Thusoh chom chom

Thusoh chom chom

233
0
SHARE

Babysana chung’a thudih a thutan ding thumna a nu-le-pa ten school hostel a kon achate thil-le-lo ladoh tau

Imphal, July 27(ET): Standard Robarth School Canchipur hostel a um simlai ho nu-leh-pa tehon Saturday nikhon hostel room a konin achate thil ho jouse apodoh tauvin, July nisim 18 ni a athi dan kihelou Ningthoujam Babysana chungchang a thudih a thu atan diuvin thumna anei uvin ahi.

Nu-le-pa achate thil ladoh a che hohin ‘visiting day’ ni teng dormitory alut diu kiphal lou ahi’in, chapang ho umna room amu uchun nu-le-pa atamjo in alunglhai louna thu asei uvin ahi. Fan umlou chule amun ong louva lupna adan umho akoi uva, simlai ho nomtah a ava le theina diu mun ong neocha bou akoiyu ahi. Nu-le-pa phabep in achate nungsol ding adeilou nau thu aseiyun ahin phabep in Babysana thu akiseilhah teng nungsol kit dinga asei uvin ahi.

Hostel a numei 147 um ahi’in, Babysana athi nikhat jouva nu-le-pa ten achate hostel a kon alahdoh u ahitan, ahivang a AMSU leh JAC toh kinoptona anei jouvu tuni a bou simlai ho thil-le-lo ho nu-le-pa ten alahdoh u ahi. Secretary General, All Manipur Students Union (AMSU) Bipinchandra Ahanthem in thuso miho akimupi na’a, Babysana athi jouva private a kibol hostel tamtah a deilou umtah thilsoh tamtah akihedoh in, dan phatah a akijui leh akisem loujeh ahi, tin dan phatah sem dinga thumna aneiyin ahi. Landhoni, Principal, Standard Robarth English School lamkaina a organization phabep in Manipur State Legislative in phatsahna anei Manipur Private School Registation Act, 2017 adoudal ahi, ati.

Landhoni lamkaina a kiloikhomna in abol thei chan abol a, State assembly in aphatsah dan hi kichepi lou ahi, ati. All Manipur Private School Welfare Association in Manipur Private School Registration Act, 2017 velvetna nei dinga thumna aneiyu ahi’in, ipijeh ham kihelouva tuni chan a Act hi kichepi loulai ahi, tin Bipinchandra in aseiyin ahi. “Act hi akichepi a ahileh private school tamtah derecognized kibol ding ahi”, tin aseiyin chule sorkar in asem Act bulhit louva school tamtah um ahi, ati.

Organisation tamtah in Manipur Private School Registration Act, 2017 doudal jong leh All Manipur Students Union (AMSU) in Act chepi nadinga pan sangtah alahding ahi, tin aseibe in ahi. AMSU Human Resource Secretary Bruce Pebam injong ahoulimna a nu-le-pa ten achate hostel a aumding monna aneilou jeh a thil aladoh tauve, tin aseiyin ahi. AMSU in kihouna akou na’a hostel a um nu-le-pa atamjo apang uvin chule Hostel a chate akoi ngam lounau thu asei uve, ati.

AMSU in State police tosotna a hostel a kon simlai ho thil tuni a alahdoh u ahi. Thukholna phatah a achelhah thei nading ahi, tin Bruce in aseibe in ahi. Hostel room (dormitory) adang jouse ahon uva Babysana athisa akimu na room bou akha u ahi’in, thukholna achelhah nahlai jeh a hiche indan a mi alut ding aphal louvu ahi.

Congress MLA 7 ho ‘disqualification case’ thu kal 4 jouteng seikit diu

Imphal, July 27(ET): Congress MLA 7 thalheng a pang Counsel in ‘disqualification case’ thu toh kisaiya jihtho a ‘objection’ apeh nading uva Speaker henga hapta li phat athumbe utoh kilhon a Manipur Legislative Assembly Speaker Tribunal kal li a dinga  avochon tauvin ahi.

Congress a kon haiya MLA sagi- Oinam Lukhoi, Ksh Biren, Paonam Brojen, Sanasam Biramani, Ngamthang Haokip, Ginsuanhao chule Y Surchandra ‘disqualify’ bol nadinga case kisem thu a tuni a Speaker’s Tribunal, Manipur Legislative Assembly toukhom ahi. Hearing anei nauva MLA sagi ho counsel in Speaker pa henga MLA ho douna a kisem case a ‘written objection’ peh nadinga kal lip hat athumbe in ahi.

Petitioner ho Counsel in ngehna doudalna anei loujeh a Speaker in kal li jouteng hearing umkit dinga phatsahna anei ahi. Speaker Tribunal a Forest and Environment Minister Th Shyamkumar douna a Congress MLA hon asem ‘disqualification petition’ achom chom 15 jong ngailhahna anei uvin ahi. Hearing a Counsel in ‘disqualification petition a adihlou (technical error) phabep aum’e, tin petition sanpeh lou dinga aseiyin ahi.

Alangkhat a petitioner counsel in July nisim 23 nikho a Md Fajur Rahim leh MLA K Meghachandra in Speaker Tribunal heng a disqualification petition apeh thu a High Court order (thutanna) apelut in ahi. Hearing jouva Speaker Tribunal in thutanna ol sei dinga aseiyin ahi. Congress a kon haiya MLA sagi holah a disqualification petition thum MLA li douna a kisem a chule MLA thum douna a petition khat cheh kipe a ahi.

Nel le suong kibolna chunga HC thutanna doudalna’a toumun kiphinna kinei

Imphal, July 27(ET): Vadung akon nel le song kibolna ho jahda ahina dinga High Court (HC) thutanlhahna deilouna leh doudalna dingin Truck owners (neiho) le labourers (natong) hon Minuthong Truck parking munna toumun kiphinna anei uve.

Hiche kiphinna hi Unemployed Local truck owners Association hon abol u ahi.

Thusoh miho komma Unemployed Local truck owners Association a Advisor Moirangthem Angouton in aseina’a, High Court in nel leh suong kijahda na dinga thutanna anei hin a hinkho’u alahmang peh ahidan aphongdoh e. Amapan aseibena a chun, nel leh suong kitolna leh kibolna a ahinkhou kingam ahidan aseiye.

Government in mining kibol aphalna dingin government henga tiemna aneiye. Alangkhatna, kiphinna khohsetah jong kipandoh ding ahi tin amapa chun aseiben ahi.

Bishnupur Thongjaorok vadung pang’a neldi khot a kivah nikhotha lo mi 300 tobang in jong Bishnupur Ward No.3 Community Hall ah toumun kiphin abol uvin ahi. Toumun kiphinna a chun High Court order kalna thucheng jatchom chom jong atahlang uvin ahi. Kiphinna a panla nupi khat in aseina ah phat sottah a kipat neldi khot a nitin neh kiholthu kahiuvin, hiche tailouvin neh holna ding lampi dang kanei pouve ati. High Court in khamgahna ahin koi nikho’a kipat in insung phabep nikho 10 lang an-ngol in aum tauve ati. Neilou genthei hoding gelkhohna jal’a akisaipi authority in khamgahna akoi anung lahdoh ding’in ngehna aneikit’in ahi.

Thongjaorok vadung hi Bishnupur District kehkhat tobang neh holna ahi tin neldi po a pang Tata DI driver khatchun aseijin hijeh chun High Court in neldi kikhot doh ho chung’a khamgahna akoi anung lahdoh ding’in temna aneiyin ahi.

ATSUM in July 28 jankim a kon Highway a nidan 48 bandh akou phat chomkhat a dinga ladoh

Imphal, July 27(ET): All Tribal Students’ Union Manipur (ATSUM) in July 28 jan kim a kon National Highway a nidan 48 bandh bol dinga akouvu phat chomkhat a dinga aladoh tauvin ahi.

ATSUM Secretary Seiboi Haokip in Adimjati Complex a um office mun a Saturday nikho a thuso miho akimupi na’a, Chief Minister Biren Singh tu-le-tu a gamsunga aumlou jeh a ATSUM thalheng, KSO-GHQ member holeh ANSAM member hon July nisim 27 nikho a Chief Minister office chamber a Agriculture Minister V Hangkhanlian toh kihouna aneiye, tin aseiyin ahi. Minister pa toh nidan 3 vel kihouna anei uva ATSUM, KSO-GHQ leh ANSAM member hon tribal organization in apohdoh thu chom chom jong asei uvin ahi.

Tribal organization in thumna anei holah a education sector, health sector, Scheduled Tribes reservation policy, Tribal Affairs and Hills thu jong pang ahi’in, kum ni vang thumna aneiyu ahitan, state sorkar henga jong tribal miho phatchomna dinga kisem ho chepi dinga kum phabep masang a kon aseiyu ahitai. ATSUM in thumna aneiho vesui dinga CM thuhilna dungjuiya state sorkar in Additional Chief Secretary, MH Khan lamkaina committee achesa October nisim 8, 2018 kum a asemdoh ahi.

ATSUM thumna ho state sorkar in tuchan a akhongai peh a, action alah loulai jeh a ATSUM chule executive member hon July 23 nikho a hiche chungchang a kihouna aneiyu ahi’in, July 28 jan kim a kon bandh bol dinga kilolna aneiyu ahi. Agriculture Minister V Hangkhanlian in ATSUM, KSO-GHQ leh ANSAM representative ho kihoupi dinga kouna anei ahi’in, kihouna a Minister pa in simlai ho henga nidan 48 bandh akouvu alahdoh diuvin temna aneiyin chule tribal simlai kiloikhomna thum ho henga thumna aneiyu vetsui peh ding a mopohna kalah ding ahi, tia kitepna anei ahi.

Delhi khopi a kon Chief Minister ahung kile teng leh High Committee panna a tribal hon thumna anei chungchang a kihouna gon dinga asei ahi’in, ST reservation policy jui louva RIMS hospital in LDC post 9 recruitment abol thu jong Minister pa toh aseikhom uvin ahi. Director, RIMS, A Santa Singh in July 25 ni a ATSUM lamkai ho Reservation policy thu a kouna aneiya, ST reservation policy kijuilou suhdih ding chule hiche dungjuiya seat peh a MBBS course reservation jong gon ding a asei ahi.

RIMS hospital authority hon hitobang a pan alahna ATSUM in akipapina thu aseiya chule RIMS in ST reservation policy suhdihna aneiya, result aganna thei pen a aphon doh ding akinepna thu jong ATSUM Secretary in aseibe in ahi.

Imp-Jiri  NH-37 a munchim jeh a gari tamtah tang den

IMPHAL, July 27(ET): Imphal-Jiribam kah, NH 37 mun phabep a munchim jeh in Saturday nikhon gari angaiya bang a alhai thei pon ahi.

T Laijang kho a munchim in inn ni achimkhum in, ahin, lamlem pam a munchim thilsoh a akisukha aumpoi. Go hattah a ajuh jeh a munchim ahi’in, highway a lhai le gari ho nasatah in asuboi in ahi. Imphal jon a hung thil kipohna truck leh inter-state bus panna a gari aja a sim munchim na kom, T Laijang kho kom a akitang den in ahi.

Munchim in lamlen akha jeh a CRPF convoy chule escort apeh u thao po gari hojong nidan phabep atangden uvin, Highway authority hon lamlen suhthengna anei uvin ahi. Ahivang a convoy chule thao kipohna gari Jiribam a che hon lamlen apeldoh jouvun, munchim in avel a highway akhah soh kit in ahi. Thulhut kimu chan a sepai ho tosotna a authority hon lamlen asuhtheng u ahi’in, jan khang chan abol ding uva police hon aginchatna thu asei uvin ahi.

T Laijang kho chung, Laikang le Kotlen kho a jong Friday jan leh Saturday jingkah a munchim ahi’in, Saturday sun nidan 10 don a  authority hon asuhtheng u ahitai. Noney leh Tamenglong a go hattah a ajuh jom jeh a munchim ahi, tin authority hon aseibe uvin ahi. Phaicham chule thinglhang a um district phabep a go alhahsam vang a district teni a achesa ni phabep sunga go hattah a ju ahi.

CM in ‘seniority’ dungjuiya tohmun apeh dinga ATRPFM in ngehna nei

Imphal, July 27(ET): All Tribal Rights Protection Forum Manipur (ATRPFM) in government department ho a ‘work allotment’ ho seniority list a apeh diuvin Chief Minister henga asei uvin ahi.

ATRPFM in thuso aneina a Head of Office (HoO) leh Drawing and Disbursing Officer (DDO) panmun hi senior aumleh junior officer ho kipe theilou ding ahi, tin asei uvin ahi. Department a Joint Director aum a ahileh Head of Office (HOO) leh Drawing and Disbursing Officer (DDO) panmun hi Deputy Director kipe theilou ding ahi. Seniority chule grade umdan dungjuiya Joint Director in HOO leh DDO post atuh ding dol ahi, tin ATRPFM in aseiyin ahi.

Mopohna nei minister chule state sorkar in senior officer kikhel tan a junior officer lhenna kinei aumlou nadinga pan alah diuvin ngehna anei uvin ahi. “Sorkar in Department hoilai hijong leh aumsa dan ho apalkeh a akitoh louva na atoh a ahileh doudalna kinei ding ahi, tin James Haokip, General Secretary, ATRPFM in thuso aneina a aseiyin, chule nam thu a sorkar in natohna peh ding alhen loudinga aseibe in ahi.

AMMSO in ‘One Day Consultation Programme on Crime Against Women and Children’ gong

Imphal, July 27(ET): All Manipur Muslim Students’ Organization (AMMSO) in Saturday sun nidan 10.30 chun ‘One Day Consultation program on Crime Against Women and Children’ agong uvin, Khaidem Mani, Acting Chairperson, Manipur Human Rights Commission, Shah Nawaz, President, AMMO, Rabi Khan, Member Bar Council Manipur, Sobita Mangsatabam, Secretary Women Action for Development chule Renu Takhellambam, President, EEVFAM chief guest a apang uvin ahi.

Jin a akou hon society a numei dinmun chungchang thu asei uvin ahi. Program a BM Umarjit, Software Engineer in numei dinmun thu aseiyin, masang a kon numei hohi anoiya kikoi ahi, tin tekah na a pasal in ji tamtah akipui thei chule sati system thu aseiyin ahi. Hiche phat laiya vaipo hon hiche system ho ana tosot u ahi, ati. “Masang laiya kon numei chunga gitlouna thilsoh hi anaum jing ahi. Tua setna kisei hohin numei hunam a kisuse chule numei kimai bou ahop ahipon, niseh natohna/kimanchah na a numei kinoise a ho jong pang ahi, ati. Numei khat in niseh a kigimbol na ato a ahileh alungthim, ahina chule lamchom chom a atohkhah tei ding ahi. Inn pam a na atoh theilou ding chule thulhuhna semna a jong boina aneiding ahi, tin aseiyin ahi. Entrepreneur lentah ahiloule society lamkai a hitobang numei ho apan theilou hi niseh a ki engbol na kibungkhenna ato jeh ahi. System hi khel ngai ahi’in, numei chung a thilse soh ho suhtang ding igot leh numei leh pasal kibang tah a bol ngai ahi, tin jong aseiyin ahi.

Kigimbolna toh a numei hon legal system a ichan tha aneiyem, tin thudohna aneiyin chule numei chunga khanse ho khoutah a gotna peh angaiye, chutileh niseh a numei vangsetna toh a nemsuh ding ahi, tin nelkalna jong aseiyin ahi. Society a ‘women empowerment’ ngaicha ahi, tin aseibe in ahi.

ACOAM Lup in Integrity Protection Day nit

Imphal, July 27(ET): NSCN-IM leh Government of India kikah a ceasefire agreement kineina akon thucheng thum “without territorial agreement” kilahdohna dinga Government of India in nopna aneina, July nisim 27, 2001 people movement kimanna a, ACOAM Lup in Integrity Protection Day ana nit uve. Manipur Press Club munna hiche kin hi ana kinitna ahi.

Kin kimanna a houlimna nei ACOAM Lup a General Secretary Telheiba Mangang in hiche thilsoh thusim chomchan hilchetna aneiye. Avel’a geldohna aneina a, July nisim 14,2001 achun NSCN IM leh Government of India kikah’a kinoptona akineiyin, Bangkok agreement tin akihe e. Hichea thucheng thum “without territorial limit” jeh in mi 18 in thina atoh e. Hiche kinoptona chunga thucheng thum doudalna a mipi kiphinna hung kipan ahi tin aseibei.

Phatchom khat jouva July nisim 27 nikhoa chun Government in achaina keiya agreement akon thucheng thum “without territorial limit” akilahdohna dinga mipi ngehna chunga phatsahna ahin neiye.

Manipur phatjoh na dinga gamsung mipi ho aki pumkhat na diuvin Telheiba in tiemna aneiyin ahi.

Hiche kin kimanna achun ACOAM Lup a President Sanjit Soraisam, International award mu H. Ibotombi Khuman, Kanglei Ima Lup a President RK. Sanahanbi, Kanglamei a President Y. Leirik le UCM a President Ksh Somorendro jong apang uvin ahi.

10th le 11th IRB written exam 5th August le um ding

Imphal, July 27(ET): Home Department, Government of Manipur akon thuso kimu dungjui in 10th le 11th IRB riflemen kilah ding kikha kilahdoh toh lhon a recruitment board in written test abol tah ding dan  hetsah na ahin nei uvin ahi. Physical test lolhin na ana nei ho in ahunglhungding August nisim 5 nikho le Khuman Lampak Main Stadium mun a written test abol ding u ahi. Hiche exam hi jingkah lam nidan 10 a kipan ding ahi toh lhon a candidate ho in nidan 9 le report abol ding u ahi. Exam a hung ho in plain clip board, blue/black dot pen le admit card bou ahin kipoh ding uvin hetsah na ahung kinei in ahi.