7th May 2021 News

7th May 2021 News

69
0
SHARE

Journalist ho Covid Frontline Warrior khat ahiutoh kilhon a Vaccine akikap diu apoimo masapen a kikoi ding ahi: CM Biren

Imphal, May 5(ET): Ginchat khel a State sunga COVID-19 Positive Case mudoh jing ahitoh kilhon in Manipur Government in State sunga hetpehna nei Journalist jouse chu Frontline Worker ahiuve tin phondohna nei dingin tohgon aneiyin ahi.

State Government tua pat a Journalist jouse gelkhohna nei tah leh apoimo pen ahiuve tia COVID-19 Vaccine akap diu ahitai.

Chief Minister in aseina a chun, Journalist hon hitobang natna hilen sunga hangsan tah a gamsung mipi ho dinga thusoh chom chom alahkhom uva apehdoh jingu hi Frontline Worker hotoh akikheh nau aumpoi tin aseiyin ahi. Coronavirus hi baitah a kilason thei natna ahi in, Journalist hon atohdiu dol atoh nauva kon’a bailam tah a natna akilahson theiyu ahi. Hiche hojeh a Government in napha tamtah mipi dinga atohdoh jingu hetpehna leh gelkhohna jal’a amaho tahsa damthei na ding leh venbit ahina diu hatah a kingaituo ding ahi tinjong aseiyin ahi.

Hetpeh a um Journalist jouse Frontline Worker ahiuve ti photchetna dinga State Government in Journalist jouse apoimo masapen ahi tia Vaccine kikappeh ding ahi.

“Damsel in umjing uvinlang hatna nanei ngaibang uvin mipi ading in napha hintong jom jing un” tinjong Manipur Chief Minister N Biren Singh in aseibei.

State sung’ah natna hilen Second Wave hin mi tamtah ahin sukha tan, ichan gei hung che ding ham tihi aki seithei pon ahi. Hitobang dinmun hasa tah a aki umjing lai in Media Fraternity hon mipi dinga thusoh kichehtah a pehdoh theina dingin hahsatna tamtah atuoh jing uvin ahi tinjong Chief Minister in aseiyin ahi.

Director (IPR) in Journalist kiloikhomna hotoh kitohu jahto a  State Mission Director (NHM toh Vaccination Drive nading ahin vaisai diu ahi.

Wednesday nikho chu All Manipur Working Journalists’ Union (AMWJU) leh Editor’s Guild Manipur (EGM) in thukin a kihoukhomna anei nauva chun State Government henga Working Journalist holeh Media Worker dang dang ho Frontline Warrior a phondoh ahina dia ngehna ana neiyu ahi.

Manipur titahlouvin, State dang dang, Bihar, Uttar Pradesh, Odisha, Tamil Nadu, Punjab, West Bengal, Uttarakhand, Karnataka, Kerala, Madhya Pradesh, Goa leh Jharkhand injong

Journalist ho Frontline Worker a phondohna ana nei utoh kilhon a Vaccine jong masapen a kap ding a ana phonhdoh u ahi.

Ccpur District sung’a Journalist leh Media worker mi 30 val tunin vaccine ana kikapdoh in ahi.

XXXXXXXXX

Rev. Dr. Hawlngam Haokip longdamsa Bethel Prayer Mountain, Kholep a vui hita; CKWS in lunghempina phong

Imphal, May 6(ET): Imphal, May 6(ET): Kukite lah’a Doctorate (Theologian) masapen Rev. Dr. Hawlngam Haokip longdamsa chu tunin amatah in anabol Bethel Prayer Mountain, Kholep a tunin Rev. Tonglet Haokip, President KBC Kinthempu hina in SOP jui pum in vui ana hitai.

Ama hi Covid-19 natna jeh’a janni JNIMS a ahinkho ana bei ahi.

Rev.Dr. Hawlngam Haokip hi (L) Jamkhothang Haokip le (L) Neilam chate lah’a atahpen, Khangbarol, Chandel district a achesa May 15, 1938 kum’a ana peng ahi. Rev Seikholet Singson khut’a January 11, 1959 kum in Baptized anachang in, Rev. Dr. T. Lunkim minister hinan Oct 16, 1968 jum in Thonglhing Haokip toh Hou dantheng in kichenna ananeilhon in, March 18, 1975 kum in Ordination Rev. Seikholet Singson khut in ana chang in ahi.

Lekha simna lam’a Guwahati University a 1961 kum in Matric ana chai in, 1967 kum in Eastern Theological College, Jorhat a B. Th. ana chai in, Serampore College, Kolkata a B.D. 1977 kum in ana chai kit in, 1978 kum in Guwahati University a B.A. ana chai in, Southern Baptist Theological Seminary, Louisville, USA a 1980 kum in D. Min ana chai in ahi.

Adamlai a mopohna anatuh ho chu, General Secretary, Kuki Baptist Convention, India (1967-1999), Member, Bible Translation Committee, Kuki Christian Council (1969-1994), Chairman, Imphal City Penetration Plan (1975), Member, CBCNEI Executive and Medical Committees (1978 -79 & 1990-92), Board Member, Eastern Theological College (1983-1991 & 2003-2005), President, Kuki-Chin Baptist Union (1981-2004), President, Manipur Baptist Convention (1985 & 2019), President, Haggai Alumni Association, Manipur (1988-1992), Member, CASA Consultative Committee, NEI (1989-1994 &1996), Member, Executive Committee Evangelical Fellowship of India (1991-1996), Member, Committee on Restoration of Normalcy, Manipur (1993-1997), President, Kuki Christian Fellowship (1993-2000), Founder Director, Abundant Life Ministry (1999 -2021), Founder, Shalom Handloom Weavers Co-operative Society Ltd. (1999-), Executive Director, Kuki Christian Leaders Fellowship (2001-2004), Chairman, Manipur Theological College (2002-2004), Teacher, Trinity Missionary Training Centre, Koirengei, Imphal (2003-2004), Chairman, Love Manipur, Movement for Peace Building and Healing of Manipur (2004-2008), President, Kuki Baptist Convention (2005-2008 & 2014-2017), Founder, Bethel Prayer Mountain (2004-2021), Executive Member, Baptist World Alliance, February 11, 1999 kum in Kuki Baptist Convention, India in General Secretary Emeritus title conferred anabol in ahi.

2004 kum’a kipat in Bethel Taona mol ahin sem doh in ahi. Hichea aman atup poimo ho lah a khat chu ahileh, jat le nam chuleh denomination kithetto louva taokhom ding ti ahi.

Hiche taona Moul a kon Gamsung le Namsung a chamna le kipumkhatna (Peace and Unity) pohlut ding ti ahi. Tuni along-chunga aloinu Thonglhing Haokip in jong ahoulim na-ah Bethel Taona Muol igel khoh uva Rev. Dr. Hawlngam in adamlai a alungtup ho isuh pilhing ding’uvin houbung mite ho temna anei in ahi.

Alangkhat a Rev. Dr. Hawlngam Haokip, Emeritus General Secretary, KBC in tahsa

damlou jeh’a eina mollem sannao chung’a Council of Kuki Worship Services (CKWS) in khopi mun chom choma um Kuki Worship Service (KWS) jouse thalhengin lainatpi nale lunghempina thuphon anei uvin ahi.

Amahi Pathen houna lam a mi hetthei lamkai len khat ahito kilhonin, jat le nam sunga akhohna chan a pan hinlajing khat ahi. Chule KWS/CKWS le inlam a houbung ho kikah a kihetthemna aum jing thei na ding a hatah apan ana la jing hijeh in aman eidalhah uhi lung thomhao um aki salheh jeng e tin thuphon chun aseibei.

Xxxxxxxxxxxxx

Compilation of Thadou Poetry & History lekhabu thensona kinei

Kpi, May 6(UNA): Thadou pao khantouna ding’a kiloikhom Thadou Linguistic Research Forum (TLRF) in Thadou paova thusim le lasim lui ho achomkhom uva PHED Minister Losii Dikho kithopina jalla anakisem “Thadou Poetry and History” lekhabu chu tunin Official Quarter, Lamphel, Imphal a SOP jui pumin thenso anahitai.

TLRF Chairman Thanglet Kipgen le Vice Chairman Janglal Sitlhou lamkainan TLRF Team thalhengin lamkai-7 in pan lahna anei uvin. Hiche kin neocha a kigong Lekhabu  thensona kinna chun Minister L. Dikho in Lekhabu hondohna aneiyin Evan. M Chandramani, Evangelist under Thadou Baptist Association in Pathen henga lekhabu thensona le Publisher pa le insung mite dingin taona ana neiyin ahi. TLRF lamkaihon Minister pan Thadou te thusim a Lekhabu poimo tah a apanna hetpehnan Thadou nampon a kisem Waistcoat le muffler ngailut thilpeh in ana nei uve.

Thanglet Kipgen, Chairman Thadou Linguistic Research Forum in “Compilation of Thadou Poetry & History” sodohna thei dinga panla adeh a Publisher Losii Dikho, Hon’ble Minister PHED, Printing and Stationery Govt of Manipur le Author jat chom chom chunga kipathu sangtah in aseiyin ahi.

“Jat le nam dangin ama pao le chonna cheh in thusim le lasim aneicheh e. Hiche bang chun Thadou ten jong pao le chonna lhingset in thusim anei uve. Lekhabu hi khangthah tampin kum-70 masanga Thadou ten lasim le thusim aneihou ahaimil lou nadiuva hin kiboipi ahi. Khang chedan toh kitoh a Thadou te thusim le lasim giltah tah hohi namdang honjong asim thei diuva English paova hung kiboldoh ahi” ati.

“Thadou tehi gamgi chom cheh in kikhen jongleo achenna mun cheh uva pile puten ana semsa lasim le chonna hohi akibang soh keiye, hiche hi Thadou te kidanna khat ahi. Tuchung lekhabu hung kisem hi Thadou te titahlou leiset kol kim vella cheng nam jousen asim a Thadou te thusim ahetbe nao hiding ahi” tin jong aseibei.

Lekhabu publisher Losii Dikho, Manipur Govt a PHED Minister le Mao MLA jong hi in aseina a, “Hitobang Thadou ten muthei tah a thusim le lasim aneihou amaho pao keo hilouva mijousen asimthei dinga ahin boldoh uhi thil loupi ahi. Nam dang jousen jong eima paova thusim hohi mijouse simthei dinga khantou sah ding akulle” ati toh lhonnin pao khantouna dinga natong Thadou Linguistic Research Forum ho pachatna jong apen ahi.

Aman aseibena a, “Khangthah hon jong ipu ipa khanga kipat chonna le khanna hohi hatah a dop sang ding ahi. Nam khat kihetna chu thusim ahin thusim ineihou hatah a muthei dinga koitup cheh ding ahi” ati. Chuleh jat le nam ho kah a kikhenna umlou nadinga nam jousen cham le lungmon akhohsah cheh a kithokhom dingin jong temna aneiye.

Athahbeh a kithenso lekhabu hi TLRF le Publisher pa panhatna jalla mipi adeichan in amuvah nadinga tohgon nei dingin TLRF Media & IPR Secretary Paojahao Kipgen in thuphon aneiye.

Xxxxxxxx

Greater Imphal leh IMC hopsung a Containment Zone phat sung May 16 geiya kisuhsaobe

Imphal, May 6(ET): Manipur Government in tuni chun IMC leh Greater Imphal sunga gahna ana umsa banga Containment Zone angaibanga May 16 chan chelha jom ding, kimanchah na jouse leh mihem avahle koima  umthei louding ahi tin ana phongdoh in ahi.

Hiche thupeh hi State Home Department in ahin sodoh ahi.

Niseh a natna hilen kithejal leh natna nei apunbe jing toh kilhon a mipi hahsat gentheina tamtah um jong leh COVID-19 natna ahithei chan a doudal ahithei nading leh mipi damtheina ding khuolna jal a Shutdown khel a hung kiphongdoh ahi tin State Home Department akon thusodoh chun aseiyin ahi.

Thangal Bazar leh Paona Bazar a thiljohna mun jouse kikhah ding, IMA Keithel leh akom’a, Temporary Market jong kikhahjom jing ding ahi. Khurai Lamlong, Andro Parking, Lambulane, Kongba, Pishum thong, Kwakeithel, Nagamapal, Singjamei Bazaar, Wahengbam Leikai a Local Market hojong kikhah sohkei ding ahi.

Imphal a Wholesale Shop hojong 3 lah a khat khat kilhahkah a jingkah 6:00 apat 10:00 gei ahon thei diu, mipi kititkhomna umthei lou ding ahi.

Hetthei khat chu, IMA Keithel tilou adang thiljohna dukan ho, bongnoi kijohna ho, gancha neh ding kijohna mun ho 3 lah a khat khat a kilhahtho a ahon thei diuvin phalpeh ahi. Dukan ahilou leh thiljoh ho kimaituo a kiteh tah a kiguol namun ho jong kilhahtho a ahon diu, Queue System achepi diu ahi.

Deputy Commissioner leh District Superintendents of Police hon aphat phat a Dukan ho kihon ding dan ahin gontoh diu ahi tinjong akiseiyin ahi. Chuleh Deputy Commissioner leh District Superintendent of Police in Local Club hotoh kithokhom a Dukan hon ding dan leh Social Distancing jui ding dan phatah a avetsui diu ahi.

Thuso in aseibe na a chun, Healthcare Facility jouse Animal Healthcare, Hospital leh Clinic ho, Nursing Home ho jaona leh Healthcare Worker ho che le vale vang ahuomkhah lou ding ahi.

Pharmacy jouse leh Veterinary Medicine joh hojong ahuomkhah lou ding, COVID-19 Vaccine kikap a che ding ho, COVID Test bol dinga che holeh Medical Emergency jouse jong phal hiding ahi. Home, Health, Relief & DM, Police Department leh District Administration a natong jouse ahuomkhah lou ding, IMC leh Greater Imphal sunga Office dang jouse kikhah ding ahi. Chuleh gari lhai le jong umthei louding ahi.

Thil-le-luo po gari, Oxygen Supply ho, LPG leh Thaotui po ho chuleh nitin kimanchahna thil le luo po ho leh Power Supply, Water Supply, Waste/Garbage Clearance, Public Distribution System, Medical/Covid services, Electronic leh Print Media, Internet leh Telecom Service Provider holeh

Public Distribution System noiya gari kimangcha holeh Glocery chuleh Neh le chah thah le ho ahuomkhah lou ding ahi.

Bank Branch jouse jong 10:00 AM apat 2:30PM geu Government Transaction leh COVID-19 toh kisai leh Government Project hotoh kisai Transaction bou abol thei diu ahi.

Finance Department leh Treasury hojong  10:00AM aoat 2:00PM gei Staff alhomthei pen a kaidiu ahi. Post Office jong 10:00 AM aoat 2:30 gei Medicine leh Medcal Equipment hotoh kisai bou aboipi diu, thildang aboipi lou diu ahi. Government akon a apoimo jep Project holeh natong amun a umden namun hoa natoh chejom jing ding ahi.

Night Curfew nilhah nidan 7 apat jingkah nidan 5 gei um ding, Historical leh Tourist Site jouse angai banga kikhah jom jing ding ahi.

Petrol Pump leh LPG kihomna jouse jong kihong jing ding, IOCL Staff ho che le va-le jong kikham lou ding ahi. Imphal Airport jong kihong jing ding, Staff holeh Passenger che-le va-le jong phal hiding, Lhun na gena Hotel hojong Staff alhomthei pen a kihong ding, Restaurant hovang kikhah ding ahi.

State sung mun dang danga Night Curfew angai banga nilhah nidan 7 aoat jingkah nidan 5 gei chejom ding, DC leh SP in kailhang mun holeh ama ama gamsunga che-le va-le toh kisai thupeh kilomtah a asodoh ding ahi.

Public Transport hoa adeh a Buse ho, Winger Van ho, Magic Van ho, Auto- rickshaw ho, E-Rickshaws ho leh adang dang hon asunga touthei ding jat lah a akeh khat khat bou apoh thei diu, Passenger ho Mask akituo sah jing diu ahi.

Deputy Commissioner ho leh Superintendents of Police in thupeh phatah a jui ahi nadinga tohgon ahin nei diu ahi. High Court of Manipur injong chunga kisei hotoh kitoh a thuoeh ahin sodoh diuvin jong thusodoh chun aseiyin ahi.

Xxxxxxxxxx

Imphal East a themjilna mun 19 CHIC dinga gon a um

Imphal,  May 6(UNA): Imphal East District hopsunga um themjilna mun agoma 19 chu District sunga Segment 10 akon a COVID-19 Positive Patient ho umna ding in Community Home Isolation Centres dingin guon in aum in ahi.

Imphal East Deputy Commissioner Khumanthem Diana Devi akon Office Memorandum kisodoh in aseina a chun themjilna mun 19 chu Covid-19 Patients (asymptomatic) hi a innmun a Toilet, Bedroom atumbeh a phatah a neilou ho umthei nading in CHICs in guondoh ahitai.

Khundrakpa AC a themjilna mun 3 ho ahileh- RK Sanatombi Devi Vidyalaya, Pangei, Kanan Devi Memorial School, Pangei leh Naorem Birahari college, Khundrakpam chu CHIC a dingin guondoh ahi. Liberal college, Luwangsangbam chu Hingang AC a ding in aki guong in, Residential school Chingkhei Ching leh Lamphel high school, Top Khongnangmakhong chu Khurai AC adin guon ahikit in, Urban Health Konok Khongangkhong, Thongju part-2 chu Thongju AC a din guon ahi kit in, State TB hospital, Keirao Wangkhem chu Keirao AC, Don Bosco father’ training centre, Ngariyan chu Andro AC, Biramangol college, Sawombung, Lamlai higher secondary school, Lamlai Primary school, Bal Vidya Mandir jr high school, Takhel, Kameng Ur Primary school, Nongada, Chingtam high school, Yaingangpokpi leh Yourabung high school chu Lamlai AC a ding, MB College, palace compound chu Yaiskul AC leh Modern college, Porompat chu Wangkhei AC ading in guon ahi.

Hiche CHIC ho vetsui leh mopohna hi agamkai Assembly Segment Covid Awareness leh Covid Enforcement Committee hon khut a um ding, agamkai MLA hon amakai diu ahi. District Home Isolation Team hon aphatseh a CHIC ho vil lhahna jong anei jing diu ahi tinjong Office Memorandum chun atahlangin ahi.

xxxxxxxxxxx

Covid-19 natna a mollem

Motbung, May 6(ET): Motbung Bazar Bethlehem Veng lampi, Raju Store neipa jinu Sudha Devi chu Covid-19 jeh in ana mollem in ahi. Amanu hi anatna alel phatna Imphal lam’a jending’a ana kipo chu Hospital a damdoh joulouva ana mollem ahi tai.

Xxxxxxxxxx

Manipur Police hon SOP palkeh mi 336 ana hentang

Imphal, May 5: Imphal: Manipur Police Department in State Government leh State Disaster Management Authority in COVID-19 natna hileh toh kisaiya dan le thupeh chuleh kigahna asodoh ho palkeh ho kholchilna anei jing utoh kilhon in tuni chun mi 336 ana hentang uvin ahi.

Dan palkeh hentang a umho hi adeh a mipi kititkhom na lah a Mai tom kitom lou, mipi kititkhomna lah a Social Distancing chepi lou, chuleh mipi kititkhomna lah a chil setthang leh adang dang ahi.

Amaho cheng hi gihna phatah nei ahitoh kilhon in ana kilhadoh in ahi. Kholchilna kineina sunga chun dan dungjuiya dan palkeh ho leusahna kineina a kon in Dangka 1,15,750/-  aki dongdoh in ahi tin IGP(Ops), leh Nodal Officer (Covid-19), Manipur Police, E Priyokumar akon thusodoh chun atahlangin ahi.

Thuso in aseibe na a chun, koi hileh dan leh thupeh chuleh kigahna ho palkeh aum National Disaster Management Act 2005 leh akitopi dan dungjuiya gotna sangtah kipe ding ahi tinjong gihna aneiyin ahi.

Xxxxxxxxxxx

Kpi tolsung kiloikhomna ho’n hapta khat sung Lockdown phongdoh

Kangpokpi, May 6(UNA): Kangpokpi khopi sunga COVID-19 natna hilen kichat umtah leh mipi akon a kilahson khah ding ginchat ahitoh kilhon in tolsung kiloikhomna ho’n Kangpokpi khopi sung May 7 apat May 13 geiya hapta khat sung chelha dingin Lockdown ana phongdoh un ahi. Kangpokpi ah nikho phabep chun kichat umtah COVID-19 natna nei phabep leh thina toh jong ana um tan ahi. Athahbeh a tunia natna nei mi 4 kimudoh leh damdohna nei mi 6 aumbe toh kilhon in Active Case 63 aum tan, chuleh thina toh mi 19 alhing tan ahi.

Tolsung kiloikhomna ho’n hiche thulhuhna hi Kangpokpi Town Committee makaina a Kangpokpi Women Welfare Organization leh Kangpokpi Youth Union hon mipi akon a ngaichat ahung um dungjuiya tunia KTC Office a toukhomna anei nauva phatsahna hung kinei ahi.

Mipi henga hetsahna thuphon in aseina a chun, hiche Total Lockdown hung kiphongdoh hi adeh a natna tijat umtah COVID-19 Second Wave kilahson tona suhtan ahi nadia hung kiguong ahi.

Hetsahna aneibena a chun, hiche Lockdown sunga kailhang mun ho, gari leh mihem koima apotdoh umthei lou ding, hinla alou theilouva kimanchahna ho lah a Government Office ho, Law Enforcement Agency ho, Medical, Power Supply, Fire Brigade, Gas Agency ho, Pharmacy ho, Water Supply leh Media hovang kilha kang ding ahi.

Ginchat umtah thulhut kimu dungjuiyin, Motbung, Kangpokpi District ah tuni chun COVID-19 natna jeh in numei khat in thina anatoh in ahi. Hinla, hiche thuso kisut geiyin Official tah in photchetna akimu naipon ahi.

Xxxxxxxxx

UPF Manipur in JNIMS a thilsoh demna nei

Imphal, May 6(UNA): Achesa May 5 nikho a thusoh chom chom a kimu dungjuiya insung mite hetpehna umlouva thiluong ana kihal na chung’ah United Peoples’ Front, Manipur (UPF) demna leh mopohna nei Department hon akinthei pen a hitobang dei umloutah natong ho chunga gotna apeh diuvin jong ngehna aneiyun ahi.

UPF Manipur a Secretary Publicity A. Loya akon thusodoh kimu duijuiyin, thina tohpa Jugindro(78) of Top Khongnangkhong, Imphal East hi May 3 nikho nilhahlam nidan 3:00 vel chun JNIMS Covid Ward ah vrtkol dingin ana kikhum lut in, hinla Jugindro in May 5 jinglam nidan 2:50 vel chun thina ana toh in ahi. A insung mite DC leh khosung kiloikhomna hoa kon a phalna hol a alhai jing laiyun Jugindro longdamsa chu a-insung mite hetpehna imacha umlouvin Hatta Minuthong a mithi kihalna mun’ah ana kihal in ahi.

W Jugindro chunga thilsoh hi Health Department a mopohna nei alen lang ho suhmo leh nahsahlou jeh ahi in, UPF Manipur in hiche thilsoh hi imalouva kigel lou ding ahi tinjong thusodoh chun aseiyin ahi.

UPF Manipur in akinthei pen a hitobang dei umlou tah natong a kigolkha jouse mopohna nei Department in akinthei pen a ahin matdoh uva gotna apeh diuvin phutna aneiyun, chuleh hitobang thilsoh ahung umkit louna dingin jong Department ho heng’ah temna aneiyin ahi.

xxxxxxxxxx

Manipur a Covid-19 jeh’a mi 13 thi kit, tukum a ding’a nikhat a thina toh tamna pen hita, Case thah 380

Imphal, May 6(ET): Manipur a nikhat sung a mi 13 in COVID-19 jeh a thina ana tuobe kit toh kilhon in, nikhat sunga thina toh atampen ahi tan, hitoh kilhon in State sunga COVID-19 jeh a thina toh agomin 447 alhingtan ahi tin State Health Department in aseiyin ahi.

Tunia COVID-19 jeh a thina toh mi 13 ho lah a mi 6 hi Imphal West akon ahiuvin, 3 hi Imphal East, 2 hi Bishnupur chuleh Churachandpur leh Kaching akon mi khat cheh ahi tin COVID-19 Common Control Room akon thusodoh chun atahlangin ahi.

Athahbeh a COVID-19 natna 380 mudohbe ahitoh kilhon in, Manipur sunga tule tua COVID-19 Active Case 2,991 holeh damdohna nei 30,295 ho pum’in COVID-19 natna nei kimudoh agomin 33,733 alhingtan ahi tinjong thusodoh in atahlahbe in ahi.

Tunia COVID-19 natna nei athahbeh a kimudoh ho lah’a 362 hi milham ahiuvin, adang 18 hi Central Armed Police Force (CAPF) Personnel ahiuve tinjong atahlang in ahi.

Milham lah a kon a natna nei kumdoh ho lah a hin Imphal West leh Imphal East akon COVID-19 natna nei kimudoh tamnapen ahijing nahlai toh kilhon in 170 leh 116 mudoh in aum in ahi. Adang COVID-19 natna nei kimudoh ho lah a 29 hi Churachandpur akon ahiuvin, 23 hi Kakching, Thoubal leh Tamenglong akon 5 cheh, Ukhrul leh Kangpokpi a 4 cheh, leh Senapati leh Noney, akon mi khat cheh ahi.

Thuso in aseibe na a chun, Vanleng a hung May 3, 2021 nikho a State hinjon a Air India flight AI-3713 touna jon 12-18 a toukha jousen Common Covid Control Room No. 18003453818 ahilou leh District Surveillance Officers (DSO) akinthei pen a akimupi diuvin hetsahna aneiyin ahi.

Alangkhat ah, D Type Oxygen Cylinder 677 leh B Type Oxygen Cylinder chu State sunga Health Institution leh Health Facility chom chom a manchah thei ding in ana kikholkhom in ahi tinjong atahlang in ahi.

Thulhut nunungpen kimu dungjuiyin, tuni chan in State sunga Vaccine kikapdoh agomin 2,42,359 alhingtan ahi.

Xxxxxxxxx

Covid Second Wave akon kivenbit nading’a CCpur DC in mipi jui ding daan phabep phondoh nanei

B.Lalboi Gangte

CCpur. May 6 (ET) : District Magistrate, Churachandpur in Covid-19 Second Wave akon kivenbit nading’a thuso anabol toh lhon’a Churachandpur District sung pumpi Containment Zone ding in ana phongdoh in ahi. Ajeh chu niseh’a District sung’a Covid-19 +ve case apunbe jing toh lhon’a hiche akon kivenbit thei nading’a Lockdown phong louva mipi hoidoh na ding’a Containment Zone a aphondoh ahi.

Hiche toh lhon’a hiche phatsung’a kham ngah na in ahopkhah lou hochu oxygen cylinder, LPG, Oil tanker, niseh’a agaicha thil po, power supply, nen chom ho, water supply, Health Care Facility, Pharmacy, Hospital, Private clinic, Nursing Home a tong, Petrol pump (Social distancing  jui pum’a angai bang’a kihong ding), telecome service leh Press/Media house jouse ahi.  Hiche naban’a  kum 45 chunglam mi leh frontline worker Covid vaccine kikapsah ding ho,  thukhoh nei jeh’a chele ho jong ahopkhah louding chuleh niseh’a ann-che lou-hing joh hon jong jingkah nidan 6:00 akipat sun nidan 12:00 sung chan ajoh thei ding, thil cho ding hon SOP phatah’a ajui ding cheh ding ahi. Ahin Nute Bazar, Zenhang Bazar, Nute Kailhang, Tuibong, Damkam Bazar leh New Bazar vang kihong lou ding ahi. Mopoh nahi SP leh CEO/ADCC in anei ding thupeh palkeh aum leh National Disaster Management Act 2005 toh kitoh’a action kila ding ahi.

Xxxxxxxxx

Community Development Society in Tribal Development Program noi’a kho 8 ah Thei-hon – II Project panta

B.Lalboi Gangte

CCpur. May 6 (ET): Community Development Society in (NABARD) Tribal Development Program noi in kho 8 tichu Lungthul (L), Lungthul (D), Thuangtam, Mualnuam, Kaihlam, Songtal, Khuanggin leh Sinzawl kho ah thei-hon (fruit farm) Project  natoh apan utoh kisai in tuni jingkah nidan 8:00 in CDS Office, Bethel-Dorcas Veng, New Lamka ah Khaikhopau Ngaite, Additional Deputy Commissioner Churachandpur in kho 8 ho hop ding Orange Nagpur-Mandarin Variety Sehkhum phung 24,000 lhandoh na jong ana um in ahi. Kingon achun Thangchinkhup Guite, AGM, NABARD, Churachandpur, CDS Staff hon SOP jui pum in pan anala uvin chuleh thei-hon-II Project hi Community Development Society in NABARD, Churachandpur, RO Imphal noi’a  Tribal Development Fund akon Thei-hon bol na ding project Mualnuam Sub-Division leh Suangdoh Sub-Division sung’a inn 200 toh atoh molso ahi.

Hetthei khat chu achesa 2019 kum in jong Thei-hon-I Project jong NABARD, Churachandpur, RO Imphal kithopi na in Pherzawl District sung Kho 11 tichu Phaitong, Khajang, Sumtuh, Mualpheng, Dialkhai, Thanlon, Suangpehmun, Tallian, Leijangphai, Joutung leh Bukpi kho ah toh molso ana hi in chuleh 2020 kum in Theiphung akon aga jong anajoh pan taovin ahi. Chuleh 2021 kum ahin 2020 kum a sang in thei ga kihomdoh atamjoh dan Lianzamung Tonsing, President CDS in atahlang in ahi.

XXXXXX

CCpur DC thupeh mipin ajui cheh hinam ti’a District Police in vetlhah na nei jing

B.Lalboi Gangte

CCpur. May 6 (ET): Churachandpur District sung’a Covid-19 natna akon kivenbit na ding’a CCpur khopi sung adeha’a Kailhang mun ho zalen tah’a hon ahi nalou ding’a Pawan Yadav, IAS, District Magistrate/Deputy Commissioner, Churachandpur in dukan hon ding dan thuso anabol toh lhon’a CCpur District Police in niseh in vetlhah na anei jing uvin ahi.  Chuleh District  sung’a Covid-19 natna kilahson na suhnem ahi na ding’a nilhah nidan 7:00 akipat jingkah nidan 5: 00 sung Nigh Curfew phon ahi dungjui’a khopi sung’a dukan hon ding dan jong nikho ana kipe  in ahi.

Hiche toh lhon’a thupeh dungjui’a khopi sung NH 102B (Tedim Road), Rengkai Bazar, Thangzam Road, Tipaimukh Road leh Red Cross Road ho dukan No. 1, 2 leh 3 a kihomkhen ding chuleh Dukan  No. 1 ho Monday leh Friday nikho leh ahon ding, Dukan No. 2 hon Monday leh Thursday, chuleh Dukan  No. 3 hon Wednesday leh Saturday nikho leh ahon ding’u ahi. Chuleh dukan neihon thil choding ho SOP phatah’a ajui sah ding uvin mopoh na peh in aum in ahi.  Alangkhat’a tunin District Police in Tedim road jui’a dukan number dungjui’a dukan kihondan vetlhah na anei uvin hiche phat sung in dukan akihon na ding nikho louva dukan hong tamtah anamudoh uvin hi jeh chun daan kipe ho ajui cheh ding uvin temna anei uvin chu jouvin dukan ho akhasah uvin ahi.

XXXXXX

IDSP, CCpur report dungjui’a CCpur District a Covid +ve case thah 39 kimudoh

B.Lalboi Gangte

CCpur. May 6 (ET): Churachandpur District sung’a Covid-19 dinmun toh kisai’a Integrated Disease Surveillance Program (IDSP) Churachandpur in tuni nilhah nidan 3:00 chan’a report asodohna’a Covid +ve case thah 39 mudohbe ahi dan atahlang in ahi. Chuleh akimudoh case thah 39 lah’a Military personnel 12 leh tolsung mi 27 ahi. Hetthei khat chu tolsung mi Covid-19 +ve case kimudoh na mun hohi Close contact akon Marian street, D. Phailen, Venglia, Thiangkangphai, Vengnuam South, New Lamka, Pearsonmun, Vengnuam New lamka, V. Munhoih leh B. Vegnnom Tongsei Road;  ERAGT akon Hmuia Veng, Elim Veng, New Lamka, SBI Branch Personmun, Pungchongi Veng, Tedim Road leh Old bazaar; Samaritan Hospital akon Vengnuam New lamka leh C. Munkot chuleh District Hospital akon Hiamtam Lamka, Khuga Tampak, Vengnuam New lamka leh Personmun a khosa ho ahi.

Hiche toh lhon’a CCpur District sung’a achesa April nisim 2 akipat May nisim 5 chan in Covid-19 +ve case 291 akimudoh in chuleh thina toh mi 6 aum tan ahi. Chuleh Manipur State ah Covid-19 natna sung’a mipi ding’a kalsong  Journalist leh Media worker ho Chief Minister N. Biren Singh in Frontline Worker ahidan aphondoh toh lhon’a Imphal leh CCpur District panna in Vaccination Centre chom chom’a Journalist leh Media worker tamtah tunin Covid-19 Vaccine ana kikap uvin ahi.

Hetthei khat chu All Manipiur Working Journalist Union (AMWJU) leh Editor Guild Manipour (EGM) in  janni (May 5) Emergency meeting ananei phatsung uvin State Government in State sung’a mipi ding’a natong Journalist leh Media worker ho Frontline workers ding’a ahetpeh ding’a ngehna ananei dungjui’a Chief Minister N.Biren Singh in jong  fronline worker in phondoh na ananei tan ahi. CCpur District ajong Pawan Yadav IAS DC-CCpur in District Immunization office, IB Road ah Journalist leh Media worker ho Covid-19 vaccine kikapsah nom aum leh kikapsah thei ding ahi ati toh lhon in tunin District sung’a Journalist leh Media worker mi 30 val ana kikapdoh in ahi.

Alangkhat’a India gamsung’a tun Manipur panna in Bihar, Uttar Pradesh, Odisha, Tamil Nadu, Punjab, West Bengal, Uttarakhand, Karnataka, Kerala, Madhya Pradesh, Goa leh Jharkhan State ho’a Journalist leh Media worker ho frontline worker in phondoh anahitan ahi.

XXXXXXXX

CMO, CCpur makai na’a CCpur District a Covid Second Wave toh kisai’a Joint Review Meeting chelha

B. Lalboi Gangte

CCpur. May 6 (ET): Chief Medical Officer (CMO), Churachandpur lamkai nanoi in tuni jinglam nidan 11:00 in CMO Campus ah Covid-19 Second Wave toh kisai in Joint Review Meeting ana chelha in hiche phatsung in District sung’a Medical line a Covid-19 toh kisai’a panla team member, District Hospital akipat Medical Superintendent makai nanoi’a staff hon pan ala uvin ahi. District Nodal Officer (DNO)  in amaho  team toh kisai report pehna anei uvin chuleh maban’a panlah ding dan jong seikhomna ananei uvin ahi.

Hiche toh lhon’a Dr. Vumchinpau Tonsing, CMO Churachandpur lamkai na in CCpur District ah Medical Department akon Covid-19 toh kisai vesui ding team semdoh ahi in chuleh team khat hi Medical Officer khat in Nodal officer hina’a avetkol ding ahi. Chuleh Sampling and Testing Team, Home Isolation Team, Human Resource Team, Covid-19 Care Centre Team, Contact Tracing Team, Covid-19 Vaccination Team, Surveillance & IDSP Team, Night Data Team, Transportation Team, Financial Management Team leh District Control Room ho jong asemdoh uvin ahi.

Alangkhat’a Sampling & Testing Team in sample alahkhom phat leh min, address leh Contact number phatah’a alah ding, Positive result mudoh’a umho Home Isolation Team gangtah’a ahetsah ding, test bol ding jouse  Registration ID apehlut ding tiho  aseikhom uvin ahi.  Chuleh Home Isolation Team, Patient leh ASHA hon ahet ding poimo leh Home Isolation phatsung’a jui ding ho phatah’a jui ho test bolthah ngai lou ding in aseilha uvin ahi.

XXXXXXX

CCpur District Police in khamnathei phabep kimandoh

B.Lalboi Gangte

CCpur. May 6 (ET): Inspector N. Thangzamuan, OC, Churachandpur Police Station makai nanoi in Police team khat in tuni jingkah in Rengkai Lei bul’a kholchilna anei nao in Tata Sumo khat akon khamnathei hi ding’a ginmo thil phabep leh gari neipa anaman uvin ahi tin thulhut chun aseiyin ahi.

Thulhut kimu dungjui’a  Amrita Sinha, IPS, SP Churachandpur thupeh dungjui’a OC lamkai na’a Police team khat in Rengkai Lei bul’a kholchilna aneinao’a  Tata Sumo (Registration No. MN07D-0263)  sung’a Cooler khat hinpo ginmo jeh’a kholchilna aneinao’a Heroin (No. 4) hin ding’a ginmo sabon bom 100 kichun Kg. 1.335 ding vel anamudoh’u ahi.

Hiche toh lhon’a Police hon gari tolpa Thangkhomang Lhungdim S/o Thangkhogin Lhungdim of Joupi, Chakpikarong, Chandel District  thudoh aneinao akon in hiche Cooler hi Chandel District, Joupi aum Haopu in Lamka chan apoh lhung ding’a asol ahidan ana tahlang in ahi. Thilsoh toh kisai’a mat’a um Thangkhomang chung’a Police case jong jihlut in aum tan ahi.

Xxxxxxxxxxx

CM in Covid wave nina dinmun toh kisaiya MLA holeh medical expert hotoh kihouna neikit

Imphal, May 6(ET): Chief Minister N. Biren in tuni chun tu-kaal’ sung’a dinga anivei channa a dingin MLA holeh medical expert hotoh tulai gamsung Covid Second wave dinmun toh kisaiyin kihouna ana neikit in ahi.

Kihouna achun Chief Minister in tule tua State Health Department noiya ICU bed, isolation bed, ventilator chuleh oxygen concentrator umjat kholgilna ana neiyin ahi.

Gamsunga niseh’a Covid natna neijat nasatah’a akibe jingna chung changin Chief Minister in Covid toh kisai angaicha medical manchah leh adang dang ho khohsah pending apoimodan ana seiyin ahi. Doctor honjong District hospital holeh Covid Care Centre ho phatseh’a avil jing uva tule tua Covid jeh’a kijen patient ho ahiding bang’a ajen diuvin thupeh ananei kit in ahi.

Ipiti kibol leh gamsung’a kum 18 leh kum 44 kikah ho manbei a Covid lou kikap thei diuham tiho jong akihoulim nau achun ana seikhom uvin ahi.

xxxxxxxx

Wangoi CHC a Covid loukapna achelha jinge: CMO in-charge Dr N Sushila

Imphal, May 6(ET): Tulai Covid natna akon kivendohna dingleh natna aban achalbe louna ding’in Wangoi Assembly Constituency a um Community Health Centre ah Covid loukapna phaten achelha jing’e, tin Wangoi Community Health centre a CMO in-charge Dr N Sushila in aseiyin ahi.

Aman aseibena achun, hiche Health Centre a Covid loukapna hi achesa February nisim 12 nikho’a ana kipan ahitan, tuni changeiyin mi sang-2 val Covid lou akikap dohtai, ati. Hiche Centre a Covid lou kikap lah’in ICDS staff ho, Medical staff ho, ASHA worker ho chuleh frontline worker hojong apang uvin, government thupeh dungjuiyin Wangoi CHC a hin niseh in mi alhomthei chan’in Covid lou akikap jinge, tin Sushila in aseibe kit in ahi.

BJP Manipur Pradesh Spokesperson N Nilamani injong Wangoi Community Health Centre vetlhahna ana neiyin ahi.

Xxxxxxx

Sugnu A/C sunga Community Home Isolation Centre kisahna ding mun suhthengna anaum

Kakching, May 6(ET): Kakching District, Sugnu Assembly Constituency MLA K Ranjit lamkainan Development committee Kakching Khunou a volunteer hon tuni chun Constituency sunga dinga Community Home Isolation Centre kisahna ding mun JNV Umathel leh akimvel suhthengna ananei uvin ahi.

Thuso bol miho toh akihoulimna achun, Development Committee a member Rishikesh Thingnam in hiche constituency sunga niseh’a Covid natna nei mi apunbe jingtoh lhon’a local MLA K Ranjit toh kihoutohna ana uma kon kinoptona dungjuiya hiche constituency a dinga Community Home Isolation Centre khat sahdoh dinga thulhuh anaum ahidan ana seiyin ahi.

Hiche Centre hi jing (Friday) nikho’a kon kihongpan ding ahin’, Home Isolation a umho jong hiche Centre a hung umthei u ahitai, tin Rishikesh Thingnam in aseibe in ahi.

xxxxxxxx

Delhi a um Manipur simlai ho ding Manipur Bhawan a medical emergency unit hondoh ding’a ngehna um

New Delhi, May 6(ET): India gamsung adeh’a Delhi a Covid natna nei mi niseh’a nasatah a akibe jingtoh, niseh’a mi asang asang in Covid natna toh kisaiya thina atojing toh lhonin Delhi khopi a um Manipuri simlai ho dinga Manipur Bhawan, Delhi a medical emergency unit khat hondoh ahina dingin Manipur Students’ Association, Delhi, Naga Students’ Union Delhi chuleh Kuki Students’ Organisation, Delhi in Manipur CM henga ngehna anei uvin ahi.

Manipur Students’ Association Delhi (MSAD) a Vice-President Somenanda in tulaiya dinga angaicha khohpen Delhi a um Manipuri simlai ho a dinga medical emergency unit khat semdoh lou akhohdan ana seiyin, hiche hi boldoh ahi theina dinga Manipur Chief Minister henga simlai kiloikhomna 3 hohin temna kanei u ahi, ati.

Delhi a um Manipur Bhawan a state government in oxygen cylinder 20/30 koisa a akoi dingin jong ngehna anei uvin ahi.

Xxxxxxxxxxx

Covid dan juilou mi 17 Moreh’a kiman

Moreh, May 6(ET): Moreh Police Station leh Moreh CDO hon Addl SP Ops Moreh, SDPO Moreh, OC Moreh PS chuleh OC Moreh CDO makaina noiyin tuni chun Moreh kailhang leh khopi vel lah in Covid dan ho juiya aum aumlou kholna ananei uvin ahi.

Hiche achun muhtom kitomlou jeh in mi 17 anaman uvin ahi. Hiche mi 17 lah’a mi 11 ho chu Dk. 1000 cheh in aleusah uvin, amaho akon agomin Dk. 11,000 adongdoh uvin ahi.

Adang mi 6 hochun leuman (fine) pehna ding sum aneilou jeh uvin achungthu u seidingin executive magistrate henga ana dinsah uvin ahi.

Xxxxxxx

Kum 11 numei chapang jummo tah’a bol khat kiman

Kamjong, May 6: Kamjong Police in kum 11 numei chapang khat jummo tah’a bol mikhat tuni chun anaman uvin ahi. Kangpat khunou village, Kamjong district akon mi- Antibus Ningshen kitipa hi Addl.SP kjg chuleh SDPO phy leh OC chassad police station panlahna team khat in anaman uvin OC women police station, ukhrul khut’a ana pedoh uvin ahi.

Xxxxxxxxxxxxxxxxxxxx

Thanlon PHC a manchah ding Ambulance hunglhungta/lhondohna anaum

B.Lalboi Gangte

CCpur. May 6 (ET):   Pherzawl district sunga um Thanlon PHC a manchah dingin Basic Life Support Ambulance khat May 5 nikho nilhah lam in Thanlon kho lhut in ana um in ahi.

Hiche Ambulance hi Manipur State sunga Health Centre 4 ho a manchah dinga National highway infrastructure development Co-operation limited (NHIDCL) in April 24 nikho a Imphal a Basic life support Ambulance ana pehdoh hochu ahi.

Ambulance chang Health Centre 4 ho chu Thanlon PHC, Pherzawl district, Haochong PHC, Noney district, Ukhrul District hospital chuleh Kakching CHC ahi.

Thanlon PHC a manchah ding Ambulance ahung lhun toh lhonin Pastor. S. Khaizalal Local Pastor NTBC Thanlon in pathen kom’a lhandohna ana neiyin ahi.

XXXXXXXX

Facebook a Nam kah’a kitomo nathei post bol khat kiman

B.Lalboi Gangte

CCpur. May 6 (ET): Churachandpur District Police in tuni jingkah lam achun Nam le Nam kikah’a kitomona thei ding thucheng ana jih mikhat anaman uvin ahi. Thulhut kimu dungjuiyin, Meetei Leikai, Zenhang Lamka akon mi-Rajesh Tongbram S/o Sabha Tongbram hin Social Media platform, Facebook a chi-le-nam, phung le chang, sakho leh chondan thu’a Nam le Nam kah’a boina thei thucheng ana tahdoh jeh a CCpur Police in anamat ahi, akiti. Hiche thu toh kisaiyin CCpur police station a FIR khat ajihlut uvin ahi.

XXXXXXX

BJP Heirok in TMC natong ho chonvalna chunga demna nei;Toumun kiphinna jong bol u

Thoubal, May 6(UNA): West Bengal election kichai jouva BJP natong ho chunga Trinamol Congress natong ho chonvalna thu toh kisaiyin BJP Heirok Mandal in demna aneiyin, chuleh tuni chu Heirok part (ii) Thokchom Leikai community hall muna toumun kiphinna ananei uvin ahi.

Toumun kiphinna a pan anala MLA Thokchom Radheshyam in mihem hinkho tongkha thei chonvalna hohin mipi thaneina a kivaihopna in mun aneipoi, tin ana seiyin ahi. Tumasang Bengal Election kichai jouva Trinamol Congress natong ho mihem hinkho tongkha theiya achonvalnau hi jachat umtah natoh ahi in, sangtah in demna akineiye, tin aseibe in ahi.

BJP Central committee in thulhuhna aneitoh lhonin, BJP party hon Trinamool Congress ho natoh demna in ni-2 sung nation-wide protest chu mun chom choma janni apat ana chelhahpi pan tauvin ahi. Chutoh lhona BJP Heirok Mandal in hiche toumun kiphinna hi anabol ahi.

Radheshyam in aseibe kit in, India hi democratic country ho lah’a alenpena vannoiyin ahet ahi, chuleh Non-Violence Doctrine jeh’a India hi vannoi het khat hi ahi, ati. Non-violence principle ho khoutah’a kijuina gamsunga mihem sukha thei chonvalna hohin mun aneipoi. Mamta Benerjee lamkaina TMC in West Bengal a hitobanga na-atoh uhin vannoi mitmu a gamsung Democracy totnopna asodohna banna gamtheng hi asuh minset ahi, tin Radheshyam in aseiyin, tuchanin West Bengal State sunga BJP natong mi 20 in thina atohtai, ati.

HItia TMC achaloh hin, election agoljona anei vang uvin, West Bengal mite atamjon TMC party apompoi, tihi avetsah ahi. Tun election akichai tai. Gollelna nei party ho goljona nei party hon abulu kiti hi West Bengal tilou gamsunga state danga ana umkhalou ahi. Chuleh koi political party hijongleh non-violence principle tahsanna chepi hon hitobang hi abollou ding ahi, tin aseibe in ahi.

BJP Manipur Pradesh State Secretary Kh. Basanta jong hiche toumun kiphinna achun pan anala in, aman jong hiche TMC ho thilbol hin West Bengal aminset ahi, tin ana aseiyin ahi. Mipi thaneina a kivaihomna a mipi hon adei angai aseitheina dinga phalna peh ngai ahi. Ahin, West Bengal a, mipiho kam aki huhbit peh in ahi, tin Basanta in aseibe in ahi. West Bengal election a BJP in seat 77 chunga goljona aneithei hi party a dinga lolhinna lentah khat ahi, tinjong aseibe in ahi.

Tuni toumun kiphinna achun BJP Heirok mandal president Thokchom Chourjit, Heirok Zilla parishad member T. Nungshi Singh, General secretray N. Brojen, chuleh BJP Thoubal district General secretary N. Opendro injong pan anala uvin ahi.

Xxxxxxxxx

India a Case 412,262 kimube, agom’a million 21 valta

New Delhi, May 6: India a Covid-19 case thah 412,262 mudohbe ahin, mi 3,980 chi natna jeh in thina atoh kit in ahi. Tuni case theh kimu toh agom a 21,077,410 alhingtan chuleh thina toh jong 230,168, ahi tai.

India sung’a niseh a case lakh 3 val kimudoh jing hi hapta/kal ni lam ahung hitan thina toh jong 3000 vel hijing ahi tai.

Alangkhat a mi 17,280,844 akijendam kit in tu hin gamsung’a Active case 35,663,98  aum in ahi. Chuleh mi 16,25,13,339 vaccin akikap doh tan ahi.

 

SHARE
Previous article6th May 2021 News
Next article8th May 2021 News
Editor at Eimi Times.