8th May 2021 News

8th May 2021 News

87
0
SHARE

CM in Lamboikhongnangkhong a lupna 600 umna COVID Care Centre leh Hospital dang 2 vetlhahna nei

Imphal, May 7(ET): Chief Minister N. Biren Singh in tuni chun Manipur Trade and Expo Centre, Lamboikhongnangkhong, Imphal West a kisem doh COVID Care Centre vilna aneiyin, chuleh COVID Care Centre mun a kigotna leh pan tohgon kinei dan ho lahkhomna jong aneiyin ahi. Hiche Centre mun’a hi damlou ho lupna 600 koi hiding, chuleh jing nikho 8th May, 2021 apat a manchah pan hiding ahi

Vilna aneina a chun, Chief Minister chu Deputy Speaker Kongkham Robindro, Advisor to Chief Minister (Health) Dr. Sapam Ranjan leh Principal Secretary V. Vumlunmang in ana kilhonpi in ahi.

Biren in Centre mun’a um Deputy Commissioner, Imphal West Th. Kirankumar leh Health Department Official hotoh jong kihoulim khom na ana neiyin, Centre mun a tohgon kinei holeh pan kilah dan thu aseikhom uvin ahi. Chuleh thenna lam phatah a chepi ahina ding leh Centre mun a nen bulom ho ahithei chan a chomngim jing theina dinga Centre mun a Health Worker hojong kilhahkah a natoh mun peh ding ahithu jong aseikhom uvin ahi. Chuleh hiche Centre mun a um Doctor honjong hitobang natna hilen doudalna dinga panmun lentah leh tohding lentah aneiyu geldoh jing pum’a gunchu tah a na atohjing ding uvin jong temna aneiyin ahi.

Chuleh Centre akon in Chief Minster Team in Jail Road, Sajiwa, Imphal East a um Babina Speciality Hospital ana jon uvin, Hospital mun’a COVID natna neiho vetkolna  dinga’a kisem mun ho vilna jong ana neiyun, COVID Patient ho koina ding leh vetkolna ding a kigotna kinei ho chung’ah  aluilhai lheh in ahi. Hiche Hospital hin COVID natna nei mi 30 tobang vetkolna thei ding lupna akoiyin ahi.

Hiche jou chun, N. Biren Singh in Canchipur a athahbeh a kisemdoh Iland Hospital vilna jong ana neiyin, Hospital mun a thil-le-luo um ho vetlhahna jong ana neiyin ahi. Hiche Hospital jong COVID natna neiho vetkolna a kimangcha ding ahi.

Xxxxxxxxxxxxx

Manipur a COVID-19 Case 600 kimudohbe, nikhat a kimudoh tampen na hi, mi 2 in thina toh kit

Imphal, May 7(ET): Manipur a dinga nikhat sunga COVID-19 natna nei kimudoh tampen hita ding in tuni sehseh chun mi 600 COVID-19 natna nei mudohbe ahitoh kilhon in State sunga COVID-19 natna nei kimudoh jat agomin 34,333 alhit tan, chuleh mi 2 in thina atuobe kit toh kilhon in, thina toh agomin 449 alhingtan ahi tin State Health Department in aseiyin ahi.

Tunia COVID-19 natna nei kimudoh ho lah a  576 hi milham lah a kon’a kimudoh ahiuvin, chuleh mi 24 hi Central Armed Police Force (CAPF) Personnel ahiuve tin COVID-19 Common Control Room akon thusodoh chun atahlangin ahi.

Imphal West leh Imphal East akon natna nei kimudoh atampen ahijing nahlai toh kilhon in   COVID-19 Case 208 leh 166 akimudoh in, 40 hi Thoubal akon ahiuvin, 34 hi Churachanpur, 33 hi Bishnupur, 22 hi Ukhrul, 19 hi Tamenglong, 18 hi Kakching, 17 hi Senapati, 7 hi Chandel, 6 hi Noney, 3 hi Kangpokpi, 2 hi Kamjong leh khat hi Tengoupal akon ahi. Adangse hi CAPF Personnel ho ahiuve tinjong thusodoh chun atahlangin ahi.

Kakching akon pasal kum 47 khat leh Imphal East akon numei kum 65 khat in JNIMS Hospital a thina ana tuo lhon toh kilhon in tuni chan a COVID-19 jeh a thina toh agomin 449 alhing tan ahi.

Chuleh, tuni chan a COVID-19 Active Case umjat 3,506 aphatan, State Recovery Rate 88.48 Percent ahitai. Chuleh tuni chan a natna a kon a damdohna nei agomin 30,378 alhing tai tinjong thusodoh chun atahlangin ahi.

Thusodoh in aseibe na a chun, State sunga hinjon vanleng a May 3, 2021 nikho a Air India flight AI-3713 touna jon 12-18 a hung toukha jousen Common Covid Control Room No. 18003453818 ahilou leh ama ana District Surveillance Officers (DSO) ho akinthei pen a akimupi diuvin jong hetsahna aneiyin ahi.

Alangkhat ah, tuni chun D Type Oxygen Cylinders 762 leh B Type Oxygen Cylinders 192 chu State sunga um Health Institution leh Health Facility chom chom a manchah thei dingin ana kikholkhom in ahi.

Thulhut nunungpen kimu dungjuiyin, tuni chan a State sunga COVID-19 Vaccine kikapdoh agomin 2,51,099 alhingtan ahi.

Xxxxxxxxxxxx

May 17 chan a ding’a District 7 a curfew kikoi

Imphal, May 7(ET): Manipur a nikhat a ding’a Case tamna pen ahung umdoh toh lhon in Govt in state sung district 7 ho a Curfew akoi tan ahi.  Achesa nidan 24 sunga case thah 600 kimudoh ahi.

Hitobang tah a case punbe jing na chu district dang ho a achal nalouding a case tamna pen district ho a kigahna phondoh a ana um ahi.

Curfew umnading district ho chu Imphal West, Imphal East, Bishnupur, Thoubal, Kakching, Churachandpur le Ukhrul distrtict ahi.  Hiche curfew chu jing (May 8) apat  May 17, 2021 chan hiding ahi.

Thuso kimu dungjui a curfew sung a phal hiding ho chu pharmacy ho kihong theiding, kijen na mun Hospital le Clinic jouse, Covid vaccine kikap ding a cheho chuleh dammo na kivetsah naho, Thuso miho, power, fire service, PHED, CAFPD, HOME, Health, Relief & DM, Police dept le district administration ho, nitin hinkho manchah ding thil le lo poho, Oxygen poho, LPG chule thao poho, mitin manchah ding a twi poho, thao khuh ho kihong jingding, gas ho jong angai bang kihom thei ding, Imphal airport jong kihongding ahi akiti. District dang ho a achesa May  6 thupeh chu kikhel louva chelha jingding  dan jui lou ho gotna peh hijing ding ahi.

XXXXXXXXXXXX

CM in Video Conference akon a COVID dinmun velvetna nei;  DC hon ama mopohna sung’a Curfew achepi diuva thuhilna nei

Imphal, May 7, 2021 (DIPR): State sunga thakhat tah a COVID-19 natna hung punbe jingtoh kilhon in Chief Minister N Biren Singh in State sunga COVID-19 dinmun toh kisaiyin tuni chun District chom chom a DC, SP, CMO,  RIMS, JNIMS leh COVID Care Centre ho a Doctor hotoh Video Conference mangcha in kihoukhomna leh velvetna ana neiyin ahi.

Hiche Video Conference a chun, Chief Minister in nikho phabep sunga natna nei kibelap jing leh dammo na kibelap jing thu a a gelkhohna thu jong aseiyin, chuleh District Administration honjong mipi hinkho hundoh thei nadinga COVID-19 natna ahithei chan a suhlhom ahina din jong temna aneiyin ahi.

Hiche na ding a hin Chief Minister in Deputy Commissioner jouse heng’a ama ama thaneina sung jouse a Curfew hatah a chepi dingin jong hetsahna aneiyin ahi. Chuleh niseh a thupeh ho toh molso ahina dinga gari leh mihem a kithopi ding alahbe thei diuvin jong phalpehna ape’n ahi. Hitoh kisai a thupeh State Government in ahin sodoh baiding ahitai tinjong aseiyin ahi.

Biren Singh in aseibe na a chun, Government in Medical Personnel COVID-19 Duty nikho 100 lhing a natong jouse jong Government in Recruitment kibolna a hetpehna kinei ding ahi tinjong aseiyin ahi. Chukit leh, gunchu tah a pang Hospital holeh Covid Care Centre hojong atumbeh a kipapina kipe ding ahi tinjong aseiyin ahi.

Chief Minister in Hospital mun a mipi vetkol dinga um ho jong ahithei channa hahsatna atuo jingu suhlhom ahithei nadinga mopohna neihon ahithei chan a vetkol ahi tei nadiuva pan alah diuvin jong hetsahna aneiyin ahi. Chuleh Doctor honjong COVID Ward a um ho lunglhai natei dinga vetkol na anei diuvin jong temna aneiyin ahi.

PHE Minister L. Dikho, Forest leh Environment Minister Awangbow Newmai, Hill Areas Committee Chairman K. Leishiyo, Advisor to CM (Health) Dr. S. Ranjan, DGP L.M. Khaute, Additional Chief Secretary M.H. Khan Official dang dang honjong Video Conference a chun pan ana lauvin ahi.

Xxxxxxxxx

KIM, KSO, TI leh CM in Rev. Dr. Hawlngam Haokip lunghempina phong

Imphal/Kpi, May 7(ET): Kuki Inpi Manipur leh Kuki Students Organisation (KSO) General Headquarters Thadou Inpi leh Chief Minister N Biren in Rev. Dr. Hawlngam Haokip mollemna chunga lunghempina thu ana phongdoh uvin ahi.

Christian ho lah’a lamkai ja-umtah Rev. Dr. Hawlngam Haokip hi Kuki community lah bouseh hilouvin state sunga Christian community pumpi a dinga lamkai lenpenloi khat ahi. Amahi Kuki Baptist Convention a general secretary panmun kum tamtah ana tuh in, atohmun akon akichol achun Emeritus General Secretary tin KBC in ana minvo uvin ahi, tin Kuki Innpi leh KSO-GHQ in lunghempina thuso abolnau achun anasei uvin ahi.

Amahi atohna ngailutah lamkai, lhagao lama mipiho khantouna dinga pan nasaatah’a analah jing ahi. Chuleh atohmuna kon akichol nungin, Bethel Taona Mol ana phutdoh in, hiche mol chu mihon taona mun, lhagao kidodohna mun, chuleh chamna leh lungmona holna mun in anei uvin ahi.

Aman eimollem san uhin lhagaova eipuihoi diuleh eilamkai diu khat eilhahsam sah uvin ahi, tin aseibe uvin ahi. Christianity kithejalna leh state sunga chamna, kingailutna, chuleh kilungkhatna umna dinga apanlahna ho hi a-imatih chana kisumil louding ahi, tin Kuki Inpi leh KSO thuso chun aseibei.

Thadou Inpi-General Headquarters in Nam sung’a ding’a it-umtah Dr. Nehginpao Kipgen, Political Scientist in Covid-19 jeh’a May 2, 2021 a AIIMS New Delhi a eina dalhah u kisumil loulai a Janni nikho a Rev. Dr. Hawlngam Haokip, Theological Scientist in JNIMS a eidalhah kit’u hi thomhou akisalheh jengin ahi.

Thadou Nam sunga dinga mipa mantam tah nin ginchat phah louva eidalhah jengu hi man na lentah ahitan, amani dinmun hi ahuhbit ding umlouva a-ong’a umding ahintan ahi. Hijeng jong leh Pathen thilgon ahitah jeh in eiho leimihem bolthei ahitah lou jeh in, lungmong’a alha pa komma choldo dingin i-lha’uvin ahin. In-sung mite lunghem na jong eilung hem-pi cheh uve ati.

Manipur State Chief Minister N. Biren Singh injong Rev. Dr.  Hawlngam Haokip lunghempina thuso ana neiyin ahi. Rev. Dr.  Hawlngam Haokip hi state sung leh agamsunga vaihomho khankho ding gelna a anatao jing ahin, Christian hou lamkai khat hina a apanlahna hohi akhang akhanga kisumil louding ahi, tin ana seiyin ahi. Chuleh adalhah insung mite lunghemna chunga alunghem huna aphongin ahi.

Xxxxxxxxxxxx

Kpi a Total Lockdown ana kipan ta, COVID-19 doudalna dinga Ventilator manchah thei khatbou um

Kangpokpi, May 7(UNA): Tuni nikho a kipat Kangpokpi khopi sunga tolsung kiloikhomna chom chom a kon a natna hilen COVID-19 natna kithejal suhtang ahina dia khopi sung Lockdown phondoh ahitoh kilhon in, khopi sung juthip vathip in ana thip in, kailhang mun jouse jong Pharmacy ho, Clinic holeh Hospital ho tailou ana kikhahsoh keiyin ahi. Gari lhai le jouse jong Government Official, Doctor ho leh Emergency ho tilou khatcha ana lhai pouvin ahi. Alou thrilouva hung potdoh mi phabep tilou adang muthei aumpon ahi.

Official tah a khopi sung dinmun kija dungjuiyin, tuni chun Positive Case khat mudoh in ana um in, hitoh kilhon chun Active Case um jat 61 alhingtan, chuleh mi 4 in damdohna ana neiyun, chuleh thina toh khat tuchan a Official tah a phondoh hinailou khat panglouvin mi 19 ahijing nalaiyin ahi.

Kangpokpi sungah nikho phabep sung chun hatah in COVID-19 natna nei leh thina toh ana kimudoh jingin, hinla, vangset umtah in Ventilator 2 um lah a khat aki semchai nailou  toh kilhon in khatbou manchah theiya um ahidan thulhut akimu in ahi.

Thulhut kimu dungjui chun kum masa chun Ventilator 2 ana kicho in, hinla khat chu a thil-le-luo alhin lou jeh in tuni chan in manchah theiyin aum pon ahi.

Tu le tua Ventilator khat bou manchah theiya umtoh Kangpokpi in natna tijat umtah COVID-19 akimaitopi dingin aum tan ahi.

Review Meeting kinei masat pen na a chun tolsung MLA leh 50-Kangpokpi AC Assembly Segment COVID Awareness cum Enforcement Committee a Chairperson Nemcha Kipgen in Medical Department ho heng’ah alhompen a Oxygen Cylinder 50 leh Purse Oximeter 100 tobang ahin ngaito peh diyvin ngehna ana neiyin ahi

Hinla, Medical Department in Director Health Services, Govt.of Manipur heng’ah B-Type Cylinder 25 leh  D-type cylinder 8 peh dingin ngehna ana pelut in ahi.

Hiche Review Meeting a chun Leikop a COVID Care Centre mun a lupna 20 toh Intensive Care Unit banga manchah dingin jong seilhahna aneiyun ahi. Hichema bang chun COVID Care Centre manchah ahipaiyin, hinla ICU tobang a kivetkol nathei ding semdoh ahi naipon ahi.

Chuleh hiche Meeting na a kiseilha banga Community Home Isolation Centre semdoh ding jong tuchan in semdoh leh manchah theiyin aum naipon ahi. Tule tuhin District sunga Isolation Facility chu District Hospital Kangpokpi a lupna 2 leh lupna 100 umna COVID Care Centre ah Oxygen Cylinder 18 bou toh aum tan ahi.

Vaigeitah thulhut kimu dungjuiyin, Kangpokpi Ward No.2 a kon numei kum 76 khat COVID-19 natna jeh in Kangpokpi Christian Hospital ah vetkol in aum in, anatna akhohset jeh in Kangpokpi Christian Hospital  akon a chondoh ding dinmun a um ahidan thulhut akimu in ahi. Thulhut kimu in aseina a chun a damlou nu Oxygen Level hi 70 Percent noiya um hidan in akiseiyin, hinla hiche thulhut kisut geiyin ichan dinmun a ding ham hetthei ahi naipon ahi.

xxxxxxxxxxx

Dum kiman

CCpur, May 7: CCP Police QRT Team holeh CCP PS NDO leh WPS in janlha (May 6) jankim nidan 11:30 vel achun Curfew chelhahna dinga duty apohlai uvin Churachandpur Police Station a checking abolnau akon Shikhar carton box 15 ana mandoh uvin ahi. Hiche thil kimandoh hochu agangthei penin ana hallha tauvin ahi.

XXXXXXXXX

Oxygen lhahsam laitah’a nurse hon Covid natna nei mi-2 huhdoh

CCpur, May 7(ET): Churachandpur District Hospital Covid ward a tuni nilhah lam nidan 6:30 vel achun Oxygen ana lhahsam in, hitobanga Oxygen lhahsam jeh’a boina aumlaitah in nurse hon stethoscope mangchan Covid natna nei mi-2 oxygen ana kikopsah uvin ahi.

Pha chomkhat jouvin oxygen supply ahung lhungin, thulhut kimu dungjuiyin hitobanga nurse ho lungthim kichep jeh’a Covid natna nei teni chu anigel lhona ahinkho lhon huhdoh’a anaum ahi.

Xxxxxxxx

CHIC in manbeiya home isolation facility gongding

Tamenglong, May 7(UNA): Asymptomatic Covid-19 case neiya, a-inn muna lupna, ehthahna, ho atuma aneilou jeh’a santhei dol tah’a home isolation kibol theilou ho a dinga ama ama Assembly Constituency hop sunga um Community Home Isolation Centres (CHIC) ho in manbeiya home isolation facility agonpeh ding ahi, tin Tamenglong Deputy Commissioner Armstrong Pame in hetsahna ana neiyin ahi.

Chuleh Health Department akon District Home Isolation Team hon home isolation a umho dinmun vetlhahna neina dinga CHIC ho vilna aneijing ding ahi, tinjong hetsahna aneina achun ana seiyin ahi.

Chubanin, Tamei a um Langmei High School, SDO/BDO Office Block- Tousem, chuleh Tamenglong district headquarter a um Indoor Stadium hohi CHIC a dinga kigong ahin, centre khat’a numei leh pasal agoma mi 50 umthei ding ahi, tinjong hetsahna aneibe in ahi.

Xxxxxxxxxx

Nagaland a COVID-19 positive case thah 309 kimudohbe

Kohima, May 7: Nagaland in Friday ni’a COVID-19 positive case thah 309 ana mube kittoh lhonin, tuchana state sunga case kimudoh jat agomin 15,580 ana lhingtan ahi, tin state Health Minister S Pangnyu Phom in ana seiyin ahi.

Hiche case thah ho lah’a 200 hi Dimapur akon kimudoh ahin’, 63 Kohima akon, 32 Mon akon, 9 Mokokchung akon, 3 Phek akon, chuleh 2 Zunheboto akon kmudoh ahi, tin  Phom in Twitter mangchan ana tahlangin ahi.

Case thah ho puma hin Nagaland a active case umjat 2,433 ana lhingtan ahi.

TAlangkhat’a, state sunga covid natna nei mi 112 ana damdoh toh lhonin tuni chana Nagaland gam sunga Covid natna akon damdoh jat agomin mi 12,540 ana lhingtan ahi. Chuleh tuni chana state sunga Covid natna toh kisaiya thina tohjat mi 112 ana lhingtan ahi.

xxxxxxxxxxx

KCP ho thupole “Lanthengminasi Eikhoi kitatdoh: Thingnoi kiloikhom jouse pankhom dinga sei

Imphal, May 7: Tuni chan a India thuneina noiya um Manipur Lenggam chamlhatna ding lungtup nei leh India Government to kidoutuo jing leh kiloikhomna KCP in gamsunga um thingnoimi kiloikhomna jouse thakhat a dinkhom phat ahitai tin lhangsapna aneiyun ahi. Hinla hiche thingoi kiloikhomna in thingnoimoi kiloikhomna jousen mijouse melma khat doukhom theilou ahidan jong aseiyun ahi. Tunia KCP te dinga anatoh jouseu phongdoh jinga pan kum kha sunga nivei seh a kisodoh lekha April lha a kisodoh (Vol XIV, issue No. 1)  “Lanthengminnarasi Eikhoi”- a a Editorial a thu kisun kimu dungjui chun, Kangleipak sunga thingnoi kiloikhomna jouse lungtup chu Kangleipak thaneina nunglah ding ti ahitoh kilhon a kithokhom angaiye tin ana seiyin ahi.

Kanglei thingnoimi jouse hin Kangleipak jalen’na nungmu nading’a India thuneina a kon a jalenna muna dinga galsat ngen ahi in, lungkhat tah a kithokhom hi lungtup molsona ding bou ahi tinjong aseiyin ahi. Hiche KCP te ngaidan seiphong na lekha kiso  chun aseina ah kilungkhat na umthei lou hi Marxist ho thujop deisah lou ho a kon ahi tinjognaseiyin ahi. Thingnoi kiloikhomna hon lungtup khatbou aki chepi theilou leh lungtup ahiding bangtah a kimolso jou lou ding ahi tinjong aseiyin ahi.

Xxxxxxxxxxx

PM Modi in Covid-19 dinmun toh kisaiya Manipur, Sikkim, Tripura CM ho ana kihoupi

New Delhi, May 7: Prime Minister Narendra Modi in tuni chun Manipur, Sikkim chuleh Tripura state ho a chief minister hotoh ama ama statesung cheh a COVID-19 dinmun toph kisaiyin kihouna ananeipi in ahi, tin government thulhut khat chun aseiyin ahi.

PM Modi in janni (Thursday) a chu Jammu & Kashmir leh Puducherry a lieutenant governor ho bana

Andhra Pradesh, Odisha, Jharkhand chuleh Telangana state ho’a chief minister hojong Covid dinmun toh kisaiya ana kihoupi ahi.

Hitia prime minister in chief minister ho akihoupi hi gamsunga Covid dinmun kimaitopi na dinga tohgon aneiho lah’a khat ahi. India gamsunga tuni chana Covid-19 case kimudoh jat hi agoma 2,14,91,598 ana lhing ahitai, tia tunia Union Health Ministry thulhut chun anasei ahi. Chuleh hiche natna jeh’a thina toh jat jong mi 2,34,083 anaval ahitai.

xxxxxxxxxx

Modi hilouva Corona joh douding ahi: Harsh Vardhan in Hemant Soren koma thuthot nei

New Delhi, May 7: Modi in Mann ki Baat bou aboipi e tia Jharkhand Chief Minister Hemant Soren in tweet abolna ah Union Health Minister Harsh Vardhan in phone a akihouna lhon ah Jharkhand Chief Minister komah Modi dou louva Corona joh douding in ana seiyin ahi. Covid 19 natna toh kisaiya Centre leh State ho akithokhom u ngai ahi, losapna leh jolou naho selguh a PM Modi chunga lunghan na sodoh hi demthei ahi tin health minister chun aseiyin ahi.

Aman aseiben state government in asumbom hou akoiguh uvin chuleh Centre in thil jouse abol ding hi Hemant Soren in adeisah ahi tin jong aseiyin ahi. Coronavirus joh douding ahi, PM hilouva tin health minister chun aseiyin ahi.

Health Minister in PM Modi ki demna thua donbutna apeh na hiche hi amasapen ahitapoi, hiche masanga jong vaccine kihop dan thua State hon Centre ngohna anei nauva Health Minister in State government hojoh demna anapeh ahi.

Hemant Soren in tweet abolna toh kisaiya state danga Chief Minister leh political lamkai  hojong alunggel u akibang pon ahi. Hiche thua hin Andhra Pradesh Chief Minister YS Jagan Mohan Reddy in tuhi kingoh to phat ahipoi tin aseiyin ahi.

Tuhi kingoh to phat hilouva Corona douna dinga pan lahkhom phat joh ahi tin Jagat in tweet abolna ah chun aseiyin ahi.

Shiv Sena lamkai Priyanka Chaturvedi in jong Hemant Soren chunga lunghan na thu kiseiho hi hetkhel jeh hidin aseiyin ahi.

Thursday ni Jan a chu PM Modi in State sunga Covid 19 natna dinmun thua Hemant Soren to jong kihouna anei ahi. Hiche jouva hi Soren in tweet abolna a PM Modi in Mann ki Baat bou aboipi e tia anasei ahi.

Thil poimo tah tah ho thujoh ngai henlang seileh phajonte tin Chief Minister chun tweet abolna ah chun aseiyin ahi. Soren in CM ahina ajabol poi tin Assam a BJP lamkai Himanta Biswas Sarma in tweet abolna ah chun aseiyin ahi.

Assam Chief Minister Sarbananda Sonowal in Soren tweet bolna chu unfortunate ahi tin aseiyin ahi. Soren in PM Modi tohgon ho chungah politicise bolding ngaitona anei ahi atin ahi. PM Modi natoh leh atohgon hohi gamsung leh mipi ading ahi tin tweet ah aseiyin ahi. Jharkhand BJP lamkai Babulal Marani injong Soren in tweet abolna chungah demna aneiyin ahi.

XXXXXXXXXX

Government akona Expert hon Covid 19 natna 3rd Wave hin mun jouse atohkhah lou maithei ahi tia seiyu

New Delhi, May 7: Government a dinga Scientific Adviser K. Vijay Raghavan in Friday nichun Covid 19 natna 3rd wave hi gamsunga lhungthei ding ahi tia anasei chu hatah a kivenna auma ahileh mun jousea umlou ding ahi tin aseiyin ahi. Pandemic hin gamsung pumpi ah mun chom chom ah alhundan akibang poi ati. Hitobang a wave alhun theina chu population jeh jong ahi tin aseiyin ahi. Chuleh hiche chungah hin kivenna lampang hatah a boipi ahi a leh 3rd wave kisei jonghi mun jouse titah louva lhunglou thei ahi atin ahi. Hichea hin local a guidance kisem hon apoh ding ahi, hichea hin Covid Appropriate Behaviour leh local a lockdown chuleh adang dang kibol hoa kona jong avenbit ding ahi ati.

Guidelines ahin chuleh test kibol naho jong phatah a achelhah jinga ahileh asymptomatic transmission umho asuh tang theiding ahi tin aseiyin ahi.

Virus hin lut na ding aholmo phatleh natna jong kibe talou ding ahi. Chuleh mipi tamtah ho chu vaccine akikap uva social distancing ajui uva ahileh virus hin lampi aneitah louding ahi tin Scientific Adviser chun aseiyin ahi.

Virus hin lampi aneitah louva ahileh a natna jong kichai tina hideh lou ahi, phat lemchang amu a ahileh virus chun natna chu ahomson kit ding ahi ati. Hichea hin mipin Covid 19 natna abeitai tia ahet uva kivenna aumlou tengleh virus dinga phat kilemtah sohdoh thei ahi ati.

Hichea hin virus natna akona kivendoh theina dinga I khut uva kingam ahi, hetding khat chu asymptomatic neihon jong Covid natna chu apehdoh thei u ahi. Hiche jeh a chu social distancing dan juiding hi poimo ahi tin aseiyin ahi.

Hiche masanga chu aman gamsunga Covid 19 natna 3rd wave lhungthei ding ahi tia hetsahna anei ahi. Mi tamtah in virus natna douna dinga Immunity asembe vang uvin virus in natna thejah dingdan lampi dang anei kit tan ahi tia Raghavan in asei ahi.

Xxxxxxxxxxx

MGNREGS noi’a job card holder ho thaman kipedoh vah ding ahitai: Minister Th Biswajit

Imphal, May 7 (ET) : Rural Development & Panchayati Raj Minister Th Biswajit  in MGNREGS noi’a thaman ding sum ahung lhun toh lhon in akisaipi authority in iti job card holder ho khut’a hopdoh ding ham ti aboipi uvin ahi. Chuleh tumasang jep’a Government in MGNREGS noi’a thaman pehdoh na ding’a Dk. Crore 83.64 akaidoh tan hiche fund hi tulai Covid natna jeh’a mitakip in hahsatna ato gelkhoh na jal’a akaidoh ahi ati.

Hiche toh lhon’a Job card holder hon amu ding nikho thaman amu thei na ding uvin District Program Co-Ordinator leh akisaipi official hon natoh phatah’a abol ding uvin Minister in temna anei in ahi. Chuleh job card holder ho ding’a kipedoh ding nikho thaman ho Panchayati Raj  Institution Member leh Zilla Parishad member hon thil dang’a amanchah lou ding uvin hetsahna leh temna jong anei in ahi.

xxxxxxxx

State Govt. thupeh dungjui’a MLA L Jayantakumar in ama Constituency sung’a QC ding mun vetlhah nanei

Imphal, May 7 (ET) : Gamsung’a tulai Covid second wave jeh’a anitin’a Covid natna vei leh athi akibe jing toh lhon in State Government in Assembly Constituency chom chom’a Quarantine Centre hondoh ding’a thupeh anei dungjui in MLA L Jayantakumar in tunin Keishamthong Assembly Constituency a Quarantine Centre ding in Imphal College vetlhah na ananei in hiche achun Imphal West SDO in ana kilhonpi in ahi. Thuso mihotoh akihoulim na’a Constituency sung’a hi Quarantine Centre 2 kihongdoh ding amun ding chu Kwakeithel Girls High School leh Imphal College hi ding ahi. Hiche keu hilouva koitobang Covid natna vei hi ding’a ginmo um ahilou leh Covid natna nei um chan bang’a umho ding in jong Hospital a akijen thei na ding uvin tohgon ho jong akichai tan ahi.

Hiche toh lhon’a Quarantine Centre teni hi ahung lhung ding May nisim 12 nikho leh kihongdoh ding chuleh Covid natna nei numei ho Imphal College Girls’ Hostel a kivesui ding ahi. Koitobang inn a isolation room kitup tah neiho vang Centre mun’a um khel hih jong leu akhohna aumpoi tin L. Jayantakumar chun aseiyin ahi.

xxxxxxxxx

Assam akon Oxygen Cylinder 12 Jiribam lhung ta

Imphal, May 7 (ET) : Jiribam DC W Malemnganba Chenglei vetkolna noi in janni (May 6) chun lupna 50 dol District Hospital ah kg. 65 a gih oxygen cylinder 12 Assam a kon in analhung tan ahi tin thulhut chun aseiyin ahi. Chuleh hiche Oxygen cylinder ho Assam akon Jiribam gamsung’a pohlut ahi’a  oxygen kining lhing tah’a manchah ahi  theina ding’a District Administration Jiribam in pan nasatah alah ahi.

Hiche toh lhon’a Jiribam DC Malemnganba Chenglei in tulai gamsung’a anitin’a Covid case akibe jing toh lhon’a Government in ning lhing tah’a oxygen akimu theina ding in bolthei chan’a pan akila jing in chuleh Assam, Cachar District ah agakiche in kg. 65 a gih oxygen cylinder 12 jong ahin kipolhung thei tan ahi. Chuleh District sung’a oxygen lhahsam na jouse’a District Administration Jiribam in jochan’a pan kila jing ding ahi ati.

xxxxxxxxx

MLA Nameirakpam Loken lamkai na’a QC ding mun suhtheng na anachelha

Imphal, May 7 (ET) : Nambol Assembly Constituency hopsung’a um Covid natna veiho’a ding’a Quarantine Centre ding’a tunaicha’a semna ding’a Leirel Girls’ High School, Nambol phatsah ana hichu hitalou ding SK Women’s College, Kongkhampat joh hiding ahitai tin thulhut chun aseiyin ahi. Hiche jeh hin local MLA Nameirakpam Loken, Nambol Block Congress Committee leh CSO hon hiche mun thah QC ding College leh akimvel suhthengna ananei uvin ahi.

Hetthei khat chu Leirel Girls’ High School hi amun alemchang lou jeh’a kikhel ahi tin MLA Loken chun atahlang in ahi. SK Women’s College hi fencing akitup in chuleh aum ding patient ho jong lunglhai jo ding’u ahi ati. Hiche mun a Quarantine Centre ahung kihondoh teng Doctor leh Nurse chuleh Health Worker dang dang in pan alah ding chuleh mipiten jong Covid daan ho phatah’a ajui cheh ding uvin temna anei in ahi.

Xxxxxxxx

Addl. SP Shankerjit makai nanoi’a Haosa phabep toh kihoukhomna um

Imphal, May 7 (ET): Addl. SP Shankerjit makai nanoi in Chadel Police team in Molcham Police Station a Chandel District hopsung gamgi chin IBP 61 to 71 sung’a kho jouse toh kihoukhomna ananei uvin ahi. Kihoukhom na’a chun Aibomjang, LH Zangnomphai, Laiyang, New Somtal, Tuileng, Bonsi, Molcham, Heimol, Bungmol Tampak, khengjang, Khumkot, Khangtung, T.Nampao, C.Gamnom, Changpol, Jordam, Gamphazol, Thingphai leh LS Laijang akon in Kho Haosa leh Secretary hon pan anala uvin ahi. Chuleh hiche phatsung’a resourse person Dr. Thongam Remai, TA & H Department in jong pan anala toh lhon in gamsung’a tulai tah’a thilsoh Covid Second Wave chung’a hilchetna/thuhilna ananei in ahi.

Hiche toh lhon’a kihoukhom na phatsung’a chun thulhuh na phabep jong anala uvin ahi. Hiche hochu Myanmar gam akon daan dihlouva koima lutsah lou ding chuleh umsah lou ding, Govt. in jui ding’a daan asemho phatah’a jui cheh ding, resource person Dr. Thongam Remai in Covid-19 phatsung’a bol ding leh bollou ding chuleh Covid vaccination chung thu’a hilna anei in, gamgi chin’a law & order phatah’a jui cheh ding in kinoptona ananei uvin ahi. Chuleh ahungkihom mipi ho heng’a sanitiser leh masks jong anahoppeh uvin ahi.

Xxxxxxxx

Kakching CDO in RPF/PLA cadre khat anamandoh

Imphal, May 7 (ET) : Kakching CDO hon tunin Kakching Khunou gamkai sung’a kon in RPF/PLA S/S 2nd Lt. cadre khat anamandoh uvin ahi. Matdoh’a um cadre pahi Kakching Khunou Angom Leikai akon M. Romesh Singh chapa Mayanglambam Siromani @ Casper @ Kesper (32) ahi. Thudoh aneinao’a amahi 2005 kum’a Chaothoi S/S Corparal akon analut’a 2006 kum’a 45 BMT ding’a Tayang a training anachai ahidan aphongdoh in ahi. CDO hon mat’a cadre leh Kenbo Bike toh Waikhong PS khut’a achung thu kholchilbe ding in anapelut tauvin ahi.

xxxxxxx

Keithelmanbi Battalion in daan dihlouva kipo thil Dk. 90.56 man anamandoh

Imphal, May 7 (ET) :  IGAR (S) vetsui nanoi’a um Keithelmanbi Battalion in janni (May 6) chun Thoubal District hopsung Sada Kumbi kho mun’a kon in daan dihlouva thingtum a kivei mi 2 anamandoh uvin ahi. Hiche akimandoh teni hin Tata truck 2 mangcha’a thingtum ho pohdoh ding anagot lhon chu Mobile Vehicle Check Post, SadaKumbi mun’a AR hon anamandoh ahi. Akimandoh thingtum hi Dk. Lakh 90.56 man ding vel ahi toh lhon’a mat’a um teni leh thil jouse Kasom Khullem Forest Office ah daan dungjui’a kholchilbe ahi nading in anapelut tauvin ahi.

Xxxxxxxxxx

Private Educational Institution ho ding’a Central Govt. in NCC honpeh

Imphal, May 7 (ET) : Central Govt. in NCC ah Junior Division (JD) Wing vacancie 5000 vel apetan ahi. Hiche tohgon hi phat sottah’a kon School chom in vacancies tam lou jeh’a NCC lut thei aum jeh’a ngehna ananei phatsottah jou nung’a hiche vacancie hi hung kihongdoh ahi. Hiche hin NCC a pamnom simlai ho ding’a phatchom na tamtah ahipeh ding ahi. Chuleh NCC a pang simlai hohi basic Military training keu hilouva national level a camps, treks, mountaineering courses, leadership development capsules ho jong ajil thei ding hiche nachung chon’a social service chom chom leh community development activities ho jong pan analah thei ding’u ahi. Additional Director  General NCC, North Eastern Region, Major General AnantaBhuyan, Sena Medal in School alunglut alum leh NCC offices naipen akijatmat pi ding in hetsah najong anei in ahi.

Xxxxxx

Goa Govt. in May 9 akon nikho 15 sung lockdown phongdoh ta

New Delhi, May 7 : Goa Govt. in gamsung’a Covid case apunbe jing jeh in tunin nikho 15 sung tichu ahung lhung ding May nisim 9 jingkah nidan 9:00 akon gamsung pumpi lockdown ding in phongdoh na aneitan ahi. Ahin niseh ngaichat thi ho vang jingkah’a nidan 7:00 akon nilhah 1:00 chan hi thei ding chuleh takeaway vang jingkah nidan 7:00 akon nilhah nidan 7:00 chan hithei ding ahi.

Hetthei khat chu Goa gamsung’a lockdown kiphondoh na ajeh hi tu naicha’a test kibol 6,769 lah’a 3,496 +ve case mudoh ahi jeh ahi. Chuleh Thursday nikho chan’a case thah 3,869 mudoh ahitoh lhon’a agom’a case 1,08,267 alhing tan ahi tin Health Dept. akon official in atahlang in ahi. Covid natna jeh’a mi 58 thina atobe toh lhon’a agom’a thina toh 1,501 lhing tan chuleh tule tun active case 29,752 lhing tan ahi.

Xxxxxxx

NR Congress Chief N Rangasamy in Puducherry Chief Minister ding’a kihahselna neita

Puducherry, May 7 :  Puducherry Lieutenant Governor Tamilisai Soundarajan in tunin Raj Nivas ah All India NR Congress (AINRC) Chief N Rangasamy chu Puducherry Chief Minister ding in kihahsel na ananeisah tan ahi. N. Rangasamy in CM ding’a Pathen min’a kihahsel na ananei toh lhon in Chief Minister panmun atuh na ali vei channa ding jong ahitan ahi. PM Modi in jong CM thah in kihahsel na anei nachung’a kipa thu jong tweeted mangcha in anaphongdoh in ahi.

Hetthei khat chu April nisim 6 election achun AINRC in seat 16 lah’a 10 anamu in chuleh BJP in seat 9 lah’a 6 anamu in ahi. Chuleh Assembly seat agom’a 30 ahitoh lhon’a AINRC leh BJP pang khom’a Ministry asemkhom lhon ahi.

Xxxxxxxxxx

Covid toh kisaiya gamsung’a Khamnathei kipolut ho vetlhah hi ding

Imphal, May 7(ET): Covid second wave toh kisai a gamsung a boina lentah aum toh lhon in Manipur phaicham simlai kiloikhomna Apunba Ireipakki Maheiroi Sinpang lup( AIMS), All Manipur students union (AMSU), Democratic Students’ Alliance of Manipur( DESAM), Kangleipak students Association (KSA), Manipuri students’ Federation (MSF) le Students union of kangleipak (SUK) ho in nisa le ja toh kisai a khamnathei jat chom chom hung kipolut ho vetchil na anei jing ding dan u hetsah na ahin nei uvin ahi.

Phondoh na ana nei utoh lhon in kiloikhomna ho chun Mantripukhri a um godown ho vetlhah na ana neina uva talab, sajan, kheini le adang dang tamtah matdoh na ana nei uvin ahi. Simlai kiloikhomna ho chun matdoh a um jabom ho chu mei in an ahal lha uvin ahi. Hitabang natoh nahi covid toh kisai a khana kinei jing ding kibol jom jingding ahidan jong kiloikhomna lamkai ho chun ana sei uvin ahi.

XXXXXXXX

West Bangal government in Dan le thupeh chung’ a report apehding a High Court in ngeh

Kolkata, May 7: Calcutta High Court in West Bengal government kom a nithum sung a affidavit lekha a pehlut din hetsah na anei in ahi. Hiche hi state sunga dan le thupeh chungchang tohkisai ahi. Election jou a kon milham hinkho leh jalen na nasa tah suboi di mun in um e tia public interest litigation (PIL) in asei jeh a court in Kishore Dutta state advocate kom a hiche mipi bitlou na mun ho leh boina sona mun ho leh boina suhthip na dinga apanlah dan hou affidavit mangcha a ahinsuh chet din hetsah ahi. Nisim 10 Nikho  teng leh Court in Public interest Litigation (PIL) akon angai lhah kit ding ahi.

State sung BJP party a na tong ho nasa tah in suhgenthei in aum uvin, abang khat chu athat un, melse tah in suhset in aum uvin, a Inn hou jong halpeh ahiuve, tin BJP lamkai hon ngohna abol uvin ahi. Hiche ngohna hi TMC supporter hon dandihlou tah a anokhum uva state police ho akon venbit na amu lou jeh u ahi, akiti. Alangkhat a opposition lang a congress leh adang dang hon jong chuti ma achu anokhum u ahi tin jong aseibei.

Election a goljo na nasa tah ana Chang Teinamool Congress chairperson Mamata Bereejee a thumvei na ding a state chief minister hiding a kihahsiel na anei Jou chun thuboi chungchang thu a dan leh thupeh ho a hiding bangtah a suhtup hiding tin kitep na jong anei in, hinlah hiche boina hi BJP hon adeh agoljo na mun houva boina leh kihetthem to louna abol uve tin dan dihlou tah in vai ahom e, tin Banerjee ngohna abol uvin ahi.

Ngohna lekha pelut lawyer Aninsya Sundae in a seibe na achun mun tamtah a boina asoh in may nisim 3 chan chun mihiem 11 hiel in thina atihtan ahi, ati. Chuleh PIL langhon asei dan un, hiche boina asopet hin police police hon a tohding dol u atong pouve, ati. Chuleh hiche boina asopet a thunei vaihom hon mipi bit na ding natoh abol lou jeh un  mi tamtah achen na mun dalhan mun bitjo del in ajam ui, ati. Hiche boina chungchang Thuso dihlou leh phalou tamtah kithethang jeh a jong mipi lunghang pun be ahi, tin jong thulhut chun aseibei. West Bengal state election Kichai a state sung a dan le thupeh umdol hi lungphon um mama jengkhat asohsoh tan ahi. Covid-19 hise khohset laitah a political party chom chomho kah a nasa tah a buoina aso jeng hi milham hoding a gelpha lou hiel thilsoh ahi, tin, aseibei.

Xxxxxxxxxx

India a kal’ khat sunga Covid-19 case Million 1.5 val punbe

New Delhi, May 7: Supply lhahsamna leh apohlena aboi jeh’a gamsunga vaccination rate alhahsuh jing laitah in India in tuni chun nikhat sunga Covid-19 case thah 4,14,188 ana mudohbe in chutoh lhonchun India in tu-kaal’ khat sunga case thah amudoh million 1.57 aval tan ahi. Chuleh tuni chana Covid case kimudoh jat agomin 2,14,91,598 alhingtan ahi.

Alangkhat’a, Covid-19 natna jeh in tunin mi 3,915 in thina anatoh in thina toh agom in 2,34,083 alhingtai.

Medical expert hon India sunga COVID-19 case leh thina toh ho mong mong hi official tah’a kiphongdoh sanga velni a tamjo ahi, tin asei uvin ahi.

Achesa kaal’phabep sunga hou toh kisaiya golnop ana kimang holeh election jeh’a kijotna ho  ”super spreader events” tia ana kiminvo toh lhonin Prime Minister Narendra Modi in wave nina suhthipna dinga ana vaigei jeh in mi tamtah akon demna leh seisetna tamtah ana toh in ahi.

India hi vannoiya vaccine semna lampanga alenpena aum vangin, agamsunga COVID-19 wave ho tuhtang nadinga nasatah in akihambol jingin, Foreign country ho’a konin jong kithopina jatchom chom ahung lut in ahi.

India gamsunga vaccine dose 16,49,73,058 lam akikapdoh tah vangin vaccination rate hi achesa nikho phabep sunga hin nasatah in ana lhasuh tan ahi.

India in nikhat’a vaccine dose million 4 chan kapdoh jouna vaccination rate aphah nungin tun vaccine  lhahsam jeh in nikhat’a million 2.5 bep bou kapdoh jouna chanin akhesuh tai, tin University of British Columbia a economics professor Amartya Lahiri in ana seiyin ahi.

“The 5 million a day target is the lower bound of what we have to aim for, since even at that rate, it will take a year for us to get everyone two doses. The situation unfortunately is very grim.”

Gamsunga state phabep in ama ama state sunga social restriction jatchom chom akikoi uvin, hinlah Centre government in national lockdown koiding agelthei naipon ahi.

Tuni’a Union health Ministry akon thulhut kimu dungjuiyin, nikhat sunga Covid natna akon mi  3,31,507 ana damdoh toh lhonin tuni chana India gamsunga Covid natna akon damdoh jat agomin mi 1,76,12,351 ana lhingtan ahi. Chutoh lhonchun tutu in active case 36,45,164 aumtan ahi.

Alangkhat’a, tuchana India gamsunga Covid-19 test kiboldoh jat hi sample 29,86,01,699 alhingtan ahi, tin Indian Council of Medical Research (ICMR) akon thulhut kimu chun aseiyin ahi.

xxxxxxxxxxx

National Lockdown umthei ahi tia Rahul Gandhi in PM Modi koma lekhathot pe

New Delhi, May 7: Congress lamkai Rahul Gandhi in Friday nichun Prime Minister Narendra Modi komah Coronavirus natna toh kisaiyin lekha ana thot in ahi. Hichea hin aman aseina ah gamsunga Covid 19 natna case thah akibe jingtoh kilhon a national lockdown umna thei asohdoh tai tin asei in ahi.

Hitobang phat hahsa sunga hi mipi hohi nagel khohpen ahiu angaiye tin aseiyin ahi. Ahithei chan a Covid 19 natna jeh a mipi genthei naho hi suhbei ding tohgon neiyin atin ahi. Population tamna mun India hi virus a dinga mutation hithei na dinga mun phatah khat asohdoh tan ahi. Tu dinmun a double leh triple strain umhohi apatna ahinalaiye tin jong Gandhi in aseiyin ahi.

Hiche virus natna hi India bou hilouva gam jousea dinga boina ahi ati. Vaccine kapna lampanga Centre tohgon anei na chungah Gandhi in aseiyin, na government in Covid vaccine kapna lampanga tohgon nanei dan chungah lolhing tah in na phongdoh in hinla hichea hin Covid 19 natna hatah a ahung pun phat in India dinmun hatah in tijat umtah dinmun asohtai tin demna anei in ahi. Government of India losapna jeh a national lockdown jong avela umthei kit din aume ati. Congress in a support jing ding ahi tia Gandhi in asei toh kilhon in stakeholders chom chom ho puikhom a kithokhom a India hi venbit nading ngaito ngai ahi, hiche tailouva India hi virus a dinga kisem phatna mun phatah sohdoh thei ahi ati.

Tu dinmun a thil poimo 4 aume tin Gandhi in aseiyin ahi a lekha thotna ah chun, hiche point 4 hochu ahileh, scientific tah a virus chu tracking bolding chuleh gamsunga mutations ahina ah genome sequencing leh disease pattern manga kholdoh angaiye ati.

Anina ah vaccine kikap ho mutations aumtoh kilhon a velvet na auma chuleh vaccine kapna jong hatah a bolbe ahina dinga mipi ho aphatcha hetsahna jong aum angaiyin ahi ati.

Congress lamkai chun aseibena ah government in adeh a mipi hahsa deh ho chunga financial hihen food support hijongleh abol ding in jong aseiyin ahi. India in Friday nichun Covid 19 natna case thah 4,14,188 ana mudoh in chuleh thina toh jong 3,915 ana ume tin Union Health Ministry in aphongdoh in ahi.

XXXXXXXXXX

Covid 19 natna case thah akibe jingtoh kilhon a Centre in Employee phabep ding’a Work from Home phongdoh ta

New Delhi, May 7: Central government officials naovop holeh disability neiho chu tuahi May 31 chan geiya dinga Office kailou diu ahi, hiche hi gamsunga Covid 19 natna case thah akibe jingtoh kilhon a vet a um ahi. Department of Personnel and Training in May 3 nikhoa Office memorandum apehlut uleh May 6 nia athahbeh a thuso aneina ah April 19 nia guidelines kisem dungjuiya Central government office hoa attendance hochu May 31 chan geiya dinga chontou ahi, hiche hi Covid 19 natna dinmun akikhel louva ahileh chejom ding ahi.

Official, containment zones sunga umho jong containment zones akilah doh tokah sea Office kailou diu ahi.

Official Office kai jousen Covid Appropriate Behaviour, Mask tom jing ding, physical distancing, sanitizer man ding, khut sopjing ding tiho ajui u ngai ahi. Employees hochu timing phatah a ajui uva office munho a mi tampi aumsah lou diuva jong thupeh ahiuve. Guidelines in asei dungjui a employees kum 18 chunglang miho chu vaccine akikap diuva hetsah ahitauve ati.

Hiche danthah hi India in Covid 19 natna case thah 4,12,262 ni khat sunga aumtoh kilhon a Union Health Ministry in asei ahi. Hichea hin mi 3980 tobang in thina anatoh uvin ahi. Chuleh tu dinmun a active case umjat chu agoma 35,66,398 ahi in chuleh ni khat sunga damdoh jat chu 3,29,113 alhingin ahi.

XXXXXXXXX

Phase 3 a Kum 18 apat 44 mi lakh 11.8 Vaccine kapdoh ta

New Delhi, May 7: Vaccine kapna phase 3 na akipat til a kona mi lakh 11.8 beneficiary ho Kum 18 leh 44 sunga umho chu vaccine kap ahitauve tin Ministry of Health and Family Welfare in Friday nichun aseiyin ahi. Hichea hin Kum 18 leh 44 sunga mi 11,80,798 hochu vaccine dose masa State leh Union Territory 30 sungah kap ahiuve.

Health Ministry data kimu dungjuiya Andaman and Nicobar Islands in vaccine dose 330 ana kapdoh uvin chuleh Andhra Pradesh ah 16, Assam ah 220, Bihar ah 284, Chandigarh ah 2, Chhattisgarh ah 1026, Delhi ah 1,83,679, Goa ah 741, Gujarat ah 2,24,109, Haryana ah 1,69,409, Himachal Pradesh ah 14, Jammu and Kashmir ah 21,249, Jharkhand ah 77, Karnataka ah 7068, Kerala ah 22, Ladakh ah 86, Madhya Pradesh ah 9823, Maharashtra ah 2,15,274, Meghalaya ah 2, Nagaland ah 2, Odisha ah 28,327, Puducherry ah 1, Punjab ah 2,187, Rajasthan ah 2,18,795, Tamil Nadu ah 8,419, Telangana ah 440, Tripura ah 2, Uttar Pradesh ah 86,420, Uttarakhand ah 17 chuleh West Bengal ah 2757 ahi.

Chuleh gamsung pumpi a Covid 19 vaccine kikap dohjat chu ahileh Crore 16.49 ahi. Ministry in aseina ah vaccine dose 16,49,73,058 tobang hochu sessions 24,11,300 sungah kap ahi ati. Chuleh nikho khat sunga dingin janni chun vaccine dose lakh 23 kap ahi. May 6 injong vaccine dose 23,70,298 jong pehdoh in aume. Sessions 18,938 sungah beneficiary 10,60,064 tobang hochu vaccine dose masa kap ahiuvin chuleh beneficiary 13,10,234 hojong dose 2 na kap ahiuvin ahi. Hiche lah ah chun healthcare workers 95,01,643 ho dose masapen ana kikap uvin chuleh HCW 63,92,248 tobang hochu Dose 2 na kap ahiuve. Chuleh Frontline Workers (FLW) 1,37,64,363 hon dose masa ana kikap uvin chuleh FLW 75,39,00 hon dose 2 na ana kikap uvin ahi. Chuleh beneficiary kum 18 leh 44 sunga beneficiary 11,80,798 hon dose masa ana kikap uvin chuleh 1,35,91,594 hon dose 2 na ana kikap uvin chuleh. Kum 60 chunglang miho lah ah mi 5,43,12,908 hon dose masa ana kikap uvin chuleh mi 53,62,385 hon dose 2 na ana kikap uvin ahi.

Hichea hin State 10 hoa vaccine kikap dohjat chu 66.84 per cent alhing jouvin ahi. Covid 19 natna akona damdoh thah 3,31,507 ni khat sunga aumtoh kilhon in India a Covid 19 natna akona damdoh chu 1,76,12,351 alhingtan ahi. National recovery rate jong tuhin 81.95 per cent ahi in, hiche lah ah chun State 10 hoa recovery thah umjat chu 72.47 per cent alhing jouvin ahi.

Achesa nikho khat sunga case thah 4,14,188 aumna ah Maharashtra in niseh a case sangpen ana umin ahi, hichea hin case 62,194 ana umin ahi. Maharashtra banah Karnataka in case thah 49,058 chuleh Kerala in 42,464 ana umin ahi.

Maharashtra, Uttar Pradesh, Delhi, Karnataka, Kerala, Bihar, West Bengal, Tamil Nadu, Andhra Pradesh leh Rajasthan hon case thah kimudoh nalah ah 71.81 per cent alhing jouvin ahi.

Tu dinmun a India a Covid 19 natna active case umjat chu agoma 36,45,164 alhingtan ahi .

Ministry in aseina ah State 12 hoa Covid 19 natna case umjat chu 81.04 per cent tobang alhing jouvin hiche hi gamsung pumpi huop a ahi tin aseiyin ahi.

Chuleh achesa nikho khat sunga Covid 19 natna jeh a thina toh 3,915 umna ah Maharashtra in atampen ahi in hichea hin 853 ana umin ahi, ama banah Uttar Pradesh ah niseh in 350 in thina anatoh uvin ahi.

Hinla Daman and Diu, Dadra and Nagar Haveli, Arunachal Pradesh, Ladakh (UT) leh Mizoram hon achesa nikho khat sunga Covid 19 natna case thah Report ana nei pouvin ahi.

Ministry in aseina ah India government in global aid amuho chu kitup tahleh ahiding banga State leh UT hoa apeh ding ahi ati.

XXXXXXX

Rajasthan leh Madhya Pradesh a nikho 4 kijom  a Petrol litre khat a Dk. 102, lhingta

New Delhi, May: Tuni chun Rajasthan leh Madhya Pradesh mun phabep hoa petrol thao hochu litre khat a Rs 102 alhingtan ahi, hiche hi nikho 4 kijom a thao man kijom a akhan toh kilhon a um ahi. .

Tuni chun petrol man chu litre khat a paise 29 leh diesel jong litre khat a Dk. 31 paise a khansah ahi.

Hiche toh kilhon a Delhi a petrol man chu litre khat a Dk. 91.27 chuleh Diesel jong litre khat a Dk. 81.73 alhingtan ahi. Sri Ganganagar Rajasthan ah petrol man chu litre khat a Rs 102.15 alhingtan ahi.

Madhya Pradesh, Anuppur ah jong petrol man chu litre khat a Dk. 101.86 alhingin chuleh Parbhani Maharashtra ah litre khat a Dk. 99.95 alhingin ahi.

Tukum sunga gamsunga thaoman litre khat a Dk. 100 avalna tuhi avel 2na ahitan chuleh hiche masanga chu February lha kimlah a 100 anaval ahi.

Thao man hochu state jousea akibang pon ahi, hiche hi local a tax, VAT leh freight charges hojeh a kibang lou ahi. VAT la tampen chu Rajasthan ahi in chuleh ama banah Madhya Pradesh ahi. Thao man chu nikho 4 kijom a khang ahi, hichea hin petrol chu litre khat a paise 88 in akhangin chuleh Diesel jong litre khat a Dk. 1 in ana khangin ahi.

March 2020 a asangpen ah Petrol chu litre khat a Dk. 21.58 leh diesel jong litre khat a Dk. 19.18 a khansah ahi ajeh chu Central government in excise duty hochu asuhpung ahi. State noiya um IOC, BPCL leh HPCL hon petrol man chu litre khat a paise 67 leh diesel jong litre khat a paise 74 a March 24 leh April 15 sunga ana suhnem ahi.

Oil companies honjong thao man ho velvet na aneijou uva April 15 a chu ana suhnem u ahi. Hichea hin State 5 hoa West Bengal jauna Election umna phat toh ana kitoh in ahi.

Hinla vote lhahna akichai jouvin oil company hon International oil market dungjuiya thao man hochu akhansah kit u ahi.

Amahon asei nauvah April 27 a kipat a thaoman ho khangjing ahi in chuleh crude oil jong barrel khat a USD 70 aval e tin asei uvin ahi.

Hichea thaoman hohi Centre leh State hon tax akoinauva aman chu petrol chunga 60 per cent lhing ahi in chuleh Diesel chungah 54 per cent tobang alhing jouvin ahi. Hiche lah ah hin Union government in petrol litre khat chunga excise duty akoijat chu Rs 32.90 ahin chuleh Diesel chungah Dk. 31.80 alhingin ahi.

Mumbai ah petrol man chu litre khat a Dk. 97.34 akonin Dk. 97.61 in Friday nichun khansah ahi in chuleh hichea diesel jong litre khat a Dk. 88.49 akona Dk. 88.82 a khansah ahi.

Xxxxxxxxxx

Tamenglong a mi 4,885 lam covid vaccine ana kikap

Tamenglong, May 8: Tamenglong district administration in tuni chan in mi 4,885 lam covid vaccine kap doh na anei taovin ahi. Thuso kimu dungjui in district sung a chun dose ani vei channa mi 1,795 lam kikap doh tahdan jong hetsah na ana kinei in ahi. Tu le tua district sung a active case 40 um ahi. Tuni channa district sung a positive case um jat hi 1,525 lam lhing ahitan ahi. Vaccine kikap ho kichol du nading mun in Tamenglong district hospital mai Duigailong a waiting shed khat akisem in ahi.

 

SHARE
Previous article7th May 2021 News
Next article9th May 2021 News
Editor at Eimi Times.