30th April 2021 News

30th April 2021 News

81
0
SHARE

Covid-19 khanjing jeh’a Imphal pumpi ni-7 Containment Zone a kiphongdoh; Mi-5 thi, Case 314 kimube toh lhon a nikhat a kimudoh tampen hi

Imphal, Apr. 29(ET): COVID-19 natna nei athahbeh a mi 314 kumdohbe a mi 5 in thina ana tobe kit toh kilhon in Manipur Government in tunin Imphal sung pumpi nikho 7 sung Containment Zone dingin phondohna anei tan ahi.

Hiche thu toh kisaiya thupeh chu State Home Department in Containment Area sunga kiphalpeh ding hotoh ana sodoh tha in ahi.

Hiche phat sunga kiphalpeh ho ahileh gari thilpo ho adeh a Oxygen/Oxygen Cylinder po ho, Healthcare Facility toh kisai adeh a Animal Healthcare, Hospital ho, Clinic ho, Nursinh Home ho leh Healthcare Worker ho bou chele vale phalpeh ahi.

Pharmacy holeh Veterinary Medicine joh ho phalpeh ahiuvin ahi. Chuleh, COVID Vaccine kikap dinga che ho, COVID Testing bol ding ho leh Medical Emergency hojong phalpeh ahiuve. Home, Health, Relief leh DM, Police Department holeh District Administration a natong jouse jong chele vale phal hiding, hinla Greater Imphal Area sunga um Office jouse kikhah ding ahi.

Nitin kimanchah na adwh a donding tui Supply ho, Power, Fire Fighting, Waste/Garbage Collection, ATM Service hoa kimancha jouse jong phalna apeuvin ahi.

Atahlahbe na a chun Ima Keithel tilou adang annme ding anche ho, sa le nga kijohna ho, bongnoi kijohna ho jong jingkah nidan 6 apat nidan 10 gei phalpeh ahiuvin ahi. Chuleh khosunga nitin kimanchahna kijohna mun holeh gancha nehding kijohna mun hojong jingkah nidan 6 apat nidan 10 gei phalpeh ahiuvin ahi.

Imphal a Wholesale Shop hojong 3 lah a khat in ahon ji ding, hitia chu kilhahtho a jingka nidan 6 apat nidan 10 gei ahonji diu, chuleh Petrol Pump ho angai banga kihong ding, ahithei chan a kititkhom navang umsah lou ding ahi.

Chukit leh, Electronic leh Print Media, Telecom Services Provider toh kisaiya natong jouse jong phal ahi tinjong atahlang in ahi. Imphal Airport jong kihong jing ding, Staff leh Passenger ho kimanchahna hojong kikhah lou ding ahi.

Lhunna gena ding Hostel hojong Staff ahunbep toh ahon thei diu, hinla Restaurant ho kikhah ding ahi. Niseh a neh le chah thahpeh ho jong kikhah lou ding ahi. Imphal West leh Imphal East a Deputy Commissioner leh Superintendent of Police in hiche thupeh phatah a jui ahi nadia ahithei chan a pan ahin lah lhon ding ahi tinjong atahlang in ahi.

Alangkhat a tuni mi 5 in thina anatokit a natna nei 314 mudohbe ahitoh kilhon in tuchan a nikhat sunga dinga case kimudoh tampen na nikho ahitai tin State Health Department akon thusodoh chun atahlangin ahi.

Athahbeh a natna kimudoh ho lah a chun Central Armed Police Force Personnel mi 18 jong ajaovin ahi tin Common COVID-19 Control Room akon thusodoh chun atahlangin ahi.

Chuleh tuni chan a natna kimudoh agomin 31,315 aphatan, thina toh agomin 400 alhingtan ahi.

Tunia COVID-19 jeh a thina toh lah a chun Imphal East leh Imphal West akon mi 2 cheh leh Bishnupur District akon mi khat ahi.

District ni – Imphal West leh Imphal East ah natna kimudoh lah a atampen ahi toh kilhon in 128 leh 77 ana kimudoh in ahi tinjong thusodoh chun atahlangin ahi. Adang natna nei 29 ho kimudohna hi Kakching ahi in, Bishnupur leh Churachandpur akon 14 cheh, 13 hi Kangpokpi, 11 hi Thoubal, 4 hi Tamenglong, 3 hi Senapati, 2 hi Noney leh 1 hi Uhkrul akon ahi tinjong atahlahbe in ahi.

Tuchan a COVID-19 Active Case um hi athahbeh a kimudoh ho pum’in 1,225 apha tan, chuleh damdohna nei agomin 29,690 alhing tan ahi. State COVID-19 Recovery Rate jong phatlam amano jep toh kilhon in Wednesday nikho a 94.75 Percent akon in tuni chun 94.81 Percent alhung tou tan ahi.

State sunga hung vanleng a April 25 nikho a Indigo Flights 6E-6181 touna jon 16-21 leh 6E-21 touna jon 29-35 a toukha jousen Common Covid Control Room No. 18003453818 ahilou leh ama ama District Surveillance Officers (DSO) akinthei pen a akimupi diu ahi.

Tunia COVID-19 jeh a thina toh nukhahpen ahileh Imphal East akon pasal kum 76 khat leh Imphal West akon pasal kum 52 khat in JNIMS leh RIMS a thina anatuo lhon ahi.

Thulhut nunungpen kimu dungjuiyin, tuni chan a State sunga Vaccine kikap agomin 1,59,860 alhingtan ahi.

Chuleh, kum 45 chunglam jousen akinthei pen a RIMS, JNIMS, District Hospital ho, CHC ho, PHC holeh lhendoh a um Private Hospital Vaccine Centre hoa Vaccine kikapcheh ding injong thumopna aneiyin ahi.

xxxxxxxxxxx

State in Centre akon a AgVa Ventilator 150 ana mu

Imphal, Apr. 29(ET): Union Ministry of Health and Family Welfare in COVID-19 natna hilen doudalna dinga AgVa ICU Ventilators 150 ahin thot chu tuni chun Imphal ahunglhung tan ahi. Mihem hinkho huhdohna thei ding manchah hung kithot ho  chu Chief Minister N. Biren Singh in Chief Minister Secretariat Durbar Hall ah kin-gon neocha ana kiman toh kilhon in ana lamto in ahi.

Hiche Ventilator hohi Prime Minister’s Citizen Assistance and Relief in Emergency Situations Fund (PM-CARE Fund) noiya hung kihomdoh ahi.

Chief Minister in ahoulimna a chun, hiche Ventilator hohi kolphe meivah panglouva nidan 2 sung manchah thei dinga jong Battery kituo den ahi. Phat masa a Centre akon a Ventilator 90 ana kimu jong abon in JNIMS ah manchah thei ahijing nalaiyin ahi ati.

Hiche chungchon ah Centre in Oxygen Concentrator 400 leh D-Type Oxygen Cylinder jong ahin peuvin, hitoh kilhon chun State sung’ah D-Type Cylinders 3000 tobang aum tan ahi tinjong Chief Minister in aseiyin ahi. N. Biren Singh in aseibe na a chun State in UNICEF akon injong RT-CPR Machine 2ana kimu in JNIMS leh RIMS ah khatcheh ana kipe in ahi ati.

Oxygen ninglhingset a neijing thei nading a Thoubal leh Churachandpur ajong ni 10-15 kah a Oxygen sem na ding kitungdoh ding ahitai tinjong aphongdoh in ahi. Kiven masat hi natna tijat umtah akon a huoidohna thei pen jong ahi in, State Government in SOP palkeh ho chunga khaotah a gotna kipeding ahi tinjong Chief Minister in aseiyin ahi.

Aman aseina a chun pathen houva kholjin ho hihen houthu toh kisaiya kin-gon kinei ho hijong leh SOP ho phatah a ajui cheh diu, koitobang dan leh thupeh ho palkeh aum leh kin hin guong ho pum’a kimat tha ding ahi ati.

Hiche natna hilen doudal theina dinga lunggel leh deisahna hung kipodoh ho akiliem jing in ahi tinjong aseiyin ahi.  Advisor to Chief Minister (Health) Dr. S. Ranjan, Additional Chief Secretary M.H. Khan leh Director (Health) Dr. K. Rajo jong kin kimanna a chun ana pang uvin ahi.

Xxxxxxxxxxx

Kpi a COVID-9 natna kimudoh 36 lhingta, SOP ho phatah a jui ahina dia Police hon hatah a kigonna nei

Kpi, Apr. 29(UNA): Tunia athahbeh a COVID-19 natna nei mi 15 mudohbe ahitoh kilhon in Kangpokpi District sunga COVID-19 natna kimudoh agomin 36 alhingtan, chuleh thina toh 17 ahijing nalaiyin ahi.

Tunia COVID-19 natna kimudoh ho lah a chun Kangpokpi District Headquarters a pansa lamlen sem a um LECKON Infra Pvt. Ltd. a natong holeh Official ho chung’ah akiha mudoh dehset in ahi.

District sunga natna punbe jing toh kilhon in Kangpokpi Police hon COVID-19 Appropriate Behavior ho phatah a jui ahina ding in kigotna phatah anei tauvin ahi.

Kangpokpi Police Personnel hojong Koubru mol kal ho khohei dan vesui ding in Damdei, Kholep jotna lampi leh Mangjol kho leh mun phabep ah melmu in ana um uvin ahi.

COVID-19 toh kisaiya SOP ho phatah a jui ahi nadia vetsuina aumjing toh kilhon in mol kal hojong alhomjep tauvin, molvum a um hojong ahung kumsuh jing tauvin ahi.

Alangkhat ah, Kangpokpi Police Station a Officer-in-Charge thah Insp.Henminthang Kipgen in jong akinthei pen in Kangpokpi khopi sunga COVID-19 Appropriate Behaviour ho phatah a jui ahina dingin vetsuina anei paiyin ahi.

Police Team honjong Kangpokpi OC makaina in maitom kituo louva hung potdoh ho ana mankhom uvin, COVID-19 Appropriate Behaviour ho apalkeh kit uleh gotna pehdinga gihna anei utoh kilhon in ana lhadoh kit uvin ahi.

Kangpokpi Police Station a Officer-in-Charge injong COVID-19 toh kisai SOP holeh Guideline ho phatah a jui ahina ding in thu lhangsapna ana neiyin, thumopna kinei ho juicheh dingin jong ana lhangsap in ahi.

Police Team honjong kailhang mun leh sumkolveina mun jouse nilhah nidan 5:00 apat akha cheh diuvin hetsahna ana neiyun, chuleh nilhah nidan 7 apat thukhoh tinten ahilou leh koimacha hung potdoh thei lou ding, thumanglou ho chunga gotna kilom kipe ding ahi tinjong hetsahna ana neiyun ahi.

Kangpokpi District Administration injong jing nikho leh Kangpokpi DC Conference Hall a Kangpokpi AC a MLA makaina a Assembly segment COVID Awareness cum Enforcement Committee toh kisaiya toukhomna anei diu ahi.

SP Kangpokpi, CMO Kangpokpi,  Kangpokpi, Champhai leh T.Waichong a SDO ho, SDPO Kangpokpi, Medical Superintendent of District Hospital Kangpokpi, Kangpokpi tolsunga kiloikhomna KTC, KWWO, KYU holeh Health Worker leh Official honjong hiche toukhomna a pan alah diu ahi.

Xxxxxxxxx

Kukite lah’a numei Ordained masapen Reverend Dr. Kim Vaiphei Haokip muolliem ta

Imphal, Apr. 29(UNA): Manipur Methodist Church phutdoh lah a lamkai Dr. Reverend Kim Vaiphei (Haokip) chu achenna Yoko Villa, Phaipijang Hebron Veng, Langol, Imphal ah nisim 29 April jinglam nidan 12:00 vel chun ana muolliem in ahi.

Amahi kum 66 alhing tan, a-inneipu Pastor Obadiah Haokip leh a insungmi ngaicheng ana dalhah in phatsottah anatna nei akon damdoh jou talouvin atonsot munding jon in ana choldo tan ahi.

Achesa 11 November, 1954 kum chun ana pieng in, Dr. Rev. Kim Vaiphei Haokip hi (L) Pastor Tongkholam Vaiphei leh (L) Lenkhoneng Tuboi Vaiphei chanu lah a aneopen ahi. Thepna, lam’ah MA(Pol.Sc) leh Theology lampanga Doctor Degree anamu ahi.

Kuki sunga numei lah a BD ana simdoh masapen leh Manipur Baptist Convention a numei lah a, President masapen jong ahi. Chuleh Kuki numei lah a M.Th.(Master of Theology) leh Kuki sunga numei lah a Pastor dinga namdetna kinei masapen jong ahi in chuleh State sunga numei lah a Gambih Pastor masapen jong ahi.

Chukit leh, Manipur sunga numei ho lah a Theology a Ph. D mumasapen jong ahi in, Methodist Church of India a dinga District Superintendent masapen jong ahi.

Convention in kum 10 sung thalhenga  Manipur Baptist Convention a Women Secretary dinga anasol masangin jong kum tamtah Kuki Baptist Convention a Women Secretary in ana pang in chuleh 2010 gei chun KBC ah Pastor na ana tong in ahi.

International toukhomna ah 22 vei pan anala in, chuleh Kukite chung chang thu seina in UN ah Minute 5 phat jong anala kha in ahi. Chuleh leiset pumpi a Continent 6 anavil doh in ahi.

Achesa October 10, 2010 a Manipur a Methodist Church of India ana phudoh toh kilhon in Executive Secretary masapen ana hi in ahi. Lekhabu jong ‘Coming of Christianity in Manipur: with special reference to the Kukis(1995)’ kiti lekhabu panna in tamtah ana sundoh in ahi.

A longdamsa vuilemna kin chu Chingmeirong Christian Cemetery, Imphal ah phatah a COVID dan leh thupeh ho jui pumin ana kimang in ahi.

Muntin a aphatlouva Dr. Rev. Kim Vaiphei Haokip muolliem na thu japha jouse in adalhah a insungmite lunghempi naleh lungmonna thuthot jong ana neiyun ahi.

Xxxxxxxxxx

CM N Biren in COVID-19 natna punbe jingtoh kilhon a  hetgilna neiho kimupi

Imphal, April 29(ET): Hetmanlou kah a State sunga COVID-19 natna nei nikho phabep a ahung punbe jingtoh kilhon in Chief Minister N. Biren Singh in lou le ai lampanga hetgilna nei ho, thunei vaihom ho leh Police ho akon in COVID-19 Second Wave kimaitopi ding dan lunggel lahkhomna chu tunia Chief Minister Secretariat a toukhomna kineina a chun ana neiyin ahi.

Education Minister S. Rajen, Advisor to CM (Health) Dr. S. Ranjan, Additional Chief Secretary M.H. Khan, Principal Secretary (Health) V. Vumlunmang, Commissioner (Education-S) T. Ranjit, Director (Health) Dr. K. Rajo, JNIMS Director Prof. K. Bhimo, Shija Hospitals Managing Director Dr. Kh. Palin, Babina Group Managing Director Dr. Th. Dhabali, Imphal West DC N. Praveen, Imphal East Additional DC Shamim Ahmad Shah, Imphal East SP H. Jogeshchandra, Imphal West SP K. Meghachandra leh Directorate of Health Services akon Officer luboh honjong toukhomna a chun pan ana lauvin ahi.

Biren Singh in Manpower, Material Management, Vaccination, Lockdown leh Containment Zone chuleh SOP ho jui ding dan toh kisaiyin lunggel lahkhomna ana neiyin ahi.

Toukhomna kinei sunga chun Chief Minister in mopohna nei Official ho heng’ah Fund lhasamtah tah a kikoi lou ding ahi tin kitepna aneiyin ahi. Chuleh akinthei pen a natong mi lahbe ding leh thil-le-luo angaicha ho akinthei pen a akholchil diuvin hetsahna aneiyin, chuleh Hospital hoa lupna tamsah beding leh COVID Care Centre ho athahbeh a chohing kit dingin jong hetsahna aneiyin ahi.

Chuleh N. Biren Singh in Education Department a natong hojong Home Isolation a vetkol a um ho kholchilna kineina ho a Health Department Official ho kithopi dinga manchah ding angaidan jong aseiyin ahi.

Xxxxxxxxxxx

Akihaisah Staff Nurse leh Multi-Tasking Staff ho COVID-19 toh kisaiya natoh jom dinga kouna kipekit

Imphal, Apr. 29(ET): Directorate of Health Services, Government of Manipur noiya contract basis a na anatong, chuleh atohna akon ana kihaisah, Staff Nurse 133 leh Multi-Tasking Staff 87 hochu, Manipur gamsunga Covid-19 case thah apunjing toh lhonin, COVID Care Centre lah, chuleh Covid-19 natna toh kisai natoh pehkit dingin State Health Department in tohgon asem in ahi.

Nikho tha ahilouleh tohman hi State Cabinet in amasa chunga ana sempeh banga, nikhat a Staff nurse ho’a Dk. 1000 mama hikit ding, MTS ho’a Dk. 500 mama hikit ding, chuleh Doctor ho’a Dk. 2500 mama hikit ding ahi.

Hiche thu toh kisaiyin Soiminlian Lengen, Deputy Secretary (Health & FW), Government of Manipur in Director of Health Services, Manipur henga official lekhathot anathot in ahi.

Staff Nurse 133 holeh MTS 87 ho natoh kitna dinga hin “terms and conditions” aumin ahi. Staff ho koitobang hetsahna kinei nikho apat ni-5 sunga report hung kibol lou aumleh ama dinga chu “offer’ kikhah ding ahitai. Staff hon masanga atoh uho keo hilouva Covid natna toh kisai natoh dang dang jong hung kipethei ahi. Chuleh State sunga hoilai mun hijongleh angaicha dungjuiya manchah thei dinga anop ngai ding ahi.

District jouse’a natong mi aninglhin theina dinga “system” kigong ding ahi. Chuleh staff hon atohnom nau district akilhen uva, che dungjuiya chu natohna ding mun kihopna dinga lottery systemkibol ding ahi.

Chujongleh, tuchunga athahbeh’a natohna ding phatsung hi natoh kipatni apat lha-6 sungma hikit ding ahi, tin Soiminlian Lengen, Deputy Secretary (Health & FW) in aseiyin ahi.

Xxxxxxxxx

Koubru kal ho kithopina anape khat chung’a kipaman kipe; Koubru mol a mi 100 vel umden nalai

Kpi, Apr. 29(ET): Janni Koubru kal ding honkhat gari ana set toh lhon a avel lah a khomi khat in kithopina ana pehtoh lhon in Koubru kal hon nasatah in kipathu asei uvin ahi.

Hitobang kithopina chung chang a Kangpokpi SP in jong kithopina ana pe pa kipaman a Dk. 1000 apeh ding in ana sei in ahi.

Alangkhat a tunin Koubru kal mi 416 lam ahung kumlha uvin, mi 50 vel akal tou kit uvin tu le tua mol chung a um jat hi mi 100 vel ahiuve akiti.

Xxxxxxxxxxxxx

Election duty che MR khat thi

Imphal, Apr. 29(ET): West Bengal Election a duty che 6th Manipur Rifles akon Jemadar Waikom Ronald Singh (40) in tunin Covid-19 natna jeh in Guwahati Medical College a thina atoh in ahi. Thina tohpa hi asopipa i aumpi ahi akiti.

Hiche toh kisai in Manipur Home Dept. in thilong kitup tah’a Manipur lhut ahina ding in Assam a vaipo hokom’a ngehna anei uvin ahi.

Alangkhat a Gauhati Medical College akon Superintendent in thilong pohdohna ding in thu in Kamrup DC hetsahna aneiyin, chuleh thina tohpa hi Covid-19 negative ahin, masang a Covid-19 positive anahisa ahi ati.

xxxxxxxxxx

Manipur Police in SOP palkeh mi 407 anaman, amaho akon Dk. Lakh 1.6 dongdoh

Imphal, Apr. 29(ET): Manipur Police Department in tuni chun Covid-19 pandemic toh kisaiya State Government leh State Disaster Management Authority in asem dan juiding leh kigahna palkeh ho chunga drive abol uva kon dan palkeh mi 407 ana hentang uvin ahi.

Hiche akiman hon dan apalkeh nau hochu japi kititna lah’a muhtom kitomlou, japi kititna lah’a social distancing dan juilou, jalhang mun lah’a chil set, chuleh adang dang ahi.

Hentang’a umho chu chomkhat jouvin police hon khoutah in gihsalna anei uvin, ana lhadoh tauvin ahi. Drive kibol sunga chun, dan dungjuiyin, dan palkeh mi akiman ho’a konin leuman (fine) Dk. 1,63,500/-  ana dongdoh uvin ahi, tin E Priyokumar, IGP(Ops), leh Nodal Officer (Covid-19), Manipur Police in thuso abolna achun ana seiyin ahi.

Chuleh National Disaster Management Act 2005 noiya dan palkeh jouse chunga dan dungjuiya dan khoutah’a kitah ding ahi, tin E Priyokumar, IGP in thuso abolna achun ana seiyin ahi.

xxxxxxxxxx

CCpur District a Covid-19 Care Centre ding’a Lanva TD Block gontup hita

B.Lalboi Gangte

CCpur. April 29 (ET) : Churachandpur District sung’a Covid-19 Second wave doudal na ding’a panlah na achelha jing toh lhon’a District sung’a natna vei kha aum leh vetkol na ding in Tedim Road jui Lingsiphai kho’a Lanva TD Block hi Covid-19 Care Centre (CCC) ding’a kimangcha ding ahi. Hiche ahi jeh chun Chief Medical Officer (CMO) CCpur Dr. Vumchinpau Tonsing lamkai nanoi in tulai hin kigon tupna natoh achelha jing in ahi. Chuleh hiche CCC hi 1st Wave sung’a anavekol Doctor, Nurse leh Multi-Tasking Staffs ho mama avetsui ding uva mopoh na akipeh toh lhon in tuni CCC Lanva TD Block ah Doctor, Nurse leh Multi-Tasking Staff ho kichuhna jong anape uvin ahi.

Hiche toh lhon’a Dr. Sania Monica, in-charge, Covid-19 Quarantine Centre in kichuh naleh thudoh chom chom kibol ho practical tah in hilchetna anape in chuleh CCC vesui ding hon Care Centre sung thengtah’a akoi ding, Covid-19 Positive ho ding chang tah leh chingthei tah’a BP, Pulse, SPO-2 jaona’a thil chom chom abol ding dan’u hilna anei in ahi. Chuleh test kit ho suhtheng ding dan, surf leh chemical mangcha’a inn jut ding dan, Care Centre sung’a manchah chom chom ho suhtheng ding dan leh PPE kit leh Oxygen Concentrator machine man ding dan practical in kichuhna anapen ahi.

Hetthei khat chu Covid-19 Second Wave sung’a kimang ding Covid-19 Care Centre Lanva TD Block hi Dr. Vumchinpau Tonsing CMO-CCpur panlah nanoi’a May lha akipat man pat thei ahi na ding’a kigo ahi. Hiche mun ahi District sung’a Covid-19 Positive Symptom nei ho vetkol na ding ahin ventilator ngaicha ho ding’a vang CCpur District Hospital Casualty building ground floor Isolation Ward ah kikoi ding hiche na chung chon’a damdoh joulou alel cheh cheh ho vang apoimo dungjui’a Imphal la’a refer kibol ding ahi. Chuleh Covid-19 Care Centre hi Manipur Chief Minister N. Biren Singh in achesa April nisim 27 nikho’a District jouse’a District Administration, Police Department leh Medical Department ho Video conference a meeting ananei pi phatsung’a District jouse’a agannathei pen’a Covid-19 Care Centre agon cheh ding uva nona ananei toh lhon’a District jousen kigot na anei ahi. Chuleh hiche CCC mun’a um ding ho neh leh don ding toh kisai’a tu leh tu’a Government in ima asei lou jeh in neh leh don ding ho a-insung miten apeh’u ngai ding ahi.

Alangkhat’a CCpur District sung’a Lanva TD Block, Covid-19 Care Centre leh District Hospital Casualty building ground, Isolation Ward ho’a Covid-19 Positive ho vekol ding’a achesa April nisim 26 nikho’a CMO office chamber, CCpur a Medical Officer 3, Nurse 12 leh Multi-Tasking Staffs 12 Interview jong ana kibol tan ahi. Chuleh Covid-19 Care Centre a Medical Officer 2, Nurse 6 leh Multi-Tasking Staff 6 duty hi ding chuleh Isolation Ward ah Medical Officer 1, Nurse 6 leh Multi- Tasking Staff 6 duty ahi ding ahi.

xxxxxxx

CCpur District Administration in District Hospital a manchah ding Oxygen Concentrator khat pehdoh nanei

B.Lalboi Gangte

CCpur. April 29 (ET): Churachandpur District Administration in tunin Medical Department heng’a Oxygen Concentrator khat pehdohna ananei in ahi. Hiche pehdoh na chu Thangboi Gangte, MCS Additional DC Officer chamber, Tuibong ah ananei ana um in hiche achun District Administration akon Thangboi Gangte, MCS, Additional DC leh S. khaikhopau Ngaihte, MCS, Additional DC in Dr. Vumchinpau Tonsing, CMO, CCpur leh Dr. T. Vanlalkungi, Medical Superintendent, District Hospital khut’a Isolation Ward a manchah ding in pehdoh na aneilhon in ahi.

Hetthei khat chu pehdoh’a um Oxygen hi District Administration in Imphal khopi akon Oxygen Concentrator hi achoh’a District Hospital Isolation ward ah manchah ding’a apehdoh nachung’a Medical Department hon kipa thu aphongdoh uvin ahi.

xxxxxx

CCpur DC office a visitor lut ding kha hita; Apoimo dungjui’a virtual mode a lut thei

B.Lalboi Gangte

CCpur. April 29 (ET): Thangboi Gangte, MCS, Additional DC, CCpur in Tuibong, DC office a visitor ho lut tah lou ding in thuso anei in ahi. Chuleh Covid-19 Second Wave akon kivengbit na ding’a DRDA office panna’a DC Office a non-official visitor ho thuthah aum tokah’a kha ahitan ahi ati. Ahin visitor koiham khat alou theilouva DC toh kihou ngai ding aum leh Virtual mode akon akihoupi thei ding hiche na ding’a contact number 9362-146-188 a jinglam nidan 11:00 akipat nilhah nidan 1:00 kah sung’a appointment akilah thei ding ahi. Chuleh virtual meeting hi jinglam nidan 11:00  akipat nilhah lang nidan 1:00 chan hi ding ahi toh lhon’a Monday nikho leh Pawan Yadav IAS  DC, Tuesday nikho leh Thangboi Gangte, Additional DC, Wednesday nikho leh Khaikhopau Ngaihte, Additional DC 2, Thursday nikho leh Zosanglur Joute, MCS chuleh Friday nikho leh Sangremsiama, BO HQ akimupi thei ding’u ahi. Alangkhat’a Covid-19 Vaccine kikap ho vang SOP guideline phatah’a ajui uva chuleh Vaccine kikap ahina hetchet na avetsah uva lut thei ding ahi.

xxxxxxx

CCpur District a Covid +ve case thah 29 kimudoh; agom’a case 88 lhingta

B.Lalboi Gangte

CCpur. April 29 (ET): Churachandpur District sung’a Covid-19 Vaccination achelhah jing lai ahitoh lhon’a tuni (April 29) Vaccination site, District Immunization Office (DIO) ah vaccine kikap sah ding mi atam jeh in District Police in boina ima aumlou na ding in anavesui uvin ahin hiche phatsung’a Covid +ve case thah 29 ana kimudoh in ahi. Hetthei khat chu Covid-19 akon kivenbit na ding’a CCpur District sung’a vaccine kikap sah thei na Private hospital khat jaona’a Vaccination site 8 aum vang in DIO a kikapsah nom atam jeh in jui ding’a kisem daan phabep koiman ajui lou jeh in District Police hon ana vetup uvin ahi.

Hiche toh lhon’a Integrated Disease Surveillance Program (IDSP) Churachandpur in nilhah lam nidan 3:00 chan’a CCpur District sung’a Covid-19 toh kisai’a data report asodoh na’a Positive thah 29 mudoh ahidan atahlang in ahi. Hiche lah’a RT-PCR Test akon election duty che 1st IRB akon personnel 16, sepai dang khat leh tolsung mi khat chuleh RAGT test akon kimudoh pasal 2 leh numei 6 ahi.

Hetthei khat chu RT-PCR test akon kimudoh 1st  IRB  personnel 16 ho hi West Bengal a election duty kibol chai’a Lamka hung lhun uva test akibol nao’a kihedoh ahi in chuleh election duty ding’a hi mi 82 kondoh nalah’a mi 16 hi positive ahi. Chuleh negative ho jouse jong mun chom cheh’a umsah uvin test bolthah kit ding’u ahidan jong atahlang uvin ahi. Case thah 29 akimudohbe toh lhon’a CCpur District sung’a agom’a 88 (Numei 26 leh Pasal 62) alhing tan ahi.

Xxxxxxxx

Tengnoupal Battalion in khamnathei Dk. Crore 2.52 man anamandoh

Imphal, April 29 (ET) : IGAR (South) vetsui nanoi’a um Tengnoupal Battalion in tunin Tengnoupal District hopsung Khudengthabi kom’a brown sugar Dk. Crore 2.52 man ding vel anamandoh uvin ahi tin thulhut chun asieyin ahi. Hetthei khat chu Assam Rifle hon thuguh pole ho akon thulhut amu dungjui uvin jingkah nidan 4:00am vel’a ginmo thei tah’a lengthei lei lah’a kikham Maruti Gypsy khat kholchilna aneinao’a brown sugar packet 107 anamudoh’u ahi. Akimandoh khamnathei hi Kg. 1.260 ahin hiche hi Imphal lam’a poh ding agot’u ahi. Matdoh’a um khamnathei ho Police Dept. khut’a kholchilbe ahi nading in anapelut tauvin ahi.

Xxxxxxxx

Eastern Army Commander in Nagaland leh Manipur gamsung vilna ananei

Imphal, April 29 (ET) : Lt Gen Anil Chauhan, PVSM, UYSM, AVSM, SM, VSM, ADC, GOC-in-C Eastern Command in achesa nikho thum (April. 27-29) sung in Spear Corps Units & formation chuleh Nagaland leh Manipur Assam Rifle ho vilna ananei in ahi. Hiche phatsung’a Lieutenant General Johnson P Mathew, AVSM, VSM GOC Spear Corps in Assam, Nagaland leh Manipur gamsung’a kigin jing’a aum jing dan leh Naga Peace Talks Framework Agreement achelhah jing dan thu Army Commander heng’a tahlang na ananei in ahi. Chuleh Army Cammander in jong Nagaland leh Manipur a Army leh Assam Rifle Spear Corps Headquarter vilna jong anei in chuleh gamsung umdan leh security umdan hetchet na jong ananei in ahi.

xxxxxxxxxx

State Government leh Shija Hospital in MoU soikaina ana nei

Imphal, April 29(ET): Tuni chun State Government, M/S Shija Hospitals and Research Institute Private Limited aleh Manipur Pollution Control Board hon Lamdeng, Imphal West District a Common Bio-Medical Waste Treatment leh Disposal Facility chuleh Hazardous Waste Treatment, Storage leh Disposal Facility semhoina ding in Kinoptona Memorandum of Understanding (MoU) soi kaina ana neiyun ahi.

Kinoptona MoU chu Chief Minister N. Biren Singh jaona in Chief Minister Secretariat ah tuni chun ana kai un ahi. State Government langa kon in Additional Chief Secretary (Forest and Environment) M.H. Khan in ana kaiyin, Shija Hospitals Pvt. Ltd. akon in Managing Director Dr. Kh. Palin leh Manipur Pollution Control Board akon in Member Secretary Shri T. Mangi in ana kaiyin ahi.

Hiche Facility ho hi Bio-medical Waste Management Rules, 2016 (as amended) leh Hazardous and Other Wastes (Management and Transboundary Movement) Rules, 2016 (as amended) noiya kibol ding ahi.

Hiche Facility semdohna dinga State Government in alut ding jat lah a 25 Percent apohdoh ding, M/S Shija Hospitals and Research Institute Private Limited in Ministry of Environment, Forests and Climate Change, Government of India akon Project Cost Sanction abol lah a 25 Percent  apohdoh ding ahi.

M/S Shija Hospitals and Research Institute Private Limited in hiche teni kisemna apumpi a mopohna leh vetsuina anei ding ahi. Chuleh na kitoh dan leh vetsuina kinei dan  Manipur Pollution Control Board hon Bio-medical Waste Management Rules, 2016 (as amended) and the Hazardous and Other Wastes (Management and Transboundary Movement) Rules, 2016 (as amended) dungjuiya avetlhah kit diu ahi.

Xxxxxxxxx

India a Covid-19 case 379,257 kimube kit, mi 3,645 thi

New Delhi, Apr. 29: India in tuni (Thursday) chun Covid-19 positive case 379,257 ana mudohbe kit in ahi. Chutoh lhonchun India gamsunga tuni chana Covid case kimudoh jat agomin 18,376,524 alhingtan ahi. tin Union ministry of health and family welfare akon thulhut kimu chun aseiyin ahi.

Alangkhat’a, tuni sung mama in mi 3,645 in Covid natna toh kisaiyin thina anatohbe kit in ahi. Chutoh lhonchun tuni chana India gamsunga Covid natna toh kisaiya thina toh jat agomin mi 2,04,832 ana lhingtan, fatality rate jong 1.12% in aumtan ahi. Chuleh tuni chana India gamsunga Covid natna akon damdoh jat agomin mi 1,50,86,878 ana lhingtan ahi, tin tujingkah nidan 8:00 a Union Health Ministry data chun avetsah in ahi.

Case thah apunjing toh lhonin active case jong 30,84,814 alhingtan ahi. Hichu total case akona 16.55% tobang ahi.

Indian Council of Medical Research (ICMR) akon thulhut kimu dungjuiyin, April nisim 28 nikho chanin Covid-19 test hi sample 28,44,71,979 akiboldoh tan ahi. Hiche lah’a kon sample 17,68,190 hohi Wednesday nikho a test ana kibol ahi.

Janni (Wednesday) a case tam mudoh pen state le UT 14 hon lah achun, asang penin Karnataka apangin, case thah 39,047 ana mudoh in ahi. abantah in Kerala ana pangin, case thah 35,103 ana mudoh in ahi. Chutobang chun West Bengal in case thah 17,207 ana mudoh in, Tamil Nadu in 16,665, Rajasthan in 16,613, Andhra Pradesh in 14,669, Bihar in 13,374, chuleh Haryana in case thah 12,444 ana mudoh in ahi. Hiche state ho a dinga hi, ningkum a Covid ahung kiseipat akon janni chu case atam mudohpen nikho u ahicheh in ahi.

Centre in tuni chanin Covid vaccine dose crore 15 val manbeiyin state le UT ho ana pedoh tan ahi. Gamsunga Covid-19 vaccination drive phase 3 na hunglhung vahding ahitan, chuteng chule mi pilhing jouse vaccine kikap thei ding ahitai.

India gamsunga Wednesday nilhah nidan 8:00 chan chun coronavirus vaccine dose hi agom gomin 149,877,121 akikap dohtan ahi. Hichengse lah’a chun dose masa bou kikap nalai healthcare worker 9,366,239 leh dose nina chan kikapdoh healthcare worker 6,145,854 jong apangin ahi. Co-WIN platform a min pehlutna dinga kot ahung kihon apat pungkal khat sungin mi million 10 val in amin ana kipehlut tan ahi.

Frontline worker hojong dose masa bou kikapdoh nalai mi 12,309,507 aumin, dose nina chan kikapdoh mi 6,599,492 alhingtan ahi.

Kum 45-59 hopsung miho lah in, dose masa bou kikapdoh nalai mi 50,975,753 aumin, dose nina chan kikapdoh mi 3,142,239 alhingtan ahi.

Kum 60 chunglam miho lah in, dose masa bou kikapdoh nalai mi 51,470,903 aumin, dose nina chan kikapdoh mi 9,867,134 alhingtan ahi.

Janni seh seh achun vaccine dose 2,049,754 ana kikapdoh in ahi. Hichengse lah achun mi 1,192,394 hi dose masa kikap ahiuvin, mi 857,360 hohi dose nina kikap ahiuve.

States leh Union territory phabep akon Covid-19 vaccine lhahsamna thulhut aumjing vangin, Union ministry of health and family welfare in tuni chun state leh UT ho komin kapdoh loulai dose crore khat (1,06,08,207) tobang aum nalaiyin, hiche chung chona chu, ahung lhungding nikho phebep sunga hi dose lakh 20 tobang amube kitdiu ahi, tin ana seiyin ahi.

Centre in tuni chanin Covid vaccine dose crore 16.16 val manbeiyin state le UT ho ana pedoh tan ahi. Chuleh hichengse lah’a konin dose 151,077,933 hi akimangdoh ahitai, tin Union Health Ministry in aseibe in ahi.

Hiche thu hi Chhattisgarh, Jharkhand, Punjab leh Rajasthan panna a state phabep in vaccine lhahsam jeh’a May nisim 1 nikho a kipan ding Covid-19 vaccination drive phase 3 na chelhahpi joulou dinga asei lai uva Union Health Ministry in asei ahi.

Xxxxxxxxxx

Assam Rifles hon Moreh a Covid Awareness Drive anabol

Moreh, Apr. 29: Moreh Battalion Assam Rifles hon HQ IGAR (South) vaisaina noiyin tuni (Apr. 29) chun Moreh a um T Bongmol khomite dingin COVID-19 Awareness Drive leh Relief Camp ana bolpeh uvin ahi.

Kingon achun khovel lah’a um kho dang dang ho akon haosa ho, youth club member ho, chuleh  khomi honjong pan anala uvin ahi. COVID-19 Awareness Drive hi gamgi vel lah’a cheng mihon COVID-19 natna chunga hetna aneibe uva, panlahna thei chana pan alah theina diuva kigong ahi. Assam Rifles medical staff hon COVID-19 natna akon kiven ding dan toh kisaiyin houlomna ananei uvin ahi.

Chubanin khomite dingin relief camp khat jong abolpeh uvin ahi. T Bongmol Village Inpipa in Asaam Rifles hon Relief Camp leh Covid awareness Drive ahin gonna chunga pachatna leh kipa thu ana seiyin ahi.

Xxxxxxxxxx

Rajasthan Chief Minister Ashok Gehlot Covid-19 Positive hi

New Delhi, Apr. 29: Rajasthan Chief Minister Ashok Gehlot in tuni chun novel coronavirus test akibol akon positive anahi dan Twitter mangchan ana seiyin ahi. Tutua hi Gehlot hi a-inn muna self-isolation kibol ahi.

Kum 69 a tah Congress leader pa hin janni a ajinu Sunita Gehlot positive anahi akon amale ama a-inn sunga kikhumtup ahitai. “Tunin Covid-19 test kkakibolna result ahungdoh in, positive kanahi, tin Gehlot in aseiyin, Covid natna-nei-kihetna-melchihna (symtom) imacha katahsa chunga asohdoh aumpon, Covid protocol nit puma innsunga kakikhumtup jomding ahi, ati.

Prime Minister Narendra Modi, State Governor Kalraj Mishra, AICC general secretary in-charge of Rajasthan Ajay Maken, PCC president Govind Singh Dotasra, Rajasthan BJP president Satish Poonia, Leader of Opposition Gulabchand Kataria chuleh adang dang hon Gehlot damloi ding adeisahnau thu anasei uvin ahi.

Hetthei khat chu, Chief Minister Gehlot hin offline meeting ho’a official hotoh Rajasthan a COVID-19 dinmun ana seikhom jing ahi. Janni achun Rajasthan in case thah 16,613 ana mudoh in, Rajasthan gama tuni chana case kimudoh jat agomin 5,63,577 alhingtan ahi. Chuleh mi 120 in thina anatoh in, tuni chana Rajasthan gama Covid natna toh kisaiya thina tohjat agomin mi 3,926 alhingtan ahi.

Alangkhat’a, Rajasthan in active case 1,63,372 aneiyin, tuni chana Covid natna akon damdoh jat agomin mi 3,96,279 alhingtan ahi.

Xxxxxxxx

Covid-19 akon adamdou jouva AIIMS akon Manmohan Singh “Discharged” hita

New Delhi, Apr. 29: Covid-19 natna anei jeh’a Delhi a um All India Institute of Medical Sciences (AIIMS) hospital a April nisim 19 nikho a admit ana kibol India prime minister lui Manmohan Singh chu, Covid natna akon ana damdoh tah toh lhonin AIIMS hospital a konin discharge ana kiboltan ahi.

Senior Congress leader pa hi March nisim 4 nikho a chu Covaxin dose masa ana kikap a, dose nina chu April 3 nikho a ana kikap ahi. Atahsa dinmun ahoi vanga kivenna dinga hospital ana kilhut ahi.

Covid-19 positive ahi masangjep a chu, Singh in Prime Minister Narendra Modi henga lekha anathot a, COVID-19 douding dan 5 anasei ahi.

COVID-19 douna dinga aphapen chu vaccine kapna natoh mano jing ding, lou-le-ai supply punsah ding hi ahipene. Vaccine kikapdoh jatchet boipi louva, population percentage ijat vaccine kapdoh thei ham tijoh boipi ding ahi, tia PM henga alekhathot a chu anasei ahi.

Xxxxxxxxxxxx

Sanaton Athokpam thina toh kisaiya YFPHR hon National Medical Commission hon khohsahna ahin nei diuva ngehna nei

Imphal, Apr. 29: Youth’s Forum for Protection of Human Rights (YFPHR) hon achesa March 15 ni a RIMS Hostel a Medical simlai Sanaton thina toh kisaiya National Medical Commission (NMC) in khohsahna ahin nei diuvin ngehna aneiyun ahi.

National Medical Commission (NMC) henga lekhat kithot in aseina a chun Regional Institute of Medical Sciences (RIMS), Lamphel, Imphal West a simlai Sanaton chu March 15 nikho chun ginmo kai tah in kikhailihsa in mudoh in ana um in ahi. Aum talou Sanaton insung mite heng’ah a melhet khat uvin Sanaton chu RIMS Casualty Ward a kipui ahi dan ana hetsah in ahi.

Insung miten RIMS Casualty Ward vilna ahung nei nauva chun, March 15 nilhah lam nidan 1:30 vel a ama Hostel Room sunga kikhailihsa a kimudoh ahidan ana seipeh bep un ahi. Koiman a Room sunga akikhailih chu anamu pon, akiloipi khat in Hostel apat Honda Activa a RIMS Casualty Ward a puipa tilou adang koiman akikhailihna amupon ahi. Aloipan Hostel Warden ahilou leh RIMS a thunei ho jong ana hetsah pon ahi tinjong aseibei.

Lekhathot in aseibe na achun, Sanaton thina hi kinielna thei khopset ahijeng vangin Lamphel Police Station in jong insung mite akon a lunglhailou naleh akithat ahi tia photchetna  aum jeng vangin a Case jengjong jihlutna anei pouvin ahi. Akhut chang teni akikan kop in, a kengto ah maha jong aum in, chuleh atahsa nung lang leh amai lah ah maha jong mutheiyin aum in, thi lhon a kijep hidinga ginmo ahi tinjong lekhathot chun aseiyin ahi.

Chukit leh insung miten March 16 nikho a JNIMS Hospital a Post Mortem kibolna a jao dinga ngehna anei ujong Police hon ana phalpeh pouvin ahi tinjong lekhathot chun aseiyin ahi.

Kiloikhomna in NMC heng’ah RIMS Authority in ipi dinga Police ho henga thina toh kisaiya hehna apehlut lou ham tia RIMS Authority a Director ho akon a Report athum diuvin jong ngehna aneiyun, chuleh Commission henga  Manipur Police Department hon Post Mortem Report ahin pehlut nadiuva hetsahna leh kholchilna phatah a chelhah nadinga jong hetsahna anei diuvin jong ngehna aneiyun ahi.

Manipur Medical Council henga jong Commission vetsuina noiya Sanaton thina toh kisaiya phatah a kholchilna ahin neidiuva hetsahna anei diuvin jong ngehna aneiyun, Lamphel Police Station chunga Sanaton thina toh kisaiya Case ajihlut lou jeh uva Action lah dinga lom lah dinga State Government henga  hetsahna anei diuvin jong NMC heng’ah temna aneiyun ahi.

NMC injong Commission hengah athipa leh a insung mite dinga thudih a thutanna ahung umtheina dinga kholchilna avetsui jing dingin jong temna aneiyin ahi.

Xxxxxxxxx

COVID-9 natna jeh’a UP IAS Association Chairman Deepak Trivedi mollem

Lucknow, Apr. 29: Senior IAS officer leh Uttar Pradesh IAS Association chairman, Deepak Trivedi chu Covid-19 positive ahi jeh’a hospital a nikho phabep ana kijen nungin tuni chun Covid-19 natna jeh in ana mollem tan ahi.

Chief Minister Yogi Adityanath in IAS officer pa thina chunga lunghempina thu ana seiyin ahi.

Trivedi hi Board of Revenue chairman panmun ana tuh ahi, chuleh Uttar Pradesh IAS Association president panmun tuh dinga ningkum March lha a chu lhendoh a anaum ahi. 1985 batch IAS officer, Deepak Trivedi hi officer miphatah, ahina ngailut umtah ahijeh’a mihet khat anahi ahi.

Xxxxxxx

Gam 40 tobang in Covid 19 toh kisaiya India kithopi diu: Harsh Shringla

New Delhi, Apr 29: India in Covid 19 natna jeh a boina hatah a atojing toh kilhon a gam 40 tobang akona kithopi na amu dingin aumin ahi, hiche holah ah oxygen leh aki saipi equipment leh consignment of critical medicine chuleh adang dang jong amu ding ahi tin foreign Secretary Harsh Shringla in Thursday nichun aseiyin ahi.

Shringla in hiche hi thuso miho koma Russian military transport aircraft 2 oxygen production plant 20, ventilator chuleh medicine pack 200,000 ahin pohlut jouva kona asei ahi. Hiche kahlah ah US akona special flight 3 injong Covid 19 vaccine semna dinga raw material, oxygen generating equipment leh oxygen concentrators ho apoh dinga ginchat ahi.

Hiche thua hin external affairs ministry in health ministry leh agency chom chom hotoh kithoa na atoh khom u ahi. India in tuahi angaichat penchu ahileh, liquid oxygen, oxygen producing units leh damdoi poimo Remdesivir leh Tocilizumab ahi in chuleh hiche hohi foreign governments leh corporation hotoh kitho khom a delivery umna dinga tohgon anei ahi.

Tuhin India in active case million 3 val aumin, hiche hin health care system leh resources ho chunga hatah a pressure apeh ahi tin Shringla in aseiyin ahi.

Hichea hin gam 40 valho, US, Russia, France leh Germany jauna Covid 19 natna toh kisaiya India kithopi na apeh diu ahi. Gam phabep hoa community association hon relief thil apeh na diuva ngehna jong aneiyin ahi.

Shringla in aseiyin India in tuhin oxygen generating plants 500, oxygen concentrators 4000 val leh oxygen cylinder 10,000 val leh cryogenic oxygen tankers 17 amu ding ahi ati. Biopharmaceutical major Gilead Sciences in doses 450,000 antiviral damdoi Remdesivir apeh ding chuleh Favipiravir dose 300,000 jong Russia leh United Arab Emirates leh Tocilizumab damdoi jong Germany leh Switzerland akona amu dinga ginchat ahi. Hiche lolhinna dinga Gilead leh Roche pharmaceutical injong drugs semna lampang a raw material supply kibolna akithopi ding ahi. Indian firms hon tuahi nikhat sunga Remdesivir damdoi dose 67,000 asemdoh jou ahi, hinla India in tua angaichat jatchu dose 200,000 leh 300,000 kikah ahi. Hiche firm hohin raw material hung lhun phat leh dose 400,000 asemdoh jou dia ginchat ahi tin Shringla in aseiyin ahi.

Tu dinmun a thilsoh ho hi masanga kimu khalou ahi in kimukit talou maithei ahi, hiche jeh a chu thil ngaichat ho seichet ngai ahi, chuleh hichea hin gam tampi honjong kithopi na apeh nom uve tin aseiyin ahi.

Gam tampi honjong India hi hatah a kithopi dinga tohgon anei u ahi, ajeh  chu New Delhi in vaccine hihen damdoi poimo chom chom hijongleh pan hatah a anala khat ahijeh ahi tin Shringla in aseiyin ahi.

Xxxxxxxxxxx

MP a thingphung 2 phuh lhu Tribal khat chunga Dk. crore 1.20 kileusah

Faisen, Apr 29: Madhya Pradesh Forest Department Officer in tribal mi khat in thingphung 2 aphuh lhuhna chungah Rs 1.20 crores aleusah in ahi. Hiche hi Raisen district a thilsoh ahi in chuleh hiche hi thingphung akona phatchom nathei thilho man dungjuiya kibol ahi tin forest officials hon asei uvin ahi.

Hiche fine chu Chhote Lal Bhilala kum 30 , Silwani village, Raisen district a cheng chu Sagaon ahilouleh Sagwan teak kiti thingphung 2 Singori Sanctuary a January 5 achu thing aphuh lhuhna a kimu ahi in chuleh April 26 nikhoa chu mat a ana um ahi.

Bambhori forest ranger Mahendra Singh in aseina ah, Indian Council of Forestry Research and Education in asei dungjui a thingphung khat in kum 50 sunga phatchom nathei asuma Rs 52 lakh apehdoh thei ahi ati. Hichea hin Oxygen supply kibolna ah Rs 11.97 lakh, air pollution control na dinga Rs 23.68 lakh, soil erosion leh soil filtration ah Rs 19 lakh chuleh water filtration ah Rs 2 lakh ahi. Hiche jeh a chu thingphung khat in ahinkho sunga Rs lakh 60 mipi dinga apehdoh thei ahi.

February lha chun Experts committee hon Supreme Court koma aseina ah thingphung khat value chu akum tam dungjuiya Rs 74500 a kal ahi in chuleh hichea hin fine jong hiche dungjuiya kipe ahi tin Singh in aseiyin ahi.

Chhote Lal hi thil dihlou a natong mi khat ahi in chuleh hichea hin amahin thing hohi aphuh ji a furniture shop ho koma ajoh ji ahi tin local mihon asei uvin ahi. Hinla hichea hin Chhote Lal paneo Phool Bhilala in aseina ah forest village a cheng akihina ah thingphung luiho kiphuh ji a insahna kimang ji ahi, hinla hichea hin ranger hon ei suboi jing uvin ahi ati.

Advocate leh Indian Forest Act noiya expert BL Gupta in aseina ah Indian Forest Act dungjuiya fine chu Rs 500 leh lha 6 tobang jail lutding a um ahi ati. Hinla ranger hon study kibol dungjuiya case apeh lut ahi, hiche hi case lunglut umtah hiding ahi ati. Madhya Pradesh Forest Department a principal chief conservator Rajesh Srivastava in aseina ah state a dinga hitobang thusoh masapen ahitoh kilhon a divisional forest officer Raisen in Report abol dinga hetsahna kipe ahi tin aseiyin ahi.

Xxxxxxxxx

TB natna kona kivendoh theina dinga IDU, PLHIV  ho sensitised kibolta, 3HP umna dinga demand jong um

Imphal, Apr. 29: TB natna toh kisaiya hetna kibelap theina dinga TB preventive therapy adeh a drugs kikap holeh HIV natna neihoa dinga nikhat sunga workshop TB Preventive Therapy (TPT) leh 3HP community demand Generation and Treatment literacy program jong PLHIV, drugs mangho leh PLHIV Manipur thakhel hojong Community Network for Empowerment (CoNE) conference hall Keishamthong Hodam Leirak Machin, Sega Road ah Wednesday nichun man ahi.

Hiche kin chu CoNE in ARK/ Kripa Foundation Catalytic Small Grant Application- IMPAACTT4TB  in agon ahi in chuleh TAG in support abol ahi, hichea hin Community organization chom chom hoa konin mi 18 hon district chom chom thakhel in ajau uvin ahi.

CoNE President RK Nalinikanta resources person a pan toh kilhon in Global Burden of TB infection, fundamental of TB Preventive Therapy (TPT), 3HP leh 1HP short course TPT options leh TPT for special populations thua houlimna anei in ahi.

Hiche kin sunga athusei na ah RK Nalinikanta in aseina ah National TB program noiya Isoniazid Preventive Therapy (ITP) hi TPT regimen noiya koi ahi in chuleh hichea hin patients hochu Isoniazid tablet niseh a aneh diuva lha 6, 9 chuleh 12 chan geiya dinga peh ahiuve. Hichea hin HIV natna neihon ARV damdoi toh niseh a anehkhom diu ahi. Hiche therapy hi phat sottah lut ding ahi in chuleh hichea hin side effects aumin hiche hin thin atongkha in ahi. IPT regimen hi aphat chomna tah aum vangin user friendly ahipon hiche jeh a chu Latent TB Infection (LTBI) jenna dinga kimang lou ahi.

Hinla tua WHO in approved abol TPT regimen noiya 3HP hohi man hiding ahi. 3HP hin thin jong asukha pon ahi, hiche jeh a chu drugs mangho leh HIV ahin chuleh PLHIV danghoa dinga jong peh thei hiding ahi ati.

Nalinikanta in hichea aboipen chu aman (price) hi ahi ati .

Hiche workshop chu resolution chom chom National AIDS Control Organization (NACO) leh stakeholders danghon 3HP hi national program noiya dinga recommend abolsa ahi.