UKLF in John Gangte kitha KNO ngohna nei; UPF, KIM, chule CSO...

UKLF in John Gangte kitha KNO ngohna nei; UPF, KIM, chule CSO chom chom in Moreh thilsoh demna sangtah nei

508
0
SHARE

UKLF in John Gangte kitha KNO ngohna nei; UPF, KIM, chule CSO chom chom in Moreh  thilsoh demna sangtah nei

Imphal, July 14(ET): Phailengmol tolthana thilsoh ni phabep jouva Moreh town a tolthana thilsoh aumkit hi gamsunga um sorkar toh kihouna neiya Kuki thingnoi kiloikhomna chom chom umkhomna teni leh Kuki CSO chom chom honin demna sangtah anei uvin ahi.

UKLF a self-styled Lieutenant John Gangte, Town Commander, Moreh hi Ngamkhai Veng, Moreh a July 13 sun a lunghanna ding thil abol louvanga kilamtin a melsetah a kikaplih ahi. Achesa July nisim 10 ni a jong Keihao leh Hengjang kho kikah Island (Phailengmol), Kangpokpi district a kho haosapu leh atupa khat mel hetlou hon akaplih’a themmona neiho tuchan a kiman loulai ahi.

Social media a FIR report kithang dungjuiya, achesa July 13 sun nidan 12.15 don a Kuki National Army (KNA) thingnoi hon Thangboi Haokip, OC, Moreh Tachtical HQ, KNA command na noiya John Gangte akaplih u ahi, tia kisei ahi. Chule tolthat holah a hi Thongmang Haokip, Moreh Town Command, KNA, Hemlen Khongsai, Second-in-Command, Hermon Camp leh Seingam Haokip, KNA min kipe ahi. FIR report a hi Moreh Police station Officer-in-charge in tolthat ho amat kahse a thilong lah loudinga kisei ahi.

Thal choi hon Moreh a UKLF thingnoi lamkai khat akaplih jouva UKLF in thilsoh demna sangtah anei uvin, United Kuki Liberation Front (UKLF) in melsetah  a kithana ahi tia alah ahi, tin UKLF thuson aseiyin ahi.

“2nd Lieutenant John Gangte, Town Commander, Moreh pa Ngamkhai Veng, Moreh a July 13 sun a lunghanna ding thil ima abol lou vanga akitha hi UKLF in demna sangtah aneiye”, tin T James, Joint Secretary, UKLF in thuso aneiyin ahi. “Suspension of Operation noiya um Kuki Revolutionary Group a lamkai atamjo hin gamsung politics thu suhlhap nadinga centre leh state sorkar lamkai hotoh kihouna aneijing laiya KNO hon sopi ho ma ma melsetah a atha jing hi vangset umtah ahi. KNO in Moreh Hill Town a cheng ho lungthim a kichatna asemna thilsoh masapen ahipoi”, tin thuso chun aseiyin ahi.

Tu masanga KNO thingnoi hon aumtalou UKLF captain anahi George melsetah a atha uva chule town sunga meithal kap leh bomb suhpoh abol jing u ahi’in, KNO lamkai hohin ipi lunggel aneiya state chule centre sorkar toh SoO soi kaina anei ham ti thudoh phat ahi, ati.

Kiloikhomna Investigation Team in thukholna anei dungjuiya 2nd Lieutenant John Gangte hi KNO thingnoi hon Thahpi @ Thangboi Haokip, OC, KNA Moreh command noiya alamtin uva atha u ahi. Chule tolthat a hi Thangmang Haokip, Moreh Town Commander, KNA, Hemlen Khongsai, second-in-command, Hermon Camp leh Seingam Haokip, Chavangphai, Moreh a cheng thingnoikhat toh ahiuve, ati.

Khonung a hitobang deilou umtah thilsoh avel a alhun kit louna dinga mopohna nei authority hon themmona nei ho chule themmona neiya kiloikhomna a lamkai ho chunga action khoutah alah diuvin UKLF in temna jong anei uvin ahi.

Kuki Revolutionary group phabep umkhomna United People’s Front (UPF) a hi UKLF jong member a pang ahi’in, John Gangte kitha demna sangtah anei uvin ahi. Thanglenlan Doungel, Information & Publicity Secretary, UPF in soi akaina thuso a chun organization in Ngamkhai Veng a John Gangte kitha demna thu kidang akisa’e, tin aseiyin chule insung mite leh UKLF lunghempina anei uvin ahi. Sorkar in thilsoh agelkhoh a chule aganna thei pen a themmona nei ho amat dinga jong ngehna aneiyin ahi.

Alangkhat a, Kuki Inpi Manipur injong Kuki nam mite lah a tukah a kithana thilsoh umho demna anei uvin ahi. Kuki nam mite chule kiloikhomna lamkai hon society a chamna aumna dinga boina lampi adalhah diuvin ngehna anei uvin ahi. KSO, Chandel district injong Moreh a eima dei banga tolthana thilsoh aumjeng alungkhampi nau leh demna thuso anei uvin ahi. Tua sorkar chunga tahsanna akineiyin, John Gangte kitha thu a thudih a thutanna aumding a kouna kinei ahi, tin jong asei uvin ahi.

Moreh town a thisan so na leh boina akhohset louna dinga mopohna nei authority hon pan alah a action alah diuvin ngehna aneibe uvin ahi. Kuki Women Organization for Human Rights, Manipur injong sun noiya John Gangte kitha jeng demna anei uvin, mihem jouse hin hinna dinga ‘rights’ anei ahi’in, mihem hinkho lahmang nadinga koiman tha anei poi, tin asei uvin ahi. Lhang a um sepai hon gamsung miho phatah a aventup a chule hitobang thilsoh alhun kit nalou dinga pan alah diuvin KWOHR in temna aneiyin chule lungmong tah a chenkhom dinga ngehna aneibe uvin ahi.