Thusoh chom chom

Thusoh chom chom

130
0
SHARE

CM lamkaina a twi khol them ding thu a ADC hotoh kihouna chelha

Imphal, August 6(ET): Chief Minister N Biren Singh lamkaina a hill district chom chom a kon Autonomous District Council (ADC) Chairmen leh Member hon Chief Minister’s Secretariat mun a Tuesday nikhon scheme chom chom noiya go twi kholthem ding thu a kihouna anei uvin ahi.

Meeting a Chief Minister in ADC Chairmen leh member hon ama ama DC hotoh khosung chom chom a twi kholtup ding thu a pan alahkhom diuvin temna aneiyin chule khovei May/June lha a umding akit ADC election kah a natoh atampen chepi ahithei nadinga meeting agon jing diuvin jong aseiyin ahi. Meeting a kilolna anei chengseu hi file a bou koiding hilouva anatoh a apohdoh diuvin aseibe in ahi.

Phaicham district chom chom a um Panchayati Raj Institution hon ama ama gamkaiya ‘water conservation’ natoh apat u ahitan, thinglhang district a jong ADC hon natoh apat diuvin CM in temna aneiyin ahi. State sorkar in molnoi mun chom chom a Centre kithopina a twi khol nadinga ‘check dam’ 100 vel sah ding tohgon anei ahi’in, ADC leh DC hon hiche dam kisahna thei ding mun avettup diuvin ngehna aneiyin ahi. NITI Aayog 15th Governing Council meeting a Prime Minister Narendra Modi in state Chief Minister jousen centre government in sponsor abol scheme- MNREGS kiti ho achepi nauva go twi chule twi akhol them diu, akholtup diuva thuhilna anei ahi, tin CM in aseibe in ahi.

Thuhilna apeh masanga state sorkar injong thinglhang gam mun chom chom mun sagi a dangka crore 2 cheh lut a ‘water harvesting scheme’ anapat ahitan, twi lhahsam jeh a abol ahi, tin CM in aseiyin ahi. Chule ADC Chairman leh Member ho lo toh kisai, tohmun ong hojong aganna thei pen a vettup dinga kitepna aneiyin, BADP noiya natoh agan sah diuvin temna aneiyin ahi.

Meeting a Ukhrul, Tamenglong, Chandel, Senapati, Sadar Hills leh Churachandpur ADC Chairman, Additional Chief Secretary (RD&PR) MH Khan leh Additional Chief Secretary (TA&Hills) Letkhogin Haokip jin a apang uvin, thinglhang district chom chom a kon ADC member ho, DC ho, ADC leh government department chom chom a official ho jong apang uvin ahi. RD&PR, TA&Hills, Planning and Minor Irrigation/Water Resources official hon Department in ‘water conservation scheme’ chom chom aneiho thu asei uvin, Chandel DC Krishna Kumar injong ngaidan aseiyin ahi.

Achesa July nisim 1 nikho a Union Ministry of Jal Shakti noiya India pumpi a Jal Shakti Abhiyan (Water Conservation Campaign) noiya ‘water conservation/harvesting’ natoh apat u ahitan, Ministry hi Ministry chom chom ni- Water Resources, River Development and Ganga Rejuvenation chule Ministry of Drinking Water and Sanitation kipunkhom a tukum May lha a kisemdoh ahi. Campaign hin go twi chule twi khol them a, twi ho velman kit ding akhohsah ahi.

Hetthei khat chu Chief Minister N Biren Singh in akilhengdoh Panchayati Raj Institution member hotoh jong achesa June 27 nikho a hiche chungchang thu a meeting anabol ahi. State sorkar in Minor Irrigation Department leh MGNREGS fund a kon, Finance Commission grant leh Integrated Watershed Management Programme (IWMP) noiya go twi khol nading natoh achepi pan ahi.

Kumbi kho a innmun kichuna jeh a mikhat alol kitan

Imphal, Aug 6 (ET): kum 47 a upa  Khagembam Achou Meitei, Kh. Ningthemjao Meitei chapale a innheng pa kum 35 a upa Athebi singh hi gamgi chung changa kiboi na anei lhon in, aki nelkal lhonna asan tah jeh in  Athebi  in Achou chu  belcha in alol atan lha tan ahi. Hiche kithana case hi Kumbi Police Station, Bishnupur district noiya jihlut ahitai.

Thilsoh hi Setupur Mayai Leikai a janhi nidan 11 vella soh ahin, khosunga cheng mipi te lunghan na asoh in mithatpa Achou chenna innmun chu ahal lha tauvin ahi. Thilsoh vesui dingin Joint Action Committee (JAC) khat jong aki semdoh tan ahi

Babysana thi thu a kiman Landhoni teni nu-cha August 20 chan jail a umding

Imphal, Aug 6 (ET): N Babysana thi thu a themmona neiya kingoh- Pheiroijam Landhoni leh achanu Romita Tuesday nikhon Chief Judicial Magistrate court, Imphal West mun a security khoutah noiya apui uvin ahi.

Hiche court ma ma in tu masanga amani nucha hi ‘bail’ anapeh lou ahi. Chief Judicial Magistrate Lamkhanpao Tonsing in Landhoni leh Romita hi ni 16 jail a umdinga aseiyin ahi. Alangkhat a thilsoh demna neiya lunghang tah a kikhom mipi hon Imphal Khwairamband kailhang a Babysana thi thu a thudih a thutanna anei diuvin asam uvin, thumna sangtah anei uvin ahi. Court complex kimvel leh Khwairamband bazaar police hon khoutah in angah uvin, ahin, thilse soh aumpon ahi.

Alangkhat a St Meera School, Nongmeibung Chakpram Leirak, Imphal a simlai leh jilkung hon Standard Robarth Higher Secondary School, Canchipur a class VII simlai Babysana thi demna a ‘human chain’ asem uvin ahi. Nongmeibung a kon Palace Gate lamlen chan ‘human chain’ asem uvin, kiphinna abol nauva school simlai 200 val leh jilkung 24 in pan ala in ahi. Kum 13 bou hinalai simlai nu thudih a atanpeh diuvin asam uvin ahi.

Babysana thi thu kikholna chule post mortem kibol hon athi thutah kholdoh nadinga akithopi lou ahi, tin school Principal Lasihram Homeshor in aseiyin chule state sorkar in case asuhlhah a chule Imphal khopi school atamjo a boina umho asuhlhap dinga ngehna aneiyin ahi. Tuchan a ngohna kisemkhum mithum- Landhoni leh achanu Romita chule achapa Robinson police hon amat ahi. Thangmeiband, Imphal West a cheng Ningthoujam Babysana hi achesa July 18 ni a aumna boarding room sunga athisa kimudoh ahi’in, ama athi a kon akaina Standard Robarth School kikhah ahitai.

ADC Employees Pension Demand Committee Manipur in kisuhthengna anei dinga ATRPFM in sei

Imphal, Aug 6(ET): ADC natong ho Pension Scheme kichepi thu a ATRPFM in mopohna nei Minister chule state sorkar henga kipathu aseiyin, chule association noiya mi phabep in pension benefit min a ADC natong ho henga sum adon hi vangset umtah ahi, tin aseiyin ahi.

Pension scheme hi state sorkar in achepi ham ahilouleh natong hon sum adonkhom uva achoh uham tihi kadohnom u ahi, tin James Haokip, General Secretary, ATRPFM in thuso aneiyin ahi. Mi phabep in ‘pension benefit’ a dinga sum tamtah adong uve ti photchenna kinei ahi. Hiche thu a press release kibol a sum dong ho chunga action lah dinga ngehna kinei ahi’in, tuchan a action kila loulai ahi, ati.

Amachang phatchomna dinga natong ho henga ‘pension benefit’ min a sum dong hon ni nga sunga suhthengna anei diuva phat achaina pen kipe ahi, tin ATRPFM in aseiyin chule Pension scheme hi state sorkar in achepi ahi’in, natong hon achohdoh ahipoi, ati. ATRPFM in tang louva hiche akichepi nadinga pan alah jing u ahi’in, ahivanga ADC Employees Pension Demand Committee Manipur kiti association min a ADC natong ho henga amaho hin sum tamtah adon u ahi.

Thinglhang gam a hitobang nehguh kibolna hi ATRPFM in amoh vet louding chule adouna a pan alahding ahi’in, hiche thu a lunggel thei jousen tohgon atosot diu tahsan ahi, ati. Hiche jeh a sum dong a pang hon tuni thuso akineiya kon ni nga sunga hilchenna apeh diu ahi’in, ahilouleh kilomtah a amaho douna a pan kila ding ahi, tin thuso chun aseibe in ahi.

Police leh MARC hon khangthah numei 3 huhdoh

Imphal, Aug 6(ET): State police hon gamdang a noti dinga joh ding agot hiding uva tahsan gamsung mi numei thum lolhingtah in ahuhdoh uvin ahi.

Montu Ahanthem, Convenor, Wide Angle, The Manipur Alliance for Chidl Rights (MACR) in Child Rights and You (CRY) toh thuso aneina a Manipur Police chule numei thum ho Moreh, Tengnoupal district mun a huhdoh nadinga pan la jouse chunga kipathu asei uvin ahi. Achesa August nisim 3 nikho a Chandel MACR partner in numei thum- Pinky (16), Asha (16) leh Vandana (19) (min kikhel) ama ama inmun a kon akiholmo uve, tia hetsahna aneiyu ahi.

MACR HQ in numei thum kiholmo thu aphotchen jouva OC Imphal West Ingocha akijahmat pi uva Anti Human Trafficking Unit, Airport hetsahna aneiyu ahi. Moreh police station a jingkah nidan 10.30 don a member ho kithopina a ucha ni nu-le-pa injong Missing Report ajihlut ahi. Moreh check post a um constable khat in numei hohi Imphal jon a ache kamu’e, tia aseiya SP Ibomcha, Thoubal Police jong numei ho lamtin pa dinga hetsahna aneiyu ahi.

Numei thum holah a khat hi sun 12.30 don a airport booking counter a kihuhdoh a chule adang ni hi North AOC Bus ticket counter mun a ahuhdoh u ahi, tin OC Ingocha in aseiyin, chule mithum ho Special Juvenile Police Unit, Singjamei PS a apehlut uva Child Friendly Police Station Lamphel a Imphal West SP Meghachandra vetsuina noiya akoiyu ahi. Numei thum holah a Vandana (19) hi Delhi a che kigo ahi’in, Facebook a akihetpi mikhat in TV Serial a audition peh dinga akou ahi. Pinky (16) hi Vandana naonu ahi’in, TV serial a a unu natonga ache ding ajuinom ahi. Chule Asha hi aloinu ahi’in, jinei ahitan, aji toh chenkhom nomlou ahi.

Aneojo teni hi Dimapur chan bus a che ding chule Delhi jon a train a cheding kigo lhon ahi’in, Vandana hi lenna a cheding chule khat teni Delhi a akimupi dinga kigong u ahi. Moreh Police chule Child Line Thoubal Imphal khopi a alhun jou uva MACR team ho Child Friendly Police station, Lamphel a akimupi uvin, chapang ho counseling abol uvin ahi. Jan nidan 7 don a Moreh police ho henga apehdoh u ahi’in, Vandana leh Pinky anu apa chule Asha jipa leh anu in ahin jui uvin ahi. CWC in thupeh anei jouva ama ama insung mite henga apedoh tauvin ahi.

Sum muna dinga inmun a kon jamdoh ahilouleh Cyber criminal hon social media mangcha a numei khangthah ho jouthu a alhep lhah nau case khat joh joh hidinga MACR in asei ahi’in, mopohna nei police hon akholtoh angaiye, tin asei uvin ahi. Tu masanga jong hitobang thilsoh anaum ahi’in, Manipur gam a jong ‘Plan of Action for Combating Child Trafficking  in Manipur’ semdoh angaiye, tin MCPCR in Department of Social Welfare henga lekha apehna a asei ahi’in, State Cabinet in aganna thei pen a Draft ‘State policy for children 2018’ apohdoh dinga jong aseiyu ahi.

Manipur Police in avel a numei chapang thum huhdohna dinga natoh phatah atongdoh kit e ti thilsoh in avel a avetsah kit ahi.

Jammu and Kashmir gam a Article 370 kilah doh hin Mizoram kichat sah

Aizawl, Aug 6: Jammu and Kashmir gam sunga umjing special status kilah doh jeh a Mizoram, gam a dia Article 371-G jong hung boi khadem tia Mizoram mipi te kichat na alen in ahi.

 Achesa kum 1986 kum a India Sorkar le Mizoram mipi ten Article 371-G noiya Mizo Peace Accord kinoptona soi akai hi hung boi kha ding ham ahilouleh Mizoram a jong hitobang chanvou ho hi hung kilah peh kha di ham tia mipi te kichat na asang in ahi. Ajeh chu hiche kinoptona sunga hi Mizo ten chon le khan, sakho, gam le go, kivai pohna ho hi, agam nei te phal na beiya India Sorkar in ema alo thei lou nadinga phalna apeh ahi. Chuleh  State sunga aching athem hon amu dol un, hitobang tohgon lentah, centre sorkar in Jammu & Kashmir chunga alah jal hin politics hung lut intin Mizoram a cheng Bangladesh galjam, Chakma ho dingin vang natoh ahilou leh phat chomna thei tohgon hin podoh inte tin asei uve.

Mizoram University,Political Science department noiya assistant professor Lallianchhunga, Article 370 hi Mizoram gamsunga lampi ni a kipo lut thei ahi tin aseiye khatna:  Chakma ten Union Territory status neidia athum u kiphinna hi hung hat be thei. Aninan, 1986 Peace Accord noiya chanvou phabep ho jong lahpeh a kon hung umthei ahi ati.

Mizoram chief minister masa chule  state Congress president LalThanhawla in jong  twitter mangchan mipite kichih thei din asei in ahi, ajehchu  Centre sorkar in hitobang natoh a konna hi  Mizoram, Nagaland chule Arunchal Pradesh ho dia special status chanvou ho hi lahpeh a hung umding dinmun ahitai tin aseiye. Centre sorkar in Article 370 alah doh a konna hi thinglhang mite dia boina tam tah hung kisem be ding ahi tin political party lamkai phabep in demna anei na banna Zoram People’s Movement (ZPM), People’s Representation for Identity and Status of Mizoram (PRISM) ho cheng in sorkar natoh hi demna sangtah anei un ahi.

CM lamkaina a meeting um

Imphal, Aug 6(ET): Chief Minister Nongthombam Biren lamkainan Naga Peace Talk a Consultative Group leh gamsung’a um Civil Society kiloikhomna lamkai hon joint meeting abol uvin hiche a chun gamsung kipunkhomna leh gam huhbit ding chungchang’a itobang’a kalson ngai em tiho chungchang aseikhom uvin ahi.

CSO thakhel a meeting a panla hochu AMUCO, UCM, CCSK, HERICOUN leh LIPUL a kon mi 27 ahiuve. Kihoukhomna a chun Consultative Group a member Retired Lt. General Himalay in Peace Talk machal dan mipi masang’in phondohna aneiyin ahi. Aman Peace Talk kihouna machal dungjui a kithulhuhna hohin Manipur ahin tohkhah lou ding’in aum’e ati. Hitobang kihoukhomna hohi boljing ding, aphat dungjui a Peace Talk machaldan leh pan lahding dan seikhom ji ngai ahi tin kihoukhomna a panla hochun aseiyuve. Naga Peace Talk chungchang in Centre in State Government heng’ah imacha hetsahna ahin nei hihlaiye tin Chief Minister N. Biren in CSO lamkai ho heng’ah aseiye. Kihoukomna hi gamsung CSO hotoh kithutoh jingding, aphat leh angaichat dungjui a kalson dingdan leh pan lahding dan ho seikhomna dia kibol ahi tin Chief Minister N. Biren chun aseikit in ahi.

Foreign Minister lui Sushma Swaraj mollem ta

New Delhi, Aug 6: Senior BJP lamkai le foreign minister lui  Sushma Swaraj chu tuni in AIIMS mun a ahinkho ana bei tan ahi.

Swaraj twitter post chaina pen chu Modi makei na government in Kashmir natoh na anei na chung uva thuphpn ana nei chu ana hi in ahi. Swaraj in Kashmir chung thu a hiche nikho ana nga jing ahi dan tahlang na ana nei ahi.

Swaraj hin politics akon kichol na ananei toh lhon a achesa Lok Sabha election a panlah na ananei lou ahi tan ahi.