Thusoh chom chom

Thusoh chom chom

251
0
SHARE

Government jilkung hon Manipur Services (Revision Pay) Rules 2019 jahda na a toumun kiphinna bol

Imphal, July 21(ET): Manipur sunga government school a jilkung a ja a sim in tuni in Imphal a Revision of Pay, 2019 a pay scale ana kah nem u deilou na in toumun kiphin ana bol uvin ahi.

Keishampat mun a toumun kiphin Joint Teachers’ Forum (Primary/Graduate /Lecturers against pay structure of 7th Pay Commission makei na noi a kibol na a jilkung aja a sim in panlah na ana nei uvin ahi. Thuso miho toh akihou limna a Joint Teachers’ Forum a convenor M Jadumani in state government na toh hi jilkung ho muset na ahin, hiche hi jilkung ho kinepna toh akile lang asoh tang ahi ati.

Thil man hibang khan lai a pay scale hung ki su nem hi ajeh ahet nom na u jong tahlang na ahin nei uvin ahi.  ROP thah dungjui a state sunga 7th pay ahung lhun jong le jilkung ho lha lo hi 5th Pay a lo kipeh dan toh hung kibang ding ahi. Jadumani in asei be na a government in school ho khantou na dingin na toh jat chom chom abol uvin, hitabang na toh kibol jou a jilkung ho lhalo hitia kisunem hi vangset umtah ahi ati.

Nagaland Governor dia RN Ravi appoint kibol hi Naga Political issue suhgang na di joh hihen: NPF

Dimapur, July 21(ET): Nagaland Governor thah dinga RN Ravi kipansahna chunga  Naga People’s Front (NPF) central headquarters in kipapina aneiyin, “Naga Political boina a hitobang machalna thah akon santhei doltah le pomthei dol solution a gamlhat tah loudi kinepna akineiye,” tin phondohna jong aneiye.

Naga Political issue to kimatna natong le Naga mipi ho phatah a hethem Ravi tobang Governor thah a akipansah na chunga NPF in Central government henga pachatna aneiye.

Hijeng jongleh, Ravi panmun thah hin tua chejinglai Naga Political groups leh Government of India kikah a kihouna asuhboi louva, asuhgang joh a agantheipen a solution ahin semdohna din NPF in Centre henga ngehna aneiye.

Ravi appointment hi ipi lam a hijongle solution kisuh ngongkai sah da hen, hinla solution umna dinga phat sottah kum som phabep Naga mipi hon ana dei jingu molso na dinga kal saotah sebena joh in pang hen, tin NPF in aseidohtha e.

Akipat til le akisemdoh apatna Naga Political issue hi party khohsahpen ahin kikhel louva aum jinge tin NPF in avel a adinmun suhchehna aneiye. New Delhi in delay tactic kiti ho amanlou na dingleh Naga Political issue a hi kitah tah’a pan alahna dinga kinepna aneidan NPF in aphondoh tha’e.

NPF akon thusoh dungjuijin, Political boundaries don louva Naga ho area jousea civil society ho jaona a negotiating group jouse to phat sottah kinaicha pan analah jal a Naga ho lungtup hi Ravi akon aki suhbulhitna dinga Naga mipi hon kinepna aneidan asei uve.

“Hiche jeh a hin, Nagaland sunga constitutional luboh dingle interlocutor dinga Ravi hung kisolna hi Naga Political boina suhlhapna dinga kithokhom na joh ahitheina dinga NPF in New Delhi henga akingeh e,” tin NPF akon thulhut kimu chun aseibei.

Manipur Democratic Alliance in cabinet meeting jaolou minister ho demna nei

Imphal, July 21(ET): Manipur Democratic Alliance (MDA) in cabinet minister achesa Saturday nikho a cabinet meeting a jaolou ho demna ahin nei uvin ahi.

Achesa Staurday ni nilhah a Chief Minister pa in Chief Minister secretariat mun a cabinet meeting ana kou ahin hinlah cabinet phabep in panlah na ananei lou u ahi. BJP sunga boina aum jing toh lhon a cabinet meeting ho a phat masa jep akon cabinet phabep hung jao dap eh ahi.

MDA Convenor N Tombi Singh in thuso miho toh akihou limna a hitabang phat boi lai tah a cabinet ho in meeting a panlah na anei lou u hi state sunga mipi genthei ho ding agel khoh lou u ahi ati.

Shiv Sena office mun a thuso miho toh akihou limna Tombi in tu kum in gojuh alhah sam lheh toh lhon in lou bol ho in boina atoh in hinlah gam vai po ho thanei ding kichu in aboi jing nalai uvin ahi ati. BJP sunga boina hi ahung sot toh lhon in gamsung mipi ho in genthei na ahin thoh pan taovin ahi ati. Hitabang boina hi BJp in agan na thei pen a asuh lhap uva pha ahi toh lhon a hitabang boina pum a government kisem hi vai poh hoi ahi hih beh in ahi tin jong Tombi in ana sei in ahi.

MDA hi Manipur sunga political party 11 in kigom khom a asem u ahi.

Kshetrigao constituency Wangkhei Ayangpalli ward a NFSA noiya anchang lha 10 lang kihom talou

Imphal, July 21(UNA): Kshetrigao constituency Wangkhei Ayangpalli ward no. 4/16 a lha som lam National Food Security Act (NFSA) noi a anchang ana kihop lou toh lhon in tuni in  Leima Keithel mun a alhang mipi ho in toumun kiphin ana bol uvin ahi.

Toumun kiphinna achun meira paibi ho in kholhang ana sam uvin placard ho a demna thu ana jih uvin ahi. Wangkhei Ayangpalli Ward no. 4/16 Apunba Meira Paibis Lup a secretary nu in thuso miho toh akihou limna a achesa 2017 kum in Imphal East DC ang a anc hang kimu loutoh kisai in complaint ana kibol in, complaint kibol chai in lha phabep anchang akimu in phat chomkhat jou in akimu kit tapon ahi ati. Tu chung in lhang sunga anchang hop asuh sah aum hih in, ka kom uva constituency ho in anchang kg 5 cheh amu ji uvin hinlah kei ho in til apat in kg 4 bou kana mu ji uvin ahi ati.  Hiche thu toh kisai a constituency sunga NFSA agent N Bobo thudoh an anei na uva MLA pa in kg 4 bou hop ding ati toh lhon a ana kihom ahi ati in, hiche thu ho hi phate cha a suh theng ahi na dingin Meira paibi ho in akisaipi vai po ho in phate in kholchil na anei u hen tin temna jong ahin nei uvin ahi.

Indian Army in milham ho a eng bol jing uve tia ZB Manipur in themmo chan

Tamenglong, July 21:  Zeliangrong Baudi (ZB) Manipur  in tuni in Sikh le Gorkha Regiment Noney district a um ho in milham ho a eng bol jing uve tin ahin moso uvin ahi.

Poupoklung Kamei, President, ZB Manipur state akon thuso kimu chun asei na a Noney gamsunga loubol le khomi ho nitin a sum kilo a kivah ho Indian Army in alhang sunga galguh bol ho nodoh na dingin pansa in asu genthei jing uvin ahi ati. Gamsung ago hah toh lhon a neh le chah hah lai tah a Army in na tong ho pot doh sah lou a mun khat khat a ahen dan ji u hi milham aum ho kiman chah le na toh le kivah na asu kha lheh in ahi ati.

Indian Army in numei avah le ho kholchil na anei jing uvin, hiche dan toh kitoh lou ahin, hetna nei mi jouse in adem ding a lom ahi ati. Indian Army in alhang sunga mei pum alha ji uvin galguh bolho kinodoh ahe ati ji uvin milham ho nu nao chapang au gicha jing uvin ahi tin jong Kiloikhomna in hetsah na ahin nei uvin ahi. Indian Army in government toh kileu khamna nei galguh bol khat toh kitho in galguh bol dang khat anodoh kigo uvin, alhang sunga mi lham ho asu genthei lheh uvin ahi ati.  Indian Army in Khoupum Valley lhang a mipi ho chamna le lungmon a aum thei na dinga anatoh ho u angah diu vin jong kiloikhomna in hetsah na ahin nei uvin ahi.

IAS le MCS officer phabep transfer ana kibol

Imphal, July 21- Department of Personnel and administrative reforms, Government of Manipur in state sunga IAS le MCS officer phabep transfer ana bol uvin ahi. Transfer kibol ho chu Sumant Singh, IAS, Commissioner cum secretary(Vety & AH/planning/education(S)/ Technical & Hr EdN./IT) and special secretary (DP) & OSD to chief Minister & OSD/Manipur Bhawan Delhi akon Commissioner cum secretary (Planning/vety & AH/IT) and OSD to chief minister & OSD/ Manipur Bhawan, Delhi in addition, Kh Raghumani Singh, IAS, Commissioner cum secretary (Power/IPR) and Special secretary(Home), akon Commissioner cum secretary (Power/IPR/Hr & Tech Education) and special secretary(Home) in addition, T Ranjit Singh, IAS, Secretary, Manipur Lok Ayukta akon Commissioner cum secretary (Education(s) and secretary, Manipur Lok Ayukta, M Harekrishna, IAS, on return from central deputation akon commissioner cum secretary(Transport), Chphang Arthur worchiyo, IAS, Director (Commerce & Industry) and director (Transport) and special secretary (TRANSPORT) in addition akon Director (Textiles, commerce & Industry) and director (Tribal Affairs) and special secretary(TA & H) in addition, Neilenthang Telien,IAS, Deputy Commissioner/Kakching akon Joint Secretary(Finance), Arambam Valentina, IAS, Joint Secretary (Tribal Affairs & Hills) & Director (Tribal Affairs & Hills) in addition akon Deputy Commissioner/Kakching le Mercina R Panmei, MCS, Joint Secretary (finance) akon Joint Secretary (Transport) and i/c Director(Transport) in addition ahiu vin ahi.

Manipur a Visa services centre August le kihong doh ding

Imphal, July 21(ET): Manipur Chief Minister N Biren Singh in gamsung a VISA services centre ahunglhung ding August nisim 5 akon aum ding dan phondoh na ana nei in ahi.  Hiche visa centre hi akihondoh le Northeast lhang sunga jong amsa pen hiding ahi tan ahi. Hiche centre mun ahi gampam gam 40 lam che na thei dinga visa service kihongding ahi. Hiche phondoh na chi Visa Facilitation Services (VFS) Global in Chief Minister pa hetsah na ananei utoh lhon a ana kinei ahi. VFS Global hi Dubai akon mulitinational enterprise ahi in visa apply na dinga center le passport toh kisai na toh na aboi pi u ahi.

Naga ho solution hi kidang tah ahi ngaiye: NPMHR

Dimapur, July 20: Naga Peoples Movement for Human Rights (NPMHR) in aseina a NorthEast sunga Political le armed group ahiloule kiloikhomna hon Naga peace talks amachal dan avejing uve ati.

Friday nikhoa Expert Mechanism on the Rights of Indigenous Peoples, United Nations, Geneva, 12th session kineina a NPMHR Secretary General Neingulo Krome in aseina’a Naga peace talk outcome hi kitilkhou theina tah a ahung sodoh a ahile alhang sunga kiloikhomna dang ho jong hung thanom diu ahi, tin Saturday nikhoa thusoh chun aseije.

“Hijeng jongleh, Naga ho to peace initiative kinei hi kisuhdaina le kisuhthasetna ahitan amaho anomang cheh joh di ahi,” tin hetsahna aneiyin ahi.

Tu dinmun a dinga, armed group ho kinahna hi ceasefire, suspension of operations le memorandum of understanding ho mangchan peace agreement chom chom a aki control e. “Hinla hiche hung kichai nikho tengle hitobang delay tactics, divide and rule policy ahiloule appeasement umchan ho hin ajeh ahin semdoh jou nadem? Hiche donbutna hi Government of India inbou anei ahi,” tin Krome chun aseiye.

Kum som phabep sungin Prime Minister Jawaharlal Nehru apat Moraji Desai, Indira Gandhi le Narendra Modi cheng in Naga Political issue lolhingtah a ahin sinsah dan u Right group secretary general in ana seiye.

Naga ho douna a kum som phabep military operation ana lamkai India a general lenpen themkhat in Military solution hi ahitheilou ahi tin ana phongdoh uve tin aseiye.

“Peace ahiloule ceasefire um le umlouva, Naga Political movement hi kum 70 val  ahitan Asia sunga Political conflict a hingsot pen khat ahitai,” ati.

Kum 22 ana chesa sunga Politics kihouna a government of India in Interlocutor chom chom ana koiho komuna jong aneiye.

“1997 kum’a Interlocutor masapen, India Former Governor Swaraj Kaushal chu Mizoram Accord  kikai lolhinsah ahin, Naga hon independent hina dinga right jouse anei uve tia lhang phong tah a anopna aphondoh phat in ana kikah e. Interlocutor ani channa K. Padmanabiah jong chun kum 10 val negotiation kinei jouva “Naga ho hi adih uve,” tia asei jouva aki kahdoh kitne,” tin aseiye.

Amapa chun aseibena’a kum 30 val Nagaland sunga bureaucrats a natong, Interlocutor athum channa R.S. Pandey chu 2014 kum in aki resigned kitne ati. Tupetna interlocutor R.N. Ravi in 2015 achun Framework Agreement kineina dingchan a ahin semdoh in, hiche hi tuchan a aki implement hihlaiye, India kitahna chunga lungsa-ih na ichan ham a umme ati.

2015 a agreement kinei jouva patna, Naga mipi hon chamna deina a atosot dan u Prime Minister Narendra Modi in apachatdan ana phongdoh e tin avel a hetsahna aneiye. Hijeng jongleh, akhut muh a ipi tobang solution akoi ham government of India inbou aki hetne tin Krome in aseikitne.

 “Hinla keihon Naga hina dol a Kahet u ka thusim ule ka dinmun uhi kidangtah ahin chule government of India injong 2002 kum a hetpehna aneiyin, August 3,2015 nikhoa Framework Agreement a avel in asucheh kitne. Hiche jeh a hi solution jong kidangtah ahi ngaiye,” tin Krome in ana seibei.