Thusoh chom chom

Thusoh chom chom

141
0
SHARE

Gamsung munchom chom a Patriot’s Day kimang; RSS in Bharat Mata lim jana apeh jeh a JSCC in gamsung thusim toh kisaiya RSS kingon boycott bol dinga sei

Imphal  Aug 13(ET): Tuni chun gamsung mun chom chom a kiloikhomna chom chom in Patriots’ Day amang uvin, achesa 1891 kum a galhang ho jana pehna anei uvin ahi.

Hicham Yaicham Pat leh Thangal General Temple complex, Imphal khopi a state sorkar in Patriots’ Day kin amang uvin, achesa August 13, 1981 kum a British douna galsat a Bir Tikendrajit leh Thangal General akhailih nau mun a kin amang uvin ahi.

Manipur Rifles contingent in martyr ho jana pehna a ‘gun salute’ abol uvin ahi. Kin pam a Chief Minister N Biren in thuso miho akihoupi na a galhang ho ana kiphal nau hin tuni chan a ilah uva mun lentah anei ahi’in, akiphal theng nau hi isuhmil loudiu ahi, tin aseiyin ahi. “Igam ingailut louvu leh gamsung mi ihinau umlou ahi”, ati. Igam ngailutna hi athu a bou vetsah ding ahipon, inatoh uvin avetsah ahi, ati.

British thahat tah ho ajo louding ahet vang uva lunglen tah a gal asat u ahi’in, hiche hi suhmil louding ahi, tin Biren in aseiyin chule hitobang a gam ngailutna leh pohnatna nei dinga gamsung miho temna aneiyin ahi. Kin gon a Chief Minister leh Council Minister ho chule civil leh police official luboh hojong apang uvin ahi.

Justice Committee on Anglo-Manipur War 1891 Martyrs and Freedom Fighter injong nikho amang uvin, Justice Committee Chairman Ibotombi Khuman in ahoulimna a, nikho hi Tikendrajit leh Thangal General bou geldohna a sorkar in aman ahi, ati. Gal jouva Andaman Island a jamlut Chongtham Mia kiti gamsunga ahung kile kit ding akiphal lou jeh a Tripura gam a thi den ho geldohna a jong man ding ahi, ati. Gal kichaiya sepai 5 akhailih u ahi’in, ‘Anglo Manipuri gal a hi gal tamtah anaum ahi’in, Khongjom jong kidouna mun khat ahi, ati.

Hiche gal a hi Machin Manao mol, Thoubal Athokpam, Laimaton mol leh Mayangkhang a mi 400 vel martyr chang ahi, tin thusim masa aseiyin, sorkar in galhang sepai ho geldoh nading mun leh status hojong asem lou ahi. Kakching a um Machin Manao Ching a bou memorial site kisem ahi, ati. Sorkar in martyr chang ho dinga ‘memorial site’ asahpeh dinga Ibotombi in ngehna aneiyin chule gamsung mihon martyr teni bou hilouva martyr chang adang jouse jong ageldoh dinga temna aneiyin ahi

Kin-gon a martyr chang ho insung mite jong apang uvin, Anglo Manipuri War, 1891 a martyr ho jana ape uvin ahi. Joint Student Co-ordination Committee in jong Imphal College mun a Patriots Day amang uvin, Waikhom Leikai Government Upper Primary School injong nikho anit uvin ahi.

Rashtriya Swayamsevak Sangh (RSS), Imphal Unit injong martyr ho jana anei uvin, Bir Tikendrajit leh Thangal General lim toh Bharat Mata lim akoi khom uvin, patriots day amang uvin ahi. Hitia Bharat Mata lim kikoina hi amasapen ahi’in, lim kikoi khom social media a tamtah in demna anei uvin ahi.

Organizing committee Convenor in thuso miho akimupi na a Thangal General leh Bir Tikendrajit lim kikah a kikoi Bharat Mata thu aseiyin, ‘martyr ho kipehdoh na hi Bharat Mata khat ahi”, tin aseiyin ahi. Gamsung pumpi thu ahi’in, Manipur gam jong India noi anahi lou vanga India hop hi ahi, ati. Chule RSS in nam hina sumang louva kipunkhom ding hi tahsanna anei ahi, tin aseibe in ahi.

Alangkhat a Joint Students Coordinating Committee in thuso anei nauva RSS hon Manipur thusim chungchang a kin agon boycott bol dinga asei uvin chule gamsung thusim kiseina a mipi adih louva apui jeh uva RSS in ngaidam athum dinga jong thumna anei uvin ahi.

District jouse ah tuni chun Patriot’s Day kingon ana kimang in ahi.

Congress in Patriots’ Day nit; J&K gamsung thilsoh tobang gamsunga jong lhungthei ahi, tia Gaikhangam in sei

Imphal Aug 13(ET): Manipur Pradesh Congress Committee (MPCC) in Tuesday nikhon Congress Bhavan, Imphal a Patriot’s Day amang uvin ahi.

Congress Bhavan mun a MPCC President Gaikhangam in thuso miho akimupi na’a, tuni nikho a hi gamsung mi galhang tamtah in Manipur chamlhatna dinga ahinkho apehdoh ahi, ati. Chamlhatna hi lolhinna ahilou leh molphouna a um ahipon, mihem in apen pi athanei na ahi, tin aseiyin, hiche hi koiman eilahpeh thei diu ahipoi, ati.

“British vaipohna a kon chamlhatna dinga gal akisat vanga chamlhatna inei uvem tihi gelthei hinalai ahi”, ati. Babysana thi thu a numei leh chapang chunga thilse kibol Congress in demna anei ahi, tin Gaikhangam in aseiyin, thukholna achelhah lai ahijeh a hiche chungchang a ima seiding akinom pon, ahivang a thutah kholdoh ahiding chule thudih a thutanna aumding thumna kanei uve, ati.

Jammu and Kashmir gam a Article 370 leh Article 35A kisuhmang thu a thudoh anei uchun Gaikhangam in J&K gam a thilsoh hi Manipur chule North East gam dang dang ho jong aboina thei ahi, tin aseiyin chule nam lhom ho awgin centre sorkar in ajah peh poi, tihi hiche thilsoh in avetsah ahi, ati. Union Territory ni a akikhen hin centre in anop nop a achon kivetsahna ahi’in, Manipur, Nagaland, Tripura, Meghalaya chule gam neo neo ho a jong hitobang thil lhung louding ahi tia sei nathei dinmun umlou ahi, ati.

Mipin adei hi ipi hijong leh centre sorkar in adei dei abol ahi, tin Gaikhangam in aseibe in ahi. Kin-gon a member hon British vaipohna a kon chamlhatna dinga galsat ho jana ape uvin, Bir Tikendrajit leh Thangal General jana peh na jong anei uvin ahi.

Golguh bolhon vengsung adalhah nadia Dorcas Veng a toumun kiphinna um

Ccpur, Aug 13(ET): Tunin Churachandpur khopi sung Dorcas Venga um mipi hon vengsung akon galguh bol ho pot na dingin toumun kiphin ana nei uvin ahi.

Vengsung mipi hon thuso mihotoh akihou limna uva vengsung a galguh bol ho mip ilah a aum jing uhin vengsung mipi ho asu ling lao in ahi tin ana sei uvin ahi.

Hetthei khat chu ZRO/ZRA kikeh so akon khopi sunga boina ana um jing ahi.

Independence Day kiman na district ho a Jingun a pang ding ho phondoh a um

Imphal, Aug 13(ET): Tunin Manipur Chief Secretary in state sunga independence day kiman na dinga district ho a jin gun a pang ding le flag khai sang ding ho min phondoh na ananei in ahi.

Independene day kiman na Imphal East a jin gun ding Yumnam Joykumar, Deputy chief Minster, Bishnuprur a L, Jayantakumar, Health Minister, Kakching a Karam Shyam, PDS & consumer affairs minister, Chandel a Letpao Haokip, YAS minister, Senapati a N. Kayisii, TD minister, Ukhrul a Losii Dikho PHED minister,  Tengnoupal a Th Shyamkumarm MAHUD minister,  Churachandpur  a V Hangkhanlien, Agriculture minister,Thoubal a Th Radheshyam, education minister chuleh Tamenglong a Awangbou Newmai, Tamei MLA jin gun a pang ding ahi akiti. Kangpokpi, Kamjong, Pherzawl, Noney le Jiribam ho a jin gun a pang di chu district DC ho hiding ahi tin jong thuso chun asei in ahi.

Meghalaya a Eimi numei khat khamnathei Dk crore 4 val mantoh kimat tha

SHILLONG | August 12: Anti-Narcotics Task Force (ANTF), East Khasi Hill police hon Sunday nikhon Mawrynkneng mun a night super bus khat a konin khamnathei lou gram 930 aman uvin ahi.

Kum 25 a upa Veineithem Haokip, Churachandpur district a cheng numei khat khamnathei akimat thu toh kisaiya aman uvin, Juvenile Home a akoi tauvin ahi. Monday nikho a East Khasi Hills SP Claudia A Lyngwa in thuso miho akimupi na a khamnathei heroin hi dangka crore 4 leh crore 4.5 ho kikah vel man hidinga aseiyin ahi.

Sakhao thum a kikoi savon bom a khamnathei kimudoh ahi, tin Lyngwa in aseiyin ahi. Alangkhat a Sadar SDPO Jagpal Singh Dhanoa, in-charge, Anti Narcotics Task Force (ANTF) in thuso miho akimupi na’a bus sung akikhol masat na a hi khamnathei kimudoh lou ahi, tin aseiyin ahi. “Von kikoina cabine sunga achombeh a thil selna mun khat a kon chomkhat jouva kimudoh ahi”, tin Sadar SDPO in aseiyin ahi.

Jagpal in asei dungjuiya, gamsunga khamnathei kiman atam na pen ahi. Lyngwa in khamnathei kiselna mun hi achombeh a thil selna dinga kisem ahi’in, gamsunga khamnathei pohlut nadinga kiloikhomna phatah a kivaipo aum avetsah ahi, ati. Bus a hidan in aphal lou khamnathei ho poh nadinga cabinet kisem be ahi’in, hitobang thil kiselna thei mun aumna bus adang dang jong umding ahi, tin SP in aseibe in ahi.

Alangkhat a Lyngwa in SP panmun katuh a kon khamnathei thil hi 21-22 vei kiman ahitai, ati. Jagpal injong ANTF hon khamnathei gram 2300 aman ahitan, akiman hohi dangka crore 10 man hidinga aseiyin ahi. Khamnathei a kivei tamtah aumin, khamnathei hohi Manipur gam a kon kipan hilou ding ahi, tin Myanmar gam a kon kipo hidinga aginmona thu aseiyin ahi. Manipur Police hon gamgi juiya thil kipo ho phatah a akhol diuva temna kinei ding ahi, tin aseiyin ahi. North East gam a khamnathei kipo atam in, hiche hohi Meghalaya gam a ahin pohlut u ahi, hiche jeh a hitobang douna a gamdang dang hotoh natoh khom ding akideiye, tin aseibe in ahi.

ENPO in Nagaland kihomkhen loihen tia sei

Guwahati, August 13: Nagaland state sunga “Frontier Nagaland” kisem doh na din kiloikhom nahin nasatah in kiphinna anei in ahi.

National Socialist Council of Nagalim (NSCN-IM)in  Greater Nagaland semdoh nadia, Nagaland gamgi panga cheng Naga-inhabited areas, Assam, Manipur le Arunachal Pradesh ho hi lahlut nading lungtup anei ahin, Eastern Nagaland People’s Organisation (ENPO) ho toh lunggel akibang tapoi hijehchun ENPO in gamtum “Frontier Nagaland” thumna kiphinna nasatah anei in ahi.

Achesa nikho phabep  sunga chun ENPO in eastern Nagaland district ho Tuensang, Mon, Kiphire leh Longleng, Independence Day kin kiman na a pan la loudia kitepna anei a konna Centre sorkar in ENPO kiloikhomna hi Delhi tolpi a kihou khom na neidia akou ahitai.

NEFA (erstwhile North-East Frontier Agency) noiya aki umlai in boina emacha aumpon, developmental works ho jong akichang phanai, hinla tunvang nungsun in aum tan, chanvou khatcha akichang tapoi, kihinso nadia ngaikhoh sil le chen, neh le chah umlouva kihing thei ahipon, hijeh chun nampi khankho ding gelkhoh na jalla  gamtum ma kivaipoh nading kidei ahi, tin ENPO president Kekongchem Yimchunger in The New Indian Express thuso miho henga hetsah na aneiye.

Phatchesa kum 1957 lai chun,  Tuensang hi NEFA noiya um ahin, Nagaland in kum  1963 kum’a  statehood ahin mu a konna state sorkar noiya um ahitai.

District 4 ho hin Nagaland gam 40 per cent kilo jou ahin, hijongleh chanvou ema akichang pon,  government service natoh na jong population a te dinga percent 8 bou aqkichang pha e tin Kekongchem in aseiye. Chuleh Naga nam mi state chomma cheng Greater Nagaland a pan nom ho jong akikham poi, amavang tua chanvou chang joulou ho dinmun hin tohkhan te ati.

Frontier Nagaland demang kibol hin NSCN-IM, Greater Nagaland demand bol hi doudal dinga kisem ahipon, gelkhel pou hite, gamtum joh kidei ahi tin achainan aseiye.

Tripura: NLFT(SD) galguh bol 88, CM Biplab Deb anga kipeh lut

Agartala, Aug 13: National Liberation Front of Tripura (NLFT) galguhbol mi 88 in meithel choi pummin Tripura chief minister Biplab Kumar Deb anga kipeh thengna anei tao vin ahi.

Sabir Kumar Debbarma lamkaina noiya NLFT galguh bol hohi  Tripura gam, Dhalai district hopsunga um Chandraipara Higher Secondary School,  ground munna kipelut u ahi. Amahon akipeh theng niu chun, gal manchah, carbines thum, mortar khat, six 7.62 MM SLRs, Chinese rifle li, bore gun khat, 19 303 rifle, M20 pistol li , wireless set li le adang manchah phabep ape lut uvin ahi.

 Milun Deb  in, centre sorkaqr le NLFT galguh bol hon hemkham na anei tauvin, Tripura  tinglhang miho lampi dih lou ajot  ta pouvin lampi dih a ache tauve tin, Prime Minister Narendra Modi sorkar minphatna apen ahi, ajeh chu BJP government in tribal te dia socio-economic dinmun asem hoi jeh a hitobang lunggel khelna hi NLFT hoa konna hung kondoh ahi tin aseiye.

Kinnei na a chun, Deputy chief minister Jishnu Devbarman le MP Rebati Tripura tenin jong pan alan ahi. Milun Deb in lamlen sem hoi na din 1600 crore jong aphal peh in ahi. Gah hetbe thei khat chu kum 2005 a konna 2015 sunga hi NLFT hon  security forces mi 28 athat un  civilians 62 in jong hinkho achan loi.

Maharashtra, Goa leh Karnataka twilet na mun a kon Navy hon mi 14000 huhdoh; Thina toh Kerala a mi 88 leh Pune division a mi 43 lhingta

Panaji, Aug 13: Achesa ni 7 sung chu Maharashtra, Goa chuleh Karnataka tuilet namun ho a kon Indian Navy hon mihem 14000 tobang ana huhdoh e tin senior official khat in tunichun asei e.

Tuilet in atohkhah ho chu ‘Varsha Rahat’ kiti minvo noi a Navy thalheng lom 41 hon helicopter, kong le keng mang a genthei toh ho ana boipi jing ahi e.

Goa hopsung Flag Officer mopo Real Admiral Philipose Pynimootil in achesa kum 30 sung a dia Navy hon Maharashtra le Goa a kon mi 11124 leh Karnataka a kon mi 3115 ahuhdoh hi loupitah a Navy natohdoh melchih thei ahi e, ati.

Aman asei be na ah hiche phatsung chun Navy huikong in Karnataka ah kg 1305 a gih relief thil leh Maharashtra a kg 1890 a gih kithopina thil genthei toh mihem 5000 a ding in athahlut pih e, ati.

Hetding chu Maharashtra hopsung Kolhapur leh Sangli district, Karnataka hopsung Belgaum le Hampi chuleh Goa hopsung Mapusa, Pernem, Karnali chuleh Narela kho ho ah navy hon mipi kithopi nading in ngahmun ah apansa cheh un ahi.

Chuleh official hon asei be na ah Goa naval noi a kon tui jap them mi 40 Kokhapur mun le North Goa district ah tui jep them mi 12 tollut ahi in abanle August 7 a kon nidan 34 sung chun Belgaum le akimvel lah a kon mihem 2517 huhdoh nading in helicopter 17 manchah ahi e, ati. Hiche ho chung chon chun Dornier aircraft gei jong manchah ahi nalai e.

Flag officer pan aseikit na ah munsang lai a kido Kolhapur airport mun a Navy ho apansat jeh a mangang tah a huhdoh ngai ho huhdoh a umthei ahi in hiche hi Navy thusim a melchih thei tah ahi e, ati.

Kerala gamsung district 14 a twilet jeh a mi 88 athi in chule adang 40 akiholmo e, tin authority hon Tuesday nikhon asei uvin ahi.

Tuesday jingkah nidan 9 chan a kijihlut data dungjuiya thilsoh jeh a mi 34 jong kisukha ahi. Achesa ni phabep sung gamsunga go hattah ajuh jeh a tamtah in thina ato ahi’in, district chom chom a munchim thilsoh jong um ahi. Malappuram a thilsoh khohse pen a, mi 29 thi ahi. Gamsunga tua hi relief camp 1332 val kihong ahitai. Kerala Chief Minister Pinarayi Vijayan in Thiruvananthapuram adalha in twilet na Wayanad leh Malappuram mun avil ding ahi.

Indian Meteorological Department (IMD) in ahunglhung ding ni nga sunga gamsunga go ju nalai dinga asei ahi. Achesa ni phabep sung munchom chom a go hattah ajuh jeh a niseh kimanchah hojong nasatah a asuhboi ahi. Pune division a go hattah a ajuh jeh a twilen a, thilsoh a thi mi 43 lhing a chule midang thum kiholmo ahi, tia official hon aseiyu ahi. Divisional Commissioner’s Office in asei dungjuiya khosung 584 a kon mi 4,74,226 vel kipuidoh a Pune, Sangli, Kolhapur, Satara leh Solapur district a um shelter 596 a aumsah u ahi.

Pune division noiya um kho 46 hi kijon theilou lai ahi’in, agency chom chom a kon sepai 1079 (unit 105) in Kolhapur leh Sangli a kithopina natoh apat uva, kong 164 jong amanchah u ahi. District nga a um lei 66 jong twilet jeh a kikhah ahi. Rajapur leh Rajapur Wadi kho a ration 2.5 ton athah uva, medical camp doctor leh lou hojong athot u ahitai, tin Defence PRO in aseiyin ahi. Satara, Sangli leh Kolhapur a medical team 302 kiging jing a um ahi. “ATM 313 jong manthei dinga sum akoiyu ahi’in, adang 334 hi ‘maintenance’ abol nahlaiyu ahi”, tin thuso chun aseibe in ahi.

NDRF team hon Shirol leh Kolhapur a mihuhdohna natoh achepi jing nahlai uva chule gancha ho neh ding jong apoh u ahi. Achesa August nisim 11 nikho a CM Devendra Fadnavis in Chief Secretary, Resettlement and Rehabilitation (R&R) senior official ho, Disaster Management Department chule adang dang hotoh Ministry Control Room mun a kihouna anei kit u ahi.

KIO/KIA in Independence Day Boycott bol

Imphal, Aug 13 (ET): Kuki Independent Organisation/Kuki Independent Army (KIO/KIA) in ahung lhung ding 15 August India Independence Day ahitoh lhon’a Manipur  State sung’a Kuki chate chen na gamsung jouse’a  jingkah nidan 9:00 akipat nilhah nidan 1:00  chan boycott kibol ding ahi tin thuso chun aseiye. Chuleh KIO/KIO in phat atep sung’a jalhang akon le mimal akon sumkol veina leh che le va le koiman abollou ding injong hetsahna anei in ahi. Alangkhat’a emergency alhai Press/Media, houbung kin ho vang kilha kang ding ahi tin thuso chun aseibei.

Thuso chun aseibe na’a Kuki chate hi British vaipohna noiya gambeh thum (Country thum) tichu India, Myanmar le Bangladesh gamsung’a Kuki gam dekhen leh hopkhen peh ahi uve ti vannoi in ahet ahi jeh’a hi nam neopen kisoh ahi. British hon ana khentelsa Kuki gam thah tundoh kit nading’a 1987 apat mi tamtah in thal le manchah ahin dompan in chuleh hinkho tamtah jong achanlo taovin ahi ati. Hiche jeh chun amangsa Kuki chate chenna gamsung ho’a kivaipoh na khat noiya Nam khat’a umkhom theina ding’a hinkho phal ngam’a pan kila jing ding ahi tin Secretary Information & Publicity John Khongsai chun aseiyin ahi.

Hiche toh lhon’a India Independent Day 2019 kingon Churacandpur, Ukhrul, Chandel, Kangpokpi, Tengnoupal, Pherzawl District ho’a kon milham, simlai le adang dang ho jong Kiloikhomna akon gimbol le suhkhah ahi louna ding uvin Independence Day kiman nikho leh aki kangse ding uvin ngehna le hetsahna jong anei in ahi. KIO/KIA in lung tup Kukiland kimolso tokah’a India Independence Day, India Republic Day boycott kibol jing ding ahi. Chuleh Kuki State / Kukiland tundoh nading’a panla National Federation for News State (NFNS) kiloikhom na’a jao Kuki State Demand Committee (KSDC) hi KIO/KIA in jong malam’a jo chan’a kithopi nathei chan’a kithopi na kipe ding ahi tinjong thuso chun aseibei.