Thusoh chom chom

Thusoh chom chom

189
0
SHARE

MCSCCE 2016 Scam: Kal 8 sunga High Court in athu aseilhah dinga Supreme Court in thupeh nei

Imphal, Aug 10(ET): MPSC in abol MCSCCE 2016 thu a boina tuchan in athip hih laiyin, kum ni ache tah vanga Manipur High Court a case achelha jing in, candidate phabep in exam kivoh hai dinga thumna anei uvin, akilhengdoh Enquiry Committee thukholna dungjuiya adih louva thil kibol phabep aum’e, tin aseiyin ahi.

Tua hi Supreme Court in hiche thu a pan alah ahi’in, Nelojit Mayengbam kiti candidate khat leh adang khat in High Court a athu akiseisot den douna a Supreme Court a case apehlut ahi. Supreme Court in August nisim 5 nikho a thutanna anei dungjuiya High Court in order amu nikho a kon kal get sung- October nisim 9 kah a case aseilhah dinga thuhilna anei ahi.

High Court in hiche thu seina a phat sottah asuhlut jeh a SC in court demna aneiyin chule ajeh kisuh umlouva High Court in case aseisot den dan chunga jong alunglhai louna thu asei uvin ahi. Hetthei khat chu achesa April 12, 2018 kum a Supreme Court in akilhengdoh candidate phabep in SLP file abol na thu aseiya hi Enquiry committee in adihlouva thil kibolna um amudoh thu aseiho hetpehna aneiya, High Court in athu gangtah a aseilhah dinga thupeh anei ahi.

Enquiry committee in amudoh lamdih louva thil kibol holah a answer script phabep a supervisor soi, examiner soi, invigilator soi ho aumlou thu jong pang ahi. Examiner ho soi umlouva answer script tamtah a mark akilhelna jong um ahi’in, question khat a mark avel vel a akipehna jong um ahi. Hiche thu hi candidate phabep in dohna anei Forensic expert honjong photchenna aneiyu ahi. Examiner hon akhol loulai answer script tamtah jong aum’e, tia enquiry committee hon amudoh hi kidang pen tah ahi.

Hiche tobang ho thu akiseidoh jouva Supreme Court Judge hon exam abon a suhmang a athah a bol kit ding hibou alampi ahi, tia aseiyu ahi’in, ahivanga enquiry committee in akholdoh ho chule SC in ngaidan asei nunga jong state sorkar ahilouleh MPSC in themmona nei ho kholna dinga pan alahlou hi vangset umtah ahi. High Court injong athu seilhah sanga phat asuhmang jing joh a tuchan a akhongai hi lungdon umtah ahi’in, hitia thil kibol hi thil dihlou bol ho tha kipehna chule candidate lungtup neiho dinga lung lhahdahna hiding ahi. Ahivanga tua hi Supreme Court in hiche thu kal get sunga seilhah dinga High Court thupehna anei ahitai.

Myanmar a munchim jeh a mi 41 thi; Mi 80 val kiholmo

Mawlamyine, Aug 10:  Myanmar a mun chim toh lhon in tu chan in mi 41 lam ana mollem tan ahi. Munchim toh lhon in emergency worker ho in lei ana khot doh uvin thilong ahol jing uvin ahi. Hiche munchim na mun chu Mon State a Ye Pyar Kone kho a ana soh ahin, inn 27 lam munchim in ana dal khum in ahi akiti.

Tu chan in akitong kha mi 47 lam ahi tin township administrator Zaw Moe Aung in thuso miho ang a ana sei in ahi. Tu chan a akihol mo hi mi 80 vaal lam ahinalai in ahi. United Nation akon thuso kimu dungjui in Myanmar a go hajuh jeh in mi 12,000 lam in akon in akichon doh gam taovin ahi akiti.

Jammu and Kashmir UT Lt. Governor podia  Vijay Kumar, IPS ginmo um; Union Territory a J&K umsot louding ahi tia PM in sei

Srinagar, August 10: President Ram NathKovind in Jammu and Kashmir Reorganisation Act, 2019 phatsah na anei tai. Bill noiya hi  union territories – Jammu & Kashmir le  Ladakh joh kiti ding ahitai, bill kiphat sahjou chun Centre in Retired IPS officer Vijay Kumar leh Centre’s Special Representative Dineshwar Sharma teni hi Jammu and Kashmir UT noiya Lieutenant Governor cheh podin phatsah na aneiye tin thusoh jong aging doh in ahi.

official thuso akimu loulai vang in, Jammu and Kashmir, governor dia ginchat um IPS Vijay Kumar vaang hi mipi hon social media mangchan akipa pi gam taovin ahi.

IPS Vijay Kumar hi tupet in  Governor of Jammu and Kashmir, Advisor in apang in ahi.  Amahi 1975-batch, IPS officer of Tamil Nadu cadre ahin, tumasaqng chun, Ministry of Home Affairs (MHA) niya senior security adviser in jong apang in ahi, thilpha tampi tong doh jongle gah hetthei pen chu Tamil Nadu gamma, a sandalwood smuggler Veerappan thaq nadia kigong  ‘Operation Cocoon’ lamkai luboh ahi. Amahi Director General of the Central Reserve Police Force (CRPF) a kumni apang in hiche sung chun  Naxal ho mi 75  athat in ahi.

Jammu and Kashmir, Article 370 noiya kehni kiso ding thu, ahung gindoh kal ni 3 lhinnin, Prime Minister Narendra Modi, in hiche chung changa, athusei na minute 40 val  televise akibol in hiche sung chun aman Jammu and Kashmir hi Union Territory noiya sottah umlou ding ahi tin aseiye chuleh Jammu and Kashmir in development thah thah amu ding amavang Ladakh hi Union noiya umjing ding ahi tin aseiye.

Jammu and Kashmir legislature hi Puducherry tobang hiding  chuleh  Ladakh hi Chandigarh toh kivai pohna anei ding ahin,  Ladakh,union territories lah a khat ahitai ti a thenso na hi  October nisim 31 leh SardarVallabhbai Patel pen kum 144 nikho toh kibang a chelha ding ahi.

Chuleh Article 370 kilah doh deilou najeh a kashmir mi, ukil khat in high court na case khat ape  lut tan ahi.

Hengjang toltha na thilsoh hi KLO/KLA ho natoh ahi, tia KNF-N in ngohna nei

Imphal, Aug. 10(ET): Kuki National Front (Nehlun) in achesa July nisim 10 nikho a Keihao leh Hengjang kho kikah, Island (Phailengmol) Block, Kangpokpi district a Hengjang kho haosapu leh atupa kaplih a SoO soi kaina a pang KNO ho ngohna anei uvin ahi.

SoO  a panglou Kuki thingnoi kiloikhomna KNF-N Information and Publicity Secretary, Gou @ Kuki in thuso anei dungjuiya, Department of Investigation in thukholna phatah a anei jouva Hengjang haosapu Thangneo Kipgen leh atupa Thangminlun Haokip that ho hetdohna anei ahi, ati. B Gamnom haosapu Henkhothang Kipgen chapa pasal 2 leh KLO/KLA thingnoimi 3 Hengjang kho haosapu leh atupa thana a pang ahi, tin aseiyin chule Henkhothang Kipgen chapa teni hi Paotinthang @ Paotin Kipgen leh Ngamkhogin Kipgen ahi, ati.

Toltha na thilsoh tohgon sem lamkai (mastermind) hi B Gamnom haosapu Henkhothang Kipgen leh asopipa Demkhosat Kipgen ahi, tin aseiyun, amani hin achapa teni atil ahi’in, Chungsat Khongsai, Home Secretary, KLO/KLA in akithopi a galmanchah chule thingnoi apeh ahi, ati. Gampum, Saikul Sub division a um KLO/KLA hohi Centre chule state sorkar toh Tripartite Talks a signatory holah a pang ahi’in, SoO ground rule palkeh a themmona neilou khosung haosapu leh atupa tha na a pan alah jeh a state Home Department in KLO/KLA akholding ‘a aseibe in ahi.

Ipijeh a sorkar in thilsoh agelkhoh louham chule tuni chan a themmona neiho lungmong tah a alhatsah a chamlhatna apeh ham, tin KNF-N thuso chun aseiyin chule kho haosapu leh atupa that a pang hohi kiloikhomna in atohga apeh leh sorkar chule mipi in KNF-N themmo achan louding ahi, tin aseibe uvin ahi.

Nagaland PDA in Article 371(A) thu a Centre in kitepna asem kipapi

Dimapur, August 10: Centre in Article 371 (A) thu a kitepna anei hin Naga peace talk leh kihouna umho lamdih a ache ‘e, ti kinepna apeh ahi, tin Peoples’ Democratic Alliance (PDA) in aseiyin ahi.

PDA chairman Chingwang Konyak leh Co-chairman Temjen Imna Along in Saturday nikho a thuso aneina a Constitution a kipe Article 371(A) kitongkha louding ahi tia phondohna neiya Prime Minister Narendra Modi leh Union Home Minister Amit Shah chunga akipana thu asei lhonin ahi. Nagaland Governor RN Ravi in Article 371(A) hi Nagaland gammi ho henga kipehna theng akineina ahi, tia asei jeh a jong apachat nau thu aseibe uvin ahi.

“Naga Peace talk’ amachal jing nadinga PDA in tosotna lhingset apeh ding ahi’in, ja um chule san thei thulhuhna aganna thei pen a akisemdoh theina dinga pan kila ding ahi, tin PDA thuso chun aseiyin ahi. Achesa Wednesday nikho a BJP Legislature Party lamkai leh Deputy Chief Minister Y Patton leh Along (state BJP president leh minister) in Jammu and Kashmir gam a Article 370 leh Article 35(A) suhmang nadinga hangsan tah a pan la a Modi leh Shah chule NDA kiloikhompi ho pachatna thu asei ahi.

Jammu and Kashmir ‘special constitution provision’ kisuhmang hi Jammu leh Ladakh miho dinga kinepna thah leh thahat kibena ahi’in, Kashmir Valley a imalam jouse a khantouna aum thei nading ahi, tia lamkai tenin asei ahi. Jammu and Kashmir gamsung dinmun hi Nagaland toh achom beh ahi, tia asei lhon a chule Naga nam mite lungtup molso nadinga Nagaland BJP in Naga dang jouse toh pan alahkhom ding ahi, tia jong kitepna aneilhon ahi.

KNF Department of Narcotic Cell in amat khamnathei Dk. crore 2.5 vel man Kangpokpi CSO hon meiya hal

Kangpokpi, Aug 10(UNA): Kuki National Front Department of Narcotic Cell in Kangpokpi district a khamnathei dangka crore 2.5 vel man aman uvin, Kuki Inpi Kangpokpi district leh CSO Kangpokpi ho khut a apelut uvin, mipi umna a Saparmeina mun a Saturday nilhah a meiya ahal lha tauvin ahi.

Akiman khamnathei holah a hi WY tablet, Heroin (no 4) leh brown sugar pang ahi. Lamminlun Singsit, General Secretary, Kuki Inpi Kangpokpi District in khamnathei ho meiya ahal pet uva thuso miho akihoupi na’a, khamnathei joh a, aneh a chule Kangpokpi district sunga kum phabep sunga khamnathei bola tam tah jeh a civil society organization hon district sunga thilse asolou nadinga khamnathei douna a pan lentah alah ahi, tin aseiyin ahi.

Khamnathei douna a pan la a Kuki National Front (KNF) hon tu naicha WY tablet, No 4 leh Brown sugar panna a khamnathei tamtah tu naicha chun aman uvin Kuki Inpi Kangpokpi district leh CSO Kangpokpi khut a apehlut ahi, tin jong aseiyin ahi. District sunga khamnathei douna chule aphatlou thu hillhang nadinga mipi masang chule media anga akiman khamnathei ho meiya kihal ahi, tin aseibe in ahi.

Kuki National Front in khamnathei douna chule district khangthah ho dinga pan alahna Kuki Inpi leh CSO Kangpokpi in pachatna thu aseiyin, khamnathei district sunga suhmang nadinga mipin atosot uva chule akithuto diuvin temna aneibe in ahi. India sorkar chule Manipur sorkar toh Tripartite Talk sem a pang Kuki National Front in United People’s Front (UPF) noiya tukum February lha a kon khamnathei bol, khamnathei joh  chule thilse kibol ho douna dinga department thah asemdoh ahi’in, gamsung miho phatchomna ding ahi.

Athah a kisemdoh department hi Department of Narcotic Cell tia kiminvo a Director lamkaina a kipo ahi. Department of Narcotic Cell akisemdoh jouva thingnoi kiloikhom hon Kangpokpi district sunga Narcotic department noiya ‘ban’ kibol thil jouse akha soh ahitan, khamna thei douna ding a pan sangtah alah u ahi. Department thah in hitobang thil bol hon society ding gelna a angah diuvin aseiyun chule dan palkeh ho chunga action lah dinga jong gihna anei uvin ahi.

Article 370 kilahdoh National Conference in SC a hehding

New Delhi, Aug 10: National Conference (NC) in Jammu and Kashmir mipi deina donglou a Article 370 lahdoh a aum chungchang Supreme Court ah tunichun hehna lekha apelut tan ahi.

Lekha a chu Article 370 paidoh dia Parliament le President in aphatsah hi dan toh kikal, manchah thei lou dan a phondoh dia NC chun ngehna abol ahi.

Hiche ngehna chu Lok Sabha a NC member jong hi Mohammad Akbar Lone le Justice (Retd) Hasnain Masoodi in NC thalheng a abol lhon ahi.

Lone hi Jammu and Kashmir Assembly Speaker jong ana hi a chuleh Masoodi hi Jammu and Kashmir High Court a judge jong ana hi sa ahi.

Ama ni hin Jammu and Kashmir Reorganisation Act, 2019 le Article 370 chung a Presidential Order hi Supreme Court a chouna abol lhon a, dan phondohsa chu man lou dia ngehna jong abol tha lhon ahi.

Ngehna bol tenin danthah kibol chu India danbu Article 14 le 21 noi a Jammu and Kashmir mipi ding a simthei hilou ahi chung chang aphondoh dia ngehna jong abol lhon ahi ahi.

Ama nin asei be na ah Article 370 hi Jammu and Kashmir mipi phatchom nading ngaito na a chingthei tah a kigong ahi e tin aseilhon in ahi. President ib asodoh order masa a chu Article 370(1)(d) chanvou dang Jammu and Kashmir kipeh nadia kigong chu J&K le Union of India kah sem hoi mo tei nadia Article 370 chu centre government in akhel ahi e tia ngohna apehlut lhon ahi.

Hetding chu Jammu and Kashmir Union Territory 2 kisona thulhuh chu Friday nia President Ram Nath Kovind in phatsahna apeh ahi in hitolhon a October 31 le UT thah teni kivaihomna chu kipan bep ding ahi.

Hiche October 31 hi home minister masapen Sardar Vallabhbhai Patel pen nikho ban a Jammu and Kashmir India state khat a lahlut ahi melchihna a bol hiding ahi.

Geldoh ding chu Jammu and Kashmir boina suh jangkhai thei nading tupna a Parliament in hapta masa a chu UT 2 asodoh ahi.