Ukhrul lang khohsahna kipanpai kit jeng

Ukhrul lang khohsahna kipanpai kit jeng

202
0
SHARE

Ukhrul lang khohsahna kipanpai kit jeng

                              Achesa 2017 March lha a N Biren lamkaina noija BJP govt ahung kisemdoh doh a thinglhang district lah a thanom tah a Ukhrul anajot masatpen chu ajeh hasei ngailouva mi atamjon ahetdi ahi. Tuchung Lok Sabha election kichaito lhon’a Centre a BJP ahung umdohjom kitleh Manipur a N Biren govt jong hing galkai dia aum jeh a Ukhrul ajot masat kit jeng hi ajeh adang ahipon thinglhangmi lah a Manipur a boina leh Manipur suhkehna di lhoh (lungthim) hi Ukhrul lang’a kon kipan ahi ti hijeng di ahi. Ukhrul district mi ho sehseh iti Economic Blockade kumhung lhalhung’in boljongleu amahole amaho alol kimehlih bep hidiu ahi. Ahin Imphal-Dimapur lampi lha khat akikha jongleh Manipur thinglhang phaicham kitilouva hahsatna hijeng ahi. Dimapur-Imphal lamlen khana di thingnoi lhoh hi Ukhrul lang’a kon ahijeh a N Biren jong hin achihna amanchah a Ukhrul mipi te akisuh lunglhaileh Maipur boina thupipen akisubeije ti ahi. O Ibobi lamkaina Congress govt nin Bandh le Blockade ho ana suhthip joulou jeh in mipi’n hahsatna lentah anatoh in tun vang hiche lam’a hahsatna aumtapoi ti hi N Biren govt kiseiphatna lenpen hijing ahi. Chuban’a Chief Minster (CM) masa O Ibobi chun thinglhangmi leh phaicham mi kikah a kitahsan tona leh kingailut tona anakhohsahpon tunvang kitona leh kingailutna aumtai ti hi N Biren nin avetsah nom jing ahi. O Ibobi dehdeh chu Ukhrul a Helicopter cha’a jong anavahlut theilou ahin tua N Biren vang hi Imphal leh Ukhrul kikah hi tol’a gari’a suhche touché athothei ahi. Hiche hi N Biren boltheina leh chihna khat hitahbah ahi. Ahin hitobang lungholna hi itih chanpi hung chejom diham ti hi ahi. Centre toh Naga thingnoi ho kihouna’a akisei thupipen hi apolang’a Nagaland ponlap tum neidi, Centre toh Nagaland thuneina jouse (sovereignty) kihomdi (neikhomdi) ti hoa kinotden dan’a aumvang’a Manipur a Naga te chenna ho Nagaland State a bedi ham, atum’a kivaipohna umdiham ti hi kihoulhah theilounapen ahidi hetsa ahi. N Biren hin nalahle nakisih ding nalah lou jongle nakisihdi ti dinmun khatna umsa ahi. Naga te lung holna’n Naga political kihouna thu atosotleh phaicham mi ho titah louva Kuki ho upa mittol akiholdoh di, atosotlou jongleh Naga lang hon not thapma ahinkoi kit diu ahi.

                      Thinglhang district HQ hoa Cabinet Meeting bolji di kiti jong hi athua ahoi vang’a atah a ahilou behdi khat ahibouve. Thinglhang district HQ hoa Cabinet meeting aga kibol man’a thinglhang district ho khangtou chom di hidehlou ahi. Chuleh achesa kum 2 sung’a akibollouna mun ijat um’am ti jong het ahi. District thah holah a Kangpokpi leh Jiribam a bou Cabinet meeting anakibol ahin Pherzawl le Kamjong hi Cabinet hon amit lha uva jong agagalmu khahlou u ahi. Thinglhang district ho khohsahna hi district HQ hoa cabinet meeting gabol louva jong neithei ahi. Cabinet meeting leh govt to kiloikhomna khat to  “kihouna” kiti phot hi Capital Imphal a umdidol ahi. Politics khat lutna Ukhrul a Cabinet meeting gakibol chu politics mama jeh a Cabinet member akeh khat gajao kitlou ahi. Tuchung Ukhrul Cabinet meeting chun N Biren govt sung’a kilang khinna khat um tahdohna khat hijo ahi. Development natoh ho gavetlhah chu thuchom ahi.