Thusoh chom chom

Thusoh chom chom

293
0
SHARE

Melhetlou hon akaplih K. Hengjang haosapu leh atupa vui hita; CM in thilsoh demna aneitoh lhon a themmona neiho mat dinga kitepna nei

Imphal/Kangpokpi, Jul 12(ET): Tuni chun July nisim 10 ni a melhetlou hon ana kaplih K. Hengjang haosapu Thangneo Kipgen leh atupa Thangminlun Haokip chu achenna lhon K. Hengjang leh Bongbalkholen mun ah ana kivui tan ahi. Mithat ho kimatdoh masang’a athi teni long lahlou ding’a insung miten anasei ahin Kuki civil society organization chom chom hotoh CM in kinoptona anei jeh uva thilong chu ana kivui ahi tai.

Jani nikho chun Chief Minister N. Biren Singh in Hengjang kho haosapu leh atupa kitha na thu demna aneiyin chule aganna thei pen a themmona nei ho mat dinga kitepna aneiyin ahi.

Chief Minister in vangsetna toh insung mite lunghempina thuthot aneiyin, insung mite lunglen tah a aum uva chule sorkar in thudih a thutanna aneiding ahi ti tahsanna anei diuvin tilkhouna thu jong aseiyin ahi. Hengjang kho haosapu Thangneo Kipgen leh asopi cha Thangminlun Haokip thal choi hon melse tah a atha thu a Kuki Inpi in ultimatum apeh ahi’in, hiche toh kisaiya Chief Minister N Biren Singh in ama office chamber a Thursday nilhah nidan 2 don a Kuki civil society organization chom chom akimupi ahi.

Kihouna a DGP, LM. Khaute, IG (L&O) Clay Khongsai, DIG Themthing Ngasangva leh mopohna nei SP hojong pang u ahi. Kuki Civil society organization holah a Kuki Inpi Kangpokpi, Kuki Inpi Saikul Gamkai, Kuki Inpi Phailengmol, KSO-GHQ, KSO Imphal, KSO Sadar Hills, Kuki Women Union Sadar Hills leh CSO dang dang pang a Khaimang Chongloi, President, Kuki Inpi Manipur lamkaina a KIM Vice president leh General Secretary panna a kalsong u ahi.

Chief Minister in akipe phat sunga tolthat ho amat a vangsetna toh ho dinga thudih a na atoh dinga Kuki kiloikhomna chom chom in hatah in asei uvin chule thudih a thutanna aum kahse a thilong kila louding chule sorkar in akipe phat sunga themmona neiho amat loulehkiphinna chom chom kibol ding ahi, tin asei uvin ahi.

Kuki kiloikhom hon thumna anei Chief Minister in adonbutna a themmona neiho gangtah a kiman ding ahi, tin aseiyin chule state DGP leh police official lamkai luboh hon themmona neiho aganna thei pen a amat nading uva bol thei chan abol diuvin apet pet a aseiyin ahi. Kiloikhomna in vangsetna toh insung mite ding gelna a thilong lah loudinga kilolna aneiyu agel phat diuvin CM Biren in aseiyin chule thudih a thutanna umding ahi, tin kitepna aneiyin ahi.

Chule state DGP in dan dungjuiya ex-gratia apehdoh dinga thuhilna aneiyin, JNIMS morgue a thilong ngah a phat hahsatah toh a insung mite henga amatah in kitepna anei dinga jong thupeh aneiyin ahi. Tahsan umtah thulhut in asei dungjuiya ex gratia dangka lakh nga agon u ahi’in chule dangka lakh ni hi advance a insung mite apet pet a apeh u ahitan, avat dangka lakh thum hi process ajo teng ule apehdiu ahi.

Giltah a kihouna anei jou uva Kuki kiloikhomna chom chom hon Kuki Inpi Manipur lamkaina noiya Chief Minister in kitepna anei agelpeh uvin chule kal khat sunga themmona neiho mat dinga aphat asuhsao be uvin, hiche chunga JNIMS a post mortem akibol jouteng thilong lah dinga jong thulhuhna anei uvin ahi. Kuki Inpi Manipur in hiche thu mopohna hi thudih a thutanna aum kahse a Kuki Inpi Kangpokpi District in alah dinga pehdohna anei uvin chule Kuki kiloikhomna jousen Kuki Inpi thulhuhna nopna anei uvin, Kuki Inpi Kangpokpi ddistrict tosot dinga lung kitoh tah a asei uvin ahi.

Lamminlun Singsit, General Secretary, Kuki Inpi Kangpokpi District in Chief Minister in kitepna anei kigel peh a ultimatum kipe hi kisuhsao be maithei ahi’in, ahivanga tuni a kon kal khat sunga sorkar in themmona neiho amat louva ahileh Kuki Inpi Kangpokpi District lamkaina a kiphinna chom chom kibol ding ahi, tin aseiyin ahi.

Mithat ho matdoh na ding’a Operation chelha jing

Imphal, July 12(ET): Achesa July nisim 10 nikho a Kangpokpi District, Hengjang kho haosa Thangneo Kipgen leh atupa Thangminlun Haokip kithana a panla ho matdohna ding’in Manipur Police holeh Assam Rifles hon janlhah a kipat chun Saikul Sub-Division sung muntin ah search operation khoutah abol uvin ahi.

Manipur Police IGP Clay Khongsai vetkolna noiyin Imphal East District Police a Additional SP Operations Krishnabombi, 26 Assam Rifles, Imphal East Commando OC Chitrasen, Manipur Police, Special Commando team a OC James Thangal, Bishnupur District Police Commando holeh Thoubal Police Commando hon Seijang leh Bongjang kho kimvel ah mithat a panla ho matdohna ding’in khoutah in search operation abol uvin ahi. Ahin tuchan in thilso toh kisaiyin koima matdoh ahi hih laiyin ahi.

Hetthei khat chu Chief Minister patoh akihou nauvah chun Kuki Inpi Sadar Hills in mona neiho hapta khat sung’a akimatdoh louva ahileh kiphinna khoutah bol ding’a ana hetsah u ahi.

NSCN-IM in peace talk jana anei poi: Brigadier Ravroop Singh

Imphal, July 12(ET): NSCN-IM in ground rules asuh keh jing toh lhon in peace talk jana anei poi tin tuni in Airport Battalion Red Shield Division mun a 59 Mountain division Brigadier Ravroop Singh in thuso miho toh akihou limna a ana sei in ahi.

Brigadier pan asei na a NSCN-IM in ground rules palkeh jing a natoh na anei uhi tu le tua peace process che lha jing jana anei lou jeh ahi ati. Tamenglong le Noney District sunga NSCN-IM hon dan toh kikal a natoh na anei jing nao chunga mipi akon complaint ana kimu jing toh lhon a Army in operation abol na a manchah tamtah le thilkeu tamtah ana mat doh dan u jong tahlang na  anei in ahi.  NSCN-IM in Manipur a Highway lifeline teni a kai don na le lampi na tong ho ahilou le railway na tong ho suh genthei jing na anei na ho u jong Brigadier pa in phondoh na anei in ahi. NSCN-IM in ground rules palkeh in Manipur sunga camp hetpeh lou asem jing uvin mi thah jong lahlut be na anei jing uvin, government thupeh jong nahsah in akoi hih uvin hiche ho hi peace process anahsah lou jeh u ahi tin Brigadier Ravroop Singh chun ana sei in ahi.

RIMS a MBBS seat 100 akon 125 a kikalsah

Imphal, July 12(ET): Ministry of Health and Family Welfare in Regional Institute of Medical Sciences, Imphal a MBBS seat 100 akon in 125 in ana kal sah uvin ahi.

Hiche thu hi RIMS director Prof Shanta in RIMS jubilee hall munna phondoh na ana nei ahi. Director pa in asei na a hcihe thu hi Ministry of Health and Family Welfare in July nisim 11 nikho a hetsah na ahin nei ahi ati. Hiche seat hi unreserved ho a ahi dan le ST, SC le OBC ho adinga hiche seat kikal sah be na a seat a onlou dan jong tahlang na ana nei in ahi. Hiche seat 25 lah a chu 11 vang sum le pai lam a hahsat na toh ho ading ahi dan tahlang na Director pa in ana nei in ahi. M.SC nursing, community health nursing, paramedical course MLT, x-ray le adang dang ho jilna ding ho a jong seat aki kal sah dan director pa in phondoh na ananei in ahi.  Ministry in M.sc nursing course 2-19-20 session akon a RIMS muna hondoh na anei tah ding dan jong hetsah na ana nei in ahi.

Hiche course jil na ding ho a online application RIMS website ho a bol thei tah dan jong director pa in hetsah na ana nei in ahi. Hiche course ho ahi Northeast a medical simlai ho  Assam tilou akon ho jouse in apply abol thei ding ahi.

ABCI company staff 4 kipui mang

Noney, July 12(ET): Melhetlou thal choi phabep in ABCI company  a staff 4 ana pui mang uvin ahi.

Hiche thilsoh chu jaanlhah jaankim lam a ana soh ahi.  Akipuimang staff ho chu Rajeev Kumar, Sr. Engineer le Assistant Manager; Akashdeep Paul, Sr. Structural Engineer; Nasirudin, Grader Operator  le John, Bolero Driver ahiu vin ahi.

Thuso kimu dungjui in Bolero regd. no. AS 11H- 5435 jong ana kitol mang in ahi. ABCI staff ho kipui mang toh lhon in Army le Assam Rifles post commander jouse hetsah na ana kinei in holdoh na dinga pan alah soh kei ding uvin jong thupeh ana kinei in ahi.

Driverpa leh Bolero tuni jingkah in ahung kilhadoh tan ahi.

Anchang man kal jeh a SWA in kiphinna bol

Imphal, July 12(ET): Socialist Women’s Association (SWA) in anchang man kal deilou vetsahna a Friday nikhon Singjamei Mayeng Leikai a kiphinna abol uvin ahi.

SWA general secretary Sarungbam (o) Bijenti Devi in Public distribution system noiya BPL card neihon mikhat a anchang kg thum hi lhakhat a dangka cheng thum a achoh ahi’in, hiche hi lhing joulou ahi, ati. “Kailhang a superfine anchang jong somthum lhing ahitan, anchang theng man hi somnga lhing ahitai”, tin Bijenti in aseiyin chule mopohna nei authority hon hiche avettup uva kailhang a anchang man asuhnem nading a pan alah diuvin ngehna aneiyin ahi.

Manipur gam a neh thupi pen a kinei anchang man akal jeh a niseh a sum kihol thu ho dinga hahsatna lentah soh ahi, tin aseibe in ahi. Sorkar in Nupi Lal athum channa aumsah loudinga SWA kiphinna bol hon asei uvin chule anchang man apet pet a asuhnem diuvin asei uvin ahi. CBI in thukholna aneiya chule anchang man kalsah a pang ho gotna peh dinga jong aseibe uvin ahi.

Anchang kiholmo thu a panla a minister ho apanmun a kon ahai diuvin thumna anei uvin, kum phabep anchang man kal jeh a gamsunga hahsatna lentah um ahi, ati. Hetthei khat chu tu leh tua anchang kiholmo jeh a thunoh baotam aum lai ahi’in, anchang hahsah a hi contractor Hemanta ahi, tia MLA Susindro in ngohna aneiya, alangkhat a Hemanta in anchang kihop lou thu a MLA pa leh ama miho themmo achan ahi.

Agri Minister in Community Nursery Seedling a ‘Method’ athah thum podoh; July 16 teng loubol ho dinga ‘Interaction program’ umding

Imphal, July 12 (ET): Agriculture, Veterinary & Animal Husbandry Minister V. Hangkhanlian in Krishi Vigyan Kendra (KVK), Thoubal avil in ‘nursery seedling method’ athah thum pohdohna aneiyin ahi.

Method thum hohi Wet Method, DAPOG method chule Modified ahi’in, Agriculture Department (KVK) Thoubal in asem ahi. July 16 nikho teng phaicham a um Imphal East, Imphal West, Thoubal leh Bishnupur district panna a district jouse a kon loubol miho dinga ‘interaction programme’ umding ahi’in, loubol mihon hahsatna ato hou suhlhap nading lampi kiseikhom ding ahi, tin Minister pa in aseiyin chule program a loubol mihon phatah a pan alah diuvin temna aneiyin ahi.

Community Nursery a Minister pa in thuso miho akimupi na’a, KVK Thoubal tohgon noiya ‘nursery seedling’ a dinga method athah thu kipodoh ahi’in, twi lhahsam jeh a loubol miho boina olsah nading ahi, tin aseiyin ahi. Seedling method athah hohi gamsung in twi hahna a bailam tah a achepi theiding ahi, ati. Modified chule DAPOG leh Modified Mat method man nadinga gam leiset hectare 1.5 a len nursery kipe ahi’in, ‘seedling process’ asuhlhap diu ahi.

Hiche Method kiman hi loubol miho ngaichat suh bulhit nading ahi’in, nursery a kitu hohi ni 15 sunga tu phat thei ahi. Thoubal district a lou (fertilizer) alhing a akikoiye, tin Minister pa injong aseiyin, lou hi District Agricultural Officer (DAO) leh Agriculture Department, KVK, Thoubal staff hon ahop ahi. Loubol mi hahsatna nei hon mopohna nei department a kon lou akilah theiyu ahi.

N Tomba, SMS, Agronomy, Krishi Vigyan Kendra, Thoubal in ‘method’ thah ho chang chi chom chom bolna a akiman dan vetsahna aneiyin ahi. Ni chomcha 120-125 sunga at thei ding Tampha Phou R-1 leh Noren-18 sem dinga tupna um ahi, ati. Thoubal sunga gam leiset hectare 2.5 a len phailei a chang chi ho tu nading tohgon achelhah laitah ahi, tin jong aseiyin ahi.

Athah a kipodoh Modified system hi muntin a kithang ahi’in, chang bolna a phat kisumang lhom a chule chang soh jong tamjo ahi. KVK, Thoubal in Thoubal district sunga hiche chang chi hi hectare 5 vel a tu dinga tohgon anei ahi’in, twi lhom jeh a chang tu nading mun lhomcha bou neiya akimvel a um loubol mihon akisempha a changchi (modified seedling) hi phailai a tu dinga akilah diuvin temna aneiyin ahi. Nursery seeding vetsahna anei nau kin-gon a KVK, Thoubal, Agriculture Department official leh staff hojong apang uvin ahi.

NSCN-IM khat ajamdoh thu a police 4 suspend kibol

Imphal, July 12(ET): NSCN-IM thingnoi khat ajamdoh thu toh kisaiya Thursday nikhon sub-inspector (SI) ni panna a police li suspend ahitai, tin police hon asei uvin ahi.

Achesa Wednesday jingkah a kum 23 a upa Thailik Panmei hi Imphal police station lock-up a kon jamdoh ahi. Police hon ama mat nadinga operation nasatah a abol uva chule athu he hon police ho ahetsah diuva jong ngehna aneiyu ahi. Koitobang ama umna chungchang thu he a aumleh dangka lakh khat kipaman peh dinga phondohna jong aneiyu ahi. Sub-inspector teni tilouva police hon Assistant sub-inspector khat leh head constable khat jong suspend abol ahi. “Village Defence force (VDF) personnel thum jong duty khohsah loujeh a anatoh a kon kiladoh ahi. Thingnoimi pa jamdoh thuchen khol dinga DIG level officer khat mopohna kipe ahi”, tin police officer khat in aseiyin ahi. Thailik Panmei hi achesa July nisim 6 ni a Noney district a sepai hon operation abol nauva amat u ahi’in, court a apui jouvu July nisim 7 nikho a kon Imphal Police station lock- up a akoiyu ahi.

LCA in July 14 jankim akon phat teplou bandh kou

Imphal, July 12 (ET): Lamkang Chief’s Association (LCA) in Imphal-Moreh lamlen panna a Chandel district sunga July 14 jankim a kon phat teplou bandh bol dinga phondohna anei uvin ahi. Challong kho haosapu anahi D Thamnok that a themmona nei ho authority hon amat joulou jeh a kiphinna aneiyu ahi, tin thuso anei uvin ahi.

Challong kho haosapu D Thamnok that a themmona nei chule akivui na lhan khotdoh a suse a mat a dan dungjuiya thudih a na tohna diga pan la a sorkar natong chule social organization jouse LCA in tosotna lhingset apeh ahi, tin thuso chun aseibe in ahi. Ahivanga bandh sunga themjilna mun, dammo toh kisai, PHED, water supplu, PWD leh tohgon kisem masa ho kilha ong ding ahi, tin LCA thuso chun aseiye.