Tulah mi thi atame kiti (Thina kin hihen ipi kin hileh...

Tulah mi thi atame kiti (Thina kin hihen ipi kin hileh thu chomcha a seije kihil di)

433
0
SHARE

Tulah mi thi atame kiti

(Thina kin hihen ipi kin hileh thu chomcha a seije kihil di)

                                   Achesa September 7 ni’a Society sung’a mi gah het thei dom insung’a thina ana lhun jeh in “tulah mithi atam’e” ti hi mi tamtah kihoulimna anahi. Hiche nikho leh ajan chun Imphal’a cheng/khosa Pu C Doungel, Ex Minister inneipi (Pi Hoinu) leh Pu Khaimang Chongloi, KIM President inneipi (Pi Kikim ) leh Kangpokpi a cheng Pu Lhunkhomang Hangsing, KRA Project officer anamollem un ajing September 8 nikhon thivuina kin’a chele vahle akipel lahlah jeng’e. Hiche nikho ni phabep nin Pu Tongmang IRS (Rtred), Saitu inpipu leh Social worker inneipi (Helhing) ana mollem’e. Hiche’a amollem hohi Society sung’a mi hetthei ho insungmi leh mi hetthei ahijeh uva aphat thakhat leh kinai thim’a thil lhung ahikitleh mi tamtah in “tulah mi aha thi e” ati ahi. Mihem hi apen’a pat nikhatleh athi teiteidi ahi ti hi koiman seihih jongleh mi hetsa ahijeh in tulah society sung’ah athi atam’e kiti hi “tulah” sehseh hidehlou, aphat dungjuija umjing ahi. Ahin tu hi baitah a kijah mat tona Mobile phone leh Internet khang ahitah jeh a mun khatna khat athileh apet pet tobang’a mun jouse’a mi’n ahet ahi. Chuban’a mi hi atamjo kiheto sohkei, adeh deh a khopi khat leh lhang khatna cheng holah a mi gah hettheidom ho ham, ainsungmite ham in thina atoleh mijousen ahet ahi. Thinglhang kochong lang’a cheng le khosa mundang’a mi hetbehlou hon thina boina toh jongleh koiman ahetphahlou ahi.

          Thina keu tam ahipon, kichenna kin ho, thil khat thua lopna leh kipapina kin leh kin dang dang jong adondon’a umjing ahi. Mi tamjo kiheto ahiban’a tulai gari nei jong atam tah jeh a mun chomchom’a kin le dong hoa galha jap di jong tam ahi. Nikhat sehseh a kin ni le thum kop tam ahitah jeh a kin kibolna hoa koima sot tah tou di umlou ahi. Govt service bol office kai jong atam jeh a office kai sung’a kin khatna gajao jap loi jong tam ahitai. Program kichai kah a mi atamjo umji talou kiti hi thil hoilou tah ahi. Hiche ho hi program sao tah tah kibol jeh ahi. Program sao (sot) hi thusei, houlimna nei atamji nakah a adingdoh chasun’in phat saotah tah alah jeh ahikitne. Thilpeh khat gahneina di, pon silpehna di mai maija thu sot tah sei ngailou ahi. Kum lhung lha lhung’a houin sung’a Pathen thu kiseijing ahijeh in thina kin hihen kin dang dang hoa Pathen thu sot tah tah kisei jong koiman angainom di tahsan aumpoi.

          Society sung’a kikhelna hi itih jongleh umloudi ngap hitam, ami in italou mong u, mi ngol, mi louchal te kiti chu ihi mong mong u hinte ti het theina tam ahitai. Nam sung’a aching athem hon thina kin’a che jousen ponsil apeh jong ngahdoh a Custom dungjuija tompon sepdi hon bou abol uva midang hon sum apehjoh diu ti hi ahi. Hiche hi Kuki Inpi geijin jui dia asei vang’a angai ngai ahi. Pon ijat nin thilong kitom jongleh atamjo ainsungmiten ahopdoh kit u ahi. Aneijou jep te chu akhohpon, aneilel jep ho dia sum joh kipe hileh thina chung’a manna kiti lhom jepdi ahi. Kipapina kin’a nampon kipe hojong akipepa, akipenu’n akisil/akivon khah behlou, atamjo almirah ngah a pang bep ahi.