Thusoh chom chom

Thusoh chom chom

196
0
SHARE

Gamsung in Sadbhavana Diwas nit; Thoubal police ho ‘reward’ peh dinga CM in sei

 Imphal, August 20(ET): India gam dang dang a banga gamsung injong Prime minister anahi Rajiv Gandhi pen ‘Sadbhavana Diwas’ anit uvin ahi.

1st MR Banquet Hall mun a Chief Minister N Biren Singh leh Deputy Chief Minister Y Joykumar Singh chief guest leh functional president hina a ‘state level’ a kin amang uvin ahi. N Biren Singh in ahoulimna a sorkar in khamnathei douna a campaign bol jom ding agelkhoh na thu aseiyin, chule khonung ding gelna a khamnathei abul a kon suhmang angaiye, ati.

Thoubal District police team hon SP Dr S Ibomcha lamkaina a tu naicha Lilong a drug factory kiman doh ahi’in, international market a dangka crore 166 vel man heroin kg 185 vel jong amat u ahi, tin CM in aseiyin chule amaho jong tu masang a kibol banga kipaman (reward) kilomtah a peh dinga aseiyin ahi. Imphal-Moreh highway hi khamnathei kipohna lamlen khat a kihe ahi, tin Biren in aseiyin chule kin gon a pang LM Khaute in Moreh leh akimvel a ‘intelligence network’ akoiya gamgi galkaiya kon gamsung mun dang dang a khamnathei akipoh lut louna dinga kitahna neitah officer khat lamkaina a network asem dinga jong thuhilna aneiyin ahi.

Gari accident a vangsetna toh atam cheh cheh jong CM in alungkhampi na thu aseiyin chule mopohna nei official hon aganna thei pen a gari neo tol hon helmet akihap tei nading uva thupeh anei diuvin thuhilna aneiyin ahi. Chule gari len (four wheeler) ho window glass a kon ‘tint’ jong alahdoh diuvin police ho henga aseiyin, akimu pai theilou glass kiman hi thilse bol gari a tou ho police a kon akisel thei nau ahi, ati.

Official hon khantou machalna natoh ho aganna thei pen a abol a chule welfare scheme hojong achepi diuvin CM in thuhilna aneikit in ahi. Old age pension scheme a dinga application 20,000 vel pending a um ahi’in, amaho a dinga dangka crore 5 budget kigong ahi. Social Welfare Department official hon applicant hohi beneficiary list a apansah diuvin jong aseibe in ahi.

‘School Fagathansi’ mission thu jong CM in aseiyin, mopohna nei official hon agannathei pen a angaicha natoh ho ajo uva, thil le lo chule manchah ho apeh’a, ni 45 sunga akilhengdoh school phabep a teacher ho posting abol diuvin aseiyin ahi. Chief Minister in aumtalou Prime minister anahi Rajiv Gandhi in jat leh nam, hou chule pao leh ham khenna umlouva gamsung miho akipumkhat na dinga pan alahna ho geldohna aneiyin ahi.

Deputy Chief Minister Y Joykumar in jong houlimna aneiyin, Rajiv Gandhi hin gamsunga cheng nam chule hou chom chom ho kah a kipunkhomna leh chamna aum louleh gamsung machal louding ahi tihi tahsanna dettah anei ahi, ati. Chief Minister in akikhom ho Sadbhavana pledge (kitepna) alahsah in ahi. Kin gon a Minister ho, MLA ho, civil leh police official chule sorkar natong hojong apang uvin ahi.

NSCN-IM hon Khekato abulu NSCN/GPRN-Reformation in demna nei

Imphal, Aug 20(ET): NSCN/GPRN (Reformation) in lunghanna ding thil bol louva UT1 Supervisor leh Defense Kilonser, Khekato Kinny tha nading tohgon um demna anei uvin ahi.

Ministry of Information & Publicity (MIP), NSCN/GPRN (Reformation) in thuso aneina a Kichilimi kho a cheng Col. Khehoto kiti mikhat lamkaina a NSCN(IM) ho August nisim 50 nilhah nidan 5 don a hung uva, ajeh beiya meithal akap u ahi’in, Khekato hi a insung mite leh chapang hotoh um ahi, ati. Thilsoh a Khekato Kinny kisukha ahi.

Naga hon chamna semdoh ding alhangai a, India sorkar toh Political Solution sem ding agot jing laiya ipi dinga hitobang lunghanna thei thil kibol ham tihi NSCN in alungdonpi ahi, ati. Chule NSCN honjong kivenna ding anei lhing ahi’in, keiho buluna dinga kichepi tohgon ho peldoh nadinga bol thei chan bolthei ahi’in, Naga miten chamna akou jeh a kitimna sangtah kinei ahi, tin thuso chun aseibe in ahi.

J&K tobang NE chunga jong chuthei ahi: Ibobi

Imphal, Aug. 20(UNA): Manipur Pradesh Congress Committee in Prime Minister lui Rajiv Gandhi pen nikho 75 channa Congress Bhawan, Imphal’a amang in ahi. Hiche kina chun President of Manipur Pradesh Congress Committee and CWC member Gaikhangam , Chief Minister masa Okram Ibobi, Congress MLA ho, office bearers holeh congress noiya natong ho chengin pan ala uvin ahi. Amahon aumtalou lamkai luipa jaanan pahvui athe uvin, Hapta Kangjeibung’a thingkeh atu uvin, RIMS  a jong blood donation camp agong uvin ahi.

CM Okram Ibobi in lamkai lui Rajiv Gandhi in adamlaiya gamsunga ding, adeh a sahsolam gamkai a cheng japi dia natoh pha, scheme chom chom apohdoh ho aminphah in, chuleh apen anu, congress lamaki Indira Gandhi in Sahsolam gamkaiya galguh bol ho chaval na natoh asuh thip dan leh Mizoram state semna dia Churachandpur leh Pherzawl gam ho aphal peh loudan jong aseiyin chule Jawaharlal Nehru in Nagaland gam jong Assam vetkol na a konna alahdoh a Statehood apeh dan thu ho jong avel in mipi te agel dohsah kit in ahi. Milun Nehru le Indira Gandhi hi natoh pha gamsunga dia atoh pet lhonna, kithat ahilhon in, amani natoh jong hetpeh in aum tapoi tin alung hemna thu aseiye.

BJP sorkar in vai ahop a konna gamsunga kitomona leh mipi te lungsung tongkha thei natoh ahin podoh jing un, japi phalna bei ya, Article 370 jong Jammu and Kashmir a konna alah doh na banna gam jong kehni asotai, hiche hin sahsolam  gamkai ho jong abanna ahung pan ding avetsah e. chuleh themjil na lam’a hi phat masa laiya Congress sorkar in pol 1 a konna 7 chan manbei ya lekha sim sah cheh dia tohgon apohdoh hi, NDA sorkar in ahin banjop in gamsunga  school Phagathallashi tohgon apoh doh vang hi thilpha ahinai tin jong aseiye. Ahivang in UPA government in RGGVY scheme apoh doh sa, gamsung muntinna kolphemeivah lhun sah ding tia natoh apoh doh jong BJP sorkar in amin khel in amaho pohdoh dan in akisem tai ati.

Gaikhangam in PM lui Rajiv Gandhi hinkho thusim aseiyin, apen kum hi August 20, 1944 ahin, chule 1984 kum’a Tamil Nadu’s Sriperumbudur a mipi anga adin pet na kithat ahidan asei ye, aman adamlai anatoh doh ho adeh’a khantou machal na toh tho’a science and technology sector ahin sem hoi in, ama jallin egamsung’u IT sector lampang’a miphah chan epha taove tin jong aseiye.

Gam leng khat in hetkhel jeh a mikhat kap lih

Chandel, Aug 20(ET): Chandel district noiya um Joupi kho a Tuesday jingkah matah (August 20) a gamleng khat in ahetkhel jeh in mikhat in thina atoh in ahi.

Thina toh a hi kum 30 vel a upa Ngamlal Khongsai, h/o Nengbul Khongsai, Joupi kho a cheng ahi. Thulhut dungjuiya Ngamlal Khongsai hi phailei a twi lam ve dinga achena a akimvel a gamleng a che Sokholet Khongsai in sakhi ahisah a meithal a akap ahi. Thilso namun a Ngamlal jong thi pai ahi.

KSA le simlai phabep in Council office bulu

Imphal, Aug. 20 (ET): Kangleipak Student’s Association (KSA) le simlai hon tunin Babupura mun’a um  Council office ana bulu uvin tin thulhut chun aseiye. Thulhut kimu dungjui’a hiche kibulu na ajeh hi simlai kiloikhomna le simlai hon daan toh kikal’a Council of Higher Secondary Education staff  hon na atoh uve ti ngohna anei utoh lhon’a atohmun’u adalhah ding uva kiphinna anei’u ahi. Hiche achun simlai hon Council Chairman kimupi ding’a ngehna ananei uvin ahin Imphal West Police hon ana ting uvin  chujouvin mi phabep Chairman pa kimupi ding in analut sah uvin ahi.

Hiche toh lhon’a KSA Vice President  Sukham Bidyananda in aseina’a Ching-tam Foundation for Innovation Education school,  Yairipok akon Thoubal a kichon ding tohgon kinei hi daan toh kitoh lou ahi jeh in kiloikhomna in School ki chon na ding’a gam lekha ana kipodoh ho semthu ahidan akihetdoh jeh’a Council natoh na neiho chung’a tuchan’a gotna akipeh lou jeh’a kiphinna kinei ahi ati.  Chuleh Council Chairman pa ana kimupi na’a hiche thu toh kisai’a Commissioner of Education(S) toh kihouna anei ding hetsah na anei in ahi. Hiche thu hi agan nathei pen’a suhlhap ahi lou le kiloikhomna in kiphinna kijom kit ding ahi tinjong hetsah na anei in ahi.

Assam NRC list a moupa apan joulou jeh a golvah kigong sa kivohai

Guwahati, August 20: Silchar a golvah bol kigo a moupa in citizenship ahina (credential) apeh theilou jeh a golvah avohai uvin ahi.

Mounu leh moupa hi anilhon a Nayagram kho a kon hilhon ahi’in, phat phabep kilungset lhon ahitai. Insung mite henga kichen ding thu asei lhon a, golvah bol nading nikho atep u ahi. Lhakhat alhin kon a numeinu apa in achanu ji ding pa citizenship dinmun thu ahetdoh a kidang asah ahi. Numeinu apa in, citizenship ahina thudohna neithei khat toh achanu kichen sah loudinga asei ahi.

Ka chanu toh ama akichen a ahileh ka chanu citizenship jong boi theiding dinmun a um ding ahi, ati. Moupa hi Assam gam a um kum masa July lha a NRC draft kisodoh na a amin pang lou mi lakh 40 holah a pang ahi. Numeinu insung miten kal masa a golvah bol ding a um avohhai u ahitai. Pasal pa insung miten ajol jing vang uva numeinu apa in alunggel akhel lou ahi.

Golvah abol theilou ding phat lhon a achesa Saturday nikho a kijam lhon ahi’in, hiche jouva numeinu apa in Silchar police station a hehna asem a, achanu hi kipuimang ahi, tia FIR ajihlut ahi.

Igam pao choisang dinga Biswajit in ‘28th Manipuri Language Day’ kin kiman na a sei

Imphal, August 20(ET): Works Minister Thongam Biswajit in Manipuri pa choisang nadinga kithopi thei chan a pan lah dinga aseiyin chule gamsung mihon jong gamsung pao adop diuvin kouna aneiyin ahi.

28th Manipuri Language Day kin kiman na Iboyaima Shumang Leela Shanglen, Palace Gate mun a Tuesday nikho a Minister pa in asei ahi. Achesa August nisim 20, 1992 kum a Indian Constitution 8th Schedule a Manipuri language akikoi geldohna a nikho anit u ahi’in, ‘Manipuri Lon Chaokhat Hanbada Lamdam Sigi Yelhou Lonsingsu Chaokhat Hanba Tangaiphade’ ti thupi noiya kin aman u ahi.

Biswajit in ahoulimna a 8th Schedule a Manipuri pao akikoi kal kum 27 achetah vanga machalna aumlou hi ilhahsam nau bou ahipon, iman nadiu jong ahi, ati. Classical Language of India a Manipuri pansah ding thu a Minister pa in ngaichat ahiteng hiche thu hi Cabinet a kipodoh ding ahi, tin aseiyin ahi. Minister pa in Classical Language of India a Manipuri apanna diga Language Commission ahilouleh adhoc committee sem dinga jong ngaidan aseiyin ahi.

Athu akhoh dungjuiya sorkar in kithopina apeh ding ahi, tin Biswajit in aseiyin chule Manipuri pao dopsang ding hi sorkar panna a mijouse mopohna ahi, ati. Pupa khanga ana kisei thusim ho mansah louva chate ho seipeh ding a Biswajit in temna aneiyin, hiche thusim hohi society chon leh khan vetsahna ahi, ati.

Health and Family Welfare Minister L Jayantakumar Singh jong apang in, Classical Language a Manipuri pao pansah nadinga research, compilation, field work ngai ahi’in, hiche ho jouse lamkai ding committee jong ngai ahi, ati. Mipi hohi thahatna hiding ahi, tin aseiyin chule gamsung mi akipunkhom diuvin kouna aneiyin ahi. Manipuri pao hi Classical Language of India a pansah ding idei ule Minister khat bou hilouva gamsung mi jousen pan alah ngai ahi’in, nam chom chom hon kipunkhomna aneiya athusei uhi Delhi in ajah ngai ahi, ati.

Kin kimanna a thupi a kimang jong Jayanta in aseiyin, Meilhei pao ti sanga Manipuri pao iti a ahileh ahop len ahi, ati. Kin gon a CAF & PD Minister Karam Shyam Guest of Honour a apang in ahi. State Level Celebration Committee 28th Manipuri Language Day-2019 lamkaina a kin kimang ahi.

Bangladesh gam a Northeast thingnoi ho camp aumpoi, tia Bangladesh authority hon sei

Shillong, Aug 20: Bangladesh authority hon Tuesday nikhon Bangladesh gam a North East India a kon thingnoi hon camp aneipoi, tin asei uvin ahi.

“India vaipo hon thingnoimi ho camp aum’e tia meeting a aseiyu ahi. Bangladesh gam a hitobang camp aumpoi, ti suhthengna kaneiyu ahi”, tin Jamalpur District Magistrate, Ahmad Kabir in aseiyin ahi. Ahmad lamkaina a member 52 lhing Bangladesh team ho Shillong khopi a ana kholjin u ahi. Gamsung tenin tu masanga gamgi galkaiya kon thingnoi natoh ho thu kipehto na aneijing ahi’in, Bangladesh sorkar in thingnoi sangtah a adoudal na avetsah jing ahi. Kagam uva thingnoi ka um sah pouve”, tin Kabir in aseibe in ahi.

Chule West Jaintia Hills district a Myntdu vadung thu jong akipodoh e, tin Jamalpur District Magistrate in hetsahna aneiyin ahi. Bangladesh gam a Sari vadung tia ahet u Myntdu vadung aboh thu jong Meghalaya leh Bangladesh gam a kon police official leh civil administration hon kihouna anei nauva aseiyu ahi. “Gamsung teni a vadung khat long khom ahijeh a hiche thu akiseikhom in, vadung suhboh louding thu phatah a kisei ahi”, tin Kabir in aseiyin ahi.

Aman asei dungjuiya Meghalaya gamsung Myntdu a Sari vadung a ‘coal mine’ a kon metallic component aum alungkhampi u ahi.  India gam a kon Bangladesh gam a gancha akipohlut thu a, dan dihlouva thil kipo jouse akidei poi, tin Jamalpur district Magistrate in aseiyin ahi. “Hitobang natoh ho kikhah ahi’in, BSF leh BGB in hitobang aumlou nadinga na atohkhom ding ahi”, ati.

CCpur Govt. College a B.Ed jil thei hita ding

B.Lalboi Gangte

CCpur. Aug. 20 (ET): Department of University & Higher Education, Government of Manipur noi’a Manglennganba, Director, Department of University & Higher Education lamkai nan tunin Churachandpur College mun’a B. Ed. Course jil thei na ding in vetlhah na ananei in ahi. Hiche phatsung chun Infrastructure lam toh kisai leh Churachandpur Government College mun’a B. Ed. Course koi thei tah tah ding hi nam ti’a vetlhah na aneina’a inspection team ho analunglhai uvin hi jeh chun B.Ed. Course hi Academic Session thah akipat jil pat thei ding in phatsah na ananei tan ahi. Hiche course hi simlai 50 in ajil thei nading’a patdoh ahi teng seat kihom ding ahi.