Thusoh chom chom

Thusoh chom chom

298
0
SHARE

Minister Biswajit in RD&PR scheme velvetna nei; MNREGS phatah a chepi ding a official ho thuhilna nei

Imphal, July 16 (ET): Rural Development and Panchayati Raj Minister Thongam Biswajit Singh in Tuesday nikhon 100 man-days aganna thei pen a boldoh nadinga gamsunga MGNREGS kichepi department official hon phatah a aboipi diuvin thuhilna aneiyin ahi.

Conference hall, New secretariat office mun a Department noiya scheme chom chom kichepi ho velvetna a Minister pa lamkaina a meeting abol nauva Biswajit in scheme athupi dan saotah a aseiyin, tohmun neilou thinglhang a cheng khangthah ho natoh pehna ding ahijeh a thupi ahi, ati. District Programme Coordinator leh District Commission hon July nisim 31 masang a ‘website’ a 30 man-days estimate upload abol diuvin thuhilna aneiyin ahi. Chule district-wise official ho dinga angaicha training aganna thei pen a bol dinga aseiyin, official hon card neiho lah a alhem um em ti akhol uva alhem aumleh min akah diu chule adihtah hobou sum apeh diuvin jong thuhilna aneiyin ahi.

Twi khol them angaidan thu chule gamsung mihon pupa khanga achepi twi akhol tup dan u lampi ajui diuvin Biswajit injong aseiyin ahi. Kihouna a mopohna nei official hon Jal Shakti Abhiyan hi Chandel leh Senapati district a twi hahna block 6 (district teni a kon block thum cheh) a kichepi ahi thu asei uvin, July lha kipat til a kon tukum September nisim 15 chan chelha ding ahi, tin asei uvin ahi.

Ama ama DC hon MLA Local Area Development Fund kiman dan hetna anei diuvin Bishwajit in aseibe in ahi. Gamsung a PMAY-G kichepi thu a mopohna nei hon state target molso nading chule beneficiary registration atam nadinga pan alah diuvin thuhilna aneiyin ahi. Principal Secretary MH Khan in DPC leh DC hohi scheme lolhingtah a akichepi nadinga stakeholder lentah ahiuvin, scheme thu mipi in ahetna ding chule akichepi hi amaho mopohna ahi, ati. Meeting a DC, DPC ho, Deputy Secretary RD & PR, Director RD & PR chule department official dang dang jong apang uvin ahi.

Indo-NSCN-IM in ‘Framework Agreement’ asem thuchen seidoh thei ahihih laiye tia Home Minister in sei

Imphal, July 16(ET): Kum somni val kihouna achelhah nunga jong National Socialist Council of Nagalim (IM) leh India sorkar in ‘politics’ thu seilhah nadinga kinoptona asem doh thei nai pouvin ahi.

Union Minister of State for Home Affairs G Kishan Reddy in, achesa August 2015 kum a India sorkar leh NSCN-IM in ‘Framework Agreement’ asem thuchen seidoh ding nading phat alhing naipoi, tin aseiyin ahi. MP Manish Tiwari in Parliament a kihouna a thudoh anei Reddy in Tuesday nikho a jihtho a donbutna apeh ahi’in, ahivanga naga Political Negotiation hi ‘advanced stage’ hinalai ahi, ati.

Manish Tiwari in thudoh aneina a August 2015 a Framework Agreement a thuchen ho ipiham tia dohna aneiya chule Pan-Naga Cultural body a dinga sorkar in Naga Flag chule March 5, 2019 ni a Section of Press a ‘Naga Constitution’ tia report thu jong dohna anei ahi.

Pan Naga Cultural Body a dinga Naga ponlap (flag)  chule constitution achom hiding ham ti thudoh Union Home Minister in donbutna aneipon, ahin, chingthei tah in athu seidoh nathei phat avat nalaiye, tin adonbut in ahi. Thuso a kipe dungjuiya NSCN-IM leh India sorkar in kinoptona point 8 anei thu kisei hi atah ahipoi tia jong seithei hiloulai ahi. Thuso dungjuiya kinoptona soi akai nauva Nagaland dinga constitution chom, flag chom, Naga passport chom, Permanent UN Representative, Joint Foreign Affairs, Joint Defence/Military, Currency Rupees (Naga currency man thei nading rights) chule Naga chenna gam jouse a Pan Naga Government thu pang ahi. Union Home Minister in thuso a kipe hohi jouthu ahi tia asei loujeh a Framework Agreement a hiche point 8 apang’e tia thuso a report umhi atah jong himaithei ahi.

CCpur Dist. sung’a Dengue le JE natna vei kimudoh; Malaria Dept. in Fogging kap panta

B.Lalboi Gangte

Ccpur, July 16(ET):  Churachandpur District hopsung’a thoukang akipat natna kiveithei Dengue leh Japanese Encephalitis hit toh kisaiyin tuni chan’a CCpur khopi sung leh akimvel ho’a khosih natna vei mi 2 alhing tan ahi. Dengue leh JE vei mudoh aum holah’a Dengue case 2 aum in chule JE case 1 ahi. District Malaria Office in hiche natna suhbei na ding in tuni akon chun veng chom chom “Fogging” thoukang thina ding meikhu anakap pan tauvin ahi. Hiche natoh phatsung in Malaria Department akon Lalramzauva AMO, S. Lianbiakthang DEO/Office Asst, Ruolchunghnung MHW, K. Ginzahau FW leh Seitinpao Peon in pan anala uvin ahi.

Hiche toh lhon’a Malaria Department in hiche Fogging kapna natoh apat uhi vadung toh kinai cha’a um kho le veng ho apan masa uvin ahi. Vadung twi kikhol namun pi ho’a hi thoukang tam namun ahi jeh in gelkhoh na ananei masapen uvin ahi.

D Thamnok thilong kikoina coffin kimudoh; thilong mudoh hilou lai

Chandel, July 16(ET): Lamkang kho haosapu anahi aumtalou D Thamnok long kikoina coffin Tuesday nikhon amudoh tauvin ahi.

Thulhut dungjuiya coffin hi Challong kho lhanmol leh Vomku kho kikah a kimudoh ahi’in, gu leh phe phabep jong akimudoh in ahivanga thilong abon a kimu loulai ahi. Thilong akimu kahse a LCA in kiphinna abol jom ding ahi, tin thulhut in aseibe in ahi. Tu dinmun a LCA in maban a pan lahding dan thulhuhna anei loulai ahi. Hetthei khat chu Challong kho haosapu anahi D Thamnok (h/o SK Shomlun hi achesa May 20 ni a kivui ahi’in, akivuina lhan hi mel hetlou hon June 15 ni a alaidoh jou uva meiya ahal u ahi’in, hiche a kon thilong leh thilong kikoina kong kiholmo a, tuni a kong kimudoh ahi.

Power Department in ‘promotion process’ a ST&SC candidate dinga 31% reservation akoipeh diuva ATRPFM in sei

Imphal, July 16(ET): OM dan dungjuiya Power Department (MSPDCL & MSPDCL), Manipur a promotion dinga SC & ST quota akikoi kahse a DPC process khongai dinga ATRPFM in asei uvin ahi.

James Haokip, General Secretary, ATRPFM in soi akaina thuso a chun point chom chom ape in, ‘direct recruitment leh promotion a appointment’ hi Manipur Reservation of Vacancies in Posts and Services (for Scheduled Caste and Scheduled Tribes) Rules, 2000 in amopoh ahi’in, Power Department hi gamsunga MSPDCL leh MSPCL a kikhen a MSPDCL leh MSPCL ani a 31% hi ST a ahi, tin aseiyin ahi. Power Department teni a ST representation lhomcha bou ahi’in, reservation rule phatah a akijui louva ahileh akhantou society leh alhasam ho kah a kibahna umlou ding ahi. Section Officer Grade-I (Elect) 42 hi Electricity Department a nisim 27, February 2018 kum a promotion a Assistant Engineer post a appointment kipe ahi’in, hiche a hi ST officer khatcha panglou chule General 40 leh SC officer 2 pang ahi. Hiche hi 200 roster point kipalkehna ahi’in, dan dungjuiya post 42 a 31% hi ST officer ho pehding ahi vanga apeh louvu ahi, ati.

Rule 6(b) dungjuiya vacancy hohi candidate (zone sunga) alhahsam jeh a akilah louleh akisei zone hi Department of Personnel, Manipur government in apeh dan dungjuiya kehletna umding ahi. Ahivanga hiche phatchomna jong ST officer hon amu dehlou ahi’in, nam len hon post ong 42 abon a akilah u ahi. Power Department a Assistant Engineer (ST) dinga backlog vacancy um ahi’in, ST inbou hiche backlog vacancy ho alah ding ahi.

Promotion, reservation leh SC/ST concession dang dang a Rules and Procedure hohi khoutah a juiding chule vettup jing ding ahi. Member jouse khantou nading ahi’in, 31% reservation hi khoutah a chepi ding ahi. Chule roster phatah a jui tei ngai ahi, tin ATRPFM thuso chun aseibe in ahi. 200 Point Model Roster, Manipur Reservation of the Vacancies in Post and Services (SC & ST) Rulls, 2011 a reserved seat ho kilahdoh ding hi ‘ban’ kibol ahi. Reserved seat ho general in aloding kiphal lou ahi.

ST/ST dinga reserved kibol post hohi ST/SC officer inbou alo ding ahi’in, ama zone sunga aumlou leh ajat nga a kehlet ding ahi. Hiche hi state in alahding mopohna ahi’in, Article 335 a kipe ahi. Dan a akisei vanga Power Department panna a department phabep in akipe SC & ST reservation thu a dan kisem ho gelkhohna aneilou ahi. Lhahsamna hi authority honjong ahet ahi’in, dan dungjuiya 31% reservation hiding ahivanga atah a 31% nai lam a umlou ahi, tin thuso chun aseiyin ahi.

Hiche jeh a mopohna nei authority hon system asemtoh dinga ATRPFM in ngehna anei ahi’in, Department a appointing authority ho henga 31% ST&SC reservation jui dinga thupehna aumleh kipapi umtah hiding ahi, tin thuso chun aseibe in ahi.

Themjilna hi society kingapna ahin govt in themjilna akhohpen in akikoiye: CM Biren

Imphal, July 16(ET): Department of Education (Schools) leh Board of Secondary Education, Manipur (BOSEM) in Chief Minister Chief Guest hina a City Convention Centre, Palace Compound, Imphal East a Tuesday nikhon 2018-19 kum a dinga ‘Annual prize distribution ceremony’ agong uvin ahi.

Education Minister Th Radheshyam, Joint Secretaries (Education-S) L Nandakumar chule Ng Roben leh BOSEM Secretary Chithung Mary Thomas jin a apang uvin ahi. Agom a award 209 ahom uvin, hiche lah a award 125 hi BOSEM noiya hiya chule adang 84 hi Department of Education (S) in apeh ahi. N Biren Singh in ahoulimna a themjilna hi society kingaina ahi, tin aseiyin chule chapang ho themjilna pha pehding hi talent semna lampi ahi, ati.

Achesa kum ni sunga school education sector a machalna lentah aumin, chule HSLC a pass percentage hi 74.69 lhing ahi’in, BOSEM kisemdoh 1972 kum a kon atam pen na ahi. Hiche hi pontho tah a pang a jilkung ho jal ahi, tin jong aseiyin ahi. Private school a sum tamtah lut ahitah jeh a achate private school a sol nom a nu-le-pa tamtah in Meeyamgi Numit ni a sum le pai a kithopina athum uvin, insung hahsa dinga pohgih lentah ahi, ati. Hiche boina suhlhap nadinga state sorkar in ‘School Fagathansi’ mission hondohna anei ahi’in, simlai ho themjilna pha/hoi peh ding tupna um ahi, tin aseiyin ahi.

Assembly constituency 60 a kon school khat cheh kilhengdoh a ‘model school’ a kisem ding, hiche school hoa hi private school a um facility jouse, smart class, computer lab, open gym, numei leh pasal toilet chom chom, manchah thah thah ho kikoi ding ahi. Hiche a dinga state budget a dangka crore 24 kisem ahi’in, adang crore 19 hi Centre sorkar in hiche mission a dinga sanction abol ahitai, tin aseibe in ahi. Government teacher kitahna neiya chule kitilkhouna neiya tamtah in hiche school mun ho a posting dinga apply abol ahi’in, interview ho akijo teng posting kiphong doh ding ahi. Chule hiche school jouse a Pre-Primary a kon Class X ahilouleh XII chan umding ahi, ati. Sorkar in private school ho achouna ahipon, insung hahsa honjong themjilna ahoipen aneiding akhohsah ahi, tin aseibe in ahi.

Education Minister Th Radheshyam in ahoulimna a mipin government school ho khat a sem dinga tu naicha tohgon anei atosot diuvin temna aneiyin ahi. Government school tamtah um a, jilkung tamtah um ahi’in, ahivanga simlai lhomcha um a chule school phabep a simlai tam a jilkung lhasam ahi. Hiche jeh a school ho akikoikhom a ahileh hiche boina kisulham theiding ahi, tihi sorkar in tahsanna anei ahi, ati.

Private school kisep cheh cheh chule adih louva kitetna aumhi thilpha ahipoi, tin Minister pa in aseiyin, private school ho vetsui nadinga Manipur Private School (Registration and Regulation)Act, 2017 kichepi vah ding ahi, ati. Chule mipin themjilna akhantou nadinga ngaidan aseikhom diuvin aseibe in ahi. Hetthei khat chu Education Department Incentive award scheme noiya state sorkar in HSLC exam a 1st a kon 3rd position a pang government school a simlai ho dangka lakh thum kipaman peh dinga anaphon ahi. 1 a kon 25 position a pang ho dangka lakh khat  chule district level a 1st leh 2nd position a pang simlai ho dangka 50,000 leh 25,000 peh dinga thuphon anei ahi.

Govt. in adoi pipen chu natoh pha bol ho kipapi ding aphalou bol ho gotna peh ding hi ahi, ti’a CM N. Biren in sei
Imphal, July 16 (ET) : Tunin 1st MR Banquet Hall mun’a Manipur Police hon gamsung’a khamnathei amat hotoh kisai’a kingon ana kiman na’a Chief Minister N. Biren in Government mopoh naleh bidoi hi natoh pha bol ho kipapi leh phatsei ding chuleh aphalou bol ho gotna peh ding ahi tin anaseiyin ahi.
Kingon achun Forest Minister Th Shyamkumar, Consumer Affairs Minister Karam Shyam, MLA Dr. S Ranjan, L Radhakishore, S Bira, S Rajen, Khasim Vashum, Chief Secretary, DGP, police leh civil department a lamkai luboh hon jong pan anala uvin. Chule SP NAB, W Basu, Additional SP Th Brinda, Additional SP (Operation) Thoubal District Police Sachidananda Soibam, OC NAB, B Rishikesh Sharma, Police Officer 13, Head Constable 16 leh Constable 28 ho heng’a Dk. Lakh 10 leh certificate pehdoh na ananei uvin ahi.
Hetthei khat chu achesa June nisim 29 nikho nin Narcotics Affairs of Border leh Thoubal District Police hon Lilong Dam kom’a um brown sugar factory khat akon Dk. Crore 100 vel man ding khamnathei anamatdoh’u ahi.
Hiche toh lhon’a Chief Minister N. Biren in aseibena’a BJP Government hin kum 2 valjep vai ahin hop akipat gamsung’a khamnathei doudal nading in pan nasatah’a pan hung kila jing jong leh mipite kithopina pang louva imacha kiboldoh jou lou ding ahi ati. Chule Government in adoi pipen hi mipi hotoh pan lahkhom ding ti ahi toh lhon’a hiche na ding’a Home Department a official holeh staff hon mipite toh kigui jopna phate’a asem ding uvin jong asei in ahi. Alangkhat’a Lilong mun’a kimandoh khamnathei jong hi mipite kithopi najal jong ahi. Manipur gamsung’a khamnathei suhmang na ding’a Police personnel hon sihnei langnei chuleh kichom bol tiho abol lou ding’u chuleh numei le chapang ho chung’a khanset na neiho ding in Fast Track Court jong akihongdoh in chutima bang in khamnathei a kivei holeh ane ho’a ding in NDPS Fast Track Court hondoh ding in kihoukhom na jong akinei jing in ahi tinjong aseibei.
Kingon phatsung’a DGP LM Khaute in aseina’a phat sottah akon gamsung’a Manipur Police leh security force hon khamnathei’a kivei holeh ane ho ana doudal jing uvin ahi. Khamnathei joh leh ane phabep akimatdoh naban in kum 2 sung in Kaa-ni leh Ganja a kivei mi phabep jong ana kimandoh in ahi ati. Chuleh Centre injong akinthei pen’a Manipur a NCB Zonal Level khat semdoh ahi nading’a thupeh aneitoh lhon in khamnathei joh leh ane ho case chelhah sung’a police personnel hon sihnei langnei na abol lou ding uvin jong Forest Minister Th Shyamkumar chun aseiyin ahi.