Union Home Minister in gamsung tohkhah loudinga kitepna aneihi tahsan thei ahipoi...

Union Home Minister in gamsung tohkhah loudinga kitepna aneihi tahsan thei ahipoi tia Congress hon ‘Naga Peace Talk’ thu’a toumun kiphin abol nauva sei

174
0
SHARE

Union Home Minister in gamsung tohkhah loudinga kitepna aneihi tahsan thei ahipoi tia Congress hon ‘Naga Peace Talk’ thu’a toumun kiphin abol nauva sei

Imphal, Nov 14(ET): Union Home Minister in Indo-Naga Peace Talk chungchang a gamsung huh dinga kitepna aneihi atahsanna ding aumpoi, tin AICC Central Working Committee (CWC) member Gaikhangam in Thursday nikhon aseiyin chule gamsunga Central paramilitary force ho akitol lut be jing hin gamsung miho lungthim a kichatna aumsah ahi, ati.

GM Hall kom, Imphal khopi a Manipur Pradesh Congress Committee (MPCC) member leh worker chule lamkai hon ‘Naga Peace Talk’ thu akiseidoh lou douna a toumun kiphinna abol nauva AICC CWC in asei ahi. Centre in kihouna a asei hou aseidoh dinga MPCC in aseiyin chule gamsung Integrity huhna ding chule Naga chamna thu kiseihin gamsung atohkhah louna dinga sorkar in State Assembly Special session akou dinga thumna anei uvin ahi.

“State sunga state umbe louding ahi”, ‘Naga Peace Talk a kisei ho thu seidoh uvin’, ‘Kipunkhom nadinga kadin u ahi’, ‘Insung keh kadei pouve’ tia kisun thucheng chom chom kiphinna abol nauva avetsah uvin, MPCC lamkai leh MLA phabep jong apang uvin ahi. Congress in gamsung huhding adei ahi, tin Gaikhangam in aseiyin chule gamsung territorial integrity kitohkhah nathei kinoptona kisang louding ahi, ati.

Union Home Minister in Manipur kitongkha louding ahi tia kitepna anei vanga gamsunga Central security force tamtah hung kitol lut be jing ahi”, tin Congress lamkai pa in aseiyin chule achesa phat masa ho a Centre sorkar in akitepna atuhchah louna thilsoh tamtah um ahi, ati. MPCC president M Okendro jong kiphinna abol nauva apang in, Centre a lamkai hon Manipur gamsung kipunkhomna leh agam akisukhah louna dinga hatah a asei ahi, ati.

Chief minister anahi O Ibobi Singh lamkaina a Congress MLA hon New Delhi khopi a camp abol uva, Indo-Naga thu jeh a gamsung akisuhkhah louna dinga asei jing u ahi’in, alangkhat a Imphal khopi a jong group dang khat in gamsung huhna dinga pan alah ahi, ati. New Delhi khopi a legislator hon campaign apat uva, AICC lamkai chule opposition lamkai dang dang jong akimupi pan u ahitai, tin MPCC president in aseibe in ahi. “Prime Minister chule Union Home Minister leh Centre a lamkai dang dang ho kimupi nadinga appointment jong kila ahi’in, PM hi tu leh tu a gamdang a um ahijeh a amatoh kimuto nading hi kiphotchen thei loulai ahi”, tin aseiben ahi.

Tohmun leh thaneina kichu ding ahile BJP MLA leh Minister ho Delhi cheding akichuthouvin, gamsung huhbitna ding’in vang koima ache nompouve: COCOMI

Imphal, Nov 14(ET): BJP lamkai State Government noiya Minister holeh MLA hohin gamsung thuboi laboi ahepha pouvin tohmun kichu ding ahilevang kintah in Delhi lang’ah acheuvin Prime Minister, Home Minister agakimupiuvin, hinlah tulai gamsung kipumkhatna hung kehthei dinmun changei alhun vang’in koima Delhi ah achepouvin, lamkai luboh ho agakimupi pouve tin COCOMI a Co-ordinator Sunil Karam in Lamshang kailhang a kingin tohgom a mipi toumun kiphin kibolna a chun aseiyin ahi. Toumun kiphinna chu Lamshang area a um kiloikhomna 18 holeh nupi kiloikhomna hon agonu ahi.

Sunil Karam in aseibena ah achesa 2001 kum’a NDA Government leh NSCN-IM kihouna a ‘without territorial limit’ kiti thucheng apan jeh’a gamsung mi 18 in thina anatolo ahin, tua jong Manipur kipumkhatna suhkeh ding dinmun a ahung umkit hi Centre in gamsung mi ijat athabe kigot nalai ham tin jong aseiyin ahi. Achesa 2015 kum Framework Agreement toh kisaiya gamsung’a um Civil Society kiloikhomna hon Prime Minister pa agakimupiuva chun Prime Minister pan akamcheng anapen, kamcheng kiti hi moh tahsan thei ahipoi tin Sunil Karam chun aseiyin chule Chief Minister pa lamkaina ruling MLA hon toukhomna anei uva chun MLA 15 apang pouvin hichun avetsah chu gamsung thu le la ahetlou dan’u leh anahsah loudan’u atahlang ahi ati. Toumun leh thaneina kichu ding akiti tengle Delhi a kitol ding akichu thouvin, ahinlah tulai gamsung thu le la dinmun hichan geita a Delhi khopi a gache a Prime Minister leh Home Minister pa gakimudi jong agopouve tin jong aseiben ahi. Mipiten alung kimlouna’u leh alung lhailou na’u achung uva ahin sekhum teng’u le lung nopmona a anei theilou diu ahi ati. Mipite toh le tham jouse thunei vaipo ho kithopina ahidan jong he’u hen tin jong aseiyin ahi.  Chule Ruling MLA 60 ho chu Prime Minster leh Home Minister pa heng a akhot tah uva ajih uh lekha Manipur gamsung hiche Indo-Naga peace talk hin atohkhah theilou ding ahi ti lading a ache ding dol tah uh ahi in hiche chu PM leh Home Minister in Oct 31 masang a abol lou ule anatoh nauva kon resign kibol ding a gihna jong ana neiding doltah uh ahin hinlah hiche tobang bolngam chu aum pouve ati.

CSOs hon 2015 kum a hiche chungthu a PM pa akimupi nauva chun Manipur kipumkhatna atohkhah louding in ana seinan hinlah kamcheng a asei bou akitahsan theipoi ati. Tua mipi hon kiphinna anei u hi state govt. suhhat cheh nading ahi in, Lamkai lenhon a ngaimah louding uh ahi ati.

Tuni a kiven toumun kiphinna achelha jom toh lhon in COCOMI Assistant coordinator Nando Luwang in thuso miho heng a aseina achun, Ruling MLA hon power choiding bou kichu louva gamsung huhna ding joh a manchah ding in aseiben in ahi.

COCOMI natoh tosotna in Janlhah chun Sagolband Constituency Assembly MLA RK Imo makainan amachenna inn kimvel ah vengsung mipiten thaomei choiyin kijotna aneiyuvin, itijongle gamsung kipumkhatna hung kitongkha theilou ding ahi tin kholhang jong asam uvin ahi.

Nambol area kimvel a jong janlhah chun Kabui community ho pannan mi tampin thaomei choiyin kijotna aneiyuvin ahi. Akijot hochu Nambol kailhang ah akisukhom uvin gamsung huhbitna ding kholhang jatchom chom asam uvin ahi. Thaomei choiya kijotna kibol sung’a deilou thilsoh imacha aumlou nateiding’in Bishnupur District SP Priyadarshini Laishram lamkainan police team hon muntin gahtah in avengbit uvin ahi. Naga Peace talk chungchang’a gamsung mipite hibangse sohta a tuchan in  MLA 60 thipbeh in aum nalai uve tin Nambol Apunba Nupi Lup a Secretary L Premila Leima in sangtah in demna aneiyin ahi.

Paotinsat Vaiphei kitha thu a UKLF in pan alapoi, tia Zillai in ngohna asem thu a kiloikhomna in kisuhthengna thuso nei

Imphal, Nov 14(ET): United Kuki Liberation Front (UKLF) in achesa November nisim 10 nikho a Sajiktampak kom, Chandel district noiya um Haika kho a Paotinsat Vaiphei kitha na thilsoh a kiloikhomna in pan ala poi, tin thuso anei uvin ahi.

Simlai kiloikhomna Zillai GHQ leh ama branch hon Paotinsat Vaiphei kitha thu a organization min aphah uva chule organization sunga um senior officer khat ngohna aneiyu hi vangset umtah ahi, tin T James, Joint Secretary, UKLF in aseiyin ahi. Paotinsat Vaiphei kitha na thilsoh a organization in pan ala pon chule organization a officer koima in ama tha nading tohgon jong asemlou ahi, ati.  Hiche jeh a hitia abul umlouva ngohna thu akisei sanga Zillai lamkai ho leh vangsetna toh pa insung miten gamkaiya um haosa upa hotoh thukholna anei uva thutah akhol diu joh hi pachat hiding ahi, ati. Organisation in kiloikhomna a kon achonchan phatlou jeh a kinodoh, kiloikhomna a thingnoi anahi ho natoh leh thilbol chunga kiphonna anei louding ahi, tin suhthengna anei uvin, ahivanga ex-cadre hijong leh thilse bol a pang ho gotna kilomtah peh nadinga khongai louding ahi, ati.

Paotinsat Vaiphei kitha thu a Organisation in amun a thukholna aneiyin, thilso ni jan a vangsetna toh pa hi midang khat hi ju kham pum a akina lhon e, ti thu akihedoh e, ati. Thilse bol ho gotna pehna dinga kiloikhomna in thukholna aneibe a, thilsoh a pang ho koi hiuvem ti kholna anei ahi’in, hiche jeh a Zillai lamkai hon abul umlouva organization chunga ngohna thu asem hohi kihetkhelna aumlou nadinga alahdoh dinga temna kinei ahi, tin T James thuso chun aseiyin chule themmona neiho akimat nadinga thukholna atosot diuvin temna aneibe uvin ahi.

Pandit Jawaharlal Nehru penkal Kum 130 lhinna kimang

Imphal, Nov 14(ET): Manipur Pradesh Congress Committee in tuni chun Congress Bhawan ah India Prime Minister masapen Pandit Jawaharlal Nehru penkal kum 130 lhin geldohna kingon amang’in ahi. Kingon a chun Manipur Pradesh Congress Committee a President M Okendro leh Congress Working Committee Member Gaikhangam chuleh party member poimotah holeh party natong hon Pandit Jawaharlal Nehru lim semthu chung’ah pahcha atheuvin ahi. Kingon hi Pandit Jawaharlal Nehru kipehdohna, chamlhatna dia pan anahalahna ho, athilpha boldoh holeh khantou machal natoh tampi aboldoh a world map a India gam kichehtah a ahin kitahlangsahna ho geldohna chuleh jaana vetsahna a kibol ahi tin Manipur Pradesh Congress Committee a President M Oken chun aseiyin ahi. Alangkhat ah gamsung huhbitna dingin Manipur State Legislature ho Delhi a akisaipi authority gano ding’in kigosadem in aum tauvin, chutima chun Congress hi gamsung mipite toh kidingkhom ahin, NSCN-IM leh Centre kah Framework Agreement hin gamsung ahin tohkhah louna teidia nasatah a pan kilajing ahi tin jong aseiyin ahi.

Congress Working Committee Member Gaikhangam in aseina ah Congress party hi gamsung huhbitna dia mipite lang’a pangjing ahi ati. Ijem tia gamsung ahung kitohkhah ngeiya ahile kimoh vetthim louding, chule Congress party in Manipur integrity huhbitna dia Centre ano jingding ahi tin ati.

India Prime Minister masapen Jawaharlal Nehru pen nikho geldohnan Oriental Naga Academy in Children’s Day amang’in ahi. Kingon hi chapang ho thaneina, venbitna leh themjilna khohsah ding bidoi neiya kibol ahi. Kingon a chun Oriental Naga Academy School Management leh jilkung hon chapang ho nule pate jong akou uvin kitilkhouna program hojong amanpi uvin ahi. Kingon kimantoh kilhon chun Literary Meet, Sports leh Merit ho’a pachanna nei simlai ho kipaman apeuve. Simlai honjong laa, laam chuleh vetnom umtah tah ho atho uvin ahi.

 

Tukum Children’s Day nikho a government school a kai simlai ho dinga ‘Helicopter Ride’ hondoh hita

Imphal, Nov 14(ET): Tukum Childrens’ Day nikho a gamsunga um Government School a kon simlai ho dinga Helicopter Ride agon utoh kilhon a gamsunga dinga hetthei umtah nikho ahi.

Education Minister Thokchom Radheshyam lamkaina a Department of School Education in State Transport Department toh Thursday nikho a Bir Tikendrajit International Airport, Imphal khopi a ‘Helicopter Ride’ apat u ahi’in, November nisim 22 nikho chan chejom ding ahi. “Helicopter Ride’ hi simlai hon gamsung thu ahetbe nomna dinga atilkhouna a kibol ahi, tin Minister pa in aseiyin ahi.

Zonal ahilouleh District Level competition ana kibolna a goljona nei simlai hon CM Secretariat, Imphal a Chief Minister N Biren Singh akimupi jou uva Helicopter Ride a kipan sah ahi. Zone thum noiya um Imphal East, Imphal West chule Wangoi a kon simlai 30 hi nikho masapen ni a helicopter lenna a tou u ahi.

Competition hi category ni- Class IV-VIII chan simlai ho dinga Zonal Education Officers (ZEO) 17 a kibol ahi, tin Radheshyam in aseiyin ahi. Gamsung thu simlai hon ahetbe cheh nading uva kitetna kibol ahi’in, mopohna nei ZEO hon ama ama district ahilouleh Zone a ‘Know Your State’ kiti thupi noiya competition agon u ahi’in, ‘extempore speech, quiz ahilouleh story telling’ kiti kitetna dang dang abol ahi.

Helicopter Ride hi ni sagi umding ahi’in, simlai hohi niseh leh hop 2 le 3 a kikhen diu ahi. Minute 25 sung simlai ho helicopter a tou diu ahi’in, lenna a kon Loktak Lake, Keibul Lamjao National Park, Moirang chule Imphal mun phabep avet diu ahi. Thinglhang district chule Jiribam a kon hung simlai ho dinga lhunna ding mun Department of Education (S) in Residential School, Uripok mun a agon peh ahi.

Zone khat cheh a kon representative 11, simlai 9, jilkung/guide khat chule ZEO representative khat pang ahi’in, helicopter a simlai ho atouvu hi tamtah dinga lungtup tahso na hiding ahi, ati. Hiche akibol hi Department of Education (Schools) noiya um government school a kai simlai ho gamsung chungchang hetbe nadinga phat pha akipeh na ahi, tin Minister pa in aseiyin ahi.

Minister pa hi Commission Education (S), Kh Raghumani Singh, Director Education (S) Th Kirankumar chule mopohna nei official adang dang hotoh kilhon ahi.

TRI a State Level Children’s Day kin kimang; chapang hon society pha ahin sem diuva Deputy CM in sei

Imphal, Nov. 14(ET): Deputy Chief Minister Yumnam Joykumar Singh in Tribal Research Institute auditorium, Chingmeirong, Imphal khopi a State Level Childrens’ Day kin kimanna a ahoulimna a gamsung ahoina ho toh umkhom thep angaidan thu aseiyin ahi.

Chief Guest a pang Deputy Chief Minister Y Joykumar in ahoulimna a Children’s Day hi aumtalou gamsunga dinga Prime minister masapen Pandit Jawaharlal Nehru pen nikho geldohna a kimang ahi, tin aseiyin ahi. Chapang ho hi khonung a dinga manlu tah ahiuve tihi ihetsoh u ahi’in, ahivanga eima chate hon society a pan aneiyu chule amopohnau lentah umho hi ihetsoh louvu ahi.

Chapang jouse hi chamlhatna neiya peng ahiuvin, mihem hinkho manlut dan chule hinkhom leh lungmong a chenkhom angaidan thu ho hetsah ding ahi, ati. Chapan tibukimlou, lungthim bulhing lou, cha leh adang dang jeh a boina kisei tamtah um ahi’in, amaho chunga society in mopohna anei ahi, ati. Chapang hon themjilna pha, healthcare pha chule phatchomna dang dang amu nading uva special scheme chule welfare program adang dang tamtah um ahi’in, Children Home, Orphanage leh adang danga um chapang hohi phatah a khohsahna peh ding, inmun a lungmong a umho banga ngailutna neiding ahi, ati.

Gamsunga um simlai ho khonunga mopohna nei chule chihna sangtah nei ahidiu adeisahna thu aseibe in ahi. Social Welfare Minister Nemcha Kipgen injong ahoulimna a, Pandit Nehru hin chapang hon ‘right to education’, ‘right to healthcare’ chule adang dang aneiyu amu nadiu lungtup anei ahi, tin aseiyin chule hiche a dinga Social Welfare Department in chapang ho, adeh a lamchom chom a tahsa bulhing lou, lunggel chamkimlou chule cha ho dinga scheme chom chom tamtah abol ahi, ati.

Chapang kisuhgimna thu tamtah akiseiyin, hiche hohi khohsah ding ahi, ati. Chapang khamnathei bol jong hi boina ahi’in, nu le pa tehon hiche chungchang a chate khohsahna sangtah apeh diu ahi, tin aseiyin chule gamsunga um chate ho nu le pa, jilkung, upa ahan ho sei ngai chule kitahnanei ahina ding uva temna anei uvin ahi.

Kin gon a L Rameshor Singh, MLA injong society pha semna dinga chapang ho puihoui angaidan thu a houlimna aneiyin ahi. Kin a Bantee Singh Konthoujam, Joint Director, Social Welfare, school chule Children Home chom chom a kon simlai ho, nu-le-pa chule jilkung hojong apang uvin ahi.

Sana Dk. Crore 3.16 man kimandoh

Tengnoupal, Nov. 14 (ET): Thuguh pole ho’a kon thulhut amu dungjui uvin Customs Prevention Force, Moreh Customs Division, Imphal officer hon tunin Indo-Mayanmar gami kom’a numei khat akon in gold biscuits 8300 gms a sum a sei ding in Dk. Crore 3.16 man ding vel anamandoh uvin ahi.  Matdoh’a um nuhi Moreh, Phaicham Veng akon Tingkholam (59) ahi akiti.  Thulhut kimu dungjui in Tingkholam hi Indo-Myanmar Friendship gate No. 2 akon kimandoh ahi. Amanu chung’a case khat jih lut ahitoh lhon’a achung thu kholchil na chelha jing ahi.

Manju Diler Hon’ble Members in CCpur vil; Sanitation worker ho lha lo lhom asah thu leh Permanent ahi nading’a kigon pehding ahi

B.Lalboi Gangte

CCpur. Nov, 14 (ET) : Manju Diler, Hon’ble Member, Status Secretary Government of India, National Commission For Safai Karamcharis, Ministry of Social Justice and Empowerment in CCpur District hopsung mun chom chom vetlhah na ananei jou in Conference hall, DC Office, Tuibong mun’a Press conference jong ananei in ahi. Manju Diler hin jinglam nidan 10:30 in Hiangtam Lamka Tipaimukh road a um ADC Town Hall apha in hiche achun T. Paukhanlian, Chairman, ADC CCpur, Thangboi Gangte, MCS, Additional DC, Dr. Vumchinpau Tonsing, Chief Medical Officer CCpur ho jong akimupi in ahi. Town Hall achun ADC Town Office noi’a worker leh office staff hotoh kihoulim khomna anei in chuleh ADC noi’a sanitation worker hon hahsatna aneiho leh boina chom chom atoho toh kisai seikhom na jong ananei uvin ahi. Sanitation worker ho lhakhat lo tu ding mun’a ding’a alhom tah dan aphongdoh naban’a Government natong nem pen ho lojat jong alojou lou’u ahi na’a alo’u kalsah ahi thei na ding’a panla ding leh atoh nao contract basis jong permanent ahi theina ding’a pan alah ding dan aphongdoh in ahi.

Hiche toh lhon’a DC Office mun’a thingnou phu naleh thuso miho akimupi na’a Sanitation worker hon daan toh kitoh’a na atoh uva alha lo asan’u hi anem val in natoh nading’a thil poimo kining lhing jong peh ahilou naban’a Ayushman Bharat Scheme noi’a Health Card leh hamphat na chom chom amu ding’u ahi ati. Kum khat a amaho ding’a Safai Karamchari toh kisai’a Awareness ni-vei beh nei ding, athil mudoh toh kisai’a Central Government heng’a lhut ding ahi dan atahlang in ahi. CCpur District a sanitation worker 31 aum in amaho hi part time worker dana’a alah u ahitoh lhon’a full time ah natong ahithei na ding’a recommend bol ding injong aphongdoh in ahi.

Minister Letpao Haokip in Paotinsat kitha demna nei

Imphal, Nov 14(ET): Achesa November, 10, 2019 nikho a Hengmol kho, Chakpikarong Sub-Division, Chandel District, a sopi Paotinsat Vaiphei thina chunga gamsung MLA khat hinan keiman jong nopmo kasan hitobang dei umlou tah thil soh demna sangtah kaneiye tin WR & YAS Minister Letpao Haokip akon thulhutkhat kimu chun aseiyin ahi. Dei umloutah thilsosah hohi achan diuva lom gotna dan dungjuija achan nadinguva keiman jong kajochanna pan kalah ding ahi. Hiche thutoh kisaija mipiten jong thu asetna lam ding hilouva aphat na lam ding joh’a pan alah khom cheh’a monanei ho kimatdoh kahsea social media lah a jong chingthei tah a thu aseiding uvin jong temna aneiyin ahi.