Tuchung Blockade hi Bill 3 thu hilou

Tuchung Blockade hi Bill 3 thu hilou

245
0
SHARE

Tuchung June 9 a pat ni 10 Economic Blockade hin phaigam’a kiphinna ichan ham’a asuhthip to akilo vang’in JAC-AATB leh OMTF hi kuoi lungthim lutna ham ti kitahlang ahitai. Athua chu thinglhang mite deilou Bill 3 deilouna jeh-a hiche ni 10 blockade kikou ahin asunglang thu chu kumseh leh June 14 leh June 18 nikho meilhei ten thupi tah-a anit jiu thangtomna’a kibol ahidan hi hiche Blockade bolna’a jao Tribe Council leh Inpi hon ahet-u ham ahilou leh Bill 3 akiti leh moh ngol jeng jeh-a “mi seisei” pha asah jeng’u ham hi di ahi. Achesa June 14, 2001 nikho’a chu India Govt in NSCN-IM toh Ceasefire chu Nagaland State pam’a jong chesah thei dia nopna ana phondoh ahi. Hichu phaigam mite’n tin-le-ha tho’a anadou uva kiphinna nasatah ahinbol uva June 18 nikho’a MLA ho inn leh Manipur Assembly Building ahin hal lhah-u anahi-e. Hiche kiphinna’a chu mi 18 ana thi lo, President’s Rule (PR) jong hung um lo, Centre in jong IM to gamgi bei Ceasefire kinoptona kiti pen chu ana lelahdoh ahi. Hiche’a pat-a hi meilhei ten June 14 leh June 18 nikho teni hi kumseh leh ahin nit jiu ahi. Hiche hi IM lamkaina nuoiya um Manipur Naga te dia thangtom umtah ahijeh-a June 18 huopna dia hi bandh, blockade khat boltei di ti jong hung um jing ahi. Tun jong hiche nikho leh Naga Area a ‘Total Shutdown’ bol di atiuvin, aphon masang uva ahinbol diu hetsa anahi-e. UNC in chutia Bill 3 thua lunglhailouna anei’u leh chutih chan chu ipi dia Tribal kiloikhomna dang ho toh bandh, blockade bol di anati lou ham? Abul’a pat in thinglhang-mi jouse’n kituoh tah in hiche Bill thu ah kiphinna ananei’u henlang hileh Manipur govt in jong Governor kom’a kuon hiche Bill 3 hi analekouva semphat-thei ipi um’em ana ti maithei ahi. Mi 9 thi lo ho pi akoi-koi in “kivahna” leh “politics bolna’a” nei di ahinti hi jachat umtah ahi.
Tribal jouse pankhom na di phaat le thu umlah-a hiche Bill ho hi ahinai, ahin khat politics tosotna di leh khat not-thap na din hiche Bill thu hi kiman da hen. Hiche thua Delhi KSO ho dinmun hi dih pen ahi. Bill 3 thua bou Tribal chankhom pi ho to pankhom di, kiphinna jong neikhom di, ahia hiche thu kalval’a ima kibol lou di ahi ti hi Delhi KSO te panna ahi. Hiche hin Tribal ho kiphinna ah ‘agenda’ dang akijep-e tina jong ahi. Muthei pen chu tuchung ni 10 Blockade hi ahi. Tun ‘Counter Blockade’ kiti ahung kipan kit tan, Ukhrul district dieh-dieh hi kitup (target) in akilang’e. Yairipok lang’a hon Uhrul district Kasom Khulen lampia thil kipo ho akhah un, Imphal’a hon Ukhrul lampia thil kipo ho lampi ah akhuo lha jeng uve. Hiche hi “nang keuvin nabolthei em” tina ahin akoi-koi dia phatchomna jong umlou di khat ahi