ZoRO Northern Zone in ZoRO kum 31 lhin nit nanei; Amollem saho...

ZoRO Northern Zone in ZoRO kum 31 lhin nit nanei; Amollem saho geldoh naleh jana kipe

252
0
SHARE

ZoRO Northern Zone in ZoRO kum 31 lhin nit nanei; Amollem saho geldoh naleh jana kipe

B.Lalboi Gangte

CCpur. May 20 (ET): Zo Re-unification  Organisation, Northern Zone in tunin ZoRO kiphudoh kal Kum 31 lhinna nit-na kingon (L) Albert Gengoukhup Mate chenna inn mun’a ananei uvin ahi. Kingon achun ZoRO GHQ leh Northern Zone a lamkai aum talou (L) T.Gougin Zou President  GHQ, (L) Thenzakham Finance GHQ, (L) Lalneithang Vice President GHQ, (L) Albert  Gengoukhup Mate President Northern Zone, (L) Nehkhojang HQ Gen Secretary hocheng chu ZoRO Northern Zone lamkai hon jana anape uvin ahi. Hiche kin’a chun ZoRO Northern Zone ah lamkai ho jouse leh Kuki Inpi, Churachandpur noi’a bakhai kiloikhom naho’a lamkai luboh jousen jong pan anala uvin ahi. Thangtinlal Simte Former Gen.Secretary ahoulim na’a ZoRO hi ZMC lamkai na’a 1988 kum’a Champhai, Aizawl khopi mun’a Chin Hill, Bangladesh leh India sung’a cheng hon amasapen ding in Conference ananei uvin ahi. Chuleh T.Sailo, S.Thangkhangin leh T.Gougin Zou kihoutoh nanoi’a Zo-Re-unification Organisation (ZoRO) kiti Zo-soun hon atumbeh’a kivaipoh naleh kivaihopna nei ding ti’a kalson na ahin neipan ahi. Gam beh 3 tichu India, Bangladesh leh Burma gam ho’a Movement nei nading in lamkai ho makai nan kalson na tuni chan ahin nei jing uvin ahi. United Nation toukhom na 17 session ah ZoRO in palai akisol tan chule United  Nation toukhom na’a ZoRO in 4 vei Zo-soun chate gam 3 umho kipum khat tah’a achen khom thei nading uvin thuseina jong akinei tan ahi ati.

Hiche toh lhon’a Khaijang Haokip President ZoRO Northern Zone in houlim na aneina’a ZoRO Northern Zone hin phutdoh’a hinpui hoi (L) Albert Gengoukhu Mate jeh’a tuni chan’a ZoRO in kalson na hin kinei tou jing ahi. ZoRO lamkai hon maban’a ZoRO tup le doi asuhbulhit nading’a pan alah tou jing ding uvin jong temna aneiyin ahi. Chuleh George Guite,  Gen. Secretary ZoRO Northern Zone in houlim na aneina’a  ZoRO hi Mizo pao tho ho ding bou hilouva Chin Kuki Mizo akilai guijop piu leh thisan’a asopi ho ding’a kipumkhat na ahi toh lhon’a Manipur ading’a thusim (history) khat isem doh’u chu Chin, Kuki, Mizo Conference leh Moreh a ZoRO conference jong anakinei kit tan ahi. ZoRO hin Chin Kuki Mizo hobou hilou thisan’a isopiu hoi lai gam’a um uham ti holdoh na’a jong kinei ahi in Kachin leh eiho hi thisan’a sopi khat ihiu ve ti phudet najong ana kinei tan ahi. Eiho kivop khom thei nasun hi ZoRO bou ahi jeh in hiche plate form ah ikisuh khom uleh kingailut na sang ding tohdoh jong tam ding ahi.

Hetthei khat chu Zo-Reunification Organisation (ZoRO) in atup leh adoi chu “Zo Nation Convergence of Kuki,Chin, Mizo, Kachin People” lekhabu 3rd Edition ah Zo chate het ding in ZoRO doi phondoh na akinei jin chule hiche hin Kuki, Chin, Mizo leh Kachin ho jouse kijopkhomna / kipumkhom na “Zo Nation”(Zo Nampi)” jat leh nam khat, thisan khat, insung khat, lungkhat leh thakhat’a kijopkhom’a pansatna khompi / khuombul khat’a ding’a din thei na ding’a hoplien tah neipum’a kichi pi ahi. Hiche lunggel leh natoh hi “Zale’n-gam the Kuki Nation (1988)” lekhabu ana kisodoh apat ahitai ati. Hiche lekhabu achun Zale’n-gam in ahop sung’a phung leh chang tichu Aimol apat Zou (A – Z) abon chan anakisun in ahin hiche’a phung le chang, jat leh nam ho min kisun abukimlou dan 2013 in ahung kilangdoh in ahi. KNO  leh ZoRO lungkhat thakhat leh khombul khat’a 2013 apat ahung ding khom apat in Mizo hohi kuki te toh bul leh bal khat, kondoh na kibang ahi ati hetsaobe na ahung umdoh in ahi. Hitobang chun Kuki ho, Barak Valley, Assam a-um, Tripura leh Chittagong Hill tracts, Bangladesh a umho jouse hi Chin te leh Mizo hotoh ZoRO noiya ahung kipumkhom pan thei taovin ahi.  A to Z list lah’a um 2013 apat sopi ule nao dang hung kiholdohbe ho chu Burma gamsung Kachin State ah um Kachin te leh Arunachal Pradesh a um Heimi, Nahen,Keisang, Chamkot,Macham, Touhi, Sitnou, Sitsaw, Nahen, Pangmi, Para, Makury Burma Sagaing Division aum holeh Nagaland ah Konyak leh Khimnungan ho ahi. Tunaicha’a H. Ngurdawla, Retired School Inspector, Govt. of Tripura in lekhabu khat anasut “Zo Ethnic (Kuki) Tribes in Tripura” kiti achun Ranglong tia kihe miho, Nagaland gamsung Peren District ah abusa uvin, Manipur gamsung’a Tamenglong District aum hon jong Zo chate, Zo chilhah te kahiu ve tin ahin phongdoh uvin hiche phung leh chang jat leh Nam ho chu Zaliangrong, Zeinu, Lengmei, Rongmei leh Kabui tinjong akihe uvin ahi.

Alangkhat’a United Nations Permanent Forum On Indigenous Issues (UNPFII) leh United Nations Declaration on the Rights of Indigenous Peoples (UNDRIP) in aphatsah dungjui in Zo Nam mite in Right to self-determination (eimachang kivaihopna / eimachang a khonung ding khankhuo / nunkhuo kigeltheina) thaneina anei ding chuleh nam khat chikhat hina chu khombul khatseh bouva athah din doh kitthei na ding leh gam thum (3) tichu India, Myanmar, Bangladesh a kithe thang talou ding tihi ZoRO in atup leh adoi pipen chu ahi.