6th May 2021 News

6th May 2021 News

86
0
SHARE

Covid-19 jeh’a thina toh khat insungmite thilong dihlou kipehkhah leh kigo jeh’a JNIMS a boina soh

Imphal, May 5(ET): Coronavirus in State sung ahin lonkhum apat a Manipur sunga thilsoh masapen ding in, State sunga Hospital lenpen JNIMS Authority hon COVID-19 jeh a thina toh pasal tehse kum 78 khat a insung mite heng’ah a thiluong ana pedoh thei pouvin, Hospital Authority hon thiluong chu insungmi dang khat heng’ah ana pedoh khauvin ahi.

Hiche thilsoh jeh in mijouse lungsung ah Hospital Authority hon State sunga COVID-19 Second Wave agelkhoh lou ham tin lungdonna leh lungkhamna ana sodoh in ahi. JNIMS Authority ho sei dan in, thiluong kipehkhel khah hi JNIMS a Doctor ho toh ding tamval jeh leh lungkhamval jeh ahi in, chuleh Doctor hon thiluong jouse a insung mite henga pehdohna in pan alatheipon ahi.

Thulhut kimu dungjui chun, Wareppam Jugindro kum 78 s/o  Samu of Top Khongnang Makhong PC Ground, Imphal East District, Manipur chu Monday (May 3) nikho a COVID-19 natna nei ahi mudoh ahitoh kilhon in JNIMS ah vetkol in ana um in ahi. Hinla, vangset umtah in tuni jingkah lam nidan 2:50 vel chun ana muolliem in ahi. Thina tohpa insung miten athi thu ajah utoh kilhon in khosung Club holeh District Administration heng’a phalna alahjou uvin JNIMS a mithi luong kikoina akon a thiluong ladoh ding in aga cheuvin ahi. Hinla, insungmiten kidangtah in W. Jugindro luong hilouvin midang luong khat aga mudoh uvin ahi.

Jugindro tupa Usham Suresh in aseina a chun,  DC leh khosung Club hoa kon a khosunga lhahna achaina nei dinga phalna akilah jouvin thiluong  lading in ana kiche in, hinla Jugindro thiluong akiholmo in ahi. Hospital Staff hon thiluong toh kisaiya imacha hetphahna aneilou dan uva asei jeh un, thiluong umna akihol in, chomkhat jouvin, Jugindro thiluong chu Minuthong a IMC ho mithi kihalna mun a ana kihal ahi dan heydoh in aum in ahi tin atupa’n aseiyin ahi.

Hitobang tah a ngaisahna neilou tah a nakitong chunga kigolna nei jouse chunga akisaipi mopohna nei holeh Government in gotna kilom apeh diuvin jong ngehna aneiyin ahi.

Hiche thilsoh jeh in vangsetna toh insungmite leh khosung miten thiluong umna kikoina mun hatah a khuolna ana nei utoh kilhon jn JNIMS Hospital sungah boina lentah ana sodoh in ahi. Chomkhat jouvin thilsoh toh kisaiyin athu Government leh State Health Department a Health Advisor MLA S. Ranjan kom ana lhun toh kilhon in boina mun ana dellut in, chuleh aman jong thil dihlou khat um ahidan aseiyin ahi. JNIMS Authority honjong thilsoh toh kisai phatah a kholchilna nei ding in anopnau aphongdoh un ahi.

Vangsetna tohpa chapa leh Civil kiloikhomna UPF a President W. Second in thulakhom ho henga aseina a chun thilsoh hi vangset umtah ahi tin aseiyin, hinla apa thiluong ana kihal doh ahitah jeh in thildang imacha asei nompon ahi. “Thilsoh hi kidang kasalheh in, seiding imacha kahepon, kei leh ka insungmiten kapa luong chunga achaina dia  lhahna leh jana kapeh theilou’u ahitai” tin W. Second chu akaplha jengin ahi.

Alangkhat a thulhut kimu dungjuiyin, hiche thilsoh toh kisaiyin JNIMS Administration Officer holeh Head of Department hon kihoukhomna anei uvin ahi.

Xxxxxxxxxxx

Rev. Dr. Hawlngam Haokip mollemta; UKLF in lunghempi

Imphal, May 5(ET): Kukite lah’a Doctorate (Theologian) masapen Rev.  Dr. Hawlngam Haokip tahsa dammo jeh’in tuni nilhah lam nidan 5:20 velchun akijenna JNIMS a ahinkho ana bei tan ahi. Amahi Covid-19 positive ahi jong akiti.

Rev. Dr. Hawlngam hi Kuki Christian Leaders Fellowship (KCLF) Advisor atuh pet ahin, Kuki Baptist Convention (KBC) a Founding member khat jong ana hi.

Along damsa hi tu leh tu’a JNIMS morgue a um ahin, jing (May 6) jingkah lam nidan 9:00 teng pohdoh hiding, nidan 10:00 vel leh amatah in anabol Bethel Prayer Mountain, Kholep a vuilem hiding ahi.

United Kuki Liberation Front (UKLF) in Rev. Dr. Hawlngam Haokip, Emeritus General Secretary, Kuki Baptist Convention ( KBC) thina chung’a lunghempina thuphon anei uvin ahi. Ama hin adamlai akon a Pathen na atoh keu hilou a gamsung a nam chom chom kikah a chamna lhut na ding a panla nasatah a la ahi tin kiloikhomna chun aseiyin ahi.

xxxxxxxx

Dr. Nehginpao Kipgen longdamsa Leikot a vuilem hita

Imphal, May 5(ET): Kukite lah’a Acamedician, Political Scientist, Writer leh lamchom chom a thusei them a ana kihe Prof. Dr. Nehginpao Kipgen longdamsa chu tuni jan vaigeitah in Leikot kho, Kangpokpi district a Government in jui ding’a dan asem (SOP) phatah a juipum leh Rev. Khuptinlal  Hangsing, Pastor KBC Gambih No. 4 Kin thempu hina in vui ana hitai.

Amahi achesa May nisim 2, 2021 jingkah nidan 6:00 vel’a Covid-19 natna jeh’a akijenna AIIMS Jhajjar, Haryana a ana muolliem ahi.

Alongdamsa hi May nisim 3 nilhah lam a KID/Welfare, KSOD le KWSD lamkai na a Rev. Dr. Paosei Kigpen in lhahdohna anei uva Ambulance a hung kipo ahi.

West Bengal, Siliguri, Guwahati, Manja Karbi Anglong, Ghaspani, Taphou Kuki, Hengbung, Changngoubung, Kangpokpi, Keithelmanbi, Leikop, Saparmeina, Motbung leh mun dang dang phabep in KSO leh CSO ho lamkaina in lunghempina kin ahung kimang peh in chuleh Damdei apat akivuina ding Leikot chan Candel light jong ama ngailutna leh jana in anabol uvin ahi.

AIIMS hospital, Jhajjar, Haryana a  Covid natna jeh’a ana kijen Prof. Dr, Nehginpao Kipgen, O.P. Jindal Global University, Delhi NCR  mollemna chunga Thadou Students’ Association, General Headquarters in lunghempina thu ana phongdohuvin, hitobang mi manlutah khat in eidalhah uh ii-society a dinga manna lentah khat ahi, tin TSA-GHQ in thuso abolna achun ana seiyin ahi.

xxxxxxxxxxxxx

Manipur a Covid-19 jeh’a mi 10 in thina tohkit, thina toh agom’a 434 lhingta

Imphal, May 5(ET): Manipur sunga COVID-19 natna hilen jeh a nikhat sunga mi 10 in thina ana tuobe kit utoh kilhon in, thina toh agomin 434 aphatan, chuleh State sunga COVID-19 natna nei kimudoh jat agomin 33000 sangin atamjo tan ahi.

Nikhat sung seh seh a COVID-19 Positive Case 397 kimudohbe toh kilhon in Manipur sunga Positive Case kimudoh agomin 33,353 alhingtan ahi tin COVID-19 Common Control Room akon thusodoh chun atahlangin ahi.

COVID-19 jeh a thina toh mi 10 ho lah a 4 hi Imphal West akon ahiuvin, 3 hi Imphal East akon, 2 hi Kangpokpi leh khat hi Churachandpur akon ahi

Imphal West leh Imphal East akon a COVID-19 natna nei kimudoh lah a, atampen ahijing nahlai toh kilhon in 187 leh 69 ana kimudoh in ahi. Adang COVID-19 natna nei 28 kimudoh hohi ahileh Kakching akon ahiuvin, 17 hi Kangpokpi, 15 hi Senapati, 13 hi Churachandpur, Ukhrul leh Senapati a 11 cheh, 10 hi Thoubal, chuleh Jiribam leh Chandel akon mi 2 cheh ahi tinjong thusodoh chun atahlangin ahi.

Tuni chun COVID-19 Active Case jong 2,657 in akaltoube in ahi.

COVID-19 natna a kon’a mi 121 in damdohna aneikit toh kilhon in damdohna nei agomin 30,262 alhing tan, ahinla State Recovery Rate chu Tuesday nikho a 91.45 Percent akon in 91.73 Percent ahitan ahi.

Thuso in atahlahbe na a chun, State sunga May 3, 2021 a hunglut Air India flight AI-3713 touna jon 12-18 a toukha jousen Common Covid Control Room No. 18003453818 ahi lou leh ama ama District Surveillance Officers (DSO) akinthei pen a akimupi diuvin hetsahna aneiyin ahi.

Alangkhat ah, Health Institution leh Health Facility ho a manchah thei ding in D Type Oxygen 821 leh B Type Oxygen 323 manchahthei dingin ana kikholkhom in ahi tinjong atahlang in ahi.

Xxxxxxxxxxxxxx

India a mi 3,780 thibe

New Delhi, May 5: India gam sunga mi 3,780 in nikhat sunga COVID-19 toh kisaiya thina anatobe kit toh lhonin, tuni chana India gamsunga Covid natna toh kisaiya thina tohjat agomin mi 2,26,188 ana lhingtan ahi. Fatality rate jong 1.09 percent chanin akemsuh tan ahi

Chuleh tuni sung seh seh’a Covid-19 case thah 3,82,315 mudohbe ahikit toh lhonin, tuni chana India gamsunga covid-19 positive case kimudoh jat agomin 2,06,65,148 ana lhingtan ahi, tin Union Health Ministry thulhut chun aseiyin ahi.

Alangkhat’a, tuni sung mama in Covid natna nei mi 3,38,439 ana damdoh in ahi. Chutoh lhonchun, tuni chana India gamsunga covid natna akon damdoh jat agomin mi 1, 69,51,731 ana lhingtan ahi. Chuleh national COVID-19 recovery rate jong 82.03 percent in aumtan ahi.

Tutun India gamsunga active case 34,87,229 aumin, hichu total case akon 16.87 percent tobang ahi.

India Council of Medical Research (ICMR) akon thulhut kimu dungjuiyin, May nisim 5 nikho chana India gamsunga Covid-19 test kiboldoh jat hi sample 29,48,52,078 ana alhingtan ahi. Hichengse lah’a sample 15,41,299 hohi Tuesday ni’a test ana kibol ahi.

Chuleh tuni chanin India gamsunga Covid-19 vaccine dose 16,04,94,188 akikapdoh tan ahi.

XXXXXXXXX

Covid natna douna dinga mijousen mopohna anei ngai ahi: S.Ranjan

Imphal,  May  5(UNA): Manipur gamsunga Covid case 2000 val mudoh’a aumtoh lhonin Covid-19 natna neiho vetsuina dingin state government in covid center phabep ana hongdoh in ahi.

Covid natna douna dinga government panlahna chung changa ahoulimna achun MLA leh CM a dinga Advisor (Health) Dr Sapam Ranjan in Covid natna symptom neiho jenna dingin government BAL Bhawan leh National Sports University (NSU) a covid centre ahongdoh tai, tin ana seiyin ahi.

Bal Bhawan hi natna nei pasal ho dinga kigong ahin’, lupna 250 nei ahi, chuleh NSU hi natna nei numei ho dinga kigong ahin’, lupna 200 val um ahi. Chubanin, Lamboikhongnangkhong a jong lupna 600 nei ding covid centre khat akigongin ni 2-3 sunga jo a umding ahitai, tin Ranjan in aseibe in ahi.

Hospital chom chom ho’a oxygen kamandoh jat khottohna leh vetsuina achelha jingin ahi. Chuleh government in state sunga private oxygen plant um 2 teni leh JNIMS a um oxygen plant jong vetsuina anei jinge, tin Ranjan in aseiyin ahi.

Chubanin, Oxygen hi state pama konin jong akipolut jingin, Oxygen lhahsamna aumlouna dingin kigotna akinei jinge, tin aseibe in ahi.

RIMS leh JNIMS hospital, chuleh private hospital ho lupna umjat tamsahbe dinga thupeh anaum chungchangin, Ranjan in, covid natna neiho a dinga atumbeh’a private hospital ho’a lupna kikoibe ding ahi, tin aseiyin ahi.

Natong mi lhahsamna aumlouna dinga Ministry noiya Covid galsat dinga Intern holeh PG student ho

recruitment process umding, chuleh covid galsat ahina a anatoh uho chu amakho uva phachom dinga kigong ding ahi, tinjong Ranjan in ana seiyin ahi.

Alangkhat’a, government in jui dinga asem SOP guideline ho mijousen ajuicheh dingin jong temna aneiyin, government in mipi tosotna panglouva Covid adoudal joulou ding ahijeh in Covid natna douna dinga mijousen mopohna anei ngai ahi, tin aseibe kit in ahi.

XXXXXXXXXX

MHS officer ho transfer and posting order le-lahdoh dinga AMTU Tamenglong Zone in ngehna nei

Tamenglong, May 5: All Manipur Tribal Union (AMTU) Tamenglong Zone in tuni chun Tamenglong district mipite ding gelkhohna jalla Manipur Health Service (MHS) officer ho transfer and posting order vohai ahilouleh le-lahdoh dingin chief minister henga ngehna ana nei uvin ahi.

May 2, 2021 nikho a governor mina deputy secretary of state Health and Family Welfare Soiminlian Lengen in Covid-19 wave nina jeh’a gamsung nasatah a alhahsuh laitah’a MHS officer ho transfer and posting order ana sodoh chu demthei doltah ahi, tin ATMU Tamenglong Zone Chief Coordinator Canaan Panmei in thuso abolna khat achun ana seiyin ahi.

Hiche transfer and posting order achun Tamenglong District Hospital a Chief Medical Officer (CMO) leh Tamenglong mite damtheina vetsuina lama mopohna nei, pan phatah, chuleh experience neitah Dr Chambo Gonmei jong transfer dingin apangin ahi, tin ATMU Tamenglong Zone in aseiyin ahi.

Chutoh lhonchun, Tamenglong district mipite ding gelkhohna jalla Chief Minister in hiche Manipur Health Service (MHS) officer ho transfer and posting order hi avohhaiya, ahilouleh ale-lahdoh dingin Panmei ngehna ana neiyin ahi.

XXXXXXXXX

MPCC in MLA anahi Thangjam Nandikishore thina chunga lunghempi

Imphal, May 5(ET): Kshetrigoa Assembly Constituency MLA anahi leh tu naicha a Congress Party a ana lelut MLA Thangjam Nandikishore chu tujingkah in Shija Hospital a akijenna akon ana mollem tan ahi.

Thulhut kimu dungjuyin Thangjam Nandikishore hi May nisim 3 nikho a Covid-19 positive anahi toh lhona hospital a ana kijen’a, tunia thi ahi. Manipur Pradesh Congress Committee (MPCC) in MLA Thangjam Nandikishore thina chunga ana lunghempi uvin ahi.

Alangkhat’a, photchetna umlou thulhut khat kimu dungjuiyin BABINA Diagnostics Centre, Porompat a natong mi 30 Covid-19 positive ana kimandoh in ahi. Dammo veiset toh kisaiya BABINA Diagnostics jonding hon chingthei tah a kivenbitna ding angaito cheh angaiyin ahi.

XXXXXXXXX

TCFC in Ukhrul sung Total Lockdown phongdoh

Ukhrul, May 5:

Tangkhul Naga Long noiya um sub-committee, Tangkhul Coordination Forum on Covid-19 (TCFC) in mipi lah’a Covid natna case alhomtheina dingin tuni (May 5) jankim apat May nisam 15 nikho jankim chan total lockdown um dingin ana phongdoh uvin ahi.

Ahin hiche lockdown sunga hi government natong holeh emergency service ho che-le va-le kikhah louding ahi.

XXXXXXX

Gari gu mi 2 kiman

Lilong, May 5: OC/LIL -PS lamkaina Lilong Police Station akon team khat leh Hav. Md. Kamal Hassan lamkaina CDO/TBL team khat in Lilong PS gate a duty apoh lai uvin akigu (stolen) Honda Dio (grey color)(Regd. No.MNO1AE-8517) khat tujingkah nidan 1:00 vel achun anamandoh uvin ahi.

Chubanin gari gu teni, Lilong Chaobok Mairenkhun akon Md. Subhan Khan (20) S/O Md. Abdul Wahid chuleh Lilong Leihaokhong akon Md.Rohid Ahamed (22) S/O Md. Ayub Khan jong anamat tha uvin ahi.

Kholchilna jouvin themmo chang gucha teni chun hiche Honda Dio hi May nisim 3 nikho nilhahlam nidan 3:00 vel’a Singjamei area akon anaguh lhon ahidan ana seidoh lhonin ahi.

Hiche thu toh kisaiyin gucha teni chunga case khat Lilong Police Station a ajihlut tauvin ahi.

XXXXXXXX

Opnat jeh’a thi mikhat chunga kholgilna natoh chelha

Imphal, May 5: OC Tamei Police Station in tuni jingkah lam nidan 11.30 vel achun Tamei Police Station akon lhang-lhumlam sang 3.3 km vel’a um Langmei kho a Residential School kisahna a natong mikhat opnat jeh a labour camp sunga athiden thu thulhut aumtoh lhonin, police team khat in amun ana dellut in ahi.

Hiche thina tohpa chu Imphal East District hopsunga um Keibi Kumda akon Wangkheirakpam Kabi Meitei (17), S/o W. Inaotombi Singh ahi akiti.

Police team hochun Magistrate henga hetsahna ananei toh lhonin covid natna toh kisaiya athilong leh natong mi adangho test bol dingin Doctor ho ana kou uvin ahi. Chuleh kholchilna achelha jing nalaiyin ahi.

XXXXXXXX

MLA Joykishan in Covid Centre a um hon hahsatna atuo ho’u phongdoh, CCC a umho neh le chah katodoh pehding ahi tia sei

Imphal, May 5(ET): COVID-19 natna neiya COVID Care Centre chom chom adeh a RD Wing Lamphel leh Bal Bhavan a vetkol a umho dinga a-insungmite hoa kon a neh le chah sempehna a boina atuo jingu ahetpeh toh kilhon in Thangmeiband Assembly Constituency MLA Khumukcham Joykishan in tuni chun hiche Covid Care Centre ho ama Assembly Constituency hopsunga um ahijeh leh hiche mun a vetkol a um ho insungmite dinga jong akimvel Containment Zone a phondoh ahitoh kilhon in chele vale jong aboiyin, Covid Care Centre a um jouse mikhat sunga neh le chah khou ni cheh kapehding ahi tin kitepna ana neiyin ahi.

Tunia MLA Joykishan leh agamkai mipi hotoh Iputhou Naotingkhong Pakhangba Hall, Thangmeiband a Vaccination Programme anei nauva chun thulakhomho ana kimupi in, Government seisetna jong neilou hel’a ahoulimna a chun, hiche COVID-19 natna hilen hi khentum neilou, Opposition leh Ruling, hao le vai khentum aneipon ahi. Chuleh Minister leh lhendoh a um MLA jousen jong ama ama Constituency sunga um Covid Care Centre hoa neh le chah angaituo peh sohkei diuvin jong temna aneiyin ahi.

“Mipi hon alhendoh adeh a eihon Government ngah louva chuleh kiseiset tuo jing sanga pan ilah uva Covid Care Centre a sopi umho leh kithopina ngaicha jing hon kithopina angaichat dungjui uva kithopina ipeh phat’u ahitai” tin Joykishan in aseiyin ahi.

“Keiman jong RD Wing a um jouse jingkah nilhah aneh diu neh le chah keima mimal a kon a niseh a kapohdoh peh ding ahi. Chule MLA dang honjong ama ama Constituency sung cheh a Covid Care Centre kihong hoa hitobang ahin bol diu jong kakinem in ahi” tinjong Joykishan in temna aneiyin ahi.

Ahinla, MLA Joykishan thusei holeh apan lahding dan aseina hi phatah a ingaituo leh hatah a demna neilou hel’a Government langa kon a lhahsamna um ahidan kisosalna tobang ahi.

Government in Greater Imphal singa, Assembly Segment 7 a COVID-19 Asymptomatic holeh Mild Covid Patient ho dinga Isolation hon dingin jong thupeh ana sodoh tauvin ahi. Hinla, tuchan in neh leh chah lampang toh kisai imacha seidoh anei naipon ahi. Chuleh, Containment Zone leh chele vale phal ahilou jeh in Covid Ward a um ho insung mite ding in neh le chah thah le najong aboi jingin ahi.

Alangkhat a, MLA Joykishan in mipi ho hengah Government akon a SOP ho phatah a jyicheh dingin jong temna aneiyin, chuleh mipi honjong Vaccine akikap cheh uva natna hilen a kon a kivengbit cheh dingin jong temna aneiyin ahi.

Xxxxxxxxxxxx

UNC in Dr. Nehginpao Kipgen lunghempina nei, Citizenship anei hinam tia dohna nei

Imphal,  May 5(UNA): United Naga Council (UNC) in aphat changlou tah a Dr. Nehginpao Kipgen in COVID-19 jeh a May 2 nikho a All India Institute of Medical Science (AIIMS), Delhi a COVID-19 jeh a thina atuo na chung’ah alunghempi nau aphongdoh un ahi.

UNC akon thusodoh a chun adalhah a-insungmite lunghempina leh alha nom’a, acholdo nadin jong vailhahna thuthot ana neiyun ahi. Thusodoh in aseina a chun thiluong jabolna leh Scholarship ahina jabolna akipen ahi. Hinla, alou theilouvin Kuki Inpi leh Government akon a kihetnom chu ahileh Constitutional/Legal tah a Dr. Nehginpao Kipgen Senapati District hopsunga Kangpokpi/Sadar Hills a kivui thei a chuleh India Citizenship jong ahiding doltah a amu hitam? Hiche dohna hi Manipur State nam chom chom chenna a dohlou theilou ahi ahi tin aseiyin ahi.

Aseibe na a chun, State sunga Muslim hihen, Meitei hihen ahilou leh thinglhangmi hijong leh Foreigner khat kimoh vui hin Manipur gamsunga boina ahin sodoh thei ahi. Hiche jeh a hi UNC in Dr. Nehginpao Kipgen Citizenship chung chang kidong ahi in, chuleh State Government in Kuki Inpi hiche thu hi akipat masang uva ageltoh masat diu ahi tinjong UNC thuso chun aseiyin ahi.

Xxxxxxxxxx

Kpi a COVID-19 jeh’a thina toh um panta, ICU phatah koi ngaita

Kangpokpi, May 5(UNA): Natna tijat umtah COVID-19 in Kangpokpi District  sunga mihem aja a sim ana tokah jou nungin, tuni chun Shija Hospital Imphal leh District Hospital Kangpokpi a Temporary Isolation Ward ah pasal kum 78 khat leh numei kum 60 khat COVID-19 jeh in ana muolliem in ahi.

Alangkhat a, ICU leh Isolation Ward phatah aumlou hi akisaipi mopohna neiho leh State Government in phatah a ahin gelkhoh loi louleh District sunga COVID-19 jeh a thina toh hung punbe jingthei ding dinmun in aum tan ahi.

Tunia natna nei athahbeh a 10 mudohbe ahitoh kilhon in, Kangpokpi District sunga Active Case chapang lha 2 velbep khat jaona in 80 alhingtan ahi.

Ramgailong Laimanai, Kangpokpi District akon kum 78 pasal khat May 4 ni jingkah chun Shija Hospital Covid Ward a vetkol in ana um in, tuni jingkah nidan 7:00 vel chun adammo na ana gim in, vangset umtah in jingkah nidan 8:00 vel chun ana muolliem tan ahi. Amahi District sunga COVID-19 Second Wave a thina toh masapen ahitan ahi.

Chukit leh, Kangpokpi Ward No.4 a um nupi kum 60 Diabetes natna neikhat dinmun asanjeh chun Kangpokpi Christian Hospital ah pohlut in ana um in, RAT Test kibol akon in COVID-19 natna nei ahi mudoh in aum in ahi.

Amahi hapta masa a chu Covishield akhatvei nadia ana kikap dan injong akiseiyin ahi. Amanu Peripheral Pulse Oximeter (SPO2) jong 45 Persent bep hidan in aki seiyin ahi. Akinthei pen in Doctor ho thumop dungjuiyin Oxygen peh in ana um in, jinglam nidan 2:30 vel chun a dinmun akhohset jeh chun District Hospital Kangpokpi a Doctor ho thusah dungjuiyin COVID Care Centre, Leikop ah akinthei pen in pohlut in ana um in ahi.

Hinla, hiche hi boina kipatna ahung hitan ahi. Ajeh chu hiche COVID Care Centre hi tuni kimangcha pan ahi. Dan dungjuiya chu COVID Patientkoi hileh SPO2 80 Percent noi hijouse chu COVID Care Centre hilouva Isolation Ward a vetkol dingdol ahi in, chuleh tule tuhin District sungah ICU leh Isolation Ward kisuhtah aum naipon ahi.

Chomkhat jouvin a dammo nu District Hospital a ama dinga Emergency Isolation Ward a koi ding in ana nungpoh kit uvin ahi.

Imphal sunga Private Hospital jenga jong lupna ding mun ana on tahlou jeh in ana kipothei tapin ahi.

Hitobang natna dinmun hasatah a hi Oxygen bou kipa a kanu ahinna hu kichai ding kamoh nga jeng ding ham tin damlou nu chapa khat in aseiyin ahi.

Hiche hi District sunga COVID-19 jeh a hahsatna toh kija masapen ahi nalaiyin, hitobang ahung umjing peh leh Kangpokpi District hi COVID-19 jeh a thina toh tampen dinmun a hung umthei ahi.

Tule tua Kangpokpi District adinga angaikhoh pen chu ICU leh Isolation Ward phatah ngaichat ahi in, hiche hin thina toh theiding dinmun a umho ahin suhlhom thei ding ahijeh in State Government leh mopohna nei Department hon hatah a ahin gelkhoh angaiyin ahi.

Tuni chan a COVID jeh a thi hi natna neijeh ahitan ahi. Hinla State Government in phatah a natna neiho ahin vetkol joulou leh COVID-19 jeh a thina toh hung punbe jing nalai ding ahi.

Alangkhat ah, Health Department order No.MED-170/25/CC-HS-HEALTH dated 2nd May 2021 dungjui leh Kangpokpi AC MLA Nemcha Kipgen makaina a May 3 nikho a toukhomna toh kilhon in Kangpokpi AC, Saikul AC leh Saitu AC a Building khat cheh a numei leh pasal 50 umthei nading Community Home Isolation Centre semdoh ahitoh kilhon in, tuni chun Kangpokpi DC in Order ana sodoh in ahi.

Tunia Community Home Isolation Centres hettheiya kiphongdoh ho ahileh Kangpokpi AC adia BJP Office, Kangpokpi DHQs, Saikul AC a dinga Thangtong Hr. Sec. School, Saikul leh Saitu AC a dinga Sanaton Sankrit Vidyalaya, Charhajare ahi.

Hiche Community Home Isolation Centre ama ama Assembly Constituency COVID-19 Management Committee hon avetsui diu ahi.

Hiche mun a hi manbeiya Asymptomatic COVID-19 Case hojong inmun a Toilet, Bedroom leh adang dang atumbeh a umlou ho umthei diu ahi.

Health Department a District Home Isolation Team hon aphat dungjuiya vilna leh vetlhahna anei jing diu, chuleh Community Home Isolation Centre hohi Leikop a Mild Asymptomatic ho dinga kisem COVID Care Centre kithopi dinga kisem ahi tinjong DC Order chun aseiyin ahi.

Xxxxxxxxxxxx

Journalist ho Government in Frontline Warrior in hetpehna nei hen tia AMWJU le EGM in kilolna nei

Imphal, May 5(ET): Tunin Manipur press club mun ah All Manipur Working Journalists Union(AMWJU) leh Editor’s Guild Manipur (EGM) hon thukin kihoukhomna (emergency meeting) anei uvin ahi.

Hiche thukin kihoukhomna akon AMWJU in thuso abol na achun, kihoukhomna na a thulhuhna chom chom 2(ni) anei un, thulhuhna akhat na achun, Journalist na tonglai ho hi state government in covid-19 hise douna a frontline Warriors tin hetpeh na leh phondohna nei hen, chuleh Anina chun, bolding leh bollou ding ho dan juiding 5 anuoi a bang hin asem uvin ahi. Phat chomkhat sung manipur press club mun a Press meet/conference ahilou leh mipi um khom him him kha hiding. Reporter ahilou leh correspondents ho press meet kibol na ho a ajao lou diu a khamgah ahi.

Mimal hihen Koi organisation hijong leh press meet bol nom jousen amatah in recording abol ho video hihen  thuso ding hijong leh whatsapp leh mail a kon a thusoh la khom hokom a athot diu. Ahilou leh anuoi a kipe whatsapp number leh mail a hi thot jingthei ahi (8259860539 || mail: amwju1974@gmail.com) reporter jouse media tour ahilou leh pickup programme ho a jaolou diuva hetsah ahi. Government a kon a thusoh jouse Directorate of information and public relation (DIPR) ahilou leh whatsapp number 825986539 leh mail amwju1974@gmail.com a thot ding ahi. Government lam a kuon covid-19 toh kisai a thudoh na ajaothei,donbut thei leh dohthei ding ho min media hokom a ahin pehlut diuvin ngehna abol uvin ahi.

Xxxxxxxxx

Moreh a Covid vaccine kikap

Tengnoupal, May 5(ET): Indo Myanmar border Town Moreh a tuni in covid vaccine kikap na ana um in ahi. Hetthei khat chu Moreh khopi sung ah covid natna nei ding a ginmo hung um pan kit ahitan ahi. Tuni a vaccine kikap na chu Primary Health centre Moreh a ana kibol ahin, Ex-minister Onjamang Haokip, M. Thoiba singh  President Meetei council Moreh,  Moreh government Higher secondary school a principal le jilkung ho chuleh Moreh ward no (4)  meitei leikai akon mi phabep jaona in mi 86 lam in vaccine kikap na ana nei uvin ahi.

Xxxxxxxx

Tengnoupal district DC thah lemna kinei

Tengnoupal, May 5(ET):  Moreh Police I.B Conference hall a tuni in vaipo thah ding Naorem Praveen Singh Deputy Commissioner( D.C) Tengnoupal District le L. Gojendro Singh ADC Moreh teni lemna kingon ana kinei in ahi. Kingon achun Metei Council Moreh(MCM), All Community Development Organization Moreh(ACODOM), Manipur Muslim Council Moreh(MMCM), Hill Tribal Council(HTC), Tamil Sangam Moreh le Gorkha Samaj Sameti lamkai ho in panlah na ana nei uvin ahi.  Kingon achun Additional SP (Ops) M. Amit Singh le SDPO Moreh Meghabarna singh  teni in jong panlah na ana nei lhon in ahi.

Kingon achun medical department lam akon in Dr. Lamkhoneng Haokip Chief Medical Officer(CMO) Tengnoupal District, Dr Manoranjan Singh M.O in charge Sub–district hospital  Moreh le Dr. Kh. Shantikumar MO In-charge PHC Moreh ho in palah na ana nei uvin ahi. Kingon achun tu le tua Moreh khopi sung a covid wave hung kit chung chang ahin kihou na an anei uvin, mipi in phate a kivenna anei ding uvin DC thah pa chun temna ana nei in ahi. Covid chung chang a kivenna ding chung chang a DC pa in hetsah na ana neina a covid akon kivenna ding ahi maitom kitom lou ho leusahding, social distancing juijing ding chuleh inna kon kin nei lou a potlouding tiho ahi tin ana sei in ahi.

Xxxxxxxxxxxxxxxx

 Rajya Sabha MP Mary Kom in Northeast akon Covid positive ho kithopina a dangka lakh 3 toh

Imphal, May 5: Manipur akon Rajya Sabha Member Mary Kom  in tuni in Member of Parliament Local Area Development (MPLAD) fund akon in dangka lakh 3 ahin podoh in, Delhi a Covid akon thina toh thi ho vuilem na ding a jahding ahidan hetsah na ana nei in ahi. Hiche sum chu Oxygen ATM a jahding ahidan jong tahlang na ana kinei in ahi. Hiche sum chu Helping Hands Society ho ang a pehdoh na ana kinei in ahi.

Hiche society hi Delhi akon NGO ahin, Northeast miho kithopina ding a kibol ahi. Robin Hibu, IPS, President Helping Hands Society in asei na a tuni a Mary Kom in eihin kou chu kithang aat pi umtah ahin, hitabang a boilai tah a Northeast mi kithopina ding a hitabang a panlah na hung kinei hi kipa pi umtah ahi tin ana sei in ahi. Tuni kithopina phondoh na ana nei toh lhon Mary Kom chu Northeast MP ho lah a Northeast mi khopi len dung a kithopina pe amsa pen ahitan ahi akiti.

XXXXXXXXXXX

DDMA, CCpur Chairman makai nanoi’a CCpur District Hospital a Oxygen plant kisem vetlhah hi

B.Lalboi Gangte

CCpur. May 5 (ET): District Disaster Management Authority (DDMA), CCpur Chairman Pawan Yadev IAS, DC CCpur makai nanoi’a CCpur District sung’a Covid-19 Second Wave  doudal na ding’a kigon tup ding dan seikhom naleh thulhuhna lah ahitoh lhon in tunin (May 5) CCpur District Hospital Campus ah Pressure Swing Adsorption (PSA) Oxygen plant ding kibolna Chairman, DDMA-CCpur in vetlhah na ananei in hiche achun Amrita sinha, IPS, SP CCpur, Thangboi Gangte, MCS Additional DC, S.Khaikhopau Ngaihte, MCS Additional DC, S. Ginmuan Ngaihte, MCS, SDO CCpur, Dr. Vumchinpau Tonsing, CMO, Dr. T. Vanlalkungi, MS leh official phabep in ana kilhonpi uvin ahi. Chuleh vetlhah na phatsung’a Construction lam akon official hon jong kithopi na anape uvin ahi.

Hetthei khat chu India gamsung’a Covid-19 Second Wave jeh’a State tamtah’a Oxygen lhahsam jeh in mitam tah in thina ato jing toh lhon’a Manipur Government in agelkhoh lheh jeng in ahi. Hiche jeh hin State sung’a Oxygen kining lhing tah aum theina ding angai to jing lai ahi toh lhon’a Imphal khopi sung’a Hospital chom chom’a Oxygen plant semdoh ahi nabang’a District dang ho ajong Oxygen plant semdoh ahi theina ding in pan nasatah’a alah jing lai ahi. Hiche chung thu’a DTC Hall, Tuibong ah DMMA meeting phatsung in Covid-19 Second Wave sung’a manchah ding CCpur District Hospital campus sung’a kibol Oxygen plant jong agannathei pen’a manchah pat ahi thei na ding in nikho 10 sung’a jo tei ding ti ahi. Hiche tohgon molso ahi nading’a Additional DC leh MS District Hospital mopoh ahi toh lhon’a Oxygen Plant hi Health Ministry akon bol ding leh Dec. 31, 2020 sung’a jotheng ding’a hetsah anahi vang in fund imacha ana um lou jeh’a natoh ana kipan theilou ahi. Chuleh  Covid-19 Second Wave  gangtah’a ahung kimaito toh lhon’a kin lebong’a natoh hi chelha ahi. Pressure Swing Adsorption (PSA) Oxygen Plan bol nading toh kisai’a Ministry akipat hetsahna ana um chun CCpur District ah Public Works Department in mopoh na alah ding ti anahi jong leh fund anamu lou jeh uchun anapan thei pouvin ahi. Tun Medical College bol na ding toh kisai’a mopo Manipur Police Housing Corporation in mopohna alatan ahi.

Alangkhat’a Oxygen Plant hi chai ahiphat leh CCpur District Hospital ah Oxygen cylinder poh leh kai lele ngailouva Ward tin’a pipeline akon damlou oxygen ngaicha ho peh thei hi ding ahi. Hiche oxygen plant hin minute khat a Oxygen 200 liter asemdoh thei ding chuleh

Oxygen toh kisai’a CCpur District Hospital in tuhin D type cylinder 29, B type cylinder 29, Oxygen Concentrator 8, NIV BIPAP 2 aum in ahi.

xxxxxxxx

 CCpur District a Covid +ve case thah 42 kimudoh; mi 2 thina toh

B.Lalboi Gangte

CCpur. May 5 (ET): Integrated Disease Surveillance Program (IDSP) Churachandpur in tuni (May 5) nilhah nidan 3:00 chan’a CCpur District sung Covid-19 toh kisai report asodohna’a Covid +ve case thah 42 leh  Positive Patient khat in thina ato ahidan atahlang in ahi. Chuleh +ve case thah kimudoh 42 lah’a 23 hi Military personnel ahin 19 hi tolsung mi ahi chuleh thina toh hi tolsung mi ahi. Covid-19 natna’a thina toh hi Checkon (B. Aijalon) akon Nengkhonei @ Neinu (48) ahin tahsa damlou na jeh’a B. Aijalon kho’a pansa um ahi in Samaritan Hospital a test akibol na’a Positive ahi dan hetdoh anahi toh lhon’a kijen manlouva Covid-19 Dedicated Ward, District Hospital, Churachandpur a thi ahi. Chuleh alongdamsa SOP guideline phatah’a juipum’a KKL lhanmul’a vuilem anahi tan ahi.

Alangkhat’a CCpur District ah IDSP, CCpur in data apeh jou nung nilhah lam nidan 5:00 vel in CCpur District Hospital ah thina anatoh in ahi. Amahi Khaizalian (55) S/o (L) Haukham of ZEO Compound akon ahin ama jong hi Covid natna jeh’a ahi. Chuleh alongdamsa hi Immanuel EBCC in Headquarter Veng lhanmol ah vuilem anahitan ahi. Tolsung mi Covid-19 positive 19 kimudoh na mun hochu V. Munhoih, Sim Veng, Zellang Veng, IB Road, Thingkangphai, Checkon/B. Aijalon, Kangvai AR, Old Bazar, Chiengkonpang, Mualvaiphei, Bethany Christian College, Lanva leh Mualveng akon ahi. Chuleh tuhin CCpur District sung’a active case 186 chuleh thina toh mi 51 alhing tan ahi.

Hetthei khat chu CCpur District ah Covid-19 natna jeh’a kivetkol na ding in achesa May nisim 1 nikhon Covid-19 Care Centre, Lanva TD Block, Lingsiphai honthah in aum in chuleh tuni chan’a mi 30 aum tan ahi. Chuleh Covid-19 positive lah’a symptom nei leh alel diu ho vetkol na ding Isolation Ward, District Hospital jong achesa May nisim 2 nikho’a hondoh ahitoh lhon in  tuni chan in mi 14 aum tan ahi. Tuhin  CCpur District sung’a positive 61 Home Isolation ah vetkol in aum in ahi.

xxxxxx

West Bengal a TMC ho um chan deilou vetsah na’a BJP in munchom chom’a toumun kiphinna bol

Imphal, May 5 (ET) : West Bengal gamsung’a Trinamool Congress ahung um doh  akon gam hoina leh gamsung chonchan khanchan jouse amangthah gamtan chuleh Party hin India Democracy jong apalkeh in ahi tin Lok Sabha MP Dr. RK Ranjan in tunin Nityaibai Chuthek a um BJP office ah thuso mihotoh kihoulim na’a chun ana tahlang in ahi. Chuleh TMC worker ho chonval na sangtah in demna akinei naban’a West Bengal election result ahung sodoh masang leh akisodoh jou nung’a TMC toson ho umchan hi vangset umtah ahi jeh’a BJP hin tuni India sung pumpi’a lungkimlou vetsah na’a kiphinna kibol ahi ati.

Hiche toh lhon’a Trinamool Congress in West Bengal gamsung vaihop akit ding ahitah jeh in atoh le tham chuleh lunggel jat chom chom aneiho hi India toh kitohlou ahi. India toh kigamgi Nepal, Pakistan leh Bangladesh gamsung’a Covid second wave ahepha pouvin ahin India gamsung’a hibang’a Covid second wave jeh’a thina toh anitin’a akibe jing hi asung’a kichem Political Party phabep umtei ding ahi tinjong MP in agin mona thu aphongdoh in ahi.

Alangkhat’a Trinamool Congress worker ho umchan leh chonval naho demna leh deilou vetsah na BJP Thoubal District in jong Thoubal Wangmataba Puja Mandir Hall ah toumun kiphinna anabol uvin ahi. BJP Manipur Pradesh leh Nagaland a General Secretary Abhay Kumar Giri in Trinamool Congress ho umchan/chonchan hi Democracy gam toh kikal/kitoh lou ahi. Chuleh Trinamool Congress worker hon BJP worker ho chung’a khut analha naoban’a Mahila Morcha ho anasuhgenthei nao leh party worker phabep hinkho chan analah naochung’a demna sangtah anei in chuleh mipite chung’a TMC ho chonval na akisaipi authority in agannathei pen’a action alah ding in jong ngehna anei in ahi.

 Xxxxxxxx

Naoriya Pakhanglakpa Assembly Constituency a MLA umlou jeh mipin hahsatna sangtah tohta

Imphal, May 5 (ET): Naoriya Pakhanglakpa Assembly Constituency sung’a MLA umlou jeh in Constituency sung’a cheng mipiten hahsatna sangtah ato toh lhon’a Government in mipite hahsat naho agannathei lam’a asuhfel lou leh Covid patient ho lamlen laidung’a kipodoh pan ding ahi tin Mongsangei Kanba Apunba Lup (MKAL) in gihna anei in ahi. Chuleh thuso mihotoh akihoulim na’a kiloikhomna Convenor AK Ibomcha in State Government in gamsung mun tin’a Covid Care Centre semdoh ding’a phondohna anei nalah’a hiche constituency apang pon hiche hi vangset umtah ahi ati. Hetthei khat chu Naoriya Pakhanglakpa Constituency sung’a inn 30,000 val akium in ahin MLA aum lou jeh in genthei hahsatna ho lhutna ding leh hitobang phat lai tah in bel ding koima akinei pon ahi tin AK Ibomcha chun asei in ahi. Chuleh Covid patient ho lamlen dung’a ahung kipuidoh tilouva ngeh naleh kiphinna hohi itih hijongle koiman gelkhoh na neiponte tinjong aseibei.

Alangkhat’a kiloikhomna Co-Convenor S Surendra Chenglei in gamkai sung’a cheng ho ding’a Covid Vaccination Centre jong Samurou a um Mongsangei gamkai sung ahikit in hiche hi kilometer 15 lam’a gamlha ahi. Hijeh hin Covid lou kikapsah ding mi atamval jeh in jankim akon ding pan loi jong aum tah jeh in gamkai mipin hahsatna sangtah kitoh ahi ati. Aman aseibena’a gamkai sung’a koitobang Covid natna vei aum jong leh authority khat chan gamkai sung containment zone in aphongdoh pon chuleh Primary contact ho jong test akibol lou jeh in mipi alunglinglao gam tan ahi ati.

 

SHARE
Previous article5th May 2021 news
Next article7th May 2021 News
Editor at Eimi Times.