Tribal Affairs and Hills Department a Dk. crore 29 kiholmo thu khol...

Tribal Affairs and Hills Department a Dk. crore 29 kiholmo thu khol dinga House Committee kisemdoh

456
0
SHARE

Tribal Affairs and Hills Department a Dk. crore 29 kiholmo thu khol dinga House Committee kisemdoh

Imphal, Feb 20(ET): Opposition member hon hatah a asei jeh uvin Manipur Legislative Assembly in Thursday nikhon Tribal Affairs and Hills Department a dangka crore 29 adih louva akimang e tia ngohna umthu khol dinga House committee asemdoh tauvin ahi.

Member 9 umna Committee hi Deputy Chief Minister Y Joykumar lamkaina, Chairman ahina noiya kipo ding chule V Hangkhanlian, Agriculture Minister, Letpao Haokip, Water Resources Minister, Th Radheshyam, Education Minister, MLA Dr Chaltonlien Amo, MLA K Ranjit, MLA Kh Joykishan, MLA Dr Sapam Ranjan leh MLA Alfred Arthur jong committee  a pang ahi.

Tribal Affairs and Hills Development Department a dinga ‘demand grant’ apohdoh sung uva opposition MLA K Ranjit in hiche thu apohdoh a, chule MLA Kh Joykishan, MLA Kanngam Arthur leh Surajkumar Okram in ‘demand’ kibol ‘policy cut motion’ abol ahi.

MLA K Ranjit in niseh thuso a Tribal Affairs and Hills Department a dangka crore 29.67 akiholmo e, tia asei thu apodoh in ahi. Ningkum September 7 ni a Department Director in Deputy Director ‘show cause notice’ apeh a, September 11 kah a Department fund achena kitoh lou ho chungchang a ‘detailed report’ apehlut dinga thumna anei ahi.

Department in August chan a receipt leh payment record akoi dungjuiya dangka 43,81,49,454 aval (balance) umding ahi’in ahivanga SBI Secretariat branch a Department balance hi 14,13,88,311 bou um ahi. Tuchan a hiche thu a koiman suhthengna anei loulai ahi’in, scam lentah hi ahi. State sorkar in themmona nei official ho chunga FIR ajihlut em chule themmona neiya pang officer ho suspend abol a thukholna aneiyem, tin MLA pa in thudoh aneiyin ahi.

Vigilance department in crore a sim sum kiholmo na chunga ipi dinga case ajihlut louham tin jong aseiyin chule sorkar in nehguh bol official ho ahuh/aven ahi tia ngohna thei ajeh um ahi, ati. Thinglhang miho government facility ho pehna dinga adihlou a natohna aume tin ngohna aneiyin chule achang ding kigel a thinglhang mi phabep in kipunkhomna suhkeh a, phaicham miho themmo chan ding agot pet a Tribal Affairs and Hill Development Department a crore a sim sum akiholmo hi vangset umtah ahi, ati.

“Go to Hill’ mission nga uvinlang ‘Go to Tribal Development department’ bol uvinlang chule thinglhang mi ahahsa ho dinga kigong a sum hohi koiyin achom ham ti khol uvin, tin MLA pa in thumna aneiyin chule ‘cut motion’ abol lahdoh ding nop peh louva athu kholding Opposition leh ruling member ho panna House Committee akisemdoh dinga joh thumna aneiyin ahi.

Tribal Affairs and Hills Department Minister N Kaiyisii in hitobanga adih louva department a natohna hi masanga kon um ahitai, tin aseiyin chule case hi Welfare of ST/SC committee kiti Manipur Legislative Assembly statutory body khut a athu kholna dinga kipedoh ding ahi, ati. House in SC leh ST thu toh kisai case ho khol dinga statutory body anei ahijeh a investigating agency ahilouleh committee dang henga pehdoh ding hi ‘sub-judice’ hiding ahi, ati.

MLA K Ranjit in jong athu kikhol ding CM khut a akoiyin ahi. Chief Minister Biren in thukholna aum jouva 2001 kum a kon 2019 kum sung, DDO nga kijom sunga dangka crore 29.21 akiholmo thu kihedoh ahi, tin aseiyin chule DDO thah akilahdoh jouva thukholna kipan ahi, ati. Dangka crore 2.15 kinung mu ahitai, tin jong aseiyin ahi.

Opposition member hon House committee semdoh tei dinga pan alah jeh uvin atil a anop lou vanga Chief Minister in achaina a opposition ho thumna asan peh in committee semdoh ding anop peh ahitai.

 

State Assembly Session ni nga channi a House in Dk. 2,170,73,66,000 lhing ‘Demands for Grants’ 6 phatsahna neita

Imphal, Feb 20(ET): 11th Manipur Legislative Assembly in Budget session ni nga channi a dangka 2,170,73,66,000 lhing ‘Demands for Grants’ 6 phatsahna anei tauvin ahi.

Demand hohi Labour and Employment Department a dangka 81,71,91,000, Department of Tribal Affairs and Hills Development a dangka 911,72,74,000, Environment and Forest a dinga dangka 769,45,04,000, Power a dinga dangka 361,01,38,000, Art and Culture a dinga dangka 34,40,63,000 chule Information Technology a dinga dangka 12,41,96,000 ahi.

Question Hour a Water Resources Minister Letpao Haokip in House a department in Imphal Municipal area leh akimvel a chuh kipat masanga natong tamtah abol ahi, tin aseiyin chule dangka crore 32.11 lut a embankment aumsa akisemphatna leh akisa 82 ahi’in, phumdi natoh 9 dangka crore 1.58 lut a kitong a, vadung to suhthengna natoh 34 chule twilet louna dinga dangka crore 8.42 a nullah kisemna natoh kibol ahi, ati.

MLA Alfred Kanggam Arthur thudoh Education Minister Th Radheshyam in adonbutna a, School Fagathansi Mission akichepi a kon government school a enroll kibol sangtah a kal ahi, tin aseiyin chule mission noiya constituency 60 a school 62 hi ‘model school’ dinga kilhengdoh a sorkar in khohsahna achombeh a apeh ahi, ati.

Opposition MLA K Ranjit Singh, K Meghachandra Singh leh Kh. Joykishan Singh in Lamdeng a Solid Waste Management Plant alolhin loujeh, Yairipok a powerhouse sub-station kisa alolhin lou chule 32 Wangkhem AC a A-B cables kikehlen alolhin louna thu leh Loktak Hydro Electric Project a ‘cut motion’ abol uvin ahi.

2016-17, 2017-18 leh 2018-19 kum sunga gamsunga meivah (power) kimang hi 326,345 leh 371kWh cheh ahi, tin Power Minister Th Biswajit in aseiyin chule Industrial Policy noiya ‘single window system’ pat nadinga tohgon um ahi, ati.

Opposition MLA K Ranjit Singh, Th Lokeshwar Singh, Md. Abdul Nasir, Kh Joykishan Singh leh Surjakumar Okram in Labour rights khohsahna akipeh lou jeh, Khundrakpam AC a ponkhuina machine kihom thengtah a akibol loujeh, Lilong ITI kitup lujeh, Manipur Building and Other Construction Workers’ Welfare Board lolhin loujeh a ‘Policy Cut Motion’ a bol uvin ahi.

Dangka 9,11,72,74,000 hi hi Department of Tribal Affairs and Hills Development in phatsahna aneiyin ahivanga opposition MLA K Ranjit, Kh Joykishan Singh, Alfred Kangnam Arthur leh SUrjakumar in tribal pao, thinglhang miho khohsahna akipe pon, Rule of Law akichepi joupon, thinglhang leh phaicham kikah a khantouna alhasam e, tia aphatsah louvu ahi.

MLA K Ranjit in TD account a kon kiholmo a dangka crore 29.67 hi hoiya umham tin TD Department thudoh aneiyin chule sum tamtah kiholmo na chunga panla a officer chunga itobang action kila em, ati.

Art and Culture department a dinga dangka 3,440,63,000 phatsahna anei tauvin ahi. Opposition MLA Meghachandra, Ak Mirabai Devi, Kh Joykishan, RK Imo leh Surjakumar Okram in Arts and Culture department a natoh avaigei jeh, Manipur Culture Policy leh Manipur Film Policy kichepi joulou jeh, thinglhang a Office of Culture aphatcha akihon theilou jeh a ‘Policy Cut Motion’ abol uvin ahi.

State Institute of Rural Development (SIRD) a dinga April 1, 2017 a kon January 2020 sunga fund allocation ho thu MLA K Ranjit Singh in thudoh aneina a Minister Th Biswajit in Department in dangka lakh 3507.41 account a amu ahi, ati. Recurring grant a budget kipe 465.63 lakh ahi in chule non-recurring grant hi 864.30 lakh vela hi, tin aseiyin chule training course leh RGPSA/RGSA fund hi 340.80 lakh leh 1836.68 lakh cheh ahi, ati.

House lamkai N Biren Singh in medical college sah nadinga screen kibol district thum- Thoubal, Chandel leh Churachandpur lah a Chandel hibou proposal a kipansah ahi, tin aseiyin ahi. MLA Kh Joykishan in thusei Education Minister Th Radhesjyam in adonbutna a, House in class XI exam a question paper ‘leak’ ahi hi thukhoh tah a agel ahi, tin aseiyin chule education system a alhangpi a simlai hon ‘copy’ abol uhi angai tobang ahijeh a asuhlhap nading lampi det hol ngai ahi, ati. Marks mu nadinga simlai hon lampi dihlou ajui uvin, adih louva natong a private school aume ti akihetdoh a ahile de-recognised kibol la action kila ding ahi, tin aseibe in ahi.

 

Pushing kho a meivah alhungtai tia Power Minister in asei hi jouthu ahi tia Kamjong kho mihon sei

Imphal,Feb 20(ET): Sambu Raiping Long (SRL) kiti Kamjong district a kho 23 kiloikhomna in Pushing kho a meivah akilhung tai, tia Power Minister in Assembly a aseiya, mipi adih aseipeh na chunga alunglhai lounau thu asei uvin ahi.

SRL President, AS Nathan in thinglhang gamlha tah a um Sambu hi gamsung khantou machalna natoh ho a akigelpha loupen ahi, tin aseiyin chule Pushing, Mapum, Zingsui, Ronshak, Sahamphung, Roni, Matiyang, Chamu, Khayang, Kachaouphung, Kashung, Langkhe, Chatric Khullen leh Chahong Khunnou ho a meivah umlou lai ahi’in, Power Ministry in Pushing kho a meivah alhungtai tia asei demna sangtah kinei ahi, ati.

Hetthei khat chu Ukhrul MLA in (Star Question No 348) a Pushing, Mapum leh Zingsui kho a meivah akilhun chungchang a thudoh aneina a Power Minister in 11th Plan RGGVY noiya Ukhrul district a um Pushing kho a 2014 kum a meivah kipe a chule Mapum leh Zingsui kho a 2015 kum a meivah kipe ahi, tia adonbut ahi.

President pa lamkaina a SRL team hon Pushing leh Mapum kho amun a meivah chungchang a natoh ho vetlhahna anei uva, 2014 kum a kon meivah umlou ahi ti photchenna aneiyu ahi. Pushing kho haosapu AS Yanglung in Kamjong a kon Pushing a transformer kitung a 2014 kum a test abol uve, tin khosung aboina ho thu aseiyin ahi.

LT line a dinga meikhom leh low tension wire ho kito pan ahi’in, kijou loulai ahi, tin aseibe in ahi. Pushing hi Ukhrul headquarter a kon km 32 a gamlha, in 200 vel um’a chule mi 904 chenna ahi. Inspection bol a che team hon khosung lamlen a cable wire kikoi amu uvin, transformer hi charge kibol loulai ahi. Khom avat ho leh cable hohi February 24 jouteng kito ding ahi, ajeh chu Luita Phanit festival aumlai ahi, tin Yanglung in aseiyin ahi.

Mapum kho haosa AS Wingchan in thuso miho akimupi na’a, 2015 kum a transformer kito jou ahitan, LT power line ama ama inson a dinga kito loulai chule khosung a meivah lhung loulai ahi, tin aseiyin ahi. February 13 ni a department officer hon khosung avil uvin, ‘jungle clearance’ a dinga volunteer ahol uvin, ahivanga Luita Phanit chelhah laitah ahijeh a kinop peh lou ahi, ati.

February 24 jouteng ‘jungle clearance’ kipan ding ahi, ati. Mapum hi Ukhrul headquarter a kon km 28 a gamlha, in 257 umna chule mi 1,117 lhing ahi. Saubhagya project noiya centre sorkar in 2019 kah a khosung jouse a meivah lhun dinga tupna anei hi gamgi a um kho tamtah a dinga mang tobang hinalai ahi, tin SRL team hon aseibe uvin ahi.

Cl XI question paper leaked bolsah ho gotna sangtah peh ding chule School registration jong cancel ding a AMSU ngehna nei

Imphal, Feb 20(ET): Council of Higher Secondary Education Manipur noiya Class XI exam chelha jinglai ahitoh lhon a Question paper a leak naho exam velbol kit ding in All Manipur Students Union (AMSU) in demand abol in ahi.

AMSU a Info. & Pub. Secy. in thuso abolna achun question paper leak sah jilkung ho kholdoh a chule a exam centre jong regstration cancel peh ding in ngehna anei uvin aseibe nauva chun gamsung a exam dan ho achehoi a akimu jeh in AMSU in exam centre ho vilna jong aki haisah in hinlah athahbeh a hiche tobang thusoh aumkit toh lhon a AMSU in a member hon exam centre ho vilding a ahin soldoh panding ahi tan OC leh examination incharge hon AMSU hon vilna ahung nei phat uleh ana kithopi a pan analahpi ding in jong asei in ahi.

CDPSA in School khadinga thulhuh anei anung lahdoh dinga KSO-Ccpur in ngehna nei

Ccpur, Feb 20(ET): Kuki Students’ Organisation Churachandpur in tuni thuphon aneina ah Churachandpur District Private School Association (CDPSA) in February 21, 2020 akon District sung’a Private School jouse kha dinga thulhuhna aneiyu phamo asahnao aphondoh uvin ahi.

Education Department, KSO-Ccpur in thuso abolna ah district sung’a student lamkai hina leh simlai ho ding gelna a CDPSA in Private school ho khading a thulhuhna anei anunglahdoh ding in temna akineiye ati. Chule changval hihen jalhang kiloikhomna ho hijongle themjilna munho a politics, eima boina chule themjilna tongkha thei thilho akon kangse ding in temna jong aneiyin ahi.

AR le Naga galguh bol ho kidin tena ana um

Senapati, Feb 20(ET):  Tunin Senapati a Assam Rifles le Naga galguh bol cease fire noi a um ho kikah a kidin tena an aum in ahi. Thuso kimu dungjui in Captain khat makai na Assam Rifles team khat in Naga galguh bol khat ana dal na uva Naga galguh bol ho in ana om khum uva a meipum anal ah peh uva captain pa jong anamat u ahi akiti. Mipi ho in galguh bol ho ang a temna ana nei utoh lhon in Assam Rifles captain pa chu lhadoh in ana um in ahi.

Jilkung vat ho athah kilahbe ding ahi: Education Minister

Imphal, Feb 20(ET): Education Minister Th Radheshyam in Manipur sung a themjil na mun ho a jilkung lhasam ho suhdim na dinga thah lahbe na kinei ding ahi tin tunin Assembly session a Ukhrul MLA, Alfred Kanngam Arthur le Tipaimukh MLA, Chaltonlien Amo thudoh donbut na ana nei in ahi. Hiche jilkung kilahbe ding hi akintheipen a hung kibol ding ahi tin jong anaseiyin ahi.

Aman aseibe na ah achesa 2013 kum apat jilkung kilabe talou ahijeh in Manipur education system khantouna akheh dan jong anaphongdoh in chule Chief Minister pa toh kihoutoh jou teng natoh ahung chelhah ding dan thu jong hetsahna ananei in ahi.

EBC Mission School Foundation chemlha; mi-4 kisukha

B.Lalboi Gangte

CCpur.  Feb 20 (ET) : Mata khosung’a EBC in Mission School anei tichu Convention English School chu tuni foundation sem ding’a che mi 4 in foundation abol lai tah uvin ana chim lha in a 4 uvin anakisukha uvin ahi tin thulhut chun aseiye. Tun District Hospital mun’a mi khat vetkol in aum in ahi. Akisukha ho chu  S.Ginzamuan (60) S/o (L) Vungzasut of Mata, Paukhansuan (58) S/o (L) Langpum of Mata, Piangzathang (58) S/o (L) Khatzatang of Mata leh Liankhenchin (46) S/o (L) Zamkhenpau of Mata ahi.

Hiche thilsoh nachung’a YPA GHQ in Ambulance in amun anadellut pai uvin akisukha ho jouse District Hospital anpolut uvin. Mi 4 lah’a 3 chu a serious beh lou jeh in dressing abol peh uvin ana potsah pai uvin ahin S.Ginzamuan akisuhkhah na alel jep jeh in Surgical Ward ah admit abol uvin ahi.

Khangthah natohna neilou Employment Exchange a kijihlut kum li sung a akehkhat a kiemsuh

Imphal, Feb 20(ET): Tuni Assemby a MLA Surjakumar Okram in Manipur gamsung a khangthah natohna neilou Employment Exchange a kijih lut ajat dohna abol tohlhon in Labour and Employment Minister Th. Radheshyam in adonbutna achun Directorate of Employment, Govt. of Manipur in record abol dungjui un khangthah natong lou employment exchange a kijihlut kumli sung in akehkhat tobang in akiem suh e ati. 2014 kum chun mi 721824 ahiuvin chule 2018 kum a kijihlut chu mi 346690 ahi in data dungjui a ivet leh akeh khat tobang in akiemsuh in ahi.

2016 kum a registered kibol chu 812811 apha in hiche hi 2014 apat 2019 sung a ding a atamna pen ahitai tin jong asei in 2017 kum achun mi 364686 in akiemsuh in chule 2018 kum chun 346690 in akiemsuh e ati. Chuleh achesa kum 3 sung in hiche a kijih lah ahin mi 980 in natohna akimu uvin numei 274 ajao uvin ahi.