UNC in Kuki te gamsungmi dihtah ahipoi, tia asei KIM in donbutna...

UNC in Kuki te gamsungmi dihtah ahipoi, tia asei KIM in donbutna nei; Chamlhatna dinga galsat ho noise na ahi, tia seiyu

1716
0
SHARE

UNC in Kuki te gamsungmi dihtah ahipoi, tia asei KIM in donbutna nei; Chamlhatna dinga galsat ho noise na ahi, tia seiyu

Imphal, Nov 7 (ET): November nisim 7 nikho a UNC in gamsung mi dihtah thu a thuso anei Kuki Inpi Manipur in donbutna aneiyin, Tangkhul based organization ho Somra tract a kon hung uva Kuki te pupa gam a cheng uva Kuki haosa ho kai apeh u joh gel uhen, tin aseiyin ahi.

NSCN-IM hon lhangphong tah a atosot jeh uva thusim dettah neiya chule tu naicha Anglo-Kuki War kum 100 lhinna kin mang a Kuki teho thudohna anei ngam u ahi’in, NSCN-IM ho lunggel seidoh a pang ahiuve, tin Sominthang Doungel, Vice President (Political Affairs), KIM in aseiyin ahi. Kuki Naga gal a hi NSCN-IM hon gamsung mi dihtah Kuki ho chenna pupa gam leiset lahpeh nadinga tohgon anei ahi’in, Kuki kho aja a sim hon khosung adalhah diu thuso pe a UNC pang ahi jong hettoh ahi, ati.

Kukiten pupa gam huhna dinga British thahat tah adouna thusim loupitah jong anei ahi’in, Kacha Naga hohi Kuki gam nokhum ho soh chule thuguh khol le a pang ahi. Gamsung dihlou tah a lokhum a Kuki ho gamsung mi dihtah ahipoi, tia seiya Kacha Naga ho dinga hiche hi suhmang theilou jum umtah thusim ahi. UNC in gu nei chule kichouna a ‘Nam kah a kinahna soh ding ahi”, tia aseiyu hin kho helou tamtah atil bou ahipon, sorkar in tuchan geiya nam kah a boina ding thu seiya NSCN-IM ho sottol a pang UNC ho athoh ham tijong lungdon umtah ahi, ati.

Framework Agreement a Naga hon lolhinna aneidiu adei uvin, ahivanga Naga autonomous council kiseiya pang Kuki pupa gam leiset ho puikhom dinga Kacha Naga hon kouna aneiyu thangkol a mopohna nei authority ho alhah lou diuvin temna anei uvin ahi. Alhangpi a Kacha Naga ho leh Tangkhul, adeh a tu khang hon Kuki gam a cheng ahiuhi ateh/ahan ho a kon photchenna akilah diuhi mijouse phatna hiding chule apu-son, apa-son houhi Kuki te banna British te soh a pang ahiuve ti thutah akisan diu ahi, ati.

Kuki ten gam leiset huhna dinga British te anasat a hi  Kacha Naga hon British dinga na atoh u ahi. UNC in koihi gamsung mi dihtah ham chule Kuki pu-pa gam leiset hilou ham ti seithei nading thutah ipi aneiyem? Kuki haosa galhang hon gamsung leh chamlhatna huhna dinga British anadou uva hi UNC ana um em? Tin thudoh aneiyin chule UNC in lunghanna thei thu asei hi India sorkar in agelkhoh phat ahitan, Kuki teho thusim leh thaneina hetpehna anei ngai ahi, tin KIM thuso chun aseiben ahi.

Centre in ‘Framework Agreement’ toh kitoh a thuchaina semdinga nopna anei ahin, group jousen pan alahkhom phat ahi, tia NSCN-IM in thuso nei

Dimapur, Nov 7(ET): NSCN-IM hon Thursday nilhah in party ni- India sorkar chule NSCN-IM in kinoptona kisem ho achaina a seidinga kinoptona anei tauve, tin phondohna anei uvin ahi.

NSCN-IM ho thuphon (declaration) a chun, “India sorkar in Framework Agreement toh kitoh a ‘final agreement’ sem dinga kigotna anei ahitan, Naga jousen kigotna aneiding ahi”, ati. Chule ‘Framework Agreement’ a group dang dang a um sopi numei leh pasal ho apan diuvin kouna leh temna aneiyin, ‘Final solution’ a pan alah diuvin asei uvin ahi. “Achesa phat a camp chom chom a um isopi ho suhkhel kingaidam ahitai. Achesa phat a suhkhel hohi ngaidam ding ah”, ati.

Dimapur khopi a NSCN-IM ho ‘Declaration’ asodoh nauva Naga Politics thu tu dinmun chan alhun dan jong asei uvin ahi. “Naga hon gal hahsatah tah ato uva, khonung ding huhna a melma ho adou ahi. Gal in Naga insung, society, khosung leh gamsung sangtah a asuhset ahi’in, Naga hohi akisei gal ho a vangsetna toh ahiuve”, ati. Ahin, Pathen in akisugim Naga ho ka awgin ajahpeh a taona eingaipeh u ahi. Indian Army General holeh political leader hon Indo-Naga boina hi ‘military’ hilouva ‘political’ joh ahi tihi tua nopna aneiyu ahitai”, tin ‘Declaration’ a chun asei uvin ahi.

India sorkar le National Socialist Council of Nagalim (NSCN) in 1997 kum a kon kihouna apat ahitai, tin asei uvin, avel vel a toukhomna aum jouva August nisim 3, 2015 kum a Naga thusim achombeh ahina hetpehna a   ‘Framework Agreement’ soi kaina anei ahi, ati. India sorkar in aganna thei pen a Naga National flag leh constitution thu suhlhap dinga kitepna anei ahi’in, alangni in kinoptona kisem ho suhcheh/seilhah nadinga khatvei tohkhah kit ding a nopna anei ahi, ati.

Framework Agreement toh kitoh a India sorkar in NSCN-IM toh ‘Final Agreement’ sem dinga kigotna anei ahijeh a Naga jousen kigotna ineidiu ahi. Kihouna chule thulhuhna akiseina a group chom chom a um sopi jouse apan diuva temna kinei ahi’in, gamsung a chamna aumna ding leh gamsung miho ding gelna a pan alah diuva kouna kinei ahi”, ati. Naga ho kipumkhat nading leh chamna thuthot hi Naga jousen sang uhen, tin aseiyin chule tuhi Naga ho akipumkhat uva khangthah a alut khom nadiu phat ahi’in, thakhat a khoiju leh bongnoi lonna gam isemkhom diu ahi, tin thuso chun aseibe in ahi.

COCOMI in Sangai Festival boycott bol dia gihna nei

Imphal, Nov 8 (ET): Coordinating Committee on Manipur Integrity (COCOMI) in State Government toh akikah uva kihou umsa chule umding ho jouse khinlhah hiding in kilolna anei tauvin ahi. COCOMI lamkai holeh UCM Secretary General Khuraijam Athouba in thuso miho heng a aseina achun, Naga issue chungthu a Govt. in thuchan a Special Assembly session anei lou jeh uh ahi ati. Chule COCOMI hon ahung lhung ding Sangai Festival jong boycott ding in gihna anei tauvin, chule mipi hon lampi akehkhat khahtan a kiven toumun kiphin pan ding in jong thulhutna anei uvin, gamsung mipi hon amauho lhang a MLA cheh achenna inmun ahiloule a Quarter uh nokhum a agangthei pen a Assemby session atou nadiuva nokhum ding in jong thuphon abol uvin, chule State Govt. toh kithujamat nading achu Media akon bou hiding ahitai tin jong phondohna anei un ahi.

 

CMG in hetpeh lou camp ho khah ding a NSCN hetsah na nei

Imphal, November 7: Ceasefire Monitoring Group (CMG) NSCN Faction jouse ang a government hetpeh lou camp le office jou se khah ding in hetsah na ananei uvin ahi.

Government in hitabang a hetsah na ana nei toh lhon in tuni in Assam Rifles in Ahthibung lhang sung vetlhah na ana nei uvin ahi. Assam Rifles in mipi ho ang a galguh bol koima gamsung a umsah lou ding in jong hetsah na ana nei uvin ahi.

Vetlhah na kingon achun SDO civil Ahthibung, Ahthibung post commander le  OC Ahthibung PS in panlah na ana nei uvin ahi. Hetthei khat chu NSCN-KN cadre 47 lam camp a nung che ding uva government in thupeh ana nei ahitan ahi. Hitabang na toh na hi Jalukie le Peren lhang sung a jong kibol ding ahi akiti. (ChongthuNews)

Myanmar sepai kitol lut be jeh’a Indian Army ho kiging jinga um; NSCN-IM ho Indo-Myanmar gamlah lang jon a cheu

Imphal, Nov 7(ET): Myanmar gamsung Lesi township, Saigang Division noiya um Hengkot leh Ngachan kho kikah gamlah a konin Myanmar sepai hon NSCN-IM thingnoi tamtah anodoh uvin, Khayang gamkai, India gam (Indo-Myanmar Border Pillar No.123 kom) langa ahin no uvin, India gam hopsung Chamu leh Khayang kimvel kah a um gamlah lang ajon uve, tin thulhut in aseiyin ahi.

NSCN-IM thingnoi 300 vel hi Hengkot leh Ngachan kho kikah a um gamlah mun chom chom mun ni a um u ahi’in, Indo-Myanmar border pillar number 124 leh 125 kikah ahi. Myanmar sepai tamtah kitol ho achesa November nisim 4 nikho a Ngachan kho alhun masang uva NSCN-IM thingnoi hon camp adalhah uva India gam lang ajot u ahi. Myanmar gamsung Hengkot leh Ngachan kho kikah gamlah a Myanmar sepai tamtah tuni jingkah in akitol lut be uve, tin thulhut in aseiyin ahi.

Achesa November nisim 5 nilhah a Indian Army langa kon thulhut in India gam hopsung border pillar no 123 kom a um Khayang kho a NSCN-IM camp aumpon chule Border Pillar No 124 leh 125 a kon India gam langa hunglut thalchoi thingnoi aume ti report jong aumpoi, tin asei uvin, India sepai hon gamkai phatah a angatup u ahi, ati. Ahivanga border a kon kimu thulhut in, Chetric Khullen a um Assam Rifles sepai ho Khayang leh Chamu kho lang a ache uve, tin aseiyin ahi.

Tu dinmun a kikaptona thilsoh umlou ahi. Assam Rifles sepai ho alut jou uva Khayang kho a umho jong Khayang leh Chamu kho kikah gamlah lang jon a ache uve, ati. Thingnoi phabep in Border Pillar 125 agalkaiya chule Huishu kho lang ajot ahi, tin thulhut in aseibe in ahi. Gamkaiya um India sepai ho achihthei nading uva hetsahna masa jong um ahi.

November nisim 5 nikho a gamsung thuso a NSCN-IM thingnoi tamtah Myanmar gam a kon ahin nodoh uve, tia kisei ahi. Camp hi Retired Lt/Gen, NSCN-IM Hangshi Ramsom leh Brigadier, NSCN-IM Nganingkhui chule Col.Mahongam leh Col. Yurho panna a NSCN-IM lamkai luboh phabep command noiya um ahi, tia jong kisei ahi. Ahivanga lamkai ho umna thuso in aseidoh lou ahi.

Malaysia a “Chavang Kut” loupi tah’a ana kimang

Imphal, Nov 7 (ET): Achesa Nov. Nisim 4 nikho chun Kuala Lumpur-Malaysia sung’a um kuki chaten  “ONE NATION UNDER ONE GOD” ti thupi mangcha in Jesus Caritas Hall mun’a Chavang kut loupe tah in anamang uvin ahi. Kingon ho kipat nading in KUT PA Thangkhankhup Guite in phat hondoh na ananei in ahi. Kingon achun Jin-gun in Aribam Romi Sharma (Founder & Director siroi solutions), Jin-ja-um in Kamkholen Kipgen IFS (B) Indian Embassy, F/president leh Robert kham (Catechist) anapang uvin  chuleh Malaysia gamsung’a um Chin / Zou – kuki chate 300 val’in pan anala uvin ahi.

Kingon phatsung in Kuki Pop singer Mimin Haokip kithopi ding in Local artiste Houmang, Sarah Huai, Vahshi hon jong  pan anala uvin chuleh Talent show, Pula- pala akon laam vetnop um tah Kuki Worship Service Malaysia Youth Dept., Sunday school union, Malaysian Thadou-kuki Catholic Church hon vetsah na ananei uvin ahi. Chuleh Youth Dept. akon Chin-Kuki-Mizo sung’a jatvon – Nampon loupi tah kineiho vetsahna jong ananei uvin ahi.