“World Suicide Prevention Day 2019; Dist. Level leh themjil na inn mun’a...

“World Suicide Prevention Day 2019; Dist. Level leh themjil na inn mun’a Working Together to Prevent Suicide” thupi noiya kingon kibol

147
0
SHARE

“World Suicide Prevention Day 2019; Dist. Level leh themjil na inn mun’a Working Together to Prevent Suicide” thupi noiya kingon kibol

B.Lalboi Gangte

CCpur. Sept. 10 (ET): District Health Society, National Health Mission, CCpur noi’a National Mental Health Program tohgon nan tunin CMO Conference Hall, IB Road mun’a “Working Together to Prevent Suicide” thupi mangcha in District Level ding in World Suicide Prevention Day 2019 ananei chelha in ahi. Kingon achun Jin-gun in Pawan Yadav, IAS, Deputy Commissioner/Chairman, District Health Society (DHS), Churachandpur; Kin-neipa in Dr. Vumchinpau Tonsing, Chief Medical Officer/District Mission Director, DHS Churachandpur ; Jin- ja um in Dr. Lalzuitluangi, Medical Superintendent, District Hospital, Churachandpur leh Dr. Jamthianlal Valte, DFWO Churachandpur anapang uvin ahi.

Kingon phatsung’a L. Thanggoulien Khongsai, MPS, DSP Churachandpur leh Dr. Chinggouman Guite, Psychiatrist, District Hospital, Churachandpur teni Resource Person in anapang lhon in “Working Together to Prevent Suicide” thupi pansa in ahung kikhom mipi ho tilkhou na aneilhon in ahi.

Chuleh District Level World Suicide Prevention Day 2019 kimanchah na phatsung’a CCpur District sung’a NGOs chom chom leh IDSP Ccpur akon District Social Welfare Officer pannan Project chom chom’a Supervisor hon jong pan anla uvin ahi.  Pawan Yadav IAS  in houlimna aneina’a tuni kingon kiman na jeh hi second 40 sung seh’a jong ama le ama kithat aum jing in chuleh hahsatna chom chom tokhah jeh’a ama leh ama kitha khangdong ho atam dehset in ahi. World Health Organisation hin atahlang na\a kum seh in khovel pumpi’a ama le ama kithat Lakh 8 val um jing in chuleh ama le ama kithat hi kum 15-29 kikah ho atampen in ahi. 2018 kum sung’a World Population Review in atahlang na’a Sri Lanka gamsung’a milip Lakh 1 um nalah’a ama le ama kithat 35.3 percent alhing in chuleh South Korea a 28.3% apha in ahi ati.

Alangkhat’a Rayburn High School (CBSE), New lamka tohgon nannoi’a “Working Together to prevent Suicide” thupi pansa’a Rayburn Chapel mun’a World Suicide Prevention Day man kimanchah na phatsung in Rayburn High a Class XII simlai hojouse pan nan  Jin-gun Dr. Vumchinpau Tonsing, CMO Ccpur leh Jin-ja-um Thangkhansiam Naulak anapna lhon in chuleh Rev. Dr. Khen P. Tombing in Principal address ananei in ahi. Chuleh Rayburn High in achesa Sept. nisim 9 nikho in High School a Encourage Suicide Prevention leh Mental Health Awareness thupi pansa in Poetry, Painting leh Slogan writing kitetna ana nei uvin ahi.  Painting Competition achun thupi ding in “Let’s Choose Life” kiti kitet na’a a khat na  in Tuankhanlal of Class XII Section D in kipaman Dk. 2000/- ; 2nd na in Gullit Paulalsiem of Class XII section F in Dk. 1500/- leh 3rd in V. Muanlalsang of Class XII section D in Dk. 1000/- anakisan uvin ahi.  Chuleh Slogan Writing Competition a thupi ding in “Suicide Prevention” kiti na’a 1st in Loukham Jammuankim of Class XII section D in kipaman in Dk. 2000/- ; 2nd a  Vungngaihkim of Class XII section A in Dk. 1500 leh 3rd na’a Samuel Infimate of Class XI section F in Dk. 1000/- akisan uvin ahi. Poetry Competition a thupi “Let’s Choose Life” n’a 1st in Khumnunkim of Class X section D in akhat na in kipaman Dk. 2000/- ; 2nd in Mercy Chingthianmawi of Class XII section F in Dk.1500 chuleh a 3rd na in Pauginsang Munsong of Class XII section B in Dk. 1000/- anakisan uvin ahi.

Alangkhat ah District Hospital Duigailong Tamenglong mun’a District Mental Health Programme, District Health Society Tamenglong vaisaina noi in World Suicide Prevention Day anamang uvin ahi. Kinogn achun Tamenglong DC Armstrong Pame, Canara Bank Manager Dinimang Daimai leh Chief Medical Officer Dr. Chambo Gonmei hochu sahlut tah in kouna anachang uvin ahi.

Hiche toh lhon’a District AIDS Control Officer chuleh DNO NCD Cell jong hi Dr G Majachunglu in Suicide kibol lona ajeh pen kicheh tah in tahalang na ananei in ahi. Hiche nikho hi achesa 2003 akon hung kimang pan ahitan chuleh District mipi ten suicide bol aphatlou dan ahet ding’u deisah najal’a Tamenglong District sung’a amasapen ding’a World Suicide Prevention Day kimang ahi ati.

India gammi akidalha umlou ding ahi, tia NRC thu a Smriti Irani in sei

Kolkata, Sept 10: Union Minister Smriti Irani in Tuesday nikhon National Register of Citizens (NRC) doudalna thu seiya West Bengal Chief Minister Mamata Banerjee demna aneiyin, Centre a BJP lamkaina sorkar in gamsung mi jouse ‘rights’ ventup dinga kitepna anei ahi, ati.

Dan dihlouva gamsung hunglut ho dan dungjuiya kibol ding ahi, ati. “India gammi akidalha umlou ding ahi’in, gamsung miho ‘rights’ kihuhbit ding ahi”, tin Union Minister Irani in NRC thu a aseiyin ahi. NRC douna thu seiya Mamata Banerjee demna aneiyin, dan dihlouva gamsung hunglut ho thu a adinmun avetsah ahi, ati.

“Mamata Banerjee dinmun hi gamsung mihon centre sorkar in phatchomna agon ho akilah theilou nadiu ahi’in, loubol mi chule numei leh chapang kithopina dinga tohgon ho asuhboina ahi”, ati. West Bengal sorkar in industry kisemdoh ding asuhboi ahi’in, West Bengal gam a Lok Sabha election a hi gammi hon kikhelna adeiyu avetsah ahi, tin Smriti Irani in aseibe in ahi.

AIMS in Meilhei ho ST a apanna dinga STDCM tohgon tosot dinga phondohna nei

Imphal, Sept 10(UNA): Apunba Ireipakki Maheiroi Singpanglup (AIMS) in Meitei/Meetei ho Scheduled Tribe List a apanna dinga Scheduled Tribe Demand Committee Manipur (STDCM) in phat sottah kiphinna anei tosot dinga phondohna anei uvin ahi.

Kwakeithel Junior High School a office complex mun a thuso miho Tuesday nikho a akimupi nauva Vice President, AIMS, Saikhom Premchand in gamsung mi dihtah ho huhdoh nading a Meetei/Meitei ho scheduled tribe list a pansah ding hibou alampi ahi, tin aseiyin ahi. Gamdang a kon hunglut be jing gamdang miho a kon gammi dihtah ho venna dinga Meilhei ho Scheduled Tribe list a pansah ding hi tu dinmun a ngaicha ahi, ati.

India Census 1891 dungjuiya Manipur gam hi Forest tribe a kisimtha ahi’in, British vaipoh sung 1931 census a jong Meilhei hohi scheduled tribe list a apan u kicheh tah a kijih ahi. Chule Manipur gam India a akilahlut jou 1951 census a jong hitia kijih ahi, tin vice-president in aseiyin ahi. ST a panna dinga thumna kinei ho thu a AIMS in STDCM tohgon ho bulhing set a atosot ding ahi, tin aseiyun chule simlai kiloikhomna AIMS in gammi dihtah ho ventup nadinga amopohna aman a pan alahding ahi, tin aseibe in ahi.

Interlocutor RN Ravi leh NSCN-IM in Dimapur a kihouna nei

Dimapur, Sept 10: Indo-Naga Peace Talk a Centre sorkar thalheng a Interlocutor a pang chule Nagaland Governor jong hi a RN Ravi leh Th Muivah, General Secretary, NSCN-IM in Monday nikhon Dimapur khopi a kihouna aneiyin ahi.

Nagaland Polcie Complex, Dimapur mun a RN Ravi in akimupi (informal meeting) ahi’in, thulhut dungjuiya RN Ravi leh Th Muivah in aban a chamna thu kiseina ding thu aseikhom lhon ahi, ati. Kihouna hi apat vah kit diuva tahsanna um ahi. Ahivanga thulhut in akit a toukhomna anei nadiu nikho aseideh pon ahi.

Nagaland hilouva New Delhi khopi a kihouna asem vah kit diuvin thulhut chom khat in aseiyin ahi. India sorkar leh NSCN-IM hon kihouna asem nauva hi ‘Naga national flag’ leh ‘Naga constitution’ thu bou kiseilha theilou ahitai, tia tu masanga kon thuso a kisei jing ahi. September nisim 9 nikho a kihouna aneilhon hi tamtah in ahetnom ahi. PM Modi in tukum October lha sunga Indo-Naga Politics thu seilhah ding adeiye, tia jong RN Ravi in anasei ahi.

Nagaland a tribe ni khah a gam leiset kichuna Lamhainandi khosung dinmun boi jing nalai

Dimapur, September 10: Peren district, Lamhainamdi kho a dinmun aboi jing nalaiyin, kinotona thilsoh akisei tahlou vanga police tamtah aum nalai uvin ahi.

Achesa Friday nikho a thal choi mi phabep in galmanchah hoitah tah akichoi uva, khosung hi tup chom neilouva meithal a anakap u ahi. Deputy Commissioner, Peren, Sentiwapang Aier NCS in thuso miho akihoupi na’a, achesa Friday nikho thilsoh jouva kon athah a kisemdoh Lamhainamdi kho sunga meithal kikapna thilsoh aum tapon, dinmun aboi tapoi, tin photchenna aneiyin ahi. Gam leiset thu a tribe ni kikah a boina anaum hi kum phabep lhing ahi.

Tu dinmun a boina aum tapon, vaipohna noiya um vang hinalai ahi. Thilsoh ima aumpon, police hon angah jing uvin, boina aum tahlou ding hi kinepna ahi, tin aseibe in ahi. State sorkar in hiche thu aganna thei pen a apohdoh a chule boina asuhlhap ding DC in akinepna thu jong aseiyin ahi. “Sorkar in pan alah ding hi kinepna ahi. Tua hi athu seilhahna dinga Cabinet Sub Committee kisemdoh ahitan, thuhilna kingah jing ahi”, ati.

Alangkhat a Zeliangrong Youth Front (ZYF) in India sorkar chule Nagaland sorkar in gam leiset thu chule nam mite thu ahiteng Zeliangrong miho agelneo lou diuvin asei uvin ahi. Zeliangrong mite hon gam leiset lentah aneiyu hi melma chom chom hangsan tah a ana dou a pupa khang a kon kiloson ahi’in, hiche jeh a tukhang a nam miten pupa gam apehdoh nadiu thu aumpon, gam lhaso nathei dinmun kitoh jong leh kipedoh louding ahi, ati.

Zeliangron nam mite hi dan jana nei ahi, tin ZYF in aseiyin chule thilsoh akhohset kah a Nagaland chule Centre sorkar in pan alah dinga ngehna anei uvin, sihnei langneina umlouva gamgi thu kholna anei uva nam chom chom chenkhomna gam a boina suhlhap nadinga gamgi akai diuvin jong temna aneibe uvin ahi. Vaipo hon gelkhohna aneilou jeh a thilse aso a ahileh India sorkar leh Nagaland sorkar themmo kichan ding ahi, tin aseibe uvin ahi.

Kiloikhomna 6 in hetpehna umlou khosung ho ‘eviction’ bol ding’a thumna nei

Dimapur, Sept 10: Naga insung a chamna leh kipunkhomna aumding gelkhoh najal a dan dihlouva kho kiphut hetpehna umlou (unrecognized kho)- Kehoi, Pushito, Vihuto leh Hetoi khosung eviction bol dinga kiloikhomna 6 in thumna anei kit uvin ahi.

President,  Zeliangrong Baudi (N), C R Zeliang, president, Zeme Council (N), Dr Tumda Newme, president, Liangmai Council (N), Khenglubo, president, Rongmai Council Peren, Ginbunlung, president, All Zeliangrong Student Union (N), Dithoibo Newmai leh chairman, Lamhai Village Council, Haibamko in soi akaina thuso a chun achesa September nisim 6 nikho a thalchoi hon abulu Lamhainamdi khosung hi Lamhai-Dungki gam a kisemdoh ahi’in, akinaipi khosung mihon dan dihlouva alokhum/alah uva, state sorkar henga jouthu a hehna asem uva, khosung mihon hem leh thal achoi uve, tia jouthu a hehna asem u ahi, ati.

Dimapur leh Peren district kah gamgi a boina semdoh ding atiu ahi, ati. Home Commissioner in July nisim 30 nikho a chamna ding gelkhohna jal a chamna asem diuva alangni henga temna anei ahi, tin aseiyin chule pupa gam huhna dinga khosung mihon hem leh thal achoi nadiu dinmun hi sorkar in asemdoh ahi, tin kiloikhomna gup in aseibe in ahi.

“Gal laiya banga kibuluna thilsoh hi dan dihlouva kisemdoh a hetpehna umlou khosung toh kithutona neiya private army ahilouleh group khat in abol ahi’in, M16, AK 47 rifle leh meithal adang dang chang kikapdoh 217 vel kimudoh hin lungmong tah a chenkhom nathei ahitapoi, ti avetsah ahi, ati. Hiche jeh a sorkar in thudoh donbutna aneiya chule hetpehna umlou khosung a dan dihlouva cheng ho evict (anodoh) dinga Zeliangrong kiloikhomna in sorkar henga temna anei ahi’in, pupa gam venna dinga panla a Zeliangrong ho themmo kichan louding ahi, tin aseibe uvin ahi.

Babysana insung mite ‘statement’ aganna thei pen a lah dinga JAC in ngehna nei

Imphal, Sept 10: Babysana thi thu toh kisaiya kisemdoh JAC in magistrate umna a vangsetna toh nu insung mite statement 164 lah dinga sorkar henga ngehna anei uvin ahi.

THAU ground mun a JAC Convenor Laishram Gyaneshwori in thuso miho akimupi na’a, Chief Minister in Babysana insung mi- apa, anu leh apaneo statement 164 la dinga IG Kailun leh SP Meghachandra thu apeh ahitai, tin aseiyin ahi. JAC leh Chief Minister in achesa September nisim 5 nikho a kihouna asemna a CM in akiman JAC member ho lhadoh ding, CBI khut a case pehdoh ding chule vangsetna toh nu insung mite statement 164 Magistrate umna a ni 10 sunga lah dinga kitepna aneijeh a kiphinna phat chomkhat a dinga kiladoh ahi, tin aseiyin ahi.

Thumna hohi bulhit ahi loule JAC in kiphinna abol kit ding, hiche teng chule CM toh kihouna kisem talou ding ahi, ati. IG Kailun leh SP Meghachandra in magistrare umna a statement 164 alah loulai ahi’in, ni 5 che ahitai, tin Gyaneshwori in aseiyin chule CM in hiche thu hi agelkhoh a agannathei pen a IG leh SP in statement alahna dinga pan alah dinga aseibe in ahi. Thutah kholdoh nadinga statement ijat veil ah ding ham, SP Meghachandra in thuso miho henga asei dungjuiya statement 40 akilah nunga jong Babysana chungchang a thilsoh a thutah ima hetdohna umlou lai ahi, tin aseiyin ahi.

Aganna thei pen a sorkar in CBI ho case apehdoh dinga aseiyin chule Thangmeiband veng mihon case hi CBI khut a akipehdoh kahse a Babysana lhagao lungmong a aumna ding chule atosotna a inmai a meivah avah diuvin Gyaneshwori in temna aneibe in ahi.

Simlai khat in hehna asem thu a Court in Kamakhya Pemton College leh MU a vaipo ho kouna pe

Imphal, Sept 10(ET): Kum 24 a upa simlai Shasikumar Sharungbam in ka career authority hon asuhset ahi tia hehna asem thu a court in Kamakhya Pemton College, Hiyangthang a lamkai ho, Principal, Vice Principal, Vice Chancellor leh Registrar, MU chule Mayai Lambi College Principal panna a kouna ape in ahi.

Shasikumar Sharungbam hi Mayai Lambi College a BSc simlai ahi’in, 2013 leh 2014 kum a 1st leh 2nd semester a pachanna anei ahitai. Chule University a kon amu Registration number hi 13381161 (2013 kum) ahi. 2nd semester exam apeh jouva National Eligibility cum Entrance Test (NEET) exam apeh nom a coaching abol nom jeh a college che talou ahi’in, 2015 kum a Shasikumar in NEET exam abol sunga BSc jo ding agot ahi.

Chomkhat jouva Kamakhya Pemton College mun a kichon a angaicha document h, admission fee leh lim (passport) apehlut ahi’in, apet pet a admission apeh louvu, MU authority hon college akhel thei nadinga phalna apeh diu angadinga aseipeh u ahi. Hiche sunga coaching abol jom ahi. 3rd semester exam hi Kamakhya Pemton College, Hiyangthang a 2015  (November) lha a ajoutai kiti hi ama lungdonna sangtah ahi, ajeh chu exam abol lou ahi. MU authority hon apeh Registration number thah 13281782 (2013 kum a issue) a roll number 3106863 a pachanna aneiye ti thu akihetdoh ahi.

Registration certificate ni amu hi MU dan dungjuiya ahitheilou hi ahi’in, Shasikumar jong apa toh kitho registration certificate athah apeh uham ti khol dinga MU authority ho henga che lhon ahi. Donbutna amu thei lhon lou jeh a RTI mancha a achapa in registration certificate athah amu dan dohna anei lhon ahi. Mayai Lambi College a admission akibol sunga Registration Number anei ahitan, athah kipe thei ahipoi, ti thu Shasikumar Sharungbam in ahetdoh a hi kidang asah ahi. Ka career kisuse ahi, tia Shasikumar injong Court of Civil Judge (SR Division) henga Money suit (hehna) asem a dangka 60,00000 compensation apeh diuva ngehna anei ahi.

Court in hiche thu toh kisaiya Kamakhya Pemton College Principal leh Vice Principal, Manipur University Registrar leh Vice Chancellor chule Mayai Lambi College Principal kouna apeh ahi.