Thusoh chom chom

Thusoh chom chom

317
0
SHARE

Kangchup thilsoh KNF in KNO/KRA ngohna nei; PRO khat kitha lamchom chom in demna nei

Kangpokpi, Jul. 24(UNA): Kuki Political Talk a pang thingnoimi adang khat melsetah a akitha jouva Kuki nam lah a tulha sunga tolthana thilsoh umho lamchom chom in demna anei uvin ahi.

Kuki thingnoi kiloikhomna lah a aluipen Kuki National Front thingnoi hohi India sorkar chule Manipur sorkar toh kihouna kisem na a pang ahi’in, thingnoi khat achesa July 22 nikho a Moltam area, Kangpokpi district a akaplih u ahi. Vangsetna toh a Demkhohao @ Haobem, s/o Jangsei Kipgen hi Public Relation Officer  (PRO), KNF ahi’in, Kangchup Chingkhong leh Kangchup Chiru kah a jan nidan 7.30 don a akaplih u ahi.

Moreh a UKLF Moreh Town Commander John Gangte achesa July 13 ni a akaplih jouvu thilsoh ahi’in, KNF in Moltam kithana thu a tolthat a KNO/KRA ho ngohna aneiya chule alangkhat a Moreh tolthana thilsoh a UKLF in KNO/KNA ngohna anei ahi. Achesa July nisim 10 ni a jong Hengjang kho haosapu Letkhotinthang @ Thangneo Kipgen leh atupa Thangminlun Haokip jong Keihao leh Hengjang kho kikah Island (Phailengmol) a ana kaplih u ahi’in, police department in Phailengmol tolthana thilsoh toh kisaiya mithum akiman tai, tia aseiyu ahi.

Moltam thilsoh a Kuki National Front (KNF) in tolthat a KNO/KRA ho ngohna thu aseiya, mipi lungthim a chule New Keithelmanbi leh Kangchup gamkaiya um KNF thingnoi ho kichatna ding abol u ahi, tia ngohna aneiyu ahi. KRA in New Keithelmanbi hi lo tei dinga achesa kum ni val agot u ahitan, Saitu Assembly constituency a candidate tosot ding agot u ahi, tin ngohna aneibe uvin ahi.

KNO/KRA Chairman pa tu naicha NIA Court in Manipur Rifle Arm Kote a kon pistol kiholmo thu a bail a alhadoh u ahi, tin Lh Stephen, Information and Publicity Secretary, KNF in aseiyin ahi. Kuki society sunga tulha sunga tolthana aban ban a thumvei kijom a um ahitan, Hengjang kho haosapu leh atupa mel hetlou thalchoi hon akaplih jouva, John Gangte, Moreh Town Commander, UKLF ho KNO/KNA in akaplih kit a chule tu naicha Demkhohao @ Haobem, PRO, KNF hi KNO/KRA hon akaplih kit ahi, tin aseiyin chule KNO noiya um thalchoi kiloikhomna adeh’a KNA leh KRA hohin dan jana neilouva adeidei tha nading a ngamna hichan gei iti anei ham, tin thudoh aneiyin ahi.

Athi Demkhohao in adalhah ajinu leh achate kiloikhomna in alunghempi uvin chule Kuki movement chule KNF dinga pan alahna ho Kuki thusim a kigeldoh jing ding ahi, ati. Alangkhat a United Peoples Front (UPF) kiti India sorkar leh state sorkar toh kihouna (tripartite talk) sem a pang KUki thingnoi kiloikhomna khat in thilsoh ho demna anei uvin, sorkar in hiche thilsoh ho agelkhoh a chule tolthat ho chunga action kilomtah a gangtah a alah diuvin temna anei uvin ahi.

Thanglenlal Doungel, Information and Public Relations, UPF in thuso aneina a Kangchup Chiru kho, Kangpokpi district a achesa July 22 jan a KNO PRO Demkhohao Kipgen @ Haobem kitha ajah u kidang asah nau thu asei uvin ahi. Lhakhat sunga tolthana thilsoh tamtah um ho demna sangtah anei uvin chule chamna dinga imalam jouse a panlahna aum laitah chule kihouna achelhah jing laiya lungneo tah a hitobang thil kibol hohi apanna umlou ahi, tin aseiyun, themmona neiho chunga action lah dinga aseibe uvin ahi. Athipa insung mite chule tohkhompi KNF ho lunghempina akineiye, tin UPF thuso chun aseibe in ahi.

Demkhohao thina KNO/KRA toh akimat na aumpoi: T Simte

Kpi, July 24(ET): Achesa July nisim  22 nikho a Demkhaohao@Haobem Kipgen, N Boljang akon thina chunga KNO/KRA boina toh kisai ahi tia ngohna kinei na chunga tuni in kiloikhomna in thuso bul le bal neilou ahidan tahlang na ahin nei uvin ahi.

KNO/KRA Info. & Pub., secy. T. Simte akon thuso kimu chun aseina a Haobem kitha na chunga kiloikhomna in imacha hetphah le gelphah akinei pon ahi tin hetsah na ahin nei in ahi. KNO/KRA in kithana chunga demna sangtah akinei toh lhon in ngohna hin nei ho in agan na thei pen a suh chen na ahin nei ding uvin jong kiloikhomna in hetsah na ahin nei uvin ahi.

JCILPS in ILP movement noise na a natong khat gamsung a achen ding phal peh talou

Imphal, Jul. 24(UNA): Bihar gammi khat in JCILPS Manipur Co-convener ahouset a paocheng ngailou tah tah a ahou jouva gamsung a umthei loudinga asei tauvin ahi.

Mipa hi Sanjoy @ Bahadur (26), s/o Keilah Thakur, Purvi kho, East Champaran district, Bihar gam a kon ahi’in, tu-le-tu a Tera Sapam Leikai, Imphal khopi a RK Sanatombi Singh inmun a inn bahara a cheng ahi. JCILPS Convener Yumnamcha Dilipkumar in JCILPS office mun a Wednesday nikhon thuso miho akimupi in, Sanjoy @ Bahadur kiti gamdang mikhat in JCILPS co-convener Dollar ama mobile phone a kon phone abol a paocheng ngailou tah a jahmo tah a ahouset ahi, ati.

Sanjoy leh ajinu hi Tera Sapam Leirak a achesa kum 19 lhing um ahi’in, amahi barber hi a chule Tera Lukram Leirak a Hair Saloon ahon ahi. Phone a Sanjor leh JCILPS lamkai pa sangtah a kinel lhon ahi’in, telephone a akihouna lhon video hi social media a jong kithang a gamsung mihon adatmo ahi, ati. Thilsoh jouva JCILPS volunteer hon co-convener pa house a gamdang mipa ahol u ahi’in, mipa hi navel a volunteer ho ahin kinahpi kit jeh a ache hohin Hair Saloon asuhset u ahi. Mipa amat jou uva police khut a apehdoh u ahi.

Lock up a jan khat aum jouva JCILPS khut a Wednesday nikho a apehdoh kit u ahi’in, JCILPS office a thuso miho masang a apui uvin ahi. Gamdang mi tamtah hung kitol lut jing ho a kon gamsung mi dihtah ho huhna dinga sorkar in dan asem dinga thuma kinei ahi’in, JCILPS volunteer hon gamsung lutna Imphal-Dimapur NH leh Imphal-Jiribam NH check gate chom chom a gamdang mi dan dihlouva hunglut ho kholna anei jing ahi.

Imphal-Dimapur lamlen a kon hung ho Sekmai, Koirengei leh North AOC a akhol uva chule Imphal-Jiribam lampi a hung ho Jiri parking, Waheng leikai a akoiyu ahi. Kholna a JCILPS hon dan dihlou chule Adhaar card, labour card leh police verification chule adang dang beiya gamsung a hunglut  gamdang mi tamtah ahetdoh ahi. JCILPS natoh hi gamsung mi dihtah ho venna ding ahi’in, non-Manipuri ho douna ahiloule ‘anti-foreigner drive’ a gel ding ahipoi, tin Dilikumar in aseibe in ahi.

Gamsung a gamdang mi koima lutsah loudinga JCILPS in tohgon anei ahipon, document dihtah a hung ho phalna apeh ahi. Gamsunga hung gamdang mihon Aadhar crad, voter I card, Labour card (ami hi natong ahileh) chule police verification certificate ho anei ngai ahi. Gamdang mi gamsunga hunglut phabep in thilse/setna abol jeh a police verification certificate ngaicha ahi. Tu naicha gamsunga hunglut gamdang mikhat police hon amat ahi, tin jong aseiyin ahi.

Sanjay hin document apeh theilou jeh a gamsung a umsah loudinga JCILPS in thulhuhna anei ahi, tin Dilipkumar in aseiyin chule amahin gamsung hoilai mun hijong leh Labour card (authority in apeh) avetsah thei louleh sam tan na dukan ahon theilou ding ahi. All Manipur Barber Association injong membership apehlou ahi, ati. Sanjay hin ahungkon na Bihar gam a jong criminal record anei ahi’in, Tera a aumsunga jong vengsung miho toh kina jing ahi. Hiche ho jeh a gamsung a cheng dinga lom lou ahi, tin Dilipkumar in aseibe in ahi.

Kiphinna bol BJP MLA hon Manipur Governor heng’a memorandum pelut

Imphal, July 24(ET): Gamsung a um BJP MLA, achesa lha phabep masang a kon Chief Minister N Biren Singh khel dinga thumna neiya New Delhi khopi a camp bol hon Manipur Governor Dr Najma Heptulla heng a New Delhi khopi a memorandum apelut uvin ahi.

Dr Heptulla hi suty a aumpet ahi’in, tu-le-tua Governor in charge hi Governor Acharya in atuh ahi. Dr Najma Heptulla in ama Facebook page a kiphinna bol BJP MLA hotoh akilahna lim atahdoh in ahi. Thulhut dungjuiya kiphinna bol MLA hohin parliament session akichai teng Centre in Chief Minister akhel dinga kinepna anei nahlaiyu ahi.

Kpi district kiloikhomna hon district hospital a amollemsa employee khat hung ki transfer sah demna neiyu

Kangpokpi, Jul. 24(UNA): Kangpokpi district hospital mun a employee athias khat posting dinga ana kisol na chunga district sunga kiloikhomna jat chom chom in Kuki Inpi Kangpokpi makei na noi in demna ahin nei uvin ahi.

Lamminlun Singsit, General Secretary, Kuki Inpi Kangpokpi District akon thuso kimu chun asei na a nitin thuso phabep a state health service noi a employee khat District Hospital Kangpokpi mun a posting dinga hung kisol thei hi thil kidang tah ahi ati. Hitabang mitmo na nitin thuso Sangai Express in kholdoh na ahin nei uva mipi hetdinga tahdoh na ahin neina chung uva General Secretary pa in kipa thuphon ana nei in ahi. Inpi akon thuso kimu chun aseina a Health department in hitabang a suhkhel ananei toh lhon in leiset chunga athisa employee posting thah kipe a transfer kibol masa pen hina achang uvin chuleh Kangpokpi district employee thisa transfer kibol na masapen ahi sah utoh lhon Directorate of Health Services in Kangpokpi mite ang a ngaidam akithum u ngai ahi ati. Alangkhat a Kangpokpi Town Committee in State Health Department natoh demna anei utoh lhon in department in phatecha a ngaidam thumna anei lou le Kangpokpi mipiten lethu na anei ding ahi tin phondoh na ahin nei uvin ahi. Hetthei khat chu Kangpokpi district hospital authority in employee pa chu amollemsa ahi kal 1 lam jou lang a ahet bep u ahin, transfer hung kibol na lha khat lam alhin tah vangin tu chan in hetsah na le khel na ding ima cha hetsah na ahin nei hih lai uvin ahi tin KAngpokpi district hospital authority ho in hetsah na ahin nei uvin ahi.

Govt. fund alam louva mang’a kingoh T Panmei, IAS bail a kilahdoh

Imphal, July 24(ET): Tamenglong DC lui T Panmei, IAS in Government fund alam lou in amangchai ti’a ngohna anakineiya July 22 nia Vigilance leh Anti-Corruption Police hon anamat uchu District & Session Judge, Imphal west in anticipatory bail in tunin alhadoh tan ahi.

Hetthei khat chu amahin Kabo Leikai mun’a Tribal Boys Hostel sahna ding’a Government fund Dk. Lakh 99 alam louvin amangchai ti’a achung’a ngohna kineiya Imphal West Special Judge ang’a ana dinjouva Police ho khut’a um ding’a thu ana kitankhum ahi.