Thusoh chom chom

Thusoh chom chom

179
0
SHARE

NSCN-IM in Naga Peace Talk a Interlocutor thah thumna nei

Guwahati, Aug 21: National Socialist Council of Nagaland- Isaak Muivah (NSCN-IM) thingnoi hon Indo-Naga peace talk a Interlocutor thah alhen diuvin Prime Minister Narendra Modi henga thumna anei uvin ahi.

India President Ramnath Kovind in Nagaland Governor dinga RN Ravi alhen jouva thumna aneiyu ahi. RN Ravi hi achesa 2015 kum a kon India Government Interlocutor a pang ahi. PM henga NSCN-IM hon lekhathot apehna a Governor khat Interlocutor a kisang louding ahi, tin asei uvin ahi. Governor dinga Ravi alhen jou uva kon Interlocutor thah lhen dinga thumna aneiyu ahitai.

NSCN-IM interlocutor Thuingaleng Muivah in advisor toh lekhathot apeh ahi’in, India sorkar in Framework Agreement, 1997 jong ageldoh kit diuva aseibe uvin ahi.

PM level a kihouna aum jouva  Indo-Naga thu machal ahi, tin jong asei uvin ahi. Achesa July nisim 26 nikho a New Delhi khopi a RN Ravi toh kihouna aneiyu alunglhai louna thu jong asei uvin ahi. RN Ravi in Governor mopohna alah jouva ‘Naga thu’ akisulham tai, tia PM Modi henga asei ahi.

NPF in Naga Political Issue agangthei penna suhchet a dia sei

Dimapur, Aug 21:  Naga People’s Front (NPF), in ama Central headquarter, munna Naga political issue suhchetna dia panna thei channa kipang ding ahi, ajeh chu thil kibol jouse hi Naga mite phatchom nading ahisoh keiye, ati.

NPF hon amaho Central headquarter munna gamsunga dia Naga lamkai len ho akoukhom un, thuso miho mangchan, Nagaland Governor thah RN Ravi, atoumun alo thei tah jeh in kipana thuthot ape uvin chuleh, sorkar in Nagaland mite dia Milun Ravi ahinsol peh jeh in jong kipathu asei kit un ahi.

NPF Secretary General, KG Kenye in Milun Ravi tohmun hi Interlocutor, sorkar leh Naga te kikah a palaiya apan na le  Governor tou munna atou jalla boina hung soh doh lou din temna aneiyin,

1964 kum’a  NPF leh Indian sorkar in hem-kham dia kinop tona anei jal’a Naga issue hi suhboi in umdahen, achesa 1998 kumma jong Naga mite gentheina hetpeh a aum na dinga election jong  boycott kibol ahin, Naga boina hi sorkar in thupi tah in gel hen lang, boina ho hi agang thei penna suhlhap na nei ta hen tin aphong doh in ahi.

Chief Minister Biren in Manipur Heli Service avel a hondohna nei kit

Imphal, Aug 21 (ET): Chief Minister N Biren Singh in Wednesday nikhon Imphal International Airport mun a Imphal- Jiribam, Tamenglong chule Moreh kikah a leng ding Manipur helicopter service avel in hondohna anei kit in ahi.

Kin gon a Chief Minister in ahoulimna a, tua sorkar in gamsung mi thinglhang gamlha tah a cheng ho hahsatna olsah nadinga Manipur Heli Service pohdoh dinga thulhuhna anei ahi, tin aseiyin chule Heli service hi gamsung miho dinga kholjin aganna thei ding, chule man lhom a kibol ding ahi, ati. Sorkar in Helicopter service hi tourist ho a dinga jong pohdoh dinga tohgon anei ahi’in, gamsung vetna (sightseeing) a man thei ding service agon kigot ahi, ati.

UDAN-2 noiya Home Affairs Ministry in Imphal leh Parbung chule Thanlon kah a Manipur Heli Service umsah dinga jong nopna anei ahitai, tin CM in aseiyin ahi. Imphal-Mandalay flight service kipan vahding ahitai, tin Biren in aseiyin chule Ministry in International Flight service tahso nading tohgon anei thu a flight operator hotoh kihouna neiding jong nopna anei ahitai, ati.

Centre in Imphal a kon gamsung mun dang dang jotna ding lenna akalsah dinga state sorkar in ngehna anei ahi’in, Imphal-Dibrugarh flight   service jong kipan vahding ahi, tin CM in aseiyin ahi. Imphal International Airport a runway thah kisa vahding ahitai, tin phondohna aneiyin chule dangka crore 600 vel project a dinga tender process jong kijou kon ahitai, ati.

Manipur Heli Service thu CM in aseiyin, Manipur Heli Service a March 31, 2020 kum service provider dinga M/S Global Vectra Helicorp Limited kilheng ahi, tin aseiyin chule passenger 8-10 kikah atou theina BELL 41EP Helicopter jong umding ahi, ati. Hetthei khat chu MHA Helicopter Service noiya tu masanga service provider Pawan Hans Ltd in Manipur Helic Service ana mopoh ahi. Kin gon a Deputy Chief Minister, Minister leh MLA ho, Chief Secretary, Commissioner (Transport), Director (Transport), Director (IPR), civil leh police official lamkai luboh hojong apang uvin ahi.

Kiloikhomna chom chom in Moreh a bandh abol jeh a niseh kimanchah boi

Tengnoupal, Aug 20 (ET): Kiloikhomna chom chom in Myanmar gamgi Moreh a Wednesday nikho a nidan 48 bandh abol jeh uvin niseh kimanchah sangtah in asuboi in ahi.

Moreh Youth Club, Kuki Students Organization, Kuki Women Union and Human Rights chule All Moreh Traders Association in Moreh Gate No 1 a um 43 Assam Rifles hon mipi che le asuhboiyu deilou vetsahna a bandh abol u ahi. Bandh sunga themjilna mun, government leh public establishment hojong akikhah soh in ahi. Ahin, bandh sunga kin khoh, hou toh kisai, dammo thu ho alha ong uvin ahi.

KSO Tengnoupal injong bandh atosot uvin ahi. Bandh bol hon Moreh Gate No 1 waiting shed a um 43 Assam Rifles ho sentry post asuse uvin, kiphinna bol ho Assam Rifles official hon jol lungdam dinga adel lut uvin ahi. Tengnoupal SP Th  Vikramjit Singh, Additional SP K Robinson, SDO Moreh I Dineshkumar in Hill Tribal Council Moreh lamkai hotoh kihouna anei uvin, bandh thu aseikhom uvin, ahin, bandh lahdoh nathei kinoptona asem jou deh pouve, tin thulhut in aseiyin ahi.

Alangkhat a 43 Assam Rifles hon Indo-Myanmar Friendship Gate No 1 leh No 2 a check kibol hi gamsung ding gelna jal ahi, tin asei uvin ahi. President, Kuki Women Union & Human Rights, Moreh, Kikim Mate in Assam Rifles hon mipi asuhgim adeilou na leh alunglhai louna thu aseiyin ahi. 43 Assam Rifles hon hiche gate mun a Moreh a cheng ho asuhboi a agimbol jing jeh a achesa kal phabep sunga gate a thil phatah a kipo thei talou ahi, tia ngohna um ahi’in, hiche lampi hi Moreh a cheng ho dinga kivahna khat ahi, tia aseiyu ahi. Ni-ni bandh umhi Wednesday jingkah nidan 5 a kon August 23 jingkah nidan 5 chan umding ahi.

CCSK in Manipur gam ke louna dia kihahselna nei

Imphal, Aug 21(ET): Committee of Civil Societies of Kangleipak (CCSK), in Manipur gam ake lou nadia tin le ha tho’a pan kila ding ahi tin aseiye. Hiche thucheng hung kon doh lona jeh chuahileh Nagaland Governor and Interlocutor, RN Ravi in Naga peace talk lha 3 sunga chatheng’a umding ahitai ati a konna ahi.

Imphal New Checkon, CCSK office munna president, Jitendra Ningomba in thuso miho akouna a chun, aman, Naga te boina suhlhap a aum ding hi akidei nai, gamsunga chamna umding amitakip in kidei ahi, amavang Manipur gamgi aki kehso’a mipi te lunglhai louna natoh ahung umle tin le ha tho’a kipang ding ahi tin aseiye.

Jitendra Ningomba in NSCN(IM) leh Indian sorkar kah’a Framework Agreement soi kikai ho, mipi anga sodoh le pohdoh louva kikoi tup jeh in sorkar demna jong aneiye. Chule  mipi ten gamsung huhbitna din panla khom tau hite tin temna aneiye.

Babysana thi thu a ‘Rally hunger strike’ umjom ding, kiphinna kehlet dinga gihna neiyu

Imphal, Aug. 21(ET): Naharol Leishemba Club, Thangmeiband Sinam Leikai member holeh vengsung Meira Paibi hon Wednesday nikhon an ngol kiphinna apan uvin, Standard Robarth Higher Secondary School a kai kum 14 a upa Ningthoujam Babysana Chanu chunga thudih a thutanna anei diuvin thumna anei uvin chule akiman JAC member hojong alhadoh diuvin thumna anei uvin ahi.

Club mun a kiphinna abol nauva President, Panthoibi Meira Paibi, Thangmeiband, S Bino Leima jong apang in, Babysana chunga thudih a thutanna aum kahse a an ngol kiphinna umjom ding ahi, tin aseiyin chule police hon boina sem louva kiphinna bol ho nomang ding go jong leh kiphinna umjom ding ahi, ati. Meira Paibi chule Thangmeiband vengsung mihon Babysana chunga thudih a thutanna aumna dinga pan lentah la a JAC convenor panna a JAC member ho akimat demna sangtah aneiye, tin aseibe in ahi.

Akiman JAC member holah a JAC Convenor chule Thangmeiband United Club (TUC) member hojong pang ahi’in, aganna thei pen a dan koi louva alhadoh diu chule Babysana thi thu jong aganna thei pen a akholdoh diuvin S Bino Leima in thumna aneiyin ahi. Sorkar in thilsoh akholdoh louva chule akiman JAC member holeh TUC member ho alhadoh louva ahileh kiphinna sangtah bol dinga jong gihna aneibe in ahi.

DM Arts a simlai Mutum Tennyson in thuso miho henga Wednesday nikho a poster campaign kipan ahi’in, DM campus leh akimvel a ahop ahi, ati. Babysana chunga thudih a thutanna aumpon, thudih a gangtah a thutanna kinei lou hi akipe lout oh kibang ahi, tin aseiyin chule sorkar in na kitong a asei vanga tuni chan a Babysana thi thu a themmona neiho akholdoh loulai ahi, ati. Simlai khat hina a Babysana dinga kiding ahi’in, simlai chankhompi khat chunga thilsoh lhung kimoh vet theilou ahi, ati. “Justice delayed is justice denied’ tia kijih poster bang a atah uvin ahi.

Dist. Hospital kimvel’a dukan ho Eviction order kiso ni 10 jouva jong natoh chelha lou lai

B.Lalboi Gangte

CCpur. Aug. 21 (ET) : LN Kashung Addl. DC & In-charge Deputy Commissioner, CCpur in achesa July nisim 17 nikho’a thuso anabol dungjui in achesa August nisim 8 nikho in Pawan Yadav, IAS DC/Ccpur in Hospital pam (outside) fencing to kinai cha’a dukan bolho heng’a show cause notice anapeh toh lhon in phalna nei louva Government gam loho ni 10 sung’a apot doh ding uvin hetsah na ananei tah ahi. Hiche thuso apeh nung ni 10 val tajeng jong leh Eviction bol ding leh bollou ding tuni chan’a hetchen ahi loulai dan atahlang in ahi.

Hiche toh lhon’a hiche Show cause notice in atahlang na’a Hospital mai polam Fencing jui’a dukan bolho potdoh ding’a hetsah na ana um na jeh hi achesa July nisim 16 nikho’a Medical Superintendent, District Hospital in ngehna anabol dungjui’a Manipur Public Premises (Eviction of Unauthorized Occupants) Act 1978 Section 3 pansa’a thuso anabol khum ahi. Eviction kibol ding hileh CCpur Govt. College (chunglam) apat HQ Veng chan’a lampi jui’a dukan bol ho asuhkhah ding injong aum in ahi. Eviction kibol got na ajeh pen tah chu tu’a lampi dung’a dukan bol hon District Hospital compound umna Fencing jui’a damthei natoh kisaiya kichat um thei alhut thei ding jeh leh Hospital mun’a ki-vetkol ho ading’a suh ngongkai na naban’a jun-le-eh thah na mun toh kisai’a atheng jou lou tah jeh’a hiche natoh hi kipandoh go ahi.

“NSCN (R) Kilonser in Maj. Toishe kitha thu a pan akilapoi, tia suhthengna thuso nei

Dimapur, Aug 21: NSCN (Reformation) Defence Kilonser leh Supervisor UT1 Khekato Kinny in August nisim 16 nikho a Maj Toishe, NSCN-IM kitha thu a pan akilapoi, tin suhthengna thuso anei uvin ahi.

Thilsoh a ngohna eikinei hi vangset umtah ahi’in, hiche jeh a NSCN-IM hon August nisim 20 nikho a kei leh ka insung eibulu u ahi’in, ahivanga vangset umtah a Pathen lungset jal a ka sochat u ahi, ati. NSCN-IM hon ginmo a amat houhi abon uva NSCN-IM a kon ahiuvin, itidan a ken pan kalah ding ham. Akiman mikhat Maj Vishiho jong NSCN(R ) a pang lou ahi, tin MIP (Ministry of Information & Publicity), NSCN/GPRN (Reformation) in thuso aneiyin ahi.

Lha phabep masang a Maj Vishiho, NSCN-IM in suty a aum sunga keiho Vice President akimupi a, NSCN-R a kapan nom e tia asei ahi’in, ahivanga Vishiho hi khamnathei bol (drug addict) ahijeh a keiho VP in asan peh lou ahi. Hiche jouva Vishiho kahenga hung a, eidinpi dinga ngehna aneiyin, kenjong kana nop peh lou ahi’in, lamkai ho thulhuhna achaina ahi, tia kasei ahi, tin aseibe in ahi.

Vishiho hi NSCN-IM hon amat ahi’in, kiloikhomna adalhah hihen lang leave a um hijong leh NSCN-IM mi ahi’in, Toishe kitha na a ken iti pan kalah ding ham. Vishiho hi thilsoh a pang maithei ahi ajeh chu NSCN-R in alah lou ahi. Maj. Toishe kitha na a pan ima akilapoi, tihi suhthengna kanei nom ahi’in, chule Toishe kitha na thilsoh alhun na a NSCN-R in ima pan alah lou ahi, tin August nisim 16 nikho a niseh thuso phabep a Maj Toishe kitha na a pan la a akisei suhthengna aneiyin ahi.

MPS phabep transfer ana kibol

Imphal, Aug 21(ET): Department of personnel & Administrative reforms, government of Manipur in MPS phabep transfer order ana so uvin ahi. Transfer kibol MPS officer ho chu P Binod RANJAN Singh, Addl. SP(LO) Kamjong, N. Nobin Singh, Dy. CO/8TH MR, K. Pukeho MAO, Addl. SP/Senapati, K. Dilip Singh, Dy. CO/2nd MR, Th. Shangkar Deba, Addl. SP/MPTC, Lhingjakim Haokip, Dy. CO/8th IRB(Addl. AIG Hqtr(Adm) PHQ in addition), Leena Yumnam, Dy. CO/9TH IRB(Addl. AIG Hqtr(Prov) PHQ in addition), Md. Abdul Kalam, Addl. SP/Tamenglong(to be stationed at Nungba), RASHID Ali, Dy. CO/6TH mr(Addl.SP/Jessami in addition), Sangboi GANGTE, Addl. SP(LO)/ Churachandpur, Luther Nangsha, Addl.SP(LO)/Ukhrul, Tholu Rocky, Addl. SP/Senapati, Syed Abdul Samad, Dy. CO/5TH IRB, Okramcha Wangkhomba, Dy.CO.3rd IRB, Akoijam Sadananda Singh, Addl. SP/Vigilance and anti-corruption, Satyaam Takhelambam, Staff officer to DGP,  Shankerjit Singh Loitongbam, Addl. SP/Vigilance and anti corruption, Diana Konjengbamm, Addl. SP/CID(Technical), Binoy Chongtham, Addl. SP/CID(Security), Rattana Nagseoam, Addl. SP(IUCAW), Imphal West, Rajkumar Charles, Dy. CO/7TH MR, Rajkumari Tinaaluxmi, Addl. SP/CID(SB), Moirangmayum Bishworjit Singh, Addl. SP(LO)/Imphal East, Moirangthem Amit Singh, Addl. SP(Ops)/Moreh, Tayenjam Bishwajit Singh, Addl. SP(Traffic)/ Imphal West (Addl. SP(Adm)/IW in addition),  Syed Samir Ahamad, Addl. SP(Ops)/Noney, Augustine Jangminthang Khongsai, Addl. SP/Chandel, Ringthing Hongchui, Addl. SP(Ops)/Ukhrul, Hasby Haaokip, Addl. SP(IUCAW)/Churachandpur, Thangkhochon Haokip, Dy. Co/2nd IRB, Lawrence Kapkhenmun Munlou, Addl. SP(Ops)/Churachandpur le ML Kaishungbou, Dy.CO/5th MR ahiuvin ahi.

INX Media Scam Case toh kisai a P Chidambaram ana kiman; CBI Court a tuni kipodoh ding

New Delhi, Aug 21: Finance minister lui le Congress lamkai P Chidambaram chu tuni nilhah in Central Bureau of Investigation (CBI) in achenna mun Jor Bagh, New Delhi mun a ana man uvin ahi. Chidambaram chu All India Congress Committee (AICC) headquarter mun a ana che jou pungkal khat jou a ana kiman ahi. CBI in Chidambaram chu jani nilhah a ana mat got u ahin hinlah inn a ana um loutoh lhon a tuni a ana mat u ahi. Chidambaram in bail ngehna ana nei chu high court in hiche case a alamkai ahi tia ngohna anei toh lhon a ana sanpeh lou u ahi. High Court in bail sanpeh ana neilou toh lhon a Supreme Court ang a bail ngehna ana kinei kit na a Supreme Court in tu chan in hetsah na ahin nei ou vin ahi akiti. CBI team Chidambaram man a cheho chun Chidabamram inn ache uchun INX case jeh a kiman go ham ti seilhah thei na ana nei pouvin ahi. Hiche thu toh kisai a Congress party in thuso ahin neina uva Supreme court ang a abail ngehna ki ngailha lou lai a hitabang a mat dinga kino na um hi ipi kibol na ham tin thudoh ahin nei uvin ahi.  Congress lamkai  Anand Sharma in thuso miho toh akihou limna a tu jaan mama a mat dinga hitabang a natoh na kinei hi lungdon umtah ahin, criminal case la hingal lou a hitabang natoh na kinei hi democracy atohkha ahi ati.

ATRPFM in scheme ho kilha doh dia temna nei

Imphal, Aug 21(ET): kum 2018-19 sunga dia, sorkar a konna thinglhang mite kitho pina dia kisem doh scheme ho hi, centre a konna kilhadoh ahitan, stete sorkar in nahsah louva akoi jeh a, alhunna ding, chanvou muding thinglhang mi hon amuthei poi tin ATRPFM in lhadoh loi din sorkar henga ngehna aneiye. Jatneo adeh’a thinglhang mi hodin, mot tuna ding, ponkhui lam hihen, vohcha vah na ding hijongleh fund ho hi aphat chan hung lhung leh mipi ten natoh apat thei ding ahitai. Chuleh, phatdang ngainan Milun Biren in sorkar mopoh na ahin neiya konna hin thinglhangmi ho henga khantou na to kitoh a chanvou ahunglut dom me tin Milun Biren sorkar jong pachat na apeuve.

ATRPFM in ngehna kinei ho hi donse’a aumlou leh, echan dia lom chanvou muloujeh a kiphinna jatchom chom kipodoh ding ahi tin, kiloikhom hon hetsah na anei uve.

Jilkung umlou jeh a simlai hon school ‘boycott’ bol gou

Imphal, Aug 21(ET): Khangabok Higher Secondary School Student Union hon sorkar in tulha sunga angaicha jilkung ahin solpeh lou uleh school boycott bol dinga gihna anei uvin ahi.

General Secretary in soi akaina thuso a chun, English, Manipuri leh Hindi jilkung ho retired ahi jouva kon tuchan a akhel ding umlou ahi, tin aseiyin ahi. Jilkung tohmun ong lahna dinga Union in thumna anei ahi’in chule school infrastructure sem phat nadinga jong avel vel a mopohna nei authority ho henga memorandum kipe ahi, ati.

Khangabok Higher Secondary School a hi class VI a kon class XII chan um ahi’in, agom a simlai 600 lhing ahi. Lhakit akipat nikho a kon kiphinna chom chom bol dinga Student Union in gihna aneiyin, thumna sorkar in asan louleh school boycott bol dinga jong gihna aneibe uvin ahi.

Maring hon Naga Framework Agreement tosot

Tengnoupal, Aug 20 (ET): Khukarthil kho, Pallel, Tengnoupal district a public meeting abol uvin, Centre leh NSCN-IM in soi akai ‘Framework Agreement’ tosot dinga kilolna anei uvin ahi.

Convenor, MPF, TK Leidong lamkaina a meeting abol u ahi’in, Nixon Makunga session secretary a pang ahi. Maring mi aja a sim, village authority ho, women society lamkai, khangthah chule adang dang jong kihouna a apang uvin ahi. Meeting a kilolna dang dang jong anei uvin ahi.