Thusoh chom chom

Thusoh chom chom

173
0
SHARE

Vadung’a song leh nel akikha jeh a natong hon kiphinna bol; Govt in kivahna ding dang angaito peh diuva thum na neiyu

Imphal, July 22(ET):  Manipur a vadung a song le nel lah akikha toh lhon in song le nel lah na mun a natong hon government heng a natoh na dang akivah na diu ahin sempeh ding uvin hetsah na anei uvin ahi.

Hetthei khat chu High Court in achesa July nisim 2 nikho a gamsung vadung a hetpeh lou a song le nel lah kha dinga thupeh ana nei u ahi. Hiche thupeh chu vadung ho ki suh set jing hetdih ahi toh lhon a ana kinei ahi. Court thupeh toh kisai in song le nel loh a pang mipi ho in kiphin na anei jing utoh lhon in government in agenthei nao hetpeh na nei a natoh na dang akivah nad ing uva ahin sempeh ding uvin hetsah na ahin nei uvin ahi.

Sekmai vadung a song le nel lah kikha toh lhon a avel lah a cheng hiche mun a natong hon hahsatna ato dan hou thuso miho ang a hetsah na ana nei u toh lhon in tuni in alhang mipi hon toumun kiphin ana bol uvin ahi. Kiphinna  nei ho in thuso miho toh akihou limna uva hitabang khana kinei hi government in mihou ho lah a mi vai ho suhmang ding agot na u natoh ahi tin ana sei uvin ahi.

Hitabang na toh na mun ho kha ding agot u le government in akha masang uva atong ho kivah na thei ding mun dang ahi lou le thildang toh na ding agel uva abol masat u ngai ahi tin jong ana sei uvin ahi. Government ang a natoh na ding dang thumna anei utoh lhon in nahsah lou a aki koi ule kiphinna sang cheh cheh nei ding uvin jong kitepna anei uvin ahi. Manipur sung a vadung ho a song le nel kilah kikha hi Thoubal River Conservation Committee in PIL file ana bol utoh lhon a court in aphat lou na ho vetlhah na ana nei jou uva kha dinga phatsah na ananei u ahi. Hinlah hiche kikha na ahin license nei ho ajao pon ahi.

Kangchup a Demkhohao Kipgen melhetlou hon kaplih

Imphal, July 22(ET): Tuni nilhah nidan 7:30 vel chun Kangchup Chingkhong leh Kangchup Chiru kikah ah melhetlou hon mikhat ana kaplih uvin ahi.

Akikaplih pa chu Kangpokpi district noiya N Boljang kho akon Jangsei Kipgen chapa Demkhohao @Haobem Kipgen ahi akiti. Demkhohao hi aloipa Sesen toh keng’a ahung nalhon a K Shonglung leh Kangchup Chiru kikah a melhetlou hon analamtin uva anakap u ahin amun’a Demkhohao @ Haobem Kipgen in thina ato ahi akiti.

Tahsan umtah thulhut in aseina ah thilsoh hi KRA sung boina toh kisai ahi tin akiseiyin chule akilhonpi Sesen hi Security Force/Assam Rifles hon hoitah a amelhet mi jong ahi akiti.

Maoist thingnoi hon ni 7 sung Standard Robarth school ‘Ban’ bol

Imphal, July 22(ET): Thal choi thingnoi kiloikhom Maosit hon Babysana case a thudih a thutanna aumna dinga party in pan alah ding ahi, tin thuso anei uvin ahi.

Hiche thu a school a kai simlai ho nu-le-pa te phabep in athu hi hostel a bou ahi’in, school pumpi hilouva hostel bou kha dinga aseiyu ahi. School authority hon numeinu thilong amu jouvu apet pet a police ho akoi diu ahi’in, ahivanga private school committee chule guardian association ho ahetsah masat uva chule school authority hon athinu toh umkhom simlai ho jong asoldoh ahi, tin Maoist thingnoi hon asei uvin ahi.

Hiche jouva bou police ho hetsahna aneiyu ahi, ati. School authority hon athinu insung mite jong apet pet a hetsahna anei louvu ahi’in, thil umchan hohin school authority hon thilsoh chungchang a lungtheng tah a na atoh louvu phatah a avetsah ahi. Sorkar in IPC section 204 noiya nu-le-pa chule police ho hetsahna aneilou jeh uva booked abolkhum theiyu ahi’in, ahivanga hiti ahiding hi tahsan umlou ahi. School authority hon natoh adihlou jeh a Maoist Communist Party of Manipur in kal khat sunga dinga Standard Robarth school ‘Ban’ bol dinga thulhuhna anei ahi’in, gangtah a thudih a thutanna aumna ding ahi, tin thingnoi hon thuso anei uvin ahi.

Athi nu toh school a chengkhom chapang ho anu apa tehon chapang hon hiche thu a ipi asei uham tihi party ahetsah diu ahi. Hiche a pan phatah a alah louvu leh school hi hiche sanga phat sot jo kikhah ding chule a itih a school kha nadinga thulhuhna jong kinei maithei ahi, tin thuso chun aseibe in ahi. Party in thudih a na atoh ding ahi’in, gamsung a kiphinna bol, police, CSO, Minister leh MLA hohi sum a suhthip thei ahi tihi mipin ahet diuvin jong asei uvin ahi.

Hitobang case ho a thu kicheh aumding hi tahsan lel umtah ahi, tin asei uvin chule gamsung kipunkhom nadinga pan lah a CSO lamkai tamtah tua BJP a lut ahitai, tin tekahna anei uvin ahi. India in hunam a gamsung alo ahi tia sam hon BJP in vai apoh jeh a BJP ideology anop peh u ahi’in, amachang phatchomna muding agot jeh u ahi, ati. Phat gomkom hol a mi hohi gamsunga umjing chule gamsung leh thingnoi ho kah a um ahi, tin Maoist thingnoi ho thuso chun aseibe in ahi.

Jilkung umlouva simlai hon exam bol; simlai hon toumun kiphinna bol

Imphal July 22(ET): Lamlai Higher Secondary School a Higher Secondary simlai hon school mun a sorkar in jilkung asol pehlou jeh a lekha sim louva exam abol uvin ahi.

School a simlai lunglhai louna nei holeh All Manipur Students Union volunteer hon Monday nikhon Pungdongbam Lamkhai a jilkung lhahsam douna a toumun kiphinna abol uvin ahi. School a simlai Irungbam Alfred in thuso miho akimupi na’a Higher Secondary a jilkung aumlou jeh a school a che jong apanna umlou ahi, tin aseiyin chule school hi 2016 kum a Higher Secondary a upgrade kibol a 2018 a admission kipan ahivanga Higher Secondary akisemdoh a kon jilkung lekha hil ding koima umlou ahi, ati.

Arts leh Science simlai ho abon uva class khat a bou akoi khum u ahi, tin school a facility chom chom lhahsamna thu aseiyin, laboratory a manchah umlou, library facility, desk leh bench umlou chule pam chena jong kidah umtah ahi, ati. Education Minsiter chule Director in phat sottah school nahsah louva akoi ahitai, tin aseiyin chule aganna thei pen a sorkar in jilkung asolpeh dinga temna aneiyin,July lha kichai kah a sorkar in thumna asan louva hiche sanga nasa jo a kiphinna umding ahi, tin gihna aneibe in ahi.

President, Imphal East AMSU unit, Sanjoy Mangsatabam injong School Fagathansi Mission thu a sorkar thudohna aneiyin, Lamlai Higher Secondary School akisemdoh a kon jilkung khatcha higher secondary class hil ding umlou ahi, ati. Education Director in avel vel a kitepna asem vanga tuchan a jilkung aum louhin authority hon agelkhoh lou avetsah ahi, ati. Lha kichai kah a thumna bulhit ahi louleh simlai chule mipin kiphinna abol ding, thilse aso leh sorkar themmona hiding ahi, tin aseibe in ahi.

Tuni a athah a school Principal a pang Nongmeirakapam Narendra in class 12 simlai hon Council exam iti abol ding ham tin thudoh aneiyin chule jilkung hon phat chomcha sunga lekha ahil jou theilou ahi, ati. Hiche hi simlai ho dinga manna lentah ahi’in, jilkung aumlou jeh a lekha sim a hung simlai ho lekha sim louva akile uhi simlai ho chunga thudih a na akitoh louna ahi, tin Narendra in aseiyin chule simlai ho ding ngaitona a sorkar in aganna thei pen a jilkung asolpeh diuvin ngehna aneibe in ahi.

Babysana thi thu a kisemdoh JAC in kiphinna bol ding

Imphal, July 22 (ET): Ningthoujam Babysana Chanu thi thu a kisemdoh Joint Action Committee (JAC) leh simlai kiloikhom hon Monday jan kim kah a JAC hon thumna anei state sorkar in asan peh louleh kiphinna sangtah bol dinga gihna anei uvin ahi.

Babysana (13) hi aumna Standard Robarth Higher Secondary School, Canchipur a achesa July nisim 18 ni a kikhailih ahi. JAC chule class 7 simlai nu insung miten Babysana thi dan hi adih louva na kitohna umdinga ginmona aneiyu ahi. JAC convenor Th Chitaranjan in thilsoh chungchang a Education Minister Th Radheshyam thipbeh a aumjeh a demna aneiyin ahi.

Alangkhat a United NGOs Mission-Manipur (UNMM) in thuso anei nauva thilsoh chule khangthah numei leh numei chapang ho kitup jing demna sangtah anei uvin ahi. Chingmeirong mun a UNMM in press meet abol nauva state sorkar in athisa kimudoh Babysana thi thu a themmona nei ho chunga gangtah a action alah diuvin ngehna anei uvin ahi.

Hetthei khat chu Thokchom Babythoi Chanu kiti numei khat jong achesa July 12 ni a Moirangkampu Sajeb Awang Leikai a um Iril vadung pam a athisa kimudoh ahi. Chule Mina Devi (32) kiti numei khat jong Lei Engkhol, Christian Cemetary, Chingmeirong a Sunday nikho a athilong kimu ahi’in, ‘rape case’ hidinga ginmona um ahi.

Yoganiti Society Manipur in gamsung a politics toh kisai a boina akichai loi dinga temna nei

Imphal, July 22(ET):Tu le tua BJP sunga boina um ho hi agan na thei pen a akichai na dingin Yoganiti Society Manipur in temna ahin nei uvin ahi. Kiloikhomna in aseina a hitabang party khat sunga kitomona hin government semna a boina aum sah in hiche akon in milham ho in genthei na atoh uvin ahi ati. MC Binod, president Yoganiti Society Manipur in thuso miho toh Manipur press club mun a akihou limna a kei ho hi yoga sam phong le a um kahiu vin kei ho in hitabang a government chunga thuphon kanei kha pouvin hinlah government sem BJP sunga kitomo na um hin milham ho asuh boi toh lhon a hitabang phondoh na hi hung kinei ahi ati. Manipur in amsa pen a ding a government hoi anei toh lhon a National media in Chief Minister N Biren India sunga Chief Minister natoh hoipen a 3 channa ahin pansah utoh lhon a mi phabep in aphalou ahi tia phondoh na anei utoh lhon a boina asem u hi thil kidang tah ahi tin jong kiloikhomna lamkai pa in ana sei in ahi.

CM in journalist ho CMHT card hop peh; Th Chinglensana ‘appointment order’ jong pehdohna nei

Imphal, July 22 (ET): Chief Minister N. Biren Singh in gamsung a journalist (working) ho Chief Minister-gi Hakshelgi Tengbang (CMHT) card ahop peh in, Manipur Press Club mun a abol u kin-gon a ahop ahi.

Chief guest a pang CM Biren in ahoulimna a gamsung miho lungtup molso nading chule mipi kipana ding hi mijouse mopohna ahi, tin aseiyin, insung hahsa ho hospital a akijen thei nadinga sorkar in achesa January 21 ni a CMHT hondohna anei ahi’in, insung 67,000 a kon mi lakh 3.5 vel CMHT noiya enroll kibol ahitai, tin aseiyin ahi.

Beneficiary 12,000 vel scheme noiya man beiya kijen ahitan, chule tuchan geiya sorkar in hospital bill dangka crore 14 vel amu ahitai, ati. CMHT tobanga India sorkar in PMJAY (Ayushman Bharat Yojana) hondohna anei ahi’in, hiche scheme noiya SECC 2011 list a pang hon kijenna a dangka lakh nga chan phatchomna amuding ahi. Manipur gam a akipe hospital ho tilouva CMHT in India mun chom chom a um Narayana Hospital, Global Hospital kiti hospital hetthei tah tah ho a jong phatchomna amu vahding ahitai, tin aseibe in ahi.

Sorkar chule hospital in Memorandum of Understanding soi kaina anei vahding ahitai, tin aseiyin chule JNIMS, Imphal khopi a Special Ward 18 kisa ding ahi, ati. Gamsung a economy akhantou jing thu aseiyin, New Development Bank in gamsung miho don ding twi theng pehna dinga dangka crore 3400 vel sanction abol ahi, ati. Media in pan alahna akipapina thu CM in aseiyin, aumsa scheme ho mipin ahet nadinga media in pan lentah anei ahi’in,  gamsung pumpi akhantou nadinga sorkar tohgon thuso mihon atosot jom diuvin temna jong aneiyin ahi.

DIPR in journalist ho apeh media card tamsah jep dinga proposal akipeh thu a CM in kum seh’a journalist tam cheh cheh ahijeh a working journalist ho media card peh kalsah angaiye, tin aseiyin chule DIPR in athu avettup dinga thupeh aneiyin ahi. Tukum a kon Manipur Press Club vettup nadinga sum hi dangka lakh ni a kon lakh nga a kalsah dinga jong aseiyin ahi.

Chief Minister in kin gon a aumtalou Th Rabina ji Th Chinglensana Police department a Assistant Sub-inspector dinga lhendohna chule CID (SB) a posting dinga aseiyin ahi. Hetthei khat chu achesa December nisim 22, 2018 kum a Th Chinglensana Singh, h/o (L) Th Rabina, Lamdeng Khunou natoh pehna dinga state Cabinet in phatsahna anei ahi. CM chule AMWJU executive member hon Manipur Press Building dinmun vetlhahna Deputy Chairman, State Planning Board, S. Rajen leh President, AMWJU Bijoy Kakchingtabam Guest of Honour leh President a apang in, Principal Secretary (Health) V. Vumlunmang, IG (Adm) I.K. Muivah, Director IPR H. Balkrisna, Health Department a official ho, thuso miho chule adang dang jong apang uvin ahi.

Indo-Myanmar Friendship Gate No. 2 a traffic kinoh den

Tengnoupal, July 22(ET): Moreh kailhang leh Indo-Myanmar Friendship Gate No. 2 vel a traffic kinoh hohin alamlha ho asuboi lheh in ahi. Hiti hohi gari amun dihtah a kingah loujeh leh lampam a daan dihlouva thiljoh ho jeh ahi. Traffic boina ho suhlhapna ding’in tukum March lha chun Tengnoupal SP lamkainan police official hon gari ho amun kitup lai ah anakham sah uvin ahi. Gari mun kitup laija kham le khamlou ho vetup ding’in Indo-Myanmar Friendship Gate No. 2 ah Moreh Police personnel 2 le 3 jong ana kikoiyin ahi. Ahin tuhin police personnel khatseh bou aumtan, gari hojong lampam amun ajaang lou laiyah akham un ahi. Chuleh Myanmar lang’a kon’in jong mi phabep Moreh kailhang lampam ah daan dihlouvin thil ajoh kit uve. Akisaipi authority in akinthei lam’a traffic boina ho ahin suhfel ding’in akim avel’a cheng mipiten ngehna aneiyuvin ahi.

CM Biren in 3rd Credit Lingkage Program noiya Dk Crore 2 val loan homdoh

Imphal, July 22 (ET): Chief Minister N. Biren Singh in ahung lhung ding August nisim 5 nikho teng 2nd MR Gate, Imphal kom a um Citizen Facilitation Centre mun a VSF (Visa Facilitation Services) centre hondohna umding ahi, ti phondohna aneiyin ahi.

Hitobang VISA centre hi Northeast pumpi a dinga amasapen hiding ahi, tin Self Help Group, nga man chule adang dang ho Manipur State Cooperative Bank leh SBI in Chief Minister’s Secretariat mun a Monday nikho a loan ahopdoh na kingon a aseiyin ahi. Chief Guest a pang Chief Minister Biren in gamsung hi aphatna lang a kikhel ahi’in, gamsung a bandh, strike ho dinga mun a ongpoi, tin aseiyin ahi.

Gamsung abon a akhantou nadinga pan lahkhom angaiyin, thudih a natohna ngai ahi, ati. Akisemdoh a kon sorkar in angaicha gammi jouse kithopina jo channa pehding tupna anei ahi’in, Meeyamgi Numit, Hill Leaders Day, GTV chule adang dang ho mipi hahsatna leh boina ho hetpehna dinga agon ahi, ati. Chule kimanchah dan a ol nadinga sorkar in loan ahop jing ahi, tin aseiyin ahi. Achesa 1980 khang a loan lah ahahsat dan thu CM in aseiyin chule loan applicant ho bank hon a engbol loudinga sorkar in thuhilan anei ahi, ati.

Fish Feed Factory masapen kimangcha pan ahitan, kailhang a kihom pan ding ahi, tin CM in phondohna aneiyin chule nga an (protein 24-28% umna) hi dangka 55 a kijoh ding ahi’in, gamdang a kon hung kipolut a nga an ho sanga dangka 25 a man lhomjo ding tina ahi, ati. Sorkar in kolbu chule soyabean khovei a kon atam so cheh nading tohgon anei ahi’in, achi loubol miho kihom ding ahi, ati.

Thanga area, Bishnupur district a jong Fish Feed Factory khat kisemdoh ding ahi, tin CM in aseiyin chule factory semdoh nadinga ngaicha a dangka crore 2 lah a Centre in dangka crore 1 apohdoh ding, adang lakh 80 hi Self Help Group of Fish Farmer hon apohdoh ding ahi, ati. Fish Feed Factory akisemdoh hi nga atam so cheh nading ahi, tin CM in aseibe in ahi.

Managing Director, Manipur State Cooperative Bank (MSCB) Ahanthem Subash in hiche hi Bank in agon 3rd Credit Linkage Programme ahi, tin aseiyin ahi. MSCB in Outstanding Performance in Self Help Group-bank Linkage, 2018-19 ‘Letter of Appreciation’ anamu ahi’in, Ministry of Rural Department in apeh ahi, ati. Kin-gon a CM in Self Help Groups 155 chule Meeyamgi Numit leh Hill Leaders Day ni a apply bol a achang dinga lom mi 16 chule nga vah mi 38 agom a dangka crore 2.58 lhing loan ahop peh in, Deputy Chairman, State Planning Board S Rajen, Deputy Speaker K. Robindro, Sekmai AC MLA H. Dingo, MLA of Yaiskul AC Shri Th. Satyabrata, Principal Secretary (Cooperation) Shri J. C. Ramthanga, Principal Secretary (Finance) Rakesh Ranjan, Secretary to CM Ningthoujam Geoffrey, Director Fisheries Bidyarani Ayekpam, MSCB, SBI official chule adang dang jong apang uvin ahi.