30th April, 2021 News

30th April, 2021 News

85
0
SHARE

SoO noiya um KRA Army Chief leh a Body Guard kikaplih

Kpi, Apr. 30(UNA): Government toh Suspension of Operations (SoO) nei thingnoimi kiloikhomna Kuki Revolutionary Army (KRA) a Army Chief leh ama vengbit a pang khat janhi jan nidan 10:30 vel chun Lhungtin a achenna ah merlhetlou hon ana kaplih un ahi.

Kuki Revolutionary Army hi State, Government leh Centre Government toh Kuki National Organisation (KNO) noiya Tripartite Talk neilah a pang khat ahiuvin ahi.

Kuki Revolutionary Army a Army Chief thina toh ahileh Janggin alias Jetlee Baite (40), s/o (L) Tongpao Baite, Lhungtin Kho akon ahi in, chuleh ama vengbit (Body Guard) a pang thina toh ahileh Lamginlen Hangshing (20), S/o Hellal Hangshing, Tingpibung kho akon ahi.

Saikul Police hon thilong ana phong uvin, Postmortem bol ding in RIMS Morgue ana kilhut in hijongleh akilemchang loujeh in nilhah lam in JNIMS Morgue lhut anahin, jing (Saturday) teng Postmortem kibol ding ahi.

Thilsoh hi melhetlou manchah kichoi mi phabep in Lhungtin khosung a jan nidan 10:30 vel a KRA Army Chief chenna inmun ana bulu uva amun a Army Chief Janggin leh a Bodyguard pan thina ana tuo ahi.

Army Chief pa ob ah meichang maha mutheiyin aum in, chuleh aluchang akikap teldeh in, a Bodyguard pa jong a kong lah ah meichang maha mutheiyin aum in ahi tinjong Police thulhut chun aseiyin ahi.

Lhungtin hi Kangpokpi District sunga Lhungtin Sub Divisional Headquarters khat ahi in,  Saikul Town akon a Km 14 tobanga gamlha ahi in, chuleh Kangpokpi District Headquarters akon a Km. 25 vel bouva kigamlhat ahi.

KRA ho kikholkhomna Camp hi Lhungtin khomun a kon a kinaicha a um ahi. Khomite sei dan in jan nidan 10:30 vel chun lhangsung ah meithal kikap gin nasah in akija in, jan khangkim gei aging in ahi tin aseiyun ahi. Jan noiya meithal kikap chu ipi jeh hiding ham ti kpiman aki hetheipon, muntin a meithal kikap gin akijah jeh in ajeh pen akihedoh theipoi atiuvin ahi.

Saikul Police leh 38 Assam Rifles Saikul Post  hon Saikul sunga um CSO hotoh aboina mun ana jon uvin, khosung aga lhun lhun uchun KRA lamkaipa leh a Bodyguard pa thiluong bou aga mu uvin ahi.

Thilsoh chunga koima chan kiphonna aneilou jeh uvin achen chai hetbe ahinaipon, chuleh KRA ho jeng injong thilsoh chung leh a lamkaipau leh Bodyguard pa kikaplihna chungah sei le sah imacha anei nai pouvin ahi.

Hitoh kisaiyin Saikul Police Station a Case jihlut in aum in ahi.

Xxxxxxxxxx

KSO, Zillai leh VPC in Lhungtin thilsoh demna nei

Saikul, Apr. 30(ET): Vaiphei Students’ Association, Kangpokpi District in janni (Thursday, April 29) a Kangpokpi District hopsunga um Lhungtin vangkho a cheng, a-jat chankhompiu Jangkhogin Baite (40) s/o (L) Tongpao Baite kithana chunga demna sangtah in anei uvin ahi.

Hitobang chonvalna leh toltha hoise tah hi Zillai, Kangpokpi District in demna sangtah akineiye, tin simlai kiloikhom hon thuso abolna achun akiseiyin ahi. Chuleh dan tahna dinga mopohna nei (law enforcing agency) hon themmona neiho agangthei penna aholdoh’a, dan dungjuiyia achung uva thu atan dingin jong simlai kiloikhom hon ngehna anei uvin, achungthu seichet ahi tokah’a thilong lahdoh lou dingin kilolna anei uvin ahi.

Hitobang thilsoh hohin society sunga chamna asuhset ahi, tin boina ahilouleh kitomona neihon hitobang chonvalna hohi ahoidoh uva kihoutoh del’a boina asuhlhap diuvin temna anei uvin ahi. Chubanin Jangkhogin Baite in adalhah insung mite henga lunghempina thuthot jong ananei uvin ahi.

Vaiphei Peoples’ Council (VPC), Kangpokpi Block injong Janggin Baite, C-in-C, Kuki Revolutionary Army (KRA) kithana thilsoh chunga demna sangtah anei uvin, adalhah insungmite henga lunghempina thu anathot uvin ahi.

Alangkhat’a, Kuki Students’ Organisation (KSO), General Headquarters injong Lhungtin kho a nam sepai  kithana thilsoh chunga demna santah in aneiyin ahi.

Kuki thingnoi kiloikhom ho lah’a sohjing hitobang kitha kimatna leh chonvalna ho akon Kuki thingnoi ho jouse akikangse chehna dingin KSO GHQ in ngehna aneiyin ahi.

Masanga pat ana kisejing bangin, thingnoi chom chom ho kikah a kiboina sodoh sahthei hitobang kitha kimat hohi KSO in aki doudal jingin, chuleh kidoudal’a kidem jingding ahi, tin KSO GHQ thuso bol chun aseiyin, chuleh hitobang natoh kibol hi Kuki custom toh kitohlou, human rights palkeh leh ngolhoitah ahi, tin demna sangtah aneiyin ahi. Chuleh mopohna nei hon hitobang thil avel’a asokit louna ding leh vendohna dinga tohgon asem dingin ngehna aneiyin, amollemsa tenin adalhah insung mite henga lunghempina thu anathot uvin ahi.

Kuki Students’ Organisation (KSO), Churachandpur injong Janggin Baite leh a bodyguard pa kitha demna anei uvin, hitobang chonvalna hi Bible thuhil, chuleh ei-Kukite nampi khankho toh kitohlou ahi, tin aseiyin ahi.

Igam le hi-nam huhbit ding Kuki nampi natong ho kikah a hitobang thil aso jing hi, vangset umtah leh thoh hahsa tah ahi, tin thuso chun aseibe in, chamna leh khantouna aumtheina dinga hitobang toltha hohi namppi natong hon angah cheh diuvin ngehna anei uvin ahi.

Xxxxxxxxx

Koubru mol kal ho lah a COVID-19 natna nei kimudoh, Thadou Inpi in mol kal kha ding’a ngehna nei

Kpi, Apr.30(UNA): Thadou Inpi Kangpokpi District in State Government leh District Administration heng’ah Koubru mol kal ho a kon a COVID-19 natna nei mudoh ahitoh kilhon in Koubru mol kal kha ding in ngehna aneiyun ahi.

Koubru mol kal lah a ana pang Khonghampat Awang Leikai akon pasal kum 23 khat April 27 nikho chun CMC Korengei a COVID-19 natna nei ahi mudoh in ana um in ahi.

Thulhut kimu dungjui chun April 29 nikho a CMC Korengei a COVID-19 natna nei a mudoh ahidan thulhut akimun ahi.

Ama hi Koubru mol a April 27 nikho a ana kal ahi in, thulhut kimu dan in Koubru molvum akal masanga pat a COVID-19 natna nei hidinga ginmo ahi.

Gah hetthei chu, achesa April 21 akon chun phaicham a kon kiloikhomna chom chom ho makaina in COVID-19 SOP leh Guidelines ho nahsah louvin mihem aja a sim Koubru mol kal ding in ana che jing un ahi.

State sunga COVID-19 natna nei leh thina toh  ahung punbe jingtoh kilhon in, Kangpokpi District Police in akinthei pen in COVID-19 toh kisaiya dan leh thupeh ho vetsuina ahin chepi ilutoh kilhon in Koubru molkal ding jong ahung lhom jep in ahi.

Koubru mol kimvel a cheng honjong mol kal dinga mipi hung kitol jing ho jeh in atijat nauleh lungthim kichol theilouva ana umdan ujong ana phongdoh tauvin, chukit leh Sadar Hills Chiefs’ Association honjong gamsungmi phat nading gelkhohna a chomkhat tadi mol kal tiho bollou dingin jong tdmna ana neiyun ahi.

Thadou Inpi Kangpokpi in aseina a chun, Koubru mol kal ho lah a kon a COVID-19 natna kimu hi mipi jousen gelkhoh angaiyin, COVID-19 toh kisaiya hitobang thilsoh hung umlou na ding in ngehna chom chom ana um in, hinla koiman ngaisah in ana neipoi tin aseiyin ahi.

State sunga kichat tijatna dinmun a aum jing laitah in Koubru Mol ah COVID-19 natna kedohsah nading khompi lentah kiguong abang in ahi.

Aseibena a chun, Koubru mol kal ding ho khamgahna ana kinei pon, hinla Social Media chom chom ah Koubru mol chunga kichep golseh toh kisai leh golnopna tamtah mutheiyin ana kitahdoh in, jou le nal thu leh kithethang a kon in khat le khat kichombol na hohi cham le lungmonna dinga natong CSO ho dinga jong lung himo na khat ahi ati.

Vangset umtah khat chu ahileh, vannoi mipi in Corona natna hilen doudalna dinga ahina thei cheh a pan alah laitah a mi phabep in sakho thu a kilep in State Government ho thupeh nitlouvin Koubru lhangvum ah aki titkhom uvin, chuleh District Administration akon a imacha natoh anei lou hin Koubru mol a kititkhom hotoh kikhutjop na anei uve tihi aphochen in ahi.

Thadou jat mite hi chamna deimi ahiuvin, chamna um nading, lungmon na ding leh kilungkhat nading deisah mite ahi toh kilhon in Koubru a pathen hou dinga che ding ana kikhaam lou na hohi pansahna leh noise na a lah louding, mihem in aphabep akinei sohkeiyin ahi ati.

Tu le tua dinmun hi thi le hin kikah a ding ihiuvin, thil dang dang sanga khotuo thiemna nei angaiyin ahi. Tu hi khat le khat thaang kikamtuo phat ahi tapon, mihem te idamthei nadiuva pan lahphat ahi tinjong aseibei.

Thadou Inpi Kangpokpi District in jong Kangpokpi District Administration leh District Police injong phatah a a ipi lampang hijong leh kitoh tah a SOP holeh Guidelines ho juicheh ahina dia pan ahin lah diuvin jong temna aneiyun ahi.

Tulai boilaitah a Koubru mol kal ho akon thilphalou ahung sodoh leh State Government leh District Administration hon mo jouse akipoh diuvin jong gihna aneiyin ahi.

Alangkhat a, Kangpokpi Police hon COVID-19 SOP holeh Guidelines ho Koubru mol kal ding ho henga vetsuina aneina ban uvah, Banner lentah in COVID-19 SOP ho phatah a juicheh ding leh maitom kitom jing ding, Koubru mol a nen paithang louva thengtah a umsah ding gotcheh dingin jong ana tahlang uvin ahi.

Koubru mol kal aumjing toh kilhon in  Kangpokpi Police Teams hon Addl.SP(Ops), Addl.SP(LO), DSP, leh Official dang dang ho makaina in Damdei, Kholep, Mangjol, adang dang ah vetsuina phatah in ana neiyun, chuleh mol kal ding holeh ahung kumsuh ho phatah in khumlutna aneiyun ahi.

Koubru mol a niseh a akal leh akum suh a umjing toh kilhon a mol vum a mi jakhat tobang pansa den hijing dingin jong akiseiyin ahi.

Xxxxxxxxxxxx

Manipur a Covid-19 jeh’a mi 5 in thina toh kit, natna nei mi 271 kimudohbe

Imphal, Apr. 30(ET): COVID-19 natna Second Wave in State sung ahin suhkhah jing toh kilhon in, tunin jong Covid-19 natna jeh in mi-5 in thina ana toh kit uvin, thina toh agomin 405 alhing tan ahi. Chuleh tuni athahbeh a natna nei mi 271 akimudoh kit toh kilhon in State sunga natna nei kimudoh agomin 31,586 alhingtai, tin State Health Department in aseiyin ahi.

Jani (Thursday) chun Manipur sung’a Covid-19 jeh a thina toh mi 5 ana um in, chuleh natna nei mi 314 ana kimudoh ahi.

State sunga COVID-19 jeh a thina toh kihedoh nukhahpen ahi leh Imphal West mi & leh Kakching District akon mi 1 ahi tinjong COVID-19 Common Control Room akon thusodoh chun atahlangin ahi.

Athahbeh a COVID-19 natna nei kimudoh lah a 259 chu milham ahiuvin, 12 chu Central Armed Police Force (CAPF) Personnel ahiuvin ahi.

Imphal West leh Imphal East a natna kimudoh atampen ahijing nahlai toh kilhon in  105 leh 104 akimudoh in ahi. Bishnupur akon in 12 akimudoh in, Churachandpur akon mi 10, Thoubal akon 8, Ukhrul a kon 7, Chandel a 5,  Kakching leh Noney a kon mi 2 cheh leh   Jiribam akon mi 1 ahi. Adangse hi CAPF ho ahiuve tinjong thusodoh chun aseiyin ahi.

Tuni athahbeh a natna kimudohbe toh kilhon in Manipur sunga COVID-19 Active Cases jong 1,417 in apunbe in, chuleh natna a konna damdoh jat agomin  29,764 alhingtan ahi. Hinla, Thursday nikho a Recovery Rate 94.81 Percent chu tunin 94.23 Percent in akhesuh tan ahi.

Alangkhat a, Manipur State sung hinjon vanleng a April 25 nikho a Indigo flights 6E-6181 touna jon 16-21 leh 6E-21 touna jon 29-35 a toukha jousen Common Covid Control Room No. 18003453818 ahilou leh ama ama District Surveillance Officers (DSO) akinthei pen a akimupi diu ahi.

Thulhut nunung pen kimu dungjuiyin State sunga tuni chan a Vaccine kikapdoh jat agomin 1,73,056 alhing tan ahi.

Chuleh, kum 45 chunglam jousen akinthei pen a RIMS, JNIMS, District Hospital ho, CHC ho, PHC holeh lhendoh a um Private Hospital Vaccine Centre hoa Vaccine kikapcheh ding injong thumopna aneiyin ahi.

Xxxxxxxxxxx

Sum demand nahsah lou ho suhboi ding tohgon nei UNLF thingnoi mi-3 leh Hand Grenade 34 mandoh

Thoubal, Apr. 30(ET): Thoubal Police hon tunin UNLF thingnoimi a pang mi 3 ana mandoh uvin, amaho akon in Hand Grenade 34 chu Tekcham Mayai Leikai, Thoubal District a ana mandoh uvin ahi.

Hand Grenade hotoh Secretary Department of Finance S Pankhei soikaina Demand Letter, Pulsar vom 200 NS Registration No MN 01L8261 leh Mobile Handset 5 jong ana mudoh uve tin Superintendent of Police, Thoubal District Manipur, MPS S Ibomcha Singh soikaina a thuso chun aseiyin ahi.

Ana kimandoh mi 3 ho ahileh,  Moirangthem Megha Singh (48), S/o (L) M Ganesh Singh, Heirok Part III; Maibam Rajkumar Singh (22), S/o M Sanahanbi Singh, Tentha Khunjao; leh Soibam Lemba Singh, 34, S/o S Shohosing Singh of Tekcham Mayai Leikai, ahi tinjong atahlang in ahi.

Amaho hin sum le pai kingeh ho nahsahlou Government Office ho, Cheh lei kisemna mun holeh Government noiya natong Official ho chenna mun a hiche Hand Grenade ho supoh dinga natong jing ahiuvin ahi.

Police hon tunia thulhut anamu utoh kilhon in thingnoimi phabep in sum le pai ngehna aneiho’u nahsah lou Government Office holeh cheh (Brick) kisemna mun hoa Hand Grenade suhpoh dinga kigotna aneiyu ahidan leh Thoubal District sunga Government Officer phabeb henga sum le pai thumna jong nei dingin tohgon jong ana neiyun ahi.

CDO Thoubal Team hon OC CDO Thoubal N Tikendra Meetei makaina leh Additional SP (Ops) MPS Sachidananda Soibam thupeh dungjui in Superintendent of Police, Thoubal District MPS S Ibomcha Sharma vaisaina in ginmona mun phabep ah kholchilna ana neiyun ahi.

Nilham lam nidan 12:30 vel chun Moirangthem Megha Singh chu Champrathong, Heirok Part III ah ana kimandoh in ahi.

Ama a kon thudoh kineitoh kilhon in, UNLF a pang ahidan leh Heishingba kiti Lieutenant khat noiya natong ahidan hetdoh ahi. Chuleh kiloikhomna in amanchah ding apohjah thei thil ho sem na a pang ahidan jong hetdoh ahi.

Chuleh nilhahlam nidan 1:30 vel chun, Team dang khat in OC CDO Thoubal N Tikendra Meetei lamkaina in ginmo kai tah a Motorcycle a hunglhai khangthah 2 chu DC Office Thoubal ah ana mandoh kit uvin ahi.

Ama a kon a thudoh kineina a kon chun, Heishingba noiya natong ma ma ahidan hetdoh in ana um in ahi tinjong aseibei.  Chuleh Government Office ho a sum le pai ngehna lekha pedinga hunglhon ahidan jong aseidoh lhonin ahi. Maibam Rajkumar Bag sung kholchilna kineina a chun Secretary, Department of Finance S Pankhei min a soikaina lekha mudoh ahi.

Rajkumar injong Soibam Lemba Singh akon a Heishingba dinga na atoh ahidan jong aseiyin ahi. Ama akon a phondoh na kimu dungjui in motlei kibolna mun khat a kon in Hand Grenade 34 mudoh ahi.

Thuso in aseibe na a chun S Lemba Singh in jong Heishingba noiya natong ahidan aseiyin ahi. Heishingba thupehna noiya ama leh Rajkumar in Government Office ho, Brick Field leh adang danga sum le pai thumna lekha ana peh jing lhon ahidan jong aseiyin ahi.

Xxxxxxxxxxxx

Gangpimual kho a inn khat mei in ana kalha; thil keu Dk. Lakh 75 man ding vel kavam

B.Lalboi Gangte

CCpur. April 30 (ET): Churachandpur District hopsung Gangpimual Kho ah tuni jinglam nidan 8:00 vel chenna inn phabep mei in anakalha in chuleh insung akon in thil le-lo imacha lahdoh man in anaum pon ahi. Hiche inn hi Tek Bahadur a ahin achate toh um khom ahi naban’a inn bahara jong akoi ahi. Chuleh inn mei kah kipat dan hi meivah gui akon hung kipan hi ding in vengsung mipin agingchan chuleh inn mei kah chu ahatval jeh chun khosung mipi leh akimvel a cheng hon alonaje anahe pouvin ahi. Hetthei khat chu inn kah nahi STC/BSF Main Gate bul ahi jeh in STC/BSF akon Personnel hon jong twi tanker 2 toh anadel lut pai uvin ahi. Hiche naban’a Fire brigade 2 in jong gangtah in anamun anadel lut pai in anaphelmit in ahi.

Hetthei khat chu inn hi Tek Bahadur H/o Mannu ah ahin inn hi insong ahi jeh in anoi’a achate leh midang in alo ahi. Achapa lenpen Ashok hi  anu-le-pa toh khosa ahin, achapa nina Paukhanthang hi aji leh chate, Thongsuan hi ajitoh chapa khat toh chuleh Narender hi inn bahara’a um ahi. Inn kah hin thil keu Dk. Lakh 75 man ding vel akalha in ahin inn neipa Tek Bahadur hin pension book leh lekha poimo chom chom lahdoh ding agot nalam in mei kong hu in anahulkha in ahi. Vangset natoh insung miho Gangpimual Village Authority lamkai na in tunin khosung mipin aneh ding anabol peh uvin chuleh inn kahna nung ho jong anasuhtheng peh uvin ahi.

xxxxxxxx

Bail a kilhadoh N. Thangchinhau in police lock-up sung’a hahsatna atoho thuso miho heng’a tahlang

B.Lalboi Gangte

CCpur. April 30 (ET): Churachandpur District Police in thudoh nei ding’a anamat bail ah kilhadoh N. Thangchinhau in tunin (April 30) achenna inn ah  Press/Media heng’a  Police Custody aum phatsung’a athil to dan ho atahlang in chuleh maban’a CCpur District Police in ama chung’a kibol bang’a mi dang chung’a akibol nalou ding in adeisah nathu aphongdoh in ahi. Aman aseina’a District Police in thudot na ding’a eimat nung achesa April nisim 24 nilhah nidan 9:00pm vel in Police custody kaum na Lock-up akon in pasal 2 in eihung puidoh lhon in tower mangcha in kamai tom pum in eina kilhondoh pilhon in ahi. Chu in ichan hamkhat kache nung uvin tou ding in eisol uvin katou jou in kamai le le leh car sung’a tou kahi kaki hetdoh in ahi. Phat chom khat jou in gari anga lhon in tol ah ei tousah in voh toh thudoh eikhop lhon in ahi ati.

Hiche toh lhon’a twi jong kanah (nose) sunglut peh’a bolgim ding chan in akihou uvin chuleh bolgimna einei sung uvin Police tenin heng’a athilpoh’u akoisah uvin thudih asei leh vangam kal ding jou asei leh gotmun lut ding ahi tichan in gihna eina nei uvin ahi tin N. Thangchinhau chu atahlang in ahi. Chu jou in kakeng chu ipi hamkhat’a eidepeh uchu tahsa pumpi electric current  kijop sah abang jeng in ahi. Chuleh eina ha voh jeh uvin tuni chan’a katahsa chung adamdoh jou tapon ahi. Aman aseibena’a eivo hon gaal manchah nakoi ho nei pedoh uvin tin nasatah in eisuhgenthei nabang’a thu kijom lou tamtah jong dohna einei uvin chuleh amaho kihouna’a manchah holpeh’a ama akon kimudoh ahi ti’a jih lut peh ding ahi tin chan in jong kihouna anei uvin ahi ati.

Alangkhat’a hiche nilhah’a eipui doh teni muleng kahet ding ahi chuleh thillhun nikho hi Joint Interrogation Cell, Imphal ah thudoh einiu nilhah ahi. Thilsoh toh kisai’a Churachandpur Police Station a officer in-charge heng’a jih tho in hehna kabol vang in koima chung’a action khao tah’a alah ding ti hi hih jong leh  Law & Order vesui ho akon statement lah ding’a kou aum khat hitobang tah’a hahsat na ato hi achai na hita henlang chuleh midang chung’a hitobang thil ho lhun kit lou ding hi kadei pen ahi tin anaphongdoh in ahi.

Xxxxxxxxx

Mi-60 val kikhop jeh’a Dk. 20,000/- kileusah

Kpi, Apr. 30(ET): Government in Covid-19 dan asem chung’a dan palkeh khat tunin Dk. 20,000/- akileusah in ahi.

Akileusah pa chu Khadke Limbu, Kangpokpi district, Kalapahar akon ahin amahin Golvah abol a Covid daan palkeh a kikhopkhomna a mi 60 val in pan analah u ahi.

Xxxxxxxx

VDF khat kikhailih

 Jiribam, April 30(ET): Tuni jingkah lam nidan 3:00 vel in VDF Paonam Premananda Singh (36) chu ama le ama ana kikhailih in ahi. Premananda hi Hilghat, Jiribam  akon ahi. Post Mortem kibol jou in along chu insung miho pehdoh ahi tan ahi.

Xxxxxxxxx

Covid daan thu Banner kitah

Kpi, Apr. 30(ET): Koubru mol a lai hou a che hon Covid daan kisem apalkeh jing utoh lhon in Damdei, Kholep le Old Saitu a Covid daan jui ding dan thu banner akitah doh in ahi.

Police duty pohon jong Greater Imphal le Containment Zone akon hung ho Koubru mol kalsah louva anungsol ding uvin jong thupeh aum in ahi.

Xxxxxxxxxxxx

IFM hon nakong chatmo ho Vaccine kappeh dinga ngehna nei

Imphal,  Apr. 30(ET): Irabot Foundation Manipur (IFM) President, Th Ajit in Chief Minister heng’ah nakong chatmo ho jouse dinga atumbeh a Healthcare Centre anaipen pen a Vaccine akikap thei nadiu gonpeh ahina din tunia Hao ground Singjamei a kin kimanna a chun ngehna aneiyin ahi.

Irabot Foundation Manipur in Yoibu Yohen Lup Thongju hotoh kithokhom in Relief Centre a Media Advisor, Nimol Ningombam heng’ah Manipur sunga tibukimlou chuleh nakong chatmo ho ding in Hearing Aids leh Wheelchair chu Singjamei Chingamathak ah ana homdoh uvin ahi.

Kin kimanna a chun IFM President, Th Ajit in State sunga natna nei kimudoh jing toh kilhon in Covid Vaccine kikap ding jong alou theilou khat ahung hitan ahi. Government in kigahtah in tohgon ahin semdoh in, kum 18-44 chan leh kum 45 apat achunglamse tin hopni in ahin homkhen in ahi. Chele vale hahsatna nei leh ama phat ngah a boi thei ding tibukimlou chuleh nakong chatmo ho dinga Vaccine aki kapthei nadiu atumbeh a ahin ngaito peh ding in temna aneiyin ahi.

Akisaipi mopohna neihon akinthei pen a pan ahinlah diuvin jong Ajit in temna aneiyin ahi.

xxxxxxxxxx

 

DC CCpur in CCpur District a dukan hon ding dan thuso nei

B.Lalboi Gangte

CCpur. April 30 (ET): Pawan Yadav, IAS, District Magistrate/Deputy Commissioner, Churachandpur in CCpur District sung’a dukan hon ding dan toh kisai’a thuso aneina’a Covid-19 natna kilahsonna suhkem ahi na ding’a nilhah nidan 7:00 akipat jingkah nidan 5:00 sung nilhah Curfew kiphon nachung’a khopi sung dukan hon ding dan nikho peh in aum in ahi. Hiche dungjui’a khopi sung NH 102B (Tedim Road), Rengkai Bazar, Thangzam Road, Tipaimukh Road leh Red Cross Road ho’a dukan No. 1, 2 leh 3 melchit kibol ding chuleh Dukan No. 1 hon Monday leh Thursday nikho leh ahon ding, Dukan No. 2 hon Tuesday leh Friday chuleh Dukan No. 3 hon Wednesday leh Saturday nikho’a ahon ding’u ahi. Chuleh khopi sung’a dukan hon ding leh dukan neihon thil cho ding ho SOP hoitah’a ajuisah ding uvin mopoh na jong ape in ahi.

xxxxxxxxx

 

CCpur District a nikhat sung’a Covid +ve case thah 11 kimudoh

B.Lalboi Gangte

CCpur. April 30 (ET): Chief Medical Officer (CMO) CCpur Office Chamber ah tuni nilhah lam nidan 2:00 in CCpur District Task Force (DTF) in Covid-19 Second Wave doudal na ding’a Covid-19 Vaccination toh kisai in thuso miho anakimupi uvin ahi. Hiche phatsung in Dr. Vumchinpau tonsing, CMO-CCpur leh Dr. Paulunmang Vaihpei, DFWO/DIO-CCpur tenin Covid-19 Vaccination chelhah jing lai ahi naban’a maban’a kum 18 apat 44 kikah ho ding’a Covid-19 Vaccination neina ding toh kisai leh Covid-19 Vaccine kikap thei ding leh kikap theilou ding ho mipi hetding in atahlang in ahi. Chuleh Private Hospital akon Dr. Gary T. Haokip, Managing Director, Samaritan Nursing Home in ama Nursing home a kum 18 apat  kum 44 kikah ho kikapna ding akiboipi lai tah ahitoh lhon’a tu dinmun in Private Hospital ho’a Covid-19 Vaccine kikap na ding mum aum naipon ahi ati.

Hiche toh lhon’a Covid-19 natna toh kisai’a CCpur District din mun IDSP CCpur in tuni nilhah nidan 3:00 chan’a data asodohna’a District sung’a Covid-19 natna tuni chan’a agom’a 2,254 alhing tan hiche lah’a 2,116 adamdoh tan ahi. Tun Covid natna vei mi 90 aum nalai in chuleh mi 48 in thina atoh tan ahi. Tunin Covid-19 +ve case thah 11 ( pasal 4 leh numei 7) mudohbe in aum in ahi ati.

xxxxxxx

CCpur District Hospital a jui ding daan thah Medical Superintendent in phongdoh

B.Lalboi Gangte

CCpur. April 30 (ET): Dr. T. Vanlalkungi, Medical Superintendent District Hospital in Covid-19 natna toh kisai’a District Hospital jui ding daan thuso aneina’a District sung’a Covid-19 natna vei apunbe jing toh lhon’a mitakip in CCpur District Hospital a Emergency thil ti louva koima in Hospital amohphah lou phot ding, damlou keng’a chethei ho amaho seh in Hospital aphah ding ahilou kithopi ngaicha ahi leh mi khat in bou akithopi ding, damlou leh visitor hon Hospital sung’a Social distancing phatah’a ajui cheh ding, chapang kum 12 noilam leh kum 65 chunglam Immune deficient nei, Diabetes, Cancer, Asthma, TB, HIV AIDS leh adang dang hon  Emergency thil ahilou leh Hospital campus sung achotlut lou ding, Hospital a bol ding neihon alut leh apot teng uleh sabon/Sanitizer mangcha’a akhut’u asil theng jing ding, Facemask bol jing ding, Hospital ah ki admit damlou ho  mi khat bou in aum pi ding, damlou ve ho damlou lupna/touna’a lup/tou lou ding chuleh ahung lhung ding May nisim 3 (Monday) akon CCpur District Hospital a Routine Operation jouse vohhai hi ding ahi ati.

Hiche toh lhon’a CCpur District Hospital a jui ding daan kisem ho juilou aum leh Manipur State Disaster Management Authority thuso chungchon’a gotna kipe ding ahi tin Dr. T. Vanlalkungi, Medical Superintendent District Hospital in thuso achun atahlang in ahi.

Xxxxxxxx

Govt. in PMGKAY noiya NFSA/TPDS chanvou chang ding ho henga manbeiya anchang homdoh ding

Imphal, Apr. 30: Department of Consumer Affairs, Food and Public Distribution, Government of Manipur, in State sunga um District jouse a Deputy Commissioner ho heng’ah Pradhan Mantri Garib Kalyan Anna Yojna (PMGKAY) noiya NFSA/TPDS chanvou changding jouse henga lhaseh a anchang  mikhat a Kg. 5 cheh May-June, 2021 a hopdoh ahithei nadia anchang aga kipohdoh diuvin hetsahna aneiyin ahi.

Deputy Secretary (CAF & PD), Robert Asem in Thursday nikho a aseina a chun, District jouse a Deputy Commissioner jousen District adia kiguon peh anchang ho Food Corporation of India (FCI)/ CAFPD Depot akon a apohdoh uva akinthei pen a chanvou chang thei ding jouse henga ahoodoh loi diuvin jong temna aneiyin ahi.

Tule tuhin State sung’ah Antyodaya Anna Yojna (AAY) noiyah chanvou chang ding 176699 aum in, Priority Households (PHH) noiyah 18340 aum in ahi. Agomin Quintal 93007.95 (AAY a ding Quintals 8834.95 leh PHH a ding Quintal  84173) chu chanvou chang ding ho jouse henga lha 2 (i.e.,May-June) a dia manbeiya kihom ding ahi.

Deputy Secretary in Deputy Commissioner jouse jong aphat cha a anchang homdinga kigonpeh ho pohdoh ahi a, ama ama cheh CAF&PD/FCI Godown a kholkhom leh mabeiya Administrative Department of CADF PD Govt. of Manipur akon a SOP ho ohatah a jui pem a hopdoh dinga Fair Price Shop ho a thotdoh ahithei nadia akinthei pen a hetsahna/ngehna ahin bol diu ahi tinjong aseiyin ahi.

Chuleh Robert in aseibe na a chun District Supply Officer (DSO), CAF & PD, in phatah a mipi dinga hung kithotdoh anchang ho thildang a akimanchah lou nading leh heikoi ahilou tei nadia vetsuina anei diuvin jong aseiyin, chuleh District Administration honjong chanvou chang ding ho henga anchang manbeiya kihom nikho ding leh aphat phatah a ahin gondiuvin jong aseiyin ahi.

xxxxxxxxxxxxxxxx

COVID-19 vaccine kapna dinga Sagolband a Temporary health centre khat kihongdoh

Imphal, Apr. 30: Gamsunga  kum 45 chunglam mi jouse COVID-19 vaccine akikap teiding gelkhohna jallin, tuni chun Sagolband Bijoy Govind, Imphal ah, primary health centre temporary branch khat ana kigongdoh in ahi.

Manipur panna a India gamsunga Covid case apunjing toh lhona, Covid natna nei mi apunjing tuhtangna dinga government in kivenna ding natoh achelhahpi jing ahi, tin Sagolband assembly constituency MLA RK Imo in thuso abolna achun ana seiyin ahi. State sung mun tamtah containment zone in akiphongdoh in, vaccine kapna natoh achelha jinge, tin MLA Imo thuso bolchun aseiyin, ahin, hiche natna doudalna dinga hin SOP holeh guideline juina lampanga mipi panlahna angai mama in ahi, tin aseibe in ahi.

Vaccine kikap hi hiche thina thei natna chunga goljona neina dinga lampi phatah khat ahi. Vaccine ahung kikap pat achun mipi hon lungboina ananei uvin, hijongleh tun, adehh in second wave um sunga hin, thumopna leh puihoina kitup tah jallin mi tamtah in vaccine ahung kikap pan tan ahi, tin Imo in aseiyin ahi.

Sagolband assembly constituency thalheng hina in, mipi ho vaccine kikpana dinga kithoopina kapeh ding hi kei dinga thil poimo tah khat ahi, tin aseibe in ahi. Sagolband hi hitobang chanvou chantheina ding PHC/UHC ho umlouna mun ahin, vaccine kikapna dinga Kwakeithel leh Khumbong langpeh a che ngai ahi.

Imo in aseibe in, Sagolband a UHC khat tundohna dinga ngehna ana kinei chu Central Ministry in angaito laitah ahi in, phat chomkhat a dinga temporary PHC hi vaccine kapna dinga kitungdoh ahi, ati. COVID-19 vaccine dose masa kikap dinga tuni mi 1,000 tobangin amin ahinpehlut utoh lhonin, Sagolband Constituency Progressive Committee member ho panlahna chunga pachatna anapen ahi.

Ahung lhungding nikho phabep sunga hi Sagolband sunga kum 45 chunglam miho vaccine kapchai dingin jong Imo in ana seiyin, Sagolband vel lah’a cheng mihon jong vaccine kikapna a pan ahunglah thei ahi, ati.

XXXXXXXXX

Bihar Chief Secretary Arun Kumar Singh Covid natna akon damdoh jou talouva thi

Patna, Apr. 30: Bihar Chief Secretary Arun Kumar Singh chu Covid natna jeh in tunin Patna gamsung Private Hospital khat’a ahinkho anabeitan ahi tin thulhut chun aseiyin ahi. Hetthei khat chu 1985 bactch officer hi Coivd-19 +ve anahi toh lhon’a atahsa dinmun analel lheh jeng ahitoh lhon’a damdoh jou talouva ana thi ahi. Chuleh Kumar hi achesa Feb nisim 27 nikho’a Chief Secretary anahi ahin chuleh ahung lhung ding August nisim 31 nikho leh retire ding ahi.

Hiche toh lhon’a Chief minister Nitish Kumar hetman louva Kumar in thina ato nachung’a lunghempi na thuthot jong anei in ahi. Chuleh Speaker Vijay Kumar Sinha, Legislative Council Chairman Avadhesh Narayan Singh, Deputy CMs Tar Kishore Prasad leh Renu Devi chuleh ministers, officials leh lamkai chom chom hon jong lunghempi na thuthot anei uvin ahi.

xxxxxxxxxxx

HTC in 43 Assam Rifles leh Tengnoupal District Police chunga pachatna nei

Moreh, Apr. 30: 43 Assam Rifles holeh Tengnoupal district police hon Moreh khopi sunga cheng mipite dinga atohphatna ho jallin Hill Tribal Council (HTC) Moreh in pachatna ana neiyin ahi.

Ningkum kumbul lama Covid-19 natna ahung kisei apat in Moreh khopi leh avel lah’a um gamgi ning chin’a cheng kho ho’a mipite dingin phat hahsa laitah ahi. Chubanin Myanmar boinan ahin delpha khum kit in, hiche hohin khovel a mipite lah’a atampen, lhinsona dinga nikhotha a sum kilo thu miho hinkho nasatah in atongkha in ahi, tin HTC in aseiyin ahi.

Hitobang hahsatna umho hetthemna nei 43 Assam Rifles holeh Tengnoupal District Police hon alhang mipite phatchomna dinga tohgon jatchom chom ahin gonpeh uho hi kipa umleh pachat umtah ahi, tin HTC in aseiyin ahi.

Chuleh, adeh’a 43 Assam Rifles hohin phatkhat phat khatleh Community Service ho ahingonji uva, kithopina jatchom chom leh chaga gentheite dinga relief program, rehabilitation centre ho atundoh ji uva, Covid Awareness Campaign chuleh khantouna ding tohgon ajat ajat ahin gonjing nau chunga kipathu sangtah in akiphong’e, tin HTC in aseibe in ahi.

Chubanin, hiche lhang sunga hin lousoh-ga in aki kingam theipon, mi atamjon kihinsona dinga nikhotha a sum akilo thu u ahi. Tua jong Covid-19 Second wave jeh’a lockdown hung umkit thei ding dinmun ahitoh lhonin boina umtheiho khintoh na dinga alhang dung khintoh masat ding angai mama in ahi, tin HTC in aseibe kit in ahi.

Xxxxxxxx

India a Covid-19 case thah 386,452 kmube

New Delhi, Apr. 30: India in tuni (Friday) sung seh seh’a Covid-19 case thah 386,452 ana mube kit toh lhonin tuni chana India gamsunga Covid case kimudoh jat agomin 18,762,976 alhingtan ahi, tin Union ministry of health and family welfare data chun ana vetsah in ahi.

]Chuleh mi 3,498 in tuni sung mama a Covid natna toh kisaiya thina antobe kit toh lhonin tuni chana India gamsunga Covid natna toh kisaiya thina tohjat agomin mi 208,330 alhingtan ahi.

Tutun India gamsunga active case 3,170,228 aumin, hichu total case akon 16.90 percent tobang ahi.

Alangkhat’a, tuni sung mama a Covid natna akon mi 297,540 ana damdoh toh lhonin tuni chana India gamsunga Covid natna akon damdoh jat agomin mi 15,384,418 alhingtan ahi, chuleh recovery rate jong 81.99 percent in aumjing nalaiyin ahi, tin Union health ministry thulhut chun aseiyin ahi.

Indian Council of Medical Research (ICMR) akon tuni’a thulhut kimu dungjuyin April nisim 27 nikho chanin Covid test hi sample 28,63,92,086 akiboldoh tan ahi. Hichengse lah akon sample 1,920,107 hohi Thursday, April 29 nikho a chu test ana kibol ahi. Chuleh India in Covid-19 vaccination drive ahin bolpat apat in vaccine dose hi 15,22,45,179 akikapdoh tan ahi.

Xxxxxxxxx

Tajikistan gamgi a kinoto na a mi 31 in thina toh

Bishkek, April 30: Kyrgyzstan in tunin Tajikistan toh gamgi a kinotona akon mi 31 lam in thina atoh uvin ahi. Soviet gam teni kikah a boina suhthip na ding thu’a tunin gam tenin kihouna ananei lhon ahi.

Gamgi a gam teni a mipi hon kinotona ananei jing utoh lhon a gamgi a um sepai ho jong ana jao uva boina chu lentah sohkha ahi. Boina asan jing toh lhon in gam teni a sepai hon jong kikap tona ananei uvin, gamteni kikah a kinotona lenpen in akisei in ahi. Tajikistan in gamgi boina chung a thina toh um thu’a vang ima thuso anei poi akiti.

 Kyrgyzstan President Sadyr Japarov in Tajik President Emomali Rakhmon chu phone akon ana kihoupi e jong akiti. Lamkai teni chun gam teni a boina thu’a kihoulhah na agangthei pen a nei ding in kinoptona ananei lhon in ahi.

Kyrgyzstan National Security Chief Kamchybek Tashiyev in thuso miho toh kihouna a chun Tajik Security Chief  Saimumin Yatimov  chu gam pama kihouna ana nei pin ahi. Kyrgyzstan  southwestern Batken lhangsung a cheng ho asei na a ceasefire um vang in kikap tona aum jing nalai uvin ahi tin ana sei uvin ahi. Thuso kimu dungjui in Kyrgyz 10,000 lam in a inn ana dalha taovin ahi akiti. Hetthei khat chu gam teni kikah ahi gamgi chungchang a boina lentah um jing ahin, gamgi tamjo chung chang ahi kiboina ana um jing ahi. Kyrgyzstan in tuni in Batken lhangsung a boina akon a thil se hoc hung chang thu ana sei uvin ahi. Gamgi a boina akon in inn 20 lam, school, dukan 8 lamle casino ana kisuse in ahi akiti. Hetthei khat chu Fergana Valley chung chang ahi  Kyrgyzstan, Tajikistan le Uzbekistan ho kikah a boina um jing ahi.  Hiche gamgi boina hi Soviet khang akon a an akipan ahitahdan in hetsah na ana kinei in ahi.

Xxxxxxxxxx

July-Aug  lha teng Covid -19 Third wave in Maharashtra lhunkhum thei dinga Uddhav Thackeray in sei

Mumbai, Apr. 30: Covid-19 second akemsuh loulai vangin, Maharashtra chief minister Uddhav Thackeray in janni (Thursday) chun July leh August lha sunga Covid-19 third wave in Maharashtra gam alhun khum thei dingin ana seiyin ahi.

State administration in infrastructure ho atamsahbe a Covid-19 third wave a dinga kigotna aneipat tah dingin Thackery in ngehna aneiyin, tu dinmun tobang avel’a mukit ding anop louna thu ana seiyin ahi.

Covid-19 natna toh kisaiya gamsung dinmun vetlhahna neina ding divisional commissioner holeh district collector ho meeting a panla dinga Thackeray hi ana kondoh ahi. Maharashtra State health minister Rajesh Tope in adeh’a oxygen supply lampanga iki ninglhin set u ngai ahi, tin ana seiyin ahi. Chuti chu ahileh oxygen supply na umlou ding ahi, tin CM Thackeray ana seiyin ahi.

Hitobanga third wave hung lhunding thu kisei hi gam phabep a Covid wave pattern kholgilna chelha ho’a kon kimudoh dungjuiya state task force member hon thumopna ananei u ahi. Expert ho sei danin, May lha kichai lamleh niseh’a case thah kimudoh jat hung kemsuh ding, July lha kichai lam ahilouleh August lha kipat lam leh case hung pung pan kit ding, hichu third wave hiding ahitai.

Xxxxxxxxx

Gamsunga Covid natna atamtah jeh a International flight ho May 31 chan India in khamgah ta

New Delhi, Apr 30: India in international passenger flight hochu agamsung a Covid natna asantoh kilhon a May 31 chan geiya dingin akhah tan ahi. Directorate General of Civil Aviation (DGCA) in Friday nikho a chu international flight ban kibolna chu May 31 chan geiya dingin aphongdoh in ahi. India in second wave aumna ah Covid natna case thah hapta khat sunga niseh a 300,000 ana mudoh jing ahi.

Hiche hi Covid natna case thah akibe jingtoh kilhon a kikhah ahi in international flight jouse chu ahung lutding hihen apot ding hijongleh kha hiding ahi tia mopohna nei authority hon ana phondoh u ahi. Hinla hichea hin international all cargo operations adeh a DGCA  aviation regulatory body in approved abol hovang chu ahuop louding ahi.

Chuleh international flight lhendoh phabep hojong a dinmun dungjuiya kiphal jong umding ahi tin aseiben ahi.

Hiche masanga chu international flight chu March 2020 a chu gamsunga lockdown aumtoh kilhon a kha a ana um ahi. Government chun May 2020 chun gam pama umho pohlut ahina dingin Vande Bharat Mission jong ana gong in ahi. Hichea hin mi lakh 82.9 pohlut in ana um uvin ahi. Mimal a risk umjongleh civil aviation in hiche mission chu lolhin sahtei ding gelna in na anatong uve tin Union Minister for Civil Aviation Hardeep Singh Puri in twitter ah tujingkah chun ana jih in ahi. India in tupet hin special international flight tohgon chu gam 28 hotoh anei laitah ahi, hiche gam hochu ahileh, Sri Lanka, Afghanistan, Bahrain, Canada, France, Germany, Iraq, Japan, Maldives, Nigeria, Qatar, UAE, UK leh USA ahiuve. India in maban a gam dang kihoupi dinga agonho chu ahileh, Bangladesh, Bhutan, Ethiopia, Kenya, Kuwait, Nepal, Netherlands, Oman, Russia, Rwanda, Seychelles, Tanzania, Ukraine leh Uzbekistan ahiuve.

India bou hilouvin gam phabep hon flight hochu ana khah tauvin ahi, hiche gamho chu ahileh Australia leh Hong Kong jong ajauvin ahi.

XXXXXXXXX

US akona Emergency Covid Relief masapen chu India hung lhung ta

New Delhi, Apr 30: US akona Covid relief thilpeh masapen chu Friday nichun India ahung lhung tan ahi. Hiche hi agamsung a Covid natna case thah hapta a akibe jingtoh kilhon a health care infrastructure atohkhah ahi tia US Embassy in asei ahi.

US akona relief thilho lah ah chun oxygen cylinder leh regulator 440 California State sunga kidong khom hochu ajauvin ahi. Hiche banah 960,000 rapid antigen diagnostic test leh N95 mask 1,00,000 jong USAID in ape in ahi. Sunday nichun US in Covishield damdoi semna dinga raw materials poimo hojong India apeh dingin ana phongdoh in ahi. Chuleh ventilator leh oxygen generation gear jong gamsunga Covid natna case thah akibe jingtoh kilhon a kithopi dingin agongin ahi. India in US koma pandemic sunga kithopi na apeh tobanga US injong kithopi na angaichat pet tah a India a kithopi nom ahi tin White House thuso chun aseiyin ahi.

US in AstraZeneca damdoi India akona a order sa million 20 dose jong chu India anungpeh tai tin White House chun aseiyin ahi.

Tunikho in critical oxygen equipment, therapeutic leh raw materials vaccine semna dinga poimo hojong amasapen dingin akipedoh tai tin state secretary Anthony Blinken in Thursday nichun tweet abolna ah chun aseiyin ahi.

News agency PTI in asei dungjuiya US in Covid natna jeh a India a kithopi nahi gamdang holeh society honjong amu thei uva pan alah diuhi deisah ahi atin ahi. US state government, private companies, non-governmental organization chuleh gamsunga kona American mi asanga simhon oxygen toh kisaiyin equipment leh apoimo dang supply hochu India a dingin ape nome tin state Department spokesperson Ned Price chun Thursday nichun aseiyin ahi.

XXXXXXXX

India a lhung Covid 19 boina tobang hohi mun jousea umthei ahi: WHO in Europe gamho hetsah

New Delhi, Apr 30: World Health Organization (WHO)  in Thursday nichun Europe gamho komah Covid natna toh kisaiya dan kisem ho lhakang a aumleh India a lhung tobang hohi lhung thei ahi tin aseiyin ahi. India a tu dinmun hin case thah leh athi jong hatah a kibejing ahi, in hichea hin experts hon asei dungjuiya mipi kipunkhom na ho jeh a case thah hi khangjing hidin asei uvin ahi.

WHO luboh Europe in aseina ah gamsunga Covid natna jeh a dan kisemho lhakang dinghi bolkhel lenpen hithei ding ahi atin ahi.

Mi changval a kiven dingdan kisemho lhakang a auma, mipi kipunkhom na ho auma vaccine kapna lam jong alhom nahlai a ahileh hiche hi case thah pun na dinga lampi phatah sohding ahi tin Hans Kluge in Thursday nichun thuso miho komah aseiyin ahi.

India a lhung tobang Covid variant hi mun jousea umthei ahi, India a kimudoh variant B. 1.617 hi WHO in kilahson abai leh abailou thuvang asodoh pon ahi.

Experts hon asei nauvah hiche hi mipi kipunkhom na ho, kichep golseh na ahilouleh kichenna ho tobang hi Covid natna kithejah na lampi khat ahi tin aseiyin ahi.

Kluge in aseibena ah Europe gamho hin ageldoh jing ding chu mipi leh mimal chuleh collective public health leh social measure hohin pandemic lampi asem ahi ati. Aman aseibena Europe gamsunga vaccine kapna lam jong ana khang jingin tuhin population lah ah 7 per cent tobang ahuop tan ahi ati.

WHO in aseina ah hiche hin avetsah chu Europe gamho a mipi tamtah hon Covid natna neiho sangin vaccine kikap atamjo tai tin aseiyin ahi.

XXXXXXXXXX

PM Modi in April a Covid second wave umsunga Meeting 21 vei ana kou

New Delhi, Apr 30: April lha sungah Prime Minister Narendra Modi in official tah in gamsunga Covid natna second wave thutoh kisaiyin meeting vel 21 ana kouvin ahi. Tu dinmun hin India in niseh leh Covid natna case thah 350,000 amudoh jing ahi.

Hiche hi Covid natna toh kisaiya kihouna hihen vetlhah na hijongleh March 2020 akona PM ajauna lah ah atamna pen ahi. March 2020 achu PM Modi in Covid natna toh kisaiya official engagement vel 14 ana nei ahi. Hichea Covid 19 engagement kibolna ah chun Union Government official ho toh review meeting anei na ah chun, US President Joe Biden Russian President Vladimir Putin hojong ajau uvin ahi.

March 2020 leh April 2021 sungah official engagement vel 65 jen ana neiyin ahi, hichea hin atamjo chu Covid natna toh kisai ahi tin Press Information Bureau (PIB) chun aseiyin ahi.

January leh March 2021 sungah India a Covid natna case chu chomkhat sunga dingin ana khesuh in , hichea hin PM in official engagement abolna jong akhesuh in ahi. Hiche hi state 4 hoa election campaign kibolna tohjong ana kimat ahi. Prime Minister chun ama party BJP a dinga campaign hatah a anabol ahi adeh a West Bengal a election phase 8 a aumna dingah jong ana bol ahi. March 2021 sungin PM in Covid 19 engagement khat bou ana neiyin, hichea hin state jousea Chief Minister hotoh review meeting March 17 chun ana neiyin ahi. Modi chun vaccine dose masapen kikapna jong AIIMS Delhi ah ana neiyin ahi.

February lha ajong Modi in pandemic toh kisai a engagement vel khat bou ana neiyin ahi. PIB in aseina ah January lha in Modi in official engagement vel 2 ana neiyin hiche teni chu ahileh January 16 a vaccine campaign leh Varanasi a vaccine kikap hotoh kihouna anei chu ahi.

India a Covid natna first wave chu September lha a ana sanjouva ana khesuh ahi. Chuleh February 11,2021 chun hapta khat sunga dingin case thah 10,988 bou ana umin ahi. India a second wave hi February lha sunga kipan ahi, hiche hi Covid guidelines kisemho lhakang ahijeh leh political leh religious gathering umjeh ahi. Hichea hin Covid natna case thah hatah a akibe jingtoh kilhon in India in oxygen hihen Covid jenna dinga poimo hijongleh lhahsamna aneitan ahi.

April lha sunga achesa nikho 10 sungah oxygen supply toh kisai in engagement vel 5 ana neiyin ahi.

XXXXXXXX

Myanmar gamsunga Coup kiboljeh a vaicha ho ale 2 a pungthei tia UN Report in sei

Bangkok, Apr 30: Myanmar gamsunga military coup umjeh a political a boina soh hohi kum tamtah sunga khantouna leh machalna umho asuhboiya chuleh agamsung a mipi ho vaicha ale 2 a apunsah ding ahi tin United Nations thuphon chun Friday nichun aseiyin ahi.

UN development program ahilouleh UNDP in aseina ah mihem million a sima economic lampang a asuhboi ding ahi ajeh chu military holeh mipi hon civil disobedience movement aboljeh uva business ho ahiding banga umthei talou ahi.

Hichea aha tohkhah dingho chu ahileh poor urban population chuleh insunga numei mopohna neiho hiding ahi tin UNDP assistant secretary general Kanni Wignaraja in zoom recording akonin the Associated Press ahetsah in ahi.

February 1 achu lhendoh anahi Aung San Suu Kyi leh adang mi 3400 hochu military hon amat utoh kilhon a ahen jou uva kona coup chu ana bolu ahi. Hiche jouva kipat a military hon internet jong akhah un chuleh kiphinna nei mipi ho chungah jong hatah in khut ana lha uvin ahi.

Chuleh hiche jeh hin factory, office, Bank chuleh facility dangho jong kha ahi in chuleh trade hojong atongding umlou jeh in kha in aumin ahi. Hiche hi Covid natna jeh a hahsatna toh kibe ahi in chuleh hiche dinmun hi 2005 a kimu tobanga 2022 kipat leh hatah a economy hi asuhboi ding ahi.

Military regime masa ah economy chu hatah in ana khangin ahi. Hichea hin garment manufacturing, tourism leh industry chom chom hoa foreign investment umhon mihem million a sim hoa dinga adeh a rural areas lah a chenghoa dinga natohna ahi in chuleh sum muna aneiyu ahi. Hinla hiche dinmun chu military in coup aboljouva kona hatah a ana tohkhah ahi.

Political crisis aum toh kilhon a hiche phatchomna hohi chomlou kah a beiding ahi tin Wignaraja in aseiyin ahi. Research agency Fitch Solution in aseina ah September 2021 leh economy chu 20% a khesuh ding ahi tin aseiyin ahi. Hapta masa a economist Jason Yek in report abolna ah thilman ho khanjeh leh hoarding aumjeh in food insecurity jong akhange tin aseiyin ahi. Hiche kahlah ah mipi hochun ATM hoa sum koiding leh lahthei jat sem ahitoh kilhon in angaichat hou chohna lamah boina atoh uvin ahi. Chuleh Myanmar sum Kyat jong masanga sanga hatah a khesuh ahi. Masanga chu dollar khat chu kyat 1350 ahi in tuahi dollar khat a kyat 1600 a khesuh ahi.

Tuchan a foreign government holeh business bolhon General Min Aung Hlaing leh junta dangho chunga sanctions adeh a army (Tatmadaw) ho financial support kibolna chu suhbei ding a ngehna aneiyu ahi.

UNDP report in aseina ah hiche sanction kibol jeh a milham hon hatah a hahsatna ato u ahitai atin ahi. Chuleh magazine Nikkei Asia Review in Thursday nikhoa aseina ah independent economist for Myanmar hon thuso anei nauvah military ho summu napen natural gas export abolho, gems leh jade hoa revenue amuna hohi foreign exchange hoa kha dingin ngehna anei uvin ahi.

Hiche sanctions kibol hohin state in anei Myanmar Foreign Trade Bank leh Myanmar Investment and Commercial Bank toh kijopna neiho chu freeze abol thei ahi.

Hiche ho kha a auma ahileh junta ho summuna pen hard currency chu international sanctions um dungjuiya kum khat sunga amujat uchu $ 2 billion tobanga khesuh thei ahi. Military chun hichea aummu houchu security operations bolna leh manchah chohna man dinga tohgon anei ahi.

US in tu naicha chun Myanmar gamsunga gems, pearls leh jade boipi company chungah sanctions abolkhum tan ahi. Hinla hichea hin trade atamjo chu guhthim a kibol jing nalai ahi. Foreign company, Myanmar gamsunga natural gas toh kisaiya industry umhon government ahilouleh military koma revenue apeh diuva hetsahna aneina ah hitobang a chalohna auma ahileh employees ho hinkho leh boina umsa electricity jong boi ding ahi ati.

SHARE
Previous article30th April 2021 News
Next article3th May, 2021 News
Editor at Eimi Times.