Thusoh chom chom

Thusoh chom chom

345
0
SHARE

People’s Day leh Hills Leaders’ Day kimang; Gamsung mite huhbitna ding’a Manipur in NRC kichepi ding ahi tai Chief Minister N Biren  in sei

Imphal, July 15(ET): Central Government in Manipur a National Register of Citizens (NRC) chepi ding’in thupeh ahin neiyin Assam state in NRC achepi jouvin Nagaland Government in Registration of Indigenous Inhabitants of Nagaland ahin podoh in, chutima bang’a Manipur Population Commission kisem ding agam mite huhbitna dia NRC kichepi ding ahi tin Chief Minister Biren in aseiyin ahi. Hiche thu hi tuni People’s Day leh Hills Leaders’ Day kimanna ah asei ahi.

Chief Minister N. Biren in aseibena ah gamsung political boina ho suhlhap tobang ahitan, Delhi khopi a lamkai kikhelna dia khosa MLA hojong innlang ahung kinungle sohkei tauvin, ama ma Constituency cheh ah khantou machal natoh hojong aboipi pan tauve ati. Cabinet lamkai kikhelna hi Centre lang’a thupeh ahung tengleh bou umding ahi tin aseikit’e. Alangkhat a Border Pillar chungchang aseina ah Chief Minister pan itinama jongleh Government hi mipite deisah kalval a chon louding ahi ati. Border Pillar thu suhfelna ding’in Myanmar official hotoh joint-survey akibol khom in, chuleh boina leh dohnom aum tengleh government official hon border a um kho haosa ho akijahmatpi jing uve atin ahi.

Chief Ministers’ Secretariat mun a Monday nikho a Meeyamgi Numit leh Hill Leader’s Day kiman khom na a government scheme ho thinglhang gamlha tah alhun nadinga media in pan thupi tah anei ahi, tin aseiyin ahi.

Chief Minister in thuso miho akimupi na’a gamsung abon a akhantou nadinga media hon sorkar atosot diuvin temna aneiyin ahi. ‘War against Drugs’ campaign boina tu naicha Narcotics and Affairs of Border (NAB) leh police hon Brown Sugar kisemna factory khat amatdoh uva, international market a dangka crore 100 val man hiding khamnathei tamtah amat u ahi, ati. Hiche a pan la a police leh NAB personnel hohi Independence Day 2019 teng hetpehna kinei ding ahi, ati.

Amaho hin anatoh phat jeh uva Chief Minister’s Commendation Award asan diu ahi, tin CM in aseiyin chule sorkar in team ho Tuesday nikho teng kipapina kin aman peh ding chule team ho kipaman dangka lakh som apeh ding ahi, ati. Gamsung a go ajuh pan toh kilhon a loubol miho dinga lungmonna aum tai, tin aseiyin chule phailei a twi aumna dinga sorkar in abol thei chan abol ahi, ati.

Tu naicha loubol miho twi chopna pump tamtah kipedoh ahi’in, chule twi lahna dinga River Lift Irrigation (RLI) scheme chom chom jong kipan ahitai. Sorkar in phailei a twi aumlou jeh a boina ho suhlhap nadinga Irrigation pump set lahbe ding agot ahi. Kin gon a Chief Minister in Kakching district noiya um Wangoo a kon loubolmi Mayengbam Shyamchandra Meitei dangka lakh 7 loan cheque ape in, loan hi Manipur State Co-operative Bank in apeh ahi.

Chief Minister in jingkah nidan 9 a kon nilhah nidan 2.30 sung a mi 1200 nailam akimupi in, hehna 400 vel angailha in ahi. Principal Secretary (Health) leh Nodal Officer, Meeyamgi Numit Vumlunmang Vualnam, Commissioner (Planning) leh OSD to CM Sumant Singh, Secretary to N. Geoffrey, IG (Adm) I.K. Muivah leh government official dang dang in mipi boina thu kiseikhom na a Chief Minister kithopina anei uvin ahi. Health, Minority, Other Backward Classes and Scheduled Castes, Social Welfare (S), SBI, Manipur State Co-operative Bank Ltd leh Police department a kon official hojong CM Secretariat complex a aum uvin, pan ala uvin ahi.

Thilong kiguhmang thu a police hon ginmo mikhat man; LCA in phat teplou bandh akou ladoh, kiphina boljom dia sei

Thoubal, July 15(ET): Challong kho haosapu anahi D Thamnok Lamkang kivuina lhan a kon coffin kiguhna a alamkai hidinga ginmo mikhat police hon amat jouva Lamkang Chiefs Association (LCA) Chandel in National Highway 102 jui Imphal-Moreh lamlen a phat teplou bandh akoi aladoh tauvin, ahin, kiphinna kibol jom ding ahi, tin aseibe uvin ahi.

D Thamnok in achesa May nisim 18 ni a thi ahi. Tengnoupal Police station SP Th Vikramjit in thuso miho akihoupina’a, June 19 ni a aumtalou D Thamnok Lamkang ajinu Sk Shomlun in lhan a kon ajipa thilong kikoina coffin akigudoh e tia hehna akimu jouva Tengnoupal district police hon case ajihlut a thukholna apat ahi, tin aseiyin ahi. “Thukholna akinei sunga police hon thilse bol lamkai khat Sunday nikho a amat ahi”, tin Vikramjit in aseiyin chule akiholmo D Thamnok thilong akimudoh vah ding akinepna thu jong aseiyin ahi.

Thilong kikoi nadinga ginmo namun ho a operation kibol ahi, ati. Police hon thu asuhlhap vah ding dinmun ahitoh kilhon a Lamkang Chief Association in bandh alahdoh diuvin Tengnoupal SP in ngehna aneiyin ahi. SP Tengnoupal toh akimuto jouva LCA chief spokesperson Peter Lamkang in thuso miho akimupi in, SP leh district administration in ngehna anei toh kilhon a police hon thukholna aneijom thei nadinga LCA in phat teplou bandh abol lahdoh dinga thulhuhna anei ahi, ati.

Ahivanga Challong kho haosapu anahi Thamnok thilong akimu kahse a association in lamlen pam a toumun kiphinna abol jom ding ahi, ati. Chule thilong akimu louleh phat teplou bandh bol kit dinga jong gihna aneiyin ahi. Hetthei khat chu Thamnok in May nisim 18 ni a Riverlane kho, Chandel district a thi ahi’in, athi a kum 90 lhing ahitai. Amahin kum 40 val Lamkang Anal nam miho lah a na atoh a chule May 20 nilhah a Challong Village Cemetary a thi vuina kin aneiyu ahi.

June 15 ni a ajinu lhan a ajipa lhan vil a ache leh lhan kilaidoh sa amu a coffin aumlou ahetdoh ahi. Sk Shomlun (ajinu) in khosung miho athu ahetsah jouva nasatah a ahol uva, June 19 ni a police station a hehna asem uva FIR kijihlut ahi. Coffin kiguhdoh na a pan laho amat diuva CSO chom chom in thumna aneiya June 26 ni a Imphal-Moreh lamlen leh Pallel Chandel lamlen a phat teplou bandh akouvu ahi’in, authority hon kitepna aneijeh a bandh ana lahdoh kit u ahi.

Alangkhat a Thamnok thilong kiholmo thu a police hon amat TS Kanhring (41) paneo in police hon alhadoh diuvin ngehna aneiyin ahi. Kanhring hi New PWD quarter, Chandel a cheng ahi. “Kanhring hi ajinu thi jouva kon alunggel chamkim lou ahi”, tin apate TS Welson in thuso miho henga aseiyin, alhadoh diuvin ngehna jong aneiyin ahi.

Bandh chun Imphal-Moreh leh Pallel-Chandel lamlen gei a cheng khomite kimanchahna jong hatah asuboiyin ahi. Bandh toson hon bandh chelhah sung chun mun phabep ah lamlen ating uvin, police honjong deilou thilsoh imacha aumlouna teiding’in muntin gahtah in avengbit uvin ahi.

Govt. School Chapang lhom na ho gopkhom ding’a Education Dept. in Order sodoh

B. Lalboi Gangte

Ccpur, July 15(ET) : Manipur Education Department in phaitol leh thinglhang gam ho’a Govt. School kimkhat Students neilhom ho gopkhomna nei ding’a agong utoh lhon’a hiche nading’a order jong akisodoh tan ahi.

Hiche School gop khom ding hochu Churachandpur District ah Vimala Raina High School leh New Bazar Jr High School; Lanva Model High School leh Pangjol Primary School, Chongchin Upper Primary School; Tohpa Kabui Jr. High School leh Louchuibung Lower Primary School; New Dampi Primary School leh Lhangnomphai Lower  Primary School chuleh  Pherzawl District ah Hanship Govenment High School leh Hanship Primary School; Leijangphai High School leh Tuikumuallum Upper Primary School chule Dr. Thuoma High School leh  Ai-englon Primary School gokhom ding in tohgon aum in ahi.

Numei ho sagoh keuva akiphinna nikho geldohna ‘Anti Repression Day’ kinit

Imphal, July 15(ET): Monday nikhoa chun Imphal sunga  Armed Forces (Special) Powers Act lahdohna dinga kiphinna ana kinei geldohna “Anti Repression Day” Imphal munna ana kimang e.

 Rape akibol jouva numei chapang Thangjam Manorama kithana chunga kiphinna a 2004 kum a tunikhoa hi, numei(elderly) mi 12 tobang in Assam Rifles ho headquarters, Imphal a Kangla Fort Western gate a sun nisah vah noichang in sagoh keuva kiphinna ana nei uve.

Hiche kiphinna hi counter insurgency operation min’a July 11,2004 kum a Imphal East sunga Thangjam Manorama rape abol jou uva Assam Rifles hon apuimang uva akaplih dan uva kingohna jouva hungsoh ahi.

Nupi hon kiphinna anei naova chun, “Indian Army rape neibol uvin,” “nei that uvin,” “kabon uva Manorama nu kahiuve,” tin kholhang ana sam uve.

Hiche nikho hi  Observation Committee of Anti Repression Day hon hiche kum apatna chu Anti Repression Day tia anit u ahitai. Tukum in, hiche nikho hi Imphal sunga Lamyanba Sanglen munna akimang e.

Observation Committee a Convenor P Sobita in Manipur thusim geldohsahna aneije. “India to akimat jouva pat Manipur hi socially, economically a dependent state in a ummin, government in human rights chom chom asukeh jinge,” tin ngohna aneije.  Hiche draconian law AFSPA, 1958 hi Counter Insurgency movement min a Central Government in Manipur sunga akoilut ahi.

AFSPA lim noiya security forces hon khansetna natoh aneina ho’u ahilchetna a, Vannoiya human rights hon hiche hi adoudal uvin chule hiche Act akisuhlhapna din ngehna anei uve ati.

Hiche Dan noiya hin, Manipur sunga 1980 kum in akikoilut in mipi asang a sim asukha tai.

“Kiphinna kijom a akinei jeng vangin, AFSPA hi aki sulham hihlaije,” tin amanu chun aseitha’ in, AFSPA douna a hi kipumkhat tah a panlahkhom angaije ati.

Kin kimanna a jao Human Rights Alert(HRA) a Executive Director Babloo Loitangbam in aseina a state sunga human rights kisuhkehna ho doudalna in numei hon panlahna khohtah anei uve ati.

“Government in akoi AFSPA douna a amasang in ading jing jeng uve,” tin Babloo in aseije. Hiche Act doudalna a movement thahpat angaidan jong aseibe e. Alangkhatna, hiche nikho kinitna achun Souvenir “Road to defiance anti-repression day” jong aki sodoh ahi.

ATRPFM in TA&Hills Director khel dinga avel a sorkar henga ngehna nei kit

Imphal, July 15: All Tribal Rights’ Protection Forum Manipur (ATRPFM) in achesa July nisim 8 ni a Chief Secretary (DP), Manipur government in TA&Hills Department a director dinga non-tribal khat ‘transfer and posting’ order aso thu alahdoh diuva avel a state sorkar henga ngehna leh thumna anei kit uvin ahi.

Joseph Rongmei, President, ATRPFM in thuso aneina a nam thu ahipon, TA&Hills hin Tribal Research Institute (TRI) kiti tribal ho chon-le-khan, akihetnau research kibolna institute jong amopoh ahijeh ahi, ati. Tribal chondan khandan helouva tribal hilou khat in TA&Hills Department director panmun atuh hi kilom loutah ahi’in, tribal chungchang thu hetgilna angaina mun avettup ding ahi. Athah a transfer hi a Arambam Valentina, IAS douna ima akineipoi, Department ngaichat hi ama toh thei ahipoi, ati. Chule Joint Secretary, TA&Hills jong ahi’in, officer khat in hitobang post thupi tah ni atuhkhom louding ahi, tin asei uvin ahi.

Directo, TA& Hills ‘transfer and posting’ aumjing hin department phatah a akivaipohna atohkhah ahi, ajeh chu Director thah jousen natoh ho ahetlou ahi’in, staff chunga kingam ahi. Director thah hon file chungchang ahet teng ule transfer abolji kit uvin hiche hi department dinga boi ahi. ‘Deputation’ a um officer khat in alhompen a kum ni chule kum 3 chan department a na atoh ding ahi’in, hiche hi kijui lou ahi. Arambam Valentina hi ama dinga pha posting apeh diuvin ATRPFM in temna aneiyin chule ngaichat dungjuiya state sorkar in pan alah dinga temna anei uvin ahi.

Phat ana kipe ahitan, tua hi nithum kingah be kit ding hiche jouteng sorkar in action alah loule kiloikhomna in ama tohgon achepi ding chule state sorkar themmo kichan ding ahi, ati. Chule state sorkar in TA&Hills Department a LDC hia, cheque kilahna a CDA, APR sem a, bill passed bol a chule Engineering Cell a agreement soi kaiya MD Rahimuddin Khan transfer abol diuvin ATRPFM in asei uvin ahi. Achesa kum 20 val CDA natoh kipe ahi’in, tribal hon achunga tahsanna anei tahlou ahi. Ama transfer abol louvu le CDA work allocation hi ama a kon lahdoh ding ahi, tin asei uvin ahi. Cashier, SO, AE leh post dang dang jong tribal hilou officer hon atuh ahi’in, TA&Hills hi ST ho a ding ahijeh a post thupi hohi tribal officer ho peh ding ahi, tin ATRPFM in aseibe in ahi.

KCP –MC in Credit Society Micro Finance Sangakpham ‘ban’ bol; Lamjingba Finance kivaipoh dan khol dinga seiyu

Imphal, July 15(ET):Thingnoi kiloikhom KCP-MC in hehna chom chom akimu jeh a Private Bank thukholna kipan ding ahitai, tin aseiyun, hitobang bank hohin vaicha genthei ho asuhgentheina thu kija ahi, ati.

Party in Credit Society Micro Finance Sangakpham natoh jouse tua pat a ‘ban’ abol ahitai, tin aseiyun chule thuso anei nauva akisei private bank a koiman loan a alah interest apeh louding ahi, ati. Akisei bank a loan interest pe a aumleh party in amaho kom a bank apeh jat sum adon ding ahi, tin thuso chun aseiyin ahi. Party in sum don angah ahitan, bank a sum thumna ima aneipoi. Ahivanga bank director in jouthu chule party minsetna ding thu athethang a thingnoimi hon office agih uve, tia kiloikhomna achou ahi, ati.

KCP-MC in gamsunga um private bank khatcha kouna aneipon chule kihouna aneipi pon ahilouleh private bank ho lekhathot jong apepoi. Credit Society Micro Finance Director Sangakpham hilchahna dinga ‘Ban’ kikoi ahi ajeh chu aman party minsetna ding thu asei ahi. Sum baisa hol a amaho kijahmatpi aumkhah a ahileh amaho hi thingnoi kiloikhomna a pang himong nauvem ti akhol diu ahi, tin KCP-MC thuso chun aseiyin ahi.

Bank Director in ipijeh a party suhminset nading thu aseithang ham ti hilchenna apeh louleh bank a staff jousen haina aneidiu ahi, ati. Private bank hin party achou jeh a kiloikhomna in gamsung mun chom chom a private bank ho kivaipoh dan kholna anei ding ahi. Amasapen a Lamjingba Finance, Lamjingba group kikhol ding ahivanga kivaipoh dan thuchen asodoh nading uva kal khat phat kipe ding ahi, ati. Mi haosa hon asum thenglou (black money) hou Lamjingba Finance a asel uve ti thu KCP-MC in amu ahi’in, hehna thu kimu hi ajou ahilouleh atah himaithei ahi in ahivanga kiloikhomna in Lamjingba Finance kisuhthengna avet ding ahi. Lamjingba Group in suhthengna anei louleh ngohna hohi atah a kilading ahi, tin asei uvin chule KCP-MC in sum athum pon, sum thum hohi alhem ahiuve, tin aseibe uvin ahi.

BJP in policy ho mun jouse alhun nadinga bolthei chan abol ding ahi: Rk Ranjan

Imphal, Jul 15(UNA): Bharatiya Janata Party MP Dr. R.K Ranjan in Prime Minister Narendra Modi thuhilna dungjuiya BJP lamkaina NDA sorkar in gampi mi dinga na atohna politcy program ho akihelou gammi ho heng chan alhun nading a pan alahding ahi, tin aseiyin ahi.

Kongpal Nandeibam Leikai mun a Monday nikho a Ranjan in thuso miho akimupi na’a PM Modi in MP parliamentary board jouse akimupi na’a thuhilna phabep aneiyin, amasapen hi Mahatma Gandhi pen kum 150 lhinna loupitah a manding ahi’in, October nisim 2 nikho teng hiding ahi. Inner Parliamentary constituency a padajatra 150 kigong ding, alhompen a mi 150 in pan alahding ahi. Hiche padajatra a hi twi khol them ding dan thu kiseiding chule MP local area development fund ho gotwi khol them ding, twi kholtup ding, pukhri leh adang dang thu seina a kimang ding ahi, ati.

BJP lamkaina NDA sorkar in ‘transform, reform leh perform’ hi bidoi a anei athupipen thum ahi’in, India thah semding lungtup anei ahi. Anichanna a thuhilna hi tua budget session gamsung pumpi hetsah ding ahi. 17th Lok Sabha election a vote 100 percent lah a 67 percent kipedoh ahi’in, gamsung mihon NDA atosot hi economy khantou ding adeijeh ahi, ati. 2014 kum a NDA in sorkar asem masanga economy dinmun thu aseiyin, 1.5 trillion anahi in, ahivanga NDA lamkaina sorkar noiya kum nga sunga 2.75 trillion a kal ahi. UPA sorkar noiya India economy hi vannoiya dinga 11 channa ahi’in, tua Modi noiya 3 trillion lhing a hatah a kal ahitai, tin Dr Rk Ranjan in aseibe in ahi.

NDA sorkar noiya 5 trillion lhin ding hi lungtup ahi. Kum nga alhin jouva Indian economy hi 6 position a um ahitan, USA leh China toh kinaicha ahitai. Tu budget session hin tohgon (objective) 10 akhohsah ahi’in, Finance Minister injong akhohsah ahi. Digital India, Pollution free India, Earth green, Make in India, Blue economu, satellite programme, healthy India, team India with Janabhakidar, telecommunication leh adang dang pang ahi. NDA sorkar in khatvei kitepna asem leh anatoh a avetsah ahi, tin Ranjan in aseiyin chule tua railway project jong crore 300 a kon 10,000 crore a kal ahitai, ati. Jiribam-Tupul (via Imphal) railway line aganna thei pen a jo ding, Act East Policy machal nadinga Imphal-Moreh railway network a dinga survey jong kichai kon ahitai, tin Ranjan in aseibe in ahi.