Tuni a kon juiding Lockdown guidelines athah’a semphatna kinei; jan nidan 6...

Tuni a kon juiding Lockdown guidelines athah’a semphatna kinei; jan nidan 6 a kon jingkah nidan 6 chan ‘public curfew’ umding

63
0
SHARE

Tuni a kon juiding Lockdown guidelines athah’a semphatna kinei; jan nidan 6 a kon jingkah nidan 6 chan ‘public curfew’ umding

Imphal, May 3(ET): Lockdown phat kisuhsaobe sunga gamsunga akiphal ding le akikhah ding ho tu masanga ana kipe velvetna aumtoh kilhon a semphatna aneibe uvin, May nisim 4 nikho a kon akiphal ding gamsung in asodoh in ahi.

NDMA in nisim 14-04-2020 ni a Order aso dungjui chule Disaster Management Act, 2005 Section 10(2)(1) noiya Union Home Secretary in Chairperson, National Executive Committee hina a tha kipe amanchah a April 14 nikho a Ministry ho/Department, Government of India le State/Union Territory government chule state/UT authority hon Covid-19 pandemic vetkol nadinga Ministry of Home Affairs in Consolidated Guidelines asodoh hi May nisim 3 chan chepi dinga kisei ahi.

Union Home Secretary in May nisim 1 nikho a Order No.40-3/2020-DM-I(A) order asodohna Ministry/Department le State/Union Territory government le State/Union Territory Authority hon Lockdown phat hi May nisim 4 nikho a kon kal ni chejom pi dinga thuso anei ahi’in, chule lockdown dan thah kisem hohi May 4 a kon kal ni sung kichepi pan ding ahi, tin Dr J Suresh Babu, Chief Secretary in thuso aneiyin ahi.

Hiche jeh a Disaster Management Act, 2005  Section 20(2)(a) noi chule Chairperson, State Executive Committee, State Disaster Management Authority hina a May nisim 4 nikho a kon gamsung pumpi a kichepi pan ding lockdown guidelines thah kisodoh ahi, tin thuso chun aseiyin ahi. Hiche hohi Covid-19 management, Annexure-II dungjui ahi.

 Thuso aumkit kahse a akipe guidelines hohi lockdown sunga kichepi ding ahi. MHA in phalna apeh ahiloule security a ding chule medical service, air ambulance tilouva domestic le international flight jouse kikhah ding, State Home Department in aphalpeh thil ahilouleh security thu tilouva train jong lhai louding ahi.

State Home Department in phalna apeh ho tilou inter-state bus hojong public service a dinga lhai louding ahi. Inter-state a vale na hi dammo thu toh kisai ahiloule State Home Department in aphal lou ho kikhah ding, school, college, themjilna mun ho, coaching/training institution le adang dang kikhah ding ahivanga online/distance learning ho kiphal ahi.

Housing health/police/government official/healthcare worker, gamsunga tangden tourist chule ‘quarantine facility’ a kimang le home delivery kibolna (neh le chah) ho tilou hospitality service hojong kiphal lou ahi. Cinema hall, shopping mall, gymnasium, sports complex, swimming pool, park, theatre, bar le auditorium, assembly hall le mi kikhopna mun ho kikhah ding, social/political/sports/entertainment/cultural/ academic/hou thu a kikhopna le adang dang ho jong kikhah ding ahi.

Pathen houna mun jouse kikhah ding, hou thu a kikhopna kiphal louding ahi. Chule mipi che le nathei bus, taxi le auto rickshaw hojong phal dinga ana kisei ahi’in, ahivanga, guidelines thah kisodoh dungjuiya kiphal talou ding ahi. Sam tan na, spa le salon hojong kikhah ding ahi.

Gamsunga um kailhang thum- Ima Market, Nagamapal le Ngari galli, Imphal kikha ding, adang kailhang hohi jingkah nidan 6 a kon nilhah nidan 4 sung kihong thei ahi. Mipi va le jong jan nidan 6 a kon jingkah nidan 6 sung kikhah ding, order akisodoh kit kah a nilhah nidan 6 a kon jingkah nidan 6 sung hi public curfew umding ahi.

Government office jouse akihon ding kiphal ding, hijong le Under Secretary rank noilang natong 50 percent attendance hiding chule Under Secretary chunglang rank jouse office che cheh diu ahi. Private office hon ‘social distancing’ ajui uva office ahon thei diuvin jong thuso chun aseibe in ahi.

DAMMS in kum 27 lhinna ‘Pangal’s Black Day’ nit

Imphal, May 3(ET): Delhi Association of Manipur Muslim Students (DAMMS) in achesa May 3, 1993 kum a kihetkhel na jeh a kinahna melsetah a Pangal 100 val athi na thilsoh geldoh na a Pangal’s Black Day 27th Anniversary anit uvin ahi.

Kinahna thilsoh a vangsetna toh holah a chapang, naovop numei chule akithopi ding umlou nikho tha lo hojong pang ahi. Thilsoh jouva vangsetna toh Pangal ho insunga kichatna le lunghanna sangtah um a, kithopi ding neilou kahiuve, tia lunggel aneiyu ahi. Pangal ho alungmon theilou jeh a khosung dalha a tamtah jong jam ahi’in, agam a chenna ding mun neilouva umlo u ahi.

DAMMS in thuso aneina a, thilso kal kum 27 achetan, ahivanga thudih a thutanna umlou lai ahi, ati. “Hiche hi Pangal ho jat lhom ahijeh uham ahiloule state sorkar a amaho thalheng ding mi aneilou jeh uham?” tin DAMMS in thudoh aneiyin ahi. Pangal hohi cha tam nei ahiuvin, khamnathei po ahiuve, Rohingya ho asel uvin, mi vohlih ahat uve, tia Pangal ho kivetbeh na um ahi’in, media chule Meitei intelligentsia hon kivetda na jeh a Pangal hohi nam neo, amaho toh umkhom dinga lomlou ahi tia avetsah u ahi, ati.

Hiche hi kivetda na sangpen ahi, ati. Thilsoh a themmona neiho mipi het a aseidoh uva chule achan diu lom gotna apeh nading uva DAMMS in independent Special Investigation Team (SIT) akisemdoh nadinga thumna aneiyin, chule vangsetna toh insung ho compensation apeh diuvin temna anei uvin ahi. Alhangpi a Pangal ho henga nam len jo (Meilhei) hon ngaidam athum uva, hitobang thilsoh aumkit louna dinga asei diuvin DAMMS in thumna aneibe in ahi.

‘Migrant’ jouse agam a nungsol ding go hih uvin, tia Centre in state sorkar ho henga ‘relaxation’ kibol thu hilchenna nei

New Delhi, May 3: State sorkar hon gamdang a natong ding ache (migrant) ho agam a nungsol nadinga bus le train ‘book’ bolna a akisahlel laiya Union Home Ministry in Sunday nilhah a, state sorkar ho henga ‘relaxation’ kibol hi a in vil nom a natong ho ding ahipon, hetman louva lockdown ato khah jeh a hahsatna sangtah toh ho a ding ahi, tin aseiyin ahi.

Home Secretary Ajay Bhalla in Sunday nikho a state ho natoh dan chunga ngaidan asei hi, state sorkar ho railway ministry henga ‘migrant’ ho inmun a sol soh nadinga train la dinga akino jing jouvu ahi. Centre in relaxation hi lockdown jeh a tangden ho dinga bou abol ahi, tin Bhalla in aseikit in ahi.

“Order a kisei hi hahsatna toh hoding ahi’in, aumna mun a lungmong a um, migam a natong ding le adang dang ding ache ho dinga ahon ahipon chule angaina a in vil a che nom ho ding ahipoi”, tin state chief secretary ho lekhathot apehna a aseiyin ahi. Hiche hi Home Ministry in phatah a ‘atangden’ (stranded) kiti thucheng hatah a aseikhoh nau masapen ahi.

Cabinet Secretary Rajiv Gauba in kal masa a Chief secretary hotoh video conference aneina a, relaxation hi abon uva ding ahipon, lockdown jeh a tangden ho ding bou ahi, tia kicheh tah a anasei ahi. Centre in Sunday nikho a state sorkar ho gamdang miho agam a nungsol nadinga akino soh uva akisah lel soh jou uva jihtho a suhthengna neidinga thulhuhna anei ahi.

“MHA order hi mi gam a natong dinga lockdown kon cha a che a tangden chule lockdown jeh a agam a kile theilou ho ding bou ahi”, tia Ajay Bhalla in lekhathot apehna a asei ahi. Hiche jeh a hi Centre in ‘special train’ lhaisah ding lung opkaina anei ahi. Ahivanga, state hon hatah a asei jeh uva centre in nopna anei ahi.

Manipur doctor hon NPA kisuhmang lunglhai loujeh a ‘cease work strike’ bol dinga gihna nei

Imphal, May 2(ET): All Manipur Health Services Doctor’s Association (AMHSA) in ni sagi sunga amaho ‘pay structure’ a Non Practicing Allowance akikoi kit louva ahile ‘cease work strike’ bol dinga thulhuhna anei uvin ahi.

Achesa April nisim 30 nikho a association in meeting anei nauva kihou lhahna aneiyu ahi. April nisim 27 nikho a Secretariat Finance Department (pay implementation cell) in Manipur Services (Revised Pay) Rules, 2019 noiya Non Practicing Allowance (NPA) hi allowance a kipan sah lou ahi, tia office memo agom a 11 apeh thu toh kisaiya kihouna aneiyu ahi.

Health Service Directorate, Lamphel a Saturday nikho a President, AMHSA, Potshangbam Shyamsunder Singh in thuso miho akihoupi na a, achesa May nisim 1 nikho a kon NPA kisuhmang deilou vetsahna a doctor hon ‘badge’ avom akibol pan u ahitai, ati. Ahung lhung ding May nisim 7 nikho kah a  general body meeting um dinga member jousen kinopna anei ahi’in, sorkar in donbutna anei dan donbut nading chule Covid -19 natna le adang dang ho thu vetkolna ding ahi, ati.

All Manipur State Government Dental Surgeons Association injong meeting a kilolna ho tosotna anei ahi, tin Shyamsunder in aseiyin ahi. Doctor jouse hiche thu a lunglhai lou ahi, ajeh chu hiche hi lo kisuhnem na thu bou ahipon, COVID-19 nat douna a natna kimaitopi a doctor ho chunga thudih a na akitoh louna ahi, ati.

Hetthei khat chu, association in tu masang, achesa July 28, 2019 le April 22, 2020 a jong NPA hi ‘pay’ a akipan sah ding thumna a nivei lekha ana pehlut u ahitai.

Gamsung hunglhung thah mi 92 ho Covid-19 ‘negative’ hi

Imphal, May 3(ET): Assam le Mizoram gam a tangden gamsunga ahin puilhung u gamsung mi 92 ho vangphat umtah in abon uva Covid-19 negative ahiuve, tin state Health department in Sunday nikhon aseiyin ahi.

Saturday nikho a Mizoram gam a kon mi 5 hung kile a chule Guwahati a kon mi 87 hung kile ahi. Amaho hi Imphal khopi chan bus 4 a apuiyu ahi’in, Mao Gate screening centre a screened abol masat uva, natna symptoms nei umlou ahi.

Imphal khopi ahung lhun uva Guwahati a kon ahin puiyu mi 87 ho Imphal Valley School a aumsah uva chule Mizoram gam a kon ahin puilhung u mi 5 ho Imphal West quarantine centre a um ahi. Abon uva coronavirus test akibolna a negative ahiuve, tin Health Department spokesman Dr Khoirom Sasheekumar Mangang in thuso aneiyin ahi.

Guidelines dungjuiya abon uva ‘quarantine rules’ phatah a ajui nading uva counseling abol jouteng ule ‘home quarantine’ a umdiu ahi, tin Dr Mangang in aseiyin ahi. Chule mopohna nei district authority hon ‘quarantine’ akibol nau phat sunga phatah a avetkol uva, mopohna akilah diu ahi, tin spokesperson in aseibe in ahi.

Curfew/Lockdown kipat akon May 3 channa state police hon Dk. lakh 23 val ‘fine’ a mu

Imphal, May 3(UNA): State police hon Covid-19 nat venna dinga mask kibu lou chule social distancing juilou ho chule lockdown palkeh ho nasatah a akhol jing uvin ahi.

State police hon April 25 a kon May 3 sunga drive abol nauva agom a curfew le lockdown palkeh ho a kon dangka 23,04,690 achomdoh uva chule gari 17,351 amat u ahi. Akisei phat sunga state police hon Disaster Management Act, 2005 noiya case 20 ajihlut uva chule nam kah a kinahthei thu social media a upload bol a mikhat jong aman uvin ahi.

Akiman dan palkeh ho, gari le leuman hohi Imphal East, Imphal West, Thoubal, Kakching, Bishnupur, Ukhrul, Tamenglong, Noney, Churachandpur, Chandel, Tengnoupal, Senapati, Kangpokpi le Jiribam District Police Station hon akisei phat sunga drive abol nauva amat u ahi. Alangkhat a, ADGP (LO) L Kailun in thuso aneina a, curfew le lockdown palkeh a mi 1007 a kon sum 97,970 fine akila e, tin aseiyinc hule Sunday nikho a drive akibol na a gari 735 jong akiman e, ati.

Lockdown le curfew palkeh ho National Disaster Management Act, 2005 noiya achungthu khoutah a kiseiya, action sangtah kila ding ahi, tin ADGP (LO) in aseibe in ahi.

Handwara operation a thingnoi hotoh kikaptona a Indian Army Colonel le Major khat panna a sepai 5 martyr chang; LeT top commander panna a thingnoi mi 2 thi

J&K, May 3 (ANI): Jammu and Kashmir gamsung Chanjmulla, Handwara a Sunday nikho a thingnoimi hole sepai ho akikapto uvin, thilsoh a unit Commanding Officer khat, Major khat le sepai ni chule Jammu and Kashmir police officer khat panna a security personnel 5 athi uve, tin thulhut in aseiyin ahi.

Kikaptona a Pakistan akon Lashkar-e-Taiba (LeT) top commander Haider panna in thingnoi mi 2 jong akaplih u ahi, tin Army thulhut in aseiyin ahi. Indian Army unit hohi thingnoi hon meithal a ahin kap phat uva, milham khat insung a ‘hostage’ dinmun venna dinga lut u ahi. Sepai hohin inmun a kon aum milham ho damsel a ahin puidoh u ahi, tin thulhut in aseiyin ahi.

“5 Army le JK Police ho panna a team hohi thingnoimi hon alo nau gamkaiya lut uva, milham ho apuidoh u ahi. Team hon lolhing tah a milham ho apuidoh ahi”, tin Army spokesperson in aseiyin ahi. Ahivanga kikaptona thilsoh a officer ni panna a sepai 4 thi a chule J&K Police officer khat jong thi ahi. Kikaptona hi Saturday nikho a kon kipan ahitan, Handwara gamlah a um inmun khat sunga thingnoimi tangden hon sepai ho meithal a akap uva, kikaptona kipan ahi.

“Thingnoimi  hon Changinmulla, Handwara, Kupwara district a milham ho aman (hostage a dinga) uve ti thulhut sepai hon athu jouva Army chule JK Police ho kitho a operation abol ahi”, tin Army spokesperson in aseiyin ahi. Kikaptona a Colonel Ashutosh Sharma, Commanding Officer, 21 RRR martyr chang ahi. Colonel Sharma hi tu masanga jong thingnoi douna a kibol operation tamtah a jong ana pang ahi.

Colonel Sharma hin thingnoimi hon amat ho huhdoh dinga team alamkai ahi. Hostage ho apuidoh jouva Lance Naik le Rifleman khat umna team hi thingnoi hon meithal a akap u ahi. Colonel Sharma tilou kikaptona a Major Anuj Sood, Naik Rajesh Kumar le Lance Naik Dinesh Singh chule sub-inspector, JK Police Shakeel Qazi jong thi ahi.

Defence Minister Rajnath Singh in sepai ho alunghempina thu aseiyin ahi. “Duty a thi a, ahinkho gamsunga dinga phal ho ka jana kape e. A insung mite ho kalunghem pi uve”, tin aseiyin ahi.

Journalist ho heng’a kithopina kipe

Imphal,  May 3(ET): Mipi hon thuso dih ahetjing theina ding uva lhaile Journalist ho jong lockdown jeh in hahsatna ato jing utoh lhon in tuni chun City police station, Khalsa Brigade, Bidhan Chakraborty chule Tapan Das, Imphal West ho kitho in Journalist ho heng ah Manipur press club ah kithopina ape uvin ahi. Alu, louthul, Mask, Sabon, Dal, Anchang, Pen, Notepad chule Sanitizer ho ahoppeh uvin ahi. Bidyapati Thingbaijam, SDPO in aseina achun relief van hochu Imphal West SP K. Meghachandra lunggel bang a kibol ahi in, natna kichat umtah umjong le mipi ho ding gelna a pan lajing thusomi ho heng ah kipathu jong aphong in ahi. Aseibena achun police hotoh kithokhom pan lakhom jing ding in jong asei in ahi.

AMWJU a President Bijoy Kakchingtabam in aseina achun Police leh thuso miho aki thokhom jing un chule tuchung injong mipi ho heng a awareness peh ahi loule thuso dihtah mutheina ding in pan alakhom jing uve ati. Alangkhat ah Young Pioneer Handicapped Person’s Development Organization hon jong kithopina alu, louthul leh kokpi ho thuso miho panpi na in ahoppeh uvin ahi.