27th April, 2021 News

27th April, 2021 News

51
0
SHARE

Haomee in IMTSU nelkalna nei, Koubru Reserve Forest Area a phondohsa ahin, avel a kho holeh KNF Camp Govt in alahdohsah ding’a ngehna nei

Imphal, Apr. 26(ET): Federation of Hoamee kiti Manipuri gammi ho kiloikhomna in Union Home Minister of India Amit Shah heng’a Memorandum pehlutna ana nei uvin, hiche Ministry mama henga Federation of Haomee ho danpo a koi dinga ngehna ana nei Indigenous Manipur Tribal Student Union (IMTSU) ho holdoh na nei dingin ngehna ana nei uvin ahi.

Manipur Press Club a thuso miho henga HAOMEE President Yumnamcha Jadumani in aseina a chun Kuki nam mi bouseh panna a kisemdoh Indigenous Manipur Tribal Student Union hi Delhi a pansa dan in akiseiyin, Address dihtah ape pouvin ahi ati. Achesa April 20, 2021 nikho a Union Home Minister henga lekha ana kipelut a soi anakai mi thum hochu Kuki jatmi bou ahiuvin, gamsunga cheng namdang ho khatcha ajaopoi tinjong Jadumani in aseiyin ahi.

Tule tua Koubru mol chungthu a hin Federation of Haomee in molvum a Temple ahilou leh thil dang dang tundoh a sahdoh ding toh kisaiyin lunglutna imacha akineipon, hinla Thangjing ahilou leh Koubru lhanga Manipur gamsung mite toh kisamkaina nei Historical Site ho jouse venbit ding hi akidei leh akiphut jing khat ahi tin aseiyin ahi. Federation of Haomee in hiche mun hohi Heritage Site a phondoh dinga phutna ana kinei jing ahi tin aseiyin ahi.

Hiche chungthu a boina leh kihetkhelna jong asang cheh cheh in, Koubru mol hi Reserved Forest Area a phondohsa ahitoh kilhon a avel a cheng ho State Government in akichaodoh sah ding ahi tin aseiyin chuleh Koubru leh Kangpokpi lhang’a khothah kisem ho leh thingnoimi kiloikhomna KNF Camp hojong alahdoh sah diuvin Government heng’a ngehna aneiyin ahi.

Government in jong Koubru Reserved Forest Area a kho umho lah a dan toh kitoh louva meithal kipe jing ho kholchilna anei uva, khosung miho khut a dan toh kitohlouva meithal um jouse jong achomngim diu ahi tinjong Jadumani in aseiyin ahi.

Chuleh akisaipi mopohna nei hon Koubru lhanga Kaani lei kibol jeh a gam kivatchai ho avetsui diu ahi tinjong atahlang in, State sung mi dihtah jong hilou gampammi kiloikhomna hon Koubru lhanga thu aneithei diu ham? Koubru mol hi State sunga agammi dihtah hon chondan toh kisamkaina kinei ahi in, ipi dinga 18/19th Century laiya hung lut panbep gampam mi ho thuneina noiya umthei ding ham tinjong Jadumani in dohna aneiyin ahi.

Chukit leh Home Minister henga HAOMEE ho danpo a phondoh dinga lekha ana pehlut utoh kilhon in Federation hon Home Minister henga Memorandum apehlut nauva chun Federation of Haomee (FoH)  hi Civil Society khat ahina ban’a Yelhoumees kiti agamnei dihtah Meetei leh Naga hon Constitution dungjuiya agamnei dihtah ho thaneina ho venbitna dinga kiphutdoh ahi ati. Chukit leh, kiloikhomna lhem Indigenous Manipur Tribal Union hon ngohna anei uhi adihlou chuleh ngohna lhem ahi in, Federation of Haomee ho suhminset na ding leh Haomee hon chamna dinga na kitong ho suhboina dinga kibol ahi tinjong aseiyin ahi.

Yazing Vicisy, Secretary General, Haomee Federation in Union Home Minister henga kipelut Memorandum a chun soi kaina aneiyin ahi.

Xxxxxxxxxxx

School ho May 1 apat Summer Vacation lha hiding

Imphal, Apr. 26(ET): Manipur Government in tuni chun BOSEM leh COHSEM noiya um School jouse a ding in Summer Vacation chu May 1 apat May 31 a ding in ana phongdoh un ahi. Hiche Summer Vacation matah a kilha na hi adeh a State sunga COVID-19 Second Wave ahung lhun toh kilhon a natna punbe jing jeh a thulhuhna hung kisemdoh ahi.

Commissioner (Education Schools), Government of Manipur, T Ranjit Singh in tunia thupeh asodohna a chun Board of Secondary Education, Manipur (BOSEM) leh Council of Higher Secondary Education, Manipur (COHSEM) hetpehna noiya um Government Aided School holeh Private School jousen Vacation kineisunga Staff (Teaching leh non teaching) 4 le 5 kilhahtho a themjilna mun ho a akoi uva aloutheilouva tohding khoh ho tong dinga akoi diuvin jong thusodoh a chun aseiyin ahi.

Chuleh themjilna mun hoa mopohna neihon jong Summer Vacation ahung kichai a themjilna mun ho ahung kihon tengleh Online Class ho phatah a chelhahpi pai ahithei nadia kigotna hoitah anei diuvin jong Commission in thupeh aneiyin ahi.

xxxxxxxxx

Tukum a atamna pen ding’a Manipur a COVID-19 toh kisaiya mi-5 thi, Case thah 146 kimube

Imphal, Apr. 26(ET): Manipur sunga COVID-19 natna jeh a tuni mi 5 in thina ana tuobe kit toh kilhon in tukum sunga dinga nikhat sunga COVID-19 jeh a thina toh tampen ahi tan ahi. Hitoh kilhon chun tuni chan a COVID-19 jeh a thina toh 390 alhingtan ahi tin State Health Department akon thulhut nunung pen chun atahlangin ahi.

Tuni a COVID-19 jeh a thina toh ho ahileh Imphal East akon pasal kum 57 leh pasal kum 75 ahi in, Imphal West akon kum 53 pasal khat, Churachandpur akon pasal 35 khat leh Thoubal akon numei kum 53 khat ahi tin COVID-19 Common Control Room akon thusodoh chun atahlangin ahi.

State sunga anivei na a natna ahung kitol jing toh kilhon in COVID-19 natna nei apunbe jing toh kilhon in tuni natna ana kimudoh jong nidang sanga tampen ana hikit in, Central Armed Police Force (CAPF) 5 jaona in natna nei agomin mi 146 ana kimudoh kit in ahi tin jong thusodoh chun atahlangin ahi.

Sunday nikho chun Manipur sungah natna nei 140 chu tukum sunga nikhat sunga kimudoh lah a tampen ana hitan, hinla tuni chun 146 in akhokhel kit tan ahi.

Tuni COVID-19 natna kimudohbe toh kilhon in tuni geiya natna kimudoh agomin Active Cases 910 leh damdohna nei 29,267 jaona in 30,567 alhingtan ahi tinjong thusodoh chun aseiyin ahi.

Milham lah a kon a natna kimudoh ho lah achun Imphal West akon mi 70, aban in Imphal East akon 42 leh Ukhrul akon mi 11 ahiuvin ahi. Adang ho hi ahileh 5 hi Kakching, Kangpokpi, Thoubal leh Bishnupur akon mi 4 cheh leh Chandel akon mi 1 ahi. Hitoh kilhon in kivendoh na dinga Containment leh Contact Tracing hojong akibol pai pai in ahi tinjong Dr Kh Sasheekumar Mangang, Aditional Director leh Spokesperson, Manipur Health Department in thusodoh achun aseiyin ahi.

Alangkhat ah Manipur hinjon a vanleng mangcha a April 19, 2021 nikho a Indigo Flight 6E-2251 touna jon 21-27 a toukha holeh April 21 nikho a Air India flight AI-3713 touna jon 12-18 sunga tou, April 24 nikho a Indigo flight 6E-2615 touna jon 22-28, 6E-2251 touna jon 13-19 leh Air India flight AI-3713 touna jon 1-4 leh 9-22 a toukha jousen Common Covid Control Room No. 18003453818 ahilou leh ama ama District Surveillance Officers (DSO) cheh akinthei pen a akimupi diuvin jong hetsahna aneiyin ahi.

Chukit leh tuni chan in Manipur sung’ah COVID-19 Vaccine kikapdoh agomin 1,20979 alhingtai tinjong aseibei.

Koi hileh kum 45 chunglang jousen Vaccination Centre a kilhengdoh RIMS, JNIMS, District Hospital ho, CHC ho, PHC holeh lhendoh a um Private Hospital hoa Vaccine akikap cheh diuvin jong thumopna aneiyin ahi.

Xxxxxxxxxxx

CM in JNIMS leh RIMS a Oxygen kisemna mun ho vetlhahna nei, Bal Bhawan a Covid Care Centre vilna nei

Imphal, Apr. 26(ET): Chief Minister N. Biren Singh in tuni chun Jawaharlal Nehru Institute of Medical Sciences (JNIMS), Porompat a Medical Oxygen kisemna ana kitungdoh vetlhahna ana neiyin ahi. Hiche Oxygen semna hi tulha nisim 28 apat kimangcha pan ding ahitai.

Chief Minister chu Advisor to Chief Minister (Health), Dr. Sapam Ranjan, Additional Chief Secretary M.H. Khan, Principal Secretary V. Vumlunmang leh Health Department, Government of Manipur a Official hon ana kilhonpiuvin ahi.

JNIMS a Official hotoh kihoulim khomna aneina a chun N. Biren Singh in Official ho heng’ah Institute huongsunga thenna hatah a achepi diu chuleh Institute sunga dinga Sweeper kikoi hon atoh diu phatah a akomupeh jing diuvin jong hetsahna aneiyin ahi.

Chief Ministerial Team hon JNIMS akon in Bal Bhawan, Khuman Lampak a COVID Care Centre lam ana jon uvin hiche Centre a kigotna ijakai lahkhomna jong aneiyun ahi.

Hiche Centre a hi COVID-19 natna nei numei ho jen thei nading lupna 250 akikoiyin ahi. Chief Minister in Health Department Official ho hengah hiche Centre a tong ding Medical Staff ho Record phatah a aboldiuvin jong hetsahna aneiyin ahi.

Hiche jou chun N. Biren Singh in Regional Institute of Medical Sciences, Imphal vilna leh Oxygen semna kitungdoh ho vetlhahna jong ana neiyin ahi. Vilna anei sunga ahoulimna a chun, COVID-19 natna apunbe jing vang in State sunga mipi hon natna dinmun ho agelkhoh pouvin Government in asodoh Standard Operating Procedures (SOPs) ho jengjong phatah a jui ding agelpha pouvin ahi. Hiche Second Wave hi tijat umcheh ahi in mipi hon phatah a SOP holeh COVID Appropriate Behaviour ho juicheh angaiyin ahi tinjong temna aneiyin ahi.

Aman aseibe na a chun Khuman Lampak a um Boys Hostel a jong Bal Bhawan a numei ho a ding kisemdoh banga pasal ho vetkolna ding COVID Care Centre manchah thei a kisemdoh ding ahi ati.

Natna doudal theina ding leh hinkho tamtah huhdohna thei dingin kivenna apoimo pen in, mipi honjong kinkhoh leh alou theilou ho tilouva moh potdoh lou ding leh ahithei chan a kititkhom na ho a kikangse dinging jong mipi ho temna aneiyin ahi.

Xxxxxxxxxx

Mizoram a achesa kum 2 sunga meikah 450 ana um

Aizawl, Apr. 26: Mizoram sung mun chom chom’ah achesa 2019 apat chun meikah 450 tobang het in ana um in, mihem hinkho 7 tobang in thina ana tuoh in chuleh mi 11 tobang ana kisukha in ahi tin State Home Department a Fire and Emergency Service hon ana jihlut uvin ahi.

Hiche jihlutna kinei dungjui chun January, 2019 apat March, 2021 sung chun mun chom chom’ah meikah 459 tobang het in ana um in ahi.

Hiche ho lah a 113 hi chenna inn meikah ahi in, adang 346 hi gam meikah ahi.

Meikah jeh in nei le gou Dangka 26.43 Crore man ana kalha in, chuleh nei le gou Dangka 26.77 Crore val man huhdoh in ana um in ahi.

Tukum April 15 a kum 54 pasal khat ana kahlih toh kilhon in, 2019 kum a pat meikah jeh a thina toh mi 7 alhing in ahi tinjong aseiyin ahi. 2019 kum chun gam meikah 82 panna un meikah 128 ana um in, 2020 kum chun gam meikah 131 pumin meikah mong mong 168 tobang ana um in ahi.

Tukum sung March lha gei chun State sung mun chom chom ah gam meika 133 pum in meikah 163 tobang ana um kit in ahi.

Meikah jeh in 2019 kum chun mi 3 in thina ana tuoh in, tukum April 15 gei chun mi 4 in thina ana tuoh kit un ahi. 2012 apat tuni geiya meikah jeh a thina tuoh agomin mi 30 aval in ahi.

Fire and Emergency Services Director C. Lalthanmawia in aseina a chun kumlui sangin tukum sunga gam meikah hohi anasajo’n ahi tin aseiyin ahi.

Chukit leh achesa 2020 January leh March kikah lha 3 sung chun gam meikah 50 tobang ana um in, tukum January apat March kikah sung chun gam meikah 133 tobang ana um in ahi.

Mizoram a gam meikah hung kipatna hi adeh a thinglhang lou kilhona dinga mang kichomkhom ho kihal na akon a hung sohdoh hipen ding in tin aginmona thu aseiyin ahi.

Tu le tu hin State sungah meiphel gari ngahmun 14 aum in, Government in meiphel gari ngahmun athahbeh a kisemdoh Hnahthial, Saitual leh Khawzawl District hoa jong koi ding in tohgon aneiyun ahi.

Alangkhat ah, Mizoram sung mun chom chom’ah tu le tuhin gam meikah in atom chahkheh tan ahi. Official akon thulhut kimu dungjuiyin District 5 – State lhanglam a um Lunglei, Lawngtlai,  Hnahthial leh Siaha chuleh Mizoram lailunga um Serchhip District ah gam meikah um ahidan thulhut akimu’n ahi. Hiche jeh hin State Government in Indian Air Force (AIF) heng’ah gam meikah phelmit na ding in kithopina ana ngeh uvin ahi.

Vangsetna tuoh leh nei le gou suhmanga um vang tuchan a um nailou ahidan thulhut chun aseiyin ahi.

Lunglei District a Additional Deputy Commissioner M. Misael in aseina a chun, Saturday ni jingkah chun Lunglei khopi pam  Saisih kimvel lah a meikah hung kipat akon in khopi hopsunga um kho 8 tobang ah gam meikah ahung chaal in ahi.

Gammang lah mun phabep a meikah ahat nahlai vangin chenna mun leh khosung ho vang venbit theiyin aum tan ahi.

Tuni a Official akon thusodoh a chun Lunglei sunga IAF hon Helicopter mangcha a pan alahjing jeh uvin tuni chun meikah 90 Percent tobang chu chenmit ahitai. Member 8 panna IAF Team hon jan a kicholdo uva jing nikho leh meikah phelmit nadia angaikhoh leh pan alahjom kit diu ahi tinjong aseiyin ahi.

State Additional Principal Chief Conservator of Forests Keyiekhrie Kire in aseina a chun Saturday nia oat chun Lunglei District sungah gampheng aletdan 427.88 Hectare tobang gam meikah in ana kalha in ahi.

Fire and Emergency Official in aseina a chun Sunday ni chun Lawngtlai District sunga Bungtlang South kho a chenna inn 12 tobang chu gam meikah a kon in ana kalha in ahi.

Champhai District Deputy Commissioner Maria CT Zuali injong Champhai District sunga mun 7 tobang ah gam meikah ana um in, amasa pen chu April 21 nichu ahi. Hinla, tun meikah chenmit leh vetkol theiyin aum tai tinjong aseiyin ahi.

Mizoram chief minister Zoramthanga in State sung mun chom chom a gam meikah ho phelmitna dinga Centre in gelkhohna nei tah a IAF ho Helicopter ahin manchahna chung’ah kipathu ana phongdoh in ahi.

Prime Minister Narendra Modi in jong Chief Minister kihoupina ana neiyin, thingna louna sumang thei gam meikah ho phelmitna dinga ahithei chan a kithopina leh tosotna aneijing ahidan ana phongdoh in ahi.

xxxxxxxxxx

Karnataka a jing nikho a pat ni 14 sung Lockdown um ding, kum 18-45 ho Vaccine manbei hiding

Bengaluru, Apr. 26: Karnataka Chief Minister BS Yediyurappa in tuni chun State Government in chanvou chang thei ding kum 18-45 ho a dinga Vaccine manbei hiding ahi tin ana phongdoh in ahi. Karnataka a COVID-19 natna apunbe jingtoh kilhon a nidan 3 sung Cabinet toukhomna kinei toh kilhon in Government in jing nikho jankim apat nikho 14 sung State pumpi a Lockdown koi ding in thulhuhna ana neiyun ahi. Nitin kimanchahna joh Dukan hon jingkah nidan 6 apat 10 gei ahon thei diu ahi tin Chief Minister in aseiyin ahi.

“Covid-19 Vaccine jong gamsung mi kum 18-44 ho dinga Karnataka sunga Government Vaccination Centre jouse a manbei a kikap ding ahi. Union Government gonna noiya kum 45 apat chunglamse ho dinga Vaccination Drive jong kichejompi jing ding ahi. Koi tobang Vaccine kikap thei jousen April 28 apat min kikhum cheh hen” tin CM Yediyurappa in Tweeter mangcha in ana tahlangin ahi.

Karnataka hi gamsung pumpi a India gammi ho dinga manbeiya Vaccine kap dinga phongdoh lah a akihe vaigei pen ahiuvin ahi. Amaho masang in tuni chun Delhi in kum 18 apat chunglamse manbeiya Vaccine kap ding in ana phongdoh un ahi. Uttar Pradesh, Haryana, West Bengal, Assam, leh Tamil Nadu in jong manbeiya Vaccine kap ding in ana phongdoh uvin ahi.

A thumvei channa COVID-19 Vaccination Drive hi May 1 apat gamsungmi kum 18 chunglam ho dinga kipan ding ahi. Hiche thulhuhna hi Central Government in gamsung pumpi a natna punbe jing diudalna dinga thulhuhna ahin nei ahi.

Tu le tuhi State tamtah a Oxygen lhahsam jeh leh lupna ding leh hinkho huhdohna ding damdoi lhahsam jeh in boina sangtah atoh tan ahi.

Xxxxxxxxxxx

Manipur Govt in thil man khan avetsui ngai ahi: MSF

Imphal, Apr. 26(ET): Covid Case khanjing le Lockdown um ding ginna ahung umjing toh lhon in gamsung a thil le lo man ahung khang jing in hiche chungchang a Government in vetsuina anei ding in Manipuri Students’ Federation in temna ana nei uvin ahi.

Hitobang boina thu neo neo ahung gintoh lhon a ajeh beihel in thil man ahung khang jing in, hitoh lhon in tahlal tamtah ding in hahsat na jat chom chom ahung umdoh ji in ahi akiti. Govt in PDA asuh hat jing a, thil man jouse asuh det uva phate a vetsui na anei ding u angaidan jong hetsah na ana nei uvin ahi. Hitabang tah a thil man khan nah o tongkha pen chu tahlal ho ahin, gamsung boina chung a boina lentah hung umdoh ding ahi tin jong ana sei uvin ahi.

Alangkhata kiloikhomna in Koubru a thingnou tunading tohon toh kisai a thingnou 100 lam ana tudoh ahidan jong aphongdoh uvin ahi.

Xxxxxxxxxx

MPCC in Fund suhchatvai in aum e tia ngohna nei, BJP makaina Govt in hilchetna ahin peh diuva sei

Imphal, Apr. 26: State sunga adeh a Panchayati Raj Institutions (PRIs) holeh Mahatma Gandhi National Rural Employment Guarantee Scheme (MGNREGS) a Job Card neiho dinga Fund hung ho chu State sunga BJP nakaina Government in suhchatvaina aneiye tin Manipur Pradesh Congress Committee hon tuni chun MNREGA Fund Dangka 485 Central Government in State henga ahin lhadoh nunga BJP makaina Government in tuni geiya alhadoh louna chunga hilchetna (White paper) ahin pohdoh diuvin phitna aneiyun ahi.

Tunia Congress Bhavan, Imphal a Press Conference kineina a Congress MLA & Spokesperson K. Meghachandra in aseina a chun Dangka 485 Crore Fund chu Ministry of Rural Development and Panchayati Raj Institutions in March 18, 2021 chun MNREGA Job Card nei ho thaman hoppeh ding in ana lhadoh tauvin, hinla hiche Fund ho hoilai gei hitam tin Government hengah dohna aneiyun ahi.

Congress hon Manipur BJP Government in donbutna ahin peh diuvin thudoh phabep jong ana neiyun ahi.

Central a kon a Manipur a MNREGA a dinga kithopina Dk. crore 485 hoilai a mathah hitam? Central government in Manipur Government ho MNREGA State Employment Guarantee Fund Account a 18th March, 2021 a Central Fund Dk. 485,50,75,000 ana lhadoh chu kon akilah ham? Tuni chan a Central akon a kithopina Dk. crore 485 chu thaman, thil-le-luo leh kivaihomna a manchah in aum naipon, ipi a dangka 485 Crore chu kimangcha ham? Hiche Fund hi Department dang dang leh Sceme dang dang dinga State Government in aheidoh ham? Hiche hi atah ahileh MNREGA a dinga Public Fund hung chu kimang khel tina ahi. Akisei Fund ho suh chatvai a aum hi Rule 236 (1) of General Financial Rule ho kipalkeh tina hilou ham? Hiche hi General Financial Rule ho kipalkeh ahi tah leh, ipi dinga Principal Secretary of Finance, Government of Manipur, Principal Secretary of Rural Development, Government of Manipur leh Accountant General, Government of Manipur chunga Action kila louva umthei ding ham? Manipur a BJP Government in hiche Official ho chunga gotna kilom apeh diu ahi. Fund ho chungchang ijakai ahet sohkeiyu ahi in jalen tah a umthei lou diu ahi. Chuleh Central Government in Manipur Government henga Fund ahin lhadoh jou ni 3 jouvin jong chanvou chang dingho ading in Fund akilhadoh deh pon, Fund kilhadoh lou hi dan toh kikal chuleh mipi ho dehna a kibol hilou ham? tin sei uvin ahi.

Gah hetthei khat chu Manipur State Panchayat Parishad hon State sung pumpi ah State Government in Fund alhadoh lou jeh in kiphinna chom chom leh Bandh jong ababol uvin ahi. Kakching, Jiribam, Bishnupur, Thoubal, Imphal East leh Imphal West akon a kilhengdoh Member hon Saturday nikho chun National Panchayat Day  chu Black Day tin ana nit uvin ahi.

XXXXXXXXXXX

IBSD in akiphudoh kal kum 20 lhinna, 20th foundation day anamang

Imphal, April 26: Institute of Bioresources and Sustainable Development (IBSD), Imphal in akiphudoh kal kum 20 lhinna, 20th foundation day kingon chu online video conference mangcha tuni chun ana mang uvin ahi. IBSD hi Department of Biotechnology, Govt. of India noiya April 26, 2001 nikho a chu autonomous institute khat’a ana kiphutdoh ahi.

bioresource lampang khantouna dingleh biotechnology jal’a socio-economic lampanga North East gamkai khantouna ding tohgon noiya ISBD hi ana kiphutdoh ahitoh lhonin ISBD tup pipen chun Indo-Burma Biodiversity Hotspot hopsung India gamkai hoa Bioresource ho hetgilna/Science toh kisaiya gontoh dinghy ahi.

Kingon achun Prof. Pulok Kumar Mukherjee, Director IBSD  lamkaina in “Managing Bioresources of NER for Atmanirbhar Bharat” kiti thupi toh kisaiyin national seminar jong ana umin ahi. Chuleh India gamsung munchom choma kon thupi sei (speaker) tamtah in pan anala uvin ahi.

Hiche virtual kingon achun Dr. R.K. Ranjan, Member of Parliament (Lok Sabha), Leishemba Sanajaoba, Member of Parliament (Rajya Sabha). Dr. Manju Sharma, former Secretary of Department of Biotechnology, C.P. Goyal, Joint Secretary, Department of Biotechnology, Dr. Govindarajan Padmanaban, former Director of Indian Institute of Sciences, chuleh adang tamtah injong pan anala uvin ahi.

Prof. Pulok Kumar Mukherjee in ahoulimna achun, IBSD in Phytopharmaceutical Mission, Ethnobotany, Ethnopharmacology  and Drug Discovery, Microbial Resources, Fermented Food and Value Addition, Plant Resources, Animal Resources, Eco-Restoration, quality management and surveillance of water, chuleh adang dangho toh kisaiyin kholgilna (research) leh khantouna ding natoh ana chelhah pi jing ahi, tin ana seiyin ahi.

Hicheng bana, IBSD in COVID-19 pandemic doudalna leh outreach program dang dang phabep jong ana bol jingin, DBT-IBSD in North east gamkaiya Covid-19 test kibolna facility ho aphatchan ana kijahmatpi jingin, chuleh IBSD mi injong JNIMS, Imphal toh kithokhom in COVID-19 test kibolna facility jong ana tungdoh in ahi, tin aseibe in ahi.

Member of Parliament (Lok Sabha) leh IBSD Society member jong hi, Dr. R.K. Ranjan in ISBD in technology jatchombeh apohdoh uva, Manipur leh agamkai sunga economy lampang suhhatna ding hi entrepreneur ho khut’a apehdoh dingin, adeisahna thu ana seiyin, Prof. Pulok Kumar Mukherjee vetsuina noiya ISBD- phytopharmaceutical mission natoh ho chunga jong pachatna anapen’ ahi. Achesa kum 20 masanga IBSD hung kiphudoh danchungchang injong houlimna ana neiyin ahi.

Leishemba Sanajaoba, MP (Rajya Sabha) injong ahoulimna achun IBSD in local community hotoh pan alahkhoma, bio resource management lampanga gamsung hihen vannoiya hijongleh institution chom chomtoh na-atohkhomna phatchom ngei nadinga asemhoi ding adeisahna thu ana seiyin ahi. Chuleh ISBD in outreach program holeh research activity anabol uho chunga pachatna thu jong ana seiyin ahi.

Dr. Manju Sharma, former Secretary, DBT in ahoulimna achun achesa kum 20 masanga ISBD ana phudoh dan thusim ana seiyin ahi. Hetthei khat chu ISBD hi Dr. Manju Sharma in Secretary of Department of Technology panmun anatuh laitah a ana kiphutdoh ahi. Chuleh Prof. Pulok Kumar Mukherjee lamkaina noiya ISBD natoh ho chunga pachatna thu ana seiyin ahi.

Kingon achun Shekhar Dutt, former Secretary, AYUSH, Govt. of India, Dr. Bhusan Patwardhan, National Research Professor, Ministry of AYUSH, Govt. of India, Prof. N. Rajmuhon Singh, Vice-Chancellor, Dhanamanjuri University, Imphal, Dr. Ajay Parida, Director, Institute of Life Sciences, Bhubaneswar, Dr. Anamika Gambhir, Scientist-F, Department of Biotechnology, Govt. of India, Dr. Manoj K. Modi, Scientist-E, Department of Biotechnology, Govt. of India; Chicago, USA akon Dr. Geofry Cordel, Italy akon Dr. Dominicod Elfino leh Marco Leonti chuleh adang phabep panna in DBT  official hetthei tah tah phabep in pan anala uvin ahi.

April 26, 2001 nikho a IBSD ana kiphudoh apat tuchung hi foundation day kiman na amasapen ahi. Kingon achun IBSD, Imphal chuleh Sikkim, Aizawl chuleh Shillong a um USBD regional Centre/research node akon staff holeh simlai hon jong pan anala uvin ahi.

xxxxxxxxxxx

PREPAK in Indian Colonialism Resist Day anamang

Imphal, April 26: CRPF sepaiho khutnoiya nunao chapang panna a milham ho suhset leh gambol a ana umnau Patsoi-Langjing Khunou 1980 thilsoh geldoh jingna in People’s Revolutionary Party of Kangleipak (PREPAK) leh a army wing Red Army hon tuni chun Indian Colonialism Resist Day 2021 anamang uvin ahi.

Leibaak Ngakpa Luwang, Secretary –in-charge , Publicity and Propaganda, PREPAK, thuso bolchun “militarization” leh “Colonisation” toh kisaiya thil kibol na’kitong ho jeh in state sunga mipi hohi mangthah ding koncha in aumtan ahi. Gamsunga jat le nam chom chom ho kikah a kitommona leh boina umjing hohi colonial regime ho tohgon leh tohga ahi. Community chom chom ho kikah’a kitomona thei natoh achelha jing nalaiyin, gamsunga civil war umsah ding atup u ahi, tin ana seiyin ahi.

Democracy chung changin, PREPAK thuso bol chun, India hi kiletsah tah vannoiya democratic country lenpen’a akiphondoh vangin agam mipi hon democracy dihtah amu hihlai uve. Mihaosa holeh thu/tha neihon gamsung vai ahom uvin, mipin vai ahop ahipoi. Hiche hi Kangleipak miho jong kihilna a kinei ahi, tin aseiyin ahi.

Xxxxxxx

India gama Covid-19 toh kisaiya thina toh journalist mi 107 lhingta

Guwahati, April 26: India gam sunga journalist 3 tobangin niseh’a Covid-19 natna toh kisaiya thina atojing toh lhona Indian media insung mite dinga kiginthem phat ahitai. India gam sunga journalist mi 107 in Covid natna toh kisaiya thina anato tah toh lhonin, vannoiya covid natna toh kisaiya journalist ho tamthi penna gam ho Switzerland a um media rights & safety body Press Emblem Campaign in agon List achun India hi Brazil (181) leh Peru (140) bantah in a-3 channa in apangtan ahi.

Vannoi pumpia gam 76 ho’a kon March 2020 sunga Covid-19 natna ahung kipat apat tuni chana Covid natna toh kisaiya journalist thina tohjat hi agomin 1184 alhingtan ahi. Hiche gamho lah’a akhoh dehset chu Mexico (106), Italy (52), Bangladesh (51), Colombia (49), USA (47), Ecuador (46), United Kingdom (28), Dominican Republic (27), Pakistan (25), Turkey (24), Iran leh Russia (21 cheh), Argentina leh Venezuela (17 cheh), Panama (16), Spain (15), Ukraine (14), chuleh adang dangho ahiuve.

PEC general secretary Blaise Lempen in pandemic jeh’a journalist ho dinmun akhoh cheh cheh ding thu anasei toh lhonin, Covid natna jeh’a thina toh journalist ho insung mite a dinga akham chebep’a compensation limlom tah’a bolding adeisahna ana seiyin ahi. Chuleh media lampanga natong ho vaccine akima kapdiu apoimo dan jong ana seiyin ahi.

Niseh’a Covid-19 case thah million 3 val akimudohbe jing toh lhona tuni chana vannoiya Covid-19 case kimudoh jat 17.3 million val, chuleh Covid natna jeh a thina tohjat mi 1,95,000 val ahitai.

Gamsung mi 21, 443,345 lam hop dinga corona-vaccination program nasatah a ana chelhah nungin jong India gama journalist phabep: Amjad Badshah (Odisha), Tanmoy Chakraborty (Tripura), Vivek Bendre, Sachin Shinde, Jairam Sawant, Sukhnandan Gavai (Maharashtra), Ram Prakash Gupta (Bihar), Rohitash Gupta (Uttar Pradesh), Ramjan Ali (Andhra Pradesh), chuleh adang phabep in Covid natna toh kisaiyin thina anatoh uvin ahi.

India gamsunga media corona-victim jat hi tua kisei sanga atamjoh ding ginchat ahi, ajeh chu media house tamtah in ajat chet alhutji pouvin ahi, tin India a dinga PEC representative Nava Thakuria in aseiyin ahi.

Xxxxxxxxx

Assam a ONGC staff ho kipuimang na a pan anala Police constable khat kiman

Guwahati, Apr. 26: kaal’ masa a Oil and Natural Gas Corporation (ONGC) a notong mi-3 ho kipuimang toh kisaiya pan anala Assam Police constable khat tuni chun mat in ana umin ahi.

Achesa Wednesday nikho’a Sivasagar district a um Lakwa tea estate sunga ONGC in thao koina ding lei avuna muna kon natong mi-3 ana puimang mi-5 ho lah’a 25th Assam Police battalion posting lha Basanta Buragohain kitipa hi khat ahi, tihi kholchilna akon hetdoh a ahung umtoh lhonin Basanta Buragohain chu tuni chun Police hon anaman tauvin ahi.

DGP Bhaskar Jyoti Mahanta akon thulhut kimu dungjuiyin Buragohain tilouvin dan pama um United Liberation Front of Asom-Independent (ULFA-I) hotoh mi puimang na a pan la adang mi-2 jong mat in aumtan ahi.

ONGC natong kipuimang mi-3 ho lah’a mi-2, Mohini Mohan Gogoi leh Alakesh Saikia chu Saturday nichun Mon district, Nagaland – Indo-Myanmar border kom akon security force ho nana huhdoh tauvin ahi. Tua kihuhdoh loulai, ONGC natong akipuimang mi-3 ho lah’a a-3 channa Ritul Saikia holna in search operation achelha jing nalaiyin ahi.

DGP Mahanta in asei danin mat’a um mi-2 teni, Biraj Chetia leh Rahul Mohan hi ULFA-I ho mi puimangna dinga garineo (Motorcycle) cho a, mi kipuimang na thilsona muna galhut a pang lhon ahi.

Kholchilna akon mudoh dungjuiyin police personnel khatbou panlahna hetdoh ahi nalaiyin, ahin koi hijongleh hiche case toh kisaiya panlahna nei kimandoh jouse dan dungjuiya khoutah a achung action kilading ahi. Basanta Buragohain thudohna kinei jouteng thuchen jouse hungpot tante, tin DGP Mahanta in Twitter mangchan ana seiyin ahi.

xxxxxxxxxxx

Opposition ho vaihopna state 4 in Covid lou Stock aumtapoi, mijouse vaccine kapna ding tohgon May 1 nikho’a kipan joulou ding ahi, tia sei

New Delhi, Apr. 26: Kum 18 chunglam miho vaccine kapna ding nikho government in asuhsaobe masangin Opposition ho vaihopna state 4 in Covid lou Stock aumtapoi, tin mijouse vaccine kapna ding tohgon chu vaccine lhahsam jeh’a May 1 nikho teng vaccination drive pantheilou dingin Sunday nichun ana sei uvin ahi.

May 15 masanga vaccine supply kipe theilou ding ahi, tin Covishield lou sem, Serum Institute of India (SII) in aseiye, tin Rajasthan government in ana seiyin ahi. Rajasthan Health Minister Raghu Sharma in aseina achun, Serum Institute toh kijato dingin thu akimu in, ahin Serum Institute in central government akon order hung chu supply boltheina dinga May 15 chanbeh ngaiding ahi, tin asei uve. Hijeh’a chu amahon jong vaccine eihin peh theilou diu ahi, tin ana seiyin ahi.

State hon vaccine jangpet’a akilah ding kiti hi ipi process hitam? Hiche hi central government in aboipi ding dol ahi. Tun kum 18-45 kikah mi crore 3.13 tobang state sunga aumin, amaho hi iti vaccine kakap diuham tin thudoh asem in ahi.

Sharma in atohkhompi Chhattisgarh, Punjab, leh Jharkhand toh thuso abolnau achun central government in Serum Institute of India leh Bharat Biotech koma state ho’a dose hijat jat hi supply bol uvin, tia aseipeh dingdol ahi, tin ana seiyin ahi.

Chhattisgarh Health Minister TS Singh Deo leh Punjab Health Minister Balbir Singh Sidhu injong Sharma ngehna neichu apom cheh lhonin ahi. Assam in vaccine a order got achun lhakhat jouleh namu diu ahi, tin ahin seipeh uve, tia Deo in athujah asei danin thulhut akimun ahi.

The state ho’a minister hochun May 1 nikho a vaccination drive bol dinga kigosa ahi nung uva vaccine semhon vaccine supply abol theilou diuva asei danin asei uvin ahi..

Jharkhand Health Minister Banna Gupta in miho vaccine kakap nom uvin, ahin vaccine hi inn’a kakisem diu hita?, tin ana seiyin ahi.

Punjab CM Amarinder Singh injong kum 18-45 kikah miho kap dinga Health Department in Covishield dose lakh 30 a order dingin thupeh ana neiyin, ahin May 15 masanga vaccine aung lhun ding ginchat umlou ahi, tin thulut kimu chun aseiyin ahi.

Chubanin jong hiche state 4 hohin Covid-19 patient go jenna ding oxygen leh antiviral drug remdesivir supply kibolna chunga sihnei langnei nei danin central government chunga ngohna anei uvin ahi.

Xxxxxxxxxx

Mizoram a lockdown ni 7 kikoibe

Aizawl, Apr. 26: Mizoram Government in tu le tua state sung a lockdown daan ol jep a akoi uhi kal khat lam chesah be ding in phondoh na ahin nei kit uvin ahi.  Hiche lockdown kisuhsao be chu covid khan jing na suhtang na ding toh kisai  a kivol ahi. Lockdown hi ahunglhungding May nisim 3 channa chelha jingding,, daan them khat vang khel a umding ahi tin govt akon thuso kimu chun asei in ahi. Phat ipe sung ahi koima in state sung a potdoh na anei louding u, phal peh na kinei ho tilou in vale jong abol louding uva temna ana nei u ahi. Lockdown umjeng vang a Lengpui Airport le inter state gamgi ho kihong jing ding ahi akiti. State sung a kailhang ho alhangpi a kikhah jingding hinlah niseh a jah ding a lo mho kihcoh le joh naho vang kikhah louding ahi akiti. Tu maban ahi kailhang ho hung kihon be ding in akisei nalai in ahi. State sung a mi kiti na school, hou in, park ho le mun chom chom ho vang kikhah jing nalai ding ahi akiti.

xxxxxxxx

JFSA in Total Shutdown phong, CSO hon tosot cheh dinga ngehna nei

Imphal, Apr. 26: Justice for Sanaton Athokpam (JFSA) in Civil Society Organisation holeh Club hon MBBS simlai khat in ginmo kai tah a thina atona chunga thudih a thutanna phutna toh kisaiya nikhat sung April 26 nilhah lam nidan 6:00 apat April 27 nilhah lam nidan 6:00 sung JFSA in State sung pumpi a Total Shutdown akou tosot cheh ding in ngehna aneiyun ahi.

JFSA Convener Moirangthem Loyalakpa soikaina thusodoh chun aseina ah ginmo kai tah a MBBS simlai Sanaton thina toh kisaiyin  nikho 40 val achenung in jong State Government in Case jihlutna aneipon ahi. Sanaton in ginmo kai tah a thina anatuo natoh kisaiya Police hon akinthei pen a Case jihlutna leh RIMS Hostel a Warden thudohna nei ding leh RIMS Director leh Dean jong atohmun a kon a haisah ding in JFSA in phutna aneiyun ahi.

Chukit leh, State sung pumpi a Shutdown kibol sunga Health Service ho, Press/Media, Power Supply, Hou thu a kimanchahna, State Fire Service holeh Essential Service ho bou ki lhakang ding ahi tinjong atahlang in ahi.

xxxxxxxxx

Sabungkhong Khul a melhetlou Nepali 7 Electoral Roll a min chong

Imphal,  Apr. 26(UNA): Lamlai Assembly Constituency sunga Polling Station 8-25 Sabubgkhong Khul a Electoral Roll ah athahbeh in hiche mun a cheng hilou Nepali mi 7 min mudoh in aum in ahi.

Hiche Nepali mi 7 a min kimudoh ho ahileh Archarya Kumari, Sita Acharya, Deepak Acharya, Kumar Acharya, Rajesh Acharya, Ganga Bahadur Acharya leh Geeta Acharya ahiuve.

Press Club a thusomi ho Lamlai Mapari Thougal Lup (LMTL) a Secretary L. Bobbisana in aseina a chun, gampam mi Electoral Roll a a min muthei leh haplut a aum thei hi tijat umtah leh State sunga mijouse dinga gelkhoh lou thei ahipoi tin aseiyin ahi.

Bobbisana in aseina a chun State sunga gamsungmi ho venbitna dinga JCILPS manchah dinga akiboipi jing laitah a hitobang thilsoh ahung umdoh thei hi gelkhoh lou thei ahipon ahi. Hitobang thilsoh chung changa hi Politian honjong kigolna anei khattou ahi dem tinjong dohna aneiyin ahi.

LMTL in Lamlai khantou jing nadia pan kila jingding ahi in, mipi honjong LMTL ho tohgon leh panlahna ho tosot jing dingin jong temna aneiyin, chuleh Lamlai suhminset nading leh mipi suhkichatna koimachan aneilou dingin jong gihna aneiyin ahi.

Xxxxxxxxxxx

Class XI Final Exam kivochon

 Imphal, Apr. 26(ET): Council of Higher Secondary Education Manipur (COHSEM) in COVID-19 Second Wave jeh in Class XI Exam 2021 chu vohchonna anei tauvin ahi.

Hiche masang jep chun Board of Secondary Education Manipur (BOSEM) saina noiya Class IX leh X Exam ding jong Government thupeh dungjuiyin vohchon in ana um tan ahi.

Tuni COHSEM in hetsahna thusodoh aneina a chun hetsahna thah ahung umkit kahse a dibga hiche Exam hi vohchon ahitai tin aseiyin ahi.

xxxxxxxxx

Wangkhem AC MLA in lampi hondohna nei

Imphal, Apr. 26: Wangkhem Assembly Constituency MLA Keisham Meghachandra in tuni chun Wangkhem Assembly Constituency hopsung Charangpat Gram Panchayat, Kharibam Leirak a tuthah a kisemchai kho le kho jotmatna lampi mipite khut in pehdohna aneiyin ahi. Hiche lampi hi MGNREGA noiya kisem ahin, aphatna ding pen’a kibol ahi akiti.

MLA pan aseina a hiche lampi hi Charangpat gram panchayat a job card holder hon MGNREGA Line Department noiya Dk. lakh 15.83 lutna kisem ahi ati. Hiche lampi semna hi ningkum November a kijoutheng ahitan tuni geiyin government a kon’a hiche lampi semna ding’in sum le pai imacha akikaidoh hihlaiyin chuleh hijeh’a area a um job card holder hon ward member holeh MGNREGA noiya natong official hotoh kitho’a lampi anasem’u ahi. MLA Meghachandra in job card holder ho, ward member holeh MGNREGA official hon hitobang natoh ahinboldohna’u chung’in kipathu aseiyin chuleh apachatna thu jong aseijin ahi.

Xxxxxxxxxxx

Kiloikhomna 6 in Bandh tosot

Imphal, Apr. 26: Justice for Sanaton Athokpam in tuni nilhah lam nidan 6:00 a kipat nikho khat (24 hours) gamsung pumpi General Strike boldi ati katosot uve tin phaisung a um simlai kiloikhomna 6 in thuphon anei uvin ahi.

Tuni Kwakeithel AIMS office a thuso mihotoh kihoulimna khat a AIMS President Saikhom Premchand leh AMSU Vice-President Laishram Athouba Meetei tenin Sanaton thina chungchang’in government in tuni changei in thudih imacha aseidoh pon, thudih a kipang ahijeh’a hitobang kiphinna ho kitosot ahi tin aseilhon in ahi.

Athokpam Sanaton thina chungchang’a thudih akiphondoh loulaise’a General Strike kibol jouse AMSU, MSF, KSA, SUK, AIMS leh DESAM honjong atosot sohkei diu ahin, chuleh achung’a kisei kiloikhomna jousen jong tujan nidan 6:00 a kipat Justice for Sanaton Athokpam in gamsung pumpi General strike abol atosot diu ahi tin aseibei.

Xxxxxxxxx

Covid-19 jeh’a Ccpur district akon mi-3 mollem

B.Lalboi Gangte

CCpur.  April 26 (ET): Covid-19 Second Wave nitin a achal jingtoh lhon in CCpur district a jong ni-2 kijom in Covid-19 jeh in pasal ni in thina atoh in ahi.

Thina toh teni chu Imphal a vetkol aumlhon ahin,  April 24 nin Tangpua Daizapau (72) H/o Nemzathang of GS Road, Gouchinkhup Veng, New Lamka ana mollim in, ajan maman New Lamka Lhanmol a ana kivui tan ahi. Ajing (April 25) nilhah lam in Kapkhanthang (38) H/o Vungliankim, Nghathal ana mollem kit in ama jong ajan mama in New lamka lhanmol a ana kivui kit in ahi.

Tahsa natna jat chom chom jeh’a Delhi a Vungkhum Guite jong Covid-19 natna jeh in Delhi a ana mollem in tujingkah nidan 8:30 vel in achenna Central Lamka ana kipolut in Lamka Lhanmol a ana kivui kit in ahi.

Alangkhat’a CCpur District sung’a Covid-19 natna akon kiven nading’a Vaccine kikap na tuni (April 26) district sung munchom chom DIC/District Hospital, CHC Singngat, PHC Saikot, PHC Henglep, PHC Sinzawl, PHC Sagang, PHC Behiang, 25 AR Headquarter Veng, 31 AR Kangvai leh Samiritan Hospital a Covid-19 Vaccination  ana kikap in ahi.

Hiche Vaccination kikapna hi ahung lhung ding April 30 chan chelha ding ahin, kum 45 chunglang hon  Aadhaar Card kichoi’a  manbei a kikap sah thei ding ahi. Chule May 1 akon kum 18 chunglang jouse Vaccine kikapna kipan kit ding ahi.

Kum18 chunglang Vaccine  kapna ding’a Private hospital kimang ding ahin, Churachandpur district a Samaritan Hospital kimang ding ahi.

CCpur District a tuni nilhah lang nidan 5:30 chan in mi 21,080 Vaccine akikapdoh tan ahi.

Xxxxxxxxx

District Hospital Ccpur, a Isolation Ward kisem CMO in vetlhahna nei

B. Lalboi Gangte

CCpur.  April 26 (ET): District Hospital Churachandpur, Isolation Ward a manthei ding’a kisem ho tuni (April 26) Chief Medical Officer (CMO) Churachandpur in vetlhah na aneiyin window leh exhaust fan tona ding natoh kibolbe ding ahi ati.

CCpur District jong Covid-19 Second Wave in ahin phah toh kilhon’a Positive mudoh niseh in aum jing in, IDSP Churachandpur in tuni nilhah lang nidan 3:00 chan’a Covid-19 Status Report asodoh dungjui in Positive Case 6 kimudohbe in ahi. Amaho chu Kum 50 noilang mi ngen ahiuve akiti.

District Hospital a Isolation Ward ding’a kisemna a hi lupna 20 um theina dinga kibol ahin chuleh Covid-19 Care Centre ding jong kisemtoh ahi. Chuleh lupna 10 cheh umthei  na Intensive Critical Care Unit (ICCU) leh High Dependency Unit (HDU) jong kisem ahi.

Chief Medical Officer in vetlhahna aneijouva mun phabep semthah ding atina ho jing leh natoh kipan ding ahi.

Alangkhat’a tunin Dr. Vumchinpau Tonsing, Chief Medical Officer, Churachandpur, Dr. T. Vanlalkungi, Medical Superintendent, District Hospital leh Dr. Sania Monica, in-charge, District Medical Store hon Contractual staff ding’a kila thah ho kihoukhompina anei uvin ahi.

Contractual staffs ho hin Isolation Ward leh Covid-19 Care Centre ho’a duty anei diu ahi. Isolation Ward a Medical Officer Khat, Nurse 6 leh Multi Tasking Staff 6 chuleh Covid-19 Care Centre a Medical Officer 2, Nurse 6 leh Multi Tasking Staff 6 in duty abol diu ahi.

Xxxxxxxx

PSA Oxygen plan natoh chelha jing

B. Lalboi Gangte

CCpur.  April 26 (ET): Churachandpur District a ding Oxygen bolna PSA Oxygen Plan District Hospital a ana kipan chu natoh achelhah jing in ahi. Hiche Oxygen Plant hi Health Ministry akon bol ding leh December 31, 2020 a jotheng dinga tohgon um anahin, fund imacha peh  ahilou jeh’a  natoh kipan theilouva anaum chu tu’a Covid-19 Second Wave ahung machal jingtoh lhon a gangrtah a natoh kipan ahi.

Pressure Swing Adsorption (PSA) Oxygen Plan kibol hi Ministry akon hetsah na aum teng CCpur district a Public Works Department in mopohna alah ding ti anahi jongleh fund ana kimu lou jeh’a natoh ana ngah u ahi in, tu’a Medical College bolna ding toh kisai a mopo, Manipur Police Housing Corporation khut a mopohna um kit ahi.

Oxygen Plant jotheng ahiteng Hospital a oxygen cylinder poh leh umtalouva Ward tin’a Pipeline kito akon damlou Oxygen ngaicha ho peh hiding ahi tai.

Xxxxxxxx

Thoubal a Ju litre 15 anakiman

Thoubal, Apr. 26: SP Thoubal, S Ibomcha vaisaina noiyin, inspector K Santosh OC, Khongjom PS lamkaina leh SI Ak Joydutta Singh leh ASI Y Kirandro Singh kithopina in Khongjom police station akon team khat in Janni (Sunday) chun Lamding Cherapur area ah liquor drive anabol uvin ahi.

Thulhut kimu dungjuiyin, hiche drive achelhah sunga chun Lamding Cherapur Awang Leikai akon mi Heikham Pailot Singh, 58, s/o H Biramangol Singh kitipa inn akonin Distilled Indigenous Country (DIC) ju litre 15 ana mandoh uvin ahi.

Ahin, Heikham Pailot chu apet tah’a chu insunga ana umlou jeh in, Police team hochun vengsung pumpi ahol vang uvin ana mudoh pouvin ahi. Chuin, Police team hochun tuni (Monday) a hi OC, Khongjom PS maiya thonlou hella ahung tei teina dingin Pailot insung mite chu availhah uvin, adalha uvin ahi.

Tuni’a thulhut kimu dungjuiyin, Heikham Pailot chu OC, Khongjom PS anga ama le ama ahung kipelut in ahi. Chutoh lhonchun Heikham Pailot leh ju litre 15 hochu Excise Authority ho khut’a apedoh tauvin ahi.

 Xxxxxxxxxx

Assam Rifles hon dan toh kitohlouva kipo Dk. lakh 36 man ding thing kipo anaman

Kangpokpi, Apr. 26: Dan toh kitoh louva thing/bim kipoh thu’a thulhut aumtoh lhonin 44 Assam Rifles hon 22 Sect AR/ IGAR (E) vaisaina noiyin nikho chom chom nikho-2 sungin dan toh kitoh louva Gelnel akon Imphal lam jona bim hung kipo Truck 7 anaman uvin ahi.

44 batallion Assam Rifles hon achesa Thursday nikho apat chun hiche lhang sunga dan toh kitoh louva thing kipo hohi ana vetlhih jing ahitai. Truck ho ginmo umtah tah phat ho’a alhaile jing jeh’in Gelnel outpost a tou AR personnel hon guhtimin ana velhi jing uvin ahi

Chutoh lhonchun Thurday nichun Kangpokpi district hop sunga um Bunglabung ah dan toh kitoh louva thing/bim hinpo truck 4 ana mantang uvin ahi. Chutobang ma achun Sunday ni jong chun truck adang 3 ma ana man kit uvin ahi

Hiche mat’a um bim po truck holeh atol miho chu DFO, Chilpilhing, KPI district khut a ana pedoh uvin ahi.

xxxxxxxxxxxx

Australia in India a  Oxygen, Ventilator leh PPE ho kithopi na peding

New Delhi, Apr 26: India a Covid 19 natna case thah akibe jingtoh kilhon in Australia in Oxygen, ventilator leh personal protective equipment (PPE kits) ho athot ding ahi tin Health Minister Greg Hunt in Monday nichun aseiyin ahi.

India in tu dinmun hin Oxygen lhahsam na aneiyin gamsunga medical stock umhoa kona kithopi na apeh dingin Minister chun aseiyin ahi. Hinla Australia in vaccine vang apehlou ding ahi.

Hunt in aseibena ah hiche lampang ah Australia in boina anei loutoh kilhon a angaichat dungjuiya kipe ding ahi ati.

National Security Committee, Cabinet in jong Tuesday nikho leh India kithopi na ding thua kihouna anei ding ahi. Hichea hin Australia in India a kona flight jouse chu akhah tan ahi.

Hiche hin mipi asanga sim atohkhah dinga um ahi, adeh a tulai tah a Australia akon a Indian Premier League, cricket kichem hojong atohkhah ding ahi. Hiche kihouna ah chun foreign Affairs Minister Marise Payne, Australia ambassador to India Barry O’Farrell leh Health Department Official, Department of Foreign Affairs and Trade chuleh Department of Home Affairs hon seikhomna jong anei uvin ahi.

India in tu dinmun a Covid 19 natna second wave alhuntoh kilhon a niseh a case thah 3,00,000 tobang achesa nikho phabep sungah ana mudoh jing ahi. Hichea hin hospital leh state phabep hoa medical oxygen supply leh lupna ho jong hatah a lhasam ahi.

Monday nichun India a Covid 19 natna case chu 1,73,13,163 alhingtan chuleh hichea hin active case umjat chu lakh 28 aval tan chuleh nikho khat sunga mi 3,52,991 hojong test kibol na ah positive ahiu mudoh ahi, hiche hi asanna pen ahitai tin Health Ministry chun aseiyin ahi.

Hichea hin Covid 19 natna jeh a thina toh jong athahbeh a 2,812 aumbe toh kilhon in 1,95,123 alhingtan ahi.

Xxxxxxxxxxx

Covid 19 natna umlaiya Election rally kiphal thu’a Madras High Court in EC demna pe

New Delhi, Apr 26: Madras High Court in Monday nichun Election Commission chu institution umlah a amopohna donlou pen ahi tin hatah in demna apetan ahi. Madras High Court in aseina ah gamsunga Covid 19 natna case thah hatah a kibe jing laiya EC in Election rally umding aphal hi ima agelkhoh louvu avetsah ahi ati. Hiche toh kilhon a EC Official hochu murder charges bolkhum thei ahiuve ati.

Hichea hin first bench akon a Chief Justice Sanjib Banerjee leh Justice Senthilkumar Ramamoorthy in mipi deisah na dungjuiya writ petition jong ana pehlut lhon ahi. Chuleh hiche Election kibolna a May 2 leh Vote kisimna Karur a aumna dinga jong fair counting auma chuleh Covid 19 dan kisemho jong jui ahina dinga tohgon nei dingin temna jong ana nei in ahi. Karur constituency akona hi candidates 77 tobang hon kitetna aneiyu ahi, hinla hichea Vote kisimna aum tengleh agents hochu counting hall sunga aket loudiu a um ahi. Hiche toh kilhon a protocol ho vetlhah na jong boithei dingin petition pelut chun aseiyin ahi.

Hiche thutoh kisaiya EC counsel in apoimo thilho jouse gontup ahi tia aseina ah, Bench chun adonbut na ah political party ho jauna rallies leh meeting ho umding EC in aphal jeh a gamsunga Covid 19 natna second wave lampi asemdoh ahi tin lunghang tah in donbutna anape in ahi. Judge hon asei nauvah May 2 nikhoa Vote kisimna umding jong akham theiyu ahi tin asei uvin ahi.

Hichea High Court in order asodoh na chungah West Bengal Chief Minister Mamata Banerjee in hiche thua hin lemna kaneiyin chuleh EC jong amopohna akona jamdoh theilou diu ahi ati. State sunga Covid 19 natna case thah hatah a akibe nahi Prime Minister Narendra Modi leh EC jeh ahi tin North Kolkata a virtual akona meeting aneina ah aseiyin ahi.

Mamata chun EC hi Centre deisah dungjuiya natohna nei ahi in, Covid 19 natna jeh a rally umding kiphal lou na ah EC in thipchet in donbutna anape poi atin ahi.

EC in hiche hi PM Modi in meeting aneiho suhbulhit nadinga aphal ahi, ajeh chu PM Modi in West Bengal a public rally agonho asuhhai jouva EC in public rally umdingho akha panbep ahi. EC in hitobang a BJP lamkai ho lung aholhi thil hoilou tah ahi tin jong Mamata chun aseiyin ahi.

Xxxxxxxxxx

Opposition ho vaihopna state 4 in Covid lou Stock aumtapoi, mijouse vaccine kapna ding tohgon May 1 nikho’a kipan joulou ding ahi, tia sei

New Delhi, Apr. 26: Kum 18 chunglam miho vaccine kapna ding nikho government in asuhsaobe masangin Opposition ho vaihopna state 4 in Covid lou Stock aumtapoi, tin mijouse vaccine kapna ding tohgon chu vaccine lhahsam jeh’a May 1 nikho teng vaccination drive pantheilou dingin Sunday nichun ana sei uvin ahi.

May 15 masanga vaccine supply kipe theilou ding ahi, tin Covishield lou sem, Serum Institute of India (SII) in aseiye, tin Rajasthan government in ana seiyin ahi. Rajasthan Health Minister Raghu Sharma in aseina achun, Serum Institute toh kijato dingin thu akimu in, ahin Serum Institute in central government akon order hung chu supply boltheina dinga May 15 chanbeh ngaiding ahi, tin asei uve. Hijeh’a chu amahon jong vaccine eihin peh theilou diu ahi, tin ana seiyin ahi.

State hon vaccine jangpet’a akilah ding kiti hi ipi process hitam? Hiche hi central government in aboipi ding dol ahi. Tun kum 18-45 kikah mi crore 3.13 tobang state sunga aumin, amaho hi iti vaccine kakap diuham tin thudoh asem in ahi.

Sharma in atohkhompi Chhattisgarh, Punjab, leh Jharkhand toh thuso abolnau achun central government in Serum Institute of India leh Bharat Biotech koma state ho’a dose hijat jat hi supply bol uvin, tia aseipeh dingdol ahi, tin ana seiyin ahi.

Chhattisgarh Health Minister TS Singh Deo leh Punjab Health Minister Balbir Singh Sidhu injong Sharma ngehna neichu apom cheh lhonin ahi. Assam in vaccine a order got achun lhakhat jouleh namu diu ahi, tin ahin seipeh uve, tia Deo in athujah asei danin thulhut akimun ahi.

The state ho’a minister hochun May 1 nikho a vaccination drive bol dinga kigosa ahi nung uva vaccine semhon vaccine supply abol theilou diuva asei danin asei uvin ahi.

Jharkhand Health Minister Banna Gupta in miho vaccine kakap nom uvin, ahin vaccine hi inn’a kakisem diu hita?, tin ana seiyin ahi.

Punjab CM Amarinder Singh injong kum 18-45 kikah miho kap dinga Health Department in Covishield dose lakh 30 a order dingin thupeh ana neiyin, ahin May 15 masanga vaccine aung lhun ding ginchat umlou ahi, tin thulut kimu chun aseiyin ahi.

Chubanin jong hiche state 4 hohin Covid-19 patient go jenna ding oxygen leh antiviral drug remdesivir supply kibolna chunga sihnei langnei nei danin central government chunga ngohna anei uvin ahi.

Xxxxxxxx

India leh France Navy hon Arabian Sea a ni 3 sunga Wargame panta diu

New Delhi, Apr 26: India leh France Navy hon Sunday nichun ni 3 sunga dinga mega wargame chu Arabian Sea ah ana hongdoh tan ahi. Hiche hi Indian Ocean sunga China in maritime presence anei doudalna dinga kigong ahi.

French Navy hochun hiche exercise bolna dinga nuclear power carrier Charles De Gaulle leh carrier strike group jouse jong amanchah ding ahi. French Embassy in aseina ah avel 19th edition na Varuna exercise kibol hin gam teni kikah a maritime security Indo-pacific sunga umsah ding angaito na ahi tin aseiyin ahi.

Indian Navy injong Missile Stealth destroyer Kolkata, guided missile frigate, Tarkash leh Talwar, fleet support, ship Deepak, Kalvari class submarine leh P-81 long Range maritime patrol aircraft ho agong e tin Official hon asei uvin ahi.

Charles De Gaulle jauna chungah French in exercise agonho lah ah multi mission frigate Provence, air defence destroyer Chevalier Paul leh Command and supply ship Var jong aman ding ahi. Charles De Gaulle hi tonnes 42,500 a gih (Eiffel tower sanga ale 4 a tamjo) chun crew 1200 val, hiche lah a 15.4 per cent tobang hochu numei ahi in chuleh air wing noiyah Rafale Marine jets 20 leh E-2C Hawkeye aircraft 2 leh helicopter phabep jong ajauvin ahi.

Indian Navy Commander Vivek Madhwal in aseina ah gam teni akona Navy hon war fighting skills ho vetsah na jong anei ding ahi ati.

Chuleh embassy in aseina ah Varuna exercise hi French carrier strike group, CLEMENCEAU 21 noiya um ahi in chuleh hiche hi French Navy hon February leh June 2021 sunga Mediterranean, Gulf leh Indian Ocean sunga agonlah a khat ahi atin ahi. Hiche ho tailouvin carrier strike group chun anti-ISS operation kibol na ah jong ajauve tin embassy chun aseiyin ahi.

1983 a ana kiphatsah Indo-French Naval hi gam teni adinga joint vision jong Indo-pacific sunga free, open and inclusive umsah nading tohgon ahi ati.

Kum phabep sunga joint exercise jong gam teni kikah a Navy holah a level thah a um ahi tin embassy chun aseiyin ahi.

April lha a jong Indian Navy hon France lamkai na noiya Naval exercise agon, La Perouse kiti ah chun United States, Australia leh Japan toh ana bolkhom uvin ahi ati.

Hiche exercise kibolna ah India akona lamkai chu, Rear Admiral Ajay Kochhar, Flag Officer western fleet a commanding ahi in chuleh France chu Rear Admiral Marc Aussedat, Commander Task Force 473 in alamkai ahi.

Nikho 3 sunga exercise kigonna ah tuipi chunga naval operation chom chom bola umding ahi, hichea hin advance Air defence and anti submarine exercise, intense fixed and rotary wing flying operation, tactical manoeuvre, surface and anti air weapon firing chuleh maritime security operations chom chom ho umding ahi tin Commander Madhwal in aseiyin ahi.

Xxxxxxxxxx

India in tu chan a Covid 19 Vaccine akapdoh Million 140 valta

New Delhi, Apr 26: India in Sunday ni jingkah chan chun gamsunga Covid 19 vaccine million 140 tobang akapdoh tan ahi. Chuleh gamsunga Covid 19 natna case umjat jong Monday nichun 300,000 alhingtan ahi.

Hichea hin gamsunga Covid 19 vaccine kikap dohjat chu Sunday nikho jingkah nidan 7 am chan in dose 140,916,417 alhingtan ahi. Hichea hin health care workers 9,290,528 ajauvin chuleh amaho hin dose masa kikap nalah a jau ahiuve. Chuleh Frontline Workers 11,950,251 hojong dose khat na chu kap a um ahi in chuleh hichea hin 6,290,491 hon dose 2 na ana kikap uvin ahi.

Hichea hin kum 45 leh 59 sunga umho, mi 47,683,792 honjong dose masa ana kikap uvin chuleh adang mi 2,330,238  hon dose 2 na ana kikap uvin ahi. Kum 60 chunglang miho lah ah mi 49,655,753 jong dose masa ana kikap uvin chuleh second dose jong mi 7,719,730 ana kikap uvin ahi.

Chuleh mi 2,536,612 hojong vaccine dose Saturday April 24 chun peh in aum uvin ahi. Hiche lah ah hin beneficiary 1,643,864 hojong dose khat na kap ahiuvin chuleh second dose jong mi 892,748 ho chungah kap ahi.

India in Vannoi pumpi a nikho 1 sunga asanna pen dingin case thah 314,835 ana umin chuleh hichea hin thina toh jong ni khat sungin 2,104 ana ume tin Union Ministry of Health and Family Welfare in Thursday nichun data asodoh in ahi.

Hiche kahlah ah India in achesa ni 2 sungin case thah 350,000 aumin ahi. Hichea hin case 352,991 aumbe toh kilhon in India a Covid 19 natna case umjat 17,313,163 alhintai tin Union Health Ministry dashboard in aseiyin ahi.

Chuleh mi 2812 injong Covid 19 natna jeh in thina anatoh uvin ahi hiche phat sung hin, hiche toh kilhon in Covid 19 natna jeh a thi jat chu 195,123 alhingtan ahi.