Thusoh chom chom

Thusoh chom chom

212
0
SHARE

Babysana thi thua thutah kholdoh ding thumna a ‘poster campaign’ kihongdoh; Babysana hi ‘child rights’ thumna a vah a pang ahi: Pradip

IMPHAL, July 29(ET): Kum 14 a upa Babysana aumna hostel room a athisa akimudoh thu a thutah kholdoh dinga Police department in kitepna avel vel a anei vanga thudih a thutanna dinga thumna awgin aging jing in ahi.

Achesa July 18 ni a Babysana hi aumna hostel room a kikhailih a kimudoh ahi’in, thilse kibolna um hiding a insung miten aginmo ahi. Thilsoh chungchang a Monday nikhon Imphal leh Thoubal district mun chom chom a Joint Action Committee tosotna a poster campaign hondohna anei uvin ahi. Thilsoh gangtah a kholdoh dinga kiphinna bol hon thumna anei uvin ahi. State Home Department in hiche thu CBI khut a pehlut dinga aseilhah nunga poster campaign abol jom u ahi.

Sunday jan a IGP Clay Khongsai in thuso miho akihoupi na’a, tua case hi DIG vetsuina a chelha jing ahi’in, case kisulham ding ahi, tia asei ahi. State police hon Imphal West Additional SP A Ghanashyam Sharma lamkaina Special Investigation Team (SIT) jong asemdoh ahitan, team hon case akhol ahi, tia Clay Khongsai in aseiya, chule amatah in thukholna avetlhah jing thu jong aseiahi.

“Hiche jeh a hiche case kikholna agan louna ding thu aumpoi”, tin aseiyin chule simlai nu athisa akimudoh na Standard Robarth Higher Secondary School a warden ni jong kiman ahitai, tin aseibe in ahi. Hostel a um simlai 36 ‘statement’ kila ahi, tin aseiyin chule Babysana thi thu hi police hon gelkhohna neitah a akhol ahi, ati.

Babysana athi sa akimudoh a, athi dan ginmona aum hin ‘child rights’ dinga kiphinna aumdoh sah e, tin Manipur Commission for Protection of Child Rights member anahi khat in Keishampat Lairembi Community Hall mun a ‘Mass Solidarity Meet on Child Rights’ kin abol nauva aseiyin ahi.

Gamsunga hitobang thilsoh aumhi amasapen ahipon, 2014 kum a kon Hostel a um simlai tamtah thi jom a ahi, tin Pradip in aseiyin ahi. Sorkar in Hostel hon ajui ding dan asem dinga 2014 kum a kon ngehna kinei ahitan, dan ngaichat ahi e tia thumna ana kinei hi sorkar in angai peh hileh Babysana chunga vangsetna lhung lou maithei ahi, ati.

Ipijeh a sorkar in dan (regulation) semna dinga phat sottah asuh lut a chule itih chan asuhmang nahlai diu ham, tin Pradip in thudohna aneiyin, sorkar in regulation sem ding agelkhoh loujeh ahi’in, law chule act tamtah hi jan kah a kisem ahi, tin aseiyin ahi.

Kikhopna a pang DESAM General Secretary Shital in ahoulimna a Babysana thi thu a agency tamtah in themmona anei ahi, tin aseiyin chule hostel hi anei hon amaho dei bang a dan akisem u ahi, ati. Manipur Human Rights Commission Chairperson in charge Khaidem Mani lamkaina a kikhopna achelha in ahi. Kin gon hi Manipur Alliance for Child Rights in agon ahi.

Gamsung district jouse a lupna 150 dolding hospital khatcheh kisadng ahi tia Health Minister in Thoubal a lupna 10 umna Ayush hospital ahondohna asei

Imphal, July 29(ET): Gamsung district jouse a lupna 150 dol hospital khatchieh kisading ahi tin Health and Family Welfare Minister L. Jayantakumar Singh in Thoubal, Wangma Taba mun, CMO office sung a lupna 10 umna AYUSH hospital hondohna kingon kiman na ah aphongdoh in ahi.

Chief guest a pang Jayantakumar Singh in ahoulimna a health sector hi mihem hinkho a athupi pen khat ahi, tin aseiyin, mijousen dam sot ding adei ahi, ati. Aman aseibena ah Indian constitution noiya right to life hi mihem thaneina poimopen ahi ati. Chuleh mipite ‘Right to Life’ kipe hi thunei vaihom ho mopohna lenpen jong ahi tin Minister Jayantakumar chun aseikit’e. Ayush leh Allopathy teni jong thakhat a achekhom lhonding’in temna aneikit’in ahi. Mipi lungdei bulhit nadinga Health Department in health service ahoisah cheh bou hilouva ‘wellness programme’ jong apohdoh ahi. Hiche thu a Health and Wellness Centre tamtah district chom chom a kihong ahi’in, Primary Health Sub Centre hojong Health and Wellness Centre in akhel ahi’in, Health department lungtup thah molso nading ahi, tin aseiyin ahi.

Ayush kijenna hi advance medical application a thil thah ahipon, amanlhom jo ahijeh a tamtah in Ayush a kijen ding joh adeilhen ahi. Ayurvedic leh allopathy hi tukhang a deilhen jo a um ahi, tin Minister pa in aseiyin chule lupna 10 umna hospital hi Thoubal mihon aphatchompi ding ahi, ati. Sorkar in health centre khantou nadinga mipi ngaidan aliemjing ahi, tin aseiyin chule health sector a sorkar tohgon mipin atosot dinga temna jong aneiyin ahi.

Kingon a L. Promila Devi, Director Ayush, Government of Manipur, Dr. Y. Lukhoi Singh, Additional Director Ayush leh Member Secy. State Health Society President leh Guest of Honour a apang lhonin chule Ayush staff ho, health staff ho, ASHA chule adang dang jong apang uvin ahi.

Thanglianpau in UPF ‘Letterhead’ aman jom loudinga UPF in sei

Imphal, July 29(ET): United People’s Front (UPF) in Front douna a Thanglianpau thilbol thu a avel a thuso aneikit uvin, Central Committee in kilungtoh tah a kilolna aneiya achesa March nisim 3 nikho a anodoh ahitai, tin aseiyin ahi.

Thanglenlal Doungel, Information Secretary, UPF in thuso aneina a phat sottah tohkhompi pa jana jeh a tu masang akichih thei nadinga avel vel a kisei ahi’in, ahivang a amahin party min lamdih louva aman a Front minsetna ding chule letterhead aman jing ahi’in, hiche jeh a Central Committee in ama chungchang a thulhuhna anei ahi, ati.

Achesa March nisim 3 ni a UPF a kon Thanglianpau akinodoh tai ti thu hi mipi hetding a local chule gamsung thuso, electronic media leh state chule centre sorkar ho hetsahna kinei ahitai. UPF in Thanglianpau in ama hinkho aman dan a lunglutna anei ahipon, ahivang a amachang phatchomna dinga UPF letterhead phalna beiya aman jing hi kimoh vet theilou ahitai.

New Delhi khopi a tu naicha kihouna (political talk) a KNO leh UPF a kon sorkar thupeh dungjuiya mi sagi cheh bou pang ahi. ST Thangboi, Chairman, UPF leh President, Kuki National Front (KNF) lamkaina a UPF team member sagi in pan alah ahi’in, kihouna aga aum vang a kouna kipelou Thanglianpau lamkaina party jong apan uhi lhahdahna ahi, ati. Chule sorkar in Front athumna hi KNO leh UPF hetlouva kihongdoh ham ti thudoh lunglhai nathei dinga adonbut dinga ngehna jong aneiyin ahi.

Khonung a boina aumlou nadinga UPF lamkaina chule membership thu sorkar in avet dinga jong asei uvin ahi. Chule Front letterhead aman tahlou nadinga Thanglianpau ‘ultimatum’ akipe in, UPF chairman dan a akisei tahlou dinga thuso chun aseibe in ahi.

Gari accident a mi 1 thi, midan 2 kisukha

Ccpur, July 29(ET): Tunilhah nidan 9:00 vel chun Tedim Road, Gouchinkhup Veng lutna bul a gari accident ana um in mi khat in thina ana toh in ahi.

Thilsoh chu DI truck MN 02A 3882 in Activa khat le mi 3 anatakhah ahin amun a nungah chapang Lydia (15) D/o Ginchinthang, Salem Veng in thina to a Mawiliankim (6) D/o of Lalsianmung leh Chianglamning (20) W/o Singneu, Salem veng kisukha ahi. Chule akisukha teni lah a Moiliankim (6) D/o of Lalsianmung in athohgim jeh in Imphal a refered akibon in ahi.

Dirver pa leh gari police hon aman taovin ahi. Misukha driverpa chu Robin Thangmuansang S/o M Jamkhothang, Zomi Colony akon ahin Police hon FIR anajihlut taovin ahi.

National Quality Assurance Standard Award kihop nading toh kisai a  CCpur Dist. Hospital, External Assessment Centre Team khat in vetlhahna nei

B.Lalboi Gangte

CCpur, July 29(ET):  District Hospital, Ccpur in National level ah Hospital theng pen ho Award kipeh  naji National Quality Assurance Standard (NQAS) muthei nading’a kigon tupna nasatah anei utoh kilhon in tunin  Centre apat team khat in NQAS toh kiseiyin Assessment ahung nei uvin ahi. Centre akipat  NQAS toh kisai’a External Assessment hung nei ho chu  Dr. Tej Kumar Mathur, Public Health Expert, 26-East End Enclave, Laxmi Nagar, New Delhi leh Mrs. Bindhu B, Head Nurse GNM, General Hospital, Thiruvanandthapuram, Kerala ahin amani chu   Dr. Somorjit, SNO – National Tobacco Control Programme (NTCP), NHM leh Dr. Ranita Devi,SNO – National Mental Health Programme (NMHP), NHM ban’a Victor, BHMID Asst (NCD) in ahung kilhon piu vin ahi.

Hiche External Assessment hi tuni jingkah nidan 9:00 ah anei uvin, hiche phatsung hin Dr. Lalzuitluangi, Medical Superintendent, District Hospital in Power Point mangchan District Hospital toh kisai in presentation aneiyin ahi. Inspection team  ho chu group ni in akikhen uvin, group khat in Maternity ward ah External Assessment abol uvin, Group khat in Casualty ah External Assessment abol uvin ahi. Centre team hin External assessment anei na uva Dr. Vumchinpau Tonsing, CMO/Ccpur; Dr. Lalzuitluangii, MS/District Hospital CCpur; Dr. T. Nengkhanmang, Deputy Medical Supt.; Sangthuam, Nursing Supt. Zenngaihlun, District Quality Consultant ban’a Specialist Doctor, Medical Officers nurse in-charge ho ban’a Quality Team ho ajao uvin ahi. NQAS award mu theina ding ah villhah na hung nei Centre akipat Official hon Service Provision, Patient Rights, Inputs, Support Services, Clinical Care, Infection Control, Quality Management kiti ho avelha uvin ahi. Team chun National Health Systems Resource Centre (NHSRC) chung chon’a  guideline pe ho jui a um  hinam tiho ave lha uvin, assessment abol uvin, staff hojong phate chan akihou limpiu vin ahi. NQAS hi National Level a district hospital, community health centre leh primary health centre khonkhat jaona a quality maban’a then na ho vetlhah na ahi.

Hiche Award sang health institution in lupna aneijat lah’a Lupna khat a Dk, 7,000/- amu ding ahi. District Hospital, Ccpur  ahi tu le tua lupna 170 um ahin, hiche teilou’a Hospital then dan , Natoh dan leh vonman chah imajouse Assessment kibol ho chungchon’a Award 4 vei muthei ah Quality toh kiseiya Award nempen Kayakalp hi District Hospital in nivei amu ahi tan, tuhin Award nina LaQshya Award ahi in,  Award 3 na ahileh National Quality Assurance Standard (NQAS) ahi in, hiche Award mu Hospital jouse hin lupna khat ah Dk, 7000 amuding u ahi tin Centre Team  vilna hung neihon aphongdoh uvin,  Award sangpen National Accreditation Board for Hospital & Health Care Providers (NABH) hi gamsung pumpi’a Quality sangpen ahi in, International standard toh kibang Hospital lou in amu lou u ahi tin vilna hung nei team chun asei in uvin ahi.

Hiche External Assessment chu nilhah lam nidan 4:30 chan in ana kibol in, jingnikho leh akivat ho aban asutjom diu, jingnikho’a External assessment ah Maternity Ward, Labour Room, Blood Bank, Casualty leh OPD avet diu ahi. District Hospital, Ccpur hi 1946 a Dispensary dan a ana kipan doh ahin, June 8, 1968 in Baleshwar Prasad, Chief Commissioner of Manipur in District Hospital hi lupna 50 um theina ding ah dop sang ana boldoh ahi in, Health Minister in lupna 50 akon in May 17, 1985 in lupna 100 um theina ding in ana  boldoh in ahi.

December 23, 2013 in Health minister in Operation Theatre wing ahongdoh in, May 31, 2002 in Manipur CM in OPD building ana hongdoh in,  tuchan’a District Hospital ah lupna 170 bou um ahi in, tuni chan hin District Hospital ahin Award chom chom mu in aum jing  in, Manipur state sung’a District Hospital umjouse lah’a amasapen ding’a NQAS-State Certification 2018-19 kum ah amu ahi in, 2018-19 in LaQSHYA noiya State Certification mumasapen in apang kit in ahi. District Hospital lah’a nivei KAYAKALP award sang leh 2015-16 leh 2018-19 ah KAYAKALP award mu masapen ahi in, Manipur state sung pumpi’a ISO 9001:2008 Certified District Hospital mu masapen khat jong ahi.

HC in vadung a song leh nel lo aphal dinga Kakching worker hon ngehna nei; Thoubal vadung dinmun thu a ‘public meeting’ um

Imphal, July 29(ET): Manipur High Court in vadung a kon song leh nel khot/lah tahlou dinga thuso anei douna a kiphinna bol hon JNRUM Hall, Kakching Sumak Leikai a Monday nikhon kiphinna anei uvin, amahon asei dungjuiya court thupeh hin insung genthei natong tamtah kivahna atohkhah ahi, tia aseiyu ahi.

Kha Maikei Apunba Shinmee Lup kiti kiloikhomna worker hon asemdoh u ahi’in, kiloikhomna noiya High Court Order demna anei uva chule nel leh song lhoh a kivah ho sum muna ahuhdoh diuvin asei uvin ahi. Toumun kiphinna a pang natong khat in, “Vadung a kon song leh nel kalo jeh a insung kavah jouva chule ka chate lekha kasim sah jou ahi”, tin aseiyin ahi. Tua High court thutanna hin keiho hinkho nasatah a asuhboi ahi’in, insung vahna ding natoh dang kaneipoi, ati.

Itih chan hahsatna kato diuham tin kiphinna bol hon thudoh anei uvin chule insung genthei tah a um natong ho ding gelna a High Court in thutanna anei alahdoh dinga ngehna aneibe uvin ahi.

Thoubal vadung umdan thu a Thoubal Mela lentol a public meeting abol uvin Thoubal River Conservation Committee (TRC) leh All Thoubal Apunba Meira Paibi Lup (ATPMPL) lamkaina a meeting kigong ahi.

Kikhopna a scholar, Meirai paibi kiloikhomna chom chom a lamkai ho, simlai chule Thoubal vadung pang a cheng ho apang uvin ahi. Kum ni lhing machine in akhot jeh a vadung se a ahitan, hiche jeh a ‘manual mining’ bol loudinga meeting a kilolna anei uvin chule dan kisem jong leh song leh nel vadung a kon lhoh ding phal louding a jong kilolna anei uvin ahi. Thoubal vadung huhna ding thu a kilolna chom chom jong anei uvin ahi.

Mao Market kihong ding

Imphal, July 29(ET): Jingle Keishampat Leimajam Leikai a Mao Market kihong ding ahitai. Manipur Press Club a thuso mihotoh akihoulimna ah Mao Imphal Market Co-ordination Committee a Convener Khuraijam Athouba in achesa 2015 kum chun Mao a loubol mihon Imphal ah Mao Market khat anahong uve ati. Hiche lai a gamsung vai anahom government in amaho touna ding chu Nagamapal Naga river chung’ah anasempeh in ahin phat chomkhat jouvin Lamphel Super Market lang’ah anachon kit’e ati.

Lamphel lang’a customer deibang a amu joulou jeh un deibang in sumkol veina ana banjom thei pouvin ahi. Alangkhat a Mao a kon’a hung thiljoh hon Imphal sung mun kitup laikhat adeikit uvin ahi. Jing nikho a kibol ding kingon hi State Government in khohsahna aneiya chuleh Mao loubol ho atosot ding deisah jal’a kingaito ahi tin Convener pachun aseiben ahi. Mao Imphal Market Co-ordination Committee a Chairman Bessi Mao in aseina ah State Government thusah jal’a Mao a kipat thiljoh hochu Lamphel Super Market a anakichon u ahin, adeibang uva customer aumlou jeh a saotah che theilou ahi tin aseiyin ahi. July leh August lha teni hi Mao a kipat anche louhing chuleh lou sohga lhunphat ahin hiche phatsung’a akijohdoh louva ahileh mohseh a mangthah kitdiu ahi ati. Chuleh New Checkon Tribal Market ah thil johna ding lampi vang aumpoi tin Bessi Mao chun aseikit’e. Government in Imphal sung mun kituplai khat a Mao Market khat asem ding’in temna aneikit’in ahi.

Babysana toh hostel room khat a um chapang ho counseling bol angaiye, tia expert hon sei

Imphal, July 29(ET): Babysana chunga thilsoh lhung hin Babysana toh room khat a um simlai ho lungthim atohkhah ding ahi’in, thilso jan a thil umchan mu uhen lang muhih jong leh asuhkhah diu ahi, tin Child Psychologist khat in aseiyin ahi.

Thuso mihon koi ahi seidoh loudinga asei jouva Psychologist nu in alunggel bep ahi. Room sunga mi akikhailih na thilsoh ho he a pilhing ho jeng jong alungthim asuhboi ahi’in, hitobang thilso na insung a lungthim suhtheng nading a hou thu a kin akibolna jong um ahi’in, Babysana toh room khat a umkhom a hostel simlai ho lunggel itih asuhboi louding ham, tin aseiyin chule chapang hohi akhonung diu gelpeh a counseling bol ngai ahi, ati. State police hon thuso anei nauva Babysana toh room khat a um simlai 36 ho abon uva khat khat a thudohna akineiye, tia asei thu a lunglhai um donbutna iti kimu ding ham, ati. Chapang ho phatah a counseling bol masang a thudohna nei hi dih kasapoi, tin aseiyin chule tua boina sangtah lhung hohin chapang ho lunggel asuhboi cheh ding ahi, ati. Alangkhat a Babysana chunga thudih a thutanna nei dinga thumna nei mi tamtah in school a um simlai adang ho agelkhoh nau thu jong asei uvin ahi.

Thilso kal nikho 12 che ahitan, simlai 36 bou hilouva simlai adang dang honjong alekhasim nau suboi thei khop lungthim boina ato ding ahi. State sorkar in thudih a thutanna aumkah a hiche chapang ho dinga lampi agonpeh ding ahilouleh lekha asim jom thei nading uva school dang khat a achon diuvin aseiyin ahi. Aphapen ding hi thukholna akichai kah a school administrator leh principal mat ding hi ahi, tin social worker khat injong thuso miho henga aseiyin ahi.