‘Twipra land’ jeh-a kijeptona kipan (Aug 27, 2016)

‘Twipra land’ jeh-a kijeptona kipan (Aug 27, 2016)

213
0
SHARE

Thilsoh neo khat jeh-a chi le nam’a kivetdana leh kijeptona hung soh doh jeng thei ahi hi 23 August ni’a Tripura khopi Agartala’a kijeptona thilsoh khat chun ahilchen ahitai. Hiche a chu Tripura a Tribal hon ‘Indigenous Peoples Front of Tripura (IPFT) ti kiloikhomna min nuoiya ‘Twipara land’ kiti State tum ‘demand’ bolna’a mipi kijotna ananei nauva Bengali hotoh hung kina kha uva kijeptona’a mi tamtah anakitongkha ahi. Tripura State hi thinglhangmi (tribal) ho gam dan’a ana umvang’in tua hi Tribal mi ho alhomjoh phatna Tribal hodi Twipara State tum demand bol hung kipan ahitai. Tribal ho hi huoilai gam hileh lim le mel a akilo vang uva ham le pao, chondan khandan kibangchet neilou, hon neocha cha’a imalam jousea kibungkhenna um ahi. Tripura’a Tribal ho jong hi Deberma/Debarman, Jamatia, Rangkhawl, Reang, Hmar,Mizo/Lusei leh adangdang Tribe chuomchieh ahiuve. Hiche Tribe holah-a atampenpen ho Tibe min hamkhatna kiloikhomna sem’a State tum deldi atiu hileh Tribal ho kah-a kitona umtheiloudi ahi ahet jeh uva IPFT min’a kiloikhom hidiu ahi. Chuleh, mu le mulou thuchuom hitantin, Tribe chuom-chuom umna ahijeh-a Twipara State ti min aputsah uva State tum adel u tina ahi. Tripura kiti thucheng mong mong jong hi ipi chet kiseina ahi kichieh tah-a akihetlou vang’a Tribal ho pao thucheng khat ahidi hetsa ahin mi bangkhat nin “twi pang” tina ahi tinjong aseiye. Ipi hileh Tripura State hi Tribal ho gam le State ahivang’a tunia hi Tribal ho gam ti thei hitalou ahitai. Bangladesh a kon Bengali ho Tripura gam’a ahung kichaulut bebe jing jeh uva tunia hi thinglhangmi ho hop thum’a hop khat bou hidoh u ahitan Bengali (gampam mi) hohi ha tam’a tamjo ahitaovin govt jong akhut uva akichoi u ahitai. Ahin agampheng toupha lang’a vang Tribal hon hop thum’a hop ni (haletna lienjo) atoupha nahlai thou u ahi. Tribal ho gam, thinglhang district hoa hi Autonomous District Council (ADC) power neitah leh ahidi bangtah-a che ahi. Hiche ADC gam huop hi ‘Twipara land’ (state) demand kibolna in ahuop chu ahi.

Kum 50/60 masang lang’a chu Tripura jong hi Tribal gam ahidungjuiya Tribal ho ‘population’ (mijat) hi 70% (hop thum’a hop ni) lang anahin tua Tribal ho hi 35% (hop thum’a hop khat) bou hung hidoh uva agam uva alhomjo (minority) hung hiu ahitai. Hiche jong chu Tripura a ILP chenalai ahi. Tua hi agam mi dihtah hilou Bengali hon ‘Twipara land’ kidel hi ichan’a ahin jahda diu hitam, “ka State u (Tripura) kehthei ponte” ahintinadiu hung nailam ahitai. Twipara state demand hi hung machalleh itobang boina ahung sobe dem het masahthei ahijeng’e. Bengali hohin Twipara State demand hi jahdana (oppose) aboldaule vang Tribal le Non-Tribal kikah-a kiboina umloudi ahin, ajahda diula ahisa tobang ahikit jeh in thil hungsohdi mu masat thei ahijenge.