Vijay bank kichom Saikul mipi’n demna nei

Vijay bank kichom Saikul mipi’n demna nei

293
0
SHARE

Kangpokpi, Dec.17: Saikul a um Vijaya Bank customer ho leh Saikul CSO hon Vijaya Bank Staff ho’a kon melhetlou mi ni in Dk.6 lakh aguhmangna thilsoh demna aneiyuvin ahi.
Geldohthei khat chu achesa December nisim 11 jingkahlam nidan 11 vel’a chu melhetlou thalchoi min in Vijaya Bank staff ho Champhai vangkho kom’a ana kham lhon’a Dk.6 lakh ana lahpeh lhon ahi. Hitolhon chun tuni chun Saikul Vijaya Bank Customer ho, KSO, Kuki Inpi Saikul Gamkai chuleh Women Union Saikul Gamkai lamkaina in mi phabep in Saikul SDO Complex sung’a kiphinna aneiyuvin ahi.
Kiphin na neiho chu “We condemn act of robbery”, “Bank robbery means robbery of people’s rights”, “The solution to arms robbery is a dead robbery on the spot”, “stop bank dacoity”, “stop robbery culture in Saikul area”, “Mind your own business”, “seek to understand others”, “We want free zone in Saikul Hill Town” tia kisun Placards phabep adom’uvin ahi.
Saikul Hill Town Chairman, Tonglet Chongloi in aseidan in melhetlou hon aguhmang’u sum chu contractor khat ahilou leh sumkolvei mikhat’a ahipo’n, mipi sumjoh ahi. Government in michom teni amatdoh’a dan dungjuiya guotna apeh ding hi mipi jouse’n adeisah ahi tin aseiyin ahi.
ADC Member Thangkam Lupheng in aseidan in Saikul Hill town sung’a hi Bank khat aumlou apoimo jeh’a Vijaya Bank hin gamkai miho ding gelkhohna jal’a Saikul’a branchkhat ahung hon ahi. Tulai hi thiljouse banking system umlouva ahitheilouna khang ahitai. Ajeh chu buhon na ding LPG a pat Simlai ho scholarship geiya Banking system aumlouleh hitheilou ahitai. Ahinlah tuchung melhetlou mini in gamkai sung’a bank khatseh um asuhgim hi saikul gamsung a cheng mijouse asuhgimtoh kibang ahi’n concern authority in hitobang achonvalna neiteni hi agangtheipen’a amatdoh ding in saikul mipi in temna aneiye tin Thangkam Lupheng in aseiyin ahi.
Alangkhat’a Kuki Inpi Saikul Gamkai President, Seikhomang Lupho in aseidan in thilsoh hi’n Saikul gamkai sung’a cheng mimal jouse lungthim hatah in asuna in hitolhon chun mipi’n kilungtoh tah in hiche thilsoh hi demna akineiye ati. Bank hi amin’a seiding in tamtah umjongleh Saikul gamkai sung mipi ho gentheina hetthem Vijaya Bank bou hin branch ahung hon ahi’n, ahinlah thilsoh hin Vijaya Bank natong ho lungsung’a kichatna lentah apendohsah tan ahi. Chuleh tunigeiya Vijaya Bank kikha jeh hin gamsung a cheng mijouse’n simsenlou boina atoh’uvin ahi. Christmas le New Year ahung naitolhon’a bank authority in jong mipi ding gelkhohna jal’a kot ahon din Saikul CSO ho, Kuki INpi, KSO chuleh Women Union in temna akineiye tin Seikhomang Lupho in aseiyin ahi.