Thusoh chom chom

Thusoh chom chom

115
0
SHARE

Babysana thi thu’a mipi lunghanna thip dehlou; Themmona neiho amat uva dan dungjuiya gotna apeh diu thumna a rally kibol

Thoubal, Aug 7(ET): Class VII simlai kum 14 bou hia Ningthoujam Babysana thi dan ginmona aumjeh a police hon thukholna anei vang uva mipi lunghanna athip dehpon, gamsunga kiphinna bol a atam cheh cheh in ahi.

Thoubal a Meira Paibi holeh Thoubal Keithel a thiljoh numei hon Wednesday nikhon Babysana thi thu a themmona neiho amat uva chule gamsung dan dungjuiya gotna apeh diu thumna a rally abol uvin chule Thoubal bazaar a jong toumun kiphinna abol uvin ahi. Ningthoujam Babysana hi achesa July 17 leh 18 jan a khao a kikhailih ahi’in, thil dihlou kibolna um hidinga ginmona um ahi.

Police hon case akhol vang uva kum 14 a upa simlai nu hi aumna hostel room a iti thi ham ti hetdoh theina ding ima seidoh thei anei loulai ahi’in, Babysana thi jeh a gamsunga kiphinna aum kal ni 20 lhing ahitai. Thoubal Keithel Fambi Mathak Makha Apunba in Thoubal a kiphinna alamkai ahi’in, Thoubal kailhang a kon Mela lentol chan kijotna anei uvin, thil joh numei hon nasatah in atosot uvin ahi.

Kijotna nei hon case kholdoh nadinga phat sottah sumang a police ho demna anei uvin ahi. Babysana in thudih a thutanna amu kahse a JAC in agon kiphinna jouse thil joh numei hon tosot dinga aseibe uvin ahi.

Tingjinpong Eveninglories Prayer Centre in Wednesday nikhon RNBA Complex, Tarung a toumun kiphinna abol uvin ahi. Promoter, TEPC Panti Gonmei in thuso miho akimupi na’a, sorkar in Babysana thi thu a thudih a thutanna aneidinga temna aneiyin chule Babysana chungchang thua kisemdoh JAC ho tohgon tosot dinga jong aseiyin ahi.

Standard Robarth Higher Secondary School hostel umdan, akivaipoh dan Panti in demna aneiyin, mopohna nei authority leh police agency hon amitmo nau avetsah u ahi, ati. Chule simlai hohi themjil ding ahiuvin, tha a, gambol ding, alungthim leh atahsa suhchol ding ahipoi, ati. Thilse kibol suhmang nadinga themmona neiho gotna peh dinga thumna aneibe in ahi.

Education system thah in aphal lou simlai ho lungthim kisuhboi, tahsa kivoh na ho school authority, jilkung leh warden hon angah diuvin Panti in gihna jong aneiyin ahi. Nu-le-pa tehon lungneo louva hangsan tah a pan alah diuvin temna aneiyin, simlai chule nu le pa ten school staff ho thil dihlou bol douna dinga kichat ding aneipon, chule thilse kibol aumle hetdoh thei nadinga simlai holeh nu le pate ho akihoumat jing angaiye, tin aseibe in ahi.

Nambol Apunba Meira Paibi Lup le Nambol sunga kiloikhomna ho in Nambol bazaar mun a Babysana thina toh kisai in kihoukhomna ana nei uvin ahi. Hiche kihoukhomna um na ding toh kisai in bazaar sung ana kikhah in ahi.  Nambol Apunba Meira Paibi Lup general secretary L Premila Leima in tu chan na mona nei ho kopoh doh jou lou na chunga akisaipi vai po ho mo so na anei toh lhon in, ama le ama kithat ahi tia ngohna kinei demna jong ahin nei in ahi. Mipi ho in

Nambol bazaar apat Nambol Chingmang chan kijotna jong ana nei uvin kholhang jong ana sam uvin ahi.

Manipur  Left party hon, Article 370 kiladoh deilou jeh a nationwide protest tosot

IMPHAL, Aug 7(ET): India danbu a kijih Article 370 and 35A,  Jammu and Kashmir gam mite a kona akilahpeh deilou vetsah na a India pumpi a kiphinna achelhah to lhonna  Left parties Manipur hon jong tosot na anei uvin ahi. CPI, CPI (M), RSP leh  AIFB lamkai hon kiphin na hi  Irawat Bhavan complex, Imphal a anei uve.

CPI Manipur State Council secretary L Sotinkumar in achesa August nisim 5, nikho a the BJP-led NDA sorkar in Article 370 alah doh hi India khang thusim a amang louva umding “dark day” ahitai tin aseiye. Centre sorkar human ma mipi te bol sorkar asoh doh taqi, chuleh alamkai  Prime Minister Narendra Modi  jong dictator tobang in aumtai chuleh  hitobang natoh a kon a hi sahsolam gamkai ho a jong Article 371 hung kiladoh ding dinmun in aumtai tin asei ye.

Article 371 chanvou hi sahsolam gamkai atam jo ho chunga thanei na kipe ahin, amavang Article 371(A), 371(B), 371(C), 371 (F), 371(G), 371(H) hi Nagaland, Assam, Manipur, Sikkim, Mizoram chuleh Arunachal Pradesh in khat cheh a anei ahi.

 Sorkar le NSCN-IM kikah a, palai a pang, RN Ravi, Nagaland Governor a apan hin  territorial integrity jong echan ham khatna asuh boi thei ahi tin jong asei kitne.

Kiphinna a panla CPI national executive member, Dr M Nara Singh in Article 370 kilah doh hi emadang ahipon “strangulation of democracy” ahina banna jammu and kashmir a cheng mipite hi atum apai a aumsah bepma State dang ho a konna kichom se bep ding ahin, BJP sorkar hi jat le nam chunga politics kichem in apang e, ati.

RIMS in kum 8 jouva candidate 13 ‘Compassionate Appointment’ pe

Imphal, Aug 7(ET): Regional Institute of Medical Sciences (RIMS), Imphal in kum get jouva Compassionate Appointment, RIMS Die-in-Harness Scheme noiya candidate 13 regular employee’ dinga ala in ahi.

Tuesday nikhon Jubilee Hall, RIMS, Imphal a candidate ho ‘Offer of Appointment’ hopdoh nadinga program abol uvin ahi. RIMS Director, Prof A Santa Singh, Medical Superintendent Prof Ch Arunkumar Singh, Principal, Dental College, Prof. Praveen Reddy, Deputy Director leh Chief Accounts Officer kin gon a jin a apang uvin chule Department Head ho, faculty member ho, official holeh staff chule simlai holeh Civil Society Organisation a lamkai hojong apang uvin ahi.

Hetthei khat chu Compassionate Appointment Scheme hi insung mi in kingaina/kingapna a anei sorkar natong (government servant) medical ground a retire hi a ahilouleh athi ho insung mite ngailut jal a tohmun pehna ahi’in, insung mi sum muna neiya adang aumloujeh a kithopina ahi. Direct recruitment vacancy a 5% hi ‘compassionate appointment’ a kimangthei ahi.

RIMS, Imphal a Compassionate Appointment Scheme noiya 2011 kum a kon koima natoh kipe talou ahi. Apply bol a dependent 126 val ahi’in, ahivanga vacancy thu  chule kivaipohna ajeh dang dang jeh a abon a abol theilouvu ahi. Hiche jeh a phat jong analut a chule applicant tamtah lunglhai lou ahi. Compassionate Appointment hi Non-Teaching Employee Welfare Association (NTEWA), RIMS, Imphal in athumjing khat jong ahi.

Kin a pang insung mihon Director pan ngailutna aneijeh u, lunglen tah leh institute phatchom nadinga pan alahna hojeh a akipanau thu asei uvin, pachatna anei uvin ahi. Ama lunggel san jeh a RIMS Imphal in medical ground a retire hia natong chule athi ho insung mite mi 13 ‘Offer of Appointment’ ahopdoh thei ahi, tin aseibe uvin ahi. Panmun peh thei case adang hojong scheme noiya vacancy aumteng leh avetlhah diu ahi. Alangkhat a institution a Non-teaching regular employee 117 jong MACP Scheme (10,20 leh kum 30 a dinga) Financial Upgradation ape uvin ahi.

Gamsung in Sushma Swaraj thi lunghempi; thi lhahna kin a CM pang ding

Imphal, Aug 7(ET): External Affairs Minister anahi Sushma Swaraj Tuesday nilhah a athi jeh a gamsung in ama thi lunghempi na dinga state kin gon um jouse avohai tauvin ahi.

Chief Minister N Biren Singh in lamkai phatah Sushma Swaraj athi lunghempina aneiyin, gamsung dinga man na lentah ahi, tin aseiyin chule Sushma Swaraj in politics a career apat dan thu aseiyin ahi. Gamsunga bol dinga kigong program jouse kivohai ding ahi, tin CM in thuso miho henga aseiyin chule IPR Minister Thongam Biswajit injong kum 67 ahi a thi lamkai nu aumlou alunghempina thu aseiyin ahi.

Swaraj hi party lamkai bou ahipon, gamsunga lamkai numei chingtah jong ahi. Amahin gamsung gelkhohna sangtah aneiya chule External affairs minister ahi sunga ‘international relation’ khantou nadinga pan tamtah alah ahi, ati. Chule Swaraj toh phat mangkhom theiya kanaum hi kei dinga kipa umtah ahi’in, kholjin na ho a mi kithopi a pang jing ahi, ati. Athi hi gamsung dinga lamkai phatah mang ahi’in, insungmite leh atosot ho kapohnat hu e, tin aseibe in ahi. Minister Biswajit in RD&PR chule Textiles, Commerce and Industries official leh staff hotoh ‘minute 2’ jana ape uvin ahi.

State sorkar in High Court thupeh ajui dinga FATYCM in sei

Imphal, Aug 7(UNA): Federation of All Tribal Youth Clubs, Manipur (FATYCM) in Governor Dr Najma A Heptulah henga sorkar natong pension hita, adeh a Chief Engineer, Water Resource-I G Robindro Sharma athah a akiman chah kit thu a memorandum apelut uvin ahi.

Manipur Press Club, Majorkhul mun a Wednesday nikho a President, FATYCM, IR Asing in thuso miho akimupi na’a, itidan a retire hitasa sorkar natong khat chu avel vel a kimangcha kit a ham, adeh a tua IFCD chief enginee, Water Resource-I G Robindro Sharma iti kivel lah kit ham, tin thudoh aneiyin chule state sorkar natoh FATYCM in demna sangtah aneiye, ati. Sorkar hi phatah a kivaipo a sorkar ahi tapoi, tihi aphotchen ahi’in, phatah a vaipo hilouva vaipo himai mai ahi, tin FATYCM thuso chun aseiyin ahi.

Additional chief engineer thepna sangtah neiya state sorkar in amanchah thei tamtah umding ahi’in, ipijeh a retired Chief Engineer pa hi post avel vel a apeh uham, hiche hi ‘rights’ kilahpehna ahi, tin IR Asing in aseiyin ahi. Retired hi a sorkar natong khat ‘extension amount’ hi avel a extend (kikahsaobe kit) theilou ahi’in, hiche hi Manipur High Court in asem dan kipalkeh na ahi, ati. State sorkar in aganna thei pen a hiche thu avettup louleh FATYCM in hiche thu High Court a apohdoh ding chule Union Minister level chan a kipodoh ding ahi, tin IR Asing in aseibe in ahi.

JAC in August 9 nikho bandh kou

 Imphal, Aug 7(ET):  Babysana thina toh kisai a kisem Joint Action Committee (JAC) in August nisim 9  nikho le nidan 5 akon jaankim nidan 12 chan bandh um ding in phondoh na ana nei uvin ahi. Hiche bandh kou ding chu THAU ground a kihou na ana nei lhah utoh lhon a ana kou u ahi.

Thangmeiband a August nisim 8 nikho le torch rally le alhang sung bandh umding dan jong tahlang na ana nei uvin ahi. Thangmeiband lhangsung August nisim 8 nikho a bandh ding chu jingkah lam nidan 6 akon nilhah lam nidan 6 chan hiding ahi. Ahunglhungding phat phabep sunga kiphinna nei ding ho ban nei cha a phondoh na ana nei utoh lhon in state government in mona nei ho amat doh jou tahlou dan u jong tahlang na ananei uvin ahi.

Article 370 kilahdoh hi ‘Democracy’ kisuhmang pan na natoh ahi: Nara

Imphal Aug 7(ET): BJP lamkaina sorkar in Parliament a Article 370 leh 35 A asuhmang National Executive Member, CPI, M Nara in demna aneiyin, hiche hi ‘democracy’ kisuhmang pan na ahi, tin aseiyin ahi.

Jammu and Kashmir gam a umjing Article 370 akilahdoh jouva Nara in Irawat Bhavan comlex a sorkar natoh ademna thu asei ahi. BJP in amaho sorkar hi hunam thahat, chang vaipohna a kipo ahi tihi aphotchen u ahi’in, hiche hi khantouna ding ahipon, nungche na joh ahi, ati. Hitobang hunam vaipo a sorkar aum laise a North East injong itobang dinmun ato ding ham tihi seithei hilou ahi, tin aseiyin chule alang langa kon atohkhah tamtah umding ahi, ati.

BJP in India gamsung hi Hindu Rashtra a semdoh ding hibou bidoiya anei ahi’in, Left party ho dinga khonung dinmun thim cheh cheh ahi, ati. India gam pumpi a kiphinna chule campaign chom chom kipan ahi’in, umjom ding ahi, kihoutoh ngai ahi, tin CPI lamkai pa in aseibe in ahi.

Assistant Secretary, CPI Manipur State Council Th Surchand injong thuso miho akimupi in, Hindu ‘fascism’ ahi, ati. Article 370 leh 35 A kisuhmang hi NDA sorkar in Hindu Rashtra semdoh dinga 100 days programme anei holah a khat ahi, tin Surchand in aseiyin ahi. Jammu and Kashmir gam centre in Union territory ni a akhen a military thahat a gamsung apoh a chule themjilna mun jouse leh kijahmat to nathei (communication) jouse akha demna jong aneiyin ahi.

Hindu Rashtra semdoh nadinga Muslim nam jat khel ding hi BJP natoh chule alungtup ahi, tin Surchand in aseiyin chule gamsunga secular, democratic leh progressive in Article 370 kilahdoh demna sangtah aneiyu ahi, ati. Kashmir hi avet nau bou ahi, tin aseiyin chule BJP in parliamentary government hilouva presidential government adei joh ahi, ati. Vannoi muntin a hitobang thil hi lhung lou maithei ahi’in, adouna a pan ahding ahi, ati.

Sorkar natoh demna a kikhopna anei nauva M Nara, Sotinkumar, Shanta, Ratan, Gyaneshwor, Apanthoi chule Sharat Salam jong apang uvin ahi. Meeting hi Left party- CPI, CPI(M), RSP chule AIFB in agon ahi.

Nagaland Governor Ravi in Article 371(A) chungchanga thuso anei CM Rio in kipapi

Kohima, Aug 7: Nagaland chief minister Neiphiu Rio in article 371 (A) thu a Governor RN Ravi thuso pachatna thu aseiyin ahi.

Governor thuso hi state in alem in, Centre sorkar kitepna a alah ahi, tin Rio in Tuesday nikhon aseiyin ahi. Centre sorkar in Article 371 (A), Constitution a special provision lahdoh nading tohgon aneipoi, tia Ravi in asei ahi’in chule hiche a koima lungkham hih uvin, Article 370(A) hi Nagaland gammi ho henga kitepna theng ahi, tia Ravi in asei ahi.

Kihouna amachal jing hi sorkar in kitilkhouna a anei ahi, tin CM Rio in aseiyin chule kihoulhah na aumding kinepna aum’e, ati. State sorkar in ‘actve facilitator’ hina a panmun dettah a alahding ahi, tin jong aseiyin ahi. Chule political solution sem doh nadinga state sorkar in bol thei chan abolding ahi’in, itobang dinmun hijong leh gamsung miho thaneina ventup nading leh amite huhna dinga sorkar in pan alahding ahi, tin kitepna aneibe in ahi.

Achesa August 3, 2015 kum a Centre sorkar leh NSCN-IM in Framework Agreement soi kaina anei ahi’in, Naga thingnoi kiloikhom holeh sorkar in achesa 1997 kum a hemkham kinoptona asem jouva kon kihouna apat ahitai. Nagaland gamsung hi December 1, 1963 kum a India gam a dinga state 16 channa a pang ahi’in, mol lah a um 16,579 square km a len Nagaland gam a tribe len 16 um a, abon uva chon leh khan, pao chule kivon dan chom chom anei ahi.

Governor Ravi jal a maban Naga Political issue machal dia JLF in kinepna nei

Dimapur, Aug 7(ET):  Nagaland Legislative Assembly’s Joint Legislators’ Forum (JLF) in sotna pat na umjing, Naga political issue, hi suhchetna aumthei na dia  RN Ravi, Nagaland sorkar  a apan hi kipah tah in asang uvin ahi ajeh chu milun Ravi jal a hi maban na machal na  hung umthei inte tin akinep nao aphong doh uve.

Newmai News Network thuso akimu dungjui in, Conference Hall of Nagaland Legislative Assembly, Kohima munna Joint Legislators’ Forum (JLF)  leh Lok Sabha and Rajya Sabha noiya MP hon naga issue chung changa kihoulimna anei uvin ahi. Joint Legislators’ Forum hon naga ho adeh a”tribal Hohos” ho henga kipumkhat na lungthim keng uhen chuleh kithokhom a pan la khom din mipite temna sang tah anei uvin ahi.

Kum 22 val che nunga jong sorkar in mipi te kipumkhatna chen khom ding lungtup kinei ho asan peh lou jeh a  Nagaland Legislative Assembly and Chairman of the Joint Legislators’ Forum, Vikho-o Yhoshu  in sorkar henga toukhom pi a, boina na suhlhap nadia solution khat a aum na din temna aneiye.

Elangbam Valentina Green Ambassador dia kilhengdoh

Imphal, Aug 7(ET): Manipur Governor in Elangbam Valentina Devi, apa min Elangbam Premkumar Singh,  Hiyanglam Makha Leikai, Kakching District chu chu Chief Minister Green Manipur Mission a Green Ambassador dingin lhendoh na ana nei in ahi. Valentina hi ahunglhungding kum khat sunga ambassador a pang ding ahi. Valentina hi Government in thingnou aphu na jouse a pan la dingin jong thupeh ana kinei in ahi.  Manipur a gam le go huh na ding hihen ipi lam pang hijjong le advertise kibol na jouse a panlah na anei ding ahi. Government in apanlah na toh kisai a achan ding a lom sum le pai lam hihen aphat chom na jat chom chom hile apeh ding ahi.