4th May 2021 News

4th May 2021 News

77
0
SHARE

Mipi ding gelna a Lockdown bulhit set a chepi dinga Supreme Court in Centre leh state sorkar thuhilna nei

New Delhi, May 3: Supreme Court Sunday nikho a Centre chuleh state sorkar in India gam pumpi a Covid-19 natna achalbe jing vetkol nadinga Covid-19 Lockdown bulhing set a chepi ding angaito dinga thuhilna aneiyin ahi.

Pandemic dinmun toh kisaiya hearing chom chom aneilhah jouva court sangpen in thuhilna anei ahi. “Pandemic second wave aumjom a chuleh akhohset jeh a Central Government chuleh state government in natna vetkol nadinga pan alah sang ding u chuleh kigotna jong anei ding uva thupeh kinei ahi.

Chuleh centre leh state sorkar in natna gangtah a akilahson to nathei mipi kikhopna kin ho akha ding uva jong hatah a kaseiyu ahi. Mipi ding gelna a Lockdown koiding jong angaito theiyu ahi”, tin Supreme Court in aseiyin ahi.

“Chuleh Lockdown akikoi na dinmun auma ahileh aphat alhin masanga adeh a angaicha jat/nam ho ngaichat suh bulhit nadinga kigotna jong nei tei ding ahi”, tin aseibe uvin ahi.

xxxxxxxxxx

Manipur a Oxygen lhasam; Hospital ho’a Oxygen Supply kisuhlou jeh’a COVID-19 natna neiho asuhboi ding’a um

Imphal, May 3(ET): Medical Science Report dungjuiyin Covid-19 natna neiho thuchom hitaleh mihem maimai jong Oxygen beiyin Minute 3 kalval ahing theipon ahi. Mihem khat dinga Minute 6 seh a Oxygen Saturation Level 90% noi ahilou leh Oxygen Saturation Level 3% a akheh nem leh (Level 96 apat 93% a akhehsuh leh) amanu/amapa chu Medical Oxygen Support a um tina ahi.

COVID-19 Second Wave sung chun April hapta masa lang chun niseh in atamthei pen in mudoh in ana um jing in, nikho phabep injong 250 chunglam natna nei athahbeh in mudoh in aum jing in ahi. Private Hospital hoa COVID-19 Care Ward thuchom hitaleh Manipur sunga Hospital lentah ni –  RIMS leh JNIMS injong COVID-19 natna nei ana dimset tan ahi. Miphabep tilou adangse ICU hihen COVID-19 Care Ward a umho hijong leh atamjo in hiche Hospital teni a akingaicha jing Oxygen Supply phatah in angaicha jing tauvin ahi.

Hinla, tumasang jep a Principal Secretary, Health and Family Welfare, Government of Manipur in May 1, 2021 nikho a hiche Government Hospital len teni RIMS leh JNIMS a dinga Oxygen agon chu hiche Hospital teni a COVID-19 natna nei gim dehset ho kivetkolna a hahsatna leh tijatna ahin lhut thei dingin aum in ahi.

Principal Secretary ( Health and Family Welfare) V. Vumlunmang akon a thupeh kisodoh a chun RIMS Hospital a dinga D Type Cylinder kiguong chu 120 ahi. Hiche jat mana JNIMS adin jong gon ahi.

Thulhut kimu in aseina a chun, hiche Oxygen athahbeh a gon a ahung um hi Shija Hospital and Research Institute panlahna noiya Oxygen Generator Plant ahung set jeh leh Private a Oxygen kisemna HVS Oxygen Plant , Patsoi leh M/s Manipur Gas Pvt. Ltd. Bishnupur mun a Medical Oxygen umjat dungjuiya kingam ahijeh ahi akitin ahi.

Hinla, State thunei vaihom hon Medical Oxygen ahin guon uhi RIMS leh JNIMS a angaicha ding jat kholtoh masalouva kibol hidan in akiseiyin ahi. RIMS Hospital akon thulhut kimu chun aseina ah, niseh in D Type Oxygen Cylinder 270 hi ngaichat ahi jing in ahi. RIMS a 5 PSA Oxygen Generator Plant ahung kimanchah a kon in D-type Oxygen Cylinder nikhat in 50 tobang akiladoh thei jingin, hinlah hiche Oxygen ho hi Casualty leh Non-Covid Section ho a COVID-19 natna neilou ho dinga kimangcha ji ahi ati. Hiche toh gom in RIMS ah niseh in D-Type Oxygen Cylinder 220 akingaicha jing nalaiyin ahi. Tule tuhin RIMS ah ICU lupna 10 leh COVID-19 natna neiho ding in Non-ICU Bed 62 aum in, tu le tuhin hiche ho jouse akilodim sohkeiyin ahi tinjong RIMS sunga kon a thulhit kimu chun aseiyin ahi.

JNIMS jong hitobangma ahikit in ahi. Covid Care Unit ah Non-ICU lupna 98 aum in, chuleh lupna abon in akilodim tan, chukit leh 94 hi Oxygen kithopina a um ahiuve. ICU lupna jong 10 aum in vetkol a um jouse jong Oxygen kithopina a vetkol a um sohkei ahiuvin ahi. JNIMS a mopohna neiho kihoumatpina ana kineina a chun nikhat sunga Medical Oxygen kingaicha ding adih chet aseithei pouvin ahi.

Private Hospital ho kichomkoi taleh JNIMS leh RIMS in D-type Oxygen Cylinder 200 val cheh angaichat diuva ginchat ahi. Hinla, State Government in niseh a D type Oxygen Cylinder ahin gonpeh hi 120 bou ahi in hiche Hospital teni a COVID-19 natna nei vetkol a umjing ho dinga bitna himong ding hinam tihi mijouse thudoh khat ahitan ahi.

Khonung leh Medical Oxygen lhahsam jeh a Manipur sunga COVID-19 natna nei mihem 10 apat 15 gei niseh a hung muolliem thei ding dinmun in aum tan ahi.

Imphal Times in HVS Oxygen Plant, Patsoi ana kijahmatpi na  a chun nikhat sunga D Type Cylinders 220 a kisemdoh jouvin ahi. Hiche Oxygen kisemna hi Private a ahi vanga Principal Secretary in thupeh ana sohdoh ho dingjuiya tohgon achelhah thei nadinga Government thunoiya um ahi.

M/s Manipur Gas Pvt. Ltd. Bishnupur, in jong State sunga kingaicha akehkhat (50%) jong hattah a asemdoh jou nahnah dan in aseiyun ahi. Amaho a kon in nikhat sunga Oxygen kisemdoh jat chet leh ajohson ahilou leh acho a pangho henga jong ijat chet kithotdoh ham tijong aseidoh pouvin ahi.

Hitobang dinmun hoa kon in State Government in Oxygen agontoh dan toh kisaiya kigotna phatah aneilou ahidan kichehtah in mudohtheiyin aum in, RIMS leh JNIMS a Covid-19 natna neiya vetkol a umho leh Oxygen ngaicha jing ho dinga ahung lhahsam khah ding hi amaho hinkho chanpha a tijatna ahin sodoh ding in aum in ahi.

Xxxxxxxxxxxxxx

ATSUM in State Government henga June 25 kah’a ADC Election nei dinga kitepna avel a hetsahna nei

Imphal, May 3(ET): All Tribal Students’Union Manipur in ADC Election nei nading Notification sodoh dinga kinoptona ana kinei toh kilhon a State Government in June 25 kah Election nei dinga April 7 nikho a MoU soi kaina kinei toh kilhon in avel in State Government heng’ah hetsahna anei kit in ahi.

Khaiminlen Doungel, Information and Publicity Secretary, ATSUM in aseina a chun, mihem jouse COVID-19 natna tijat umtah toh hinkho mangkhom akihina ban’ah Manipur State sunga adeh a thinglhang miten India Constitution Article 371(C) noiya Constitutional Rights kipeho panna in nitin a ngaichat akibelap jing in ahi. Autonomous District Councils phatah a manchah theiya aumlou jeh in thinglhang miten imalam jouse ah boina leh hahsatna akitoh jingin ahi. India danpi noiyah thinglhang mite atum a kivaipohna ding chanvou kipe hojong amachang phatchomna ding ngaito a Political Agenda kisemhon munemna leh donse in anei tapouvin ahi.

Aman aseina a chun, V.V. Giri, President of India in Constitution Article 371 C dungjuiya Manipur Legislative Assembly (Hill Areas Committee) Order 1972,  ana sodoh dungjuiyin Hill Area a District Council ho Power leh Function ho chu Hill Areas Committee(HAC) mopohna leh State Government in HAC phatsahna dungjuiya tohgon achelhahpi ding ahi. Hinla, Manipur State Government in Autonomous District Council ho General Election aphatcha a nei ahi nadinga Hill Areas Committee in nivei jen 8th October 2020 leh 12th April 2021 toukhomna a phatsahna anapeh nungin jong nahsah in anei pouvin ahi.

Chuleh, ADC Election aphatcha a nei ahina dia phutna kineiho hi thinglhang akon a MLA honjong kithutoh tah in tosot cheh uleh aga jong umthei ding ahin, hinla ATSUM hi Political Student kiloikhomna ahi tia phutna kineiho phatsahpi lou phabep jong aum nalaiyin ahi tinjong aseiyin ahi.

Anhinla, ATSUM hi akichepi chu adeh a thinglhang mite thaneina suhhat jing ding leh ADC jong thinglhang mite dinga Constitutional Rights khat ahitoh kilhon a ATSUM in thinglhang mite thaneina kimoh lahmang theilou ding ahi tia aphatcha a, ADC Election um nadinga State Government henga phutna kinei ahi in, hinla Tribal MLA hon gelkhoh tah sangin a Political Party Principle ahilou leh lamkaipa’u lungholna in akisaboi jing tauvin ahi tinjong aseiyin ahi.

Aman aseibe na achun ATSUM in aphatcha a, ADC Election nei nadinga phutna akinei jing lai hin ATSUM in asung leh apolam a kon in boina tamtah ana kitoh jing in, mun chom chom a kon in kiloikhomna hahmosah tei nading in gihna leh seisetna tamtah jong ana kitoh jing in ahi. Chuleh phitna kinei ho suhboi tei nading in lam chom chom akon injong tohgon chom chom aum jing nalaiyin ahi. Hinla, thinglhang mipi jouse tosot naleh adeh a thinglhang gam hoa kikoikhomna bahkai hoa kon a tosotna aum jing toh kilhon in ATSUM jong hichan gei akilhung theiyin aphatcha a ADC Election um nadingin injong State Government toh kinoptona MoU soi kaina jong ana kineiyin ahi ati.

Kinoptona nunung pen chu 7th April 2021 in ana kineiyin, 5th May 2021 kah a Autonomous District hoa General Election neina ding Notification sodoh dingin kinoptona ana kineiyin ahi. Chuleh, 25th June 2021 kah a ADC Election nei dinga State Government in thulhuhna anei ahidan jong 5th April 2021 nikho thusodoh mijouse mutheiyin in tahlah in ana um in ahi.

Aseibe kit na a chun, hetgilna neihoa kon in COVID-19 hi a-itih a hung umjing ding ahitan, aphat phat a mopohna nei hon Standard Operating Procedure (SOP) ho phatah a jui pum’a COVID-19 kimaitopi a hinkhom ding dan joh hi kijil angaiyin, chuleh State Government hihen Local Self Government jong phatah a manchah theiya um jing angaiyin, hichena dinga hin Local Government leh Legislative Assembly Election jong COVID-19 sung ahijeng vangin Election Commission of India  in SOP asohdoh dungjuiyin chelhahpi ahijing in ahi. Hichema banga State Government injong phatah a ADC Election achelhah thei nadia thinglhang kho jouse a Vaccination Programme phatah a achelhahpi uva chuleh SOP ho phatah a chepi ahithei nadia pan alah diu angaiyin ahi.

Manipur State Government in jong 7th April 2021 nikho a kinoptona MoU soikaina kinei banga 5th May 2021 masang ngeiya ADC Election umna ding Notification ahin sodoh uva chuleh 25th June 2021 masang ngeiya Autonomous District Councils Election nei dinga 5th April 2021 nikho a thusodoh ana kinei dungjuiya kinoptona ho ahin suhbulhit diuvin jong ATSUM in avel in hetsahna anei kit in ahi.

xxxxxxxxxxxxxx

Mamata Banerjee in term 3 channa ding’a West Bengal CM dinga kihahselna May 5 nikho teng nei ding

Kolkata, May 3: Trinamool Congress (TMC) in tuchung West Bengal assembly election a goljona nasatah ananei kit toh lhonin, TMC Chief Mamata Banerjee in term 3 channa a dinga chief minister panmun atuh kitding toh lhona May 5 nikho teng kihahselna aneiding ahitai, tin TMC senior leader leh minister Partha Chatterjee in tuni chun ana phongdoh tan ahi.

Trinamool Congress noiya MLA kilhengdoh thah hon tuni kihouna aneinau achun kilung khat tah in legislative party leader dingin Mamata Banerjee ana lhengdoh uvin ahi, tin TMC secretary-general Partha Chatterjee in aseiyin ahi.

TMC legislator hon outgoing House/Assembly lui’a speaker anahi Biman Banerjee chu Assembly thah a jong pro-tem speaker dingin ana lhengdoh kit uvin ahi.

TMC legislator ho kihouna akichai achun member kilhengdoh thah hon Assembly  a kihahselna May 6 nikho teng anei diu ahi, tin minister Partha Chatterjee in thuso bol miho henga ana seiyin ahi.

Ahin TMC chief Mamata Banerjee in aman atetna Nandigram assembly constituency achun ama dinga akithopi (aide/assistant) a anapang, chuleh tua Bharatiya Janata Party (BJP) lamkai hi, Suvendu Adhikari henga ana gollel in ahi. Kitetna nasatah ana chelhah nungin, Election Commission of India (ECI) website dungjuiyin Adhikari in vote 1,956 in goljona ana neiyin ahi.

Nandigram a vote thahsimna dinga TMC in petition ase ECI in ana sanpeh lou vangin Banerjee in result chung changa Supreme Court a hehba sendingin aseiyin ahii.

Agom gomin TMC in West Bengal state sunga assembly constituency 294 lah’a 213 chunga goljona ananei uvin, BJP in 77 chunga goljona ananei uvin ahi. Seat 292  a bou vote simna kichai nalai ahi in, seat 2 a vote simna chelha nalai ding ahi.

West Bengal assembly election hi March 27 leh April 29 kikah sunga phase 8 a ana chelha ahi.

Mamata Banerjee hi 2011 kuma TMC in kum 34 jen kijoma ana thahat jing Left front ho chunga goljona ananei toh lhona amasapena dinga West Bengal chief minister ana pangdoh ahi. Kum 5 jouva re-election khat’a goljona ananei kit toh lhona anivei channa a dinga CM ana tuhkit ahi.

Xxxxxxxxxxx

Gari gu khat, gari leh sum pum’a kiman

Imphal, May 3(ET): Lilong Police hon Lilong Atoukhong kon mi gari gu khat anaman uvin, gari kigu chutoh sum Dk. 70,000 pumin ana mat tha uvin ahi. Hiche gari gupa kithopi mikhat ana kisel mang in, police hon ahojing nalai uvin ahi. Mat’a um chu Lilong Atoukhong akon Singamayum Farid Khan (31) s/o Singamayum Abdul Salam ahi, akiti.

Thulhut kimu dungjuiyin, Numei Police panna in Lilong police station akon team khat in OC Lilong PS lamkaina leh SP Thoubal vaisaina noi, ANJUMAN Lilong member hotoh Lilong Atoukhong a inn khat kholna ananei uvin ahi.

Hiche kholna achelhah sunga chun gari gu khat ana mandoh uvin, ama a konin white colour Honda Activa registration number umlou khat toh, gari kiguhpet a tool box sunga um hidinga ginmo, sum Dk. 70,000 ana mudoh uvin ahi.

Thudoh aneinau akon Farid Khan in akiloipi Lilong Atoukhong kon mi mama Singamayum Imran Khan (26) yrs s/o Singamayum Riaj Khan toh chun hiche active chu Ghari Mamang Leikai, LINGEL Office mai, Mahindra Showroom koma kona April 30 nilhahlam nidan 2:45 vel’a ana guhlhon ahidan ana seidoh in ahi. Ahin Singamayum Imran Khan chu ana kiselmang manin ahi..

Hiche thu toh kisaiyin themmo chang teni chunga case akijihlut in, kholchilna jong achelha jing nalaiyin ahi.

Hetthei khat chu, hiche active kigu aneinu, RK Ruby in April 30 nikho a chu, a-gari gu ho chung changa hetna neiya thulhut aumleh kipaman Dk. Lakh 1 pehdinga Facebook a ana tahdoh ahi.

Xxxxxxxxxx

Manipur a kum 18 chunglang ho ding’a vaccination drive bolding tohgon ana chelha joulou

Imphal, May 3(ET): Centre in tuni chun state leh UT ho manchah dingin vaccine dose crore 16 leh lakh 54 man beiyin ana pedoh’e, tia All India Radio akon thulhut aumjeng vangin Manipur panna in India gamsunga state phabep hon, kum 18 chunglam miho a dinga mass vaccination drive May 1 nikho a pat dinga tohgon ana umchu vaccine lhahsam jeh in ana pan thei pouvin ahi.

Thulhut kimu dungjuiyin, dose kimangdoh hi ase (wastage) ho pumin crore 15 leh lakh 79 lam alhingin ahi. Union Health and Family Welfare Ministry in state holeh UT ho koma vaccine dose lakh 75 lam aum nalaiye, tia anaseina bana, ni 3 sunga vaccine dose lakh 59.7 tobang state holeh UT ho pehbe dinga anasei ahi.

Ahin COWIN a amin ana pelut ho dinga May 1 nikho apat vaccine kapna patdinga nana kiphongdoh chu vaccine lhahsamna jeh in Manipur state sunga jong ana kipan theipon ahi. Shija Hospital and Research center injong hospital a vaccine stock abei toh lhonin tunia pat vaccine kap angatan ahi.

State Health department akon thulhut kimu dungjuiyin, private hospital hon Serum Institute of India (SII) akon vaccine akilah diuva kisei ahi. Hinlah Imphal a private hospital ho’a kon thulhut kimu dungjuiyin, vaccine lahna dinga private hospital hon serum institute akihoupi uleh SII in ama ama state government a kona joh vaccine akilah diuva ana seipeh u ahi.

Tuchanin thuchen aumnai pon, private hospital hon ni 7 masanga deposit amakoi louleh vaccine chang theilou diuva thulhut kimu khat in asei toh lhona, vaccine kikapna hi hung khongai jep dingin aumtan ahi.

Hetthei khat chu, Serum Institute of India CEO Adar Poonwalla in Chief Minister phabep leh “Indian Corporate figure” thanei tah tah phebep a kon gihna amu toh lhona United Kingdom lama ana jin doh ahi. Hiche jeh hin SII in vaccine semna leh supply bolna lampang in boina tamtah atoh jingin ahi.

Ahin Telegarph akon thulhut kimu dungjuyin CEO Poonwalla hi India hung kile dingin kigotna aneichai ahitan, ahung lhungteng vaccine lhahsamna jeh’a boina hohi sutlhap’a aumding ginchat ahi.

XXXXXXXXXXX

Thoukang lou leh apo mikhat kiman

Thoubal, May 3: Thoubal Commando hon tujingkah nidan 5:50 vel’a, Yairipok-Kasom lamlhong juiya um Somrei a checking abolnau akon gamdang khutsoh thoukang lou (Godzilla mosquito coils) carton box 58 le apo mikhat ana mandoh uvin ahi, tin HC. Md. Rakib, G-63, CDO/TBL Unit in OC/NSK-PS henga thulhut anapeh chun aseiyin ahi.

Akimanpa chu Old Checkon akon mi- Shamurailatpam Rishikumar Sharma (28)S/o Sh. Nobendro Sharma ahi, akiti. Chuleh Sharma hin thoukang lou hohi Bolero kang (white) khat’a ahin poh laiya Thoubal Commando hon ana mat u ahi.

Mat’a umpa leh akiman thil hochu superintendent of Custum Preventive Force, Pallel khut’a pehlut dingin ana gong uvin ahi.

XXXXXXXXXX

COVID-19 um sung’a numei naovop ho ding atumbeh a Centre semdoh dinga MSCW in ngehna nei

Imphal, May 3(ET): Manipur State Commission for Women (MSCW) in tunin State Government heng’ah COVID-19 natna punbe jing lai ahitoh kilhon a numei naovop hon Hospital leh Healthcare Centre hoa damsel a nao aneithei nadiuva atumbeh a guontohna aneipeh diuvin ngehna aneiyin ahi.

MSCW Chairperson Binota Meinam in aseina a chun,  COVID-19 natna hilen jeh in kivetkolna mun(Health Facility) jouse jong natna hilen doudalna ding bouvin akimangcha tan ahi. Hiche jeh hin adeh in numei naovop hoding in genthei hesohna apunbe jing in ahi.

Ahithei leh State Government in District jouse a atumbeh a naovop holeh naonei ho ding Hospital/Primary Health Centre/ Health Care Centre khat agonpeh diuvin ngehna aneiyin ahi.

Amanun aseibena a chun, numei naovop hohin Hospital avil jing nauva konna natna baitah a akilahson theiyu ahi. Chuleh  numei naovop damlou ho vetkolna ding atumbeh a Centre gonpeh goh hilouva numei naovop hon natna hilen sung leh Lockdown sunga nao neiho phatah a lou le ai toh vetkolna phatah apeh diuvin jong ngehna aneiyin ahi.

Commission in aseibe na a chun,  numei naovop COVID-19 natna nei a kijen jing lai hojong phatah a nao aneithei nadiuva Hospital ahilou leh Centre gonpeh ahina din jong ngehna aneiyin ahi. Chuleh naonei jouva   nu leh cha kikah a noichep akon a COVID-19 natna kilahson bai ahijeh a jong hitobang thu ho hetthemsah ahithei nadia tohgon leh Guidelines phatah a semdoh ding adeisah dan jong Meinam in aphongdoh in ahi.

Xxxxxxxxxxxx

Khamnathei joh kiman

Imphal, May 3(ET): Lilong Police hon Lilong Haoreibi Turel Ahanbi akon Phundreimayum Yasmin (28) W/o Phundreimayum Mujibur in Khamnathei ajoh thuguh amu dungjui uvin ANJUMAN member ho jaona in amun adellut uvin anamandoh taovin ahi.

Akiman nu inn kholchil na le vetchilna anei naova kon Brown sugar 262.8 gram, ANREX- CP cough syrup 67 leh SP capsules 579 ana mudoh uvin ahi.

Xxxxxxxxx

Manipur in akinaipi State ho akon D Type Oxygen Cylinder 374 Imphal polhungta

Imphal, May 3(ET): State sunga COVID-19 natna nei ahung punbe jing toh kilhon a Oxygen ahung lhahsam khah ding venna in State Government in kinaipi Assam leh Nagaland State akon in Oxygen ana lamdohbe in ahi.

Tunin D Type Oxygen Cylinder agomin 374 chu Assam Nagoan leh Dimapur Nagaland a Oxygen kisemdohna mun akona hung kipo chu State Capital, Imphal ahunglhung tai, tin Manipur Chief Minister N. Biren Singh in aseiyin ahi.

State sunga Oxygen semna tundoh ahina ban’ah, Government in jong Manipur sunga Oxygen ninglhingsel a aum jing nading in kinaipi State ho akon in Oxygen akilambe in ahi. Tunin D Type Oxygen Cylinder 374 chu Nagoan leh Dimapur akon in akimu tan ahi tin aseiyin ahi.

State sunga Hospital hoa Oxygen ninglhingsel a aumjing thei na ding in Chief Minister in Sunday nikho chun State sunga Oxygen umjat hetdoh thei nading in velvetna leh toukhomna ana neiyin, chuleh Oxygen kisemna mun cheh ah Officer khat cheh jong mopohna peh in ana um in ahi.

Chief Minister in COVID-19 doudalna a mipi ho venbit ahi nadia ahithei chan a pan kila jing ding, chuleh mipi jousen jong State Disaster Authority akon a Covid-19 SOP kisemdoh ho phatah a juicheh dingin jong temna aneiyin ahi.

Tule tuhin Manipur ah Oxygen kisemna 2 aum in, khat chu Jawaharlal Nehru Institute of Medical Sciences (JNIMS) leh adang khat chu Regional Institute of Medical Sciences (RIMS),Imphal a um ahi in, Covid-19 Ward leh Unit ho a kimangcha ahi.

Ninglhingset a Oxygen pehdoh ahijing theina ding in Thoubal leh Churachandpur a jong Oxygen semdohna kitungdoh ding ahi tinjong Chief Minister in kitepna jong ana neiyin, chuleh nikho 10-15 jouleh manchah hipai thei ding ahitai tinjong aseiyin ahi.

Gah hetthei khat chu, COVID-19 natna nei hatah a apunbe jingtoh kilhon a Oxygen hatah a ngaichat leh manchah jing ahijeh leh Oxygen atamthei chan a kholkhom ahitgeina ding in Regional Institute of Medical Sciences (RIMS), Imphal in Friday nikho chun Department jouse a, Routine Operation Service jouse May 1, 2021 apat thuthah um masangse a umsah louding in ana kah uvin ahi.

Xxxxxxxxxx

Covid-19 Second Wave douna ding’a SOP hi ikidalnau ahin’, kithokhomna hi itha hatnau ahi: Kpi AC MLA

Kpi, May 3: COVID-19 wave masa douna a pan alahna chunga national level changeiya pachatna anachang Kangpokpi Assemby Ccontiuency MLA Nemcha Kipgen in ama assembly constituency sunga Covid-19 wave nina douna dinga tohgon jat chom chom ananei pankit tan ahi.

Covid-19 wave masa phat laiya Kangpokpi leh Senapati district a dinga Minister in-charge anahi, MLA Nemcha Kipgen in tuni chun district administration, police, SDO ho, chuleh local body hotoh conference hall, DC Office Kangpokpi a review meeting ana neiyin, ama assembly constituency sunga Covid-19 wave nina douna dinga kigotna anei cheh diuvin ana thumop in ahi.

Chuleh department jouse kigotna, bolkhel theiho, SOP dan kitah dan ho, vaccine kikap, kitiho chung chang vetlhahna ana neiyin, wave nina douding dan toh kisaiyin kihouna ana neiyun ahi.

Kihouna achun agang thei penna Leikop a Covid Care Centre hondoh ding, Covid natna neiho jenna dinga lupna 20 umna Intensive Care Unit (ICU) tobang accomodation koidingin kinoptona ananei uvin ahi. Chubanin Community Home Isolation Centre jong agangthei penna tundoh dingin kinoptona ananei uvin ahi.

Medical department hon oxygen cylinder 50 leh purse oximeter 100 beh akoi tei tei ding jing MLA Nemcha in thupeh ana neiyin ahi. Chubanin district police in SOP phatah’a juiya aumna dinga phatah’a vetsuina aneiya, dan palkeh ho chunga dan dungjuiya gotna apeh dingin thupeh ana neiyin, chuleh district administration in thilman kal chung change vetsuina anei dingin jong ana thupeh in ahi.

Alangkhat’a, containment zone hojong khah chahkheh dingleh phatah’a vetsuina nei dingin mopohna nei department ho ana thupeh in ahi. District administration akon thulhut kimu dungjuiyin district sunga um kho 20 tobang containment zone in akiphongdoh tan ahi.

Wave nina chung change ahoulimna achun MLA Nemcha Kipgen in wave nina hi ahatdan leh agan dan rocket toh atekah in, tahsa chunga hiche hitpi (virus) hi alut teng, chop (lungs) abulu pai ji in, jenna ding phat umji lou ahi, ati. Chutoh lhonchun, japi lah’a natna akithejal leh atuhtang ahah ding jeh in, mipi jousen natna kithejal louna dinga nasatah’a kivengtup cheh dingin temna aneiyin ahi.

‘SOP hohi eiho kidalna bang ahi in, pan lahkhom hi eiho thahatna ahi, hijeh’a chu SOP ho phatah’a ijuicheh uva, pan ilahkhom cheh diu ahi, tin MLA Nemcha in ana seiyin ahi.

Chuleh Kangpokpi Assembly Constituency sunga cheng mipi jousen lung opkaina umlouva vaccine akikap cheh dingin temna aneiyin, kijendam danga kvendoh aphajoi, tin ana seiyin ahi.

Alangkhat’a, May leh June lha a dinga anchang kihomvah tadinga phondohna aneitoh lhonin, wave nina sunga koima kel thoh aumlouna dinga local civil body hon mopohna nei department holeh authority ho akithopi diuvin jong temna aneiyin ahi.

District sunga positive case 8 ana kimudohbe toh lhonin, Kangpokpi District sunga active case 57 aumtan ahi. Hichengse lha’a kon mi 48 chu home Isolation akibol uvin, mikhat Shija hospital a aumin, mi 2 Bal Bhavan Covid Care Centre a aumin, chuleh mi 6 isolation camp a aumin ahi.

Medical department akon thulhut kimu dungjuiyin tuni chanin district sunga mi 4500 vel bou vaccine akikapdoh nalai uvin ahi.

Xxxxxxxxx

28 channa Pangal Black Day

Imphal, May 3(ET): Delhi Association of Manipur Muslim Students (DAMMS) in tuni in a 28th  vei channa Pangal Black Day  anit uvin ahi. Hiche nikho chu achesa May 4, 1993 a nam le nam  kikah a kiboina a mi 100 vel in thina anato geldoh na toh kisai a kimang ahi.  Tuni nikho hi Manipur a ding’a vangset umtah nikho chuleh Manipuri Muslim ho ading a lunghem nikho ahi toh lhon a athi ho geldoh na kingon hi kinei ahi tin kiloikhomna akon thuso kimu chun asei in ahi. Hitabang nam le nam kikah a boina akon ahi boina lentah ana soh a mi tamtah in a innmun adalhah uva genthei tah a hinkho ana man u ahidan jong tahlang na ana kinei in ahi. Anikho akinit toh lhon in Delhi Association of Manipur Muslim Students (DAMMS)  in independent Special Investigation Team (SIT) khat semdoh ahi a mona nei ho pohdoh ahina ding in temna ana nei uvin ahi. Meitei nam ho injong PAngal ho ang a hiche thilsoh toh kisai a ngaidam athum ding u adei dan ujong hetsah na ahin nei uvin ahi.

Xxxxxxxxxx

Manipur a COVID-19 natna 362 kimudohbe, Active Case 2,071 lhingta, mi-7 thibe

Imphal, May 3(ET): Manipur sunga COVID-19 tuni nikho sung sehseh a 362 mudohbe ahitoh kilhon in Manipur sunga natna nei kimudoh jat agomin 32,523 alhingtan, chuleh mi 7 in thina atuobe kit toh kilhon in thina toh agomin 422 alhingtan ahi tin State Health Department in aseiyin ahi.

Athahbeh a natna kimudohbe toh kilhon in

State sunga Active Cases umjat 2,071 alhingtan ahi. Sunday nikho chun Active Cases 1,823 ana lhingtan ahi.

Imphal West leh Imphal East akon in COVID-19 natna nei kimudoh ana tampen nalai uvin, 146 leh 122 ana kimudoh in ahi. COVID-19 natna neiya mudoh a um adang 23 hohi Kakching akon ahiuvin; 22 hi Bishnupur; Thoubal leh Churachandpur akon 14 cheh; 8 hi Kangpokpi; 5 hi Chandel; Tamenglong, Senapati leh Noney akon 4 cheh leh Ukhrul leh Kamjong akon mi khat cheh ahi tinjong Common COVID-19 Control Room akon thusodoh chun aseiyin ahi.

Tunia Manipur a COVID-19 thina toh lah a mi  3 hi Imphal West, 2 hi Thoubal chuleh Imphal East leh Kakching akon mikhat cheh ahi tinjong thusodoh chun aseiyin ahi.

Alangkhat a, natna akon mi 107 in damdohna anei utoh kilhon in tuni channa COVID-19 natna akon a damdohna nei agomin 30,030 alhingtan ahi. Hinla Recovery Rate vang 93.04 Percent in akemsuh kit in ahi.

Thuso in aseibe na a chun State sunga hung vanleng a April 25 nikho Indigo flights 6E-6181 touna jon 16-21 leh 6E-21 touna jon 29-35 a toukha jousen Common Covid Control Room No. 18003453818 ahilou leh ama ama  District Surveillance Officers (DSO) akinthei pen a akimupi diu ahi.

Thulhut nunungpen a kimu dungjuiyin, tuni chan a State sunga Vaccine kikap agomin 20,9,074 alhingtan ahi.

Chuleh, kum 45 chunglam jousen akinthei pen a RIMS, JNIMS, District Hospital ho, CHC ho, PHC holeh lhendoh a um Private Hospital Vaccine Centre hoa Vaccine kikapcheh ding injong thumopna aneiyin ahi.

xxxxxxxxxxx

CCpur District a Covid Vaccination Centre thah 3 kihongdohbe; Covid +ve case tha 30 kimudoh

B.Lalboi Gangte

CCpur. May 3 (ET): Covid-19 natna akon kivenbit na ding’a India Government panlah nanoi in kum 45 chunglam Covid-19 Vaccine kapna achelha jing lai ahitoh lhon’a CCpur District sung’a Vaccination site thah 3 ah vaccine kapna tunin akipan tan ahi. Hetthei khat chu Covid-19 Vaccine hi Vaccination Centre mun phabep a kikap jong leh achesa hapta ni sung’a kum 45 chunglam miho kikap sah ding aniseh’a akibe lap jing in Vaccination Centre a kikapsah ding mi atam val tah jeh’a hiche akon natna akilahson ding ven na’a SOP guideline phatah’a jui pum’a vaccine kap ahi theina ding’a Chief Medical Officer (CMO), CCpur in Centre umsa hotoh kithokhom ding’a Centre thah 3 abelap ahi. Chuleh belap’a um Covid-19 Vaccination Centre hochu Pearsonmun PHSC, HWC, YPA Hall, New Lamka leh ADC Hall, Tuibong ahi. Centre ho ahin  tuni jinglam nidan 10:00 akipat chun Covid-19 vaccine First dose leh second dose kap pat anahi in chuleh CMO, CCpur akon thuthah aum masangse’a hiche mun ahi vaccine kapna chelha jing ding ahi.

Hiche toh lhon’a Observation Room ding’a Pearsonmun ah PHSC manchah ding chu amun alemchang lou jeh in Medical lam leh YPA phatsah na dungjui in mun lemchang YPA Office joh amangcha uvin ahi. Chuleh Covid-19 Vaccination Centre 3 ho’a vaccine kap pat ahitoh lhon in Pearsonmun ah Vaccination Centre chu N. Liankhanpau, President, YPA Pearsonmun Unit  in hon dohna anei in ahi. Chuleh Covid-19 Vaccine kap natoh kisai’a tuni akon chun Centre chom chom ah Token system chepi ahi jeh in vaccine kikap hon jong Social distancing phatah in ajui thei uvin ahi.

Alangkhat’a Dr. Vumchinpau Tongsing CMO, CCpur in Centre kimang thah ho vetsui na nei ding mopo ding agong dungjui in JC Khuptong, MHS in YPA Pearsonmun Unit kithopi na’a YPA Pearsonmun Unit office avettup ding; Thangkhanpau, MHW in YPA New Lamka block kithopi na’a YPA Hall, New Lamka chuleh Seithang Mate, MPW in KKL Tuibong kithopi na’a ADC Hall, Tuibong avettup ding ahi. Chuleh Covid-19 Vaccine kikap na hi DIO panna’a Covid-19 Vaccination Centre chom chom’a angai bang’a chelha jing ding chuleh  CMO Conference hall a Covid-19 sample lah na jong angai bang’a chelha jom ding ahi ati. Covid-19 Vaccination Centre ho’a nikhat sung’a kum 45 chunglam mi First dose a mi 100 chan kap hi ding chuleh Second dose kikap ding hon jong hiche mun ho anailut jeng thei ahi.

CCpur District sung’a tuni nilhah nidan 3:00 chan in Covid-19 +ve case thah 30 akimudoh in ahi. Chuleh District sung’a tuni chan’a case 2,307 alhing tan hiche lah’a 2,133 adamdoh tah chuleh active case 124 aum nalai in ahi. Covid jeh’a thina toh 50 ( Pasal 34 leh numei 16) alhing tan chuleh tuni Covid case thah kimudoh hohi District Hospital, Samaritan Hospital, Sielmat Christian Hospital, ERAGT leh Close contact akon ahi uvin ahi tin CMO chun atahlang in ahi.

xxxxxxx

Excel Diagnostic Centre in building thah leh machine thah lhandoh nanei

B.Lalboi Gangte

CCpur. May 3 (ET): Churachandpur District hopsung’a um Excel Diagnostic Centre, Hill Town in tunin Building thah leh Machine thah kilamdoh ho lhandoh na anei in ahi. Chuleh lhandoh’a um machine thah hi Diagnostic Ultrasound System ahi. Hetthei khat chu Excel Diagnostic Centre hi Churachandpur College Main Gate mai’a ana um chu achesa April lha bul’a Nazareth Nursing Home kom Immanuel Building ana kichonlut toh lhon’a tuni Machine thah holeh building lolut thei na ding’a hondoh naleh lhandoh na kingon ana um ahi. Excel Diagnostic Centre hi Lamka khopi sung’a ding’a natna chom chom test bol thei na Centre ahi naban’a Imphal a Babina Diagnostic, Mona Clinic leh Lal Path Labs, New Delhi a ding’a Authorized Collection Centre khat jong ahi.

xxxxxx

CCpur District a April lhasung’a Police hon SOP leh Traffic daan palkeh mi 605 akon Dk. 1,99,000 ana leudohsah

B.Lalboi Gangte

CCpur. May 3 (ET): Churachandpur District Police in achesa April lha sung’a District sung’a SOP juilou leh Traffic daan palkeh agom’a mi 605 akon TR-5 Challan a ana leudoh sah Dk. 1,99,000/- chu Treasury office leh Bank ah anapelut tauvin ahi. Covid-19 natna toh kisai’a Government in mitakip jui ding’a daan asem dungjui’a khopi sung’a mask kibol lou mi 360 akon in Dk. 72,000/-, Social distancing jui lou mi 10 akon Dk. 4,000/- , SOP juilou mi 370 akon Dk. 76,000/- ana leudoh sah ho District Treasury Office leh State Headquarter, Police noi’a Police Covid-19 Nodal Authority, ADGP (Law & Order) Manipur account ah napelut tauvin ahi.

Hiche toh lhon’a April lha sung’a Traffic daan palkeh mi 235 akon Dk. 1,23,000/- analeudoh sah uvin ahi. Hiche lah’a Motor Vehicle Act. noi’a Section 177 (General provision) palkeh mi 226 akon Dk. 1,13,000/- , Section 177-A (wrong parking) noi’a mi 3 akon in Dk. 3,000/-, Section 179 (thupeh jabol lou) noi’a mi khat akon in Dk. 2,000/-, Section 184 (One Way traffic violation) noi’a mi 2 akon in Dk. 2,000/- chuleh Section 194D noi’a mi 3 akon in Dk. 3,000/- analeusah’u ahi. Traffic daan palkeh mi 235 akon kileusah Dk. 1,23,000/- hi 50% Manipur Road Safety Fund leh 50% hi Director, Transport Department, Manipur Account ah apelut uvin ahi.

Xxxxxxxxxx

Covid-19 Joint Task Force, Puorabi in Covid toh kisai’a awareness leh poster campaign hondoh nanei

Imphal May 3: Imphal East District hopsung Laining thou Puthiba Community Hall, Pourabi ah janni (May 2) nikho chun Covid Appropriate Behaviour leh Poster Campaign toh kisai in awareness programme hondoh na ana um in ahi. Hiche campaign hi Covid-19 Joint Task Force, Puorabi, Imphal East tohgon nanoi’a kibol ahitoh lhon’a Imphal East Superintendent of Police Jogeshchandra Haobijam in hondoh na ananei in chuleh hiche campaign hi Lalmai leh Khundrakpam Assembly Constituency hopsung’a chelha ding ahi. Kingon kibol lona ajeh hi gamsung’a Covid natna apunbe jing toh lhon’a mipi ho heng’a kivengbit tah’a um jing ding’u hettohsah ding deisah’a kigong ahi.

Hiche toh lhon’a MLA Th. Lokeshwar Singh vetsui nanoi in Khundrakpam Kendra Development Committee (KKDC) in Khundrakpam Mayai Leikai, Pangei Yangdong leh Keibi Heikakmapal Awang Leikai sung’a cheng mipi ho heng’a ann-chang, dal, thao, ngari, sabon leh thil chom chom jong anahoppeh uvin ahi. Kingon achun Chief Medical Officer, Imphal East District Dr. L Indira, President of COVID-19 Joint Task Force, Pourabi, K Kalachand, Pradhan ( Waiton Gram Panchayat), P. Surbala leh Lamlai Police Station akon personnel hon jong pan anala uvin ahi.

Xxxxxx

Moreh Battalion in manchah phabep mandoh

Imphal, May 3 (ET): HQ IGAR (South) vetsui nanoi’a um Moreh Battalion in achesa May nisim 1 nikho chun Moreh kom Zoujang Forest gamkai sung’a inn khat akon in thal leh meichang phabep anamudoh uvin ahi tin thulhut chun aseiyin ahi. Akimudoh manchah hochu Assault Rifle khat panna’a magazine leh meichang chuleh Chinese hand grenade 2 ahi. Machah ho jouse chu kholchilbe ahi nading in Moreh Police khut’a anapelut tauvin ahi.

Xxxxxxxxxxx

India a nikhat sung’a Covid-19 case thah 3,68,147 kimudoh; Mi 3,417 in thina toh

New Delhi, May 3 : India gamsung’a nikhat sung in Covid +ve case thah 3,68,147 akimudohbe toh lhon’a agom’a case 19,925,604 alhing tan ahi tin Union Health Ministry akon chun mudoh thei in aum in ahi. Chuleh Covid natna jeh’a thina toh mi 3,417 aumbe toh lhon’a agom’a Covid natna jeh’a thina toh 218,959 alhing tan ahi. Hiche naban’a achesa April nisim 29 nikho’a active case Million 3 anakhelbep chu tun 3,413,642 alhing tan chuleh nikhat sung’a Covid natna akon adamdoh discharge kibol mi 300,732 aumbe toh lhon’a agom’a natna akon damdoh 16,293,003 alhing naban’a recovery rate 81.77% in aum tan ahi tin Govt. in aphongdoh in ahi.

Hiche toh lhon’a Covid natna akijen na ding Hospital jouse adim gam tan, oxygen jong lhasam lheh jeng ta chuleh morgue leh kivuina/kigona (crematorium) adeh’a Delhi ah adim gamtan ahi. Chuleh Union Territory leh State phabep sung’a Covid doudal na ding’a lam chom chom’a kigah na jong akikoi jing tan ahi.

Xxxxxxxxx

India in tuchan a Covid 19 Vaccine Dose 157 Million kapdoh ta

New Delhi, May 3: India in Sunday nikho chan in agamsunga Covid 19 vaccine akapdoh jat chu million 157 dose alhingtan ahi. Gamsung pumpi huop a phase 3 na nikho 2 nia vaccine kapna ah kum 18-44 chan sungah mi 86,000 ho kap ahiuve. Media thuso lah a Centre in March lha a kipat a vaccine ho athahbeh a order abol tapoi kiti chu jouthu ahi tin Centre in aseiyin ahi.

Sunday nikho chan in vaccine dose kikap doh jatchu ahileh 156,816,031 alhingtan ahi. Hichea hin health care workers 9,428,490 hon dose masa kikap nalah ah chun ajau uvin chuleh mi 6,265,397 honjong dose 2 na ana kikap uvin ahi. Chuleh Frontline Workers 12,757,529 honjong dose masa ana kikap uvin chuleh 6,922,093 honjong dose 2 na ana kikap uvin ahi.

Kum 45 leh 59 sungah mi 53,280,976 hon dose masa ana kikap uvin chuleh 4,008,078 honjong dose 2 na akikap uvin ahi. Kum 60 chunglang miho jong 52,618,135 dose masa ana kikap uvin chuleh 11,449,310 ho chu dose 2 na jong ana kikap uvin ahi.

Chuleh Sunday nikho jingkah chun vaccine dose 1,648,192 jong pehdoh in ana umin, chuleh beneficiary 989,700 ho chunga dose masa chu kap ahiuvin chuleh beneficiary 658,492 ho chu dose 2 na kap ahiuvin ahi.

Monday nichun Union Health Ministry in aseina ah media akona thuso aumna ah Centre in Covid 19 vaccine thah order abol tapoi kiti chu jouthu ahi tin aseiyin ahi. Hichea thuso chun aseina ah Centre in Covid 19 vaccine order abolna chu March 2021 ahitai tia asodoh ahi .

Xxxxxxxx

Centre tohgon boita, Coronavirus chunga jona neitalou: Rahul Gandhi

New Delhi, May 3: Congress lamkai Rahul Gandhi in Monday nichun central government hi, policy paralyzed ahi in chuleh hiche jeh a coronavirus natna chunga jona anei lou ahi tin aseiyin ahi.

Tweet abolna ah Congress lamkai chun, policy paralyzed GOI virus chungah jona aneipon, kimai topin, alhem semhih in tin ajih in ahi.

April 28 ajong Gandhi in Central government in coronavirus vaccine semna dingin mipi sum tamtah amang uvin hinla tuhin hiche vaccine mama chu mipi komah mantam tah tah in joh ahi ati.

Aman aseiben gamdang hoa hitobang a vaccine mantam danhi aumpoi tia Modi government chu demna anapeh ahi. Mipi ho sum chu vaccine company ho komah peh ahiuve, hinla tuhin mipi hon mantam tah a achoh diuvin aume atin ahi.

Rahul chun central government in coronavirus data hi adihtah asodoh poi tia ngohna anei ahi.

Twitter a aseina ah Modi lamkai na noiya government hin pandemic toh kisaiya data hohi Control abola asodoh nomlou ahi tiajong asei ahi. Employment leh development tobang a Central government in corona data dihtah mipi komah aseidoh poi ati. Pandemic boina hi aventup joulou ujong himai thei ahi hinla thudih a im uvang hi tin tweet abolna ah chun aseiyin ahi. India in Sunday nikhoa chu Covid 19 natna case  3,68,147 tobang registered ana pehna ah Covid 19 natna jeh a thina toh jong 3417 an umin ahi tin Union Health Ministry data chun atahlang in ahi. Hiche toh kilhon a case umjat chu agoma 199,25,604 alhingin ahi.

Chuleh niseh a case thah umna ah May 1 nichun lakh 4 val ana lhingin, hinla janni chun 392,488 in akhehsuh tan ahi.

Chuleh hiche Covid 19 natna jeh a thina toh jong tuhin 2,18,959 alhingtan ahi chuleh tua active case umjat jong 34,13,642 aume tin government data kimu chun aseiyin ahi.

Xxxxxxxx

CT Scan velkhat kibol hi X Ray vel 300 kibol toh thakhat ahi, Cancer Risk akona kiveng dinga Guleria in sei

New Delhi, May 3: AIIMS director Dr Randeep Guleria in Monday nichun patients Covid 19 mild symptoms neihon CT Scan leh bio markers ho aha manval uva ahileh CT Scan manval jeh a radiation hoa kona cancer natna kaithei ahi tin aseiyin ahi.

Mild cases hoa dinga CT Scan hi bolngai lou ahi, CT Scan velkhat kibol toh X-ray vel 300 kibol hi kibang ahi. CT Scan manval akona khonung leh cancer natna kaithei ahi tin Guleria in gihna anei in ahi. Aman diagnosis ho kiman val naho thu aseina ah hiche hohi mild symptoms neihoa dinga ngaicha lou ahi tin aseiyin ahi.

Mipi tamtah in Covid Test kibolna a positive ahi a ahileh CT Scan lahtei dingin agel uve ati.

Chuleh biomarkers, CRP, D-Dimer, LDH, Ferritin leh adang dang hojong mild symptoms leh normal saturation hoa aman nading aumpoi ati.

Biomarkers hoa ahiding banga kiha ngapval hin tahsa sukha thei khop a treatment aval a aumsah/ apehthei ding ahi ati. Biomarkers hi moderate illness hoa doctor ho thupeh dungjuiya man ding ahi tin Guleria in aseiyin ahi. Monday nichun India in Covid 19 natna case thah 368,000 leh thina toh 3417 nikhat sungin ana mudoh be kit tan ahi tin Union Health Ministry data kimu chun aseiyin ahi.

Xxxxxxxxx

Journalist hojong Frontline Workers ahiuve tia Punjab, MP, West Bengal, Bihar, Odisha leh Uttarakhand hon phongdoh ta

New Delhi, May 3: Punjab Chief Minister in Monday nichun journalist accredited leh yellow card kipe jouse chu frontline Workers ahiuve tin aphongdoh in ahi. Punjab sunga Journalist accredited jouse leh yellow card journalist jouse chu Covid frontline Workers a sim ahiuve tin Raveen Thukral, Media Advisor to Punjab Chief Minister chun aseiyin ahi.

The editor’s Guild of India in Journalist hojong vaccine kapna lampanga phat peh masat ahi nadiuva media organisations jousen a scribe hou vengbit dingin ngehna anei in ahi. Thuso aneina ah the Guild in Covid 19 natna jeh a journalist thina toh ho chungah akhohsah na thuphon aneiyin ahi.

April 2021 sunga jong hiche virus natna jeh a journalist 52 valin thina anato u ahi. Chuleh Delhi a um Institute of Perception Studies in aphondoh dungjuiya Covid 19 natna jeh a journalist thina toh chu 100 avaltai tin aseiyin ahi, hiche hi April 1, 2020 akipat a kisim ahi tin the Guild chun aseiyin ahi.

World Press Freedom Day  nikhoa News18 in journalist ho frontline Workers a phongdoh state ho phondoh najong anei in ahi. Hiche masanga Madhya Pradesh injong Media professional accredited , State government in frontline Workers dinga aphondoh sa ahi. Hiche thuphon anei na ah Chief Minister Shivraj Chouhan in aseina ah Journalist hon a duty bolpet uva jong Covid 19 natna jeh a ahinkhou hi tijat umtah dinmun a umjing u ahi atin ahi.

Hiche jeh a chu accredited journalist jouse chu Madhya Pradesh sunga frontline Workers a phondoh ahiuve. Amaho hi kive tup diu ahi tin Chouhan in Twitter a video asodoh na ah chun aseiyin ahi. Chuleh Journalist 4000 val tupet a hi State government toh accredited kibol ahi tin public relations department in aseiyin ahi.

West Bengal Chief Minister Mamata Banerjee in jong Assembly seats 292 umna a seat 213 a goljona anei jouvin Journalist hochu Covid warrior ahiuve tin aphongdoh in ahi.

Bihar.

Bihar government injong state sunga Journalist hochu frontline Workers dinga aphondoh toh kilhon in vaccine kapna lampanga jong jausah hiding in thuphon aneiyin ahi. Hichea hin Journalist jouse information and public relations department a state level a accredited kibol jouse leh non-accredited scribe, district public relations officer, print, electronic leh web media sunga umho chu vaccine kapna toh kisaiya frontline Workers a kisim ding ahiuve tin Official thuso chun aseiyin ahi.

Amaho hi aphat neiya vaccine jong kap hidiu ahi. State Government in media miho Covid 19 natna toh kisaiya mipi ho ahilchet nau thua amopohna hou ahetpeh najong ahi.

Odisha Chief Minister Naveen Patnaik injong State sunga Journalist natong jinglai hochu frontline Covid warrior ahiuve tia aphondoh ahi. Hichea hin Journalist 6500 tobang hon aphatchom pi diuva ginchat ahi.

Chuleh hichea working journalists 6,944 tobang jong Gopabandhu Sambadika Swasthya Bima Yojana noiya koi ahiuve. Hichea hi amahon health insurance cover Rs lakh 2 cheh amutheiyu ahi tin thuso chun aseiyin ahi. Odisha in journalist ho Covid 19 natna jeh a thina toh auma ahileh ex-gratia jong Rs 15 lakh a insung mite ho peh hiding ahi ati.

Uttarakhand government injong Media holeh Journalist jouse chu frontline Workers ahiuvin chuleh vaccine jong kap a um ding ahi tin aseiyin ahi. Hiche pandemic sungah journalist hohin frontline Workers ho bangin natohna anei uvin Covid 19 natna thutoh kisaiyin mipi ho hetsahna jong anei uve tin Uttarakhand Chief Minister Tirath Singh Rawat in aseiyin ahi.

Xxxxxxxxxx

Eastern Naga simlai hon CM gihna nei

Kohima, May 3: Eastern Naga Students’ Federation (ENSF) in tuni in ni 13 sung a suh bulhit ding thumna Nagaland Chief Minister ang a ana nei uvin ahi. Hiche ngehna ana kinei chu Nagaland Public Service Commission (NPSC) noi a 25 percent natoh na kilah na reservation ahi akiti.

Hiche ngehna ahunglhungding May nisim 15 sung a aki suh bulhit lou le kiphinna na tohgon jat chom chom ahin chepi ding dan u jong hetsah na ana kinei in ahi. ENSF President Sepili L Sangtam in thuso miho toh kihou na a hetsah na ana neina a simlai kiloikhomna 6 lam in kihou na an akinei dungjui a hitabang tohgon hi hung kinei ahin, hiche chung chang a govt hetsah na ana kinei hi lha 5 lam ahung val tah toh lhon a tuchung ahi achaina ding a hetsah na kinei kit ahin, maban a sanpeh na ahung kinei lou le kiphinna hatah a hung kinei pan ding ahi tin ana sei in ahi. Kiphinna ana kivoh chon jing na chu govt in cabinet kihou na a pohdoh na kinei a seikhomna kinei ding ahi tia hetsah na ana nei jing utoh lhon a kivochon ahidan jong tahlang na ana nei uvin ahi.

Achesa January nisim 14 nikho achu cabinet in sub committee anka semdoh uva hiche chung chang thu vetlhah na nei a lha thum sung a report ahin pehding uva ana kisei ahin hinlah tuni channa athu kisei kit tah loutoh lhon a hitabang hetsah na hi hung kinei ahi tin kiloikhomna lamkai pa chun ana sei in ahi. Lamkai pa chun asei na a tribe noi nung Sangtam, Konyak, Yimchunger, Khiamniungam, Phom le Chang ho ading a NPSC noi a natoh kilah na a 25 percent reservation hi akisei na asot tah dan le achesa 2009 lam akon a ana kipan ahitahdan hetsa na jong ana nei in ahi.

xxxxxxxxxxxxxx

SC in IPC section 124-A chouna kinei na chung a hetsah na nei

 Imphal May 3: Supreme Court Justice UU Lalit, Justice Indira Banerjee le Justice KM Joseph jaona division bench in in tuni in Attorney General for India office chung chang a achung uva thusomi mi 2 in case ana pan lhon toh lhon in thuso phabep ana nei uvin ahi.

Hiche petition chu thuso mi Manipur akon Kishorechandra Wangkhemcha le Kamal Shukla, Chhattisgarh akon in IPC noi a section 124A chu chouna ana ne lhon ahi.  Indian Penal Cord noi a Section 124-A hi Indian daanpi toh kito lou le kikal na toh kisai a chouna chu ana kinei ahi. Hetthei khatcchu Kishorechandra chu Manipur Chief Minister chung chang a dehna thuseina ana nei jing toh lhon a FIR jong thumvei lam an akipan khum ahitan ahi. Kamal Shukla hin govt douna a cartoon jihna an anei jing ahi.

Xxxxxxxxxxxxxxxxxxxxx

Manipur a pasal dammo ho ding a Special Covid care centre kisem

Imphal, May 3: Tuni in Bal Bhawan a pasal dammo na nei ho ding in lupna 235 lam umna Covid Care Centre (CCC) khat ana kisem in ahi. Health department akon thuso kimu dungjui in akihondoh nikho in pasal dammo na nei mi 17 lam an akikoi pan in ahi akiti. Hiche centre chu covid case hung nem jing tah toh lhon a ningkum December lah a chu ana kinga ahin, case hung khan jing kit toh lhon a hung kit hah pat kit ahi.

Alangkhat a numei dammo na nei ho ding in National Sports University (NSU) office complex a lupna 200 lam umna covid care centre semdoh ding in hetsah na ana kinei in ahi. Dr Babychand,  in asei na aYAS dept akon a hitabang tohgon nei thei na ding a phal na anga jing u ahidan tahlang na ana nei in ahi. Doctor nu chun asei na a lupna 600 lam umna covid care centre Lambui Khongnangkhong a jong ahung kisem doh ding dan tahlang na an anei in ahi.

Xxxxxxxxxxx

Assam a numei chapang khat kisuhset jouva kitha demna kinei

Imphal, May 03: Northeast India sung a numei ho vekol a pang jing Eastern Himalayan Women Forum (EHWF) in Nagaon Assam a numei chapang kum 12 a upa khat kisuh set jou a kithana chung chang a hatah in demna ahin nei uvin ahi.

Kiloikhomna Convenor, Maggie L Ralte in asei na a akisuhset jou a kithat chapang nu chu Kudam Ronghang Arong, West Karbi Anglong district akon ahin, chapang nu nule pa hin achesa 2018 kum a Paresh Borthakur kom a avetsui thei ding le tia ana koi lhon ahin, Paresh Borthakur hin ahin suhset jing a ahin suh genthei jing ahi. Hiche chapang nu chu Prakesh Borthakur le achapa  Nayanivoti Borthakur in ana suhset lhon a mei a ana hal lhon ahi. Thuso kimu dungjui in hiche chapang nu chun nao ahinvop toh lhon a amona hon sel ahina ding a mei a ana kihal ahi akiti.

Northeast state ho adeh a Assam Nagaon sung a numei kisuhset le kitha hi ahung ha pun be jing in, Karni ANglong district akon a chapang 5000 lam hi Nagaon sung a mi inna natong le ding a um ahin, hiche ho jong hin itabang hinkho aman u ham kihelou ahi tin kiloikhomna chun hetsah na ahin nei uvin ahi. Kiloikhomna in Chief Minister Sarbananda Sonowal le Governor Jagdish Mukhi in Special Investigation Team  asem a mona nei ho kholdoh ahi na ding in jong temna ana nei uvin ahi.

Xxxxxxxxxx

BJP in Assam Chief Minister lhenna ding a centre akon lamkai phabep solding

Guwahati, May 3:  Assam a election kichai a BJP in goljo na anei tah toh lhon in BJP in centre akon in Assam CHief Minister lhen na ding chung chang a lamkai phabep asol ding u ahi akiti. Assam Chief Minister lhenna hi ahunglhungding ni 2 sung a het ahitahding dan tahlang na ana kinei in ahi.

BJP in Chief minister Sarbananda Sonowal mama alhen ding uham ahilou le athah alhen ding uham ti vang tu chan in het ahi hihlai in ahi. Chief Minister ding ahi Sonowal ahilou le Himanta Biswa Sarma khat joh joh lhen ahung hiding dan tahlang na ana kinei in ahi.