Yaingangpokpi’a ‘chamna kadei uve’ tia awging’a kisam; curfew lahdoh ding’a ngehna um

Yaingangpokpi’a ‘chamna kadei uve’ tia awging’a kisam; curfew lahdoh ding’a ngehna um

211
0
SHARE

Imphal, Dec 22: Phaicham’a boina aumjing lai leh thilsoh ho sorkar in amoh vet tho laiyin Imphal East leh Ukhrul district kikah’a um Yaingangpokpi’a um khosung khat’a nam chom chom kiloikhom hon, “thakhat ihiuvin, chamna kadeiyui”, tin awging in asam uvin ahi.
Yaingangpokpi hi Tangkhul, Kuki, Meilhei chule nam chom chom chenkhom na mun ahi’in, a-itih’a kon lungmong’a ana chengkhom-u ahi. Imphal-Ukhrul kikah lamlen, Khurai leh Seijang kikah dinmun boijing’a chule lamkai khatcha in boina suhthip nading’a pan alah lou jou nung’a Yaingangpokpi area Chingmi Tamni Peace Committee in Yangangpokpi Keithel community hall’a toukhomna agon ahi.
Tangkhul, Kuki, Meilhei chule nam neo achom chom hojong public meeting’a apang uvin ahi. Toukhomna’a houlimna nei hon nam chom chom lungmong tah’a achenkhom suhboi nathei dinmun umjing ho thu asei uvin chule mipi hon kihetkhel nathei thu lamleng ho amoh sei lou diuvin kouna jong aneiyui.
General secretary, Yanganpokpi area Chingmi Tammi Peace Committee, Elangbam Shyamkishore in thuso miho akimu na’a chun committee hi 2001 kum’a kisem doh ahitan, hiche’a kon nam kikah’a boina thei dinmun aum chan’a pan alahjing ahi, tin aseiye. Sorkar in Khurai leh Seijang kikah lamlen’a phat teplou curfew akoi alahdoh diuvin ngehna anei uvin ahi. Alangkhat’a, gamkaiya um hon hunam mang louva tribal Christmas leh New Year mang ding’a che ho lamkah’a asuhboi louna diuvin temna jong aneibe uvin ahi.