Thusoh chom chom

Thusoh chom chom

162
0
SHARE

‘Koirao tribe’ hi ‘Naga tribe’ a um ahi, tia Thangal Union in suhthengna neiyu

Senapati, July 14(ET): Thangal Union (TU) in scholar phabep in asei tobang a Kuki tribe toh kisaina akinei poi, tin suhthengna thuso anei uvin ahi.

Dikapa K, General Secretary, Thangal Union (TU) in thuso aneina a ama leh ama scholar tia kisei hon semthu thusim chule jouthu aseiyu akihe’e, tin aseiyin chule ‘Koirao tribe’ kiti Thangal Tribe leh Manipur a Kuki Tribe ho thu a kijih article jong asei uvin ahi. Koirao kiti group khat in hoilai mun hamkhat a memorial stone atun uva, Manipur a Kuki sub-tribe khat a akisei na aumin, hiche thu a Thangal Union (TU) in suhthengna anei ahi’in, thu kisei hi abul umlou, jouthu ahi, ati. Hitobang tohgon hi Manipur gam a cheng Thangal tribe hon asan louding ahi, ati.

“Thangal tribe hi Manipur gam a cheng Naga group lah a adihtah ahi, tihi thusim a kisei ahi’in, tribe hi British gam mi hon Thangal, Meeyangkhang (W MC Culloch, 1859), Kolya (Dr Brown 1873) chule Khoirao (Grierson, 1903) a ajihlut (record) ahi. India in chamlhatna amu jouva tribe hi avel a Schedules Caste and Scheduled Tribe Orders (Amendment) Act, 1956 noiya ‘Koirao’ tia hetpehna kinei kit ahi. ‘Thangal’ kiti hi akibang (synonym) a Scheduled Tribes Order (Amendment) Act, 2011 (Sl No 2 of 2012 Order) kiti Gazette of India in Ministry of Law and Justice noiya akoibe ahi.

‘Koirao Tribe’ hi tribe koima in aman lou ahi’in, Thangal Naga tribe tilou adang in amanlou ahi. Manipur gam a cheng Thangal ho tilou adang in amanlou chule ahetlou ahi”, tin TU thuso chun aseibe in ahi. Thangal hohi Naga group a um, Makhel (Naga gam) a kon sahlang a kichon ahiuve. Makhel hi Tadubi kom, Senapati district noiya um a Koirao tribe (tua Thangal tia kihe) ho kon na gam ahi. Thangal hon ama chon leh khan chule kivonna chom anei ahi’in, Kuki sub-tribal group toh kisaina anei pon, thusim hohi akhang akhang a kon um ahi. Thangal ho pao man jong Kuki pao toh akibahna aumpoi, tinjong asei uvin ahi.

Koirao tribe hohi Kuki sub-tribe khat ahi tia semthu thusim kisem Thangal Union in demna sangtah aneiyin, hiche hi mipi hetkhel nading thu ahi, tin aseibe uvin ahi.

UKLF lamkai that a akingoh na KNA in nelkal

Imphal, July 14(ET): Kuki National Army (KNA) in July nisim 13 nikho a mel hetlou hon John Gangte, Town Commander, UKLF Moreh akaplih na thilsoh demna thuso anei uvin ahi.

T Stephen Kuki, Deputy Secretary, Information & Publicity, Tactical Headquarter, KNA in thuso aneina a KNA in akiphudoh a kon kiloikhomna sunga kibungkhenna jeh a kidouna hi adoudal jing ahi’in, John Gangte kitha demna sangtah kinei ahi, ati. Sun noiya lunggel tohna umlouva tolthana thilsoh lhung hi lungdon umtah chule gamkaiya chamna suboi thei ahi. Chule KNA chunga jouthu a ngohna thu social media phabep a kisei gelkhohna aneiyin, ngohna thu hi abul umlou ahi, tin jong aseiyin ahi.

Thilsoh hi lungthim themtah a kigong hiding ahi’in chule John Gangte kitha hi organization douna a kibol ‘business’ thu hidinga ginmona sangtah um ahi ajeh chu thilong a kon dan in akha WY chule pistol khat kimudoh ahi tihi police leh CSO hon ahet ahi, ati. S Moljol a um UKLF thingnoi thal choi khat ipijeh a Ngamkhai Veng a achang a vah le a chomkhat jouva athisa kimudoh ham tihi organization in Moreh mipi thudohna anei nom ahi.

Thilsoh umchan hohi abon a suhdih theilou hon organization suh minsetna dinga abol ahi, tin thuso chun aseiyin ahi. Chule John Gangte insung mite chule UKLF ho KNA in alunghempi e, tin T Stephen Kuki thuso chun aseibe in ahi.

UKLF lamkai kitha jeh a kibol bandh in nitin kiman chah suboi

Imphal, July 14(ET): Jani Moreh khopi sung’a UKLF Town Commander Lalthang John Gangte meithal a kikaplih deilou vetsahna a nilhah lam nidan 5:00 akon nidan 24 sung’a Hill Tribal Council Moreh, Kuki Women’s Union & Human Right, Kuki Student’s Organisation chuleh Moreh Youth Club total shutdown abol uvin mipite nitin kimanchahna hatah in atongkhan ahi. Bandh chu nilhah lam nidan 5:00 in lahdoh ahitan ahi.

Thilong hi tuni post-mortem kibol ding chujoule Morgue a Freezer a kikoi ding athu kicheh masang’a along kilalou ding ahi tin HTC President in anaseihin hinlah thilong JNIMS anakilhut in kihoutohna aumthei lou jeh in post-mortem jong anakibol tapon ahi. Tahsan umtah thulhut kimun aseina ah jingkah nidan 8:00 leh Moreh a CSO hotoh kihouna umding kihouna dungjuiya aban kichallha ding ahi ati.

UKLF lamkaipa thatho matdohna ding’in Tengnoupal Police SP Th Vikramjit leh 43 Assam Rifles a Commanding Officer teni lamkainan police officer hotoh commando team hon khopi sung muntin ah search operation abol uvin ahi. Thulhut kimu dungjui in janhi chun Commando team 6 in Moreh lang ajon un khoutah in search operation abol uve jong akiti. Team dang dang honjong Moreh lang ajotbe nalai diuvin akiseiyin ahi.

CAF & PD in kisuhthengna anei nauva thu kilhon lou tamtah um ahi: Maoist

Imphal, July 14(ET): Thingnoi kiloikhom Maoist Communist Party Manipur in Sunday nikhon Khurai Assembly constituency miho NFSA anchang kihop lou thu a CAF & PD Minister Karam Shyam in kisuhthengna thu asei hi akitoh lou aum’e, tin demna anei uvin ahi.

NFSA anchang hi lhakhat a dinga ‘utilization certificate’ akipehlut kahse a kipe (issue) theilou ahi’in, Minister pa in lha nga a dinga anchang contractor pa kipe ahitai, tia asei ahi. Contractor khat in Utilization certificate pelut louva Khurai AC a dinga NFSA anchang quota iti alah thei ham, tin Maoist in thudoh anei uvin chule ipijeh a Minister pa in Utilization certificate beiya anchang kipedoh theilou ding ahi tia asei vanga Contractor pa in lha nga a ding anchang alah apachatna thu asei ham, tin Maoist in thudoh aneibe uvin ahi.

NFSA anchang ‘utilization certificate’ beiya kiladoh hi akigu toh kibang ahi, tin Maoist thuso chuna seiyin chule contractor pa leh CAF&PD staff thilsoh a themmona nei ho chunga action alah diuvin thumna anei uvin ahi. NFSA anchang hi Assembly constituency 20 a cheng hon amukhah lou ahi, tin asei uvin chule achan ding dol achan nadinga kiphinna nei ho chunga Minister pa in ‘defamation case’ semkhum dinga asei demna jong anei uvin ahi.

High Power Committee in thukholna anei sunga NFSA anchang kilahdoh hi Minister pa in asei guideline ho kipalkeh na ahi, ati. CAF&PD in ahop SK thao hojong hoiya um ham, tin Maoist hon aseibe uvin ahi. SK oil hohi petrol pump ho a kijoh ahi’in, pump nei hon petrol toh ahal uva, thao asuhboh u ahi, ati. Authority hon ni nga sunga lha nga a ding NFSA anchang Transport Contractor in alah ding phalna pe a department a staff ho gotna kilomtah apeh louleh strike umding ahi, tin gihna jong anei uvin ahi.

Khamnathei’a kivei mi 2 kiman

Tengnoupal, July 14 (ET): Tunin Indo-Mayanmar gamgi kom’a khamnathei a kivei mi khat akon in WY tablet pieces 3,369 Dk. Lakh 8.42 vel man hiding ana kimandoh in ahi. Hetthei khat chu thuguh pole ho’a kon thulhut amu dungjui uvin Moreh Police Assistant Sub-Inspector T Paomilun Haokip leh 43 Assam Rifle akon Major Anesh Mohan, Minou Post makai nanoi in combined team in Mayanmar Tamu khopi akon Wonna (40) anaman uvin ahi. Phat chomkhat jou in Moreh Police Station mun’a thil kimandoh ho jouse pum in anapelut tauvin ahi.

Alangkhat’a Deputy of Superintendent (Operations), Imphal East Rk.Charles makai nanoi in Imphal East Commando hon Kshetri Awang Leikai mun’a janlhah (July 13) chun khamnathei a kivei khat anamandoh uvin ahi. Ama akon chun N10 tablets strips 700, SP tablets 3200 leh mobile phone khat anamandoh uvin ahi. Thulhut kimu dungjui in khamnathei’a kivei akimandoh pa hi Imphal East district hopsung Kshetri Awang Leikai akon Md. Salim Shah (40) ahi akiti. Chuleh amapa hi Porompat Police Station in thil kimandoh ho jouse toh apehlut tauvin ahi.