278th April, 2021 News

278th April, 2021 News

63
0
SHARE

COPPK in Koubru mol ana umsa aloupina banga umsah kit ding leh venbit jing ding lungtup akinei jing’e: COPPK

Kpi, Apr. 27(UNA): Phaicham a kon kiloikhomna chom chom a kon a ngohna dihlou tah leh vetda na kamcheng kilhadoh jing leh Media ho mangcha a lunghanna thei thu kiseidoh ho chung’ah lungnopmo na anei utoh kilhon in Committee on Protection and Preservation of Mt. Koubru (COPPK) in Koubru mol chung chang thu’a adinmun  leh atup le adoiho Manipur sunga cheng mipi jouse hetding in tahlahna anei uvin ahi.

Tuni nilhah lam’a Kangpokpi khopi sung’a toukhomna kinei na a thulakhom ho henga Dr. Lamtinthang Haokip, General Secretary, COPPK in aseina a chun Committee on Protection and Preservation of Mt. Koubru in Koubru mol ana umsa leh dinmun ana umsa banga umsah jing ding akideiyin ahi. Committee on Protection and Preservation of Mt. Koubru hi Minister lui Nemcha Kipgen leh mopohna nei Department Official ho panna a adeh a Koubru mol a Thingna, Louna ho (Natural resources) kisuhmang jing venbitna dinga tolsung mipi hon ana kisemdoh ahi tin aseiyin ahi.

Aman aseibena a chun Committee kisemdoh hi amakai ding leh adeh a gamsung mipi ho henga hoitah a iki hinso thei nadiuva Thingna, Louna ho venbit leh Balance Eco-System leh Biodiversity venbitna ding toh kisaiya hilthem ding tihi ahi.

Hitoh kilhon chun, mopohna nei Department hon asang a sim thingnou ahin peh utoh kilhon in COPPK a Volunteer hon June 24, 2019 chun ana kitu in, chuleh Koubru mol kimvel a lamlen leh kho ho ah Awareness jong ana kibol in ahi ati. Chuleh gamsung  hinsah nading in jong COPPK makaina in kiloikhomna chom chom Saitu Gamphazol Area Youth Organization, Tujang Area Youth Organization, Leikot Area Youth Organization leh adang dang honjong Koubru mol ah thingnou ana kitu jinge tinjong aseiyin ahi.

Aman aseibena a chun tonlai a pat in tolsungmi holeh khangthah tamtah Koubru lhang a kon a hung seilen ijat hamkhat jong Government sunga Department chom chom ah tohmun akimu utoh kilhon in Koubru mol aloupina bang leh ana umjingsa banga suhnou kit ding lungtup anei jing uve tinjong aseiyin ahi.

Gamsung mipi hon lungtheng tah an lungtup holeh gin um tah a COPPK ho lungtup ho heikoi nom kiloikhomna hon nam kikah a kitomona thei chanpha a ahin peikoi uhi vangset umtah ahi tinjong aseiyin ahi.

State Government in dan toh kikal a natong kiloikhomna chom chom Federation of Haomee, UKAL, KKL leh adang dang hon lunghanna thei leh kitomona thei seidoh jing ho avetsui diuvin jong temna aneiyin ahi.

Dr. Lamtinthang Haokip in aseibena a chun Manipur mipi holeh Chief Minister in gamusung mipi ho leh COPPK ho tup le doi ho phatah a het thempeh joh uva Koubru mol masanga banga  aloupina banga thah tundoh nadinga avaigei masanga kithopina pejo ding in temna aneiyin ahi.

COPPK General Secretary in avel a hilchetna aneina a chun Committee on Protection and Preservation of Mt. Koubru in Party dang dang toh kimatna imacha akineipon, chuleh Politics toh kijopmatna in na akitong pon, hiche Committee hi a lamkai ho Politics a aki kumlut masanga uva pat a ana kisemdoh ahitai tinjong ahilchen in ahi.

Committee on Protection and Preservation of Mt. Koubru hon aseibe na a chun Koubru mol chung changa boi loi tah a niseh a kilhaina leh pathen hou ding tia mol kal aum jing aum toh kisaiyin jong dohna aneiyin ahi. Chuleh Dr. Haokip in aseibena a chun April 21 apat mol kal ho hi adeh a kichep golseh mi, kipana ding hol ho, gam khol le ding ho, kisuhhalna leh Picnic adinga che atamjo ahiuvin, hinla lunghan umtah khat chu michouna a umchan hoilou abol jing hou leh sakho thu a houguttah dan a um uva Entry Point jouse a dunglhai vailhai atho uva kicholngahna mun jouse a nen bulom apaithang uhi dei umlou tah ahi tinjong aseiyin ahi.

Committee on Protection and Preservation of Mt. Koubru in aseibe na a chun April 14 nikho a COPPK, SAHILCA leh Kangpokpi CSO holeh ADGP 2, IG, SP Kangpokpi jaona a ‘Gentleman’s Agreement’ kinei nunga jong Koubru mol a Kangpokpi Police Personnel ho apansah jing utoh kisaiyin jong alungdon na aphongdoh un ahi.

District Administration in jong henasa sa a Koubru mol kal hon COVID-19 SOP ho henasa sa a apalkeh jing uva kon a natna hung punbe jing thei dinmun a aum jong hi kihetmosah a umthei ding ahi pouve tinjong Committee in aseiyin ahi.

Xxxxxxx

Federation of Haomee in koi holeh hoiche kho kichondoh diu ham ti phunchel louva anga hat diu angaiye: KIK

Kpi, Apr. 27(UNA): Federation of Haomee ho a kon a pilhing lou tah a thuphondoh ahin sodoh utoh kisaiyin Kuki Inpi Kangpokpi hon Koubru lhanga koiho kho leh hoiche pen kichondoh a chuleh hoiche Camp pen ki otdoh ding ham tia ngahhat tah a aum jingu angaiye tin thumopna ana neiyun ahi.

Thangminlen Kipgen, General Secretary, Kuki Inpi Kangpokpi in aseina a chun, Federation of Haomee tia kiloikhom hon ahet diuva poimo pentah chu Koubru toh kisaiya gamnei dihtah hina leh photchetna lekha poimo jouse State Government heng’ah pehlut na ana kinei tan, tuni chan in Government akon in donbutna aum naipon, Federation of Haomee kahiuve tia kiloikhom hon phunchel lou hel’a ana ngahat diu ahi.

Kuki Inpi in dan toh kitoh a na kitong ho aki tahsan jing in, hinla thulah theilou mi phabep in Koubru chungthu a sei le sah tamtah aneiyun, State Government in tuchan in Saitu haosa in gam nei dihtah ahina photchetna aneina toh kisaiyin Government in Official tah in hetpehna ahi ahilou aphongdoh naipon, mijousen phunchel lou hel a nga hat ding ahi ati.

Aman aseina a chun, Constitution Article 371C noiya bang in Hill Area ho hi Survey akibol kha pon, Kangpokpi District sunga hoilai mun hijong leh State Government in Revenue Land tia lahlut ding agot jing hi lungdon umtah leh nuijat umtah ahi ati.

State Government in jong Government in achesa 2013 a thupeh ana sodoh banga Kangpokpi District sunga Land Record jouse District Headquarters a ahin pehlut diuvin jong avel in hetsahna aneiyun ahi. Chuleh Hill Areas Committee akon a thulhuhna hojong State Government in ajabol  ding, chuleh thinglhang gam chung chang thu toh kisai jouse HAC doh masatna aneidiu ahi tinjong ngehna aneiyun ahi.

Kuki Inpi Kangpokpi in Manipur Police hon Uniform pum’a Salai Taret Flag toh lim akilah khom nau toh kisaiya Manipur Police hohi Salai Taret Force hiu ham tinjong dohna aneiyun, akisaipi mopohna nei hon hitobang Police Personnel ho chunga gotna kilom apeh diuvin jong ngehna aneiyun ahi.

Chukit leh,  Kuki Inpi Kangpokpi District in Deputy Commissioner Kangpokpi heng’ah Kangpokpi District sunga Business hihen, phat ong manga hung ho hijong leh COVID-19 Appropriate Behaviours ajuicheh’u hinam tia phattah a vetsuina anei diuvin jong ngehna aneiyun ahi.

Containment Zone kikhah na jong District sungah aumkha naipon, hiche hin District sunga natna hilen ahin thejal thei ding ahi in, khonung leh District Administration ho mitmona jong hung hithei ahi tinjong aseibei.

Xxxxxxxxxxx

COVID dinmun toh kisaiya CM in DC jouse toh Video Conference ana nei

Imphal, Apr. 27(ET): Chief Minister N. Biren Singh in tuni chun District jouse a Deputy Commissioner hotoh COVID-19 dinmun toh kisaiyin Video Conference ana neipi in ahi. Hiche kihoukhomna hi adeh a, State sunga COVID-19 natna hung punbe jingtoh kilhon a ana neiyu ahi.

Conference kinei sunga chun Chief Minister in adeh in DC ho heng’ah Active Case umjat, Home Isolation a um jat, Vaccination kiboldoh jat leh COVID Care Centre semdoh kit toh kisaiya kigotna ho ana dong in ahi. Chuleh lha kit a hunglhung ding dinmun toh kilhon a kigotna anei diuvin jong hetsahna aneiyin ahi.

Chukit leh kimanchahna ho hihen kigotdan ho hijong leh Principal Secretary (Health), Government of Manipur  henga Report apeh uva, Copy jong Chief Minister henga apeh diuvin jong hetsahna aneiyin ahi.

Tua pat a mijousen jong COVID-19 hi hui a kipeson dan a kisei ahitah jeh in kiven them angai lheh tan ahi tinjong aseiyin, chuleh DC jousen jong Home Isolation a umho jong a insung mite toh chom um hinam tia avetsui jing diu vin jong hetsahna aneiyin ahi. Home Isolation a um ho jong insung mite hotoh Room holeh junthah ehthahna achom chom a aum theilou ding leh COVID Care Centres a ahin puilut diuvin jong hetsahna aneiyin

Biren Singh in Assembly Constituency chom chom a COVID Awareness cum Enforcement Committee semdoh a akinthei pen a COVID Care Centres thah tundoh ahiloi nadin jong hetsahna aneiyin ahi. Chuleh State sung lutna mun hoa kon a hung lut ho Negative Report hojong phatah a avel a kholchilna anei diuvin jong hetsahna aneiyin ahi. Chief Minister in DC ho heng’ah Vaccination suhhat jing ding leh SOP toh kisai hilthemna leh palkeh ho phatah a gotna peh ahina ding jong hetsahna aneiyin ahi.

Xxxxxxxxxxx

Kpi a covid daan thah kisem

Kpi, April 27(ET): Kangpokpi district magistrate akon thuso kimu dungjui in Kangpokpi district sung ading in covid daan thah akisem in, jaan curfew angai banga umjing ding, khopi sunga kailhang ho kal khat sunga ni 3 bou kihongding, akihongding dukan ho kilha jing ding ahi akiti.

Dukan kihon ni le nilhah lam nidan 5 chan bou kihong ji ding, mipi kititna kingon jouse jinei na le thina ho tilou kikhahding, kingon aum tah jong le mi 20 vaal kiphal louding ahi. Milah a vaa le teng maitom kitom cheh ding, daan palkeh ho kileusah ding ahi.

XXXXXXXX

AJWJU in kiphinna nei dinga gihna nei

Jiribam, Apr. 27(ET): All Jiribam Working Journalist Union a General Secretary le ISTV Jiribam Correspondent a pang S. Roshimala, police commando khat in achesa nisim 25 nilhah lam nidan 3:00 vel a Jiribam Lamlong keithel a ana voh na chung chang a AJWJU in nasatah a demna anei utoh lhon in mona nei police commando pa hi agangthei pen a akimat doh a gotna akipeh na ding in ngehna anei uvin ahi.

Ahung lhungding ni 15 sung’a police commando pa gotna akipeh lou le kiloikhomna in kiphinna jat chom chom ahin bol diudan jong hetsah na ahin nei uvin ahi.

xxxxxxxxx

Manipur a -19 natna jeh’a mi-3 thibe; Case thah 175 kimudoh

Imphal, Apr. 27(ET): Manipur sungah tuni chun nikhat sunga natna kimudoh lah a 2021 sunga atampen ahitoh kilhon in 175 ana kimudoh in, chuleh mi 3 in thina ana toh kit in ahi tin State Health Department akon thulhut chun aseiyin ahi.

Manipur sunga dinga COVID-19 natna kimudoh 146 akon in tuni chun 175 in apunbe in, hitoh kilhon chun State sunga tule tua natna nei umjat 1032 alhing tan ahi tin Common COVID-19 Control Room Imphal akon thusodoh chun atahlangin ahi.

Chuleh, athahbeh a natna a kon a mi 50 in damdohna ana nei utoh kilhon in damdohna nei agomin 29,317 alhing tan, chuleh thina toh agomin 393 alhingtan ahi.

Tunia natna athahbeh a kimudoh holah a chun Central Armed Police Force Personnel 3 ajaovin ahi.

Imphal West a kon in COVID-19 natna nei athahbeh in 84 mudoh in ana um in, District jouse lah a 2021 sunga nikhat sunga kimudoh atampen ahitan ahi. Imphal East akon in 29 ana kimudoh in, 26 hi Bishnupur a kon, 9 hi Kakching, 8 hi Senapati, 7 hi Churachandpur, Kangpokpi, Thoubal leh Ukhrul akon mi 3 cheh, 2 hi Chandel leh  Tengnoupal akon mi khat ahi.

Recovery Rate jong 95.74 Percent akon in 95.36 Percent in akemsuh tan ahi.

Tunia COVID-19 jeh a thina toh ho ahileh Imphal West a kon pasal 42 leh Imphal East akon numei kum 75 khat ahi.

Manipur State sunga vanlenga hung April 25 nikho a Indigo flight No 6E-6181 touna jon 16-21 leh 6E-21 touna jon 29-35 a toukha jousen Common COVID-19 Control Room No 18003453818 ahilou leh ama ama District Surveillance Officer ho akinthei pen a akimupi diuvin hetsahna aneiyin ahi.

Thulhut nunung pen kimu dungjuiyin Manipur sungah tuni geiyin Vaccine kikapdoh agomin 1,39,457 alhingtan, chuleh kum 45 chunglam jouse akinthei pen a Vaccine Centre RIMS, JNIMS, District hospital ho, CHC ho, PHC holeh lhendoh a um Private Hospital hoa Vaccine kikap cheh diuvin jong thumopna aneiyin ahi.

xxxxxxxxxxx

Sanaton thi thu’a a Bandh kibol in mipi kimanchah suboi

Imphal, Apr. 27(ET): Justice for Sanaton Athokpam in janlhah nidan 6 akon nikhat (24 hours) gamsung pumpi bandh abol mipi kimanchahna asuboi lheh in ahi. Akiphin bol ho chun Sanaton thina chungchang’a thudih ahung kipohdoh ding angeh uvin, mona neiho chung’a gotna lhunsah ding’in jong asei uvin ahi.

Hiche kiphinna a hin simlai kiloikhomna 6 hon tosotna ananei uvin ahi. Hiche bandh jeh hin phaisung kailhang dukan jouse akikhah in, lamlen ho’a gari alhai pon ahin, ana asa, hou le bih toh kisaiya, alou theilou kin le dong chuleh adang dang hovang lhakang in anaum in bandh kibol sung’in deilou thilsoh imacha vang aumpoi tin akiseiyin ahi.

Bishnupur District a jong bandh atosot uvin district sung munchom chom a bandh achelhan ahi. Dukan, kailhang, oil pump chule passenger gari jouse jong alhai pon, Apunba Nupi lup (ANUL), Bishnupur leh Pioneer’s Club Bishnupur Ward Number 4 a member hon bandh nasatah in abol uvin hiche a chun police hotoh akinoto najong anaum in ahi.

Tuni chan a Athokpam Sanaton thina chungchang’a thudih ahung kipohdoh lou jeh’in Anul Bishnupur District a President L Pramo Leima in alung kimlouna thu aseiyin, hiche thilsoh chungchang’a kiphutdoh JAC in ahinbol kiphinna jouse kitosot ding ahi tinjong aseibei.

Bandh chun Noney a jong mipite kimanchahna asuboiyin State le state kah gari khatcha alhaipon, Sanaton Athokpam themchan nan Longmai Bazar, Noney  a nupi hon kholhang asam uvin, Naga Women Union Longmai Area honjong pan alauvin ahi.

Justice for Sanaton in  hiche chungchang’a thudih pohdohna dia kiphinna leh thil dang dang aboljing vang uvin koiman nahsah in akoi pouve tin Justice for Sanaton in lekhaso khat ah aseiyin hiche chungchang hi mi kimkhat in jou le nal in kichepnan anei uve tinjong akiseibei.

Government lang’a kon chuleh insung mite lang’a kon hijongle imacha seithengna umlouvin hithei ponte tinjong aseiben chuleh Government in bolthei thei ahinbol ding’in jong ngehna anei uvin ahi.

Xxxxxxx

Mask kitomlou jeh’a mi 15 Jail kilhut

Imphal, Apr. 27(ET): Manipur Police hon tunin Mask kitomlou jeh leh COVID-19 SOP sukeh/juilou jeh in Imphal khopi sunga mi 15 tobang ni-3 sung jail tang dingin thu ana kitankhum uvin ahi.

Official thulhut kimu dungjuiyin, hiche mi 15 hochu chief judicial magistrate, Imphal West, Y Somorjit Singh anga ana ding uvin, japi kititna lah’a mask akitom lou jeh uvin amahon athemmo nao ana phong uvin ahi.

Amaho chengse chu themmo achang uvin, Dk. 1,000 cheh a leuding leh nithum sung jail tang dingin court in thupeh ana neiyin ahi. Chuleh amaho a kona kidongdoh Dk. 15,000 chu state account in akihenglut tai, akiti.

Manipur gamsunga Covid-19 case apunjing toh lhonin, mopohna nei authority hon dan khoutah asem uvin, mipin ajuicheh dingin temna anei uvin ahi. Chuna bana, Covid-19 dan ho juiya aum aumlou, chuleh dan palkeh ho vetsuina nei dingin state pumpi a police personnel ho akilha thangin ahi.

Xxxxxxxx

NE gamkai sung’a Oxygen alhahsam jeh’a Centre govt. in NE state 5 ho’a Oxygen generation plant 13 tungdoh ding

New Delhi, Apr. 27: Covid-19 natna vei apunjing laitah’a, India sah-solam gamkai state ho’a mihem hinkho huhdoh thei hui (Oxygen) alhahsam jeh in, India sah-solam gamkai hopsunga um state 5 ho a oxygen generation plant 13 tundoh dingin Centre in in tohgon asem’e, tin official khat in Monday nichun ana seiyin, Meghalaya, Nagaland chuleh Mizoram a oxygen plant 3 cheh kitungdoh ding, Arunachal Pradesh leh Manipur a 2 cheh kitungdoh ding ahi, ati.

These 13 are among the 551 dedicated

India gamsunga public health facility ho’a Pressure Swing Adsorption (PSA) medical oxygen generation plant 551 tundohna dinga Centre tohgonna noiya hiche 13 hohi Sah-solam gamkaiya um state ho’a kitungdoh ding ahi. PM Cares Fund in oxygen generation plant ho tundohna dinga sum hopdoh pat dinga phalna jong ana peh ahitai.

Ahin, centre in tohgon ahin’ sah-solam gamkaiya um state 3 ho, Sikkim, Tripura chuleh Assam akiminphah pon ahi, tin official pa chun aseiyin ahi.

Meghalaya gama hiche oxygen generation plant hochu East Khasi Hills district, West Garo Hills district chuleh West Jaintia Hills district a kitungdoh ding, Mizoram gamsunga hi Aizawl, Champhai chuleh Lunglei district ho a kitungdoh ding, chuleh Nagaland gama Dimapur, Kohima chuleh Mokokchung district ho’a kitungdoh ding ahi.

Alangkhat’a, Meghalaya Chief Minister Conrad K Sangma in Monday nichun Ribhoi district hopsunga um Byrnihat a kitungdoh oxygen plant vilna ana neiyin ahi. Byrnihat unit hin nikhat a oxygen cubic meter 2000 tobang apohdoh jou ahi.

Xxxxxxxxx

Bengal election candidate ho lah’a Covid-19 jeh’a thi mi-4 lhingta

Kolkata, Apr 27: West Bengal a Malda district hop sunga um Baisnabnagar akon independent candidate Samir Ghosh in COVID-19 toh kisaiyin thina anatoh in ahi. Amahi Bengal election anatet candidate ho lah’a Covid-19 jeh’a thina toh a-4 channa ahitai.

Alangkhat’a, election anatet, Union Minister Babul Supriyo jong hi Covid-19 positive anahitan ahi.

Bengal election anatet candidate ho lah’a Covid-19 jeh’a thina anatoh adang 3 hochu Murshidabad district hopsunga um Jangipur akon Revolutionary Socialist Party candidate Pradip Nandi, Murshidabad district hopsunga um Jangipur akon mama Congress candidate Rezaul Haque, chuleh North 24 Parganas hopsunga um Khardaha akon ruling Trinamool Congress (TMC) nominee Kajal Sinha ahiuve.

Monday nichun Madras High Court in Covid SOP leh danho jui louva party hon kijotna lentah tah abolsah jeh’a Election Commission of India a official ho chunga toltha toh kisaiya hehna semkhum dinga anasei ahi.

Xxxxxxxx

Malaria akon kivenbit nading’a State Malaria Official 3 in CCpur District vetlhah nanei

B.Lalboi Gangte

CCpur. April 27 (ET) :Churachandpur District ah thoukang jat chom chom velha ding leh test bol ding in tunin (April 27) State Malaria Office, Imphal akon official 3 jaan khat geh ding in Lamka khopi ana jon uvin ahi. Hiche official 3 hochu  Lalhmnglien Ralsun, Health Supervisor, Assistant Entomologist lamkai nanoi’a Ch. Santa Singh, Male Health Worker leh L. Jilla Singh NVBDCP driver ahi. CCpur District alhun uvin District Malaria Office, CCpur ah Dr. T. Nengkhanmang, District Malaria Officer, NVBDCP, CCpur leh staffs ho ana kimupi uvin chuleh DMO Office chamber ah thoukang akon natna kilason Malaria, Dengue leh Japanese Encephalitis (JE) doudal na ding’a pan lah ding dan seikhomna ananei uvin ahi.

Hiche toh lhon’a thoukang matna ding lighting trap manchah dan vetsahna ananei uvin chuleh State Malaria Office in India gamsung’a Malaria natna suhbei na ding’a panlah na achelhah pi jing lai ahi toh lhon’a kivenbit na lam toh kisai’a panlah ding dan aum thei na ding in 2020 kum a CCpur District sung’a Malaria PV case kimudoh na Zezaw PHC hopsung Kullian PHSC noi’a um Panglian kho ah thoukang matna lighting trap mangcha’a thoukang mat’a Imphal ah Laboratory a vetlhah na ahi na ding’a State akon Lighting trap 3 amanchah ding’u ahi. Chuleh DMO lamkai nan State official hon Panglian kho ajon uvin hiche achun kho Haosa leh kho mipi kithopi na in thoukang tam na mun dehset ho’a Lighting trap koina mun ding vetlhana anei uvin  hiche achun mun chom chom ah lighting trap anakoi uvin ahi.

Hetthei khat chu State Malaria Office, Imphal in 2020 kum a Malaria, Dengue leh JE kimudoh na mun ho’a natna hit po thoukang ho velha ding in achesa April 8 – 9 in Thoubal District hopsung Thoubal Wangma Taba ah thoukang alakhom uvin, April 15 – 16 in Senapati District hopsung Makhan Khullen, April 20 – 21 in Imphal East District hopsung Sagolmang Bazar a thoukang anamat ho Laboratory akon kimudoh dungjui in Dr. AR Chishti, State Malaria Officer (NVBDCP) Manipur heng’a report anapelut uvin ahi.

Alangkhat’a District Malaria Officer, NVBDCP, CCpur hin Department ban’a kho tin’a ASHA worker, facility worker jouse toh kithokhom’a CCpur District sung Zero Malaria District hisah na ding’a pan nasatah’a akilah jing lai tah ahi. Chuleh kho sung’a koi tobang khosih, luchang-na, sungkho aum’a kiginmo nanei aum leh agannathei pen’a Health facility naipen ahilou leh ASHA ho heng’a thisan test akibol sah ding uvin hetsah na anei in ahi. Mipi Malaria natna akon venbit na ding in tukum bul akipat chun District Malaria Officer, NVBDCP, CCpur in kho  chom chom’a kangkal anakihom in chuleh Malaria natna toh kisai’a 2020 kum chun CCpur District sung’a Malaria natna vei mi 11 um nalah’a khat in thina anatoh in ahi.

xxxxxxxxx

PHED CCpur in District mipin twi ning lhing tah’a amu thei nading’a pump semphat na natoh chelhah pi jing

B.Lalboi Gangte

CCpur. April 27 (ET) : Public Health Engineering Department (PHED) Churachandpur Division in CCpur khopi sung twi pehdoh na ding’a kimangcha pump semphat na natoh tunin (April 27) Department akon staff hon asujom jing uvin ahi. Twi-pump hi PHED CCpur in Khuga Dam akon twi lah naleh pehdoh na ding’a 100 Horsepower (Hp) 5, 40 Hp khat leh 20 Hp 3 amanchah ahi in chuleh akipehdoh na line 3 a 100 Hp 3 amangchah’u ahi. Hiche holah’a khat aset jeh chun Department in Company a athah athum ahung lhun kahse’a hiche asepa hi manchah thei ahi nading’a asem ahi in ahin mipi twi pehdoh na vang angai bang in achelhah sah uvin ahi. Hetthei khat chu 100 Hp twi-pump kimang ho hi Crompton Greaves ahi naban’a kum 10 val ngen ahi dungjui’a Company a jong Spare part kimu jou lou ahi. Hi jeh’a chu Department in part ase phabep asem thu ahin tu’a Shafter se jong Rod leh Bushing ding Imphal a asem sah mai mai’u ahi.

Hiche toh lhon’a Manipur gamsung’a Churachandpur District tilou District dang’a kum 10 val Department in mipi ading twi-pump amang cha pouvin ahi. CCpur Khopi sung leh akimvel ho twi pehdoh na ding in PHED CCpur in Zone chom chom in akhen uvin Zone-I Koite Lui, Zone-II Lanva Lui leh Zone-III Khuga Dam akon twi lah leh pehdoh in aum in ahin Zone-I leh Zone-II ahi twi deibang’a apot tah lou jeh’a Zone-III bou’a hi kingam ahi. Chuleh Zone-III jeng ajong manchah ho alui ngen ahi na chung chon’a meivah kitup lou jeh in twi pehdoh nalam jong nasatah’a asuhnongkai ahi.

Xxxxxxxxx

Sopi kikah boina jeh’a mi-1 thi

Jiribam, Apr. 27: Thulhut kimu dungjui in jani nilhahlam nidan 1:30 vel chun, Choto Bekra Police Out Post a posting, Lamabhutangkhal akon Samiron Das- (34)-(VDF No. 10J0091) S/o Nikhil Das chu apenpi a-upa, Parimol Das in paicha (chisel) mangcha a, Lamabhutangkhal a achenna a-inn sunga ana bulu a konin thina anatoh in ahi.

Hiche thu toh kisaiyin, Borobekra Police Station ah suo motu case khat ajihlut uvin, Samiron Das longdamsa chu District Hospital, Jiribam Mortuary ah akoi tauvin ahi. Chuleh tolthatpa Parimol Das holna in police in pan ala jingin ahi.

xxxxxxxxx

Ccpur a mun 4 Containment Zone a kiphongdoh

B.Lalboi Gangte

CCpur. April 27 (ET): Additional District Magistrate in tunin District sung’a mun 4 Containment Zone in aphongdoh in ahi. Hiche Containment Zone a kiphongdoh mun ho chu Lamjang, Chiengkonpang, Dorcas Veng leh Rengkai ahi.

Integrated Disease Surveillance Program (IDSP) Churachandpur in tuni nilhah nidan 3:00 chan’a Covid-19 data report asodoh na’a +ve case 3 mudohbe ahidan atahlang in ahi. Chuleh +ve case thah kimudoh na mun ho Additional District Magistrate in Containment Zone in aphongdoh in chuleh CCpur District sung’a data report dungjui’a mi 148 test kibol na’a pasal khat leh numei ni hi kimudoh ahi.

Hiche toh lhon’a RTPCR a test kibol mi 101 result apotdoh naipon chuleh tu leh tuhin CCpur District sung’a active case 52 aum in ahi. Chuleh tuni chan’a District sung’a case agom’a 2,195 alhing tan hiche lah’a mi 48 in thina jong atoh tan ahi.

Xxxxxxxx

Chandel leh Tengnoupal Battalion in daan phallouva thil kipo Dk. Crore 4.62 man ding mandoh

Imphal, April 27 (ET) : HQ IGAR (South) vetsui nanoi’a um 26 Sector Assam Rifle, Chandel leh Tengnoupal Battalion in jaani (April 26) chun Chandel leh Tengnoupal District sung’a kon in daan phallouva thil kipo agom’a Dk. Crore 4.62 man ding vel anamandoh uvin ahi.

Hetthei khat chu Chandel Battalion in Chandel District hopsung Angbreshu leh New Songyang kom ako in gari 5 leh mi 5 ginmo jeh in anaman uvin kholchilna anei nao’a daan in aphallou thi kipo Dk. Crore 1.36 man ding vel anamandoh ahi. Chuleh Tengnoupal Battalion in jong Tengnoupal kom gamlah’a kon in daan in aphallou cigarettes, textile leh kengkoh Dk. Crore 3.26 man ding vel anamudoh ahi. Thil keu kimandoh ho jouse Chandel Police Station, Forest and Custom Dept. ho khut’a anapelut tauvin ahi.

Xxxxxxxxxxx

Imphal East sunga COVID-19 Appropriate Behavior ho phatah a chepi ahina dinga District thunei hon milham kiloikhomna ho henga ngehna nei

Imphal, Apr. 27: Gamsunga COVID-19 natna hilen punbe jingtoh kilhon in Imphal East District Administration in tuni chun milham kiloikhomna ho heng’ah natna doudalna dinga hung kioedoh cheh dingun temna aneiyin ahi.

Imphal East District Administration Deputy Commissioner in Imphal East District hopsunga um Civil Society kiloikhom na ho, jat le nam chuleh Tribe kiloikhomna, Houbung ahilou leh Hou kiloikhomna chom chom ho henga ngehna lekha asodoh na a chun District Administration ho tohgonna noiya natna hilen doudalna dinga kipehdohna neicheh ding in ngehna ana neiyin ahi.

Imphal East sung’ah COVID-19 natna hilen hatah in apunbe jing in achesa ni 4 sung chun District sung’ah natna nei mi 100 mudoh in ana um in ahi tin Imphal East a Deputy Commissioner (In-Charge) Shamim Ahmad Shah soikaina lekha chun ngehna aneiyin ahi.

Kithokhom na a kon a SOP leh COVID-19 Appropriate Behavior ho lah a adeh a Mask kitom, Social Distancing chepi na hihen, Curfew suhhatna leh natna kithejal louna dinga pan hoitah a kilathei ding ahi tinjong aseiyin ahi. Chuleh Government in tohgon anei hohi mipi tosotna jao louva lolhing tahtah theilou ding ahi tinjong aseibei.

Ngehna lekha chun aseibe na ah, Government in State sunga COVID-19 natna hilen doudalna ding in tohgon chom chom ahin guongdoh in, hitoh kilhon chun kinkhoh leh alou theilou ho lhakang na aneitoh kilhon in  nilhah lam nidan 7:00 apat jinglam nidan 5:00 gei Curfew jong aphongdoh in ahi.

Chukit leh kikhipkhomna holah a alou theilouva thivuina kin, kichenna leh sakho thu a kimanchahna ho a jong mi 20 kalval phal ahi tapon, kailhang mun hoa thiljohna mun ho jong phatbi neiya honsah ahitan, chukit leh mipi kititkhomna mun hoa maitoh kitom lou ho, Social Distancing chepi lou ho, chil setthang holeh Paan, Gutkha leh Ja ne ho leusah ding ahidan jong atahlang in ahi.

Xxxxxxxx

KSA hon Tobacco Product kijoh ho kholchilna nei

Imphal,  Apr. 27(UNA): State sunga COVID-19 Second Wave doudalna ding toh kisaiyin Kangleipak Students’ Association (KSA) hon khaamna kinei Dum(Tobacco) leh khamnathei dang dang ho lhangphong tah a kailhang mun a kijoh holeh aphat kichaisa thil le luo kijoh ho kholchilna ana neiyun ahi.

Tunia Khoyathong a amaho Office mun a thulakhom ho henga HRD Secretary Romen Soibamcha in aseina a chun phat masa a COVID-19 natna jeh a genthei hahsatna phat sottah ana kithohjou nungin, tunjong Secobd Wave jeh in avel in hahsatna akitoh kit tan ahi. Hiche Dum(Tobacco) ho akon in natna hatah in apunbe sah jing in, phat masa a pat in Government in ‘Disaster Management Act’ dungjuiyin Tobacco Product ho joh leh neh ding ana phal pouvin, chuleh mipi kititkhom na lah a chil set thang jong ana phal pouvin ahi. Chuleh Government in’ Manipur Epidemic Diseases Amended Regulation 2020’ mangcha in Tobacco Product ho leh khamnathei ho neh leh joh ding ana khaam uvin ahi. Government in aphallou hena sasa in Imphal tolpi sunga kailhang mun holeh khosung tin’ah lhangphong tah in tuni chan in mutheiyin akijoh jing in ahi. Akisaipi mopohna nei honjong hitobang thil joh ho chung’ah sum le pai leusahna ana nei jing un, hinla ajoh hon hitobang sumkolveina a kon in aki kangse nom pouve tinjong aseiyin ahi. KSA, in lhangphong tah a khamnathei leh Tobacco a kisemdoh kijoh jouse kikholchil jing ding ahi tinjong aseiyin ahi.

Alangkhat ah, hiche COVID-19 batna Second Wave hi gamsung pumpi a niseh in apunbe jing in, hitobang ma chun State sung jenga jong natna nei leh thina toh jong apunbe jing in ahi. Hitobang boina leh hahsatna dinmun a aki umlai jeng injong nitin kimanchahna thil le luo ho man akhang jing in, kailhang mun ah thil le luo choh ding akemsuh jing tan ahi ati.

COVID-19 Second Wave doudalna ding leh natna a kon a kivendoh thei nadinga mipi ten Mask kituo jing ding, mipi kititkhomna hoa kikangse ding leh thenna hinkho mangcheh dingin jong temna aneiyin ahi.

Xxxxxxxxxx

Bishnupur District sung’a dukan leh kailhang jouse nilhah nidan 3:00 apat kha ding’a DC in thupeh nei

Imphal, April 27 (ET) : Bishnupur District hopsung Covid natna ahung khan jing toh lhon’a dukan leh kailhang jouse nilhah lam nidan 3:00 apat koiman ahon lou ding chuleh Misemni (Sunday) nikho vang nilhum’a koiman ahon lou ding uvin Deputy Commissioner in thupeh anei in ahi. Hetthei khat chu Bishnupur District sung’a hi janni (April 26) nikho chun Covid +ve case 5 akimudoh in chuleh tuni (April 27) case 24 kimudoh ahi. Chuleh Manipur gamsung’a nikhat sung in Covid +ve case thah 175 akimudoh in chuleh mi 2 in thina jong atoh in ahi tin State Health Department chun atahlang in ahi.

Xxxxx

Salai Women Depositors’ Group in CM henga memorandum pelut

Imphal,  Apr. 27(UNA): Salai Group of companies khut’a sum ana henglut ho sum huhbitna dingin Salai Women Depositors’ Group in tuni chun CM Biren henga memorandum ana pelut uvin ahi.

Salai Women Depositors’ Group General Secretary Y.Reena Devi in thuso abolna achun, Salai Group of companies khut’a sum ana henglut hon kumkhat le keh tobang hi amu diudol chanvou achanlou jeh uva ahinkhou’ genthei dan ana seiyin, hiche thu toh kisaiya lunggim val jeh’a thilo jong aumin, alhoh chavai doh a kijen (psychopathic patient) jong aumin ahi, ati.

Salai Women Depositors’ Group thuso bolchun Salai Group of companies khut’a sum ana henglut ho sum huhbitna dinga CM in Salai /Smart Society te asset jouse amatpeh a, ahilouleh company in transaction holeh operation ho masanga banga achelhah jom sah kit theina dinga Salai companies athah’a ahonsah kit dingin ngehna aneiyin ahi.

Hetthei khat chu October 30, 2019 nikho a Government of Manipur leh National Investigation Agency (NIA) natoh thilbol jeh’a Salai or Smart Society in dividend hihen capital hijongleh khatcha apehdoh theilou ahitai.

Salai Holdings Pvt. Ltd, Manipur khut’a sum hengho hi vangsetna lentah achang uvin, gimna sangtah athoh uvin ahi, ajeh chu atamjo hi kihinso na dinga aphachom neokhat khat del mai mai Inchen genthei leh hahsa, meithai (widow), lampam dunga thiljoh (street vendor), thiljohna inn-ngah (shop keeper), von-khui (tailor), nikhotha a kivah (daily wages labourer), rickshaw tol, thing them (carpenter), inn-song-sa (mason), natoh akon kichol (pensioner), lo lhomcha cha nei, chuleh adang dang ho ngen ahiuve, tin memorandum chun aseiyin ahi.

Chubanin jong, Salai Holdings khut’a sum ana heng ho sum muna chu niseh’a athem thema akholdoh uho, marup ho, neile gou ajohdoh naiva kon amu uho, gam ajohdoh uva kon amu uho, bilba-khutjem ho ajohdoh naova kon umu uho, chuleh retirement benefit amu uho ngen ahi, tin memorandum chun aseibe in ahi.

XXXXXXX

Assam a numei IAS officer masapen Parul Devi Das, COVID-19 natna a thi

Guwahati, Apr. 27: Additional Chief Secretary, Assam anahi leh Assam gamsunga dinga numei IAS officer masapen Parul Devi Das chu COVID-19 natna toh kisaiyin private hospital khat’a Monday nichun ana mollemtan ahi.

Assam-Meghalaya cadre officer Das hin 1980s laiya Meghalaya gama jong sottah na anatoh ahi. Ama hi Shillong khoi a anapeng leh hung seilen ahi. Chuleh themjilna lampanga Loreto Convent akon hung kijiltou ahi. Apa (L) Ramnath Das chu Assam cabinet minister khat anahi in, asopipa Naba Kumar Das jong Assam chief secretary anahi ahi.

Assam chief minister Sonowal in lunghempina thu aseina achun, atohna angailut, akhohsah, chuleh apottha jeh’a vetjui thei tah Parul Devi Das in state administration a pan alahna hohi a-imatih chana mijousen kitil khouna hijing ding ahi. Administrative officer khat hinan Parul Devi Das in mipi dinga ntatoh poimo tah anatoh ahi. Ama thi hi state dinga vangsetna khat ahi, tin aseiyin ahi.

Xxxxxxxx

Mizoram in COVID-19 case thah 103 mudoh kit, agoma case 5,513 lhingta

Aizawl, Apr. 27: Mizoram in tuni chun chapang 19 panna in Covid-19 case thah 103 ana mudohbe kit in, chutoh lhon chun tuni chana Mizoram gam sunga Covid-19 case kimudoh jat agomin 5,513 ana lhingtan ahi, tin official thulhut khat chun aseiyin ahi.

Covid natna nei kimandoh mi 103 ho lah’a achun mi 39 in travel history anei uvin, adang mi 64 hochu contact tracing kibolna akona kimandoh ahi, chuleh Central Reserve Police Force (CRPF) personnel mi 8 leh Assam Rifles staff mi 2 jong apange, tin official thulhut khat chun aseiyin ahi.

Aizawl district hi case thah kimudoh tamna pen ahi in, case 86 ana kimudoh ahi, chuleh abantah a pang Mamit district a kon case 6 ana kimudoh ahi. Case adang hochu Lunglei, Serchhip, Kolasib, Champhai chuleh Lawngtlai district ho’a kona ana kimudoh ahi.

Mizoram gamsunga tuhin active case 769 aumin, tuni chana Covid natna akon damdoh jat mi 4,731 alhingin, thina tohjat mi 13 alhingtan ahi.

Mizoram in tuni chanin Covid-19 test hi sample 2,93,904 aboldoh tan ahi. Hichengse lah’a kon sample 3,488 hohi Monday ni’a test ana kibol ahi. Alamngkhat’a, kum tamlang mi 43,627 panna in Mizoram in mi 1,76,327 Covid vaccine akapdoh tan ahi. Hichengse lah’a kon mi 43,264 hohi anivei channa jong kikap ahitai, tin State Immunisation Officer Dr Lalzawmi in aseiyin ahi.

xxxxxxxxxxxx

Nagaland Govt. in April 30 akon May 14 chan gamsung pumpi lockdown ding’a phongdoh

Kohima, Apr. 27: Nagaland State Spokesperson leh Advisor Mmhonlumo Kikon in tuni lhah chun Kohima ah press conference abolna’a Nagaland gamsung pumpi ahung lhung ding April nisim 30 akon May nisim 14 chan’a lockdown um ding in phondohna ananei tan ahi. Chuleh hiche thulhuh nahi tuni cabinet meeting toukhom na’a kila ahitoh lhon’a guideline ho April nisim 29 leh kisodoh ding ahi. Gamsung’a lockdown chelhapi ding’a thulhuh na kinei na ajeh hi Covid natna kilason ho daldoh/venbit na ding ahi.

Hiche toh lhon’a Mmhonlumo Kikon in lockdown phatsung’a kikhah ding phabep atahlang na’a School, College, Education Institution, Hostel leh Vocactional Training Institutes ho kikhah ding ahin online classes ho vang akiphal naban’a kitilkhou jing ding ahi. Chuleh cinema hall, theatre, sports complex leh adang dang jong kikhah ding ahin mipi kikhopna, hou inn ho containment zone sung hilou ho SOPs phatah’a jui pum’a 30% capacity phal hiding ahi ati. Aman aseibena’a State entry point jouse’a testing centre kikoi ding chuleh Govt. office jouse roster system dungjui’a 50% a kai thei ding ahi. Chuleh mipi lah’a facemask bol lou jouse Dk. 200 kileusah ding ahi tinjong aseibei.

Xxxxxxx

India a Case thah lakh 3.23 kimube

New Delhi, April 27: Achesa nidan 24 sunga India a Covid-19 positive case 3,23,144 akimube in, natna nei agom a 1,76,36,307 lhing ahitai. Hiche lah a active case 28,82,204 um ahi. Hiche phat sunga natna a mi 2,771 thi ahin thina toh agom in  1,97,894 alhingtai. Chuleh recovery rate 82.54 per cent ahi tai tin Union Health Ministry data chun asodoh in ahi.

Alangkhat a Maharashtra a case athah 48,700 kimu a chuleh Uttar Pradesh gam a 33,351 kimuve ahi. Tuesday jingkah chan a India gam in United Kingdom a kon oxygen concentrator 95 chuleh ventilator 100 amu ahitan, gamsunga Covid 19 second wave akisei khoh lai ahi. State chom chom in oxygen angaichat chuleh alhahsam thu asei jing jou Monday nikho a Ministry of Home Affairs in India in oxygen anei lhing nan ahivanga apoh le na a boina um ahi, tia anasei ahi.

Alangkhat a, achesa Sunday nikho a Karnataka CM BS Yediyurappa in ni 14 lhing Lockdown agamsunga chepi dinga thuphon anei ahitai. Chuleh Covid-19 case atam jing toh kilhon a Assam gam a jong May nisim 1 chan Night Curfew um dinga Tuesday nikho a Assam sorkar in thuphon aneitan, jan nidan 8 a kon jingkah nidan 5 chan curfew achepi diu ahi.

Union Home Ministry in Tuesday nikho a Thailand gam a kon medical oxygen hung kipo India ahung lhung tan, Singapore khopi a kon tanker akeu (empty) phabep jong kipodoh ding ahi, ati. Oxygen thu a gamsung in boina atona chunga Covid-19 case atam cheh cheh jeh a alangkhat a Delhi High Court a political leader, campaigner ho chunga action lah dinga case kisem ahi.

Tuesday nikho a ‘star campaigner’ leh political party jousen West Bengal assembly election sunga Covid-19 dan apalkeh jeh uva lamkai ho chunga FIR jih dinga hehna kisem ahi in, Uttar Pradesh DGP anahi chuleh Centre for Accountability and Systemic Change (CASC) chairman Vikram Singh in application apeh a, achesa kal khat sunga West Bengal a campaign bol jouse ‘home quarantine’ bol tei nadinga Centre leh EC in thupeh anei dinga thumna anei ahi.

Xxxxxx

Oxygen tonne 70 Delhi lhut hita

New Delhi, April 27: India sung ading a Oxygen express train masa pen chu tuni in Delhi anal hung tan ahi. Hiche train chun Delhi khopi sung hospital ho a jahding oxygen tonne 70 lam analhut ahi. Hiche oxygen ho chu Raigarh, Chhattisgarh akon hung kipo ahi.

Indian railways in covid gal sat na chung ahi thon lou a panlah na anei ding ahi tin Railway Minister Piyush Goyal in ana sei in ahi. Tu masang jep a chu Railways in Angul, Kalingnagar, Rourkela le Raigarh akon a Delhi a jahding Oxygen pohding ana got u ahin hinlah tuchan in train ani veichanna ding hi akisei hihlai in ahi.

Hetthei khat chu achesa nidan 24 sung ahi Delhi sung a covid akon a thina toh hi mi 380 lam ana lhing ahi.

Xxxxxxxxx

India a covid case khan jing hi hospital a umding kichu jeh le mipi kititna tam jeh ahi: WHO

Geneva, Apr. 27: India mipi ho in ajeh apol beihel a hospital amoh dal dal ule mipi  kititna aum jing hin covid case gamsung a akhangsah ahi tin World Health Organization (WHO) in tunin hetsah na ahin nei uvin ahi. India sung a thina toh hi lakh 2 lam hung lhing ahitan, hospital ho in lupna ontah loutoh lhon a koima umnading mun pelou a ana nodoh pan u ahitan ahi.

Hetthei khat chu India sung hatah a aboitah toh lhon a WHO in  oxygen concentrator 4000 lam kithopina a ana peh u ahitan ahi.  Hiche oxygen concentrator pehdoh na kinei ho hi energy source bou naicha ahi tin WHO spokesman Tarik Jasarevic chun ana sei in ahi.

Jasarevic chun asei na a covid natna nei ho hi 15 percent bou in hospital angaichat ahin, ahiding bangtah a hospital jotna akinei le oxygen alut ding jat ho jong hi lhom jep ding ngaichat na hi lhom ding ahi tin ana sei in ahi.

Xxxxxx

Bangladesh in Independence Kum 50 lhinna mang, 1971 Liberation War toh kisaiya Indian Sepai khat jong kipa man pe

New Delhi, Apr 28: Kum 71 war veteran Karnataka Karwar akona Bangladesh Liberation War 1971 laiya galsat a ana pang Bangladesh government in independence day 50 lhinna aman na March 2021 ah kipaman anape in ahi. 1971 kuma chu kum 19 anahi Govind Gaonkar chun Indian Army chu tankers specialist dan a alut toh kilhon in 22 Mountain Regiment ah ana umin ahi. Hiche kuma chu Bangla Vimochan warfront a post a um ahi, hichea hin aman Prestigious Army Gallantry medal jong ana sangin ahi. Apa Raya Gaonkar jong Indian Air Force a natohna nei ahi. November 1971 achu Naga Regiment noiya Gun Position Officer dinga Shikharapura, East Pakistan tua Bangladesh a ana um ahi. Independence kum 50 lhin manna dingin Bangladesh in kin chom chom jong agongin ahi. Independence day chu March 26 leh 29 sunga man dinga tohgon anei ahi. Hichea chun Gaonkar leh ajinu jong Indian Sepai dang 29 toh jauding a kou ahi.

Gaonkar in aseina ah hiche kingon a kou na eikinei hin gal kisat lai phat eigel dohsah tin aseiyin ahi.

Bangladesh in kipaman (award) apehna dingah Gaonkar chun kum hijat jouva akinaipi gam sepai hon akithopi na ageldoh hi thil thupi tah khat ahi tin aseiyin ahi.

Army sunga kum 21 natohna anei jouvin Gaonkar chu helicopter pilot ahina akonin retired ana hitan, tuhin aji toh Karwar ah hinkho amang tan ahi.

Xxxxxxxxx

Leiset chung gam chom chom in Covid chung chang’a India kithopina pe

New Delhi, April 27 (IANS): Leiset chung gam chom chom ho in India sung a covid natna hatah a ahung um toh lhon in kithopina jat chom chom ahin pe jing uvin ahi. Thuso kimu dungjui in US, UK, France, Ireland, Australia, Germany, Saudi Arabia, Singapore, Hong Kong, Thailand, the UAE, Kuwait le Russia ho in kithopina jat chom chom ahin peh u ahitan ahi. UK  in oxygen concentrator 495, non-invasive ventilator 120 le  manual ventilator 20 lam tu kal sung in ahin pe uvin ahi. France in jong phase 2 a relief ahin pohsah diu ahidan jong tahlang na ahung kinei in ahi. France in phase masa ahi oxygen generating unit 8, liquid oxygen,  respirator 28 le 200 electric syringe pusher 200 lam ahin pe uvin ahi akiti. Ireland injong oxygen concentrator 700 lam ahin thot uvin ahi. Thuso kimu dungjui in Germany injong  ventilator 120 chuleh KN95 mask million 80 lam ahin thot uvin ahi. Australian Prime Minister Scott Morrison in jong tuni in a govt in  ventilator 500, surgical mask million khat le p2 500,000 lam chuleh N95 masks, 100,000 goggles, 100,000  gloves le face shield 20,000 lam apeh doh ding dan u hetsah na ana nei in ahi. Kuwait le Russia injong lou le ai ahin peh diu dan tahlang na an anei uvin ahi. Gam chom chom akon in private injong kihtopina ahung jing in ahi akiti. US President Joe Biden in Prime Minister Narendra Modi toh phone a kihou na ana nei jou in kithopina ahin thot ding dan u jong tahlang na ana nei in ahi.