Thusoh chom chom

Thusoh chom chom

374
0
SHARE
CM Biren chung’a disciplinary action la dinga BJP president heng’a hetsah na um

Imphal, Jul 17(UNA):  Chief Minister N Biren Singh in Manipur a BJP sunga boina um suh lhap ahi di tah dan tahlang na ananei vang in, BJP MLA akiphin hon BJP Manipur Pradesh president ang a Chief Minister chunga disciplinary action la dingin hetsah na ana nei uvin ahi.

Manipur BJP president ang a lekha thot kinei chu minister 3 le MLA 11 in soi akai u ahin, kiphinna nei ho hin Chief Minister pa natoh na ho hin BJP atongkha in ahi tia ana sei u ahi. Kiphinna nei BJP MLA ho in Chief Minister suh khel na le natoh dih na ho tahlang na ahin neina uva, Chief Minister pa in achesa 2018 kum in Member 26 umna Tamenglong Autonomous District Council a BJP MDC 14 a um jeng vang in council a ana form sahp[on ahi tin ahin sei uvin ahi. Chief Minister pa in Kadijanbou Ch., BJP Candidate ang a By election  3/Chaton ADC Constituency, TADC (2018) goljo na anei ding vang in ana tetsah pon NPF pa kai na ding in tha ana pen ahi akiti.

Chief Minister pa in BJP hatmo nadingin athanei na ana podoh in BJP Councilor, Moirang Municipal Council, Moirang AC, Manipur, aho Congress (INC) Councilor hotoh ana kitho sah in “No Confidence Motion” BJP Chairperson chunga ana file sah uvin ahi. New Delhi mun a BJP MLA kiphinna nei ho in centre lamkai ho akimupi kit ding utoh lhon a tuchung a nasatah a kiphinna kinei a Chief Minister kikhel sah ding ahi tin thuso miho ang a hetsah na ana nei uvin ahi.

Swine Flu natna akon thina toh um toh lhon a Health Directorate in hospital ho kigingjing a aum diuva hetsah

Imphal, July 17(ET): Imphal East akon khangthah Swine Flu natna akon thina toh ana  umtoh lhon in Manipur Health directorate in gamsung a um hospital ho kiging jing a aum na ding uvin  hetsah na anei taovin ahi. Tuchung case hi Swine flu natna state sunga matdoh a aum  a 3 vei channa ahi tan ahi.

Manipur sunga Swine Flu case hi achesa May 2015 kum a ana kimu doh masa pen ahin mi 2 in thina ana to ahi.  Hetthei khat chu Imphal Eat district akon kum 18 a upa psal khat Imphal akon hospital khat in Dispur hospital a refer ana bol u toh lhon a Swine flu natna positive ana hi ahi.  State Health Directorate a director Dr K Rajo in Swine Flu toh kisai a thina toh het ahi toh lhon a hospital ho a  Swine Flu natna akon hung kipolut aum le Special doctor ho in atumbeh a ajan ngai ahi ati.

Swine Flu hi mi akon a kila son thei ahi toh lhon in Director pa in mipi jouse kichih thei na dingin jong hetsah na ahin nei in ahi. Swine Flu um hetdoh ahi toh lhon in Imphal a surveillance officer akikoi pan tan ahi.  Swine Flu hi mikhat chit le khuh akon kiladoh thei bou hilou a thil jat khom ho toh khah akon a jong kila doh thei ahi.

KNO/KNA thuphon UKLF in nelkal; Government in gotna apeh lou le kiloikhomna in kipe ding ahi tia gihna nei

Chandel, July 17(ET): Achesa July nisim 13 nikho a Moreh mun a UKLF 2nd  Lieutenant John Gangte kithana chunga KNO/KNA in T Stephen Kuki min a thuso ahin nei u UKLF in nelkal na ahin nei utoh lhon in hilchetna ahin nei uvin ahi.

UKLF in thuso ahin neina a media a John Gangte thilong a WY tablet akimu e tia tahlang na kinei na chunga kidang sah na u phondoh na ahin nei uvin ahi. ASI T Paominlun Haokip soikei na report a WY tablet kimu akisei loudan jong hetsah na ahin nei uvin ahi. Hiche thu toh kisai in UKLF in IO pa chunga tahsan lal na anei dan le UKLF min setna dinga report asem toh ding a ginmo na anei dan u tahlang na ahin nei uvin ahi.

Kiloikhomna in hiche thu toh kisai a case a IO a pang T Paominlun Haokip ASI, Moreh PS le KNO akon Telsing Thangboi @Thahpi Haokip in kihoutoh na anei lhon a natoh anei lhonding ginmo na anei dan u jong tahlang na ahin nei uvin ahi. UKLF in hiche report  kisem KNO/KNA in koi toh ki khut jop mat na akon ahin sem u ham tin vai po ho ang a kholdoh na anei ding uvin hetsah na ahin nei uvin ahi.

UKLF in khamnathei ho suh mang dinga natoh na akinei toh lhon a operational area sunga hitabang na toh na ki vechil jing ahi dan jong phondoh na ahin nei uvin ahi.

Moreh khopi mun a KNO/KNA in dan toh kitoh lou a natoh na anei seh uva government in gotna pe lou le don lou a akoi jing uhi, KNA ho hi dan toh kitoh lou a natoh na le adei dei u thana thei dinga license kipe ham tin jong UKLF in thudoh ahin nei utoh lhon in government in mona nei ho matdoh na le gotna pehna anei lou le kiloikhomna in kile thuh ding government in mo akipoh ding u ahi tin UKLF akon thuso kimu chun asei in ahi.

BOSEM in ngehna ho anahsah louleh kiphinna khoutah boldia DESAM in gihna nei

Imphal, July 17(ET): Board in ningkum leh tukum class X themvetna mark kisuh chatvaina ho thu report ahin pehdoh loujeh leh RTI kipelut ho chung’a thipbeh a aum chungchang’in Democratic Students’ Alliance of Manipur (DESAM) in tuni chun Manipur Press Club ah kihoukhomna kingon khat amang’in ahi.

DESAM in ngehna aneiho chungchang’in Board in imacha donbutna ahinpe hihlaiyin hiche hin avetsah chu themvetna ho alam louva  kibol ahidan atahlang’e tin DESAM a General Secretary Sital Oinam chun aseiye. Hiche chungchang’a Board thipbeh a aum peh’a ahileh deilou thilsoh jatchom chom jong hung umdoh maithei ahi ati. Board sung’a hin mark suchavai leh adon louva kichem mihon khat aum’e tin aseiben ahi. Hiche chungchang State Government in akinthei lam’a ahin vettup louva ahileh DESAM in kiphinna khoutah ahinbol ding ahi tin jong gihna aneiyin ahi.

Hiche kingon a chun DM College Mathematics Department a Head masa H Jayanta, All Manipur Recognised Private School Welfare Association a Advisor N Tomba, Board of Secondary Education Manipur a Chairman masa P Dhanakumar leh DESAM President Salam Akash hojong apang uvin ahi.

Khomawi lei kisem quality dei bang anahi lou jeh kisuse

B. Lalboi Gangte

Ccpur, July 17 (ET):  Churachandpur Police Station apat Imphal kikah Tedim Road (National Highway) lamlen semphat na natoh achelhah jing lai tah ahitoh lhon’a quality hoitah’a maintain abol ding uvin Joint Action Committee Against Non-Completion of Developmental Works CCpur  (JAC-ANCDWA) hon lamlen kisem dan avelha jing uvin ahi.  Tuibong leh Khomawi kikah’a lei um Khomawi Lei (Bridge) expansion kibol quality dei bang ahi lou jeh in tunin JCB mangchan anasuse uvin ahi.

Hiche toh lhon’a JAC spokersperson James Seikhogin Doungel in aseina’a National Highway (Tedim Road) lamlen kisem na natoh hi JAC in mopoh nanei contractor leh department heng’a hoitah’a asem ding uva ngehna tam tah vei anakinei ahi in ahin lei kisem dan quality deibang  ahi lou jeh’a contractor heng’a hoitah’a abol ding’a ngehna ana kinei vang’a khohsah na anei lou jeh’a ana kisuse ahi ati. Chu jouvin nilhah lam in Zero point Police station akipat Hmar veng chan black topping ana kisun chaisa ho aban ajom uvin final coatting ananei tauvin ahi.

Catholic School Canchipur a Principal ahin sol peh louvu leh kiphinna bol dinga nu-le-pa ten Bishop House gihna nei

Imphal July 17(ET): Achesa ni phabep Catholic School Canchipur a Head of Institution aumlou jeh a nu-le-pa chule guardian hon school gate pam a Wednesday nikhon kiphinna anei uvin ahi.

Sobita Biramani in thuso miho akimupi na’a school principal Father Sony Thomas hin June 17 ni a suty alah ahi’in, tuchan a hung kile loulai ahi, ati. Catholic School Canchipur chule Catholic School adang jouse hi Bishop House noiya um ahi’in, Bishop House in Father Sony Thomas hi avel vel a school a kon lahdoh ding agot ahi. Nu-le-pa, guardian chule Van Drivers Association in kiphinna sangtah abol jeh a Father Thomas in Catholic School Canchipur a Principal panmun atuh nading term ni kum ni kisuhsao be ahi, tin aseibe in ahi.

School a Father pa ahung kile kit tahlou na’a hi Bishop House in pan alah ahiding school simlai khat apa Biramani in atahsanna thu aseiyin chule Bishop House chunga tahsan alhahsamna thu jong aseiyin ahi. Tulha nisim 24 nikho teng 2nd terminal exam kipan ding ahitan Bishop House in terminal exam chule HSLC exam bol ding a simlai ho vettup dinga Principal ahin sol peh kit diuvin temna aneibe in ahi. Phat sottah school a head of institution aumlou hi system lhahsamna ahi, tin jong aseiyin ahi.

Principal pa pachatna thu aseiyin, kum masa a sanga Father Thomas phat sunga school thilbol doh hi hatah a machal a hoi ahi, tin aseiyin chule Principal Father Sony Thomas ahin sol peh kit louvu leh 2nd terminal exam kipan July 24 jouteng school kikhah ding ahi, tin Bishop House gihna aneibe uvin ahi.

CCpur Police hon khopi sung’a khamnathei doudal nading’a drive bol jing

B.Lalboi Gangte

CCpur. July 17 (ET) : CCpur Police in District sung’a cheng mipi te hoina ding’a natoh anei’u asut jom jing utoh lhon in achesa June nisim 15 nikhon  Shivanand Surve IPS SDPO/CCpur lamkai na in New Bazar kimvel kholchil na ananei nao’a ju anamatdoh hou  tunin Mini Secretariat campus, Tuibong mun’a Nobin MPS Addl. SP (Operations), Chiinneilam Gangte, OC/Women Police station, police personnel holeh  Joint Women Organisation, CCpur apat lamkai ho jao naleh thusoh miho mai’a anasuse uvin ahi.

Suhset aum ju ho chu Old Monk Rum, OC whiskey, Romanov, VAT 69, Blenders Pride, Royal Stag, MC Rum, 100 Piper, Signatures, Teachers, Kingfisher Beer, Turborg, Diablo leh Local ju ho ahi.

Hiche  toh lhon’a N. Nobin Singh MPS Addl. SP/CCpur in aseina’a jalhang’a khangdong  ho ding’a pha lou ju leh khamnathei ho koima in ajoh talou ding in temna aneiyin ahi. Chule maban’a jong hitobang jalhang set nathei ding khamnathei chom chom ho District Police in drive anei jing ding’u ahidan jong aphongdoh in ahi. CCpur Joint Women Organisation akon’a  JL. Sawmi in CCpur Police in mipi te hoi nading dei na’a khamnathei doudal’a drive anei naochung’a akipa nao aphongdoh in chule maban ajong  tosot apeh jing ding in jong aphongdoh in ahi.

KSO Sadar Hills in JNV a alut dinga kilom hobou lut na dinga hetsahna nei 

Kangpokpi, Jul. 17(ET):  Jawahar Navodaya Vidyalaya lut na ding a dan kisem ho jui ahi na dingin Kuki Students Organization Sadar Hills in JNV Kangpokpi alut dinga kilom hobou lut sah dingin hetsah na ahin nei uvin ahi.

Thuso kimu dungjui a JNV dan palkeh a mi tamtah in JNV Kangpokpi a lekha simna ana nei toh lhon a alut ding a lom tamtah ana jao thei lou ahi akiti. Mipi ho in complain ahin nei jing utoh lhon a Kuki Students’ Organization Sadar Hills in hiche thu a kikum na ahin nei toh lhon a JNV lutna ding ahi alut ding dan kipe ho mijousen phate cha ajui cheh na ding uva kholchil nap hate cha a neiding ahi dan tahlang na ahin nei uvin ahi.

Thangminlen Kipgen, President KSO Sadar Hills in thuso miho toh akihou limna a tu chung in simlai 4 JNV dan palkeh a lut akiman doh in, themjil na mun certificate semthu a simlai ho hinpe school ho jong akikou in, hiche ho hi evidence um a phate cha a video record bol pum a kibol ahi ati. KSO Sadar Hills in ZEO le school lamkai hotoh ZEO Kangpokpi office mun a kihou limna ana umtoh lhon a mona nei school ho in adih loud an u jong tahlang na ana nei uvin ahi akiti.

President pa in asei na school dan dungjui a JNV lut thei ding simlai chun Kangpokpi district sunga recognised school khat a class 5 achai tei tei ngai ahi in, hiche simlai 4 hochun Kangpokpi District sunga lekha simna ana nei pouvin, certificate ana kisem thu uvin ahi ati. Certificate semthu simlai ho hinpe a JNV a lut thei dinga ana kibol sah school hochu Manger English School, Kangchup Chingkhong, L.N. Memorial Academy, Kangpokpi, Khongbal Tangkhul Govt. Jr. High School le Shishumilan Primary School, Purum Khullen ahiu vin ahi. KSO in JNV Kangpokpi a kum khat a simlai 80 lah na dinga 40 bou kilah jing na chunga nop mo asah dan u jong tahlang na ahin nei uvin ahi.

Neihsial veng’a Houbung thu’a boina ana um jing thu’a chamna kisem; Vengsung mopoh na nei jousen anopnao soikai

B. Lalboi Gangte

Ccpur, July 17(ET): Churachandpur District hopsung Neihsial vengsung’a achesa nikho phabep sung’a Houbung thu’a kho chaga ho kikah’a kibung khenna naleh thagum kiso tona tamtah vei ana sodoh jou nung in Kuki Inpi Churachandpur (KIC) in veng sung damna ding leh chamna aum thei na ding in Local Church a kipo ding leh vengsung’a houbung dang um lou ding’a thutan na anasem utoh lhon’a vengsung mipi hon kinop tona ananei uvin ahi.

Ahin phat chomkhat jou in vengsung mipi kimkhat in thutan kisem jui louva Manipur Presbyterian Church Synod (MPCS) houbung tundoh tei ding  tia pan analah jing jeh uva vengsung’a boina anasoh doh ahi. Thilsoh chung thu’a tuni nilhah lam nidan 2:00 in Kuki Inpi Churachandpur, Office, KKL Complex mun’a thutan lhah naleh cham na semna ananei uvin ahi.

Hetthei khat chu KIC hin achesa May nisim 10, 2018 nikho’a Neihsial veng thu’a thutan na (Judgment Order) ananei chu insung phabep in Local Church pom deh lou’a MPCS Hou-inn phudoh tei ding ana gong jing hon tunin Kuki Inpi thutan na apom’u vetsah na’a vohchal tuh-nga val anatha uva ann-kong anasem utoh lhon’a KIC in Neihsial veng leh Houbung dam ding dei na jal in thugah na jong anasem uvin ahi. Chuleh thu-gah na kisem ho chengse chu ankong sem holeh vengsung haosa leh semang pachong hon jong hetpeh na ananei uvin ahi.

Hiche thu’a KIC in Neihsial vengsung mipi te ding’a thu-gah na anasem peh chu achesa May nisim 10, 2018 nikho’a KIC in thutan na ananei bang’a Neihsial veng hopsung’a koiman Hou-inn thah atun doh talou din’a phatsah naleh  Local Church a um cheh ding’a jong phatsah ahitoh lhon’a Houbung Lamkai athah a akilheng ding uvin jong asei in ahi. Chule tuni’a pat Houbung sung’a loitum hin sem jeh’a Houbung kivaipoh na’a boi ahung um kit le hiche’a loithum sem’a pang lamkai mopoh nanei pen pen chun mopoh naleh thepmo na jouse akipoh ding, phat che dungjui’a  Houbung mipi ten Local Church Mission chom’a khel ding ti’a lunggel anei’u jong leh mipi kilungto nabang’a khelmo hilou ding, Neihsial veng leh Houbung kivaipoh ding dan hi Village Authority hon vengsung kivaipoh na Administration, Custom, Development chuleh vengsung toh kisam kai najouse avet tup ding chuleh Houbung thutoh kisam kai jouse Local Church Committee in avet tup ding, Neihsial veng Houbung in kivai hopna sung’a thunoh baotam aum khah leh vengsung Haosa leh Semang Pachong ahetsah ding, vengsung haosa hetpeh nalouva Houbung thu mun dang’a koiman apohdoh theilou ding, Neihsial veng demarcation / boundary hopsung’a cheng jousen vengsung kivaipoh na daan ho jouse ajui cheh ding ahin vengsung kivaipoh na daan ho juinom lou leh jabol lou aum leh khosung adalhah ding, Neihsial veng Houbung mite jousen (Local Church) kihoutoh naleh kilungtona aum tilouva koiman MPCS leh EOC anung boipi tah lou ding chuleh tua Hou inn dia ana kigong boina mun ajong koima kimoh kum lut lou din in phatsah na ananei utoh lhon’a jui cheh ding in anopnao soikai najong ananei uvin ahi.  Hiche thugah na hetpeh na nei ding in Samuel Haokip Home Secretary KNO, Khaikam Khongsai C-in-C KNO/KLA chuleh Kuki CSO akon KKL-GHQ President Kamthang Haokip, L.Haopu Haokip KSO-CCpur leh Kuki Chief Association President hon jong soikai na ananei uvin ahi. Chuleh hiche phatsung in Observer ding in Francis  Songate Secretary Hmar Inpui GHQ anapang in ahi.

Alangkhat’a KNO Home Secretary Samuel Haokip in houlimna aneina’a Neihsial veng sung’a boina sohdoh hi society sung’a kichang chi sahna aum jeh ahi. Hiche thilsoh hi jachat umtah ahi in ipi houbung in um jong leu chun ihoupao Pathen achom deh pon hitobang Houbung  thu’a boina ho anung so kit tah lou ding in temna anei in ahi. Chuleh Neihsial veng ho Kuki a hunglut’a na kigel uleh dih lou ding ahi in ibon uva (Vaiphei, Gangte, Hmar, Simte, Zou, Zomi) Kuki ihi soh kei uvin ahi. Neihsial ho kuki noi’a na um ding’u hilou Kuki nahi’u ahi in tu’a kicham na soi nakai’u hi maban’a hiche kinopto na chamna hi um dan jing ding Saa in akho nung athi pi ahi in ahin mihem in vang akam athi pe ahi ti asuhmillou ding uvin tilkhou na jong anei in ahi.