Thusoh chom chom

Thusoh chom chom

122
0
SHARE

AMUCO in 22nd Integrity Day nit; Boina thu kiseilhah na a gamgi tohkhah loudinga Ph Deban in sei

Imphal Aug 4(ET): Meilhei, Naga, Kuki hihenlang koi kiloikhomna hijong le boina thu seilhah na hin gamsung kipumkhomna atohkhah louding ahi, tin President, All Manipur United Club Organization (AMUCO) Ph Deban in aseiyin ahi.

AMUCO in Kwakeithel Akham Leikai, Community Hall mun a 22nd Manipur Integrity Day anit na a Deban in asei ahi’in, sorkar in boina thu ho lahthei dinga asuhlhap ding ahivang a kibungkhenna policy India sorkar in abol hi ngah ding ahi, ati. Hitobang policy hin thinglhang leh phaicham akhen ahi, ati. Mapal Kangjeibung a ‘Integrity pollar’ thu aseiyin, sorkar in Integrity Park asem dinga ngehna aneiyin ahi.

Boina jouse suhlhap nadinga khantou machalna lampi lang chepi ding ahi, tin aseibe in ahi. AMUCO General Secretary S Sanjoy injong ahoulimna a ‘Integrity Day’ kiman lo na athusim ho aseiyin ahi. Gamsung ke louna dinga AMUCO in kijotna agot a, asang a sim in kijotna a pan alah ahi, tin aseiyin chule India sorkar in 1992 kum a ‘divide and rule policy’ amanchah a Kuki-Naga, Meitei Pangal- Meitei, Kuki-Paite, Hmar-Dimasha chule thinglhang leh phaicham kah a kinahna ding anasem ahi, tin aseibe in ahi.

Phat khoh pet tah a haosa chule thunei hon mipi kiphinna ana gelkhoh lou, sorkar sem ding chule alam louva bou manchah ding agel jeh a society a hahsatna lentah a pang ahi, ati. Bangkok Declaration kiti India sorkar leh NSN-IM thingnoi hon 2001 kum a soi kaina anei jeh a mipi kiphinna soh a mi 18 in thina ato ahi, ati.

India sorkar leh NSCN-IM in soi akai ‘Framework Agreement’ asungthu hi ipijeh a mipi het dinga kiseidoh louham, tin jong thudoh aneiyin ahi. Manipur sorkar in gelkhohna anei pon, hitobang thu ho suhlhap ding akhohsah pon, lamkai panmun a bou akisalel uve, tin aseiyin chule sorkar in gamdang mi gamsunga hunglut ho vettup nading dan semding jong khohsahna aneilou ahi, ati. Multinational corporation hon Manipur panna a North East India gam a thil (resource) ho pohdohd ing agot jeh uva hahsatna akibe cheh kit in, hiche doudalna a mipin pan alahkhom ding ahi, tin temna jong aneiyin ahi.

Kin gon a President, Poirei Leimarol Meira Paibi Apunba Manipur L Memchoubi, President, Kuki Inn Manipur Khaimang Chongloi, Vice President, Zeliangrong Union Chandra Haomee leh President, AMMDO Y Zakir Hussain jong apang uvin ahi. Nikho kipat til a Mapal Kangjeibung a um Integrity Pillar a jana vetsahna a pahcha ana koi uvin ahi.

Shillong khopi sung’a Khamnathei leh manchah a kivei thu’a Kuki Inpi Meghalaya in thuphon nei

Shillong, Aug 4(ET): Kuki Inpi Meghalaya in thuphon aneina ah Shillong khopi sung a khamnathei (drugs) a kivei le kichem aum jing tolhon’a Kuki ho jong akimandohho aumjeh in Shillonga Kuki chate jouse asukhan chule agamnei te leh Police hon Kuki kahi ti jouse muset naleh ginmo na anei tah jeh un, Sorkar natong le simlai chapang chenna ding kihol hon genthei nale hahsat tampi atoh taovin ahi. Chukeo hilouvin, Pathen houna mun Hou-in teni jeng jong Police leh agamnei ten ginmona aneitaovin, Houbung lamkai holeh Pastor ho jeng jong khosung/vengsung a Haosa hon kouna le thudoh jong aneitaovin ahi.

Hitobang’a khamnatheija kivei kimandoh ho jeh in Kuki Nam suhminset na asoh in, Kukite jum na le jachatna jong mun tampi ah mipin akitoh tan ahi. Hijeh chun, Kuki Inpi Meghalaya in Nampi khankho ding gelna bana, khonunga simlai chapangho themjilna munpi khat huhna dingleh Kukiten Shillonga tahsa le lhagao va khantou ding tup le doi molso ahithei nadingin chepi ding leh juicheh dingin thuphon aneijin ahi.

Shillong khopi sunga Kuki mi koima khamnathei (drugs) le meithal meilou (arms and ammunitions) a kivei umthei louding, Drugs/Arms a kivei akihetdoh leh vengsung a Haosa/Dorbah Shnong leh Police toh kitho’a kiman ding, Hitobang kiveina bolla kiman doh aumleh, ama leh a insung mite jousen Shillong adalhah diu,  hiche nia pat avella Shillong a hung kitthei louding chule achenna kho/veng Haosa leh civil society hetsah dinga lom ho jouse kihetsah ding, print leh social media ajong hetsah na kibolding, Kuki Inpi Meghalaya, Kuki Students’ Organisation (Shillong Branch) leh Shillong sunga Dorbah Shnong le Khasi Students’ Union toh kitho jinga hitobang thilphalou bol ho kithim kholjing ding, nampi minset nathei kiveng jing ding ahi tin Kuki Inpi Meghalaya thuso chun aseiben ahi.

BJP lamkai na govt hi dan toh kitoh lou ahitoh lhon a congress in 2022 election teng seat 45 lam a goljo nading atupding ahi: Gaikhangam 

Imphal, Aug 4(ET): MPCC president Gaikhangam in tunin thuso miho toh akihou limna a tu le tua BJP lamkei na coalition government hi dan toh kitoh lou ahi toh lhon a congress in ‘Mission 2022’ kiti campaign Manipur a seat 60 lah a 45 a goljo na ding doi le tup a tohgon anei pan ading ahi tai ati.

Booth level Congress workers interaction programme, Yairipok Tulihal Awang Leikai mun a Andro Block Congress Committee makei na noi a kingon kiman na achun  Gaikhangam in in grass root level campaign apat a mipi toh kihou limna anei jing dan jong tahlang na ana nei in ahi. Natoh na kinei chunga AICC in kipa thu ahin phon dan u Gaikhangam in hetsah na ana nei in ahi.  Tu le tua government kisem dan chunga hou limna anei na a Gaikhangam in government hi Indian danpi toh kitoh lou a kisem ahin, namphu a mi kichoh thu a kisem ahi toh lhon a akit teng nasatah a pankila a hitabang um lou na tei ding ngai to na kinei ding ahi ati.

Congress in government asem lou na chunga hou limna anei na a congress government mi in adei lou ahi lou danle BJP in dan toh kikal a na toh na anei jeh a lolhon na anei thei u ahi dan jong hetsah na ana nei in ahi. Andro MLA Shyamkumar huh doh ding dan aum loudAN le MLA hina akon apot a Andro a by election ahung umding dan jong congress president pa in tahlang na ana nei in ahi.

NSCN (IM) in RN Ravi demna nei, kiletsahna neiya ngohna neiyu

Kohima, Aug 4:  National Socialist Council of Nagaland (NSCN-IM) in Nagaland Governor dinga athah a kilheng RN Ravi demna anei uvin, kihouna anukhah pen a aumchan akikhel in, kiletsahna aneiyin, kihoupi ahahsa’e, tin asei uvin ahi.

Ravi hi NSCN-IM leh sorkar in chamna thu aseina a Centre Interlocutor a jong pang ahi. NSCN-IM in ‘Nagalim Voice’ issue thah pen editorial a Governor dinga Ravi kilhen hi mijousen kidang asah ahi, tin aseiyin ahi. Ravi in tua hi panmun ni atuh ding ahitan, August nisim 3, 2015 kum a ‘Framework Agreement’ soi kaina kinei dungjuiya Indo-Naga thu aseilhah dinga Prime Minister Narendra Modi in thuhilna anei ahi, ati.

Ahivanga, lha phabep jouva phatah a kihouna (formal talk) masapen akinei na’a Ravi chaloh dan leh aumchan kikhel a kiletsahna anei jeh a NSCN Chief Negotiator Th Muivah lamkaina NSCN negotiator ho dinga nopmona lentah aum’e, tin ‘Bemusing Appointment’ kiti editorial a asei uvin ahi. Sorkar lungput akikhel toh kiloikhomna organization in ‘Framework Agreement’ kisuhkeh louna dinga pan alah ding ahi ajeh chu hiche kikhelna aumleh thulhuhna umho kisang thei louding ahi, ati.

Deputy National security advisor anahi Ravi in achesa August nisim 1 nikho a Raj Bhavan, Kohima khopi a Nagaland Governor dinga kihahselna alah ahi. Modi lamkaina BJP sorkar in thunei vaihomna ahin tuh leh tamtah in aginchat lel Indo-Naga political talk athah a akisei kit in, ahivang a India Interlocutor RN Ravi Nagaland Governor dinga kilheng inte tihi tamtah in agel phahlou ahi. Ravi in tua hi panmun ni- Governor leh Interlocutor panmun atuh ding tina ahi”, tin Editorial a chun aseibe uvin ahi.

Munchim jeh a Kohima-Dimapur jotna lamlen kijonto thei talou

Kohima, Aug 4: Manipur gam a dinga neh chule thil kipohna lamlen National Highway 29 mun phabep Saturday jan a go nasatah a ajuh jeh in alhohmang tan ahi.

Old KMC Dumping zone kom, NH 29 mun a kal ni masanga se lamlen akisem phat jou til ahi’in, munchimna mun hi munchimna masat namun a kon metre 100 ho vel a bou gamlha ahi. PWD (NH) official hon lamlen metre 15 vel hi janni jan nidan 11 leh 12 kikah a go juh jeh a chimlha ahitai, tin asei uvin ahi. Munchim nomna mun ahi’in, adeh a chuh lai le lamlen a munchimna thilsoh umjing ahi. Lamlen hi phat chomkhat a manthei ahina dinga asem nadinga ni 8-10 ho tobang lutding ahi’in, go ajuh jom a ahileh natoh sot jep kit ding ahi, tin official hon aseibe uvin ahi.

Department official hon ‘3-slope benching’ asem diu, chomkhat a dinga asem phat diu ahi. Imphal chule Dimapur leh Guwahati a kon kipan truck ho Saturday jan a kon munchimna mun alangni a che thei talouva tangden ahitai. Driver phabep in hitobang munchim dan hi kumseh leh, adeh a chuh teng aumding ginmo hijong ahi’in, hiche jeh a driver hon hahsatna ato sangpen ahi, ati. Ration (nehding) akitoh a ki kipoh ahi’in, dukan anaivel a aumlou jeh a itihchan kitang den ding ham tihi driver ho lungkhamna ahi.

National Highway 2 tilouva janni jan leh tuni jingkah a kon khopi mun chom chom a munchim leh mudslide thilsoh um a official hon lamlen hon nadinga pan alah jing ahi.

‘Observation of World Breast Feeding Week, 2019’ kin kimang

Imphal, August 4(ET): Development Organisation of Andro Kendra (DOAK) in Thambalnu Market complex, Poiroupat Lamkhai Imphal East mun a ‘Empower Parents, Enable Breastfeeding’ ti thupi a World Breast Feeding Week-2019 kin amang uvin ahi.

MAHUD, Town Planning, Horticulture & Soil Conservation, Forest and Environment Minister Thounaojam Shyamkumar, Ex-Pradhan, Tulihal Gram Panchayat Laishram Magha Singh chule Patron Member, Breastfeeding Promotion Alliance of Manipur (BPAM) Dr Ksh Chourjit Singh, President, BPAM Dr N Jitendra Singh, National Trainee, BPAM Dr Kh Ratankumar, National Trainee BPAM Dr SHyamkumar Laishram kin-gon a Chief Guest, President leh Guests of Honour a apang uvin ahi.

Minister Shyamkumar in ahoulimna a inu u ingailu soh kei uvin, chule minu in acha apeh masat pen hi noitwi ahi, tin aseiyin ahi. Noi an kivah hi minu leh acha kah a kingailutna ahi’in, chapang kivahna an ahi’in, minu khat in acha avah laiya kuwa (zarda) ho aneh a ahileh acha tha nading gu apeh pan ahi, ati. Hiche hi khantouna vetsahna ahipon, ‘ecological imbalance’ ahi, tin aseiyin chule naosen noitwi a vah hi minu chule acha ani a dinga thilpha ahi, ati.

Minu khat in acha an avah nomlou leh minu pha ahilouna avetsah ahi. Hospital akisemdoh be cheh cheh hin natna chom chom neiya mi atam ahilouleh hinkho thengtah a kiman lou avetsah ahi, tin jong aseiyin ahi. Minu in acha angailutna hi hou jouse chule muntin a thakhat ahi’in, khonung khangthah pha, damtheina pohdoh nadinga society a minu pha ngaicha ahi, ati. BPAM in Andro Kendra chule gamsung mun chom chom a jong ‘Breastfeeding’ thu a Awareness program abol be dinga ngehna jong aneiyin ahi.

‘Observation of World Breasfeeding Week 2019’ program a doctor ho, BPAM member ho, simlai numei, nupi, vengsung upa hojong apang uvin ahi.