Thusoh chom chom lahkhom

Thusoh chom chom lahkhom

337
0
SHARE
Twi hahsat jeh’a boina toh loubol hon Govt. heng’a panpi na ngeh jing; Govt. in mun phabep’a water pump hopdoh nanei

Imphal, July 12 (ET) : Tukum sung loubol ho ding’a deibang tah’a go  amu jou lou jeh uvin phailei gotna mun ho’a Government in kithopina apeh jeng vang in gamsung hitobang kithopina muloulai loubol mi tamtah aum nalai in ahi. Chutima chun Thanga Assembly Constituency hopsung’a um loubol hon twi hahsatna chungchang in Government akon kithopina amu nailou’u nachung’a Thanga sung’a loubol ho kithopi ding’a Sangai Education & Social Development Organization, Keibul a Advisor Kh Sanatomba in State Government leh akisaipi MLA heng’a temna aneiyin ahi.

Hiche toh lhon’a Sangai Education & Social Development Organisation, Keibul a member holeh thuso mihon Moirang Khunou Gram Panchayat a phailei gotna mun holeh  tule tua manchah theilouva um Keibul a RLI Scheme ho vetlhah na ananei uvin ahi. Hiche scheme hi Minor Irrigation Department noi’a anakisa leh Thanga Assembly Constituency MLA masa chuleh PDA Chairman masa jong anahi T Mangibabu in achesa Jan. nisim 2, 2017 kum’a ana thenso ahi. Twi hahsat najeh in Thanga Assembly Constituency sung’a loubol hon hahsatna atoho Government leh akisaipi MLA in khohsahna anei louna chung in Kh Sanatomba in alungkim louna thu jong aphongdoh in ahi.

Alangkhat’a Moirang Assembly Constituency MLA P Saratchandra vetkol nanoi in Constituency sung’a um loubol mi kiloikhomna chom chom ho heng’a horsepower 5 a hat water pump set 5 ana homdoh in ahi. Hiche natoh hi gamsung twi hahsatna mun ho’a twi hoppeh nading’a kalsonna aneiho banjom’a anakibol ahi. Water pump hohi loubol ho hahsatna suh-oljep na ding leh loubol ho kithopi nading ahi tin BJP Moirang Mandal Secretary Ngangom Basanta Singh in aseiyin ahi. Hiche naban’a Kumbi Assembly Constituency hopsung Selungkhong Maril leh akimvel’a um acre 5,000 a len phailei ho’a twi hopdohna ding horsepower 25 a hat pump set 3 mang chan Manipur vadung leh Wangoo vadung teni akon in River lift Irrigation anabol peh in ahi. Chuleh hiche natoh naho hi MLA S Bira vetkolna noiya kibol ahi toh lhon’a twi jopdoh’a Selungkhong Maril a khol ding in Wangoo Ahallup Awang Litan Makhong mun’a engine ho jong akikoi tan ahi. Hiche akon Selungkhong Maril a um phailei ho twi kihoppeh ding chuleh hiche kibol lo nahi loubol hon twi lam pang’a hahsat ato hou olsah jep ding bidoi nei’a kibol ahi tin MLA S Bira chun aseibei.

 

 

Moria Digitech in Offset Printing Press thah hondoh na nei

B.Lalboi Gangte

CCpur. July 11(ET) : Churachandpur District hopsung Tuibong Bazaar sung’a um Moria Deglitch in tunin offset printing press alamdoh hondoh naleh lhandoh na ananei uvin ahi. Kingon achun Jin-gun in Thangkhoyang Baite, Chief of B. Phaicham in Offset Printer hondoh na anei toh lhon in Rev. Siama Phaltual, Executive Secretary, KSP in Pathen heng’a lhandoh na ananei in ahi. Th. Ngamboi Baite, Proprietor Moria Digitech in houlimna aneina’a Moria Digitech hi achesa 2015 kum a kipandoh’a in chuleh hiche mun’a hin Flex Design, Flex Printing, Fibre Priting, Fibre Photo Frame, MDF Memento Board, Mug Printing, T-Shirt Printing, Flag Cloth Printing, Digital Printing, Magazine, Souvenir, Booklet, Handbook, Receipt, Cash Memo, Invitation Card, Visiting Card, Pamphlets, Calendar leh adang dang nakisem pan tan ahi.

Gamsung munchom chom a world population day kimang

Imphal, July 11(ET): Tuni in Manipur gamsung muntin ah “Family Planning for a Healthy mother and child” kiti thupi noiyin World Population day akimang in ahi.

Health Director Dr. K Rajo in Health Directorate campus ah mipi kijotna khat hondohna aneyin chujou chun kingon hondohna aneiyin ahi. Mipite chu Lamphel IMA Hall lang jon’in akijot uvin, Hall ah kingon jong amangpei ngal uvin ahi. Tuni kingon chu State Health Society, NHM Manipur leh Directorate of Family Welfare Services tenin agon ahin, hiche a chun Health Minister L Jayantakumar, Health Director Dr. K Rajo, Health a Joint Secretary RR Peter, Health a Additional Director Dr. Sashikumar Mangang leh Family Welfare a Additional Director Dr. Salamatullah hojong apang uvin ahi. Kingon a ahoulimna ah Minister L Jayantakumar in phat masang jep mihem tam masang chun idei ingai khat heng’ah innmun loumun kipa thilpeh in ana kipeji’e ati. Phat achetoh kilhon in kikhelna jatchom chom ahung umdoh in, ahatpa aboltheipa lalna phat ahung hidoh in chuleh mihem lunggel jong aphatmo cheh cheh toh kilhon in gam le go kichuna jong ahungsoh dohtai ati. Society hoitah leh phatah semdohna dia human resource jong angaicha khohtah thilkhat ahi tin Minister Jayantakumar chun asei in ahi. Society sung’a human resource hatah a ngaicha ahijeh’a cha le nao jong tamnei behseh lou ngai ahi ati.

District Health Society Kakching injong World Population Day kingon ana mang uvin ahi. Kingon kimantoh kilhon chun July nisim 24 chan chelha ding Population Stabilization Fortnight hondohna jong ana um in ahi. Kingon chu Kakching Chumnang Leikai, Representatives of Lois Kakching auditorium a kimang ahin hiche a chun Kakching District Immunization Officer Dr. Y Nando Singh, Kakching a Chief Medical Officer Dr. Th Somarendra, Kakching District TB Officer Dr. Kh Satyabala, District Health Society Kakching a District Program Manager N Romen, Health Centre ho’a Medical Officer in-charge ho, Community Health Officer holeh ASHA worker hojong apang uvin ahi. Angaicha ho heng’a hopdoh thei ahina ding’in family planning a dia angaicha thil le lo Health Centre ho apeuvin ahi.

Nambol Maibam Chingning Makha Community Hall ah tuni in World Population Day toh kisaiyin spot painting competition khat akibol’in ahi. Competition chu Nungthelleima Meira Paibi Lup leh Red Hill Club Maibam Chingning tenin Suraj Gorkha 5 JAK Rifles toh agon khom’u ahi. Nungthelleima Meira Paibi Lup a Secretary M Sanajaobi Devi in thuso mihotoh akihoulimna ah competition hi simlai chapang hon mihem jat kibejing aphatdan leh phatlou dan ahetdiu deisah jal’a kibol ahi ati.

Competition ah chun school 8 a kon’in simlai 70 lang in pan ana lao vin ahi.

Khurai MLA le Mipin anchang ngehna a DC Office nokhum

Imphal, July 11(UNA): Tunikhoa chun Khurai Kendra MLA Leishangthem Susindro (Yaima) le Khurai AC akon mipi tamtah in Imphal East DC office Complex ana nokhum uvin, Assembly Segment a mipi hon lha nga sunga amudiu NFSA anchang quota mang ho aki hopdohna din ngehna anei uve.

Local MLA leh a mipi hon tunikho nidan 1pm donvel leh mipi henga anchang kisu mahthah ho aki hopdohna ding ngehna’a Porompat munna Imphal East DC Office ana jot u ahi. Hijeng jongleh, police hon DC Office gate munna mipi ho chu ana ting tang uve.

MLA pan police ho henga ahetsahna achun anchang kichohna dinga sum a deposit na dia District Supply Officer akisaipi ho kimuto pi dinga kahungu ahi ati.  Phat chomkhat jouvin ,MLA pa leh Khurai AC a fair price shops agent 27 to thusoh miho DC Office Complex sunga ana kilutsah e.

MLA ho chu DSO office a jangpet in achelut uvin chule Khurai AC a dinga anchang mangho chu media ho masanga officer pa ana hetsah uve. Chujouvin,  Assembly segment a lha nga sunga di anchang quota kipehna dinga DSO henga MLA pan Rs. 25,22,825 cash in deposit abol e. Akisaipi DSO leh Civil Supply Inspector hon sum chu ana lauve.

Geldoh tha din, janhia chu Khurai a mipi ho lha nga sung quota anchang kichohna di sum deposit ding kisaipi Transport contractor, New Checkon Imphal East a M/S N.E. Enterprise munna ana cheuva ahi. Hinla transport contractor pa office ana mu joulou jeh uvin ana deposit doh pouve.

MLA L. Susindro in thusoh miho kom’a ahetsahna achun M/S N.E. Enterprise a Transport Contractor le Proprietor hi Laishram Hemanta Singh ahi ati.  Khurai Assembly Constituency a di NFSA anchang chohna dinga sum akisaipi Assembly Constituency hon a deposit doh joulou jeh uva anchang aki toldoh theipoi tia thusoh mangcha’a Transport Contractor Hemanta in tu masanga ana sei jouva New Checkon munna Transport Contractor office a ama le anchang agent ho ana cheuva ahi.

 Contractor in aseina a Khurai a dinga lha nga sung di anchang quota chu custody a aum nalaiyin chule anchang amount deposited akibol jou tengle bou kihomdoh di ahi ati. Hinla MLA pa leh a agent ho contractor pa office ana che naova konna a office address ana holmo uve.

Aseibena a amale mipi ho sum deposit din DSO office ana chekit uvin, DSO le Civil Supply Inspector henga personal tah in apedoh uve. Jing tengle Khurai mipi ho anchang lha nga sunga di akihopna din officer ni in kitepna aneihon e.

 Jing channa anchang akihopdoh louva thil deilou um asodoh le Officer ni leh akisaipi minister hon mo akipoh diu ahi tin MLA pan aseitha e.

Hemanta chunga government le akisaipi minister hon Dan dungjuiya action la uhen tin ngehna aneije.

Anchang manna thua hin akisaipi minister le contractor ho jong anat uve tin MLA pan ngohna aneiyin chule moral ground a aki resign na diuvin jong angeh bei. Akisaipi Minister hi leng moral ground a kaki resign di ahi tin aseithan ahi.

NHM & DFWO CCpur leh Pherzawl Dist. in World population day 2019 ana nit

 B.Lalboi Gangte

CCpur, July 11(ET):    National Health Mission leh District Family Welfare Office, CCpur & Pherzawl District tohgon na noi in  CMO Conference Hall, CMO Complex ah tuni tuni jinglam nidan 11:00 in “Family Planning fulfills the responsibility for preparing a healthy mother and child” kiti thupi mangchan world population day 2019 ana ni0t uvin ahi. Kingon achun LN. Kashung, Additional deputy commissioner CCpur district Jin-gun in apang in, Dr. Phirthanglien Buhril CMO in-charge, Pherzawl District leh Dr. Lalzuitluangi, Medical superintend MS, district hospital teni Kinnei-pa leh jinja-um in apang lhon in ahi.

World population day kiman chah na ah Dr. Paulunmang vaiphei, SMO PPC District hospital in World population day toh kisai hou limna anei na a leiset pumpi’a milip umjat in punlam nasatah in amano toh lhon in tuhin mi umjat 7.7 billion val ahi in, 2020 teng  8 billion akhokal ding ahi toh lhon a mi tam cheh cheh hin khosah le kivah hahsat na bou ahin pohlut hilou a dam thei na lam jong nasatah a atoh khah dan tahlang na ana nei in ahi.

Dr. Lalzuitluangi, Medical Superintendent District Hospital in ahoulim na aleiset  ah mihem umjat  nasatah in apung in, damthei na ding in family planning  angai in, CCpur ah nao neilai ah thina toh jat Maternal death hi akem vang in, naongeh thisa akhang jing in ahi ati. Numei in ji aneithei phat  kum 18 apat hijong leh kum 18 sang ah chapang jo ah ji anei phat uleh amaho  damthei na tongkha thei ahi toh lhon a kichat umtah ahi in, nao avop phat uleh  a oisung uva um Naosen ading kichat um ahi in, kum lhinglou ah ji nei igot lou ding u ahi atin, Cha tamtah nei nupi ho  damthei na ading aphat loudan toh lhon a family planning hin damthei na ahin pohlut ding dan thu jong ana sei in ahi.

LN Kashung, Additional Deputy Commissioner in ahoulim na a leiset pumpi’a numei naovop lai a thi niseh’a mi 800 alhing jou in, hiche holah’a India in 20 percent alo in, Family Planning bolna ding in numei ho mopoh na hetpeh apoimo masa in, Nu adamthei aleh chajong damthei ahi na Nu in mopoh nalentah aneikhah ahi in, Family planning sem nading hin numei tahsa damthei naleh maban’a nao nei abailam na ding hin kum 3 chan beh chanei kikah sah poimo ahi in,  nu adamthei aleh Chajong damthei ahi toh lhon a he them ngai ahi ati. Gam khangtou hon milip umjat growth rate leh death rate pen kibang in achepe uvin hinlah gam khangtou panpan ho’a population control umlou jeh in nasatah in mihem in punlam amano in khosah na a hahsat na alhut in ahi ati. Population control iti phat leh mi tamtah in Condom, I-Pill, Copper-T kiti ho angaito uvin, itilam ah hinkho mang leng ka maban nomding ham ti essence of life hi ihet u phat ahin, haosat jeh leh kivah na ding sum leh pai tamtah nei jeh’a Ji leh Cha tamtah neite ihilou diu, damthei na, khosahna leh Maban hinkho di phate cha gelkhoh joh di ahi tin ADC pa in asei in ahi.

CCpur District sung’a World Population Day kiman nahi Hapta khat sung’a suhjom hiding ahin, hiche phatsung’a ASHA ho makei na noi a Iron Folic Acid tablets, Contraceptive pills chom chom Mala ‘N’, Chhaya Centromen, Ezy Pills, Nirodh Condom leh Copper-T muthei hiding, niseh’a ASHA hon ahopdoh jat hou District Data Manager chungchon’a  report apehding u, Naonei lou nadia kibol sah nomho jong Post Partum Centre aneilut ding u ahi ati akiti.

Bright Star Aviation (BSA) in CCpur Government College mun’a Aviation Industry toh kisai’a Awareness nei

B.Lalboi Gangte

CCpur. July 11(ET): Bright Star Aviation (BSA), Rengkai Road in Aviation lam toh kisai’a lunglutna neiho ding in CCpur district sung’a um School chom chom akon simlai holah’a Career Guidance ananei uvin ahi. Tuni nilhah lam nidan 1:00 in CCpur Government College mun’a Aviation Industry toh kisai in Awareness program ananei uvin hiche achun CT. Lian Guite, MDC New Lamka West in Career toh kisai’a kichuh na anapeh naban’a themjil na nei simlai hon tupkhat neipum’a themjil anei ding hilna ananei uvin ahi. Chuleh Bright Star Aviation nei CEO K. Neihsial in lenna lam’a lunglutna neiho ding in lampi kho mupeh na leh aviation toh kisai hilchetna ananei in ahi. Churachandpur Government College akai BA First Semester student 200 val in kingon achun pan anala uvin chule Bright Star Aviation in achesa nikho ajong  khopi sung’a um school chom chom’a simlai ho heng’a aviation toh kisai hilchetna leh lampi komu peh na jong ananei jing uvin ahi.

Hiche toh lhon’a K. Neihsial houlimna aneina’a British School of aviation, New Delhi mun’a kum 15 sung trainer kana pang in ahi. Pilot hina ding’a Class XII chai angai in chule Physics, Chemistry leh Mathematics lam’a ST ho ding’a percent 55 mark mu tei jong angai in ahi ati. Chule hiche jilna ding’a course khat ah Dk. Lakh 15 vel lut ding hi jong leh India Govt. in Pilot jil ho ding in Dk. Lakh 15 scholarship jong ape in ahi. India gamsung’a tuhin exam chom chom bol lah’a alenpen UPSC chung chon’a IAS, IPS, IFS leh adang dang lhen doh ahi na dungjui uva India gamsung ading’a din mun poimo lenpen tuh hijong leh alhalo’u Seventh Pay nung in jong Dk. 59,000 bou alodoh jou uvin ahin Pilot ding’a qualified hon hon vang lhakhat’a Dk. Lakh 2.5  alodoh jou uvin ahi. Gamdang che International Service ah Pilot hon vang lhakhat’a Dk. Lakh 5 vel alodoh jou uvin ahi. Aviation lam toh kisai CCpur district sung’a ding’a masapen ding in achesa April nisim 20, 2019 in Rengkai Road mun’a um Bright Star Aviation in ana kipandoh in ahi.

Hetthei khat chu K. Neihsial hin Delhi a BSA HQ mun’a kum 15 sung na anatoh nung’a CCpur district gamsung mipi ho ding gelkhoh na jal’a hiche Aviation lam toh kisai BSA main HQ apat phalna amutoh lhon’a inn mun akon’a jil thei nading Bright Star Aviation hi ahin hondoh ahi. BSA ah course thum tichu Cabin Crew lha 8 course, Ground Staff lha 6 course leh Pilot jilthei hi ding ahi. Pilot hi BSA akon  Delhi mun’a  aga jil ngai ding ahin Cabin Crew leh Ground Staff vang Lamka Khopi sung’a jong jil jeng thei ahi.

EEVFAM  in 10th Foundation Day mang

Imphal, Jul 11(UNA): Inidan Army leh Manipur Police hon Armed Forces Special Power Act (AFSPA), 1958 min a dan pam a atha hon thudih a thutanna amu nadinga kisemdoh Extrajudicial Execution Victim Families Association, Manipur (EEVFAM) in GM Hall, Imphal khopi a Thursday nikhon 10th Foundation Day amang uvin ahi.

Fake encounter chom chom a kithat vangsetna toh ho insung mite apang uvin, athi ho lim anga pahcha akoi uvin, association member hotoh athi ho jana pehna anei uvin ahi. Renu Takhellamba in ahoulimna a EEFAM in 2012 kum a kon Supreme Court a extrajudicial killing case 1528 val a thudih thumna anei ahi, tin aseiyin ahi. Hiche lah a case 11 a charge sheet kisem a chule case 4 athu kisei ahi, ati. Ahivanga tuchan a vangsetna toh ho insung miten thudih a thutanna amu loulai ahi, tin aseibe in ahi.

Vangsetna toh ho insung mite, photchenna ho chule witness ho jal a EEVFAM hichan lhung jou ahi, tin aseiyin, ahivanga tosotna aum vanga avat aum’e, ati. EEVFAM akisemdoh a kon gamsunga tolthana thilsoh hi EEVFAM aum masanga toh tekah dinga nemsuh ahi, tin jong aseiyin ahi. Mipin EEVFAM atosot a chule vangsetna toh hon thudih amuna dinga pan alah diuvin Renu in ngehna jong aneiyin ahi.

Chairperson, Human Rights Commission, Khaidem Mani Singh leh President, EEVFAM, Renu Takhellmanbam kin gon a Chief guest leh president a apang lhonin ahi. Kin-gon a Dr Thiyam Bharat Singh, Reader, Centre for Study of Social Exclusion and Inclusive Policy (CSSEIP), MU in Socio-Economic Survey of Families of Victims Extrajudicial Executions chungchang thu aseiyin ahi. Chomkhat jouva ‘Our Journey for Justice: Whate Next?’ ti thupi a panel discussion anei uvin ahi.

Babloo Loitongbam, Director, Human Rights Alert leh Professor Amar Yumnam, Director, CSSEIP, Manipur University; Aram Palmei, Senior Women Human Rights Defender; Bijoy Kakchingtabam, President, All Manipur Working Journalist Union leh  Ningthoukhongjam Subaschandra, Advocate, EEVFAM Counsel injong kin gon a pan ala uvin ahi.

Meghalaya: East Jaintia Hills sunga prohibitory order kiso

Shillong, July 11: Law and Order umna dingleh security umtheina dinga, Meghalaya a East Jaintia Hills le Bangladesh International border sunga nidan 6pm apat nidan 6am chan Section 144 CrPC akiphong in chule ganhing kihoina ahiloule mihem, gari hihen ipi hijong aki potdoh louna din jahda ahi.

Hiche thupeh hi district a additional district magistrate in aphon ahin, International border a BSF personnel ho venbitna ding, Dan phalna louva na kitohna ho suhtang na le deilou um thilsoh venbitna dinga hiche Dan hi kikoi ahi.

Thupeh in aseina a manchah hem, petrol bombs, crackers le lathi tiho BSF personnel ho douna a manchah thei ding ho phal ahipon chule India gam hop sunga jan teng vadoh di jong khaotah a jahda ahi.

Hiche thupeh hi apet petna kijui di ahin chule thupeh dang kinei masang sea kijuidi ahi.

East Jaintia Hills noiya um International border munna ganhing le contraband goods, betelnut, dry fish, bidi, cigarette, tea le adang dang aguh a kitolna thusoh kimu jouva hiche thupeh hi kikoi ahi.

Aki hetsahbe na achun hichea kisei thil hohi India apat Bangladesh sunga jan tengle kithah jia ahi akiti e.

“Hiche anti-social element ho a hin manchah hem, petrol bomb, cracker, lathi tiho BSF ho dounan akimangji in, asukha jiuve,” tin government akon thusoh chun aseije.

Agriculture Minister in Community Nursery chom chom vil

Imphal, July 11(ET): Gamsunga loubol miho dinga har (fertilizer) angaicha ho Agriculture Department in alhahsam sahlou ding ahi, tin Agriculture, Vety & AH Minister V. Hangkhanlian in aseiyin chule leiset patta leh Aadhar card loubol mihon apehlut jouteng uleh beneficiary hon fertilizer amu diu ahi, ati.

Imphal East hopsunga um Khundrakpam mun a Community Nursery, Imphal West a Sairen kho, Pollangsou Loukon chule Bishnupur district noiya um Nachou kho avil na Minister pa in asei ahi. Amun kholtohna aum jouva Agriculture Department in IR-64 muchi atu pan ahitan, India gam a chang kitu amapen a kila hi ni 90-95 ho lut ahi’in, district li a um gam leiset hectare 5 cheh a kibol ahi. Hiche chunga KVK Thoubal a gam leiset hectare 21 a Community Nursery kisem ding ahi, ati.

Tuni a kitu chang hohi lha kichai teng loubol miho tu phat dinga kihom theiding ahi’in, ahivanga go twi lhahsam jeh a muchi kitu theilou ahi, tin aseiyin ahi. Tuni a kitu doh hohi angaicha jat ahi tina ahipoi, tin jong aseiyin ahi. Agriculture Minister in pan alah a loubolmo miho pump set 126 jong ahopdoh ahitan, twi umlouna phailei ho a twi chop nading pump hop ding adang jong kigong ahi, ati. Minister pa in mun chom chom avilna a Agriculture official leh staff phabep injong ajui ahi.

Karnataka, Goa sunga Political boina jeh a Congress in Parliament sung le po’a kiphinna nei

New Delhi, July 11(ANI): UPA Chairperson Sonia Gandhi le party chief Rahul Gandhi in Thursday nikhoa chun Karnataka le Goa sunga Political crisis thu jeh’a BJP makaina government doudalna le deilouna jeh in Legislator ho kiphinna chu ana lamkai hon’in, Parliament a house ani akon ana vahdoh uve.

Party member ho chun Parliament a Mahatma Gandhi statue maiyin jingkah langa kiphinna anei uvin, “Save Democracy” kijihna banner ana kidop uve. “Karnataka le Goa thusoh deilouna a kiphinna kinei ahi,” tin Rahul Gandhi in thusoh miho ahetsah e.

Sonia Gandhi le Rahul Gandhi jaona a party chu Lok Sabha akon ahung kijotdoh uvin, Karnataka le Goa sunga Political kiboina a BJP natohna chunga demna le ngohna aneije.

Party dang NCP, DMK le National Conference le adang dang akon MP hon jong amaho kiphinna chu ana jop uve. Party lamkai Adhir Ranjan Chowdhury in hiche thusoh hi asusang nom in hinla ana kiphalpeh poi. Party MP ho phat chomkhat jouvin ana kijotdoh uve. State sunga Political dinmun a BJP MP Shobha Karandlaje in kichehtah a houlimna aneiye.

Rajya Sabha a Congress lamkai Anand Sharma in hiche thu hi aphongsang in, Karnataka sunga elected government ho akisulong e tin BJP chu horsetrading a angoh e. Karnataka le Goa sunga thilsoh hi Democracy kithana ahi ati.

Information and Broadcasting Minister Prakash Javadekar in aseina a Congress boina hi amahon aki semthu u ahi ati. “Na party uvin chief aneipoi. Ipi ti BJP na ngoh thei u ham?” tin aseije.

Chairman M. Venkiah Naidu in aseina a House hi normal tah a function in hinla nikho phabep apat adjournment akimutai ati.

 Political development a um in hinla “country khantouna di igel u angaiye.” “Member ho a seat uva akile na diuva thupeh bou kanei thei ahi. A party a kile dinga koima ka sol theipoi,” tin amapa chun aseije. Congress member ho phatchom khat jouva chun ana kijotdoh uve. Anand Sharma, Choudhury, Shashi Tharoor le Gaurav Gogoi jong kiphinna neilah a ajao uve.

Karnataka sunga Political crisis le Goa a Political development thua Tharoor in aseina a hiche hi Democracy kithana leh Constitution ki buluna ahi ati. “BJP hin ahitheina lampen pen’a mi BJP a lahlutna dileh jopsah na ding angaito u ahia ahile, country hi party khatseh hina a heidoh di atiu ham?” tin Tharoor in thudohna aneiye. Hinla hiche hi Dan in atup ahipoi. Democracy in amudan hi mikhat ahatmo a aumdi hi ahi ati.

Karnataka sunga Ruling Congress-JD(S) alliance ho aki resign uvin State Government boina a alhalutne. Goa sunga Congress MLA 10 in jong ruling BJP ajop uve.