Van chunga gamve kisol (Leinuoi, Twikhanglen nuoi leh Lha thah geija...

Van chunga gamve kisol (Leinuoi, Twikhanglen nuoi leh Lha thah geija thil holna um)

413
0
SHARE

Van chunga gamve kisol

(Leinuoi, Twikhanglen nuoi leh Lha thah geija thil holna um)

                    Leiset chung ateh (aneo) tah jeh a vanthamjol’a jong chenna thei mun leh “asung’a um thil” ipi laidoh thei aumdem ti gam khangtou holah a kitetna gei um ahitai. India in lhathah (moon) sung’a thil gakhuol di, gam gave dia ‘Chandrayaan-2’ asol chu lhathah chung’a iti gachuh ham akihet theilou phatna chomkhat chu kijahmat tona umthei talou ahi. ISRO Scientist hon kijahmat tona aumkit tai ativang uva hiche ‘Chandrayaan mission’ hi alolhing sel’e ti asei ngamlou u ahi. ‘Chandrayaan-2’ hi ‘Spacecraft’ (huikong) lenpitah mihem atol leh atou umlou, leiset chung’a kon ‘control’ kibol, lha thah chung’a ga chudi leh asung anuoija ipipi um am, leithao (mineral) itobang bang um’am ti ho  gakhuol dia kisol ahi. Achesa July 22 (2019) ni’a leiset chung’a kon ana kipatdoh September 7/8 jankim vel’a lhathah chung’a gachu ahi. Oltah a lhathah chung’a gachu dia kiguong chu thepna lhahsam jeh hidi ham, hachuh a gachu’a ‘Vikram” kiti abah (a part) khat chu ase abal umdan’a kisei jeh a kihoumat tona umtheilou anahi. Kijahmat tona aumdoh kit tai kiti vang’a gel bang’a asuh asah umlou ti hi govt leh Scientist hon aphondoh nom chetlou uva kisei ahitai. Lhathah sung’a mihem atahsa tah a gachon kha hi USA (Americate) bou ahinalaijun, hijong chu achesa 1969 kum lang chu ahitai. Hiche masang chun Soviet Russia ten mihem jaolouva ‘Space craft’ (huikong) khat anasol uva lha thah sung’a analenglut u ahitai. America te mi 3 lhathah sung’a analenlut uva anam ponlap u ana tundoh u chu mihem lah a lha thah sung gachon masapen ahijeh uva Americta te gam tithei ahi. Tuchan’a lhathah sung’a huikong galenglutsa hi America, Russia leh China ahiuvin India te jong ali channa hideh chet hidan ahi.

                             India govt nin dangka Crore sangkhat lutna’a ‘chandrayaan project-2’ hi abol ahi. Dangka Crore hija hi leisei chung’a inchen louchen semna, inn le lou sahna hon kineileh ichan apahlah lah tadem ti thei ahi. Ahin tulai gam khangtou ho chihna le thepna kitetna’a hi leiset chung le leinoi bou khuolna hitalouva tuikhanglen nuoi leh vanthamjol geija khuolchilna kitetna jong sotna pat um ahitai.  Leiset jong hi van thamjol a-onglaija “gam” (planet) tamtah lah a khat bou ahijeh a mihem chenna leiset chung bon aumtheileh vanthamjol’a adang chenna thei “mun” aumdem ti khuolna kitetna umjing ahi. Leiset chung tobang gam dang khat tou ana um’in mihem tobang, ahilouleh mihem sang’a chihna thepna nei (Extra terrestrial-ET) jong aumkhadem ti hi Scientist ho ginmo ahi. Hollywood Film minthang tamtah jong hiche ET thua pansa’a kibol ahi. Vanthamjol’a ‘Mars’ (Planet) chung’ah twi aum’in mihem jong kichenglut theijinte ti hi kum phabep masang’a America Scientist hon ana mudoh u ahitan vantamjol kisan’a gam kichuna hung umdia kiseina sot ahitai. Alangkhatna seidia, vanthamjol geija gam ve dia kitetna hi mihem papsetna khat ahi. Lei thao le thil mantam dang dang holna a leiset nuoilang, tuikhanglen tolang gei kilaigam ahitan tua vanthamjol’a jong thaotwi leh thil mantam holdi ti ahitai. Chandrayaan-2 project jong hichelam ahi.