Thusoh chom chom

Thusoh chom chom

184
0
SHARE

Thangmeiband a nidan 12 bandh umjeh a kimanchah boi; kijotna nei simlai mi 3 kisukha, JAC kiman ho Aug 9 nidan 10 kah la lhadoh ahilouleh kiphinna kehlet hidia gihna neiyu

Imphal Aug 8(ET): Babysana thi thu a kisemdoh JAC in nidan 12 Thangmeiband kimvel a bandh abol jeh uvin, akimvel a kimanchah nasatah in aboiyin, lamlen a gari lhai alhom in chule dukan hojong akikhah in chule kiphinna abol nauva simlai thum akisukha in, police gari ni jong ase in ahi.

Thangmeiband kah bou hilouva akimvel Thangal bazaar a dukan hojong bandh in atongkha in, akhah uvin ahi. Thangmeiban a kiphinna bol mi tamtah akikhom uvin, gari alhaithei louna dinga lamlen a tyre meiya ahal uvin ahi. Kiphinna bol hon Standard Robarth School Principal leh founder Landhoni lim kisemthu Khuyathong Polem Leikai a meiya ahal uvin, Landhoni tolthat ahi, tin asam uvin chule Babysana chunga thudih a thutanna anei diuvin thumna anei uvin ahi.

Thangmeiband vengsung lamlen a jong khom ajam uvin, lamlen akhah uvin ahi. Alangkhat a state sorkar in thilse soh aumlou nadinga Thangmeiband kimvel a police khoutah a akoi uvin, police hon Thangmeiband vengsung lamlen jouse angah uvin ahi. Kiphinna bol ho nomang nadinga tear gas leh smoke bomb phabep jong police hon akap uvin ahi.

Alangkhat a Churachand Higher Secondary School simlai hon Babysana thi demna leh thudih a thutanna aneidiu thumna a kijotna anei uvin ahi. School mun a kon metre 200 vel a bou gamlha Chief Minister’s Secretariat chan kijotna neidiu atiu ahi’in, police hon alamtin vang uva New Checkon a kon Hatta Gollapati langa akijot uvin ahin, Minuthong lei a police hon analamtin uvin ahi. Simlai holeh police ho kikah a kinotona sangtah aumin, kiphinna bol ho suhthip nadinga police hon tear gas leh mock bomb akap uvin ahi.

Kijotna neiya simlai hon lamlen pam a police hon angah Gypsy ni song a asep uvin asuse uvin, Minuthong mun a jong nasatah a kinotona aumin ahi. Police hon tear gas akap nauva simlai khat akeng akisukha in, ambulance a apo uvin, hospital alhut tauvin ahi.

Hiche phat don ma ma a Lamlong Higher Secondary School, Khurai a kai simlai honjong CM Bungalow lang ajon uvin, kijotna anei uvin Minuthong kom a police hon analamtin uvin, tear gas leh mock bomb a ano nauva simlai ni akisukha in ahi. Kijotna anei sung uva  New Checkon leh Hatta a dukan jouse akhah uvin ahi. Model Higher Secondary, Tera a simlai honjong kijotna anei uvin, ahin, akisukha aum pouvin ahi. Thoubal district mun chom chom a jong school chom chom a kon simlai hon ‘human chain’ asem uvin ahi.

Bandh umna Thangmeiband a bandh akhoh dehset in, kiphinna bol tamtah in lamlen akhah uvin, song leh thing ho lamlen a ajam uvin, tyre hojong meiya ahal uvin ahi. Alangkhat a Thangmeiband a torch rally bol dinga tohgon nei ya JAC co-convenor leh member khat police hon amat a ni 15 jail a umdinga aseilhah u ahitai. Jingkah a kon khothim chan geiya mun chom chom a numei hon JAC lamkai teni alhadoh diu thumna a toumun kiphinna abol uvin, sorkar in thumna asan louleh mipi lunghanna ato diu ahi, tin gihna jong anei uvin ahi.

Alangkhat a Babysana thi thu a kisemdoh JAC in akiman member ho August nisim 9 jingkah nidan 10 kah a alhadoh lou ule kiphinna kehlet dinga gihna aneikit uvin ahi.

Shillong Manipuri Students Union (SMSU) in Standard Robarth Higher Secondary School a simlai N Babysana Chanu (14) thi demna anei uvin ahi.

Achesa July 18 jingkah a school hostel sunga akikhailih sa kimudoh ahi’in, Chongtham Thangamba Meetei, SMSU President in thuso aneina a school authority ho Union in demna aneiye, tin aseiyin chule chapang chunga hitobang thil lhung hi mopohna aneilou jeh u ahi, ati. Thilsoh chungchang dihtah leh gangtah a thukholna anei diuvin thumna jong anei uvin ahi.

Chule state sorkar in gamsunga um private hostel hon ajuiding dan (rules and regulation) khoutah asempeh ding, ngaichat ahitoh kilhon a aphat tin a avil diuvin aseibe uvin ahi. Thilsoh a themmona neiho khoutah a gotna peh dinga Union in thumna aneibe in ahi.

Bandh bol got jeh a JAC co-convener leh member khat ni 15 jail a kikoi

Imphal Aug 8(ET): Co-Convener, Joint Action Committee, Pratap Leishangthem leh member, JAC, Elangbam Joykumar ni 15 jail a umdinga asol tauvin ahi.

Babysana thi thua kisemdoh JAC lamkai Leishangthem Pratap (51), s/o L Ibohanbi, Thangmeiband Sinam Leikai, Co-Convenor JAC leh Elangbam Joykumar (49), s/o (L) E Mani, Lalambung Thakhellambam Leikai, membr teni hi Wednesday nilhah a amat uva IPC chule CLA Act section chom chom noiya FIR asemkhum uva, tuni a Chief Magistrate court a apuiyu ahi.

Court in August nisim 22 nikho chan jail a umdinga ngehna asan peh tan ahi. August nisim 7 jan nidan 7.30 don a IO kipehlut na a Th Chitaranjan, convenor, JAC in soi akaina press note a Thangmeiband kah a August jingkah nidan 6 a kon nilhah nidan 6 chan bandh bol dinga kouna aneiya chule August nisim 9 jingkah nidan 5 a kon jankim chan gamsung pumpi a bandh bol dinga kouna anei ahi, ati. Thangmeiband a a Meira rally bol dinga tohgon jong aneiyu ahi’in, lamlen a kiphinna sangtah bol ding chule dan dihlouva mipi khop khom a chamna suhboi nading tohgon aneiyu ahi, tin jong asei uvin ahi.

Hiche masanga jong bandh leh strike phabep abol jeh uva niseh kimanchah boijing ahi’in, kiphinna abol jing jeh uva themjilna mun holeh simlai hojong atohkhah ahijeh a police hon thukholna anei ahi, ati. Hiche thu phatah a kholna akineiya chun Thangmeiband mun, DM College gat maiya toumun kiphinna agon masat u akihedoh in, aban ban a JAC member leh kiphinna bol hon Khuyathong leh Lilasing Khongnangkhong lamlen atin uva, kijotna anei uva, Landhoni lim kisem thu, tyre ho meiya ahal u ahi’in, strike jeha kiphinna jatchom chom um hin, JAC hon bandh akou avettup joulou avetsah ahi.

Kiphinna bol hon boina tamtah asemdoh a chule Cheirap Court a jong hearing umni a kiphinna sangtah abol uva, police duty bol ho song, ahtui se, twi bottle ho a ase u ahi’in, athilbol uhin dan sangtah a asuhset jeh a Greater Imphal a CrPC kikoi ahi’in, avel a August nisim 7 nikho a THAU ground a kihouna anei uva bandh bol dinga kouna aneiyu ahi. Thudohna akineiya chun Th Chittaranjan Ngangom Tejkumar, Heisnam Foren, Huirem Romenjit, RK Tharaksana, Ema Gyaneshwori, Ibechoubi leh adang dang hi tohkhompi a aseiyi ahi. JAC member dang ho mat dinga a inn u kholna um ahi’in, vengsung mihon police ho lut ding akha uva, twi pipe aman uva lamlen jouse akha jeh uva ‘law and order’ boina sang ahi, tin IO a chun aseiyun chule adang hojong mat angaidan thu aseiyin ahi.

Alangkhat a Court a kon ahungdoh jouva Pratap in thuso miho akihoupina’a chun ‘bail’ ngehna kinei louding chule dan dungjuiya kichelha ding ahi, tin aseiyin ahi. Thangmeiband kimvel a tuni a um bandh chule JAC in nikhat (nidan 24) gamsung pumpi a bandh bol dinga kouna anei jeh a lamkai teni police hon amat ahi. Sorkar langa kon Babysana thi thu a thuso aumlou jeh a JAC in bandh akou ahi.

Pranab Mukherjee in Bharat Ratna Award kisan

New Delhi, Aug 8: Tunichun India President 13 channa Pranab Mukherjee in Bharat Ratna kipaman akisantan ahi.

Mukherjee ban a kipaman sang ho chu aumtalou social activist Nanaji Deshmukh le aumtalou lasa minthang Bhupen Hazarika jong damlou nung a kipe ahilhon e. Mukherjee hi India kipaman sangpen chang dia President Ram Nath Kovind in tukum January lha a chu ana lhendoh ahi.

Kipaman sangpen changdia lhendoh ahi a kon January lha chun twitter ah PM Narendra Modi in Pranab Da hi tukhang a miching inei ule pontho tah a agam a dia natong jing le achihna kibahpi tamlou, hitobang kipaman pehdia aum hi kipa umtah ahi e, ati.

Chutobang ma chun Pranab Mukherjee kipaman sang peh ahi nachung ah congress lamkai Rahul Gandhi in jong gam le nam a dia alung atha mang a pan hatah a hin la jana a kipaman peh a aum hi kiletsahpi thei tah ahi e tin twitter ah atahdoh kit e.

Hetding chu gam le nam a dia natong insung West Bengal gam a Mukherjee chu achesa 1935 kum a ana peng a achesa 1969 kum a Rajya Sabha a lhendoh ahi chan a chu journalist a ana pang ahi.

“Meet the Heroes” conference sunga “Mizo heroes” 144 jaana sangtah kipe

Aizawl, Aug 8: Janhi chun “Meet the Heroes: Peace Pays” ti thupi manchan Aizawl tolpi a conference achelhan ahi. Hiche kin na hin, Mizo National Front (MNF) noiya chamlhat galsat na dia panla Mizo Hero’s tia kiminvo galhang mi 144 ho chu jaana sangtah apeovin ahi. Amaho ho hi chamlhat galsat laiya chu Arakan State jonna  China a kon a Myanmar chan kenga lamjot ahiuve.

Ministry of Tribal Affairs, Mizoram Tourism department leh North Eastern Council (NEC), kithokhomna noiya kigong kin hi  kum 1986 kumma Mizo Peace Accord soi kai nadia panmun lentah hinla  MNF  ho geldoh na dia kigong ahi.

Jin Gun na pang Mizoram Chief Minister, Zoramthanga in kum1986 kumma chamlhat galsat MNF ho thohgimna ho jalla Mizoram lungmonga aum thei h hin, tulai khangthah ho ahetthem thei na diuvin seiyin ahi. Aman gam ngailut na neidingin mipi te temna aneiyin chuleh lekhabu  “The Valorous Walk to China”  leh   “Expedition to China” jong athenso in ahi.

Mizoram Tourism minister, Robert Romawia Royte, in kibol lona aseiyin ahi. Aman, Mizo Peace Accord hin tourist ahilouleh gamvah mi ho gamsunga akou ding adeisah dan jong aphongdoh e.

Conference, a hin minister, legislator, official le party worker ho jaonan  mipi  144 vel in pan alaovin chuleh MNF galhat mi 77 ho chu geldoh na le jana apaovin ahi.

MNF, galsat hohi, India sorkar sepai ho toh kisat na dia Arakan State a konna China chan kenga lam ajot uva, group 2 a akikhen uvin, amahon Myanmar gamsung aho pa uva, go le dai thoh pum a  Mizoram gamma meithal leh manchah ho toh hung kinung le kit ahiuve.  Mizoram hi 1972 chanin Assam sunga um ahin, mizo ho chenna lhang sunga kum 20 val kel lhah nunga jong centre sorkar in donse a akoilou ahin, mipi te hahsat na akile theina dia MNF pan lah na jalla  June 30, 1986,kum a  MNF leh  Union of India in accord soi akai a,  February 20, 1987 kum a hi India dinga state 23 channa a Mizoram hung pang pha ahi.

Lha 1 sung’a Khuga Dam Canal nakitohna Bill Dk. Crore 15 Dept. in asuhcen louva suhset ahi le Dept. in mo akipoh ding ahi tia Contractor hon sei

B.Lalboi Gangte

CCpur. August 8 (ET):  Mangbeldam @M. Dama, Special Contractor leh President, Khuga Contractors’ Association in tuni jinglam nidan 9:30 in Lingsiphai ah Press/Media ho akimupi in, Khuga Dam natoh na bill bang khai a um nalai ho muthei nading’a pan athah a lah thei a aum nachung’a kipathu aphongdoh in ahi.

Dama in aseina ah IFCD in Phatsot tah Khuga Dam khohsah louva akoi nung’a IFCD Minister, Letpao Haokip amatah in vilna ahungnei nachung’a kipa thu aphong in, Khuga Dam hondoh ahi kal kum 10 lang ache tan ahin tuni chan ah phatchom na sang in boina lhun naleh mitlhi lonna het leh jah in aum jing in ahi ati. Aman aseibe na ah Khuga Dam jeh hin kumseh leh mihem 4 le 5 tobang  in thina atoh jin gam acre tamtah suhset ahi ban’a Canal chim lhah jeh’a Phailei tamtah aset lon, Contractor tamtah in insung a phachom diham tia natoh bangkhai tampi dalha a natoh abol vang in Dk. Crore 15 val pending bill aum jeh hin Contractor tamtah in genthei na sangtah atoh uvin Khuga Dam left leh right canal, kilometer khat jong twilong Joulou ahina ah loubol miten twi a poimo teng uleh amaho sum, tha le-jung akisen ban uva mi kiphal hon canal a twi alontheina dia asem hamham uvin lou bolthei na mai mai dia asem jiu ahi atil. Chule Dam hin Power apehdoh lou keu hilouvin Electric Department a Dk. lakh 50 lang bat anei jeh uva power supply jong disconnect bol ana hin, Left leh Right Canal gate hon na dia Dk. 2,000 3,000 asen uva generator akhel va Lourup ho kitou del u  ahi ati.

Hitobang dinmun ahilai ah IFCD in agel khoh ah pan alah na Contractor honjong kinepna lentah akineiyin, pending bill Crore 15 lang um hojong akinthei lam ah apehdoh ding in ngehna abol in, hiche pending bill ho tuni apat Lha khat sung’a department in ahin semtoh lou uleh Khuga Dam, Left leh Right Canal, Head Works Spillway a Contractor hon anatoh nao chung’a natoh thilbol anei  uleh koiman ima cha aseithei louding leh department in mo akipoh ding ahi dan  mipi in hetpeh ding in ngeh na aneiyin ahi.

Sorkar in Naga boina suhlhap ding agelkhoh poi: NSCN-IM

Guwahati, August 8: Indo-Naga peace talk a boina phabep aumin, NSCN-IM in Prime Minister Narendra Modi henga lekha apeh nauva Naga thu suhlhap ding India sorkar in agelkhoh dan atahsan lel nau thu asei uvin ahi.

NSCN-IM Chairman Q Tuccu leh general secretary (Chief negotiator) Th Muivah in soi akaina lekhathot a chun kihouna hi level sangpen a seiding ahi’in, ahivanga Governor’s level a akisunem’e, tin alunglhai louna thu aseilhon in ahi. “RN Ravi, Interlocutor in achesa July nisim 26 nikho a Indo-Naga thu (political problem) ho lhathum sunga seilhah nadinga kipeh detna anei thu asei kakipah uve”, tin lekha a chun asei uvin, ahivang a party tenin kihoulhahna anei theilou flag leh constitution tobang thukhoh tah phabep um nalai ahi, ati.

Sorkar kikhel chan a Prime Minister hon hiche thu hi ‘level’ sangpen a seiding a kitepna aneiyu ahi, ati. “India Prime Minister in kouna eipeh jeh uva India a kahung u ahi’in, kihouna avel vel a lolhingtah a kisem a, achesa August nisim 3,2015 kum a PM umna a Framework Agreement soi kaina um ahi. Ahivanga kihouna hi tua ‘Governor’s level’ a bou akisuhnem hi kidang kasa uve”, tin lekhathot a aseibe uvin ahi.

Achesa kum 22 sung alangni in lungneng tah a kihouna aneiya chule thulhuhna aumthei ding gelkhohna kinei ahi. Ahivanga tu naicha kikhelna umho chule thil umdan hohi lungdon aumin, hiche thu kiseilha thei ding hinam tihi lunggel a ginchat lelna kinei ahi, tin aseibe uvin ahi.

India sorkar in Mega Food Park sahding aphatsah ahi: Rameswar Teli

Imphal, Aug 8(ET): India sorkar in Manipur gam a dangka crore 80 a Mega Food Park sah dinga phatsahna anei ahi, tin Minister of State, Ministry of Food Processing Industries, Rameswar Teli in Thursday nikhon aseiyin ahi.

Pradhan Mantri Kisan Sampada Yojana thu a Hotel Imphal a tuni jingkah a nikhat workshop abol nauva Minister Teli in houlimna aneiyin, Mega Food Park project a Centre in dangka crore 50 subsidy apehding ahi, ati. Entrepreneur Ministry ho dinga fund alhahsamna aumpoi, tin aseiyin chule aumsa fund ho lahna dinga sorkar henga proposal thot dinga tilkhouna thu jong aseiyin ahi.

Guest of Honour a pang Textiles, Commerce and Industries Minister Thongam Biswajit Singh in scheme phatchomna ho entrepreneur hon akilah diuvin kouna aneiyin ahi. Entrepreneur hohi phaicham district a bou umdiu ahipon, unit hi hill district a jong akehlet uva chule gamsung mi ho tohmun apeh diuvin tilkhouna thu aseiyin ahi. Gamsunga entrepreneurship amachal nadinga tilkhouna thu Biswajit in aseiyin, entrepreneur atam channa tohmun neilou jeh a boina ho kisulham ding ahi, ati.

Centre in Small State Development Police asemdoh dinga Minister pa in temna aneiyin chule sorkar leh bank kithopina beiya lolhing tah a pan la a entrepreneur ho apachatna thu aseiyin chule amaho hin scheme kisem ho amuthei nading uva department a ‘link’ abol diuvin temna jong aneiyin ahi. Aumtalou External Affairs Minister Sushma Swaraj jana pehna jong anei uvin, ‘minute’ khat thipchet a aum uvin ahi.

Kin-gon a Chief Secretary Dr J Suresh Babu, Additional Secretary, Ministry of Food Processing Industries Dr Rakesh Sarwal, Principal Secretary, Commerce and Industries, Manipur government P Vaiphei, Director General, Indian Chamber of Commerce Dr Rajeev Singh leh adang dang jong apang uvin ahi. Workshop hi Indian Chamber of Commerce in Department of Commerce & Industries, Manipur government chule Ministry of Food Processing Industries, India government tosotna a abol ahi’in, Kisan Sampada Yojana thu hillhang ding bidoi neiya abol u ahi. Gamsunga um entrepreneur leh banker hojong workshop a apang uvin chule official leh resource person hon scheme thu a houlimna anei uvin ahi.

August 16 a kon September 30, electoral roll suhchetna na dia EVP kimangcha ding

Imphal, Aug 8(UNA): Special Summary Revision-2020 tohgon na noiya Election Commission of India (ECI)  letter no. 23/2019-ERS (vol.III) dated July 25 and 31, 2019, sunga hi Chief Electoral Officer (CEO) Manipur in Electors Verification Programme (EVP) launch abol ding ahin,  August nisim 16 a konna September nisim 30, 2019 sunga hi electoral roll sem tupna umding ahi.

Special Summary Revision-2020 tohgon na noiya , Lamphelpat, CEO office munna  CEO Manipur P.K Singh in thuso miho toh kihoulimna anei na a  chun, Electors Verification Programme (EVP) a konna hi mipi ten, changval hihen insungmiten  electoral roll toh kimatna neiya  boina neiho kisuhlhap pehding chuleh  polling station ho jong hetchen thei ahina banna electoral service hoisah ding lungtup kinei ahi tin aseiye.

EVP mangcha a electoral roll sempha nomhon Indian passport; driving license; Aadhar; ration card; government/semi-government official identity card; bank passbook leh  farmer’s identity card ho vetsah a semjeng thei ahi. electoral details ho hi voter helpline-mobile apps; NVSP portal;ahilouleh  Common Service Centres (CSCs); 1950 helpline/district contact hoa form ki fill up chaisa lekhapeh chu   Booth Level Officers (BLO) ahilouleh  Electoral Registration Officers (EROs) ho komma pehlut thei hi. ECI in mipi te henga colour photograph leh lim kicheh tah pehlut tha hen tin aseiye. Semphatna natoh hi September 1 a konna nisim 30, 2019 chan chelha ding, boina neihon  October 15 a konna 30 november chan vel vetna neithei ding , akichai ho tadoh na hi January 1 a konna 15, 2020 chan chelha ding ahi CEO in heath na aneiye.

common service centre anaipen munna cheng10 peh a kisem thei ahin chule tumasanga

thuso miho toh kihoulim na a chun lhakehtasa Gouminlen Singson, MP election, west Bengal munna hinkho chan pa hi ASP ( L/O) Kangpokpi district escort a jong pang ji ahi chuleh

 lhakehtasa W. Lalkham Thangneo, MP election laiya hinkho chan pa loinu chu CEO in kithopinan ex gratia lakh 15 cheh apeovin ahi.