3th May, 2021 News

3th May, 2021 News

84
0
SHARE

Election Result 2021; Assam, West Bengal leh Kerala a Ruling Party hon goljona neikit

BJP candidate Suvendu Adhikari in vote 1,736 a West Bengal CM Mamata Banerjee jou

Imphal, May 2: Tuni Election Result phondoh a aum toh kilhon in State 3 a Ruling Party ho avel in hatdohna ana nei kit uvin, West Bengal a Mamata Banerjee makaina Trinamool Congress injong hatah in BJP ho sangin hatna ana neiyun, Assam ah BJP hatah in goljona anei kit in, chuleh Kerela a LDF in hatah a goljona anei kit uvin ahi.

State 4 leh Union Territory khat a Vote akisim jing laiyin, Tamil Nadu a AIADMK in akitetpi DMK chunga goljona leh vaihomna ahin nei dingin akilangin ahi. Puducherry ah AINRC nakaina NDA in vaihomna anei thei ding dinmun in aum kit in ahi.

Assam ah BJP in agoma Seat 126 lah ah Seat 74 in ana makai jing in, Congress makaina Alliance in 44 ah ana goljou bep in ahi. Chuleh Chief Minister Sarbananda Sonowal leh State Finance and Health Minister leh BJP Star Campaigner in Majauli leh Jalukbari Constituency akon in goljona ana neilhon in, Anti-CAA Activist Akhil Gogoi in Sibsagar Seat ah ana makai kit in ahi.

Election Commission in Assam Election a COVID-19 dan leh thupeh phatah a jui jing pum in Assembly Constituency 126 akon in Vote simna ana pan uvin ahi.

Bharatiya Janata Party in State sunga anivei na a goljona aneitoh kilhon a Government asem ding ahi tin Minister Himanta Biswa Sarma in aseiyin ahi.

Thulakhom ho henga aseina a chun, Chief Minister jong BJP akon hiding chuleh State sung khantouna dinga, BJP in na kitong kit ding ahi ati.

Mamata Banerjee jong West Bengal a TMC in Seat 200 val a makaina aneitoh kilhon in athumvei channa a Chief Minister ding in kigotna aneitan ahi.

Hinla, Election Commission Vote sim dungjuiyin Nandigram Seat ah Mamata in BJP lamkai Suvendu Adhikari chu Vote 1,736 in ana pha lel in ahi. Hinla alou theilouva VVPAT akon a photchetna achejing laitah ahi in, hiche jou teng leh Official tah a kiphongdoh ding ahi.

Kolkata a thulakhom ho henga ahoulim na a chun, hiche goljona hi Bengal mipite a ding ahi. Bengal in gamsung pumpi ahuhdoh in kiletsahpi aum lheh in ahi. Election Commission jong  ichungu vah gitlou abol uvin, BJP Spokesperson bangin aum uvin ahi. BJP in Politics kidah umtah abol uvin, Election ah gollelna anei uvin ahi tinjong aseiyin, chuleh COVID-19 hi kagelkhoh pen ahi in, hitoh kisaiya natoh kipan pai ding ahi. Kihahselna jong thupi tah a kinei lou ding ahi. Mijouse henga manbeiya Vaccine kipe ding, chuleh Centre in jong mijouse henga Vaccine manbeiya apeh diuvin temna akineiyin ahi. Hiche hi ahung hithei lou leh Kolkata a Gandhi Murti a toumun kiphinna kanei ding ahi tinjong aseiyin ahi.

Chuleh koiman jong goljona kipa jeh a kijotna abol loudiu, natna hilen ahung kichai a angai banga kimanchah na ahung um thei kit teng leh Brigade Parade Ground a thupi tah a kin-gon inei diu ahi tinjong aseiyin ahi.

Hitobang goljona ahung um toh kilhon in BJP lamkai Kailash Vijayvargiya in TMC in goljona anei chungah Mamata Banerjee pachatna anapen, chuleh Bengal in Didi hi akilhendoh ahi. TMC in goljona anei hi Mamata Banerjee jeh ahi in, mipi hon Didi hi akilhendoh ahi tin aseiyin ahi.

Babul Supriyo leh Actor Yash Gupta jong Tollygunge leh Chanditala constituency ah ahat jing nalai lhon in ahi. Locket Chatterjee jong Chunsura a ahatjing nalaiyin ahi.

TMC Minister Firhad Hakim, Partha Chatterjee leh Subrata Mukherjee hojong Kolkata Port, Ballygunge leh Behala West Constituency ho ah ahatjing nalai uvin ahi.

PM Narendra Modi injong TMC in Bengal a goljona aneina chung’ah Mamata Banerjee henga akipapina ana phongdoh in ahi. BJP in Bengal mipi ho dinga na kitong jing ding ahi ati.

Defence Minister Rajnath Singh leh Finance Minister Nirmala Sitharaman injong TMC in goljona aneina chungah Mamata Banerjee heng’ah kipapina thu ana phongdoh in ahi.

Chukit leh Tamil Nadu ah DMK in Seat 119 a goljona aneitoh kilhon in akithopi hotoh kipunkhom a Government asemdoh diuvin aum tan ahi.

Election Commission akon kimu dungjuiyin DMK in 119 Seat a hatna anei jing in ahi. M K Stalin in State sung mipi te hengah kipathu ana phongdoh in, chuleh CM panmun tuh dungin kigotna aneitan ahi.

Tua Vote kisim banga ahung machal toupeh nahleh koima toh kipunkhom louva achangseh a Government ahin semdoh thei ding ahi.

Tamil Nadu a Simple Majority mutheina dinga Seat 234 lah a Party in 118 Seat amutei angaiyin ahi.

Kerala ah LDF in Seat 140 lah a 99 ah hatna anei jing in ahi. Chuleh UDF in Seat 43 a hatna aneijing nalaiyin ahi.

Tukum 2021 a, Kerala Assembly Election chu  Phase khat ah April 6, 2021 chun Assembly Seat 140 ah ana kinei in ahi. Chuleh Party ahilou leh Alliance hon Government semthei nadia alhompen a Seat 71 a goljona anei tei angaiyin, hitoh kilhon chun LDF in nomtah in hisanga tamjo in goljona aneiyin ahi.

Hiche Election a hin LDF in vaihomna nei jom ding atup in, United Democratic Front (UDF) in vaihomna leh thaneina nung mukit ding atup uvin ahi. BJP makaina National Democratic Front (NDA) injong Vote ijat hamkhat mutheina ding in Campaign hatah in ana nei uvin ahi. LDF a Pinarayi Vijayan hi 2016 apat a Chief Minister hung hi toupeh ahi.

Xxxxxxxxxxx

COVID-19 natna len sung’a Koubru mol kallou dinga COPPK in temna nei

Kpi, May 2(UNA): State sunga COVID-19 jeh’a tijatna dinmun leh natna nei niseh a apunbe jingtoh kilhon in Committee on Protection and Preservation of Mt. Koubru (COPPK) in State sunga cheng adeh a phaicham leh Thinglhang a cheng mipi jousen tulai natna hilen sunga ahithei chan a Koubru mol kal lou ding in ngehna anei uvin ahi.

Kangpokpi DHQs a um KSO Administrative Office a Press Conference kineina a chun COPPK Secretary, Dr. Lamtinthang Haokip in COVID-19 Second Wave hin gamsung pumpi hatah in ahin sukha in, hiche goh hilouvin State sung jeng jong hatah in ahin sukha tan, mihem ten phatah a kivenna akinei lou leh tijatna dinmun a ding thei ding in aum tan ahi.

Hinla, State Government leh Department chom chom in thil hetthem nanei Civil Society kiloikhomna dang dang toh kithokhom in COVID-19 Appropriate Behavior phatah a jui leh chepi ahina dingin pan hatah in alajing uvin ahi ati. Aman aseibe na a chun tulai tah a Koubru mol kal jing jong hi natna hung punbe thrinadinga tijat um khat ahi in, hiche hin Mol kal ho a kon a natna mudoh ahitoh kilhon a State dinga jong lunggim na ahin lhit thei ahi tinjong aseiyin ahi.

Hijeh chun koi hijong leh Manipur sunga kon adeh a Thinglhang leh Phaicham a kon hijong leh tulai natna tijat umtah akon a kivendoh thei nadinga Koubru mol kal akon a kikangse cheh ding in temna aneiyin, hitobang natna hilen hung kichai lang tengleh angai banga pathen hou leh kilhaina bolnom jousen adeibanga Koubru mol kal kit ding in jong ngehna aneiyin ahi.

Tulai boina um laitah a Koubru Mol kal lou dinga kigellhah na nei jouse khankho nunkho leh ngailutna nei dihtah hidiu ahi tinjong aseiyin ahi.

Dr. Lamtinthang Haokip in aseina a chun April 20 nichun COPPK in mopohna nei Department holeh gamkai haosa hotoh natna hilen hung kichai lang leh Koubru lhang a thingnou tu dingin jong kigotna akineiyin ahi.

Chuleh Koubru Mol chung chang thu a kiboina toh kisaiya CM toh seikhomna akinei masangse a Committee on Protection and Preservation of Mt. Koubru in April 20 nikho a Government akon palai hotoh kinoptona kinei kipom jinga kichepi jing ding ahi tinjong Dr. Lamtinthang Haokip in aseiyin ahi.

Aman aseibe na a chun, Saitu AC MLA chuleh CM dinga Advisor Ngamthang Haokip akon temna ana kimu dungjuiyin Committee on Protection and Preservation of Mt. Koubru in Manipur sunga cheng thinglhang hihen phaicham a kon hijong leh Koubru chjg chang boina toh kisaiya CM toh seikhomna leh kithulhuhna phatah seilhah ahi masangse a koi hijong leh Newspaper hihen Social Networking Site ho hijong leh nam kah a kihetkhelna sodoh thei ding ama deidan leh nop nop a thusodoh asodoh lou diuvin jong temna aneiyin ahi.

Chuleh hitobang temna leh ngehna ho nahsah louva thuphalou seidoh leh boina semdoh tei tei aum leh Committee on Protection and Preservation of Mt. Koubru in mokipo lou ding ahi tinjong aseiyin ahi.

Koi mimal hihen kiloikhomna hijong leh panna beiya thusodoh hinsodoh a um a, lunggel hihen ngaidan kiseidoh ho hijong leh Committee ho ngaidan leh lunggel ahi tia kila thei lou ding ahi tinjong aseibei.

Xxxxxxxxxx

Prof. Dr. Nehginpao Kipgen COVID-19 jeh’a Delhi a muolliem, Kangpokpi Dist, Leikot a vuilem hiding

Kangpokpi, May 2(UNA): Kukite lah a Acamedician, Political Scientist, Writer leh lamchom chom a thusei them a ana kihe Prof. Dr. Nehginpao Kipgen chu natna tijat umtah COVID-19 jeh in tuni jingkah nidan 6:00 vel chun akijenna AIIMS Jhajjar, Haryana a ana muolliem tan ahi.

Amahi kum 46 ahitan, aji ngaitah Hoipi Kipgen leh chapa ni Lenchung David Kipgen leh Thangmuan Bryan Kipgen adalhah ahi.  Prof. Dr. Nehginpao Kipgen hi (L) Mangkholen Kipgen leh Nemnei Kipgen chapa ahin, 1975 kum a Myanmar (Burma) Teijang kho a ana peng in, tupna neimi ahitoh kilhon in Manipur Keithelmanbi Sainik School a Class III chan anasim in, KT. Hr. Sec. School, Kangpokpi a Class VIII chan anasim kit in, Sangaikot Churachandpur a Class X anachaiyin, chuleh Higher Secondary Imphal a ana chaiyin hiche jou chun America a lekha sim sangbe ding in ana vaikon doh in ahi.

Kum phabep jouvin India a ahung kinungle in athi nikho geiyin Center for Southeast Asian Studies (CSEAS), O.P. Jindal Global University, New Delhi a Executive Director pan mun atuh ahi.

Aman Academic Research abolna ho a chun Asia sung gelkhohna in adeh in Southeast Asia and Burma/Myanmar kiti ana ha kholgil lheh in, chuleh kholgilna leh thuhilna aneiho lah a chun South East Asia sunga adeh a Democratisation, Global/world Politics, Ethnic Conflicts and Identity Politics, Human Rights, Refugees, Maritime Disputes, International Organizations leh Government And Politics hohi hatah in ana lhangsap in ahi. Chuleh International Academic Conference ho injong Paper Present leh kihoulim khomna tamtah jong ana makaiyin, International Political Science Association (IPSA) leh International Studies Association (ISA) injong pan ana lajing in chuleh RC18-Asian and Pacific Studies IPSA a jong Board Member khat ahi.

Achesa 2013 apat chun Prof. Dr. Kipgen hi Myanmar/Burma sunga ding in jong Democracy (V-Dem), leh Department of Political Science, University of Gothenburg (Sweden), leh Kellogg Institute, University of Notre Dame (USA) a ding jong Country Expert khat in ana pang in ahi.

Dr. Nehginpao in Master leh Doctorate ana mutheina ding in Open Society Institute, New York; Prospect Burma, London leh U.S. State Department akon in jong Scholarship anamu in ahi. Chuleh Earth Community Organization, Canada akon in jong International Writing Award anamu in ahi.

Dr. Kipgen in amachangseh a asut lekhabu 4 tah jong  Routledge (Taylor & Francis), Oxford University Press, leh Ruby Press ah ana tatdoh in, Peer-Review Academic Article chom chom 24 –  Asian Journal of Social Science, Social Research, International Studies, World Affairs, Journal of Asian and African Studies, Journal of Muslim Minority Affairs, Ethnopolitics, Strategic Analysis, South Asia Research, Indian Journal of Political Science, Economic and Political Weekly, Asian Profile, Asian Affairs, International Journal on World Peace, and India Review tiho jong ana jih in ahi.  Chukit leh International Newpaper leh Magazine lentah tah ho injong Articles 230  tobang Continent 5 – Asia, Africa, Australia, Europe leh North America hop injong ana sundoh in ahi.

British Broadcasting Corporation (BBC), Radio Free Asia (RFA), Voice of America (VOA), ABC Radio National (Australia), Channel News Asia (Singapore), and India-based Lok Sabha TV, DD India, WION television, Beijing-based China Global Television Network (CGTN), ANC television (Phillipines) leh Sputnik International (Russia) ho injong amel ana lah in ahi.

A thiluong hi gari lam a Kangpokpi a hung kipolhung ding, aluongdamsa vuina hi SOP ho phatah a jui pum’a Kangpokpi hopsunga um Leikot khomun a kivui ding ahi.

A muolliemsa Prof. Dr. Kipgen apalen chapa Sehbem Kipgen in aseina a chun Delhi apat a Kangpokpi geiya a luongdamsa pohdohna ding ijakai suhfel ahitan, chuleh Leikot, Kangpokpi a COVID-19 dan leh thupeh ho phatah a jui pum’a vuina kin kinei ding ahi tin aseiyin ahi

Social Media ho ah aphat loutah a thina anatoh Prof. Dr. Nehginpao Kipgen ngailutna leh lainatna mi tamtah a kon in mutheiyin jong ana um in ahi.

Kangpokpi AC MLA, Nemcha Kipgen injong alunghemna thu ana phongdoh in, Prof. Dr. Nehginpao Kipgen in eidalhah uhi a nam mite keu hilouva vannoi adia jong manna lentah ahi tin aseiyin ahi.

“Aphat chang louva Academician leh Executive Director, Centre for Southeast Asian Studies,Jindal School of International Affairs Prof. (Dr.) Nehginpao Kipgen in eina muolliem san nau chung’ah adalhah a insung mite lunghempina akineiyin ahi” tin MLA in Facebook ah ana tahlang in ahi.

Saitu MLA Ngamthang Haokip in jong facebook a Dr Nehginpao Kipgen thi alainatna thu ana phongdoh in aman eidalhah u hi Kuki Society a man na lentah ahi ati.

Kuki Inpi Manipur injong aphat chang louva  Prof. Dr. Nehginpao Kipgen ana muolliem na chung’a lunghempina thu ana phongdoh uvin, tunia COVID-19 jeh a Prof. (Dr.) Nehginpao Kipgen in eina dalhah nau chung’a seijoulou lhasetna leh lunghempina akineiye tinjong ana phongdoh un ahi.

Prof. (Dr.) Nehginpao Kipgen in ana tohdoh holeh atup leh adoi lolhin thei nadia genthei hahsatna anatuo hojong athah in ana geldohna anei kit uvin, atup le adoi mutheina ding leh lolhinna dinga gunchutah a pan lajing leh adamlaiya jong ahetna ho mangcha jing ahi in, itih hijong leh kisumil louding ahitan, adalhah a insung mite jouse lunghempina akineiye tinjong Khaimang Chongloi President KIM in Facebook ah ana atahlang in ahi.

Chuleh, O.P. Jindal Global University akon atohkhompi honjong Professor (Dr.) Nehginpao Kipgen muolliem na chung’ah adalhah a insung mite lhamonna leh lunghempina thuthot ana neiyun ahi.

Kuki Inpi Manipur in nalunghem nau akithohhu in, chuleh Kuki nam pumpi in Prof. (Dr). Nehginpao Kipgen in aphat louva Executive Director atuhlaitah a a muolliem na chung’a kahin lainatpi uve tinjong Director of the Center for Southeast Asian Studies (CSEAS), Jindal School of International Affairs, O.P. Jindal Global University in aseiyin ahi.

Aseibena a chun Prof.(Dr.) Nehginpao Kipgen hi vetton thei tah jilkung ahi in, Political Thinker thupi tah leh Lekha jihthem tah jong ahi. Center for Southeast Asian Studies, Jindal School of International Affairs, O.P. Jindal University adia jong mipamai tah leh itt untah ahi tinjong aseiyin ahi.

Aseibe na a chun, Prof. (Dr). Nehginpao Kipgen hi ana khang a dinga jong Political Scientist nasaloi ahitan, aman umlou hi adeh a atohkhompi holeh amatoh kihekha jouse dinga jong manna lentah ahi ati.

Dr. Lamtinthang Haokip in jong Facebook mangcha in  Prof. (Dr.) Nehginpao Kipgen, Executive Director, Centre for Southeast Asian Studies, Jindal School of International Affair chuleh Kuki Political Thinker in aphatlouva thina atuona chungah lunghempina thu ana tahlangin ahi.

Chuleh mimal hihen, loi le pai chuleh insungmi akinaipi jousen jong ngailutna leh lunghempina thu ana thot uvin ahi. Kiloikhomna chom chom adeh in KSO-GHQ, KSO Delhi&NCR, KSO CCPUR, Thadou Inpi, HTC Moreh, TSA Sadar Hills, Kuki Lawyer Association Manipur, KKL GHQ, IHRA, Kuki Intellectual Group, Doungel, Inpi, Kipgen Khangthah Kiloikhom, Kipgen Phungpi, Kuki Welfare Association Guwahati, Thadou Youth Association Imphal, Henglep Sub-Div Chief Association, Khankhologymedia, HNA, KNO/KLA leh kiloikhomna dang danga kon injong lunghempina thuthot ana nei uvin ahi. Chuleh Dr. Satkai Chongloi, Kuki Inpi, Paotinthang Lupheng, KSO-GHQ, Dr. D.L. Haokip leh Dr. Jangmang Guite, Kuki Reformation Forum, Kuki footballer leh Kuki Gospel Artistes honjong Visual in lunghempina ana phongdoh un ahi.

Chukit leh, Government of Manipur, Home Department in jong Delhi apat Manipur sunga Prof. Dr. Nehginpao Kipgen luongdamsa hung kipohlutna ding’ah phalna (No Objection Certificate) ana pedoh uvin ahi. Ahunglhung ding nisim 5 nikho leh Kangpokpi CSO ho makaina a aluongdamsa Mao Gate a lamtuo na jong um ding ahi.

Xxxxxxxxxxxxx

Mamata Banerjee in election gollel jongleh Chief Minister a pangthei nalai ding

Kolkata, May 2: TMC chief Mamata Banerjee lamkaina noiyin tutua vaipo Trinamool Congress (TMC) party in tuchung Bengal election a goljona lentah anei uvin ahi. Ahinlah, aman atetna seat a chu BJP candidate Suvendu Adhikari koma gollelna anei hitam tihi thuchen aumthei naipon ahi.

Tu masangjep chun Mamata Banerjee in goljona aneitai, tin thulhut ana umin, ahin Sunday nilhah lama press conference abolna achun Mamata Banerjee agollelna ana phongdoh kit in ahi. Alangkhat’a, TMC in vote simna achelha jing nalaiye, tin Twitter mangchan ana seikit in ahi.

Tutua dinga thudohna um tampen chu Mamata Banerjee in Chief Minister hina ajom nalai ding ham?, tihi ahitan ahi. Adoltah a chu CM atuhthei nalai ding ahi in, tuhjong atuh ding ahi.

India a dinga state minthang cheh 3’a chief minister tuh Nitish Kumar, Yogi Adityanath chuleh Uddhav Thackeray hi a state cheh uva legislative council member hicheh u ahi, ahin legislative assembly in amaho hi ahoptha kitpon ahi. Hijeh’a chu sei bailam dinga chief minister hina dinga Vidhan Sabha election a goljona neilou ahiuvin ahi. Chuleh amaho lah’a Nitish Kumar bou hin achesa kum 36 masanga chu Vidhan Sabha election khatvei anatet khah ahi.

Maharashtra Chief Minister Uddhav Thackeray in general election anatet khahlou ahi. Ahin hiche a hi Banerjee boilou ahi, ajeh chu West Bengal in legislative council aneilou ahi. Hijongleh a party (TMC) in masanga chu hitobang council khat tundoh ding thu ana seisa ahitai.

Minister khat chu lha 6 kijom sunga state legislative member khat ahilouleh hiche phatsung chu akichai teng Minister hitalou ding ahi, tin Article 164 in aseiyin ahi. Hichun lawmaker khat hina dinga  Mamata Banerjee in lha 6 bou aneitai, tina ahi. Aman dinga lampi um chu seat ahomkeo ho a dinga nomination file abol’a by-election atet ding bou ahitai.

Alangkhat’a, Sunday ni’a agollelna aseina achun Banerjee in Nandigram a dinga thu kitan anit dingleh constitutional bench henga acheding thu ana seiyin, TMC a dinga goljona lentah ahi in, BJP in politics phalou abol jeh uva election alel u ahi, ati.

Xxxxxxxx

Manipur a COVID-19 case 32000 valta; thina toh 415 hita

Imphal, May 2(ET): State health department akon tuni’a thulhut kimu dungjuiyin Manipur gamsunga COVID-19 positive case thah 256 tuni’a akimudohbe kit toh lhonin, tuni chana case kimudoh jat agomin 32000 ana valtan ahi. Chuleh tuni mama a mi 5 in Covid natna toh kisaiya thina anatobe kit toh lhonin, tuni chana Manipur gam sunga Covid natna toh kisaiya thina tohjat agomin mi 415 ana lhingtan ahi.

Tuni’a positive case thah kimudohbe ho pumin gamsunga COVID-19 case kimudoh jat agomin 32,161 ana lhingtan ahi. Chuleh COVID-19 active case jong 1,823 aumtan ahi, tin COVID-19 Common Control Room in thuso abol chun aseiyin ahi.

Case thah kimudoh ho lah’a mi 242 hi milham ahiuvein, adang mi 14 hochu Central Armed Police Force (CAPF) personnel ho ahiuve, tin COVID-19 Common Control Room thuso bolchun aseibe in ahi.

Imphal West leh Imphal East akon COVID-19 positive case akitam mupen jing nalayin, Imphal West akon case 112 chuleh Imphal East akon case 56 ana kimudoh in ahi. Milham ho lha’a kon case thah kimudoh dangho chu Bishnupur akon mi 17, Thoubal, Kakchung chuleh Churachandpur akon mi 13 cheh, Ukhrul, Noney chuleh Kangpokpi akon mi 4 cheh, Chandel akon mi 3, Jiribam akon mi 2, chuleh Kamjong akon mi khat, ahiuve.

Alangkhat’a, tuni mama in Covid natna ananei mi 80 ana damdoh uvin, chutoh lhonchun tuni channa Manipur gamsunga Covid natna akon damdoh jat agomin mi 29,923 ana lhingtan ahi. Manipur state COVID-19 recovery rate jong Saturday ni’a 93.53 percent anahi chu Sunday nichun 93.04 percent chanin ana kemsuh tan ahi.

Tunia COVID-19 natna jeh’a thina toh mi 5 ho lah’a mi 3 chu Imphal West akon ahiuvin, chuleh Bishnupur leh Imphal East akon mikhat cheh ahilhonin ahi.

Thulhut nunungpen dungjuiyin, tuni chana Manipur gamsunga Covid lou kikapdoh jat hi mi 2,07,765 alhingtan ahi.

Xxxxxxx

Khamnathei toh kimat tha

Ccpur, May 2(ET): Churachandpur district, Gouchinkhup Veng, New Lamka lhangsung a khamnathei a kivei mi um thu police hon ajah toh lhon in 31 AR Kangvai Bn toh kitho a operation abol nauva nilhah lam nidan 8:00 vel in Venus hotel akon hung mi 2 in Gypsy ahung vetchil na anei naova Kani Kg. 50 lam ana kimudoh uvin ahi.

Hiche kani toh kimat tha teni chu Jamkhokam Touthang (38) s/o (L) Pailen Touthang,  Patlen village, CCP le Heljapao Haokip (48) s/o (L) Songkhohen, Patlen village, CCP akon ahi lhon in ahi.

Xxxxxxx

Assam Rifles hon dan toh kitoh louva thil kipo phabep ana man

Kamjong, Tengnoupal, May 2: Shangshak Battalion Assam Rifles hon IGAR (South) vaisaina noiyin tuni chun Kamjong district hopsunga um Bungdung vangkho koma konin dan toh kitoh louva bim (timber) po gari ana man uvin ahi.

Hiche bimpo gari ho kholchilna anei uva konin Dk. Crore 10.56 man hiding bim hochu ana mandoh uvin, hiche gari tol mi 8 hochu, bim kiman ho pumin KasomKhullen Police Station khut’a ana pelut uvin ahi.

Alangkhat’a, Tengnoupal Battalion leh 165 TA Battalion Assam Rifles hon IGAR (S) vaisaina noiyin tuni chun danin aphallou thil NH-102 juiya hung kipo phabep ana mandoh uvin ahi.

Lockchao vel’a danin aphallou thil hung kipoh ding thulhut aumtoh lhona, Assam Rifles hon operation anabol uva kon Dk. Crore 2.77 man vel hiding foreign cigarette, beer chuleh anti-mosquito coil ana mandoh uvin, civil authority ho khut in ana pedoh uvin ahi.

Xxxxxxxxx

Govt. in NAFSA noi’a lha seh’a ahop ding dol ho hompan loihen : MLA Mirabai

Imphal, May 2 (ET) : Gamsung’a tulai Covid natna jeh in neilou genthei hon ann-ngol ding din mun’a aum tah jeh uvin MLA Mirabai in NAFSA noi’a Government in ann-chang leh thil chom chom ahop ding uvin temna anei in ahi. Chuleh Covid natna akon kivendoh nathei ding’a Government in tohgon leh kalsonna jatchom chom abol ho jong akino jep ding uleh mipin jong Government in jui ding’a aphatsah Covid daan ho ajui cheh ding uvin atahlang in ahi.

xxxxxx

Khamnathei toh kimat tha Police constable leh IRB khat suspend kibol

Imphal, May 2 (ET) : Irilbung Police Station hopsung Kiyamgei Mamang Leikai ah janni nilhah nidan 3:00 vel in local club hon Police constable khat leh IRB personnel khat akon in khamnathei phabep anamandoh uvin chuleh ama nichu Irilbung Police Station ah ana thahlut uvin ahi tin thulhut chun aseiyin ahi. Chuleh hiche thilsoh chung’a Imphal East District SP Jogeshchandra Haobijam in ama conference hall a thuso miho toh akihoulim na’a Police Constable leh IRB personnel teni hi suspend akibol lhon tan ahi. Chuleh suspend kibol teni hi Bashikhong Mamang Leikai akon N Ibungochouba chapa Nareirakpam Leimaba Meitei (30) leh Singjamei Makha Khongnang Pheidekpi akon (L) M Chaoba chapa Meinam Raju (36) ahi.

Hetthei khat chu ama ni akon nahi Heroin powder gram 15 kimandoh ahin chuleh kholchil na aneibe nao’a kon in Kiyamgei Muslim akon Abdul Gani chapa Md Abdul Hakkim leh Md Abdul Kahir chapa Md Salam teni akon in Heroin powder gram 17 leh Dk. 27,000 jong anamandoh uvin ahi. SP in aseibena’a akimandoh ho cheng hi Irilbung Police Station ah akithah lut tan chuleh NDPS Act noi’a daan toh kitoh’a action kila ding ahi tinjong aseiyin ahi.

xxxxxxxx

Chenna inn mai’a bomb kikam; Police hon kholchilna panta

Imphal, May 2 (ET) : Imphal khopi Porompat Police Station hopsung Kshtrigao Nongjai Leikai a janni jingkah in Kshetrigao Zilla Parishad member Najrun Islam chenna inn gate mai’a Chinese hand grenade khat ana kikoi nachung’a insung miten Police ho hetsahna ananei utoh lhon in Porompat Police in amun anadellut pai uvin ahi. Hiche jou chun Manipur Police Bomb Disposal Squad hon bomb kikoi chun boina ima um louvin analadoh uvin ahi tin thulhut chun aseiyin ahi.

Hiche toh lhon’a hiche bomb kikoi hi kon ipi jeh’a akoi ahileh hiche kisut chan in akiphongdoh koima aum naipon ahi. Chuleh thilsoh toh kisai’a Police hon kholchil na jong apan tauvin ahi. Najrun Islam in thuso miho toh akihoulim na’a tunai cha chun thingnoi ho akon in demand letter kana mu in ipi hileh athu’a kihoucham thei ahi in hitobang’a thil kibol hi koi hijong leh abol kit tahlou ding uvin temna anei in ahi.

xxxxxxxx

Covid natna akon kivenbit nading’a Moreh khopi sung’a lamkai ho kihoukhom; jui ding daan phabep phatsah nanei

Imphal, May 2 (ET): Manipur gamsung mun chom chom’a Covid natna nei mi akibe jing toh lhon in Moreh khopi IB Conference Hall ah tunin Moreh khopi sung’a Covid natna akon kivendoh theina ding in kihoukhomna ananei uvin ahi. Hiche kihoukhom nachu Tengnoupal DC Sharth Chandra Arroju leh Tengnoupal SP Th Vikramjit lamkai nanoi kibol ahin Moreh Hospital a Doctor ho, Moreh Consumers’ Club ho, Primary Health Centre Moreh a MO in-charge, 43 Assam Rifles, Community lamkai, simlai kiloikhom na holeh Police personnel hon pan anala uvin ahi. Hiche phatsung’a chun Moreh kailhang sung jingkah nidan 5:00 akipat nilhah nidan 4:00 chan hon ding hiche phatsung’a kailhang kai jouse in social distance ajui cheh ding, mipi kikhopkhom na bol lou ding chuleh mask kitom cheh ding uvin  thulhuh na anei uvin ahi. Chuleh koitobang mask bol louva kailhang kai ho lesol ding in jong thupeh anei uvin ahi.

Hiche toh lhon’a Covid daan palkeh ho CSO leh Police hon kholchilna anei ding koitobang daan jui ding’a thupeh kinei ho nahsah lou aum leh kileusah ding ahi. Chuleh Moreh khopi sung’a um tehse ho Covid vaccine kikap cheh ding chuleh jing (May 3) nikho akon koi hileh Covid daan palkeh aum leh Dk. 1000 kileusah ding ahi tinjong thulhuh na anei uvin ahi.

xxxxxxxx

Imphal khopi sung’a Police hon khamnathei phabep anamandoh

Imphal, May 2 (ET): Imphal Police Station in tulai Covid natna akon kivendoh na ding’a pan nasatah alah jing lai ahitoh lhon’a tunin Imphal Police Station a personnel hon Covid awareness cum Enforcement Committee Thangmeiband toh kithokhom nanoi in khamnathei matdoh na ding in drive ananei uvin ahi. Hiche phatsung in nupi 4 leh pasal 5 akon in jukang leh jusan anamandoh uvin chuleh akimandoh ju hochu mipi masang in anasumang uvin ahi. Chuleh Thangmeiband leh akimvel’a hitobang drive hi hung kibol jing ding ahi tin District Police hon ana phongdoh uvin ahi.

 xxxxxxxxx

Wangoi Community Health Centre a Covid vaccine kikap sah ding tam val jeh’a boina sohdoh

Imphal, May 2 (ET): Agriculture Minister O Lukhoi in tunin Wangoi Community Health Centre din mun vetlhahna ananei in chuleh tulai tah’a hi hiche Centre a hi Wangoi Assembly leh akinaipi Constituency ho ding’a Vaccination drive achelhah laitah ahi. Chuleh achesa nikho phabep sung’a kon hiche Centre mun’a hi Covid vaccine kikap ding akibe jing toh lhon’a boina khat asohdoh tan ahi. Hijeh chun hitobang boina ho aum louna ding in Centre authority in ima jouse agontup ding uvin aseiyin ahi.

xxxxxxxxx

AMFCSU in kiphinna anei phat chomkhat ading’a vohaita

Imphal, May 2 (ET): All Manipur Fisheries Co-operative Societies Union Chairman M Tombi in Ministry in gamsung’a nga vah ho ding’a sum akaidoh ho apeh doh loulai jeh in Chief Minister leh akisaipi Minister toh kihoutoh na akinei dungjui’a kiphinna kibol ho phat chomkhat a ding’a kivohai ahi. Chuleh Government in kitepna anei agannathei lam’a anatoh’a apohdoh ding in temna anei in ahi. Ajeh chu hiche sum kihopdoh lou jeh hin nga vah ho boina nasatah atoh gam tauvin ahi tin jong aseibei.

XXXXXX

KIC

Imphal, May 2 (ET) : COVID-19 2nd Wave ahung lhun toh lhon in Churachandpur Dist. sung’a mipin ahetding leh jui cheh ding in Kuki Inpi Churachandpur (KIC) in thuphon anei in ahi. Chuleh Nam sung’a Haosa, Upa, Hou lamkai chuleh CSOs’ jousen Govt. in jui ding thupeh anei “SOP Guidelines” toh kisai’a mipi heng’a awareness abol jing ding leh um nacheh’a pan alah jing ding uvin mipi temna anei in ahi.

XXXXXXXXX

Manipur Left Party hon Working class tosot nanei

Imphal, May 2: May Day toh kisai in CPI (M), CPI, RSP leh AIFB in jong international working class ho tosot na aneidan’u aphongdoh uvin ahi. Chuleh Left Party ho hin Covid doudal nading leh nikho tha’a natong ho rights venbit na ding’a working class ajop’u ahi. Party hon joint statement abolnao’a India gamsung adeh’a Manipur gamsung hi Independence ahung hi akon mipi damthei nalam nasatah’a atohkhah na gamsung khat ahi ati. Tun jong Covid natna doudal na ding leh mipi hinkho huhdoh nading’a Central Govt. in pan nasatah’a alah ngai ahi ati.

Hiche toh lhon’a Union Govt. heng’a gamsung’a um Hospital jouse in oxygen angaichat dungjui’a akoi lhing peh cheh ding chuleh Free Universal Vaccination programme jong gamsung pumpi’a ahondoh ding in ngehna anei in ahi. Chuleh PM Cares Fund akon Dk. Crore 35,000 Covid-19 doudal nading’a amanchah ding leh Central Vista (New Parliament, Delhi) sah nading’a Dk. Crore 20,000 lut ding jong angah’a vaccine joh’a sum hi amanchah ding in ngehna anei in ahi.

xxxxxxxxxxx

US gamsung Green Bay Casino a thalchoi khat in mi 2 kap lih; mikhat kisukha

Green Bay, May 2: Wisconsin authority hon Green Bay casino mun a achesa Saturday jan a thal choi pasal khat in mi 2 akaplih in chuleh police hon thalchoi pa akap lih masang uva midang khat jong nasatah a akisukha e, tin asei uvin ahi.

Thal choi pa hin alunghan jeh a mikhat atup hidinga Brown County Sheriff Lt Kevin Pawlak in aseiyin chuleh atup pen mipa hi apet a Oneida Casino a umlou ahi, ati. Ahivanga, thal choi pa hin atup mikhat atohkhompi ahilouleh aloi agol ho kap dinga kigel lhahna anei hidinga ginchat ahi, tin Pawlak in aseibe in ahi.

Buluna thilsoh hi jan nidan 7.30 don ahi in, Oneida Nation noiya um Oneida Casino mun thilsoh ahi. Attorney General Josh Kaul in buluna thilsoh vetkol ahitan, kichat ding aum tapoi, tin aseiyin ahi. Casino restaurant mun a meithal kikap pan ahi, tin amun a um Yatim in aseiyin chuleh asochat akipana thu jong aseiyin ahi.

Xxxxxxxxxxx

Odisha in May 5 a kon ni-14 Lockdown chepi dinga phongdoh

New Delhi, May 2: Odisha sorkar in Sunday nikhon Covid-19 case atam cheh cheh jeh a ni 14 lhing agamsunga Lockdown chepi dinga thuphon anei tai.

Lockdown hi May nisim 5 teng kipan ding chuleh May 19 chan umding ahi. Angaicha khoh ho hi jingkah nidan 7 a kon nidan 12 chan mipin akichoh theiding, achoh nadinga meter 500 gamlha chan chethei diu ahi. Alangkhat a Lockdown sunga Healthcare leh emergency service adang dang ho ahop tha sah louvu ahi.

Alangkhat a, Odisha Chief Minister Naveen Patnaik in agamsung journalist ho Frontline Covid Warrior ahiuve, tin phondohna aneiyin ahi. Covid toh kisai thu hilna ding chuleh thusoh apeh uva pan sangtah alah u ahi in, Covid-19 douna gal akisat na a eikithopi u lentah ahiuve, tin Patnaik in aseiyin ahi. Hetthei khat chu Gopabandhu Sambadika Swathya Bima Yojana noiya journalist 6944 um ahi in, amaho hin dangka lakh 2 chan Health Insurance Cover aneiyu ahi, tin CMO thuso chun aseibe in ahi.

Chuleh Covid 19 natna a thi journalist ho a insung mite dangka lakh 15 ex gratia peh dinga jong thuphon aneiyu ahi. Sunday nikho a kisodoh state health department data dungjuiya, Odisha gam a Covid 19 case athah 8,015 kimube a chuleh natna jeh a achesa nidan 24 sunga mi 14 thi ahi. Hiche toh kilhon a natna nei agom a 4,62,622 lhing a chuleh mi 3,91,048 damdoh ahitai. Natna a mi 2,068 thi a chuleh active case tua hi 6,9453 um ahi.

Xxxxxxx

Agriculture Department a Director appointment order vohhai ding’a LOUSAL in ngehna nei

Imphal, May 2(ET): Loumee Shinmee Apunba Lup (LOUSAL) in Sunday nichun Agriculture Department a director pam=nmun tuhdinga MCS officer khat kilhendohna thutoh kisaiyin Manipur government chunga demna sangtah ananei uvin, appointment order vohai dingin ngehna anei uvin ahi.

Agriculture hi kihinso naleh kivahna bulpi a nei state ho lah’a Manipur jong khat ahitoh lhonin, Agriculture Department in panmun poimo tah aneiyin ahi, tin LOUSAL general secretary Laishram Kiranjit thuso bolchun aseiyin, Department poimo dan i-ngaito leh agriculture lampanga heatgilna nei khat khel’a MCS officer khat in director panmun atuh dinga akilhendoh hi vangset umtah ahi, ati.

Agriculture lampanga khantouna leh machalna aum theina dinga Expert ho ngai ahi, ajeh chu Scientific approach panglouva louva kantouna leh machalna umtheilou ahi. Hichena dinga hi agriculture leh akisaipi sector ho’a research bolna dinga college leh university tamtah kitungdoh ahi, tin aseibe in ahi.

Alangkhat’a, government in loubol miho lo avel-2’a kalsah dingin aseijing uvin ahi. Ahin Department sunga lamkai tuhdinga lom umlouna a state in hitobang tohgon chu iti atoh molso ding ham ti donbutna umloulai ahi, tin LOUSAL thuso chun aseibe in ahi.

Agricultural sector a kijilna sangtah nei research scholar holeh scientist ho kiningnot a MCS officer khat kilhendoh hin tua vaipo government hin hitobang thu ho’a double standard anei dan avetsah ahi, tin LOUSAL in aseiyin ahi.

State government in Agriculture Department a director ding lhendohna a kon politics apamkoi uva, akisaipi sector- veterinary, sericulture, fishery- ho a jong politics apamkoi diu ngai ahi, tin appointment order le lahdoh dingin ngehna anei uvin ahi.

Chujong leh, Agriculture Department staff hon appointment order le lahdohna ding toh kisaiya kiphinna aneinau chunga tosotna anei dingin jong LOUSAL in aseiyin ahi.

Xxxxxxxxx

Manipur High Court in Lhukhosei Zou chung’a case kibol sanpeh lou

Imphal, May 2: Manipur High Court in ‘3.5 Collective’ member hon Lhukhosei Zou, midang 6 le state government chung’a case file ana bol asanpeh tapouvin ahi.

High court Justice MV Muralidaran in case kisan peh lou na chung a ngehna hi sanpeh na akinei le justice system ahin toh khah ding, private a hitobang tah a ngehna kinei daan injong aphal loudan hetsahna ana nei in ahi.

Thuso kimu dungjui in 3.5 Collective ho in Prime Minister pa jaona a hetsah na ana kinei jeng vang a le donbut na ima aumlou dan tahlang na ana nei uvin ahi.

Xxxxxxxxxxx

Thoubal a DIC Liquor Drive kibol akon mi 2 kiman

Imphal, May 2(ET): Thoubal District police in Distilled Indigenous Country (DIC) ju (liquor) matna dinga natoh achelhahpi jing utoh lhonin, janni (Saturday) achun district sung munchom chom’a konin ju phabep anaman doh kit uvin ahi.

Thulhut kimu dungjuiyin janni nilhahlam nidan 4:30 vel achun, SDPO Yairipok PS, K Dhananjoi, OC Yairipok PS, Md Riyajuddin, Nongpok Sekmai PS Premkumar Mangang, Thoubal PS L Joychandra, OC Thoubal CDO, N Tikendra meitei chuleh WPS Thoubal District akon numei police personnel ho panlah khomna District Police Thoubal combined team khat in Dr S Ibomcha Singh, MPS, SP Thoubal makaina noiyin Ukhongsang Village a liquor drive anabol uvin ahi.

Drive abol u sunga chun, Ukhongsang Mayai Leikai akon Hijam Bembem Devi, (43) w/o H Ibomcha @Jayenta Singh leh Ukhongsang Mamang Leikai akon mama Waikhom Jiten Singh (46), s/o (L) W Tomba Singh chu DIC ju asem jeh in anaman uvin ahi.

Thulhut kimu dungjuiyin, Hijam Bembem Devi inn akonin DIC ju litre 5 cheh umna plastic container 36, DIC ju litre 20 cheh umna plastic packet 5, anthom (fermented rice) sel 5 (5 kgs) cheh umna baltin (bucket) 17, anthom sel 10 cheh umna theibong (Jerry Can) 25, chuleh anthom sel 5 cheh umna plastic bucket 27 ana mandoh uvin ahi. Chuleh Hijam Jiten Singh inn akonin anthom sel 5 cheh umna aluminum bel (pot) 2, plastic bucket akeo 11, chuleh aluminum bel akeo 8 ana mandoh uvin ahi.

Chubanin jong Ukhongsang Mamang Leikai akon mama Thangjam Mombi Devi (58) w/o Th Kullabheigya Singh inn akonin jong aluminium bel 11, plastic baltin akeo 7, anthom sel 10 cheh umna plastic baltin 4, DIC ju kisemna a kimang aluminium utensil set khat, DIC ju litre 15 umna litre 20 dol plastic baltin khat, chuleh DIC ju litre 25 umna litre 20 dol plastic baltin khat ana mandoh uvin ahi, tin thulhut chun aseiyin ahi. Ahin Thangjam Mombi Devi chu police team ho galhun masangin ana jamming tan ahi.

Akiman teni leh akimandoh thil hochu OC Excise station Yairipok khut in apedoh tauvin ahi.

Xxxxxxx

CBSE in Class 10 hoa dinga Policy thah phongdoh, June 20 leh results so hiding

New Delhi, May 2: Central Board of Secondary Education (CBSE) in Saturday nichun class 10 simlai hoa dinga exam umna ding, Covid 19 natna jeh a aki suhhai toh kilhon a mark peh dingdan ho phondoh na anei in ahi. Hiche policy dungjuiya kumseh leh subject khat chunga Internal assessment noiya mark 20 kipeji chu kum sunga simlai hon test ahilouleh exam dang anei nauva a mark mudan hoa kona vet hiding ahi. Simlai hochu subject khat chunga mark 100 a vet peh hidiu ahi, hichea hin board policy dungjuiya mark 20 chu Internal assessment akon ahi in chuleh mark 80 tobang hochu kum lhuna board exam hoa kona hiding ahi.

Chuleh hichea school hoa kona mark kipeh danho chu kum khat sunga periodic test/ unit test ah mark 10, Half yearly exam a mark 30 chuleh pre board exam a mark 40 hiding ahi tin CBSE Examination Controller Sanyam Bhardwaj in aseiyin ahi.

Hichea hin board in school ho komah result committee principal leh hilkung 7 jauna asemdoh uva, amaho chun results ho asemtoh diuva hetsahna jong anei ahi. Hichea hin school khat akona hilkung 5 hochu mathematics, social science, Science chuleh language akon 2 leh akinaipi school hoa kona hilkung 2 jong committee external members a um ding ahi.

Pandemic sungah simlai hoa dinga results phatah leh thengsel a aumna dinga aphatcha results sodoh ding hi thil hahsa tah dinmun in aumtan ahi. Hinla hichea hin board chun school jousea lamkai holeh hilkung umjouse CBSE toh affiliated ho jouse chu aphatcha chuleh kilomtah a result apehdoh thei ding akinep na thuphon aneiyin ahi.

School honjong amaho koma mark kipeho chu masanga class 10 board exam a performance toh kitoh a abol diuva jong thupeh ahitauve ati.

CBSE in school hon unfair leh biased practice, assessment abol nauva anei loudiuvin jong hetsahna anei in, chuleh hichea hin ajuilou uva ahileh disaffiliation penalty amudiu ahi tin board chun aseiyin ahi. Board chun aseibena ah  results hochu June 20 leh phondoh na umding ahi chuleh school in May 5 leh member 8 jauna result committee asemdoh ding ahi ati.

Chuleh school wise a provision leh mark hopdohna ho leh document ho finalize bolna ding chu May 10 hiding ahi ati. Chuleh candidate kum khat sunga test ahi ding banga jaujou louhoa dinga school in amahoa dinga online a phone akona Assessment May 15 leh abol ding chuleh hichea result jong May 25 leh phondoh hiding ahi tin Bhardwaj in aseiyin ahi. Controller chun aseiyin hichea marks hochu CBSE koma June 11 leh pehlut na umding chuleh hichea result hochu June 20 leh phondoh hiding ahi ati.

CBSE in April 14 nikhoa chu class 10 board exam chu ana suhhai a chuleh class 12 exam jong postponed anabol ahi Covid 19 natna case toh kisaiya. Hichea thulhuh na chu high level meeting Prime Minister Narendra Modi chairman hina a ana um ahi.

Board exam hohi alhangpia February leh March lha sunga ana umji ahi, hinla tukum a hi Covid 19 natna jeh a May- June lha a um dinga board chun aphondoh ahi. School tamtah hon ana hongdoh kit tau jongleh gamsunga Covid 19 natna case thah akibe jingtoh kilhon in atamjo kha in aumkit tan ahi.

Xxxxxxxx

State ho a goljo lopna kipat toh kilhon a Election Commission in gihna phongdoh

New Delhi, May 2: Election Commission in State jouse leh Union Territory hoa political party koiman State 5 hoa kona victory procession anei theilou diu ahi tin gihna thuphon anei tan ahi. Video kimudoh ah Kolkata ah Trinamool Congress supporters hon mun phabep hoa celebration aneinau mutheiya um ahi. Mask jong kitomlou mipi aja a simhon party Office pamlangah flags ho choiyin aum uvin ahi, hiche hi State sunga Covid 19 natna case umdan toh kitohlou ahi. Hitobang a celebration kibolna chu rural areas lah dunga jong ana um in ahi.

Hitobang a celebration kibolna chu Tamil Nadu ah DMK supporters hon ana mang uvin ahi. DMK party hi kum 10 jouva power nung neikit dinga ginmo ahi.

Hiche thuhi media thuso na akona kimu ahi tin Commission chun State  jousea Chief Secretary leh UT ho koma hitobang kin kibol hochu akha diuvin hetsahna jong aneitan ahi.

Commission in hiche thilsoh hi khohtah a alah ahi in chuleh hichea hi hitobang thusoh hochu avela aumlouna dinga dan khoutah a achesah dingin jong Commission in avel in thuphon aneiyin ahi.

Commission in hichea SHOs leh Officer dang ho chu suspend peh hidiu chuleh criminal/ disciplinary action jong amaho chunga kila ding ahi tin aseiyin ahi.

State 5 hoa Election umna ding toh kisaiya rally ho ana umna hoa kona Covid 19 natna case thah hi khang dinga ginmona jong umsa ahi. Hichea hin adeh a West Bengal ah dinmun chu akhoh sepen ahi.

Madras High Court injong State 5 hoa Election umna dinga atohgon danho chunga Commission chu demna aneisa ahi. Monday nichun Court in aseina ah hichea hin Election Commission in achangseh a gamsunga Covid 19 natna second wave alhun na ah mona anei ahi tin aseiyin ahi. Chuleh Officer hojong murder charge bolkhum thei ahiuve tin judge hochun aseiben ahi.

Trinamool Congress candidate, Covid 19 natna jeh a thina toh a jinu in jong Election Commission chungah murder case apelut tan ahi. Khardah a kona Trinamool Congress party candidate Kajal Sinha chu coronavirus natna jeh a April 25 nikhoa chu ana thi ahi in tuahi ajinun Deputy Election Commissioner Sudeep Jain leh adang Official hochu amopohna donlou ahi tia ngohna anei ahi.

Xxxxxxx

Centre in kum 18-45 sung mihem crore 59 Vaccine kapna dinga Dose Crore 122 ngaiding ahi tia sei

New Delhi, May 2: Centre in Supreme Court koma hetsahna apeh na ah mihem Crores 59 kum 18 leh 45 sunga vaccine kapna dingah vaccine dose crore 122 tobang ngaiding ahi tin aseiyin ahi. Top Court masanga affidavit apehlut na ah Centre in vaccine kap dinghi government in atohgon holah a akhatna ahi in chuleh hichea hin 100 per cent a vaccine kapna phat sotlouva aumtheina dinga tohgon jong um ahi tin aseiyin ahi.

India a Covid Vaccine 2 umlah a Covaxin leh Covishield chu government in mipi jouse huopsah ding atohgon ahijouva hatah a alhahsam na hung um ahi. Hichea lekha kipehlut na ah vaccine kapna lampanga amasa hochu health care workers ho ahiuvin chuleh 2021 mid year population sunga kum 18 leh 45 sunghoa dinga project kigonna ah mi Crore 59 alhingin ahi. Mihem hijat vaccine kapna dinga Covid 19 vaccine dose crore 122 ngaiding ahi ahi tin Centre in aseiyin ahi.

Central government in  Covaxin leh Covishield damdoi lah nadinga tohgon anei na chungah foreign khutsoh Covid 19 vaccine hojong emergency a phalna peh ahina dinga tohgon aume tin Supreme Court koma hetsahna anei tan ahi. Hichea hin government in Covid 19 vaccine Sputnik V vaccine chu emergency dinmun a man dingin phalna apetan ahi, hiche vaccine hi European Union Agency hon Russia a studies/ clinical trials kibolna data leh India a Dr Reddy’s laboratories a Phase II/III trials kibol jouva phalna apeh ahi.

Chuleh hiche Sputnik V vaccine chu India in July lha akipat a asem dinga um ahi. Hiche local a kisem Sputnik V vaccine chu dose million 8 leh 16 (dose khat chu mi 2 ) ahuop ding ahi, hiche hi July leh August 2021 lha a dinga kigong ahi. Hiche thutoh kisaiya Union of India jong Pfizer, Moderna chuleh J&J toh 2020 kum kim akona kihet tona aneijing ahi. Hichea hin company hon amaho vaccine cheh u develop/ supply/ manufacture ho India a local partners toh kithoa asem thei diuva Centre in ahetsah ahi. Hichea hin top Court in April 22 nikhoa chu pandemic dinmun toh kisaiya Covid 19 case thah hatah a akibe jingna chungah essential services leh supply ho adeh a Oxygen leh drugs jauna Centre in tohgon anei dinga ginchat ahi.

Xxxxxxxx

MBBS simlai Final Year simho chu Covid Duty dinga kou hiding: Government

New Delhi, May 2: India a Covid 19 natna case akhanjing toh kilhon a medical students ho lahlut hidingin government thuso khat in Sunday aseiyin ahi. Hiche hi Prime Minister Narendra Modi lamkai na noiya meeting umjouva phondoh a um ahi.

Covid 19 natna jenna dinga human resources lama Prime Minister chun review meeting ana kou ahi. Hiche kihouna ah chun Union Health Minister Harsh Vardhan, Health Secretary leh Official dangho jong ajau uvin ahi. Hiche kihouna ah chun simlai holeh medical leh nursing course a pass out hochu Covid duty noiya natong dinga jong seikhom ahi in chuleh hichea details hochu jingleh sohdoh ding ahi tin thuso chun aseiyin ahi.

Hiche thulhuh na lah ah NEET leh incentivising MBBS pass out hochu Covid duty noiya um ding a ginchat ahi. Hichea hin MBBS final year leh nursing students hojong Covid duty polah a jausah hiding ahi. Hichea hin medical personnel Covid duty bolho chu government in recruitment abolna hihen financial incentives phatleh deisah na kipe diu ahi ati. Hiche kihouna chu gamsunga Covid 19 natna case thah akibe jingtoh kilhon a health care workers ho hatah a asuhboi ahi.

Saturday nichun Delhi a Batra hospital a oxygen lhahsam jeh a mi 12 thina anatoh lah ah doctor khat jong ajauvin ahi. Hospital sunga chu hapta khat sunga avel 2 na dinga oxygen supply chu ana lhasam ahi.

India in Covid 19 natna second wave alhuntoh kilhon in hospital, morgue leh cremation ho chu adimlha jeng in chuleh hichea hin damdoi leh oxygen hochu hatah a lhasam ahi. India chu Covid 19 vaccine semdoh lah a alenpen hijongleh State phabep hoa vaccine alhahsam jeh in mass vaccination tohgon chu asuboi tan ahi.

Covid 19 case thah akibe masangin political party hoa lamkai, PM jauna political rally anei nauvah mipi tamtah kipunkhom naho ana umin, hiche hochun Covid dan kisemho social distancing leh mask kitom ding tiho juina aumpon ahi. Experts phabep injong rallies leh mass religious kikhop khomna hochu mihem million a simhon ana jui nauvah Experts hon hiche hi Covid 19 second wave kipatna ahi tia aseiyu ahi.

PM Modi jong hichea hin State election ho akhohsah joh a pandemic dinmun joh aboipi loujeh in demna amu in ahi.

Chuleh Central government jong March lha sunga kipat a Scientific Adviser hon variant thah aum thu aseiyu angaisah loujeh u ahi tia ngohna aneiyin ahi.

Xxxxxxx

BKU lamkai Rakesh Tikait leh midang 12 Section 144 suhkeh jeh’a case kijihlut

New Delhi, May 2: Haryana police hon Bharatiya Kisan Union lamkai Rakesh Tikait leh adang 12 hochun maha panchayat agon jeh uvin section 144 asuhkeh utoh kilhon in case jihlut ahitai tin Official hon Sunday nichun asei uvin ahi. Tikait leh BKU lamkai hochun “kisan mazdoor maha panchayat” kingon Dhurali village Ambala Cantt ah Saturday nichun ana gong uvin ahi.

Ratan Maan Singh, Baldev Singh leh Jasmer Saini jong mi 12 kimanho lah ah chun ajau uvin ahi.  Coronavirus case thah hatah a akibe jingna chungah district magistrate injong section 144 aphongdoh tan ahi, hiche section noiyah mi 4 val kiloikhom na kiphal lou ahi.

Police hon asei nauvah sub Inspector Chandi Singh in BKU lamkai ho koma maha panchayat gong lou dinga ahetsah ahi ajeh chu district sunga section 144 kichesah ahitai tin aseiyin ahi.

Hinla BKU lamkai hochun hiche kingon chu ana chelhah pi uvin ahi tin senior police official khat in aseiyin ahi.

Assistant sub Inspector khat in complaint abolna chunga Tikait leh adang 12 ho chunga case jong kijihlut ahi. Amahohin Section 144 noiya order kiso ho asuhkeh u ahi in chuleh public servant khat in district magistrate in thuso aneiho sukeh na ah section 188 , IPC noiya dan asuhkeh u ahi. Provision dang IPC, police case kipelut lah ah section 269 (negligent act likely to spread Infection of disease dangerous to life)leh 270 (malignant act likely to spread Infection of disease dangerous to life) ho ahi tin police official khat in aseiyin ahi. Maha panchayat a athusei na ah Tikait, BKU a national spokesperson chun aseina ah Centre in agon Farm Bill 3 ho ho deilou najeh a kiphinna hi lahdoh ahi masanga chejom ding ahi tin aseiyin ahi.

Hiche toh kilhon in aman loubol miho koma phat sottah lut a gal umdia kiging banga um diuvin ngehna jong aneiyin ahi. BKU lamkai chun Covid 19 dinmun avettup na chungah government jong demna aneiyin ahi chuleh hiche kingon jouva thuso miho koma aseina ah hiche Covid 19 natna akona kivendoh theina dinga poimo ho agelkhoh diuvin jong hetsahna anei in ahi.

Xxxxxxxx

Modi in Medical Oxygen Supply toh kisaiya Review Meeting ana kou

New Delhi, May 2: Prime Minister Narendra Modi in Sunday nichun gamsunga medical oxygen dinmun vetlhah na review meeting ana neiyin hichea chun ama chairman hina anala in ahi. Gamsunga Covid 19 natna case thah hatah a akibe toh kilhon a oxygen supply kibolna chu hatah a ana suhkhah ahi.

Industry tamtah, rich combustion process leh power plants hochun oxygen plants anei uvin hiche hochu medical a manthei ahi. Hichea hin hitobang industry unit hochu holdoh a adeh a demand centre leh temporary Covid care centre oxygen beds umna hojong holdoh nading tohgon aumin ahi. Chuleh hichea facilities 5 hoa dinga pilot jong gonsa um ahi tin Prime Minister’s Office chun aseiyin ahi.

Hiche thuso chun aseiyin oxygen umna lupna 10,000 tobang hochu phat chomkhat sunga hitobang plants toh kinai namun hoa temporary hospital sahdoh a koi thei dinga tohgon jong um ahi. Hichea hin nitrogen plants 37 hochu medical oxygen asemna diuva lhendoh a um ahi. Hitobang a modified nitrogen plants hochu hospital koma chon ahilouleh oxygen semdoh na site a manthei ahi. Hiche muna kona specialised vessel/ cylinder manga hospital hoa pohlut thei ding ahi tin Modi in aseiyin ahi. Hiche review meeting ah chun principal secretary Rajiv Gauba leh Home Secretary Ajay Bhalla jong ajauvin ahi.

Saturday nichun south Delhi, Batra hospital ah Covid 19 natna nei mi 19 doctor jauna admit bola uma ahiuvin hinla hichea hin minute 80 tobang oxygen supply aboijeh in athi uvin ahi. Hapta masa sunga jong Jaipur Golden Hospital, Delhi a Covid 19 natna nei mi 20 ho admit kibol jouvin oxygen supply ana boitoh kilhon in thina anatoh uvin ahi. Geldoh thei khatchu hiche hi hospital hon oxygen supply kibolna chu liquid medical oxygen akona backup cylinder hoa akhel kah a thilsoh ahi. Gamsunga hospital honjong oxygen supply kibolna hatah a aboina chungah kithopi na athum uvin ahi. Delhi a tuahi Covid 19 fourth wave alhun laitah ahi.

Hiche thua hin Centre in medical oxygen leh vaccine semna lampang ho chu hatah a kiboipi a production jong suhpung ding kingaito jing ahi ati. Chuleh Delhi government injong amahoa dinga oxygen kikoi jat jong apodoh joupon ahi tankers lhahsam na jeh in ati. Medical oxygen supply kibolna alhahsam na thua Delhi government leh Centre jong demna hatah a amusa ahi. India in Covid 19 natna second wave alhuntoh kilhon a niseh a case thah a lakh a sim a akibe jingtoh kilhon a Covid 19 natna jenna dinga poimotah medical oxygen supply kibolna chu hatah a atohkhah ahi, ajeh chu demand toh supply kibang talou ahi.