Thusoh chom chom

Thusoh chom chom

286
0
SHARE

Vadung’a nel le song lahlouding’a High Court in order anaso douna a ‘bandh’ chelha; gari 4 kisuse, mi 8 kiman

Imphal July 26(ET): High Court in song leh nel lo loudinga thutanna anei jeh a niseh a natong hon National Highway akhah uvin, kiphinna anei uvin ahi.

National Highway 102 lamlen Sekmai a kiphinna bol hon lamlen ating uvin, ahivang a Advance Women Society, Protection Committee leh Sekmai Development Committee in song leh nel loh a kiphinna bol ho akitosot poi, tin suhthengna anei uvin ahi.

Hetthei khat chu mi tamtah in nel leh song alo a niseh a neh ding an akihol thu ahi’in, hitobang a natong hon High Court thutanna adoudal uva bandh abol u ahi. Achesa July nisim 30 a kon ‘Ban’ kikoi lahdoh nadinga natong chom chom in Imphal Ukhrul lamlen jong akha a kiphinna aneiyu ahi.

Driver’s Union lamkaina chule niseh a sum kihol thu hon bandh abol nauva gari li ase in ahi. Bandh toson hon Pheidinga, Imphal-Dimapur lamlen a bandh palkeh a gari li asuseuvin, police hon Pheidinga a bandh bol ho tear gas a ano uvin ahi.

Gamgiphai kho mi tamtah injong bandh atosot uvin, jingkah a kon bandh abol uvin, Manipur High Court in ‘Ban’ kikoi alahdoh kahse a strike bol jom dinga asei uvin ahi. Vadung suhboh louna dinga court in thutanna anei alahdoh nading uva thumna aneiyu ahi.

Hiche kiphinna achun police in kiphinna nei mi 8 ana man doh uvin ahi. Thuso kimu dungjui in jingkah lam nidan 9 vel apat in Sekmai Keithel le kanglatongbi lhang a akon mi phabep in lampi ana ting pan uvin ahi akiti. Sekmai mun a kiphinna nei hon Dimapur nel po truck som lam nel ana bolha uvin ahi. Hiche kiphinna chu Pheidinga Lamkhai, Kangpokpi le Saparmeina lhang a jong ana kibol in ahi. Pheidinga Lamkhai a mi 300 lam in kiphinna ananei nauva bus 3 lang ana suseuvin hiche bus ho chu bandh kibol toh lhon a security in ahin pui ahi akiti.

Alangkhat a Sekmai police in Sekmai lhang a bandh bol mi 8 lam ana man uvin ahi.  Akimandoh ho chu Thokchom Ratan Meitei (37), S/o Th Khoidum, Tendonyan Makha Leikai, Senjam Ibomcha Singh (58), S/o late Chaoba, Koirengei, Khumukcham Benando Singh (58) S/o Kh Chaoba, Tendongyan, Huidrom santosh Singh (26) S/o H Basanta, Awang Sekmai, Morangthem Amujao Meitei (21) late  M Mocha, Khabam Leikai, Wangkhem Kiran Singh (45) S/o W Sulendro, Kanglatongbi Bazar, Maibam Naoba Singh (28) S/o M Ibomcha, Sekmai Mamang Leikai le Ningthoujam Ibomcha Meitei (35) S/o late N Shamu, Sekmai Mamang Leikai akon ahi akiti. Hiche mi 8 ho ana kimat toh lhon  in nuppi phabep in Sekmai MLA H Dingo inn ana bulu uvin ahi. Natong ho khat in thuso mihotoh akihou limna a court thupeh hin song le nel loh ho kivah na asumang in, natong ho in court thupeh akija vangin natong 20,000 lam hinkho man atoh khah ding hi akinom poi tin ana sei in ahi. Alangkhat a Sekmai protection committee, Advance Woman Society le Sekmai AC development committee in jani a kihoukhomna ana nein a uva song le nel loh ho kiphinna tosot lou dingin kihou lhah na ana nei uvin ahi.

High Court ‘Ban’ lahdoh dinga association ni in ngehna nei

Imphal, July 26(ET): Manipur High Court in phalna beiya vadung pam a nel leh song lo loudinga akha jeh a nel chule song po hon boina sangtah atoh e, tin Serou Leingoi Truck Owners’ Association leh Shaktiman Association, Churachandpur in demna thuso anei uvin ahi.

DK Baite, President, SLTOA, Paulien Gangte, Secretary, SLTOA, Khamlun, President, Shaktiman Association chule Haupu, Secretary, Shaktiman Association in thuso anei nauva niseh a neh kihol thu ho sum muna kisuboi ahi, tin asei uvin ahi.

High Court in achesa July nisi 3 nikho a dan in aphal lou nel leh song kilhoh ho akha jeh a song chule nel po a gari tol chule niseh a nikho tha kihol hon hahsatna ato ahi, tin asei uvin ahi. Niseh a thil kibol ki khongai lo ahi’in, ‘Ban’ kikoi jeh a insung mite kivah joulou ahitan, ‘ban’ jeh a driver leh labourer ho panna a natong tamtah in toh ding aneilou ahitan, insung tamtah in boina ato ahi, ati.

Hiche jeh a mihem ngailutna a jal a ‘Ban’ lahdoh dinga ngehna kinei ahi’in, ahilou leh association teni in kiphinna sangtah abol ding ahi, tin gihna jong anei uvin ahi.

UNC noi a  ‘Council Assembly’ in district 7 ho nung lah doh ding thu a adinmun u tuhchah  

Senapati, July 26(ET): United Naga Council noi a ‘Council Assembly’ in achesa December 8,2016 kum a district 7 ana kisem nung lahdoh dinga kilolna ana nei u tuhchah dingin kihou lhah na ananei uvin ahi.  UNC council assembly meeting chu Bena kho (Thonglang Akutpa), Senapati district, IT Road mun a ana kibol ahi.

Hiche meeting chu Liangmai Naga Council makei na noi a ana kibol ahi. UNC in achesa May nisim 4 nikho a Ukhrul a presidential meeting kibolna a  kilolna le thulhut kinei ho tuh chat dingin jong kihou lhah na ana nei uvin ahi. Council in achesa August nisim 3, 2015 kum a Framework agreement ana kisem jong tosot jing dingin phondoh na ana nei uvin ahi. Naga mite in India le Myanmar kikah a gamgi kisem jong agam mi Naga ho hetlou a kisem ahi toh lhon a hetpeh na akinei loud an le akichepi thei lou ding dan thu jong hetsah na ana nei uvin ahi.

Kiloikhomna in asei na a hiche gamgi hohi malai khang toh kitoh a abon a kithah sem ding ahi tin jong phondoh na ahin nei uvin ahi. Bena(Thonglang Akutpa) khomun a  ‘Council Assembly’ kibol na achun UNC in R Stoneson, Makui kho akon chu UNC, Vice President dingin lhendoh na ana nei uvin, Puanthanpou Gonmei, Tamenglong chu Assistant General Secretary, A Athili Kayina, Tadubi chu Finance Secretary,  H Khuba Peter, Maram Centre chu  Art and Culture Secretary chuleh Kh Paul Chothe, Purum Chumbang kho akon chu Assembly Secretary dingin lhendoh na ana nei uvin ahi.

EKCA in TNL thuso  suhthengna nei

Imphal, July 26(ET): Eastern Kuki Chiefs’ Association (EKCA) in achesa July nisim 20 nikho a Ukhrul a EKCA leh TNL in kikhopna aneina a agenda ho TNL in ahilouva asei alungkhampi nau chule kidang asah nau thuso anei uvin ahi.

Jamkholun Haokip, President, Eastern Kuki Chief’s, Association (EKCA), Chasad in thuso aneina a July nisim 24 nikho a ‘EKCA not to claim land ownership in Kamjong’ ti thupi a niseh thuso phabep a thu kiso hi abon a semthu chule langneina dimset ahi, tin aseiyin chule hiche hi Kamjong gamkaiya cheng nam ni kikah a tahsan kipalkeh na sohthei ahi, ati.

EKCA leh TNL in kikhopna (joint consultation) anei hi nam teni lungmong tah a achenkhom theina ding ahi’in, khosung gamgi thu chule ama ama gam hopsung thu a phatah a kihouna um ahi, ati. TNL in ngehna aneijeh a EKCA in khosung thuso (notification leh clarification) jouse a pupa gam (ancestral land) ti man loudinga nopna anei ahi, ati.

Phaikoh haosapu in kagam ahi tia jouthu a aseina ima aumpon, TNL in hiche thu asodoh hi EKCA in vangset um asa deh poi. Ahivang a Phaikoh kho haosapu chule Kuki kho adang dang in asei ho bulhitset na atosot joh ahi, tin thuso chun aseibe in ahi.

Surrender kibol hon an-ngol kiphinna bol; Police hon suboi

 Imphal, July 26(ET):  Government in charter of demand kinei asuhbulhit louto kilhon’a All Manipur Hills & Valley Individual Surrender Welfare Association phaw noiyin gentheina toh surrender kibol hon tunia chun Keishampat Community Hall munna an-ngol kiphinna apandoh uve.  Hijeng jongleh police team hon kiphinna neiho chu ana suboi uve.

Thusoh miho kom’a Association spokesperson Abdul Latif in aseina a, government henga manchah koilha ex-militant ho job kipehna dinga ngehna aneiyu jaona a charter of demand kinei government in asuhbulhit na dinga ngehna aneiyu ahi.

May 21,2017 nikhoa State Cabinet in resolution asemna a security force a surrender kibol ho  lahlutna dingin aseiyin, hinla akitepna tuchan in bulhit louva akoiye.

Aseina a surrender kibol ho hi mipi musetna achang uvin chule natohmun aholnaova jong hahsat na atoh uvin koiman jong natong dingin agoi nompoi ati.

Government policy dungjuiya ngehna kinei ho thum beh – Surrender kibol ho security force a lahlut ding ahiloule government natohna phatah peh ding, stipend kivat ho kilhadohna ding leh amudiuva kisei ho kipehdohna ding beh asuhbulhit na dingin ngehna akineiye.

Ngehna kinei ho government in nahsahna aneilouva ahile kiphinna khohsetah kipandoh ding ahi, tin hetsahna aneiye.

Alangkhatna, Manipur Police a team hon surrender kibol ho an-ngol kiphinna chu ana suboi uve.

SBI Personmun Branch office kibulu; monna nei mi 2 kimandoh

B.Lalboi Gangte

CCpur, July 26 (ET): Melthet lou mi phabep in achesa July nisim 25 jankim vel in State Bank of India (SBI) Pearsonmun Branch anabulu uvin hiche achun Computer  phabep jong anapodoh uvin ahi akiti. Thulhut in aseina’a hiche gucha ho hin seh (hammer) leh chempong mangcha’a Bank kot kikam na akaldoh uva chuleh shutter kam na kanglong 2 jong akaldoh uva analut uvin computer phabep aladoh un ahin amaho manchah seh leh chempong anadalha uvin ahi ati.

Hiche toh lhon’a SBI Bank in amanchah computer Monitor 3, Keyboard 2 leh Mouse 2 anapodoh uvin ahi. Hetthei khat chu hiche SBI Bank ahin office hour sung bou’a security kikoi ahi. Thilsoh nachung’a CCpur Police in Bank mun’a CCTV kikoi ho mangcha in kholchil na aneipan tauvin ahi. SBI Pearsonmun mun’a thilsoh ahi toh lhon Pearsonmun Village Authority in demna anei in ahi.

Alangkhat’a hiche thilsoh chung in gucha ho chung’a FIR No. 93(7)2019 CCP PS u/s 457/427/380/34 IPC noi’a case registered jong ana kibol in ahi. Chuleh thuguh po le ho’a kon Police hon thulhut amu dungjui uvin Bungmual khosung inn jouse kholchil na anei nao in Bank akon kigudoh monitor 2, keyboard 2 leh mouse 2 chu Bungmual akon Chunkhogin chapa V Ginminlal (26) te inn a anamudoh uvin ahi. Mat’a um V Ginminlal chu Police hon thudoh anei nao’a Pearsonmun akon T Kamzathawn chapa Thangkhanhau Tonsing (26) in jong pan alah ahidan aphondoh toh lhon in Police in kholchil na aganei nao’a monitor 1 ana mudoh uvin ahi. Bank akon thil kigudoh ho mudoh ahi toh lhon in Police hon mat’a um teni chung thu kholchil na anei jing nalai uvin ahi.

Babysana thilong avel a post-mortem bol kit u; kiloikhomna chom chom in thutah kholdoh dinga kiphinna neijom

Imphal, July 26(ET): RIMS a doctor hon ama-le-ama kithat ahi tia post mortem report a asei Babysana thilong avel a JNIMS a post mortem bol dinga apokit uvin, JNIMS conduct hon post-mortem athah bol kit uvin ahi.

Babysana thilong chunga post-mortem akibolna anivei channa ahitan, Standard Robarth School, Canchipur a kai simlai Babysana athi dan ginmo aumjeh a thutah kholdoh na a pan lading a kisemdoh JAC in Chief Minister Biren Singh toh avel a post mortem bol kit dinga kinoptona aneiyu ahi. Hetthei khat chu Standard Robarth School a staff ni police hon amat ahitan, chule JAC in thumna anei banga hiche thu hi CBI khut a pehdoh dinga state sorkar in nopna anei ahitai. Ahivang a CBI in case alah ding hinam ti thuchen tua kihe loulai ahi.

Alangkhat a hostel dormitory sunga kikhailih a kimudoh N Babysana Chanu thi thu a thutah kholdoh dinga thumna neiya meira paibi, simlai chule adang dang in kiphinna abol jom nalai uvin ahi. Standard Robarth Higher Secondary School a teaching chule non-teaching staff honjong school maiya kiphinna abol uvin ahi. School a jilkung RK Opendro in thuso miho akimupi na’a, N Babysana Chanu thi alunghempina thu aseiyin chule aganna thei pen a thutah kholdoh dinga aseiyin ahi. Babysana thi chungchang a thudih a thutanna aumleh simlai ho school kai pan thei kitdiu ahi, ti atahsanna thu aseiyin chule Home Department luboh jong hi a Chief Minister in aganna thei pen a thukholna achal jing a chule thudih a athu aseilhah dinga temna aneibe in ahi.

North-East Forum for International Solidarity (NEFIS) injong Babysana thi thu kikholna a police vaipo ho umchan demna thuso anei uvin ahi. Tuchan a police hon themmona neiho akholdoh theilou jeh a mi tamtah lunghanna soh ahi, tin aseiyin ahi.  Achesa July 18 jingkah a Standard Robarth Higher Secondary School a class VII simlai Babysana (14) hi hostel room sunga akikhailih na a kimudoh ahi. Sorkar in dan (regulation) asemlou jeh a private school hohin angailou chonna ajuiyu ahi, tin NEFIS thuso chun aseiyin ahi.  Themmona nei ho aganna thei pen a amat uva chule gotna apeh diuvin NEFIS in thumna aneiyin chule KG a kon PG chan themjilna pha (quality compulsory government education) peh nadinga policy asem uva gamsunga privatization ‘Ban’ bol dinga jong thumna aneibe uvin ahi.

Gamsung in 20 channa ‘Kargil Vijay Diwas’ mang

Imphal, July 26(ET): Kargil War a gal hang ho geldoh na a gamsung injong Banquet Hall, 1st Manipur Rifles mun a ‘Kargil Vijay Diwas’ amang uvin ahi.

Chief Guest a pang Agriculture Minister V Hangkhanlian in, ni 74 lhing Kargil War aum sunga gamsung dinga India sepai 527 in ahinkho apehdoh ahi, tin aseiyin chule nikho hi gam ngailutna jal a hangsan tah a kiphal theng a sepai ho ikithang at pi nau ahi, ati. Pakistan Army chule thingnoimi hon Line of Control (LoC) agalkai uva, dan apalkeh jeh uva India sepai hon 1999 kum a ‘Operation Vijay’ abol uva Pakistan alethuh ahi, tin thusim aseiyin ahi. Athi ho jana pehna aneiyin, amaho panlahna hi suhmil thei ahipoi, tin aseibe in ahi.

Kin gon a President a pang Forest and Environment Minister Th Shyamkumar in houlimna aneina a, chol louhel a gamsung dinga pan la a hangsan tah a galsat ho isuhmil loudiu ahi, tin aseiyin chule nikho hi martyr chang ho geldohna, ilah uva gam ngailutna neikit nadinga kitilkhouna ahi, ati. Gamsung mihon thingnoi chule gamsung suboi thei adang dang douna a pan alahkhom diuvin Minister pa in temna aneibe in ahi.

Kikhopna a Education Minister Th Radheshyam, Sekmai MLA H Dingo, Chief Secretary, DGP, civil leh police official hojong apang uvin ahi. Chandel District administration injong DC office conference hall mun a ‘Kargil Vijay Diwas’ anit uvin ahi. Chandel DC in Kargil gal akipat dan thu aseiyin chule gal hang sepai ho, adeh a Chandel district a kon gal hang thum ho kiphalna geldohna leh kithang at pi na thu aseiyin ahi. Koi hijong leh nei-le-gou ahilouleh thil dang dang pehdoh ding hi ahahsa pon, ahivang a hinkho pehdoh ding hi kiphalthengna lenpen ahi, ati.

Gamgi a galsat dinga mijouse che thei hih jongleh pan alah nau ho a tomngai tah a na atoh theiyu ahi, tin aseiyin chule ‘immunization’ lhahsam jeh a chapang neocha cha thi ahi’in, jilkung hon kichuhna pha aneilou leh simlai hon gentheina ato ahi, ati. Additional SP CHandel injong houlimna aneiyin, gamsung sepai ho chunga kipathu aseiyin ahi.

Hetthei khat chu 1999 Kargil War a hi Chandel a kon Army thum- G Garnethang, Rifleman (Unapal kho), Chara Nicholas Moyon, sepoy (Mitong kho) chule Ng Beningvir Moyon, sepoy, (Khukthar kho) in gamsung dinga ahinna anapeh u ahi’in, athum uva hi Naga Regiment a um ahiuve.

District Administration, Thoubal injong Conference Hall, DC Office, Thoubal a 20th Kargil Vijay Diwas kin amang uvin ahi. Thoubal DC L Radhakanta, MCS in ahoulimna a Kargil Gal (Operation Vijay) a lunglen tah leh hangsan tah a galsat sepai ho geldohna aneiyin, gam ngailutna leh gamsung huhna dinga kipehdohna neiya sepai hohi gamsung in a itih a ageldoh jingding ahi, ati. Athi sepai ho jana a ‘minute 2’ thipbeh a aum uvin ahi.

Thoubal Battalion, Assam Rifles in Sofia English School, Thoubal a 20th Kargil Vijay Diwas nikho toh kitoh a ‘Know Your Army Mela’ abol uvin ahi. Kingon a The Sofia English School, Fancier Academy, Brilliant Academy, Evergreen Flower School, New Era Hr Secondary, Wisdom Foundation chule Thoubal a um school dang dang a kon simlai 800 in pan ala uvin ahi.

‘Josh & Motivational Talk & Movie’ abol uvin, hiche jouva ‘Equipment & Weapon display’ (galmanchah vetsahna) anei uvin, gam ngailutna la asa uvin ahi. Simlai hon Operation Vijay chule Army chungchang hetgilna dinga thuhilna aneiyu nom asa lheh uvin chule ‘Message for Soldier Corner’ a tamtah in ngaidan jong asei uvin ahi. Param Veer Chakra leh Maha Veer Chakra sang ho thusim jong asei uvin ahi. Kargil Vijay Diwas thu hilna ding chule sepai ho kipehdohna thuhilna dinga kin-gon (outreach program) abol u ahi’in, School Principal chule staff hon Assam Rifles ho chunga kipathu asei uvin ahi.

27-Sector Assam Rifles noiya 25th Assam Rifles hon jong CCpur mun a Kargil Vijay Diwas anamang in ahi. Hiche kingon achun 5 Km Marathon competition anabol uvin ahi.

Marathan chu Tuibong Peace ground ah Colonel. Saurabh Saxena in hondohna aneiyin competition a pang mi 122 ahi.

RIMS Nephrology a Super Specialty DM Course akipat ding toh kilhon a ‘Kidney Transplant program’ aumvah ding kinepna um

Imphal, July 26(ET): Union Ministry of Health & Family Welfare in DM  (Super specialty) Course, Nephrology hondoh dinga phatsahna anei toh kilhon a Regional Institute of Medical Sciences (RIMS) a Kidney Transplantation Programme umvah ding ahitai, tihi kinepna thei ahitai.

“Tukum a kon RIMS Nephrology a DM Super Specialty Course bolna dinga seat ni phatsahna um ahi’in, kum thum jouteng Kidney Transplantation programe kipan maithei ahitai”, tin Jubilant, Director, Institution, Dr A Shanta in thuso miho henga RIMS campus a Friday nikhon phondohna aneiyin ahi. RIMS a Kidney Transplantation Programme akipat theid ing dan RIMS Director Dr A Shanta in aseiyin, RIMS a kon Nephrology a Super Specialty Course akijo teng leh amaho hin RIMS a kum khat na atoh teiyu ngai ahi, ati.

RIMS Nephrology a Super Specialty MD ni umding ahi’in, kum thum jou chule akit kum jouteng doctor hijat ma umding ahitai. Urology Department leh Nephrology department kitho a RIMS in Kidney Transplantation Programme kum thum jouteng umding ahi, tin Dr Shanta in aseiyin chule Nephrology, RIMS a Super Specialty Course hondoh dinga phatsahna pe a Union Ministry of Health and Family Welfare chunga kipathu aseiyin, Kidney transplantation programme bol nadinga lungtup abulhit ahi, ati.

Pradhan Mantri National Dialysis Scheme (PMNDS) kiti scheme aumtoh kilhon a below poverty line ho panna a programme hi mijousen aphatchompi ding ahi, ati. Dr Shanta in RIMS, Imphal hi khangthah doctor hon DM, Nephrology asim nathei India Map a pang ding ahi’in, kal (kidney) natna neiya gamsung mi chule Northeast gammi leh kinaipi hon aphatchompi diu ahi, tin aseibe in ahi.