29th April, 2021 News

29th April, 2021 News

111
0
SHARE

Government in COVID-19 dan asem palkeh a Koubru mol kal niseh a kibelap jing

Kpi, Apr. 28(UNA): State sunga COVID-19 natna leh thina toh apunbe jing laiyin, mol kal ho dinga COVID-19 dan le thupeh ho ngaikhoh lou leh kimangcha lou bang in niseh in Koubru Mol a kal ding mihem aja a sim akitol jing in ahi.

State sunga adeh a phaicham lah a COVID-19 natna leh thina toh District dang ho sanga atamjo niseh’a akimudoh jeng vang in COVID-19 dan leh thupeh ho nahsah louvin April 21 apat tuni geiyin Koubru mol kal akibelap jing in, hinla hiche toh kisaiyin tohgon imacha aum naipon ahi.

Chuleh tulai tah hibang boina khohset laitah in tuni chan in adeh a mopohna nei mipi palai dinga kilhengdoh lamkai ho jeng jong mol akal un, chuleh kiloikhomna phabep injong mol kal ding in tohgon aneijing un ahi.

Chukitleh mopohna nei Media ho jeng jong COVID-19 natna hilen chunga kiven ding dan hetthemna neiho jeng jong State sunga kichat umtah dinmun a aki umlaitah hephalouvin mol kal dinga mipi tamtah kititkhomna lah a pan ala nalai un ahi.

State Government in COVID-19 natna nei leh thina toh hatah a ahung punbe jing toh kilhon in dan leh thupeh khao tahtah ahin semdoh uvin, kikhopkhomna ho akhaam un, themjilna mun holeh kichep golseh ho jeng jong aphal tapouvin ahi.

Hinla, ginchat umlou tah in kivendohna dinga dan leh thupeh tamtah a kisemdoh nungin niseh in COVID-19 dan leh thupeh ho palkeh in Koubru mol a kal ding akitol jing in, chuleh nikho dang danga kal ding jong kigosa a um jing ahidan het ahi.

Tumasang chun Chief Minister N. Biren Singh injong April 20 nichun hitobang boi laitah leh COVID-19 natna punbe jing toh kilhon a mol kal louding in temna ana neiyin, hinla ngehna anei ana phachom pon, ajing nikho apat tuni geiyin Koubru Mol kal ding apunbe jing nalaiyin ahi.

Government in dan le thupeh asodoh holah a chun mipi kititkhomna jong alou theilouva thivui/thigalna, kichenna holeh phat chomkhat a dinga houthu a kilhaina/kin ho tilou adangse ana phallou dan kichehtah in ana sodoh tauvin ahi. Chuleh alou theilouva kipunkhomna ho jong mi 20 kalval hilou dingin jong thupeh chun ana seiyin ahi.

Ahijeng vangin, niseh a Koubru Mol kal dinga mipi kipunkhom hohi mi jakhat chunglang ngen ahiuvin, COVID-19 jeh a dinmun tijat umtah ahi laitah a mihem aja a sim kipunkhom jing hi lhangsunga cheng mipi ho dingin jong kichatna asodoh sah in ahi.

Koubru Mol kalna dinga lampi in ajotpa kho haosa khat in aseina a chun mihem alhompen a 60/70 tobang niseh tobang in ahung kitol jing un, mi phabep jong cholngahna mun ho ah mol kal ho kinbol ding in aum jing uve tin aseiyin ahi.

Aman aseibe na achun Koubru chung chang thua boina toh kisaiya nam kah a kihetthemmona ana sodoh jeng jong leh natna hilen punbe jingtoh kilhon a damtheina ahin suhkha thei ding hoa kivendohna ding in thipbeh in akimohvet in ahi ati.

Khomi chom dang khat in aseina a chun, COVID-19 natna nei leh thintoh apunbe jing jeh in thilpha ding seidoh leh boldoh hijong leh aphalou lamtah a alahkit thei diu ahijeh in lunggel kichol theilouvin akium e atin ahi.

Aman aseibe na a chun, mol kal dinga hung ho akon in umchan hoilou leh kimanchah na akimupon, aphathei uvin, anunnem thei lheh uvin hinla phaicham a natna leh thina toh kitam mudohna a kon a hung kondoh ahi jeh un thilsoh chom chom hung sohdoh thei ding hi kigelkhoh ahi ati.

Natna hilen umlaitah hihih leh phatah a lemna kineiya, phatah a jindotna jong kinei theiya, kihelkhelna ho akonna jong ichan gei hamkhat kihetthem tona hung umdoh thei ding ahi.

Paolal Haokip, President of Sadar Hills Chiefs’ Association in aseina a chun, tu le tua natna hilen jeh a hahsatna leh boina umjing laitah a Koubru mol a pathen houdinga cheho chunga thusei ding hi ahahsa lheh in, chuleh thu kisei hojong aphalou langtah a kilakoi jeng thei ding ahi in, hinla khosung miho damtheina dinga alou theilouva Mol kal holeh State Government henga khankho jal a COVID-19 natna hilen jeh a hahsatna umjing toh kilhon a Koubru Mol kal lou ding a ngehna kahin nei ahi ati. Chuleh thina thei hiche natna hilen in hou le beh, jat le nam chuleh mivom mikang khentum aneipon ahi tinjong aseiyin ahi.

Aman aseina a chun, lhangsunga cheng mipi ho tijatna in akidim tan, ateh akhang in COVID-19 Second Wave tijatna in akidim tan, hitobang dinmun a aki umlaitah a mipi tamtah kipunkhom ho kimu jing hin lungthim tijatna akibelap jing tan ahi ati.

Hijeh chun, sopi ulenao mol kal dinga kiguong jousen jong gamsung miho damtheina ding gelkhohna jal leh State Government in COVID-19 doudalna dinga dan le thupeh asodoh ho jabolna neiya molkal angah diuvin jong lungtheng tah in temna kahin neiyin ahi ati.

Aloutheilouva phat kiteppeh sunga hou thua kilhaina/maicham semlouva khoh ahijong leh SOP ho phatah a jui pum a mi 20 a kilhah lele a kal diuvin jong temna aneiyin, khuti leh SOP jong palkeh hipontin, chuleh damtheina jong hiding ahi tinjong aseibei.

SAHILCA President injong State Government heng’ah khankho jal leh mipi jouse damtheina dinga natna thejal thei ding mipi kipunkhomna ho phatah a ahin vetsui diuvin jong ngehna aneiyin, chuleh COVID-19 natna tamtah mudohbe ahung hi masang ngeiya dan leh thupeh ho mangcha a mipi kipunkhomna ho ahin vetsui diuvin jong temna aneiyin ahi.

District Administration Kangpokpi injong April 17 leh 19 nikho a COVID-19 Second Wave toh kisaiya mi 20 val natna nei mudoh a aum jou nungin jong SOP holeh juiding dan kisodoh ho ana mangcha gei lheh uvin, hinla akinaipi Senapati District in hapta khat masangpeh apat in COVID-19 dan leh thupeh ho aba mangcha pan tauvin ahi.

Akisei bangin themjilna kot ho akikhah tan, kichep golseh hojong aki chejomsah tapon, hinla janhi nikho gei chun mipi kipunkhomna mutheiyin aum jing in, hinla imacha tohgon leh khamgahna aum naipon ahi.

Ahijeng vang in, District Magistrate/DC Kangpokpi akon thupeh kisodoh khat ahung kithethang in, hiche a chun phat masa a Night Curfew nilhah nidan 7:00 apat jinglam nidan 5:00 gei chelha jom jing ding, kailhang mun a thiljohna mun ho hapta khat sunga thumvei kilhahtho a ahon thei diu ahidan ana tahlangin ahi. Chuleh thiljohna kimaito hojong khat kikha nileh khat kihong ding hiche ho vesui ding a CEO SH-ADC leh SP Kangpokpi ngansena kipe ahidan jong atahlang in ahi.

Thupeh kisodoh in aseibe na a chun niseh leh kailhang mun a thiljohna mun ho jouse nilhah lam nidan 5:00 a kikhahsoh kei ding ahi.

Chukit leh mipi kititkhomna jong alou theilouva thivuina, kichenna leh phat kitep sunga Ritual/Ceremony ho tilou adangse kiphallou ahidan leh kikhopkhomna nei ding honjong District a mopohna neiho akon a phalna akilah masat uva chuleh mi 20 kalval kipunkhom theilou ding injong thupeh ana kisodoh in ahi.

District Magistrate/DC Kangpokpi akon thupeh in aseibe na a chun, mipi kititkhom na lah a maitom kitom jing ding, Social Distancing phatah a chepi ding leh thupeh juilou ho leusah hiding ahidan jong atahlang in ahi.

Kangpokpi District Police hon SOP holeh Guideline ho vaigei tah in manchah leh chepi tajong leh tuni jingkah apat chun mun chom chom ah mol kal ho ana vesui uvin ahi.

Tuni nilhah lang chan chun Koubru mol a kon in mi 300 tobang ahung kumsuh uvin, ahung kunsuh ding tamtah jong aum nalaiyin ahi.

Tunia kon chun District Police hon khatvei kal a mi 20 kalval kallou ding in phalna ana peuvin COVID-19 dan leh thupeh dungjuiyin mol kal ding ho vetsuina ana neiyun ahi.

Xxxxxxxxxxx

Koubru mol thu’a boina akhohset jing Chief Minister in lungkhampi

Imphal, April 28(ET): Chief Minister N. Biren Singh in tuni chun Koubru mol thutoh kisaiya boina asousang jing jeh’a nasatah a alungkhampi dan thu ana seiyin ahi.

Forest Minister leh Forest Department official hotoh CM Darbar Hall muna tuni kihouna a ahoulimna achun Chief minister Biren in reserve forest area hisa Koubru mol dinmun  kavet teng ka ka-nome, tin ana seiyin ahi.

“Koubru lhang’a thing khatcha akimu tapon, thijing ho geiyin akikaldoh gamtai, tin N. Biren Singh in aseiyin, mihem hi angaiya um thil (nature) ho’a dinga melma huse/khohse pen ahi, ati. Chuleh government natongho, adeh’a Revenue leh Forest department ho’a natong ho chunga ngohna aneiyin, government natong hon atohdiu dol kiatah tah leh dihtah in atong pouve, tin aseiyin ahi.

Chubanin, state sung gam leh leiset dan dihlouva lokhum mihon Patta lhem (fake) akisemthu uvin, gamlah leh dil’ (lake) ho ah gancha thana lou (pesticide( holeh chemical jat jat amangcha jing uvin ahi. Hiche ho jeh hin mihem a dingin natna jat jat ahung umdoh kit’e, tin aseiyin ahi.

xxxxxxxx

Manipur a COVID-19 case 259 kimubeh toh agom’a 31000 valta, Natna toh kisaiya mi-2 thibe

Imphal, Apr. 28(ET): Manipur a COVID-19 positive case thah 259 ana kimube kit toh lhonin, tuni (Wednesday) chana Manipur a case kimudoh jat agomin 31,001 ana lhingtan ahi. Tuni mama a mi 2 in Covid natna toh kisaiya thina anatobe kit toh lhonin, tuni  chana thina toh jat agomin mi 395 alhingtan ahi, tin state health department thulhut chun aseiyin ahi.

Covid-19 positive case thah kimudoh ho lah’a chun Central Armed Police Force (CAPF) personnel mi 7 jong apang’e, tin tuni nilhahlam nidan 5:00 a Common COVID-19 Control Room akon thulhut kimu chun aseiyin ahi.

Gamsunga district 3 ho, Imphal West, Imphal East chuleh Churachandpur district hohi COVID-19 positive case thah kitam mudohna pen district ahijing nalaiyin ahi. Health department akon thulhut kimu nunungpen in asei dungjuiyin, tuni’a kimudoh case thah ho lah’a 94 hi Imphal West district a kona kimudoh ahin’, 76 hi Imphal East district akon, chuleh 27 hi Churachandpur district akon kimudoh ahi.

Chubanin, case thah ho lah’a 20 hi Bishnupur District akon kimudoh ahin’, 11 Thoubal akon, 7 Kakching akon, 6 Senapati akon, 4 Ukhrul akon, 3 Kangpokpi akon, 2 Chandel akon, chuleh Tengnoupal leh Jiribam akon khat cheh kimudoh ahi, tin thulhut chun aseiyin ahi.

Kivenna dingleh natna kithejal son’louna dinga bol dinga lomho jouse kichelhahpi ahitai, tin Manipur Health Department  a Additional director leh spokesperson, Dr Kh Sasheekumar Mangang in thuso abolna achun ana seiyin ahi.

Alangkhat’a, tuni chun Covid natna akon mi 59 ana damdohbe toh lhonin, tuni chana Manipur gamsunga Covid natna akon damdoh jat agomin mi 29,376 alhingtan ahi. Chutoh lhon chun State Covid-19 recovery rate jong 95.36 percent akon 94.75 percent chanin ana kemsuh tan ahi.

Chuleh hiche case thah holeh, adamdoh leh athi ho nunga hin, tutu in Manipur gamsunga COVID-19 active case umjat 1,230 ana lhingtan ahi.

Thulhut kimu dungjuiyin, tuni’a COVID-19 natna toh kisaiya thina anatoh teni lah’a khatpa chu JNIMS hospital a akijenna a ana mollem ahi in, kum 76 a tah, Imphal East District kon mi ah, chuleh adang khatpa chu RIMS hospital a akijenna a ana mollem ahi in, kum 52 a tah, Imphal West District kon mi ahi, akiti.

Tuni chana Manipur gam sunga Covid vaccine kikapdoh jat mi 1,47,012 alhingtan ahi. Koi hijongleh kum 45 chunglam mihon RIMS leh JNIMS hospital a um vaccine centre ho, ahilouleh District hospital ho, CHC, PHC chuleh private hospital ho’a vaccine gakikap cheh dingin State Health Department in thuso abolna achun temna aneiyin ahi.

Xxxxxxxxxx

COVID-19 Vaccine kikaplou leh Negative Test Report um louva CM Office lut phal hitalou ding

Imphal, Apr. 29(UNA): Koi hileh COVID-19 Vaccine kikapna photchetna leh Negative Test Report umlouva Chief Minister pa Secretariat a lut ding kiphal talou ding ahi tin Secretary to Chief Minister N Geoffrey in tunia pat chepi pai ding in thusodoh na ana neiyin ahi.

Hiche thulhuhna hi adeh a COVID-19 natna punbe jingtoh kisaiya kivendohna ding leh Chief Minister Secretariat a natoh phatah achelhah jing theina ding ahi tinjong thusodoh chun atahlangin ahi.

Thusodoh in aseina a chun, Chief Minister kimupi nom jouse in Chief Minister pa Secretary akon a phalna akilah masat diu, phalna kilah masat lou ho Office huomsunga kilutsah lou ding ahi.

Koi hileh Mask kitolou jouse jong CM Office Complex a kilutsah lou ding ahi.

Chief Minister kimupi nom jousen State/Central Government thusah dungjuiya Vaccine kikap cheh diu ahi. Phalna kipeh masanga CM office a Vaccine kikapna photchetna ngaicha ding ahi. Chuleh phalna kipe jousen Chief Minister akimupi nadiu nikho ni 3 sunga Test kibolna Negative Report ahin kichoi cheh’u ngai ding ahi.

Kipunkhomna/kiloikhomna min a kimutopi nadia phalna kithum na toh kisaiya atam pen a mi 3 kalval phalpeh hilou ding ahi.

Chuleh CM kimutopi thei dinga phalpehna kipe jousen jong thilpeh imacha abolthei loudiu ahi.

Vilna hung nei jousen jong Office huomsunga kikoi Hand Sanitiser amanchah sohkei diu chuleh CM Secretariat a Official jouse a kon a bolding leh aphat dungjuiya angaicha jouse a akithopi cheh diu ahi.

Lekha ana kipelut ho chunga hetbe nom neiho jouse dinga Telephone (Ph. No. 0385 2450048 / 2450137) abou thuchen dohthei hiding ahi. Chuleh tahsa tah a lekha pehlutna phal hilou ding ahi. Lekha kipelut ding jouse  Dak Counter (General Section) a pehlut leh lah hiding ahi.

Xxxxxxxx

CCpur District a night curfew mipi atam jon jui lou; Niseh ngaichat thilman kal District Administration in vetsuina nei ding

B.Lalboi Gangte

CCpur. April 28 (ET) : District Magistrate, Churachandpur in nilhah Curfew aphondoh toh lhon in thupeh jui lou mi phabep CCpur District Police in anahen tang naban’a niseh’a angaicha thil ho aman kal nachung’a District Administration in kivesui ding ahi tin thuso anei in ahi. Chuleh thuso in atahlang na’a Covid-19 second wave ahung kipat toh lhon’a CCpur District sung in jong Positive tamtah mudoh ahi naban’a thina chan toh jong aum tan ahi. Hijeh hin CCpur District Magistrate in mipi damthei na ding leh Covid-19 kilah sonna apungbe ding venna’a achesa April nisim 19 nikho akipat jui ding daan thah tichu nilhah nidan 7:00 akipat jingkah nidan 5:00 sung nilhah Curfew ana kiphongdoh ahi. Ahin Curfew ho phondoh anahi vang in District sung mipin ngaisah louvin akoi jing nalai uvin ahi ati.

Hiche toh lhon’a IDSP Churachandpur in nikhat sung’a CCpur District sung’a Covid-19 toh kisai data report asodoh na’a case thah 19 mudoh ahidan leh data kisodoh na’a Positive tamtah pang lou lai ahi dan jong atahlang in ahi. Chuleh tuni kimudoh case thah hohi Covid-19 second wave hi kilahson na abailam dungjui’a atamjo Close Contact akon ngen ahi uvin ahi. Hiche lah’a Kho khat akon in Pasal 9 Close contact akon positive ahi dan mudoh ahi. Chuleh Pasal 9 kimu doh lah’a kum 23 pa hi District Hospital akon kimudoh ahi.

Alangkhat’a Covid-19 natna apunbe jeh’a Night curfew akiphon toh lhon’a niseh’a ngaichat poimo kijohna kimkhat in thil man akalsah nao toh kisai District Administration in akigelkhoh in chuleh India gamsung mun phabep’a jong Lockdown akiphong tan nilhah Curfew um jong leh niseh’a ngaichat  poimo lah lutna lam toh kisai zalen tah lha ong ahi dungjui’a thil man kikalsah hi mipi ding’a hahsat na ahi dungjui in avesui ding mopoh najong akipe tan ahi. Achesa April nisim 4 nikho’a kisemdoh District Level Task Force (DLTF) a Chairman Khaikhopau Ngaihte, MCS, Additional DC in hiche chung thu toh kisai’a vetlhah na alamkai ding chuleh CEO, ADC Churachandpur in kithopi na apeh ding chuleh dihlou tah’a thil joh aum leh a Trade license Cancel peh ding uvin thupeh anei in ahi. District Supply Officer (DSO) Churachandpur in niseh’a poimo thil kijoh na jouse’a mipin muthei na ding’a thil man dukan mai’a atahdoh ding uvin hetsahna anei in ahi.

Xxxxxxxx

Thadou Inpi in Imphal Tribal Colony a cheng ho ding lampi chom agonpeh dia ngehna nei

Kpi, Apr. 28(ET): Thadou Inpi-General Headquarters in State Government heng’a Imphal Tribal Colony a cheng thinglhang miho inn le lou neilouva ahung umlou nadiu leh boina chom chom ahintuo nalou diuva aphatcha a lampi chom ahin gonpeh diuvin ngehna aneiyun ahi.

James Haokip, General Secretary, Thadou Inpi-GHQ in aseina a chun Thadou Inpi in Imphal Tribal Colony a inn leh Building semhoi leh sahphat nading aki doudal pon, hinla Tribal Colony min khel ding kiti hi aki geltheipoi atin ahi.

Chief Minister in gelkhohna ahin nei dinga temna aneitoh kilhon in James Haokip in aseina a chun, Tribal Colony Imphal a cheng ho kichondoh diuva thupeh kisodoh toh kisaiyin Thadou Inpi in State Government hengah hahsatna kineiho akinthei pen a suhlhap dingin jong ngehna akineiyin ahi.

Thadou hi Manipur State a dia gamsungmi holah a Tribe lenpen khat jong ahi in, gamsung pumpi a kithethang sohkei ahina ban’a Tribal Colony ajong inn 50 val cheng ahi tin aseiyin ahi.

Hijeh chun Tribal Colony a cheng ho kichondoh dinga thuoehna kinei toh kilhon a chenna inn neilou leh boina chom chom ahintuo masang uva akinthei pen a lampi dangkhat ngaituo peh ahi nadiuva ngehna hung kinei ahi tinjong aseiyin ahi.

xxxxxxxxxxxx

Rayburn College a academic session 2021-22 akon PG Program Master Degree sim thei nading’a MU akon Professor team khat in vetlhah nanei

B.Lalboi Gangte

CCpur. April 28 (ET): Churachandpur District sung’a Private College lah’a Rayburn College, Gangpimual in Academic session 2021-22 akon Post Graduate (PG) Program Master Degree jil/sim thei na ding’a lhinna hinam ti vetlhah na tunin Manipur University (MU), Imphal akon Professor team khat in vetlhahna ananei uvin ahi. Chuleh Rayburn College velha ding Professor team hochu Professor S. Mangi Singh, Dean, School of Social Sciences; Professor S. Jibonkumar Singh, Director, College Development Council; Professor Rama Krishna, Department of History; Professor L Rahen Singh, Department of Political Science leh Professor Kh. Dhiren Singh, Department of Commerce ho ahi. MU akon Professor team ho chu Rayburn College Principal Dr. Rev. Khen P. Tombing lamkai na in College staff hon vailhunna anei uvin chuleh Rayburn College NCC in Guard of honor anape uvin ahi.

Hiche toh lhon’a Rayburn College leh MU akon Professor team hon Rayburn College, Gangpimual a Post Graduate Program Master Degree jil/sim thei na ding toh kisai in thu chom chom seikhomna ananei uvin ahi. Chuleh Professor team hon Library, PG block leh College Campus sung vetlhah na anei naoban’a Commerce, History leh Political Science a teaching staff hotoh jong kihoulimkhom na anei uvin ahi. Hiche phatsung in Principal Rev. Dr. khen P. Tombing in teaching staff ho tahlang na leh Subject toh kisai chuleh Post Graduate Program chelhah ding dan toh kisai’a houlimna ananei in ahi.

Hetthei khat chu Rayburn College, Gangpimual hin Academic session 2021-22 akon PG Program noi’a Master Degree subject 3 tichu Commerce, History leh Political Science sim thei na ding’a Manipur University heng’a ngehna anei ahi. Chuleh Subject 3 ho sim thei na ding’a Rayburn College kigong chaisa’a um ahitan chuleh Guide ding’a Political Science a Retired Professor Dr. LS Gangte, History a Retired Professor Dr. Laldena leh Commerce a Retired Professor Dr. Md. Kheiruddin ahi. Tuni MU akon Professor team hon College building, kivai pohdan leh lekha poimo document chom chom ho vetlhahna ananei ahi.

xxxxxxxxx

RIMS a local organisation ho akikum uhi vangset umtah ahi: RIMSSU

Imphal, April 28(ET): RIMS hi national level institution khat ahi in, RIMS authority mopohna hong sunga local organisation ho hung kikumlut hi kilem/kisang lou ahi, tin Student Union of Regional Institute of Medical Science (RIMSSU) in ana seiyin ahi.

“Keiho, Simlai kiloikhom RIMSSU hon RIMS a ka-jilkung ho’uleh vaipo ho chunga bul-le-bal neilouva ngohna kineijing ho chunga demna sangtah kanei uve”, tin RIMSSU thuso bol khat chun aseiyin, simlai kiloikhom phabep toh April nisim 22 nikho a kihouna achun RIMSSU in suhthengna ananei ahitai, ati.

RIMSSU thuso chun aseibe in, “Kangailut tah’u kasopiu  (L) Sanaton Athokpam umna warden pa matna dinga Justice for Sanaton Athokpam (JFSA) kiloikhom hon ngol thubuh’a ngehna aneiyu, chuleh ka Director pa’uleh Dean pa hi amopohna nahsah louva asei uhi santhei dol ahipon, akigelthei him himpoi. Hospital vetkolna hihen, hospital dimset’a umjing adammo ho vetsuina hihen, RIMS a themjil simlaiho boina ho sutlhapna lampang hijongleh Director leh Dean vaisaina noiya RIMS sunga kikhelna leh khantouna tamtah umdoh ahi. Hitobang khantouna leh vetsuina kitup jal’a hi India pumpia dinga RIMS hi National Institutional Ranking Framework (NIRF) noiya Rank 28 channa a pangjou ahi. Hiche hi simlaiho leh Manipur pumpi a dinga kithang atna lentah ahi. RIMS a natoh chedan leh thil umchan hephalou khat in i-atileh mikhat chu amopohna nahsah lou dana aseithei ham?, ati.

“RIMS community ho jousen (L) Sanaton alunghempi naban’a Magisterial Enquiry lolhinna dinga pan alah jinglai uva, hitobang tah’a joule nal a vaipo ho, jilkung ho, chuelh simlaho chunga ngohna kinei jing hi vangset umtah ahi.” Hiche sang hin JFSA leh akisaipi jouse RIMS minsetna ding natoh akon agangthei penin kikangse uhen. Media lah dunga mi chunga ngohna thuso bol lele sanga magisterial enquiry jabol cheh’a, dan in atoh ding dol tohlhah sah hi chihna hijo ding ahi”.

Dharna touva, kijotna neiya, jou thu thejal sang’a COVID-19 second wave akhohset jing laiya hi kivenna dingleh kihuhbitna ding joh a pan lahding ahi, tin RIMS a simlai kiloikhom hochun asei uvin ahi.

Chubanin, “director hihen Dean hijongleh, local committee ho douna a thilbol dingin simlaiho hunamin abol khapoi, dan ho kalungthim uvah kakichin jing uvin, katosot jing uve. Kho mulou banga thi ibol loudiu ahi. Kaloi ngaita uvin eidalhahnau chunga avelin kalung hempi uvin, agangthei penna Magisterial Enquiry alolhin ding kakinem uve,” tin aseibei.

Xxxxxxx

Shangshak Battalion in Dk. Crore 6.72 man ding thingtum anamandoh

Imphal, April 28 (ET) : IGAR (South) vetsui nanoi’a um 10 Sector Assam Rifle, Shangshak Battalion in tunin Kamjong District hopsung Koshu kho kom akon in daan phallouva kipo thingtum (timber) anamandoh uvin ahi. Chuleh akimandoh thingtum hi agom’a Dk. Crore 6.72 ahin Forest Officer, Finch Corner heng’a kholchilbe ahi nading in anapelut tauvin ahi.

xxxxxxx

Assam Rifle hon mun chom chom’a daan in aphallou thil phabep anamandoh

Imphal, April 28 (ET) : 26 Sector Assam Rifle, Tengnoupal Batallion in tunin Tengnoupal District hopsung Khudengthabi kom’a daan dih louva kipo kuwa chang anamandoh uvin ahi. Hetthei khat chu khudengthabi lengthei lei lah’a kuwa chang kisel ahi dan thuguh amu dungjui uvin Tengnoupal Batallion in hiche gamkai sung kholchilna aneinao’a Kuwa chang kg. 5,230 sum a Dk. Lakh 31.38 vel anamudoh’u ahi. Chuleh akimandoh thil jouse kholchilbe ahi nading in Customs Department khut’a anapelut tauvin ahi.

Alangkhat’a Moreh Batallion in jong tunin daan dih louva kipo khamnathei phabep anamandoh uvin ahi. Hetthei khat chu Moreh Batallion troop ho hi Indo Myanmar gamgi a patrolling ache nao in gamlah’a carton box phabep um anamudoh uvin kholchilna anei nao’a carton box 25 akon khamnathei Dk. Lakh 2.02 man ding vel anamudoh’u ahi. Chuleh mudoh’a um khamnathei jouse kholchilbe ahi nading in Customs Department, Moreh khut’a anapelut tauvin ahi.

Xxxxxx

Inn chim jeh’a insung khat’a mi 5 in thina toh

Mirzapur, Apr. 28: Uttar Pradesh gamsung Mirzapur hopsung Choti Gudri gamkai sung’a tuni jingkah nidan 3:00 vel in inn khat anachim jeh in insung’a kicholdoh/lum insung mi 5 in thina chan anatoh in ahi tin thulhut chun aseiyin ahi. Chuleh thina toh hochu mipa Umashankar (50), minu Gudia (48), chapa Shubham (22) leh Saurabh chuleh chanu Sandhya (20) ahi akiti. Thilong 5 akimudoh tan ahi tin Police khat chun atahlang in ahi.

Hetthei khat chu Umashankar hi motor mechanic ahin vengsung mipi sei dungjui in hiche insung mi lah’a chanu ani chana nu vang hiche thilsoh na’a hin ajao pon ahi ati. Ajeh chu ama nu hi Varanasi a lekha sim ahin chuleh ahung lhung ding Nov. lha sung’a ji nei ding’a kigo chai ahitai. District Magistrate PK Lakshkar in aseina’a hiche insung mite hin inn nung lang ka (room) neo khat lha a Dk. 200 apeh uva um’u ahi ati. Chuleh Chief Minister Yogi Adityanath in lunghempi naleh kithopina in thina toh ho Dk. Lakh 2 cheh peh ding in phondohna anei in ahi

xxxxx

Coast Guard pan lah na’a Arabian sea a kiholmo fishing boat khat nikho 4 jouva amun hetdoh hita

New Delhi, Apr. 28: Indian Coast Guard in tunin achesa nikho 4 masang’a Arabian Sea a ana kiholmo Tamil Nadu fishing boat Mercedes chu kholchilna akinei jing toh lhon’a aum na hetdoh thei in aum tan ahi ati. Hiche boat chu Arabian Sea a Goa akon Km 1,100 kigam lha in aum in ahi. Hetthei khat chu Tamil Nadu akon hiche nga matna kong hi achesa April nisim 6 nikho’a crew 11 toh nga man ding’a anakondoh nao’a gammang kha’u ahi.

Hiche toh lhon’a  Maritime Rescue Co-ordination Centre (MRCC) in satellite phone mangcha’a hiche kong toh kihoumatna anei tah toh lhon’a coast guard ship escorted nanoi’a Tamil Nadu ahung lhung ding May nisim 3 leh hung lhung mai thei ding’u ahi tin Official khat chu aphongdoh in ahi.

xxxxxxxxx

Govt. in thilman jat ding agontoh AMSU in pomlou, thah gontoh kit dinga ngehna nei

Imphal, Apr. 28: Government in thilman ding agontoh ho apom pehlou toh lhonin Manipur Students’ Union (AMSU) in mopohna nei authority hon price list chu athah gontoh kit uva, akikhel tokah a chepi dinga thupeh aneilou dingin ngehna aneiyin ahi.

Covid natna jeh’a gamsung economy khansuhna ho gelkhohna jal’a Department of Consumer Affairs, Food and Distribution in April nisim 25 nikho a chu Essential Commodities Act, 1995 noiya thil 17 ho man jat ding ana gontoh ahi, tin AMSU headquarters a HRD secretary, Mani Ningthoujam in Thangmeiband a um AMSU office a thuso bol miho koma tuni’a ahoulimna a chu ana sei ahi.

Mani Ningthoujam in aseina achun, matar, mustard oil, palm oil chuleh refine oil, kitiho panna in thi phabep man jat kigong chu wholesale rate toh retailer price akibah mai mai jeh in akilom theipon ahi. Arhar dal leh thil phabep hochu retail price sangin wholesale rate atamjoi, ati.

Hiche thu toh kisaiyin, Union in mopohna nei authority hon agang thei penna price list vel vetlhahna anei dingleh thil dang akiminphah loulai ho man jat ding jong tahlangna anei dingin ngehna aneiyin ahi. Chuleh thil adang dangho ma jat dingjong tahlangna nei dinga achesa nikho phebep sunga Union in ngehna anei jing nunga jong authority hon adonse lou jeh injong demna aneiyin ahi.

Gamsunga thilman kal vetsuina dingin, Thangal Bazaar, Nagamapal chuleh avel lah ho’a Union in drive jat chom chom akibol jinge, tin Mani Ningthoujam in ana seibe kit in, lha 3 lam eikhang thei diu thil aloma kikholtup ho Union in anamu in, hitobang stock a um thil ho man kalsah ding angaikhoh poi, ati.

xxxxxxxxxx

Government Fish Farm ho ding’a PPP Model pohdoh hiding ahi: Fishery Minister

Imphal, Apr. 28(ET): Fishery Minister S. Rajen Singh in aseina, a chun State sung pumpi a Government vetkolna noiya um Fish Farm ho jouse Fish Farmer ho phatchomna dinga Public Private Partnership (PPP) Model dungjuiya saansah(leased) ding ahitai. Hitoh kilhon a State Cabinet in jong thulhuhna kisemdoh paiding ahitai tinjong aseiyin ahi.

Minister Rajen in Old Secretariat, Babupara, Imphal a Press Conference kineina a thulakhom ho henga aseina a chun Government in hitobang thulhuhna ahin semdoh hi adeh a Fish Production tamsahbe nading leh State sunga khangthah tohmun neilou hon sum le pai aki holtheina diuva hung kiguong ahi ati.

Aman aseina a chun, nikho phabep chun mi phabep in Government vetsuina noiya um Fish Farm ho hetpehna umlouva aguh a gam ahin nehlut dan thulhut jong ana kimu in ahi. Bishnupur District sunga Haotak, Kumbi a um Regional Pengba Farm hetpehna umlouva hin nehlut ho hengah hetsahna jong ana kibol tan ahi. Koi hijong leh dan toh kitoh louva natoh ho bollou ding leh Government panlahna ho kithopi cheh joding in jong Minister in temna aneiyin ahi.

State sunga Nga akimandoh dan thu a aseina a chun, Minister Rajen in State chom a kon a kumseh a Nga chohna dinga sum le pai kisengdoh hi Dangka Crore 4 alhingin ahi tin aseiyin ahi. State sunga Nga vahna louva kikoi ho jong Ngahvahna dinga phatah a imanchah them uleh hiche sum le pai kisengdoh hojong kihuhdoh thei ding ahi ati.

Hitoh kilhon a mopohna nei Official honjong tohgon phatah ahin semdoh diuvin jong hetsahna aneiyin ahi.

Loktak Livelihood Mission akon a Liktak Lake a Cage Culture mangcha a Fish Farm jong kibol ding ahi tinjong aseiyin, hiche hin Farmer ho dinga sum muna phatah jong hung hiding ahi ati.

Xxxxxxxxxx

Insp. Khogen in thilpha bol pum’a Kpi ana dalha, Kpi tolsung kiloikhom ho vailhahna nei

Kpi, Apr.28(UNA): Vetjui thei tah Police Officer, Inspector Maibam Khogen, Officer-in-Charge Kangpokpi Police Station in janhi chun panmun thah aluona ding mun CID(SB) jon in Kangpokpi ana dalha tan ahi.

Kitahna neitah Police Officer ahitoh kilhon in District adalhah masang in Kangpokpi khopi sunga meithai phabep neh kiholna dia sumkolveina abolnau machalthei nading in kithopina ana neiyin ahi.

Tumasang chun Kangpokpi khopi sunga tolsung kiloikhomna hon Kangpokpi Town Committee ho makaina in khopi sunga Ju joh ana khaam uvin, chuleh Ju joh jousen kipehdohna in April 25 akon a Ju joh talou dingin jong kigellhuhna ana neiyun ahi. Anaho lah a mi phabep chu meithai kihinso nadinga Ju joh ahiuvin ahi.

Inspector Khogen in April 26 a Transfer Order amu masang chun hitobang dinmun chung changah gelkhohna ana nei lheh in, hijeh chun Town Committee ho heng’ah meithai kihinso nadinga Ju joh a chuleh Ju joh talou dinga kigellhuhna neiho min ahin lahkhom diuvin ngehna ana neiyin ahi. Hitoh kilhon chun khopi sung adalhah masang April 27 ni jingkah chun Kangpokpi Town Committee Office ah meithai ho ana kimupi in KTC, KWWO leh KYU masang ah neithai mi 3 ho heng’ah Dangka 5,000/- cheh neh kiholna sumkolveina danga akipatna diuvin kithopina ana pe’n ahi.

Chuleh meithai hon hiche sum hi aki hinso thei nadiuva sumkolveina thahbeh abol nauva amanchah diuvin thumopna aneiyin, Ju kiti hin insung ding leh Society ading in thilpha ahin lhut poi tinjong aseiyin ahi.

Inspector Maibam Khogen hi COVID-19 hung lhun til’apat doudalna kinei lai chun hatah in pan ana la in, apanlahna ho hi khopi sunga mijouse dingin vetjui thei tah anahi in ahi. Chuleh neh kiholthu mi tamtah jong ana kithopi jing in, a gunchu naleh akitahna jal in gamsung MLA akon injong pachanna peh in ana um in ahi.

Alangkhat ah, Kangpokpi sunga tolsung kiloikhomna Kangpokpi Women Welfare Organization, Kangpokpi Youth Union honjong Kangpokpi Town Committee makaina in OC Kangpokpi Office ah janhi chun vailhahna kin-gon ana manpeh uvin ahi.

Inspector ijat hamkhat Kangpokpi Police a Officer-in-Charge ana tuh jing un, abon chauvin apha sohkei yun alungtheng sohkeiyun, hijeng jong leh nang hi achombeh in nana tohna ah lungtheng tah leh nalungsungah kitahna naneiyin ahi tin KTC Chairman Lunseh Kipgen in vailhahna a houlimna aneina a chun aseiyin ahi.

Town Committee hon ngailutna leh pachatna vetsahna in Saipikhut Waistcoat khat ana peuvin, chuleh KWWO leh KYU hon ajinu  chu ‘Khamtang’ ponve ana vepeh uvin ahi.

Inspector Maibam Khogen in aseina a chun Transfer leh Posting hi Government natong ho dinga alou theilou khat ahi in, kum 30 val na kahintoh apat in hitobang Transfer leh Posting hojong kahintuoh jing in, hinla phat chomkhat sung hijong leh Kangpokpi mite toh kaki polkhom hi a-itih a kasuhmil lou ding ahitai tin aseiyin ahi.

Kangpokpi tolsung kiloikhomna jouse chung’ah phat chomcha khopi sunga aum sunga ngailutna leh tosotna aneijing nau jeh in kipathu aseiyin, chuleh KTC, KWWO, KYU leh khopi sunga cheng mipi jouse hengah angailutna leh ajana a phongdoh in ahi.

Lamkai ho tilkhouna jong aneiyin, chuleh COVID-19 Second Wave doudalna dinga jing amasang pen a din ding, chuteng leh kithopi dinga mipi ho koulut ding ahi. Amasanga idin tokah a koima hung pang lou ding ahi tinjong tilkhouna a chun aseiyin ahi.

Inspector Maibam Khogen hi CID(SB) a kichon ding chuleh Inspector Henminthang Kipgen in Kangpokpi Police Station a OC panmun atuh ding ahi.

Xxxxxxxxxxxx

Koubru mol a lai houna mun kisemna ho’a koima community kikumda hen: MLA Rameshore

Imphal, Apr. 28(ET): Koubru mol a lai houna mun themkhat kisuhsetna chung’a MLA Lourembam Rameshore in alung kimlouna thu aphong in Ipu ipateuvin eina dalhah peh’u hiche mun hi tulai khang leh ahunglhung ding khang hon phate ivenbit u ngai ahi tin aseiyin ahi.

Hiche mun hi Meetei hoseh’a hilouva community dang dang’a dia jong muntheng a kinei ahin, amun semhoi suhhoibena natoh kibolna ho’a koima kikumlou ding’in jong ngehna aneiyin ahi. Koubru a pathen houna mun semna dia sum le pai a kithopina hinpe nom jouse liem ahijing’e tin aseiben chuleh hiche mun a pathen houna ding leh thildang dang bolna ding’in Dk. Lakh 2 in ana pang in ahi.

Alangkhat a Achesa December, 2020 kum a Koubru mol chung’a lai houna ding kisemna foundation kibol ho aum gam tapon hiche hi vangset umtah ahi tin Mahousa Kanba Lup a President Dodo Luwang in alung kimlouna thu aphongdoh in ahi.

Thuso mihotoh akihoulimna ah hiche foundation hi leng Leisemba Sanajaoba in December nisim 1, 2020 kum a anaphu ahi atin, aleiset dinmun ho velha ding’in team khat jong akalsong uvin ahi. Amun agalhun u chun foundation song kikamho anaum tapoi tin asei uvin, thilsoh chung chang’a demna aneiyin, maban’a hitobang natoh ho bolkit louding’in jong aseiyin ahi.

Xxxxxxx

India a Covid case million 17.99 lhing ta

New Delhi, Apr. 28: Union ministry of health and family welfare akon tuni thulhut kimu dungjuiyin

India in tuni seh seh in Covid-19 case thah 360,960 ana mudohbe kit in, vannoiya dinga nikhat sunga case thah kimudoh tamni pen khat ahitai. Chutoh lhonchun tuni chana India gamsunga Covid case kimudoh jat agomin million 17.99 alhingtan ahi.

Chuleh mi 3,293 in tuni chun Covid natna toh kisaiyin thina anatohbe kit uvin ahi. Chutoh lhonin tuni chana India gamsunga Covid natna toh kisaiya thina tohjat mi 2,01,187 alhingtan ahi. Tule tun India gamsunga active case 2,978,709 aumin, hichu total case akon 16.34% percent tobang ahi.

Alangkhat’a, tuni chana India gamsunga Covid natna akon damdoh jat agomin mi 14,817,371 alhingtan ahi. Chuleh tuni chana India gamsunga Covid lou (vaccine) kikapdoh jat jong mi 14,78,27,367 alhingtan ahi.

Indian Council of Medical Research (ICMR) akon thulhut kimu dungjuiyin, April nisim 27 nikho chanin India gamsunga Covid test kiboldoh jat hi sample 28,27,03,789 alhingtan ahi. Hichengse lah’a a sample 17,23,912 hochu Tuesday nikho a test ana kibol ahi.

Xxxxxxx

Eviction

Imphal, Apr. 28(ET): Imphal East district administration le Police hon tunin Heingang Makha Leikai a gam hin neh ho inn ana suseuvin ahi.

xcxxxxxxxxxx

SOP juilou kiman

Imphal, Apr. 28(ET): Police hon tulai Covid SOP palkeh ho check abol uva amatjing utoh kilhon in tunin Face mask kitomlou mi 22 Imphal Police Station a phat chomkhat ahenden uvin ahi. Ama ho chu Imphal Magistrate ang’ah adinsah uvin sum jong aleusah uvin ahi.

Koi hileh milah a mask kitomlou ho kivelha jingding ahin, SOP palkeh hojong kiman jingding ahi tin police hon asei uvin ahi. Government in juidia aphatsah Covid SOP phate’a juichieh ding’in mipite temna jong aneikit uvin ahi.

Xxxxxxx

Jiribam akon jilkung transfer kibol simlai kiloikhomna phabep in demna nei

Jiribam, April 28(ET): Jiribam sung a simlai kiloikhomna Jiribam unit-AMSU, MSF, DESAM  le KSA ho in Borobekra Higher Secondary School, Jiribam akon jilkung 2 Imphal lam a transfer kibol na chung chang a hatah in demna ahin nei uvin ahi. Thuo miho toh kihou na a L. Bilaks Meetei, President, DESAM, Jiri District Council in asei na a Commissioner of Education (S) akon thupeh dungjui in Borobekra Higher Secondary School, Jiribam akon jilkung 2 Ananda Singh Higher Secondary School le Model Higher Secondary School, Imphal a transfer akibol in, hitabang thupeh hi kiloikhomna ho in akipom thei pon ahi tin ana sei in ahi. Jiribam district sung a school ho ahi jilkung vat jing a kithu be jinglai a aum sa kisan ahung kilah doh hi vangset umtah ahi tin lamkai pa chun asei in ahi. Atom Rajiv Meitei, President, MSF, District Committee, Jiribam  in hetsah na ahin nein a a jilkung thah ahung kisol lou le aum sa ho lahdoh louding in vaipo ho ang a temna ana nei in ahi.

XXXXXXXXX

Jiribam a covid toh kisai a kihoukhomna um

Jiribam, Apr. 28(ET): Tuni jingakh lam nidan 10 vel in Kamranga Masjid, CHampanagar Masjid, Chingding leiai Masjid le Islamabad le ahang sung’a club chom chom akon lamkai hon District police multipurpose hall a covid toh kisai in kihoukhomna ana nei uvin ahi.

Kihoukhomna achun covid akon kivenna ding a SOP juiding dan le bol ding ho chung chang thu seikhomna ana nei uvin ahi.

Assam toh gami gampam mi hunglut ho kholchilna neina ding’a District police ho kithopi ding mopohna neihon amaho mopohna sung’a local volunteers ding list apehlut diuvin jong kinoptona anei uvin chuleh Covid-19 Second Wave khanjing toh kisaiya Muslim community hon Namaz leh houkhomna toh kisai thildang ho a inmun uva aman diuvin ngehna jong aum in amahon jong ana noppeh uvin ahi.

Jiri vadung vel a cheng hon jong Assam akon mi alutsahlou diuvin jong hetsahna anei uvin chuleh gampam mi hunglut venna ding in foot patrolling achelha jing in ahi.

Xxxxxxxx

PM in IAF koma Covid operation kibol na Speed, Scale hatsah dinga ngehna nei

New Delhi, Apr 28: Covid 19 natna in gamsunga apunjing toh kilhon a adoudal a lamah jong war footing a um ahi toh kilhon in Prime Minister Narendra Modi in Wednesday nichun Covid relief lama Indian Air Force ho panlah dan velvet najong anei in chuleh hichea hin Oxygen tankers leh apoimo dang manchah ho pohna a speed, scale leh safety jong sempha be dinga ngehna jong aneiyin ahi.

Air Force ho panlah na thua PM ahetsah na ah IAF Chief Air Marshal RKS Bhadauria in IAF in heavy lift fleet leh medium lift fleet ho thua 24×7 a umthei dinga gon ahi tin PMO’s thuso chun aseiyin ahi.

Fleet jousea aircrew hojong round the clock operation dinga kigong ahi tin IAF Chief chun aseiyin ahi. Aman PM koma aseina ah IAF in achombeh a Covid air support cell jong agonge tin aseiyin ahi. Hiche hi Ministry chom chom leh agencies hotoh kitho khom nadinga kigong ahi. Hichea hin IAF in Covid douna dinga natoh na anei jingin ahi, hapta khat val sungah cryogenic oxygen containers ahom (empty)  hochu filling Centre holeh gamdang hoa kona jong oxygen lhahsam na jeh a kipolut jing ahi. Wednesday nikhoa jong IAF hon natoh asujom uve tin Official hon asei uvin ahi. Oxygen tankers hochu C-17 heavy lift planes manga Bangkok akipat a Jamnagar, Agra, Chandigarh, Hindan, Bhopal leh Surat, Indore leh Jodhpur chuleh Indore leh Jamnagar kikah a poh ahi.

PM in aseiyin IAF personnel Covid 19 operation kibolna natoh neijouse venbit angaiye tin aseiyin ahi. PM in IAF personnel holeh a insung mite ho dinmun dohna jong anei in ahi. IAF Chief in ahetsah na ah IAF sungah vaccine kapna chu atamjo achal lha tai tin aphongdoh in ahi.

Monday nikho jong chun PM in Covid management thua military kigon tupdan ho velvet najong anei in ahi. Hichea hin Chief of Defence staff General Bipin Rawat in April 26 nichun hiche thua PM hetsahna jong aneitan ahi. Aman aseiben military medical personnel aphat louva achesa kum 2 sunga retirement neiho jong aumnau vellah a Covid facilities hoa toh sahkit ahitauve ati.

Covid relief natohna dinga Armed Forces, defence research and development organisation leh defence public sector hon aphat vala natohna anei u ahi. Hichea hin amahon Covid hospital asemdoh uvin, oxygen production leh medical staff holeh oxygen contact ho airlift abol uvin ahi.

Xxxxxxxxx

Myanmar Unity Government in ASEAN koma mat a umho lhadoh ahi masanga kihouna umlou ding tia sei

Naypidaw, Apr 28: Myanmar a pro democracy Unity Government in military junta power ana laho chungah oppose abol jouva kona lha 3 lhin konin Wednesday nichun political prisoners ho lhadoh ahi masanga kihouna umlou ding ahi tin aseiyin ahi.

Association of South East Asian Nations (ASEAN) member 10 umna chun February 1 a coup kibol jouva kona Myanmar a dinga lampi ana holjing a chuleh boina umho ngah a chuleh kihouna jong nei dinga ngehna anei ahi. Hinla Junta hochun ASEAN Summit a kona proposal umho chu ana sang pouvin ahi. Hiche summit ah chun Myanmar senior General Min Aung Hlaing jong chu Civil langa kona kouvin aumin ahi.

Pro democracy National Unity Government (NUG) noiyah coup kibol na kona kideldoh members of parliament jong ajauve tin Southeast Asia regional bloc in ajau in ahi. Hinla hichea hin kihouna phatah a aum theina dingin political prisoners hochu ajeh beiya alhadoh diuva ngehna jong aneiyin ahi. Amaho chu ahileh, President U Win Myint leh State counselor Daw Aung San Suu Kyi, NUG Prime Minister, Minister Mahn Winn Khaing Thann ahiuve.

Win Myint Suu Kyi leh adang hochu couple kibol jouva mat a um ahiuve.

Military in aseina ah power chu alah ngai ahi ajeh chu Election kibolna ah fraud case aumin chuleh complaint jong aume tin aseiyin ahi.

Pro democracy kiphinna chu Nay Myanmar gamsunga cities leh town jousea ana umin ahi. Military chun lethal force manga kiphinna neiho chunga crackdown ana bolu ahi, hichea hin mi 750 val ana that uvin ahi tin activist group hon asei uvin ahi. Hinla hichea hin Reuters in athijat chu asei chen theipon ahi ajeh chu Junta hon Media holeh Journalist ho jong amat lah a chu jau ahiuve. Kiphinna neiho chun NUG support bolnan Mandalay khopia kijotna anei uvin ahi tin Myanmar Now media thuso chun aseiyin ahi, hinla hichea hin boina asolou danho jong aseiyin ahi.

Hiche thua hin ASEAN hon Indonesia capital ah Saturday nichun kihouna anei uvin ahi. ASEAN lamkai hon asei nauvah hiche kihouna ah chun point 5 tobang ah boina suhlhap nadinga kinopto na anei uvin ahi.

Hiche thua hin Junta hon asei nauvah ASEAN ho thumop chu phatah a gellhah na kinei ding ahi ati, hichea hin Myanmar velha dinga Envoy solding jong ajauvin ahi.  Hinla hiche thutoh kisaiya activist hon demna anapeh u ahi.

Hinla hichea hin achombeh a Suu Kyi kum 75 leh political prisoners dangho lhadoh na dinga ngehna aum dehpon ahi. Assistance Association for Political Prisoners Advocacy group hon asei nauvah tuhin mi 3,400 tobang coup kibol jouva kona kiman ahiuve tin aseiyin ahi.

Hiche coup hin military leh ethnic minority insurgency kikah a autonomy thumna anei nauva kiboina ho athah umsah kit tan ahi. Chuleh Army holeh Karen insurgents ho kikah a Thai gamgi lah dunga kikap tona jong ana um in ahi. Chuleh north, China toh kinai langah Army holeh Kachin ho kikah ah kikapto na ana umin ahi. Boina hochu Chin State ah jong ana soh in ahi, hiche munhi India toh kinai muna um ahi. Myanmar now in aphondoh na ah hichea hin government Sepai 30 valin nikho 4 sunga athi uve tin aseiyin ahi.

Karen insurgents hochun Myanmar army posts, Thai gamgi koma umchu Tuesday nichun ana latan ahi. Hichea hin military akona air strike jong ana um in ahi. Military hochun hiche munlah ah chun air strike avelin Wednesday nichun ana bolin ahi. Hinla hiche thua hetna nei authorities hon asei nauvah hiche ah hin athi amang ho hetthei ahinai poi tin aseiyin ahi.

Hichea hin kho 100 adeh a chapang, tehse leh numei naovop hon hiche airstrikes akon a jamdoh na din Thai gamgi langah ana jam uvin ahi tin Free Burma Rangers aid group chun aseiyin ahi.

Xxxxxxxxx

Covid-19 natna Second Wave hin India Economic Growth asuh boithei ahi: S&P

New Delhi, Apr 28: Global Ratings in Wednesday nikhoa aseina ah Covid 19 natna second wave alhuntoh kilhon a India GDP leh business ho atohkhah ding ahi tin aphongdoh in ahi. Second Wave hi hatah a akhoset toh kilhon a India kiledoh na ding khah a pang ding ahi ati.

Hapta masa a chu global rating agency chom khat Fitch in aseina ah India in economic growth leh tu dinmun a current fiscal chu 12.8 per cent tobang a um ahi. Hinla Moody Investor Service in aseina ah Covid 19 second wave hin India a growth forecast kibolna chu asuhboi thei ahi, hinla GDP chu digit 2 a 2021 kum sunga um ding ahi tin aseiyin ahi.

Official estimate bol dungjuiya India economy hin 2020-21 fiscal sungah 8 per cent tobang alhing jouvin ahi, hichu March 31,2021 leh kichai ding ahi. S&P in aseina ah India in tuahi production lama hatah a GDP 10 per cent chan tongkha a um ahi tin aseiyin ahi.

India a Covid 19 natna second wave hi tijat umtah dinmun alhungtan ahi. Hichea hin hinkho tamtah akichai in chuleh humanitarian concern jong aume tin S&P global rating agency chun aseiyin ahi. S&P in aseibena ah India a Covid 19 natna case hatah a akibe nahi gamsunga health infrastructure ho chunga pressure hatah a apehbe ahi ati. Government in fiscal leh adang dang agontoh hochu economic growth phatah a aum theina ding a poimo ahi. Hichea hin aphat leh scale of post recovery jong atohkhah ding ahi tin S&P in aseiyin ahi. S&P hin tu dinmun a India a rating BBB anei ahi in amahon asodoh dungjuiya India GDP chu 11 per cent a umthei dinga anaphon doh ahi. Chuleh tua a case um dungjuiya lockdown leh economic ngaidan ho hin corporate sector hoa revenue leh sumhol theina ho akha ding ahi. Chuleh Bank hojong tuchan hin systematic risk sangtah anei uvin ahi.

S&P in aseibena ah Asia Pacific region sunga India a kona kimudoh Covid 19 variant chu alhom lang ahina laiye. Mun phabep ah Vaccine hochu virus ho mutations aumjeh in akan na tapon ahi ati.

Xxxxxxxx

DRDO in lha 3 sunga Medical Oxygen Plant 500 semdoh ding: Defence Minister

New Delhi,, Apr 28: Defence Research and Development Organisation (DRDO) in ahung lhung ding lha 3 sunga PM Cares Fund noiya Medical Oxygen Plants 500 atundoh ding ahi tin Defence Minister Rajnath Singh in Wednesday nichun aseiyin ahi.

Medical Oxygen Plants (MOP) technology chu DRDO in light combat aircraft (LCA) ho semdoh na dinga aman hochu Tejas in oxygen supply lhahsam toh kilhon a aman ding ahi tin Minister chun twitter ah atahlang in ahi.

India a Covid 19 natna case thah akibe jingtoh kilhon a hospital holeh state phabep hoa medical oxygen leh lupna ho hatah in alhasam in ahi. DRDO in thuso aneina ah MOP technology kichon na chu Bengaluru a um Tata Advanced system limited leh Coimbatore a um Trident Pneumatic ahi, hiche company teni akona plants 380 kisemdoh ding ahi. Chuleh plants 120 minute 1 sunga litres 500 semdoh na thei jong Industry of Petroleum,  Dehradun akona kisem ding ahi ati. DRDO in MOP hi minute 1 sunga litres 1000 semdoh thei dinga kisem ahi atin ahi. Hiche system noiyah patients 190 tobang flow rate of 5 litres per minute chuleh ni khat sunga cylinder 195 charge aboljou ahi tin aseiyin ahi. India in ni khat sunga Covid 19 natna case thah 3,60,960 ana mudoh be kit tan ahi, hiche toh kilhon a India a Covid 19 natna case umjat chu agoma 1,79,97,267 alhingtan chuleh hichea hin thina toh jong athahbeh a 3,293 aum toh kilhon in lakh 2 avaltan ahi tin Union Health Ministry data kimu chun Wednesday nichun aseiyin ahi. PM Cares Fund noiya Medical Oxygen Plants 500 tobang lha 3 sunga kisemdoh ding ahi in chuleh hichea DRDO in MOP technology aman na chungah kipathu aseiyin ahi.