UCM in Kuki Territorial Council leh Naga Regional Council doudalna thuphon nei

UCM in Kuki Territorial Council leh Naga Regional Council doudalna thuphon nei

77
0
SHARE

UCM in Kuki Territorial Council leh Naga Regional Council doudalna thuphon nei

Imphal, May 26(ET): Centre Government in Manipur gamsung’a Naga Regional Council le Kuki Territorial Council semdoh na ding tohgon kichai ding ahin mano toh lhon in tunin United Committee Manipur in Manipur sunga hitobang tohgon ho khatcha mipin kipom louding ahi dan thuphon anei uvin chule hitobang tohgon hi ahung chelhah le achesa June 2001 kum a thilsoh avel a hung lhung kit ding ahi tin jong kiloikhomna thuphon chun aseiben ahi.

Manipur gamsung hi Kum 3000 lam pu le pa ten ahin sem uva nekhom donkhom a asunga cheng ho hung khosa ahiuvin, hitobang kum 30 bep galguh hinbol ho suhkeh ding le suhboi ding ahipoi tin jong UCM akon thuso chun asei in ahi. Mipin khantou na le machal na ding bou agel a thildang gamsung suboi ho akon kikangse ding in jong kiloikhomna in hetsah na anei uvin ahi. Hitobang natoh na hi doudal na kinei jing ding hinlah gamsung machal na dinga tohkhom ding lungput nei ho vang kiloikhomna in kilemna jing ding ahi tin jong kiloikhomna thuphone chun aseiyin ahi.

Manipur mi ho kipohna ‘special train’ Bihar a kibulu, Manipur CM in demna sangtah nei

Imphal, May 26(ET): Chief Minister N Biren Singh in Monday nikhon Goa a tangden gamsung miho kipohna train kibuluna thilsoh demna sangtah aneiyin chule Bihar Chief Minister Nitish Kumar in themmona nei ho ‘book’ abol dinga aseiyin ahi.

Bihar gam a railway station a train akingah pet thilsoh ahi. Train kibuluna thilsoh a themmona nei chule pan la ho chunga Bihar CM Nitih Kumar in action alah dinga Manipur Chief Minister in temna anei ahi. “Goa a kon ka gam jon dinga hung ho kipohna special train kibuluna thilsoh demna sangtah kaneiye. Sunday ni a train Bihar gam a akingahna a mipin abulu ahi. Bihar CM Nitish Kumar in apet pet a themmona neiho ‘book’ abol dinga temna kaneiyin chule Railway Minister Piyush Goyal injong thilsoh chungchang avetlhah dinga temna kanei ahi”, tin CM Biren in aseiyin ahi.

Northeast gam mi 1,300 val kipohna special train khat Danapur railway station, Bihar gam a achesa Sunday nikho a mipin abulu ahi. “Katihar jong kapel loulaiyu ahi’in, train kingahna (stop) chom chom ni a song a kise na thilsoh ni katoh uvin, anukhah jo hi akhohse jo e. Keiho coach a bou song 20/30 vel eise khum uvin, akisukha phabep kaum uve. Train tol (driver) hon Bihar a angaichat louna a train angah da a chule Katihar lhunna dinga pan alah dinga khat touvin aseithei ding ham. Train achejom sah pouvin, police hon miho atosot uvin, amaho train sunga kalut sah loujeh uvin keiho pasal hojong avo uve”, tia train a tou mikhat in asei ahi.

Shramik Special train hi Gurugram, Haryana a kon Thursday nikho a kipandoh ahi’in, Sunday nilhah a New Jalpaiguri (NJP) railway station, West Bengal lhung ahi. Thilsoh umchan gangtah a akisei thang jouva Seva Bharti kiti NGO member hon train a tou passenger ho jouse neh le chah chule twi ahop peh uva lou le ai a jong kithopina aneiyu ahi.

Train hi Sunday jingkah nidan 5.45 a Dimapur lhung dinga um ahi’in, ahivanga, nidan 16 val avaigei sah u ahi. Hetthei khat chu lockdown sunga mi gam a tangden ho agam a thah nadinga Railway Ministry in ‘special train’ agon ahi. Meghalaya sorkar injong thilsoh ahet jouva athu Bihar chule Delhi sorkar henga Chief Secretary le DGP a kon apohdoh ahi.

Meghalaya Chief secretary injong Chairman, Railway Board henga athu apohdoh a, Meghalaya gam mi bou hilou Northeast gam mi train a hung tou khom ho huhna dinga pan alah dinga asei ahi. Meghalaya DGP, R Chandranathan injong apet pet a pan alah a, Bihar DGP chule DG, Railway Protection Force in pan alah pai dinga akihoulimpi ahi.

Lhukhosei Zou kilhadoh leh Brinda transfer kibol seimat lou ding ahi: KSO-GHQ

Kpi, May 26(UNA): ADC Chandel Chairman, Lhukhosei Zou leh Th.Brinda, MPS transfer kibol thu hi seimat louding ahi tin Kuki Students’ Organization-GHQ in asei in ahi. Thanglenmang Simte, General Secretary, KSO-GHQ in aseina achun CSO konkhat in Lhukhosei lhathum sung kilhadoh thu a demna anei uvin chule Brinda atohna kichon jeh in jong demna aneikit uvin mipi kho hephalou ho lunggel apei chavai kigo uvin hiche hi adihlou ahi ati. Aseibena achun Th. Brinda MPS chun social media a court thutanna chung a demna nasatah in abol in chule doctor numei khat chung ajong gihna aboljeh a ama natoh akon transfer kibol ahi ati.

CSO phabep in hiche teni chungthu a government angoh ujong adihthei pon court in athutan dan chung a thunei koima aumpon adih a sanding ahi ati in chule mipi kho hephalou ho puikoi nading a lampi dihlou gonlou ding ahi ati. CSO phabep in Lhukhosei ‘Drug Lord’ tia aminsah ujong hi aki pomthei pon anatoh chung a thutan ding court aum in court in athudan a kiche ding ahi ati.

Covid-19 boina chung’a khaokho lan jeh a India gam phabep boina kibe; Kum 26 sunga dinga khaokho lan kisei gimnei na pen hi

New Delhi, May 26 (PTI): India gam a khaokho alan jeh a state nga a anche louhing/me lei chule lousoh ga tamtah atohkhah dinga lhakhat masanga thuhilna anaum ahi.

Union Environment Ministry in kal masa a thuso aneina a Rajasthan, Punjab, Haryana le Madhya Pradesh gam a khaokho asang aja a sim alut e, tia anasei ahi. Rajasthan gamsung hi khaokho in asuhboi vangsetna toh lenpen a gam ahi’in, khaokho lang dinga ginchat anaum phat sanga ma jo a India gam a khaokho lang ahi.

Uttar Pradesh gam a jong ganhing a kon kibuluna thilsoh kiseiya, Maharashtra le Delhi a jong kiginna dinga thuhilna um ahi. United Nations (UN) in khaokho ahon hon a continent a leng hin tukum India agriculture sector sangtah a asuhboi thei dinga ana sei ahi. Food and Agriculture Organisation (FAO) in asei dungjuiya, khaokho hi vannoiya agam gam a kichon le/leng le ‘migratory pest’ luipen ahi.

Ganhing hi khaolang (grasshopper) toh akibahlouna um ahi’in, locust species ho lah a thil suse thei pen a kisei hi FAO in asei dungjuiya Desert Locust (schistocerca gregaria) ahi. Hiche hi mihem in ahet lousoh gas use thei akhohse pen holah a pang ahi’in, lhathum sunga ajat 20 a pung thei ahi, tin FAO expert hon asei uvin ahi.

Khaokho pilhing khat hin ama tahsa gih dan toh kibang jat hi niseh a anehdoh thei ahi’in chule ganhing apilhing 80 million umna khaokho hon hin square kilometer khat alo thei ahi, ati. Hiche ganhing hi niseh le km 150 lhing leng thei chule square km khat dim a khaokho hon hin mihem 35,000 in nikhat a aneh jat aneh doh thei ahi.

Tu naicha India-Pakistan gamgi a ‘locust outbreak’ anaum hi Indian Ocean a cyclone umjing jeh hidinga scientist hon ginmona aneiyu ahi. “Tua um ‘locust outbreak’ hi kum 25 sunga Ethiopia le Somalia gam a aumna, India gam a kum 26 sunga ding chule Kenya a kum 70 sunga ana kisei sanga lenjo ahi”, tin Keith Cressman, Locust Forecasting officer, FAO in aseiyin ahi.

Indian Institute of Tropical Meteorology (IITM), Pune a climate scientist Roxy Mathew Koll in asei dungjuiya, Africa solam le Arabian Peninsula a go hattah ajuh jouva outbreak kipan ahi, tin aseiyin ahi. Climate change chule ‘Indian Ocean Dipole’ tia kihe jeh ahi, tin Koll in hilchenna aneiyin chule Western Indian Ocean alum cheh cheh, Global warming a nisat cheh cheh jeh jong ahi, tin aseiyin ahi.

India gam a khaokho hon million a sim lhung hi Southern Iran a kon kipan ahi’in, hiche mun hi kum masa a apunbe nao (breeding) mun ahi. Indo-Pakistan gamgi alangni a nipi laiya hi khang (generation) thum chan achi punbe ahi, tin Cressman in aseibe in ahi.

Gamsung vaipo hon kiginna kikhousah a, amaho chaloh vetkol nadinga drone kimang a chule Pakistan toh kihouna um ahi, tin asei uvin ahi. Sorkar in drone, satellite manchah, sprayer ho aman tilouva UK a kon manchah lah ding jong angaito ahi. Monday nikho a Jaipur khopi chunga khaokho leng tamtah mutheiya um ahi’in, Jaipur a lenglut van tom leuva khaokho hi Nagaur a kon kipandoh ahi.

Rajasthan gam a um district 33 val hiche ganhing hin anokhum ahitai. Sunday nikho a Malhargarh, Madhya Pradesh a khaokho ho lhung u ahi. “Central Locust team le Agricultural Science department a scientist hon pan alah uva hop 60 tobang hi lou akap uva alahdoh u ahi”, tin Manoj Pushp, Mandsaur DM in aseiyin ahi.

Jhansi DM injong fire brigade hon chemical akoiya kiging jinga aum diuva thuhilna anei ahi. “Ganhing thu khosung mihon Control room ahetsah diuva thuhilna kipe ahi’in, hamhing na a -en (green) na mun a khaokho ho che diu ahi. Hiche jeh a alhun nau mun ho thuchen hetsahna nei ngai ahi”, tin Andra Vamsi, Jhansi district magistrate in aseiyin ahi.

“India gam a km 2.5 le 3km kikah nailam lhing khaokho alen khom thu akija in ahi. Kota, Rajasthan a kon team hon adouna a pan alah ahi, tin Kamal Katiya, Deputy Director, Agriculture department in aseiyin ahi. Tu dinmun a khaokho hon hi Bangra Magarpur, Jhansi a um ahi’in, ganhing than a lou jan teng kikap ding ahi, tin aseibe in ahi.