Union Minister Gadkari in Dk. crore 3000 lhing project chom chom hongdoh

Union Minister Gadkari in Dk. crore 3000 lhing project chom chom hongdoh

89
0
SHARE

Union Minister Gadkari in Dk. crore 3000 lhing project chom chom hongdoh

Imphal, August 17(ET): Union Minister for Road Transport, Highways and MSME, Nitin Gadkari in Monday nikhon video conference a kon highway project chom chom 13 foundation stone chule gamsunga dinga ‘road safety project’ hondohna aneiyin ahi.

Project a hi agom a lamlen km 316 vel ahop ahi in, dangka crore 3000 lut ding ahi. Chief Minister N Biren Singh in Manipur Bhawan, New Delhi a ‘virtual’ a kibol kin-gouna lamkaiyin, kin gon a DoNER Minister of State (Independent Charge) leh PMO Dr. Jitendra Singh chule MoS Road Transport and Highways Gen. (Retd) VK Singh jong apang in ahi.

Works Minister Th. Biswajit, CAF & PD Minister Shri Karam Shyam, Water Resources Minister Letpao Haokip, Agriculture Minister V. Hangkhanlian, Education Minister Th. Radheshyam, MP (Inner) RK Ranjan, MP (Outer) Lorho Pfoze, MP (Rajya Sabha) Leishemba Sanajaoba, Manipur Tribal Development Corporation Chairman Vungzagin Valte, Advisor to Chief Minister K. Leishiyo, Chief Secretary Dr. Rajesh Kumar leh official dang dang jong Imphal khopi a konin kin goun a apang uvin ahi.

Nitin Gadkari in ahoulimna a, Imphal khopi a highway semhoi nadinga foundation stone hi state sorkar in proposed abol ahi in, DPR jong kisem ahi, ati. North East khantou ding Prime Minister in agelkhoh toh kilhon a Centre in project chom chom apat ahi, tin jong aseiyin ahi.

Central Roads Fund (CRF) chungchang a Gadkari in, state a kon Utilization certificate’ akimu mu teng leh dangka crore 250 additional fund kipeh be ding ahi, tin aseiyin chule Chief Minister in road project ho aganna thei pen a akipat nadinga gam leiset lahna chule ‘utility’ ho abol gang dinga jong temna aneiyin ahi.

Brahmaputra leh Barak vadung a natoh kijou ahitan, twilam (waterways) a thil chule mi poh le thei hiding ahitai, tin Minister pa in aseiyin chule Imphal hi hiche vadung lamlen a kijot to sah thei dinga jong ngaidan aseiyin ahi. Northeast a public transport a dinga thao (fuel) achombeh gon dinga jong aseiyin ahi.

MSME sector in gamsung khantou nadinga pan alah na ho thu aseiyin, MSME unit kikeh let thu a Chief Minister apachat na thu aseiyin, quality hoitah handloom leh handicraft thil gamdang a joh thei dinga akisem nading Special Designing Centre asemdoh dinga jong aseiyin ahi.

Chief Minister in ahoulimna a Imphal-Jiribam chule Imphal-Moreh lamlen kisemphat nading thu a Nitin Gadkari chunga kipathu aseiyin, lamlen teni a hi chuh lai leh munchim nom ahijeh a athupi dan thu jong aseiyin ahi. Union Minister noiya foundation stone tun doh na um a Makru leh Barak lei hi tukum kichai kah a jo dinga aseiyin ahi.

‘Look East Policy’ hi ‘Act East Policy’ a PM Modi lamkaina a akikhel jouva kon Manipur a khantou machalna tamtah mutheiya um ahi, tin Biren in aseiyin chule Imphal-Moreh lamlen four-lane highway a upgrade bol nadinga natoh chelha ahi, ati. Imphal-Jiribam highway sah na project hi land compensation thu jeh a chomkhat avaigei vanga chelha jing ahi in, chule Moreh bypass road leh Pallel-Chandel lamlen jong kisa pan vah ding ahitai, tin aseibe in ahi.

Imphal hi khopi neocha ahi in, the ahitan, hiche jeh a highway semphat ngai ahi. Gadkari in Imphal City a km 25 lhing lamlen highway project a sem dinga ngehna aphatsah jeh a gamsung mihon achunga kipana sangtah anei ahi, tin CM in aseiyin chule Imphal-Moreh lamlen jong four-lane highway a upgrade bol dinga temna aneibe in ahi.

Xxxxxxxxxx

MPSC MCSCCE 2016 a lolhinna nei candidate hon themmona nei MPSC official leh staff ho gotna peh masat dinga thumna nei

Imphal, Aug 17(ET): MPSC MCSCCE 2016 a akilheng doh candidate hon achesa August nisim 14 nikho a MCSCCE (Mains) 2016 exam athah a bol dinga MPSC in notification asodoh na chunga alunglhai lounau thu asei uvin ahi.

MPSC in 2016 kum a Manipur Civil Services Combined Competitive Examination (MCSCCE) abol na a kana pan uva chule constitutional body athen ding hi tahsanna lhingset kaneiyu ahi. Ahivanga, MPSC exam abol na a lhahsamna chule adih louva thil abolna aume ti jeh a Manipur High Court in MPSC MCSCCE (Mains exam) 2016 asan tah loujeh a keihon natohna a kon ‘termination’ kamu jou uva tahsanna hi kanei tah louvu ahi, tin asei uvin ahi.

“Tuhi MPSC ahilouleh staff ahilouleh official ho asuhkhel nau leh adihlou abol jeh uva gotna peh phat ahitan, achesa kum phabep anabol uhi tua gotna akipeh louva ahileh mipi sum a khonung chan geiya jong hitobang hi abol jom diu ahi”, tia High Court in thutanna anei na a anasei ahi.

Ahivanga, tuchan geiya MPSC official koima hiche jeh a gotna kipe a umlou lai ahi. CBI in athu hi boina umlouva akhol na a jona anei ngai ahi in, themmona neiho akimat doh a thudih a thutanna nei ngai ahi, tin exam a lolhinna ananei candidate hon thumna phabep anei uvin ahi.

MPSC in CBI thukholna akichai kah a exam abol lou dinga thumna anei uvin, High Court thupeh banga athu akhol jou masat uva chule themmona nei ho gotna peh dinga thumna anei uvin ahi. MPSC in exam abol nauva asuhkhel hou suhdihna dinga pan alah dan hou High Court henga apehlut dinga jong thumna anei uvin ahi.

Manipur High Court in thutanna anei na a, MPSC suhkhel na ho asei chungchang ahi. Chule Mains exam pe a candidate jousen result akiphon jouteng ama ama answer sheet RTI copy akilah doh diu aphal nading uva jong thumna anei uvin, hiche hi adih a na kitong vetsahna ding ahi, tin Ranjan Salam in MPSC MCSCCE 2016 a lolhinna neiya candidate ho thalheng a aseiyin ahi.

XXXXXXXXXXXX

Manipur a Covid 19 a thi 17 lhing ta; natna nei 118 kimu be

Imphal, Aug 17(ET): Manipur a Covid natna nei mi khat akijen na Regional Institute of Medical Sciences (RIMS) a athi kit toh kilhon a natna jeh a thi mi 17 alhingtai, tin official thulhut in Monday nikhon aseiyin ahi.

Kum 48 a upa Kiyamgei, Imphal East district a cheng natna nei mikhat Sunday jan nidan 8 don a RIMS Covid Care facility mun a thi ahi, tin RIMS Medical Superintendent Dr. Ch Arunkumar Singh in aseiyin ahi. Adamlou mipa hi August 13 ni a RIMS a admit abol u ahi in, amahin kidney natna, anaemia, hypertension, diabetes leh high blood pressure kiti natna chom chom akop ahi, ati.

Achesa nidan 24 sunga CAPF 24 leh milham 94 (pasal 53 leh numei 41) Covid 19 positive ahi akimudoh be in ahi. VRDL, JNIMS a mi 9, Raj Medicity a 3, DH Noney a 2, Babina Diagnostics a 2, DH Churachandpur a 25, Imphal West RAT a 69, Shija Hospital a 2, DH Thoubal a 5, DH Tamenglong a 1 test akibolna a positive ahi kihedoh ahi.

Natna nei hohi Imphal West district mi 72, Thoubal 6, Imphal East 12, Churachandpur 1 chule Noney district mi 2 pang ahi. CAPF tilouva natna nei adang jouse hi abon uva gamdang a kon hung kile umlou ahi. Abon uva Covid Care facility a achon uvin chule containment leh contact tracing kiti bol dinga ngaicha ho apat u ahitai.

Chule achesa nidan 24 sung ma ma a mi 102 natna a kon adam doh toh kilhon a discharged abol tauvin ahi. Discharged kibol hohi CAPF 7, RIMS a 5, CCC Lamboi Khongnangkhong a 81, Kasom a 8 chule Senapati a mikhat ahi in, RT PCR test abol kit jou uva Covid-19 negative hiu ahi.

Manipur a positive case hi agom a 4687 (milham 3471 leh CAPF 1216) lhing ahitan, discharged kibol jat hi 2634 (milham 2480 leh CAPF 254) ahi. Active case hi 1936 (milham 975 leh CAPF 961) ahi in, recovery rate hi 58.33% lhing ahitai.

Psychological Support Helpline Number – 8787457035, 9402751364, 76299435961; Hospitalisation Helpline Toll Free Number – 1800-103-2015 chuleh Helpline Covid 19 Common Control Room Number – 1800-345-3818 hi aphat tin a kihong jing ahi.

Xxxxxxxxx

PM anahi Devi Gowda in NSCN-IM thu suhlhap ding adeina thu sei

Imphal, Aug 17(ET): Prime minister anahi leh Rajya Sabha MP HD Deve Gowda in thuso aneina a, India sorkar in NSCN-IM toh kihouna anei na a boina ato dan thu kivetsah na niseh thuso a kisei chungchang thu a alunggel aseiyin ahi.

Kihouna a pang hon tu naicha thuso anei uva kon kitahsan lel na aume tihi kicheh tah a muthei ahi, tin Deve Gowda in aseiyin ahi. Achesa 1997 kum a Naga Ceasefire agreement anaum a, hiche jouva Isak Chishi Swu leh Thuingaleng Muivah toh February 1997 kum a Zurich khopi a kihouna kaneiyu ahi in, kihouna hi lolhing ahi, ati.

Achesa kum 23 sunga aban ban a kikhel sorkar in machalna ana kisem doh hohi tua adalhah louding ahi. Athu seilhah nadinga ei mapui ding uva Constitution chule 2015 Framework agreement jong um ahi, tin aseibe in ahi.

Chule kitahsan lel na umho achom a koiya, kihouna che jom pi ding, aganna thei pen a Peace Accord sem ding adei sah na leh akinepna thu jong aseiyin ahi. North East gam mi hon lungmong a hinna ding chule economy khantou na amu nading uva tha aneiyu ahi, tin jong aseibe in ahi.

XXXXXXXXXX

Kangpokpi in Lockdown khoutah a achepi jouva guidelines thah dungjuiya kailhang ho hong pan ta ding

Kangpokpi, Aug 17(ET): State sorkar in lockdown sunga ‘relaxation’ phabep akoi vanga ‘Complete Lockdown’ chepi a Kangpokpi Town Committee (KTC) in August nisim 31 nikho chan hi Home department in guidelines thah asodoh dungjuiya ‘relaxation’ chepi dinga thulhuhna anei tauvin ahi.

Tu masanga KTC noiya civil organization chom chom in town sunga community transmission aumlou nadinga Lockdown bulhing set a ana chepi uva, chule sorkar in lockdown a olsah a, sector phabep alha ong vanga Lockdown khoutah a ache jom pi u ahi. Ahin, tua hi town sunga Covid 19 dinmun aphat tou tah jeh a August 31 chan hi government thuso dungjuiya ‘relaxation’ chepi dinga thulhuhna aneiyu ahitai.

District Administration in achesa August 15 nikho a Secretariat, Home Department thuso dungjuiya Lockdown sunga lha ong ding phabep ho guidelines thah ana sodoh a, August 31 chan jui dinga thuso anei ahi. District Magistrate Somorjit Salam in District headquarter a dukan kihon nading chule sub-divisional market ho kihon nadinga Monday nikho a achom beh a guidelines asodoh kit ahi.

Thuso dungjuiya, Kangpokpi district headquarter a dukan/kailhang hohi jingkah nidan 6 a kon sun kim (12) chan kihong ding ahi in, Kangpokpi Town Committee noiya organization chom chom in ngehna anei dungjui ahi. Von, kong leh beh leh aneo neo (crockery) kijohna dukan chule kengkoh sem na dukan ho Monday, Wednesday leh Friday nikho teng kihong ding, chule hardware leh electrical store, motor spare part leh mobile kijohna dukan ho Tuesday, Thursday leh Saturday nikho teng kihong ding ahi.

Grocery dukan hohi Monday a kon Saturday chan kihong ding, ahivanga hotel, restaurant leh bakery hohi home delivery a ding ti louva kikhah ding ahi. Gari semna (workshop) ho leh pharmacy hojong Monday a kon Saturday nikho chan kihong ding ahi.

Relaxation phabep akikoi vanga sorkar in apeh pass nei ho tilou gari dang alhai ding kikhah ahi. Hijong leh Covid 19 toh kisaiya lhai department chule emergency service ho kilha ong ding ahi in, mipi lah a vah doh hon mask akibol teiyu ngai ahi.

Alangkhat a, Kangpokpi district headquarter a Medical department noiya natong ASHA worker hi a Covid-19 positive nu tunin akijen na COVID Care Centre, Lamboi Khongnangkhong a kon discharged ahin bol tauvin ahi. Ama hi Kangpokpi DHQ a COVID 19 frontline worker Covid 19 positive masapen hi ahi.

Medical department in tuni sun a ambulance a apoh uva chule ni 14 Kanggui Christian College Community Quarantine Centre a um dinga athah lhung u ahitai. Community Quarantine Centre a nikho 14 lhing ‘surveillance’ a aum jouteng COVID 19 warrior nu hi local body chule medical department in ngailutna neitah a alamto diu ahi.

Xxxxx

Health Minister in apanmun a kon haina anei dinga NSUI Manipur in thumna nei

Imphal, Aug 17(ET): Health Minister L Jayantakumar in atuh cabinet portfolio a kon haina anei dinga National Students’ Union of India (NSUI) Manipur in thumna anei uvin ahi.

Simlai kiloikhom hon Covid 19 pandemic sunga tohgon phatah a kisem tup louva policy leh program umho, public healthcare system gon tup na aumlou chule khohsahna aumlou ho jeh a Minister pa in haina anei dinga thumna aneiyu ahi.

NSUI Manipur president P Bankimchandra Meitei in thuso aneina a, Covid 19 pandemic sunga tohgon chepi ding akitup lou, gelkhohna aumlou jeh chule lolhin lel na ho jeh a Covid 19 natna nei tamtah in thina ato ahi, tin asei uvin ahi. Health Minister in tua dinmun hi agelkhoh ngai ahi. Achuti louva ahileh Medical portfolio atuh hi legislator achang dinga lom adang khat apehdoh ding ahi, ati.

COVID-19 case chule natna toh kisaiya thi tam cheh cheh a, suhtang thei louva um ahi in, alangkhat a, hiche jeh a Covid 19 natna neilou adamlou adang hon kijenna dinga hahsatna sangtah ato ahi, tin thuso chun aseiyin ahi. Sorkar in tohgon asem a, RIMS ahilouleh JNIMS hijong leh tu ngaichat pet a hi Covid natna hilou adammo adang ho kijen nadinga special hospital khat agon ngai ahi, ati.

Nao nein a a minu ni in thi na chan ato thu asei uvin, adamlou kijen ding kiphal peh lou hi kibungkhenna leh kithetna chule kibolgim na ahi, ati. Hitobang thilsoh hohin mipi lungthim a kichatna tamtah asemdoh ahi, tin asei uvin ahi.

Health professional chule mopohna nei department hon lungthim chingtah leh ahop len chule dihtah a pandemic douna a pan alah khom diuvin jong simlai kiloikhom hon temna aneibe uvin ahi.

Xxxxxxxxxxx

HSLC compartmental examination 2020 candidate jouse ‘pass’ ahitai, tia phondohna umta

Imphal, Aug 17(ET): Gamsunga Covid 19 pandemic akisei khoh jeh a HSLC compartmental examination 2020 pe dinga form pelut a candidate ho abon uva ‘passed’ hidiu ahitai, tin thuso anei tauvin ahi.

Examination result toh kisaiya thuchen hi Board of Secondary Education website- www.bosem.in ahilouleh www.manresults.nic.in a vetthei ahi. Secretary, Board of Secondary Education Manipur (BOSEM) Dr Chithung Mary Thomas in Monday nikho a notification asodoh na a, gamsung dinmun hi August lha ahilouleh September lha kipat til a exam bol nathei dinmun ahipoi, tin aseiyin ahi.

Compartmental exam hi August ahilouleh September lha kipat til kalval a akivoh chon a ahi jong leh candidate hon kum khat aman sah na theiyu dinmun uma hi, tin jong Secretary in aseiyin ahi.

Full marks 80 ahi na chule pass mark 20 ahi na subject ho a candidate ho atam pen a mark 25 kipe ding, pass mark 20 leh grace mark 5 kipe ding ahi. Full mark 48 ahina chule pass mark 12 ahi na subject ho a candidate ho atam pen a marks 15 kipe ding, mark 12 hi pass mark hiya chule 3 hi grace mark a kipe ding ahi, tin notification chun aseibe in ahi.

Chuleh full mark 32 chule pass mark 8 ahi na subject ho a candidate hohi marks 10 cheh atam pen a kipe ding ahi. Pass Mark 8 leh grace mark 2 kipe ding ahi, ati. Achesa August nisim 14 nikho a sorkar in phatsahna aneiya chule Examination committee in kilolna anei dungjuiya result phondohna aneiyu ahi in, ahung lhung ding September nisim 1 nikho a kon exam certificate akilah thei nading uva school ho hetsahna jong aneiyu ahitai.

xxxxxxx

DHS CCpur in RAT kits manchah ding dan Nurse leh Doctor ho kichuh nape

B.Lalboi Gangte

CCpur. August 17 (ET) : District Health Society Ccpur tohgon nanoi in tunin (Aug. 17) GNM School of Nursing Conference Hall mun’a CCpur  khopi sung’a private hospital leh nursing home ho’a ding in Rapid Antigen Test kits training anachelhah pi uvin ahi. Hiche phatsung in Dr. Kh. Sania Monica in-charge sample collection Covid-19 CCpur leh Dr. Seikholet ENT Specialist District Hospital CCpur tenin kichuhna anapelhon in ahi. Hiche achun Rapid Antigen test bol ding dan, sample lahkhom ding dan, sample test lakhom ding Nurse leh Doctor ho PPE kivon ding dan ho kichuh na ana kipe in ahi.

Hiche toh lhon’a training achun CCpur Khopi sung’a Private hospital leh Nursing home chom chom tichu Grace Nursing home, Nghathal, Sielmat Christian Hospital, Sielmat,  Samaritan Nursing Home, Bijang, Lamka Nursing Home, IB Road, Nazareth Nursing Home, Tipaimukh road leh People Health Foundation, Gangpimual akon RMO, Lab technician, Nurse leh Nursing Superintendent pannan mi 18 in pan anala uvin ahi.

xxxxxxxxxxxxxx

Lamzang kho lamlen’a thilong khat anakimudoh; ipi jeh’a thi ahi Police hon kholchil nanei

B.Lalboi Gangte

CCpur. August 17 (ET) : Lamzang kho lutna bul’a lamlen ah tuni (Aug. 17) jingkah nidan 2:30 vel’a chun thilong khat ana kimudoh in ahi. Chule hiche thilong hi Mizoram akon hung kipandoh hon lamlen lai’a anamudoh uva kon khosung miho anahetsah utoh lhon’a khosung mihon jong anadellut uvin ahi. Hiche thilong hi Lamzang kho sung mi B. Sawmminthang (23) S/o (L) B. Thangsiankhan ahidan jong anahedoh uvin ahi.

Hiche thilsoh chung thu’a CCpur Police hetsah na ananei dungjui uvin District Police hon thilsoh namun anadellut uvin chuleh Imphal akon Forensic Expert ho jong anakou uvin ahi. Police hon Sawmminthang tahsa chung kholchilna anei nao’a thina chan ding khop’a atahsa chung’a maha muding aumpon ahivang in akhut vang adul in, aluchang thisan in achup in ahi ati. Chuleh CCpur Police in postmortem bol ding in District Morgue ah thilong chu anakoi tauvin ahi.

Thilsoh chung thu’a khosung miho seidan in Sawmminthang hi Churachandpur Government College ah BA final year simlai ahi naban’a Pathen ni nilhah lam’a mi phabep toh ju ana donkhom uvin chuleh a ju don nao mun akon meter 15 vel’a alongdamsa kimudoh ahi ati. Hiche ahi jeh chun CCpur  Police hon jong a ju donkhom pi mi 2 thudohna nei ding in Police Station ah apui uvin ahi. Thilsoh thu’a CCpur Police team Shivanand Surve IPS Addl. SP (LO), Lawrence K. Munluo MPS Addl. SP(Ops), SDPO-CCP leh OC-CCP chuleh Jangminlen Lupho EM (SDC-CCP) hon thilsoh na mun kholchil na ananei uvin ahi. District Hospital Ccpur ah post mortem kichai in insung mihon tuni mama in Lamzang lhanmol ah anavui tauvin ahi. Alangkhat’a thilsoh thu’a CCpur Police Station in Suo Moto case ala uvin FIR no. 62(08)2020 CCP-PS U/s 279/304-A IPC a melchihna anei uvin chuleh kholchilna natoh jong apanpai tauvin ahi.

xxxxxxxxxxxxxxx

 DSU, IDSP/CCpur in CCpur District sung’a Covid-19 toh kisai’a report sodoh

B.Lalboi Gangte

CCpur. August 17 (ET) : District Surveillance Unit, IDSP/ CCpur in COVID-19 toh kisai’a report asodoh nao’a nidan 36 sung in CCpur District sung’a  Covid +ve case thah 92 akimudoh in ahi ati. Positive kimudoh namun hochu Khuga Dam kom’a um Assam Rifles Quarantine Centre akon 23, 32Bn CRPF Loktak akon 44, Sielmat Quarantine Centre akon Returnee pasal 1 chule Singngat aum 2nd Assam Rifles personnel 24 ahi. Chule nidan 24 sung’a Case thah 92 kimudoh holah’a Case 67 hi achesa Aug. nisim 15 nikho’a kimudoh ahi naban’a amaho hi sepai  ngen ahi. August 16 in Rapid Antigen Test chung chon’a Siemal Christian School Quarantine Centre aum pasal 1 positive mudoh ahin chule 2nd Assam Rifles Singngat ah AR personnel 24 positive mudoh ahi ati.

Hiche toh lhon’a CCpur District sung’a tule tun Covid +ve case 577 alhing tan hiche lah’a adamdoh 199 aum in , active Case 378 aum nalai in ahi. Tuni chan’a Rapid Antigen Test kits akon sample 1088 test kibol nalah’a Positive 88 mudoh ahi in chule adang jouse RT-PCR akon ahi.

Alangkhat’a Community Quarantine umho simtha louva Institutional Quarantine Centre ding’a kimang Circuit House Bijang ah mi 9; Isolation facilities toh kisai’a lupna 30 um thei na District Isolation Ward a mi 3; Covid-19 Care Centre NEILIT a mi 25; Covid-19 Care Centre STC BSF a mi 173; Transit Hostel, Lanva TD Block a mi 14; Covid-19 Care Centre Assam Rifles, Khuga Dam a mi 48; Covid-19 Care Centre 2nd Assam Rifles, Singngat a mi 53; Covid-19 Care Centre 32 Bn CRPF a mi 48 aum in ahi. Chule Home Quarantine ah tuhin mi 677 aum in, contact tracing kibol jing lai mi 6 ahi. Sample lakhom natoh kisai tunin Sample Collection Team in Khuga Assam Rifles Quarantine Centre akon sample 85, Covid-19 Care Centre Staff akon 11, CRPF Loktak akon 29, DIET Centre akon 35, Covid-19 Care Centre Lanva TD Block akon 5, Donbosco Hr. Sec. School akon 50, Hotel Venus akon 19, Hotel Asiatic akon 4, Bijang Circuit House akon 4 leh mi dang 1 agom’a sample 243 analakhom uvin ahi.

xxxxxxxxxxxxx

Nagaland a Covid +ve case thah 61 kimudoh; agom’a 3,455 lhingta

Kohima, Aug 17: Nagaland a Covid +ve case thah tuni 61 akimudoh toh lhon’a agom’a case 3,455 chuleh active 2,019 alhing tan ahi. Hiche case thah kimudoh hohi sample 577 test kibol na’a kon kihedoh ahi. Case thah kimudoh 61 lah’a 30 hi armed force personnel ho, 14 traced contact akon, 9 hi returnee ho chule 8 hi frontline worker ho ahi. Chuleh armed force personnel 22 hi Kohima akon 8 hi Dimapur akon, traced contact 14 lah’a 11 hi Dimapur akon, 2 hi Zunheboto akon, 1 hi Kohima akon ahi. Returnee 9 lah’a 7 hi Dimapur akon chuleh Kohima le Zunheboto akon khat cheh ahi. Chuleh frontline worker 8 ho hi Dimapur akon ahi.

Hiche toh lhon’a Nagaland Health Minister S Pangnyu Phom in aseina’a case thah 61 akimudohbe kit toh lhon’a tule tun Dimapur ah confirmed case 1,773 lah’a active case 1,202, Kohima ah confirmed case 935 lah’a active case 628, Zunheboto ah confirmed case 100 lah’a active case 84 chuleh Mokokchung ah confirmed case 19 lah’a active case 2 aum in ahi. Chuleh tuni chan’a armed force personnel 1,511; returnee 1,177; traced contact 490; frontline worker 223 chuleh adang dang 54 hi Covid +ve ahi tinjong aseibei.

xxxxxxxxxxxxxxxxx

Bihar a lockdown Sept. 6 chan ding’a kisusaobe

Patna, Aug 17: Bihar Government in gamsung’a Covid +ve case apunbe jing nalai jeh in ahung lhung ding Sept. nisim 6 chan lockdown suhsaobe ding in tunin State Home Department in phondohna anei in ahi. Hetthei khat chu Bihar a lockdown hi July 16 apat July 31 chan ding’a anakisaobe jou nung’a August nisim 16 chan kisusaobe kit’a tu’a Sept. nisim 6 chan ding’a ahin suhsaobe kit ahi.

Hiche toh lhon’a achesa July nisim 30 nikho’a thupeh dungjui’a containment zone ho jouse public transport kiphallou ding ahin thil pole truck hovang kiphal ding ahi tin State official chun anaphongdoh in ahi. Chule Air, railway, office, bank leh office dang dang jouse jong chelha jom jing ding ahi. Hetthei khat chu Bihar a tule tun Covid +ve case 104,093 aum in chuleh thina toh 537 alhing tan ahi.

Xxxxxx

Mobile network hoilou  Moreh mipi dia boina hi

Moreh, Aug 17(ET): Moreh khopisung a BSNL Customer Care Center, Airtel chuleh Reliance Jio umna mun ho Moreh Consumer Club (MCC) hon tunichun vetlhahna anei un ahi.

Hiche hi network kisuhmo behseh jeh a online class nei chapang hon nohphahna lentah ato thu nu le pa ten thulhut apeh tolhon a vetlhahna hi chelha ahi e.

Moreh a um mobile operator BSNL, Airtel le Reliance Jio hon kisuhsel a network apehdoh theilou ban a mipi akehkhat in navah a amanthei dia jong akoidoh joulou ahi. Tuchan a Airtel in 30/40 percent, Jio in 20/30 percent leh BSNL in 60 percent bou apehdoh jong lhakhat sung a ni 10 sung bou ahinalai e.

Gam khangtou lou a kihe Myanmar in mipi 90 percent manchah thei a akoithei lai a Indian Network lhahsam dan hetdoh thei ahi.

Hitia Indian Network lhahsam tah a aum hi Myanmar ho hetdia jachat umtah jong ahi e tin MCC palai khat in aseiye.

Network lhahsam le kisuhlou na hi mipi ding gel na a ni 5 phatsung kah a Moreh khopisung a Mobile Network ho asem hoi ding un Moreh Consumers Club President Seiboi Haokip makai na chekhom palai ho chun Network Operator ho ngehna aneiban un ihamtia ni 5 phatsung a akikhel aumlou le Network Operator hochung a dan tahkhum ding in jong phondohna anei uve.

Moreh khopisung a internet kisuhlou hi simlai tamtah dia manna le internet mang a thilbol ho le bank ho gei atohkhah ahitai.

Xxxxxxx

Police Gallantry mu kipe pa kinung lahpeh; police 2 suspend kibol

Imphal, Aug 17(ET): Police a dia natongpha police khat Chief Minister’s Police Medal for Gallantry 2020 peh ahi nikhat jou in All Manipur Students’ Union (AMSU) in hehna abol tolhon in Manipur government in Sunday nichun kipaman apehdohsa anunglah pih kit tan ahi.

Imphal East Police Station a Sub-inspector Bheishamayum Debson Singh chu achesa 2013 kum a crore 3 val khamnathei apohpet a police mi 10 toh mat a ana um ahi.

Hitolhon a Sub-inspector Bheishamayum Debson Singh kipe CM’s Police Medal for Gallantry chu apet pet a kahlhah le lahdoh pih ahitai tin joint secretary (home) Rehanuddin Choudhury thusodoh chun asei e.

Khamnathei toh kimat a achungthu seibang khai um nalai aselguh jeh in Sub-inspector Bheishamayum chu atohmun a kon chomkhat kicholsah ahingal tan ahi.  Chule Bheishamayum chungchang a ngohna kisei hi adih ana hikit e tin thulhut kimuchun aseiye.

Chule iti lamdol a CM medal mudia Bheishamayum min hi Imphal East superintendent of police in ahin pehlut chungchang kholchilna neidia IGP (Int) Radhashyam Singh in alamkai ding le SP (CID) S Gautam Singh le SP (CID) Joyce Lalremmawi palai hina kisemdoh lom chun hapta khatsung a thulhut ahin pehlut diuva jong nganse ahiuve.

Hiche thu toh kimat in Imphal East SP a dia Reader mopo inspector E Roshan Singh themmona mudoh ahitolhon in atohmun a kon phatchomkhat a din kicholsah ahingal e.

Director general of police (DGP) LM Khaute in Inspector Roshan themmona mudoh ahitolhon a phatchomkhat sung atohmun a kon kicholsah ahi in hiche phatsung a dan dungjui a neh le chah a ding sum bou amuding ahi e, ati.

Langkhat a Chief Minister N Biren Singh in government in asuhkhel hetdoh nadia aphatcha hetsahna hin bol simlai kiloikhom ho pachatna apehban in police kitahlou mikhat jal a department pumpi minse thei ahi bang a natong pha ho kipaman pehding le atong hoilou ho gotna pehdia tu government in tohgon kichepi chu kijuipeh ding ahi, ati.

Xxxxxxxx

National Education Policy 2020 hin vannoi a India hi hetna lam a ahatsah ding ahi e: Th Radheshyam

Imphal, Aug 17(ET): Danthah kisemdoh National Education Policy 2020 in vannoi a hetna lam a India akhantousah ding hijongle hiche dan gamsung a phatah a chelhahsah nading a seikhom jing angai e tin Press Information Bureau leh Regional Outreach Bureau, Imphal gonna noi a chelha tuni Webinar a chu Th Radheshyam Singh, Education Minister, Manipur in asei ahi.

Radheshyam in boina khat hetthem nadia nidan 1 sung ngaitona akipehle boina chu minute 1 sung a suhlhap thei ahi tia Albert Einstein in ana seibang a central in tu naicha aphondoh National Education Policy jong het them nadia gelkhom masat angai lheh e, ati.

Education Minister in India chonna toh kitoh a themjilna hoipen pehding tupna a kibol hiche tohgon boldoh thei a ahung um hi kipa aumlheh in chule class 5 a pat 8 chan hon ama ama pao a lekha asim dia kigong hin themjilna lunglut ahin tamsah be ding ahi e, ati.

Dr. M Meenakumari Devi, Director, State Education Research and Training in danthah cheding dan thu in houlimna anei e.

Chule liemna thusei Additional Director General (Guwahati le Imphal Region), S N Pradhan in danthah hoitah a chesah nading a panla ding in media ho tepna jong anei e.

Chule Webinar a panla jouse le minister ho chung ah Director PIB Imphal Abhishek Dayal in akipapina jong aphongdoh e.

Hetding chu tuni webinar a chu mi 50 vel pang ahi.

Xxxxxxxx

Tuchan a India Covid-19 natna nei mi 2.64 million pha, adamdoh 1.9 million vel hi

New Delhi, Aug 17: Union health Ministry in tunia thuso atahdoh dung jui in tu nidan 24 kahsung a Covid-19 natna nei hetdohbe mi 57981 pum India mi Covid-19 natna nei hi mi 2.64 million alhing in, hiche lah a kijen jinglai hi 676900 le amollem hi 50921 ahi e, ati.

Covid-19 natna a India mi thina toh 1.93% hi vannoi a dia Sunday nikho chan a dia alhompen ahi e tin government chun asei e.

Covid-19 natna a mihem 50000 hi United States ah ni 23 sung, Brazil a ni 95 le Mexico ah ni 141 sung in athi in hinla India a mihem 50000 hi ni 156 sung in athi e.

Chuleh tu nidan 24 sung a natna nei 1,919,842 lah a adamdoh jong 57,584 apha in hiche hi 72.51% ahi.

Health Ministry in patepna le phatah a damlou akijen jeh a adamdoh hichan gei pha ahi e, ati.

Sunday chan a India patepna aboldoh jat hi 2,93,09,703 vel ahi in patepna boldoh jat jong 30 million lhingkon ahitai. Hiche hi government noi a lab 969 le private lab 500 agom a 1469 jal a patepna hijat boldoh hithei ahi.

Indian Council for Medical Research (ICMR) le state government ho kholdoh dungjui a natna khandan Mumbai a 57%, Bihar district 6 a 0.7% chule Chhattisgarh district 3 a 0.5% ahi e.

Baltimore a university khat in India sang a Covid-19 natna tam nei gam chu US a 5,403,213 le Brazil a 3,340,197 teni ahi e, ati.

Xxxxxxxxx

MBOCWWB chairman masa in SPIO dihlou a thu ahil ahiloule RTI Act agelkhohlou jeh a State Labour Department a chatvaina um hidia ginmo hi

Imphal, Aug 17(ET):  Manipur Building and Other Construction Workers’ Welfare Board (MBOCWWB), Labour Department, Government of Manipur chairperson ana hi Sanglakpam Preshyojit Sharma in Rural Social Service Society ama chairman/chief functionary le general secretary hina NGO noi a skill development program natoh nading in 13,18,16,800 ana phaldoh thu MBOCWWB chairperson ana tuhsa khat in Imphal Times a a sodoh dia lekha apeh a kon NBOCWWB sung chatvai dan hetdoh be ahilo tai.

MBOCWWB State Public Information Officer L. Bijeta Devi in June 10, 2020 nia Right to Information (RTI) dannoi a dohna khat donbutna ana peh a chu MBOCWWB 2016-17 le 2017-18 sung a kumlhun toh phon le audit bolna lekha neilou ahijoh dan ana sei ahi.

Langkhat a NGO chun aphatcha in lekha pehding dol government kom ah akipelut in Department of Accountant General (AG) in jong audit ana bol in hichu Sanglakpam Preshyojit Sharma MBOCWWB chairperson hilai hidan in akisei kit e.

Hitia thuchom chom akisei a pat RTI noi a dohna ho donbut ding ngaitona umlou mong ham ahiloule SPIO L Bijeta in RTI dan imalou a agel na MBOCWWB sung chatvai dan hi asanglheh tan ahi tin thulhut chun asei e.

Xxxxxxxx

Jemon GaS Agency in gas ahopna a SoP kijui lou

Imphal, Aug 17(ET)- Gamsung a covid-19 natna hat jing toh lhon a government in SoP asem juiding a hetsah na ana kinei ho chu tuni a Jemon Gas Agency , Singjamei in gas hopna a customer ho hetsah na ana nei vang uvin koima in ana juipouvin ahi. Thuso kimu dungjui in Agency customer ho chun social distancing daan juiding toh kisai a queue a ding pum a jingkah akon a gas hopding ana nga  u ahin hinlah agency in gas ahin hop pan uva konna ahiding dol a hopdoh na ahin nei lou u customer ho in hetdoh na ana nei uva konna mipi in counter a abulu uva kinah boutam an aum ahi akiti.  Consumer ho akon thuso kimudungjui in LPG la a hung ho chu khat toh covid positive ahi khah ule mijouse chu hiding u ahitan ahi akiti. Customer ho chun daan kipe ho juiding in ana um uvin hinlah agency in ahilou ding dolt ah a gas ahin hop uva kon hitabang thilsoh chu hung soh kha ahi tin hetsah na ahung kinei in ahi.

XXXXXXXXXXXX

Health Minister in Truck driver ho ang a Medical Kit hopdoh na nei

Imphal, Aug. 17(ET): Health and Family Welfare Minister L. Jayantakumar Singh in tuni in Keithelmanbi mun a Imphal Jiribam a lhai truck driver ho ang a medical kit hopdoh na ana nei in ahi. Tuni a hopdoh na kinei kit ho chu hand ssanitizer, maitom chuleh kitom na idng thil jat chom chom ahi akiti. Minister pa in thil hopdoh na kingon achun truck driver ho panlah na chung chang a kipa thu phondoh na jong ananei in ahi. Minister Jayantakumar in ahoulimna acun driver ho chun covid akon akiven na ding u thil kipe be ding u ahi tin ana sei in ahi. Maban a hitabang thil hopdoh na kin ISBT, Chingmeirong a akinei ding dan jong phondoh na ana nei in ahi. Tuni kingon chu Manipur Truck Drivers’ Association le Highway Truck Owners’ Welfare Association makai na a kibol ahi.

XXXXXXXX

Mipi in health worker ho amuset loudiuva RIMS in temna nei

Imphal, Aug 17(ET): Achesa lha phabep sung a RIMS a frontline a natong  doctors, nursing officials, paramedics le adang dang ho in natna po a gingcha a aum na mun ho uva thet na ana nei jing u thu kijah toh lhon in RIMS vaipo ho in hitabang thilsoh ho umnalouding in mipi ang a temna ahin nei uvin ahi. Hitabang hahsat naphat a mipi ding gel a natong ho hi apan mun u jaa peh a kithang att pi na um tah she a hitabang kimuset nah o umhi vangset umtah ahi tin RIMS akon thuso kimu chun asei in ahi. Hitabang a jou le nal ahilou le thulamleng ho frontline ho chung a kisei ho hi mipi in tahsan na anei louding uvin jong hetsah na ahung kinei in ahi. Mipi in hitabang thet nah o hi apam pei uva hitabang a gamsung a mipi ding a natoh na nei ho hi jana joh apeh ding uvin RIMS vaipo ho in temna ahin nei uvin ahi. Gamsung mipi ho in kihtokhom a hiche natna doudal na ding a panlah khomna anei ding u phat ahitahdanjong vaipo ho chun hetsah na ahin nei uvin ahi.

Xxxxxxxxxxxxxxxxxxxxxxxxxx

Ccpur ADC meeting kouna

Ccpur, Aug 17(ET): Autonomous District Council, Churachandpur  member ho in Chairman Paukhanlian le Vice- Chairman Paokholal Haokip lahdoh na ding a hetsah na ana nei utoh lhon a, athu high court a pohdoh na ana kinei toh lhon in court in athu tanlhah lou le Chairman lah lhah na thei ding dan umlou dan thu hetsah na ana nei toh lhon in Churachandpur ADC jouse meeting ahunglhungding August nisim 18 nikho jingkah lam nidan 10:30 leh ADC Churachandpur Council hall a umding ahi akiti. Hiche meeting ahi member jouse in panlah na anei ding uvin jong hetsah na aum in ahi.

Xxxxxxxxxxxxxxxxxxxxxxxxxxxxxxxxxxxxxx

UP sung a kho 700 vaal twi in chup

Lucknow, Aug 17: Uttar Pradesh sung a district 15 lam akon a kho 700 lam twi in ana chup toh lhon in  Chief Minister Yogi Adityanath in tuni in vaipo ho ang a relief camp ho a social distancing phate a kijui na ding in hetsah na ana nei in ahi. Khosih ahi lou le buhsi vei ho covid test bola hi na ding uvin jong Chief Minister pa chun hetsah na ana nei in ahi. Gamsung a Sharda vadung le Saryu vadung ho jong ahung khan jing dan thu relief commissioner Sanjay Goyal in tahlang na ana nei uvin ahi. Twilet toh kisai in NDRF, SDRF le PAC  team 22 lam akisol lut tan ahi akiti. Boat 1,046 lam jong mi huhdoh an ding a akikoi tahdan jong hetsah na ana kinei in ahi. State sung a twilet in atoh khah district ho chu Ambedkar Nagar, Ayodhya, Azamgarh, Bahraich, Ballia, Barabanki, Basti, Deoria, Gonda, Gorakhpur, Kheri, Kushinagar, Mau, Sant Kabir Nagar le Sitapur ahi akiti. Chief Minister pa in vadung pam hop hate a vetsui ahi a ase lai ho vetsui ahina ding jong thupeh ana nei in ahi. Relif camp ho a jong gul ho aum nalouding in suhtheng jing ding in thupeh ana kinei in ahi.

Xxxxxxxxxxxxxxxxxxxxxxxx

Gallantry velvet na nei ding a AMSU in hetsah na nei

Imphal Aug 17: Achesa July nisim 17 nikho a ama le ama anakikap lih kigo Addl DGP Arbil kumar chung chang a thilsoh hi Independence day nikho a Gallantry kipeh ding chung chang a kiboina jeh ham tihi mipi in adohnom penchu ahitai tin All Manipur Students Union in hetsah na ahin nei uvin ahi. Kiloikhomna Secretary General Ahalthem Bipin Chandra in thuso miho toh akihoulimna a hiche thu chung chang ahi independent enquiry khat bollou akhoh dan hetsah na ahin nei in ahi. Alangkhat a P. Dhana kumar Retd. IPS in ahoulimna a state sung a khamnathei toh ksiai a kiman ho hi gram a kiman ho jail a um kg a kiman ho bail a kilhadoh ham tin thudoh ahin nei in ahi. Khamnathei toh kisai a gamsung a kiveina hi Golden Triangle toh ahung bah toh lhon a hiche kiveina a MLA, party chomchom akon lamkai ahi lou le police ho jong ahung jaona chung a vangset umtah ahidan jong tahlang na ahin nei uvin ahi. Manipur sung a khamnathei toh kisai panlah na a MLA 60 ho in panlah na anei sohkei u le nomtah a kisumang jou ding ahi tin jong Congress spokesperson K. Meghachandra in phondoh na ahin nei in ahi.

Xxxxxxxxxxxxxxxxxxxxxxxxxxxxx

PREPAK(PRO) cadre khat kiman

Imphal, Aug 17(ET): Tuni nilhah lam nidan 5.30pm vel in Imphal West Commando le 15 AR in kitho in PREPAK (PRO) cadre khat Seijang kho akon in ana mandoh uvin ahi. AKimandoh pa chu Ingudam Ingocha @ Borobi Singh (43yrs) s/o (L) I. Megho Singh, Seijang Makha Leikai, Imphal East ahi akiti.

Thudoh ana kinei na a Ingocha in PREPAK chu achesa February lha a Lalngamba kiti khat lamkai na noi a ana jop ahidan tahlang na ananei in ahi. Achesa March lha a Moreh a lamkai pa in ahi kou toh lhon a  Lamlai Yaingangpokpi lamlen a bomb kam ding aga lahdan jong tahlang na ana nei in ahi.

Akimandoh pa akon chu Chinese hand grenade khat, detonator 4, volt battery le connector 2,  CIRCUIT 3, PEK Cake (260gm) 2, WIRE 3, Tri Nitro Toluene (TNT) explosive powder (700gm) le mobile phone khat matdoh na ana nei uvin ahi. AKimandoh pa chu IIIT Mantripukhri a RAT jang a covid test kibol na a negative ana hi toh lhon in Yaingangpokpi Police station a pehdoh na ana kinei tan ahi.

 

SHARE
Previous articlePDF a dingin hilai hi click in
Next articleAug 19 news
Editor at Eimi Times.