UKLF in Moreh gamsung kichonlut hi mipi deisah ahi, NSCN (IM) toh...

UKLF in Moreh gamsung kichonlut hi mipi deisah ahi, NSCN (IM) toh kisaina akineipoi: T.James

503
0
SHARE

Moreh, Dec.27:UKLF in Moreh gamsung kichonlut hi KNA-KNO in Moreh a cheng milham ho chung a chonvalna sangtah aneiho suhtang ding lunggel akineijeh ahi tin kiloikhom Dept. of Info. & Pub.Secy, T.James a kon kimu thulhut in aseiyin ahi. Chuleh UKLF in NSCN-IM cadre 30 vel Moreh khopi sung a ahin puilut’e ti’a KNA-KNO in ngohna aneihi abul abal umlou jouthu ahi’n, Moreh sung a cheng mipiho lungsung a kichatna lungthim akhumlut peh nomjeh a asei ahibouve tin thulhut chun aseiyin ahi. Kiloikhomna lhingset le lentah khat in hitobang a jou le nal thu aseihi ama le ama kijoh lele tobang ahi. Police, Commando chuleh 11 AR hon Moreh sung a UKLF cadre ho aum’u hi ahe uvin chuleh UKLF cadre ho lah a hin NSCN-IM apangpoi tijong kichehtah in ahe’uve. HTC, KSO, KWU , tribe lamkai chuleh ward lamkai ho’n jong hiche thu hi kichehtah a ahetjeh’u ahi tin thulhut chun aseiyin ahi.
NSCN-IM le UKLF kikhan hi Manipur sung thuso ho in jong kichehtah a ahet’u ahi. Achesa March , 2015 kum a NSCN-IM cadre hon aimol-Ngairong, Pallel gamkai sung a UKLF cadre Manglun ahin thajou’uva kipat NSCN-IM le UKLF hin kikhutjopna ana kineijouse ana kinuse ahi. Chuleh Jan.2016 chun Molnom a NSCN-IM ho toh kikaptuonah a UKLF cadre khat in amit achan thu jong hiche nikho a chu thuso jouse’n headlines a ahinkoiyu ahi. Tu’a KNA-KNO in UKLF chung a ngohna aneiho hi alungthim thenlou dan’u le politics hoilou abolho’u atahlang’u ahi tin thulhut chun aseiyin ahi.
Moreh hi Kuki-Naga kinah laiya kon KNA hoa ana toupha’u ahitai. Moreh hi sum le pai ninglhing tah a munathei mun khat ahijeh a KNA ho hi’n anei le agou’u akisonpi ‘uva kiletsah tah a ham’u ahi. Ahinlah asum mu ho’u hungkondohna milham ho chung a khansetna aboljing’uvin hitolhon chun a politics bol’u ahoilou jeh in Chandel gamkai sung a cheng mipi jouse’n anung gu athohlal panta’uvin ahi. KNA hin SoO ground rules phatah a juidan in akiseiyin ahinlah alangkhat a khamnathei, thing-gai (sandalwood), songmantam chuleh manchah a guhthim in akivei’uvin ahi. Hiche ho’a kon sum amu ho’u jong mipi gentheina suhlhapnah a mangchalouvin alamkai cheng’uvin CCpur lang a Insah na din amangcha’uvin ahi. Chandel gamkai sunga cheng, adeh a moreh khopi sung a cheng, ho hin KNA-KNO thilbol hi achimchah gam’u ahitai. Valley based Insurgent Groups (VGIB) ho Sajik Tampak a alut theiyu jong chu KNA-KNO in Dk.6 lacs akilah’uva camp kisahna ding phalna anapeh jeh ahi. Hiti’a chu hungchal a achainah a VBIG ho hin Kuki ho chenna munho jong khat khat a ahinluopan u ahi. Thingphung aga in akihe’e tia kisei paochamtuh bang a jong kiloikhom khat hi athilbol ho’a kon kihedoh thei ahi. KNA-KNO thingphung vang hi ga phalou tampi ahinsuo ahitai. KNA-KNO in Chandel mipi ho angailut le angailutlou ahunglhung ding Assembly Election a Kuki kaidoh am ahilouleh Non-Kuki ho hungkaidoh’uvam tihin aphondoh ding ahi. Chuleh tutu’a Chandel MLA jong hi KNA-KNO thingphung a pat hung gadoh ahi’n, mipi in aphat le aphatlou kichehtah a ahet ahi.
KNA-KNO in amachang phatchomna ding’a thilphalou tampi abolho hi Government of India le State government in jong akholchil ding a lomtah ahi. Chuleh KNA-KNO in muona neilou milham tampi athana mun “Lenthei Lei” jong akholchil lhon ding in ngehna akineiye tin thulhut chun aseiye.
UKLF in Moreh kichonlut hi nop man ahilou le da man a kichonlut ahipo’n, Moreh khopi sung a cheng lamkai ho le milham ho’n adeisah jeh’a kichonlut ahi. Ajeh chu KNA-KNO chaloh dan ahoitah lou jeh a mipi in jong ‘balance of power’ aumding adei ahi. Chuleh kiloikhom in Moreh khopi sung kichonlut’a Operational area khat a kisemdoh thei hi KNA-KNO chung’a mipi lungkimlou jeh le Government of India in KNA-KNO atahsan tahlou jeh ahi tin thulhut chun aseiyin ahi.