Thusoh chom chom

Thusoh chom chom

243
0
SHARE

Babysana thina thu’a warden 2 kiman, case CBI pehdoh hita; Babysana thu seilhauvin lang simlai sangli khonung setsah hih uvin, tia association in sei 

Imphal, July 25(ET): Babysana thina toh kisai a mipi in mona nei ho matdoh ding adei dan u phondoh na ana nei utoh lhon a kiphinna jat chom chom nei ding a hetsah na ana nei utoh lhon in tuni in hiche case chu CBI ang a pehdoh na ana kinei tan ahi.

Hiche thu chu Chief Minister N Biren Singh in phondoh na ananei ahi. Babysana thina toh kisai a kisem JAC in thuso mihotoj akihou limna uva Chief Minister pa toh akimu to na uva Chief Minister pa in case  CBI anga  pehlut ding ahi dan ana sei in ahi ati.

Alangkhat a Manipur police in Standard Robert Higher Secondary school a warden ni ana mandoh uvin ahi. Warden akiman teni chu Nongmaithem Jinnty (27), D/o N Joykumar,  Moirangkhong Sougaijam Leirak le Kamie Ileen (50) D/o (L) Kamei Kumar, Langthabal Chingthak akon ahi lhon in ahi.

Babysana thi thu a thutah kholdoh ding chule Standard Robarth Higher Secondary School a simlai sangli ho gelpeh dinga Langthabal Chingthak Women Society in aganna thei pen a boina suhlhap dinga ngehna anei uvin ahi.

Press club mun a Advisor, Langthabal Chingthak Women Society Numitlei Kabuini in thuso miho akihoupi na’a thilse kibolna jeh a vangsetna toh tamtah in thudih a thutanna amulou ahi. Hitobang a hi Standard Robarth chungchang thu jong kihelou lai ahi, tin aseiyin ahi. Civil society chom chom in thutah gangtah a kholdoh nadinga pan alah ahi, tin aseiyin chule Babysana thi alunghempina thu aseiyin ahi.

Chule school a kai simlai asang a sim hojong gelpeh dinga aseibe in ahi. Social media a thu kisei chom chom ho thu aseiyin, Internet hi mipi lunghanna ding a tilkhouna a manlou dinga aseiyin chule Chief Minister in thudih a na atoh a, thilsoh aganna thei pen a kholdoh nadinga pan alah ding’a ngehna aneibe in ahi.

Babysana thi thu a simlai hon ‘human chain’ sem; thutah kholdoh dia DESAM in thumna nei

Imphal July 25(ET): Kakwa leh Canchipur kimvel a um school chom chom a simlai hon Babysana thi thu a thutah kholdoh nading a National Highway 2 juiya ‘human chain’ asem uvin ahi.

Apunba Ireipakki Maheiroi Sinpang Lup (AIMS) lamkaina a ‘human chain’ asem u ahi’in, kiphinna abol nauva Imphal Public School, International School of Resources, Sofia High School, Dineshwori School chule Temple of Learning leh Paradise Academy school a kon simlai hojong apang uvin ahi.

Vice president, AIMS, Saikhom Premchand in Babysana thi thu a insung mite lunghempina thu aseiyin, hostel dormitory sunga thi a simlai nu chunga thudih a thutanna aumlou leh AIMS in kiphinna chom chom abol ding ahi, ati. Chule JAC in aphon tohgon jouse jong tosot dinga aseibe in ahi. Alangkhat a thilsoh toh kisaiya St. Patrick English School, Thangmeiband in Thangmeiband Meisnam Leikai mun a toumun kiphinna abol uvin ahi.

Democratic Students’ Alliance of Manipur (DESAM) in state sorkar chule mopohna nei authority hon Standard Robarth Higher Secondary school hostel a Ningthoujam Babysana athi dan thu gangtah a kholdoh dinga ngehna aneiyin ahi.

Sagolband Popular Upper Primary School mun a President, DESAM, Salam Aakash in thuso miho akimupi na’a, thilso kal kalkhat alhingtan, ahivang a thukholna machal lou ahi, ati. N Babysana thi thu a kisemdoh JAC tohgon ho tosot dinga DESAM in aseiyin, chule tosot jom dinga jong aseiyin ahi.

State sorkar in hiche thu a aanna thei pen a thutah akholding a chule school a kai simlai aja a sim in tu boina jeh a boina ato ho suhlhap ahi’a, school ache vah thei nadiu dinmun sempeh ding ahi, ati. Gamsung a simlai chapang cha cha in aumna hostel leh boarding mun a gimna chule gotna ato hohi thutah ahipon, simlai jouse ding gelna a state sorkar in pan alah ngai ahi, ati.

Gamsung a simlai kiloikhomna chom chom chule thingnoi kiloikhomna chom chom um ahi’in, mikhat vaipohna hilouva mijousen pan alahkhom a kipumkhatna aneiding hi DESAM in asei ahi’in, hiche jouteng society a thudih a natohna umding ahi, tin aseibe in ahi.

Drivers Association in July 30 a kon Imphal-Ukhrul lamlen a phat teplou bandh bol ding

Imphal, July 25(ET): Ching Tam Truck Drivers’ Association Manipur in July nisim 30 a kon Imphal-Ukhrul lamlen a phat teplou bandh akou uvin, vadung pam a nel leh song kikhot High Court in akha douna a kiphinna abol u ahi.

Sabungkhoh Khunjao Club, Imphal East district a toumun kiphinna abol uvin, niseh a neh ding kiholthu a natong ho ding gelna a nel leh song kikhot theilou dinga ‘ban’ kikoi alahdoh diuvin thumna anei uvin ahi. Hetthei khat chu Manipur High Court in dan phalna beiya gamsung vadung pam ho a nel chule song kikhotna leh adang dang bol loudinga ‘Ban’ akoi ahi’in, pollution sodoh na natoh jouse akha ahi.

Chief Justice Ramalingam Sudhakar leh Justice Kh Nobin, Manipur High Court in July 3 ni a hiche thu a thutanna anei ahi. Suo Moto PIL thu a court in hearing aneijou ahi. Dan dungjuiya licence ahilouleh lease nei hon bou nel chule song akhot thei dinga court in thutanna anei ahi. Deputy Commissioner, SP chule district jouse a forest officer hon dan dihlouva vadung pam a natohna aumlou nadinga aventup diuva jong Division bench in thutanna anei ahi.

Dan palkeh a aumleh dan dungjuiya athu kiseiding ahi, tin aseibe uvin ahi. Court in advocate A Mohendro leh Harichhaya ‘amicus curiae’ dinga alhendoh ahi’in, order phatah a chepi nadinga kithopina anei lhonding ahi. Tukum February lha a Thoubal vadung ventup nadinga Suo Moto PIL court in angailhah ahi’in, hiche jeh a vadung chunglang nasatah a boh ahi.

Thoubal River Conservation Committee (TRCC) in achesa kum ni tobang vadung venna dinga campaign abol jing ahi’in, district mihon phatah a atosot u ahi. Vadung to a nel ho JCB (excavator) a akhot uva, amun ma ma a asop jeh uva vadung ho boh gam ahitan, TRCC chule mipin ‘sand mafia’ (dan dihlouva nel a kivei) ho douna a kiphinna abol uva, bandh jong abol u ahi.

Serou a nel le song lah kha nalou dinga natong hon ngehna nei

Kakching, July 25(ET): Gamgung vadung ho akon song le nel lahding khana Manipur High court  in thupeh ana nei toh lhon a song le nel loh ho in genthei nale hahsat na ato jing utoh lhon in tuni in Kakching District sung Sugnu sung a um Seoru vadung a song le nel loh a pang ho in government ang a hiche thupeh kinei nung lah doh  ahi na dingin temna ana nei uvin ahi.

Tuni a hiche thu a Serou lhang mi ho in toumun kiphin le kihou khomna ana neina uva natoh angai bang a jom ahi na ding adei sah na  u phondoh na mipi in ana nei uvin ahi. Hiche natoh akon a mi tamtah in insung avetkol a achate school akai sah ahi toh lhon a ahunglhung ding ni 2 sunga song le nel lah na ding a natoh jom ahi na dinga government in phal na ahin peh ding uvin ngehna ana nei uvin ahi.

Nam sung’a kitha le kimat thilsoh ho KIM in phamosa; thilse bolho kidoudal ding ahi tia thuso nei

Imphal, July 25(ET): Kuki Inpi Manipur in tuni abahkhai kiloikhomna lamkai hotoh Kuki Inn mun a kihoukhomna ana nei uvin ahi. Kihoukhomna achun kilolna resolution no.2 mipi hetdingin phondoh na ana nei uvin ahi.

Kilolna mipi hetdinga a phondoh na ana neina uva inpi in  namsung le gamsung a kitha le kimat aum jing toh lhon a  Kukite jalhang kiloikhomna jousen sangtah a adeisah loudan phondoh na ana nei uvin ahi. Tunung tuban a nam sunga kitha le kimat aum leh jalhang iloikhomna hon doudalna sangtah kinei ding ahi dan hetsah na ahin nei uvin ahi.

Nam sunga sum le pai dei jeh a mi kiman a umjing toh lhon a koi hijong le sum le pai deijeh a mi man aum le ama ho matna ding le gotna peh na dinga jalhang kiloikhomna ho in pan alah joh diu dan jong tahlang na ana nei uvin ahi. Nam sunga mithat le mi man ho koima kihuh lou ding dan le achan dinga lom gotna achanna ding uva pan nasatah a KIM le abahkhai kiloikhomna ho in alah diu dan jong hetsah na ahin nei uvin ahi.

Student hon MHRC Office, Commission bulu, Jilkung lhahsapna chunga Edn Dept akon report ngeh

Imphal, July 25(ET): Jilkung lhahsapna jeh a Education kituptah Student hon amuthei lou nachung uva Commissioner aki kumlut ding deina a tunia chun Socialist Students’ Union of Manipur (SSUM) khopkhom na noiya Student a ja’a sim hon Lamphelpat munna Manipur Human Rights Commission ana bulu uve.

SSUM General Secretary Bhusan Longjam in thusoh miho kom’a aseina’a, Student in thina atojeh a Student body phabep in Standard Robert Higher Secondary School akha nato kisai suo-motto case chu Manipur Human Rights Commission in avelha in, School kha kiti hi Student ho dinga education right kisuhkeh pehna ahin hiche hi Dan in aphallou ahi ati.

Jilkung le infrastructure development lhahsapna jeh in school tamtah in student ho henga education kituptah apedoh theipoi.  Hichea Education kituptah peh theina dinga Rights Commission panlahna chunga pachatna akineiye. Hijeng jongleh, Commission in student dangho kana awgit ajahpeh poi. Commission in School themkhat bou phatchomna dinga pan alah’a ahile kisang theilou ding ahin, Commission in adang genthei na toh school ho jong ahetphah ngaidi ahi tin aseibei.

Akomuna achun, Lamlai government higher secondary school hin jilkung aneilhing joupon, Commission in school kana awgit hi ahetphah a aki kumlut angaiye. Hinla hiche school kana awgit  hepha louva Standard Robert Higher Secondary School dinga Commission in gelkhohna tah a nei hi vangset umtah ahi, tin aseiye.

SSUM lamkai in aseinaova government in jilkung asolpeh masang sea Student ho hil dinga private teacher hi kimangcha ding ahi ati.

Phatchom khat jouvin SSUM lamkai hon MHRC a Chairman, Khaidem Mani chu a Office chamber munna akimupiuve. School ho kana awgit ngailha dingleh suhlhap pehna dinga pan kila ding ahi tin Chairman pan Meeting achun lhamonna aneiye.

Chujongleh, Manipur Human Rights Commission in Lamlai Higher Secondary School munna jilkung lhahsapna to kimatna case ajihlut in chuleh August nisim 7 chan a report ahin pehlut na dingin Education Department henga thupeh aneiye. S. Yaima Meetei, President, SSUM akon complaint petition a kingam a Commission in hiche case hi ajihlut ahi.

Complaint bolpan a petition a chun agantheipen a Commission kikumlutna dingin ngehna aneiye.  Lamlai Higher Secondary School akon student jatsim tamtah ho Manipur Human Rights Commission office munna akijot uve.

 Commission in student ho liemna ana neiyin chule apohgih ho khoto tah in angailhah peh e.  Lamlai Higher Secondary School munna Class XI le XII ho hil ding jilkung khatcha umlouna chunga Commission in kidang asalheh e.  Student hon jong aseinaova class XI le XII class la dingin Jilkung thum amaho mimal tah in aki hire u ahidan asei uve. Hichan gei ahi vangin tuchan in jilkung khat jengcha jong aki solpeh hihlaiye tin student hon aseitha uve.

Student hoa kon aki ngailhah a chule complaint petition kimu dungjuiya, Commission in Section 12 of Protection of Human Rights Act, 1993 noiya MHRC Complaint Case ajihlut in chuleh Commissioner (Education), Government of Manipur henga notice jong athot e.

Kin le bong’a ngaikhoh ahito kilhon’a amu apat hapta kah ni sunga Commissioner (Education) in Complaint Petition ahin donbutna dingin  Commission registry bol chun thupeh aneiye.

Tunia proceeding le Complaint Petition jong Commissioner (Education), Government of Manipur henga August nisim 7,2019 kah ngeiya action alah theina dinga akithot ahi.

KNF PRO kitha UKLF leh Kangchup CSO hon demna nei

Imphal, July 25(ET): United Kuki Liberation in achesa July 22 nikho a Kangchup Chiru a Kangchup Area a KNF PRO anahi aumtalou Demkhohao Kipgen KNO/KRA hiding a ginmo hon akaplih demna sangtah anei uvin ahi.

Kiloikhomna in vangsetna toh insung mite chule anatohna organization alunghempina thu asei uvin ahi. T James, Joint Secretary, UKLF in soi akaina thuso a chun itidan a society sunga sopi chan khompi khat hitia kithat ham tin aseiyin ahi. Bible a sopi kitha to na Cain thusim hin Kuki te lungtup molso nading lampi ima asemdoh louding ahi, tin thuso chun aseibe in ahi.

Hiche masang tolthana thilsoh ho a themmona neiho chunga action kila le hitobang hi avel a soh louding ahi. Dan chunga koima umlou ahi’in, society a thudih a natohna umhen, ati. Chule boina akhohset louna dinga sorkar in themmona neiho chunga action khoutah alah dinga UKLF in ngehna aneibe in ahi.

Achesa July nisim 22 nilhah nidan 7:30 vella Kangchup Chiru area a Demkhohao Kipgen @ Haobem kithana chung’a Kangchup Area CSO hon alungkim lounao leh apohnatnao aphong uvin ahi.

Thulhut in aseibe na ah achesa kum phabep sunga ei le ei kikah’a kihet themto louna jeh’a kitha kimat ana umtan, hijehchun tunung tuban apat Kangchup Area sunga hitabang a ei le ei kikah a kitha kimat ahung umkit louna ding in Kangchup Area CSO hon tiemna le ngehna jong akineiye ati.

STC / BSF 113 Battalion in Kargil Vijay Diwas mang; CCpur akon Martyr 4 ho jana kipe

B.Lalboi Gangte

CCpur. July 25(ET): Subsidiary Training Centre (STC) BSF Munpi G. Mualkoi mun’a busa 113 Battalion STC / BSF in India leh Pakistan in Kargil War ananei phatsung’a India in goljo na ananei hetjing na ding’a kumseh leh Kargil Vijay Diwas anaman jing utoh lhon’a tunin jong anamang uvin ahi. Kingon chu VLK. Vaiphei, Deputy Commandant OC Bn. Hqtr 113 Bn. BSF in alamkai in chuleh hiche phatsung in 113 Bn BSF apat officer leh constable ho jouse in pan anala uvin ahi. India ading ahinkho anatoh doh CCpur District akipat Martyr ho innko hon jong pan anala cheh uvin ahi.

Kingon phatsung’a Dy. Commandant VLK Vaiphei in aseina’a India in Kargil War ah goljo na achan het jing na ding’a kingon hi kimang jing ahi in chuleh BSF atong India gam venbit na ding’a ahinkho ana pedoh Martyrs ho insung in Pension toh kisai in Die-in-harness toh kisai’a boina ato nao chun’a 113 Bn BSF in panpi na kipe jing ding ahi. Kargil War leh India huhbitna ding’a thina toh ho janan Minute 2 thep chet in aum uvin chuleh Constable Akang Konyak 113 Bn BSF in CCpur District sung’a BSF martyr  mi 4 ho thusim sim doh na aneiyin ahi. 113 Bn BSF in Martyr ho insung mite heng’a Memento peh naleh pon silpeh najong anei uvin ahi. Hiche toh lhon’a CCpur District sung’a akon BSF Martyr ho chu (L) Inspector T. Alex Lalminlun, (L) Constable S. Khamzagou, (L) Constable Lhunkhohao leh (L) Constable Koichung Athang Aimol ahi.

Mun chom chom a khamnathei tamtah kiman

Imphal, Jul. 25(UNA): Narcotics and Affairs of Border (NAB) in mun chom chom a khamna thei tamtah aman uvin ahi.

SP/NAB W Basu in Thursday nikho a thuso aneina’a, NAB team hon thuguh amu toh dungjuiya Kwakeithel Police Outpost kom, Tiddim lamlen, Imphal West a jingkah nidan 9.30 don a heroin powder gram 580 leh khamnathei po mikhat kiman ahi, ati. Akiman mipa hi M Thangsuanmung Zou (46), s/o Hangkhokam Zou, H/No 117, Zalenphai Part III, Moreh Ward No 2, Tengnoupal district a cheng ahi.

NAB team hon Krishna Premi Oil Pump Moirangkhom maiya kong Wednesday jan nidan 8.40 don a heroin powder gram 1.3 po a khamnathei a kivei khat aman uvin ahi. Akiman mipa hi Lhunginthang Haokip (23), s/o Paohao Haokip, S Chajang,

Motbung, Kangpokpi district a cheng ahi. Case teni NAB Police station a ajihlut uvin, thukholna apan tauvin ahi.

Alangkhat a Thoubal district police hon Thursday jingkah nidan 7 don a Lilong Haoreibi Turel Ahnabi, Kaleikhom lei kom a thuguh amu jeh uvin operation abol uvin, Spasmo Proxyvon Capsule chang 853 po a mikhat aman uvin ahi. Akiman mipa hi Md Mujibur Rahaman (38), s/o Md Salauddin, Lilong Haoreibi Turel Ahanbi a cheng ahi’in, louchang hi Md Mujibur Rahaman inmun a kon amat u ahi. Thilsoh toh kisaiya Lilong Police station a case ajihlut uvin, thukholna achelha in ahi.

TNAI JNIMS unit in kiphinna abol ladoh ta

Imphal, Jul. 25(UNA): Train Nurses’ Association of India, TNAI JNIMS unit in July 25 nikho a kon kiphinna vohhai dinga ‘general body meeting’ abol nauva kilol lhahna anei tauvin ahi.

President, JNIMS Society leh Manipur Chief Minister Biren in ama Bungalow mun a July 24 ni a kitepna anei jeh a TNAI JNIMS unit in kiphinna abol vohhai dinga kihoulhahna aneiyu ahi. TNAI JNIMS unit in thumna aneiho lhathum sunga chepi dinga president, JNIMS Society in association member ho, Principal Secretary (Finance) Director JNIMS, Deputy Director (Admin), Deputy Director (Finance) JNIMS, deputy Secretary (Health) chule Medical Superintendent, JNIMS umna a kitepna anei ahi.

TNAI JNIMS unit in JNIMS Society president leh Director in thumna anei hou ahetthem peh jeh uvin kipathu asei uvin ahi.

Standard Robarth school a anakai simlai dang dang injong hostel a hahsatna ato thu seiyu; Sanajaoba in sorkar thudohna nei

Imphal, July 25(ET): Sorkar in Standard Robarth School Canchipur a class VII simlai Ningthoujam Babysana thi thu a thudih kal khat alhin jouva jong akholdoh loujeh a mipi lunghanna asang cheh cheh in ahi.

Standard Robarth a anakai simlai khat in school hostel a aum laiya hahsatna chule gimna anathoh ho thu IT thuso miho henga aseiyin, ama tilouva simlai adang dang injong hostel a anaum lai uva atokhah thu seidinga thuso miho akijahmat pi be jing nahlaiyu ahi. School a anakai simlai hohin school hostel bol nadinga dan jouse school hostel in apalkeh ahi, tia aseiyu ahi.

Standard Robarth School a anakai simlai adang khat injong hostel a aum sunga hahsatna ato ho thu aseikit in, simlai masa nu banga aman jong koi ahi aseidoh loudiuvin ngehna aneiyin ahi. “Amasa a kisei ho hibou kato u ahipoi”, tin simlai nu in aseiyin, adang tamtah jong um ahi, ati. “Simlai khat adammo teng natna khohtah aneiye ti ahet jong ule akisei hi gelkhohna eineipeh louvu ahi”, tin aseiyin ahi. “Adamlou thu kasei teng uleh warden in adamlou simlai ho dinmun vettohna nei louva gamsa bang a eihouset joh uva chule nu-le-pa te jumna ding thu jong asei jiu ahi. Mingol kibol banga gimtah a eibol u ahi’in, ahivang a simlai nehthei ahilouleh thil pohpeh uhi phatah a abol u ahi, tin aseibe in ahi.

“Amaho toh kibangchet a fee kapeh u ahi’in, hitia eichombol uhi thil dihlou ahi. Thil mantam tam ahilouleh nehding thil pohpeh jeh uva bou keiho eichom bol uham”, tin simlai nu in thudohna aneiyin ahi. “School authority jeh a Babysana thi ahi tia ex-student hon kagel u ahi’in, Babysana thi thu a thutah kholdoh nadinga ima jouse kaseidoh diu, Babysana tobang a simlai adang in gimna ato kit kadei pouve, ati.

Alangkhat’a, sorkar in hiche thu akholdoh theilou jeh a mipi lunghanna asang cheh cheh in ahi. Manipur lei khanggui hi a Leishemba Sanajaoba in Facebook a thutah tuchan a akikhol loujeh thudoh aneiyin ahi. Babysana thi thu kholna ding hitih chan akhongai hi ichan geiya thunei hiu ham”, tin Sanajaoba in aseiyin chule sorkar in gamsung boina asan kah a thutah akholdoh ding a temna aneiyin ahi. Themmona anei ule hangsan tah a mipi henga ngaidam athum ngam u ngai ahi, tin Babysana insung mite lunghempina jong aneiyin ahi.