvir leh Teejay hin cha apengkop numei ni anei lhon sa ahitai.

“Numei khat kanei kit uvin, numei hileh pasal hileh ani a lamto dinga kigel lhahna kaneiyu ahitai. Pasal ana hileh Laxmi, Saraswati leh Ganesha hiding ahi in, numei ahijeh a Laxmi, Saraswati leh Parvati hiding ahitai. Vangpha kakisa lheh e”, tin Karanvir in aseiyin ahi.

Cha anei lhon masanga jong Karanvir in Instagram a hospital alut lhon thu aseiya, numei hihen lang pasal hijong leh avangpha kahiding ahi, tia asei ahi. Canada gam a naosen apen masanga numei ahilouleh pasal ahi ki kihet masat thei ahi in ahivanga kahet masat nom lhonlou ahi, tia anasei ahi.

Hiche masanga Hindustan Times a Karanvir in pandemic sunga nao neiding tohgon ima kaneipoi, tia anasei ahi. “Hiche thu hi kana ja jing uvin, ‘lockdown baby’ hiding ahi. Ahin, nao neiding a kakigot lhon lou vanga ki kouna ahi. Teejay leh kei hi lhagao lam a kilhon tah kahi lhonin, itahsa a lhagao in ahung lut ding phat akilhen ahi tihi kani lhon a ka tahsan lhon ahi”, tia anasei ahi.

Xxxxxxxx

English katho theilou jeh a 5-star hotel a natoh kahol eina peh louvu ahi, tia actor Govinda in sei

Mumbai: Bollywood actor Govinda in film masapen hi 1986 kum a anatho pan ahi in, Govind Ajuha tia ana peng actor pa hi akipat til a ima ahilou vanga acting alut kum 15 jouva suhtang jou hoi hilou chule film lolhingtah tah aban ban a athodoh jom jing ahi.

Monday nikho hi King of Comedy tia kihe Govinda apen nikho ahi in, actor pa alolhinna hi hetman louva thip kit ahi. Monday nikho a actor pa kum 57 lhing ahi. Govinda hi actor insunga peng ahi in, apa Arun Ahuja hin film 40 nailam abol jouva industry a anatoh angah ahi. Anu Nirmala Devi hi classical singer leh actor hetthei umtah ahi.

Ahivanga Govinda hinkho hi kihambol na leh gentheina a kipan ahi. Apa natoh aboi masang chan a Mumbai a cheng uva, apa in film produce bol dinga akigel lhahna pen film alosap jouva Carter Road a a inmun u ajoh uva, Virar a kichon uva, hiche mun a Govinda peng ahi.

Simi Garewal toh akihoulimna a Govinda in phat sottah hahsatna ato thu chule insung kivahna dinga anu kihambol na thu aseiyin ahi. Kanu hin acha numei li jinei na dinga mopohna akilah ahi in, kapa hin alosap na athoh joulou ahi, ati. Commerce graduate hi a Govinda in office chom chom a natoh ding akihol thu aseiyin ahi.

Taj Mahal hotel a toh ding kakihol in, ahivanga English kahet loujeh a eilah louvu ahi. Amaho maiya sap pao katho theilou ahi, ati. Kanu in cha gup aneiya, numei li jinei sah nadinga kihambol a chule abol thei chan abol a hahsatna tamtah ato ho kavetlel ahi. A gentheina nikho gangtah a kakhel nom ahi, tin jong aseiyin ahi.

Anu leh apa in industry adalhah kum 33 nailam jouva Govinda industry a lut kit ahi in, kum 21 alhin a actor hi ahi. Producer thah thah um a, anu apa helou tamtah um ahitan, amaho kimupi nadinga nidan sottah tah kangah in, ahivanga kalung lha dehlou ahi, tin akipat til thu aseiyin ahi. Ahivanga, kum 22 alhin, 1986 kum a film masapen atho jouva film 50 tho dinga soi akai pai ahi. Govinda hin thusim atho ding ngailha louva ama career kipat til a film tho dinga soi ana kai ahi in, set alhun teng leh a line ho akivet ji ahi.

“Genthei na leh hahsatna tamtah kamu a kahet jeh a thil kalhen lou ahi in, natoh kamu e, tia kei leh kei henga kakisei ji ahi. Kanu in natoh nanei ahitan, Pathen tahsan inlang kitah tah a tong in tia eihilna kajui jing ahi”, tin aseibe in ahi. Sim joulou film hit tamtah atho doh jou 2000 khanga Khan ho industry a ahung machal jouva kon Govinda career hi nasatah a khesuh ahi. Achesa kum 15 sunga hi ahshi banga anavah a, ana lolhing ahi in, comedy leh social drama ani a lolhing tah actor anahi ahi.

Xxxxxxxxxx

Kareena Kapoor Khan in Pregnancy Bible kiti lekhabu ajih phongdoh

Mumbai: Kareena Kapoor Khan in achapa Taimur apen kum li alhin nikho a Instagram a ama lekhabu jih phondohna aneiyin, Kareena Kapoor Khan’s Pregnancy Bible kiti lekhabu ajih thu aseiyin ahi.

Lekhabu hi minu hiding ho chule nao nei masanga kigot ding dan hetnom ho dinga phachom hiding ahi. “Kareena Kapoor Khan’s Pregnancy Bible’ kiti minu hiding ho a dinga kajih lekhabu phondoh nadinga tuni hi nikho pha pen ahi. Naovop jeh a natna a kon neh leh chah pha chule fitness ho thu abon a kasei ahi in, nasim kal u ka ngah lel e”, tin Kareena in Instagram a aseiyin ahi.

Kareena Kapoor Khan’s Pregnancy Bible publisher in lekhabu a hi minu leh anatna ho chuleh naovop lel na a kon neh ding ho, exercise, damtheina ding chuleh nao pen nadinga actress nu in kigot ding dan ho abon a asei ding ahi, ati. Naovop sunga damthei ding, kipa ding leh umthim louding hi angaina ahi in, lekhabu hi eima in ihetnom ho hol nading ahi, tin aseibe in ahi.

Kareena leh ajipa Saif Ali Khan in cha anei vah kit lhon ding ahitan, tu leh tua hi chapa khat- Taimur anei lhon ahi. Saif Ali Khan injong author debut bol dinga kigotna anei ahi in, a lekhabu jih khovei teng kisodoh ding ahi.

Tu leh tua Kareena in radio show ‘What Women Want’ shooting abol lai ahi in, Aamir Khan toh Laal Singh Chaddha atho chule Karan Johar in abol Takht film release ding anga ahi.